ក្រោយរកឃើញ អាមេរិកក៏បានឈានដល់ការប្រគល់ដួងព្រលឹងជាតិ ដែលគេឆ្លៀតឱកាសលួច តាំងពី «សម័យកាលនៃការបង្ហូរឈាម ឬរបបប្រល័យពូជសាសន៍នៅកម្ពុជា នាអំឡុងទសវត្សរ៍ឆ្នាំ១៩៧០ មកកាន់កម្ពុជាវិញជាបន្តបន្ទាប់។ នេះបើយោងតាមការចេញផ្សាយពីសារព័ត៌មាន CBS News ។

លោក Brad Gordon មេធាវីជនជាតិអាមេរិកដែលធ្វើការឲ្យរដ្ឋាភិបាលកម្ពុជា អស់ ១៤ ឆ្នាំ ក្នុងការតាមដានទ្រព្យ​សម្បត្តិ​សិល្បៈចម្លាក់​ដែលបានបាត់បង់ បាននាំក្រុមការងារទៅដល់ប្រាសាទមួយស្ថិតនៅចម្ងាយ ១០០ ម៉ាយល៍ (១៦០​គីឡូម៉ែត្រ) ស្ថិតនៅ​ភាគឦសាននៃប្រាសាទអង្គរវត្ត។ នៅទីធ្លាប្រាសាទដែលបាក់បែក ស្ទើរតែគ្មានអ្វីសល់ក្រៅពីជើងទម្រទទេរស្អាត ដែលរាយប៉ាយនៅចន្លោះដើមស្រឡៅ។

លោក Brad បានពន្យល់ថា «នៅពេលដែលក្រុមចោរមកដល់ទីតាំងបែបនេះ អ្វីដំបូងដែលពួកគេយកគឺព្រះ​សិរ​​ (ក្បាល) ព្រោះវាស្រួលកាន់ ហើយក្រោយមកទៀត ទើបពួកគេត្រឡប់មកយកដងខ្លួន។ ប៉ុន្តែ ពួកគេ​មិនសូវប្រយ័ត្នទេ ដូច្នេះទើបក្រុមចោរបានបន្សល់ទុកនូវបំណែកខ្លះៗ»។

លោក Brad បានហៅមេចោរជនជាតិអង់គ្លេសឈ្មោះ Douglas Latchford ថា ជា «ខួរក្បាលនៅពីក្រោយមហាចោរកម្មសិល្បៈដ៏ធំបំផុតនៅក្នុងប្រវត្តិសាស្ត្រ»។ Latchford រស់នៅក្នុងប្រទេសថៃ ជាពាណិជ្ជករអង់គ្លេសដ៏អាថ៌កំបាំងម្នាក់ ដែលបានចាប់ផ្តើមប្រមូលវត្ថុបុរាណនៅក្នុងទសវត្សរ៍ឆ្នាំ ១៩៦០។

លោក បានបង្ហាញខ្លួនឯងថា ជាអ្នកប្រាជ្ញ និងជាអ្នកការពារវប្បធម៌កម្ពុជា ដោយបានបរិច្ចាគរូបចម្លាក់ទៅឲ្យសារមន្ទីរ Metropolitan Museum of Art (The Met) នៅទីក្រុងញូវយ៉ក និងស្ថាប័នល្បីៗផ្សេងទៀត។ លោក ថែមទាំងបានបោះពុម្ភសៀវភៅចំនួន៣ក្បាលដែលបង្ហាញពីគំរូដ៏ល្អបំផុតនៃវត្ថុបុរាណខ្មែរ ដែលតាមពិតទៅ វត្ថុភាគច្រើនក្នុងនោះត្រូវបានលោកលួចមកសោះ។ លោក បានប្រើប្រាស់សៀវភៅទាំងនោះធ្វើជាកាតាឡុកលក់ទំនិញ ដើម្បីឲ្យអ្នកទិញជឿជាក់ថាវាជាវត្ថុ​បុរាណ​ស្របច្បាប់។

ក្រោយមក មេចោរ Latchford ត្រូវអាជ្ញាធរអាមេរិកចោទប្រកាន់ជាផ្លូវការនៅឆ្នាំ ២០១៩ ពីបទរត់ពន្ធ កុហកបោកប្រាស់ និងបទល្មើសផ្សេងទៀត ប៉ុន្តែ លោកបានស្លាប់មុនពេលតុលាការកាត់ទោស។ លោក Brad បានបញ្ចុះបញ្ចូលគ្រួសាររបស់ Latchford ឲ្យប្រគល់ការប្រមូលផ្ទាល់ខ្លួននៃវត្ថុបុរាណដែលបានលួចត្រឡប់មកវិញ រួមទាំងរូបសំណាកពីកោះកេរនៅឆ្នាំ ២០២១ ផងដែរ។ លោក Lion ដែលកំពុងទន់ខ្សោយដោយសារជំងឺមហារីក បានមកពិនិត្យរូបសំណាកនោះនៅសារមន្ទីរជាតិកម្ពុជាដើម្បីបញ្ជាក់ថា វាជាវត្ថុពិត មុនពេលលោកបានទទួលមរណភាពពីរបីខែក្រោយមក។​

ទោះបីជាមានការត្រឡប់មកវិញខ្លះក៏ដោយ វត្ថុបុរាណខ្មែរជាច្រើននៅតែត្រូវបានលាក់ទុកនៅក្នុងភូមិគ្រឹះរបស់​មហាសេដ្ឋី និងដាក់បង្ហាញនៅក្នុងសារមន្ទីរល្បីៗលើពិភពលោក។ សារមន្ទីរ The Met នៅញូវយ៉ក មានការប្រមូលវត្ថុបុរាណខ្មែរដ៏សំខាន់បំផុតមួយ ប៉ុន្តែ បំណែកល្អៗជាច្រើននៅក្នុងផ្នែកសិល្បៈអាស៊ីអាគ្នេយ៍ គឺជាវត្ថុដែលបានមកពីការលួចប្លន់ និងឆ្លងកាត់ដៃរបស់ Latchford ។

លោក Brad Gordon បាននិយាយថា មនុស្សភាគច្រើនដែលដើរកាត់សារមន្ទីរ The Met មិនបានដឹងថា ទាំងនោះជា «វត្ថុបុរាណបង្ហូរឈាម» ឡើយ ពួកគេមិនដឹងពីប្រវត្តិ និងមនុស្សដែលត្រូវស្លាប់ដើម្បីយកវាចេញមកនោះទេ។

ក្រៅពីសារមន្ទីរ វត្ថុបុរាណខ្មែរដ៏កម្រក៏ត្រូវបានរកឃើញនៅក្នុងភូមិគ្រឹះនៅកោះ Palm Beach របស់មហាសេដ្ឋីចុងក្រោយ លោក George Lindemann និងភរិយាផងដែរ ដែលពួកគេបានចំណាយប្រាក់ប្រហែល ២០ លានដុល្លារ ដើម្បីបង្កើតការប្រមូលនេះឡើង ដោយមានការជួយជ្រោមជ្រែងពី Latchford ។

លោកស្រី Andrea Bayer អនុប្រធានផ្នែកប្រមូល និងរដ្ឋបាលនៃសារមន្ទីរ The Met បានទទួលស្គាល់ថា កាលពីមុនសារមន្ទីរមិនបានត្រួតពិនិត្យប្រភពដើម​​​វត្ថុបុរាណ​ឲ្យ​បានម៉ឺងម៉ាត់គ្រប់គ្រាន់នោះទេ។ នៅចុងឆ្នាំ ២០២៣​ សារមន្ទីរ The Met បានប្រកាសប្រគល់វត្ថុបុរាណចំនួន ១៣ ដុំត្រឡប់មកវិញ បន្ទាប់ពីមានសម្ពាធ​ពីរដ្ឋ​អាជ្ញា។ ដូចគ្នានេះដែរ គ្រួសារមហាសេដ្ឋី Lindemann ក៏បានព្រមព្រៀងស្ម័គ្រចិត្តប្រគល់វត្ថុបុរាណចំនួន ៣៣ ដុំមកឲ្យកម្ពុជាវិញផងដែរ។

នៅក្នុងខែមិថុនា ឆ្នាំ ២០២៦ នេះ សារមន្ទីរ The Met បានប្រគល់វត្ថុបុរាណចំនួនពីរថែមទៀតមកឲ្យកម្ពុជា បន្ទាប់ពីមានការរឹបអូសដោយអង្គភាពជួញដូរវត្ថុបុរាណរបស់រដ្ឋ​អាជ្ញា នៅ​​​តំបន់ Manhattan។ ទោះជាយ៉ាងណាក៏ដោយ រដ្ឋាភិបាលកម្ពុជានៅតែបន្តទាមទារយ៉ាងម៉ឺងម៉ាត់ឲ្យមានការធ្វើមាតុភូមិនិវត្តន៍នៃវត្ថុបុរាណចំនួន ៣០ផ្សេងទៀត ដែលកំពុងស្ថិតក្នុងកណ្តាប់ដៃរបស់សារមន្ទីរ The Met នៅឡើយ។

រដ្ឋមន្ត្រីក្រសួងវប្បធម៌កម្ពុជា លោកស្រី ភឿង សកុណា បានសង្កត់ធ្ងន់​ទាំងអារម្មណ៍រំភើបថា ការបញ្ជូន​ត្រឡប់មកវិញនៃរូបសំណាក និងទេវរូបទាំងនេះ គឺប្រៀបដូចជា «ការទទួលបានមកវិញនូវព្រលឹងរបស់ជាតិ» មិនត្រឹមតែសម្រាប់លោកស្រី និងក្រុមគ្រួសារដែលបានបាត់បង់ក្នុងសង្គ្រាមនោះទេ ប៉ុន្តែគឺសម្រាប់ប្រជាជនកម្ពុជាទាំងមូលផងដែរ។

គួរបញ្ចាក់ដែរថា ក្នុងអំឡុងសង្គ្រាមស៊ីវិល វត្ថុបុរាណខ្មែររាប់ពាន់ដុំត្រូវបានលួចប្លន់ជាលក្ខណៈប្រព័ន្ធ ដោយមេខ្លោងជនជាតិអង់គ្លេស ឈ្មោះ Douglas Latchford ដែលប្រើប្រាស់រូបភាពជាអ្នកជំនាញបិទបាំងសកម្មភាព​ជួញ​ដូរ​​ឆ្លងដែន យកទៅលក់ឲ្យសារមន្ទីរខាន់ៗមួយចំនួននៅលើពិភពលោក និងមហាសេដ្ឋីបរទេស៕

ប្រែសម្រួល​អត្ថបទ ៖ សាង ស្រីល័ក្ខ

The post សារ​ព័ត៌មាន​អាមេរិក​ CBS ចុះ​ផ្សាយ​ពី​របៀប​ដែល បណ្តាញ​ចោរមាន​​មូលដ្ឋាន​នៅថៃ ​Latchford​​ លួច​​​វត្ថុបុរាណ​ខ្មែរ​ ​លក់​​​​ទៅឲ្យ​សារមន្ទីរអន្តរជាតិ និង មហាសេដ្ឋី​​ appeared first on Kampuchea Thmey Daily.

ចំពោះមុខតំណាងបេសកកម្មការទូត និងអង្គការអន្តរជាតិប្រចាំនៅភ្នំពេញចំនួន៤៤រូប លោកស្រី ភឿង សកុណា បានបញ្ជាក់ជាថ្មីនូវមូលដ្ឋានច្បាប់ចំពោះអធិបតេយ្យរបស់កម្ពុជាលើតំបន់វប្បធម៌ ដែលត្រូវបានកាន់កាប់ដោយកម្លាំងប្រដាប់អាវុធថៃ ចាប់តាំងពីខែធ្នូ ឆ្នាំ២០២៥ រួមមាន បណ្ដុំប្រាសាទតាមាន់ ប្រាសាទតាក្របី និងប្រាសាទខ្នារ។

លោកស្រី បានសង្កត់ធ្ងន់ថា សកម្មភាពរបស់ថៃនៅតំបន់បណ្តុំប្រាសាទតាមាន់ ប្រាសាទតាក្របី និងប្រាសាទខ្នារ ចាប់តាំងពីបទឈប់បាញ់ កន្លងមក គឺជាការទាមទារអធិបតេយ្យដោយខុសច្បាប់របស់ថៃ។

លោកស្រីរដ្ឋមន្ត្រី ក៏បានរៀបរាប់ប្រាប់ពីសកម្មភាពដែលប្រព្រឹត្តដោយភាគីថៃនៅតំបន់ប្រាសាទរបស់កម្ពុជា រាប់ទាំងការរៀបចំពិធីសាសនា ការទៅទស្សនាទីតាំងដោយគណៈរដ្ឋមន្ត្រីថៃ សកម្មភាពជួសជុលដោយគ្មានការអនុញ្ញាត ការដាក់បញ្ចូលប្រាសាទទាំងនោះទៅក្នុងបញ្ជីសារពើភណ្ឌបេតិកភណ្ឌជាតិរបស់ថៃ និងការសាងសង់សំណង់អចិន្ត្រៃយ៍ជាច្រើនទៀត ដូចជាការកសាងព្រះពុទ្ធបដិមាធំៗជាដើម។

បញ្ជាក់ទៅកាន់អង្គទូតបរទេស លោកស្រីថា កម្ពុជាបានដាក់កំណត់ទូតតវ៉ាជាច្រើន ហើយនឹងបន្តប្រឆាំងដាច់ខាតចំពោះសកម្មភាពខុសច្បាប់បែបនេះរបស់ថៃដែលប៉ុនប៉ងបង្កើតស្ថានភាពលើដីជាក់ស្តែង និងព្យាយាមជំរុញការទាមទារ ដែលពុំមានមូលដ្ឋានទាំងអង្គហេតុនិងអង្គច្បាប់ចំពោះបេតិកភណ្ឌវប្បធម៌ខ្មែរ។

បន្ថែមពីនេះ លោកស្រី ភឿង សកុណា ក៏បានគូសបញ្ជាក់ពីការបំផ្លិចបំផ្លាញយ៉ាងធំធេងចំពោះប្រាសាទព្រះវិហារ ដែលជាតំបន់បេតិកភណ្ឌពិភពលោកបានចុះបញ្ជីក្នុងអង្គការយូណេស្កូ ក៏ដូចជាចំពោះបូជនីយដ្ឋានវប្បធម៌ដទៃទៀតដែលមានតម្លៃលេចធ្លោជាសកលផងដែរ។

លោកស្រី បានអរគុណដល់តំណាងបេសកកម្មការទូត និងអង្គការអន្តរជាតិចំពោះការគាំទ្រជាបន្តបន្ទាប់ចំពោះការដោះស្រាយជម្លោះព្រំដែនកម្ពុជា-ថៃដោយសន្តិវិធី។ សម្រាប់កម្ពុជា លោកស្រី បញ្ជាក់ជាថ្មីនូវការប្តេជ្ញាចិត្តដ៏ខ្ជាប់ខ្ជួនក្នុងការដោះស្រាយវិវាទព្រំដែនជាមួយប្រទេសថៃ តាមរយៈមធ្យោបាយសន្តិវិធី អនុលោមតាមច្បាប់អន្តរជាតិ និងកិច្ចព្រមព្រៀងទ្វេភាគី។ លោកស្រី បញ្ជាក់បន្ថែមថា សន្តិភាពរវាងកម្ពុជា និងថៃ មានសារៈសំខាន់ សម្រាប់សុខដុមរមនា សាមគ្គីភាព និងវឌ្ឍនភាពរបស់អាស៊ាន និងតំបន់ទាំងមូល៕

The post រដ្ឋមន្ត្រីវប្បធម៌ប​ង្ហាញពីការកាន់កាប់ដោយខុសច្បាប់ពីយោធាថៃលើតំបន់ប្រាសាទរបស់កម្ពុជា ទៅកាន់អង្គទូតបរទេស appeared first on Kampuchea Thmey Daily.

កម្មវិធីបើកសម្ពោធមហោស្រពភាពយន្តជប៉ុននេះ បានធ្វើឡើង កាលពីរាត្រីថ្ងៃទី០៥ ខែធ្នូ ឆ្នាំ២០២៥ នៅរោងភាពយន្ត Major Cineplex by Smart នាផ្សារទំនើបអ៊ីអន១ ភ្នំពេញ ក្រោមវត្តមានលោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា នាយកមូលនិធិជប៉ុនការិយាល័យទំនាក់ទំនងភ្នំពេញ នាយករងមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) អ្នកសារព័ត៌មាន ព្រមទាំងភ្ញៀវកិត្តិយសជាច្រើនចូលរួមយ៉ាងកុះករ។

មហោស្រពភាពយន្តជប៉ុនឆ្នាំ ២០២៥ បាន​ពាំនាំ​យក​ខ្សែភាពយន្ត​របស់​ប្រទេស​ជប៉ុន​ជា​ច្រើនមកកាន់រោងកុននៅក្នុងប្រទេសកម្ពុជា។ ទន្ទឹមនឹងនេះ មហោស្រព​ក៏​បាន​នាំ​មក​នូវ​កម្មវិធី​ដ៏​ពិសេស​មួយ៖ Special Feature: A Mini Retrospective on Hirokazu Kore-eda’s Film ដែលនឹងមានការចូលរួមកិច្ចសន្ទនាអំពីភាពយន្ត (Film Talk) តាមអនឡាញពីសំណាក់ លោក Hirokazu Kore-eda អ្នកដឹកនាំខ្សែភាពយន្តដ៏ល្បីល្បាញប្រចាំប្រទេសជប៉ុន ព្រមទាំងអ្នកជំនាញភាពយន្តពីប្រទេស ជប៉ុនមួយចំនួន។

លើសពីនេះ កម្មវិធីក៏មានការចាក់បញ្ចាំងខ្សែភាពយន្តចំនួន ៣ របស់លោក Hirokazu Kore-eda សម្រាប់សាធារណជនទស្សនាដោយឥតគិតថ្លៃ។ កម្មវិធីនេះ ត្រូវបានរៀបចំឡើង​ដោយ​មានការសហការជាមួយលោក សូ ច័ន្ទតារា ផលិតករភាពយន្តពី KUDU Studios ដែលបានចូលរួមក្នុងកម្មវិធី ASEAN-Japan Film Programmers and Curators Project ដែលរៀបចំដោយមូលនិធិជប៉ុន (Japan Foundation) និងមហោស្រពភាពយន្ត អន្តរជាតិនៅទីក្រុងតូក្យូ (Tokyo International Film Festival) ឆ្នាំ ២០២៤។

ព្រឹត្តិការណ៍មហោស្រពភាពយន្តជប៉ុនឆ្នាំ ២០២៥ ត្រូវបានរៀបចំឡើង ដោយការិយាល័យទំនាក់ទំនងភ្នំពេញនៃមូលនិធិជប៉ុន ដែលមានការចូលរួមសហការ ពីសំណាក់ស្ថានទូតជប៉ុនប្រចាំកម្ពុជា ក្រសួងវប្បធម៌ និងវិចិត្រសិល្បៈ ព្រមទាំងមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)។ ចាប់តាំងពីឆ្នាំ ២០១៥ មហោស្រពភាពយន្តជប៉ុនបានប្រារព្ធឡើងជារៀងរាល់ឆ្នាំនៅកម្ពុជាក្នុងគោលបំណង ចែករំលែកវប្បធម៌រវាងប្រទេសកម្ពុជា និងជប៉ុនតាមរយៈវិស័យសិល្បៈ និងជាពិសេសឧស្សាហកម្មភាពយន្ត។

លោកស្រីបណ្ឌិតសភាចារ្យ ភឿង សកុណា បាន​មាន​ប្រសាសន៍ថា “ប្រទេស​កម្ពុជា និងជប៉ុនបានផ្សារភ្ជាប់ទំនាក់ទំនង និង​ទំនុកចិត្តរវាងគ្នាជាយូរអង្វែងមក​ហើយ ពិសេសក្នុងឆ្នាំនេះ ជាខួប​លើកទី៧២ នៃ​ការបង្កើតទំនាក់ទំនងការទូតរវាងគ្នា។ ប្រទេស​ទាំងពីរ បានខិតខំ​បន្ត​ពូនជ្រំ​បង្កើតនិងថែរក្សា ទំនាក់ទំនង​ដ៏ល្អ ប្រសើរ​ក្រោម “ភាព​ជាដៃ​គូ​យុទ្ធសាស្ត្រគ្រប់​ជ្រុងជ្រោយ តាម​រយៈការផ្លាស់ប្តូរទស្សនកិច្ចកម្រិតខ្ពស់ជាញឹកញាប់ និង​កិច្ចសហប្រតិបត្តិការដ៏រឹងមាំក្នុងវិស័យជាច្រើន។”

លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុន ប្រចាំព្រះរាជា​ណាចក្រកម្ពុជា បាន​បង្ហាញនូវ​ចំណាប់អារម្មណ៍​ចំពោះកម្មវិធី “ក្រោយ​ពីរីករាយ​នឹង​ទស្សនាភាពយន្ត យើងខ្ញុំសង្ឃឹមថា ប្រជាជនកម្ពុជានឹងបានឃើញនូវទិដ្ឋភាពចម្រុះនៃសង្គមនិងវប្បធម៌របស់ប្រទេសជប៉ុន តាមរយៈការ​ទស្សនា​ភាពយន្ត​ជា​ច្រើនប្រភេទ ហើយកាន់​តែចាប់អាម្មណ៍លើប្រទេសជប៉ុន។ ”មហោស្រពភាពយន្តជប៉ុនឆ្នាំនេះ ត្រូវ​បានសម្ពោធ​ជា​មួយ​នឹង​ការ​ចាក់​បញ្ចាំង​ខ្សែ​ភាពយន្ត Sunset Sunrise ដែលជាស្នាដៃដ៏ល្បីល្បាញប្រចាំឆ្នាំ ២០២៥។ ភាពយន្តនេះបានទទួលការគាំទ្រយ៉ាងខ្លាំងពីសំណាក់ទស្សនិកជន និងភ្ញៀវកិត្តិយសដែលបានចូលរួម ដោយសបញ្ជាក់ពីគុណភាពនៃវិស័យភាពយន្តជប៉ុននាពេលបច្ចុប្បន្ន។

គួរ​បញ្ជាក់​ផង​ដែរ​ថា មហោស្រពភាពយន្តជប៉ុនឆ្នាំ២០២៥ នឹងបន្តចាក់បញ្ចាំង​ខ្សែភាពយន្ត​របស់ប្រទេសជប៉ុនសរុបចំនួន១៩ រឿង ដែលមានប្រភេទផ្សេងៗគ្នាដូចជារឿងភាគ ភាពយន្តបែបប្រឌិត ភាពយន្តបែបអាថ៌កំបាំងនិងស៊ើបអង្កេត ភាពយន្តគំនូរជីវចល ភាពយន្ត​បែបកំប្លែង និងភាពយន្តបែបបុរាណជាដើម។ ការចាក់បញ្ចាំងខ្សែភាពយន្តទាំងអស់នេះ នឹងប្រព្រឹត្តិឡើងជារៀងរាល់ចុងសប្តាហ៍ចាប់ពីថ្ងៃទី០៦ ខែធ្នូ ដល់ ថ្ងៃទី១៤ ខែធ្នូ ឆ្នាំ ២០២៥ នៅតាមរោងភាពយន្តនានា ទូទាំងទីក្រុងភ្នំពេញ។សំបុត្រចូលទស្សនាត្រូវបានផ្តល់ជូន ដោយឥតគិតថ្លៃ សម្រាប់សាធារណជនទូទៅ ដោយអ្នក​ទស្សនាអាចទទួលបានសំបុត្រ​នៅទីតាំងចាក់​បញ្ចាំង​ខ្សែភាពយន្ត​ផ្ទាល់៕

ដោយ ៖ ស្រីរ័ត្ន

The post ខ្សែភាពយន្តជប៉ុន១៩រឿង នឹង​ត្រូវ​ចាក់​បញ្ចាំង​ទស្សនា​ឥតគិត​ថ្លៃ​ តាម​រោង​ភាព​យន្តខ្នាតធំៗរបស់​កម្ពុជា ចាប់ពីថ្ងៃទី ៦-១៤ ធ្នូ appeared first on Kampuchea Thmey Daily.

សូម​បញ្ជាក់​ថា សិស្សសាលា​មធ្យម​វិចិត្រ​សិល្បៈ បាន​រួម​គ្នា​សម្ដែង​ទស្សនីយភាព​សិល្បៈ ស្នាដៃ​សិស្ស ឆ្នាំ​សិក្សា ២០២៤-២០២៥ រួមមាន របាំ​បុរាណ របាំ​ប្រពៃណី សៀក និង​ល្ខោនខោល​ជាដើម ដើម្បី​ប្រមូល​ថវិកា​ជួយ​ឧបត្ថម្ភ​កងទ័ព​ជួរមុខ និង​ជនភៀសសឹក​នៅ​តំបន់​ជម្លោះព្រំដែន​កម្ពុជា​-​ថៃ៕

The post រដ្ឋមន្ត្រីក្រសួងវប្បធម៌ បានទទួលការចូលរួមឧបត្ថម្ភជំនួយសប្បុរសធម៌ពី អ្នកឧកញ៉ា សំអាង វឌ្ឍនៈ ក្នុងកម្មវិធីសិល្បៈសប្បុរសធម៌ ដើម្បីវីរកងទ័ព appeared first on Kampuchea Thmey Daily.

រដ្ឋមន្ត្រីវប្បធម៌កម្ពុជាលោកស្រី ភឿង សកុណា ថ្លែងបទអន្តរាគមន៍ដូច្នេះ ÷”ថ្ងៃនេះ យើងខ្ញុំសូមជម្រាបជូនគ្រប់សមាជិកគណៈកម្មាធិការទាំងអស់អំពីកង្វល់របស់កម្ពុជា ពាក់ព័ន្ធនឹង សំណង់ចម្លងដ៏ធំតាមគំរូប្រាសាទអង្គរ នៅក្នុងខេត្តបុរីរម្យ ព្រះរាជាណាចក្រថៃ ដោយមិនបានពិភាក្សា ជាមួយកម្ពុជា ហើយក៏មិនបានគោរពទៅដល់ក្រមសីលធម៌នៃតម្លៃវប្បធម៌របស់កម្ពុជានោះដែរ។ ការសាងសង់ នេះក៏បានប៉ះពាល់ផងដែរដល់ Integrity និង Authenticity និងតម្លៃលេចធ្លោជាសកល (OUV-Outstanding Universal Value) របស់រមណីយដ្ឋានអង្គរទាំងមូល។”

រដ្ឋមន្ត្រីក្រសួងវប្បធម៌កម្ពុជាបានប្រាប់ទៅកាន់ពិភពលោក ទៀតថា ទោះបីជាកម្ពុជាបានខិតខំព្យាយាមជាច្រើនលើកច្រើនសាក្នុងការជជែកជាមួយភាគីថៃ ក៏ការសាងសង់សំណង់ដែលដូចទៅនឹងប្រាសាទអង្គរវត្តរបស់កម្ពុជានៅតែ បន្តមិនបញ្ឈប់នោះទេ។

រដ្ឋមន្ត្រីវប្បធម៌កម្ពុជា ប្រាប់ពិភពលោកថាករណីសាងសង់ចម្លងតាមគំរូប្រាសាទអង្គរនេះ កំពុងបង្កជាសំណល់គំរូដ៏គ្រោះថ្នាក់បំផុតសម្រាប់គ្រប់ បេតិកភណ្ឌពិភពលោកទាំងអស់។

ទន្ទឹមនឹងក្ដីបារម្ភចំពោះគ្រោះថ្នាក់ដ៏ធ្ងន់ធ្ងរចំពោះសម្បត្តិដ៏ល្អឯករបស់កម្ពុជា លោកស្រី ភឿង សកុណា ស្នើសុំឱ្យមានវិធានការបន្ទាន់ដូច្នេះ÷”យើងខ្ញុំស្នើសុំអង្គការយូណេស្កូ ក៏ដូចជាស្ថាប័នពិគ្រោះយោបល់ទាំងអស់របស់អង្គការយូណេស្កូ សូមពិនិត្យជាទូទៅលើបញ្ហានេះ ជាមួយការយកចិត្តទុកដាក់ខ្ពស់។”

នៅក្នុងបទអន្តរាគមន៍ លោកស្រី ភឿង សកុណា រដ្ឋមន្ត្រីក្រសួងវប្បធម៌កម្ពុជា អរគុណយ៉ាងជ្រាលជ្រៅ ចំពោះការយកចិត្តទុកដាក់ជាប់មិនដាច់របស់ គណៈកម្មាធិការបេតិកភណ្ឌពិភពលោក ចំពោះកិច្ចការការពារបេតិកភណ្ឌពិភពលោក ជាពិសេសប្រាសាទ អង្គរវត្ត ដែលបានចុះក្នុងបញ្ជីបេតិកភណ្ឌពិភពលោក តាំងពីឆ្នាំ១៩៩២ ហើយក៏ជានិមិត្តរូបជាតិកម្ពុជាផងដែរ៕

ដោយ÷ ង៉ិល ណារ៉ាត់

The post រដ្ឋមន្ត្រីវប្បធម៌កម្ពុជា ប្រាប់ពិភពលោកថា ថៃលួចចម្លងប្រាសាទអង្គរវត្ត និងស្នើសុំយូណេស្កូ ពិនិត្យលើបញ្ហានេះ appeared first on Kampuchea Thmey Daily.

រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានថ្លែងក្នុងសន្និសីទសារព័ត៌មាននៃកិច្ចប្រជុំបច្ចេកទេសលើកទី៤០ របស់គណៈកម្មាធិការសម្របសម្រួលអន្តរជាតិ សម្រាប់កិច្ចការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ(អាយស៊ីស៊ីអង្គរ និងសំបូរព្រៃគុក) ដែលធ្វើឡើងនៅខេត្តសៀមរាប កាលពីរសៀលថ្ងៃទី២០ ខែមិថុនា ថាការងារជួសជុល ថែទាំ និងអភិរក្សប្រាសាទបុរាណនៅក្នុងតំបន់អង្គរខេត្តសៀមរាប គឺជាការងាររបស់ជាតិខ្មែរទាំងមូល។

លោកស្រី បញ្ជាក់ទៀតថា តម្លៃរបស់អង្គរមិនត្រឹមតែជាបេតិកភណ្ឌរបស់ជាតិខ្មែរប៉ុណ្ណោះទេ គឺជាសម្បត្តិបេតិកភណ្ឌរបស់មនុស្សជាតិនៅទូទាំងពិភពលោក។ លោកស្រីថា «បើទោះបីជាក្នុងរយៈពេល ៣០ឆ្នាំមកនេះ អាជ្ញាធរអប្សរាបានប្រឹងប្រែងជួយសង្គ្រោះប្រាសាទបុរាណជាច្រើនឱ្យរួចផុតពីហានិភ័យ រួចហើយក្តី ក៏នៅក្នុងរយៈពេល ១០ឆ្នាំទៅមុខទៀត អាជ្ញាធរជាតិអប្សរានៅតែបន្តជួយ សង្គ្រោះប្រាសាទបុរាណជាច្រើនថែមទៀត»។ ទស្សនៈវិស័យរបស់អាជ្ញាធរជាតិអប្សរា ក្នុងរយៈពេល១០ឆ្នាំទៅមុខទៀត ក្រៅតែពីបន្តជួយសង្គ្រោះប្រាសាទបុរាណ ក៏នឹងប្រឹងប្រែងបណ្ដុះបណ្ដាលកូនខ្មែរជំនាន់ក្រោយជាច្រើន ឱ្យចេះជំនាញជួសជុលនិងថែរក្សាប្រាសាទបុរាណជំនួសអ្នកជំនាញបរទេសផងដែរ។

អ្នកជំនាញ ADHOC សម្រាប់ការអភិរក្សបេតិកភណ្ឌ លោក Mounir Bouchenaki  បានលើកឡើងថា ក្នុងរយៈពេល៣០ឆ្នាំមកនេះ ក្រោមកិច្ចខិតខំប្រឹងប្រែងរបស់គណៈកម្មាធិការសម្របសម្រួលអន្តរជាតិ សម្រាប់កិច្ចការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ(អាយស៊ីស៊ីអង្គរ)ដែលមានជប៉ុននិងបារាំងជាសហប្រធាន ក្រៅតែពីបានជួយសង្គ្រោះប្រាសាទបុរាណជាច្រើននៅតំបន់អង្គរ ឱ្យរួចផុតពីគ្រោះថ្នាក់ និងលើកតម្លៃអង្គរឱ្យកាន់តែល្បីល្បាញ ក៏បានរួមគ្នាធ្វើធម្មនុញ្ញអង្គរដ៏វិសេសមួយ ដែលធ្វើឱ្យប្រទេសជាច្រើនបានយកគំរូតាម។

បន្ថែមលើនេះ ក្រៅពីការបណ្ដុះបណ្ដាលធនធានមនុស្សជំនាន់ថ្មីឱ្យមានជំនាញអភិរក្សបន្តវេន ក៏បានប្រមូលយកវត្ថុបុរាណ និងបដិមារពីបរទេស ឱ្យវិលត្រឡប់មកមាតុភូមិកំណើតជាបន្តបន្ទាប់ ធ្វើឱ្យកាន់តែមានភាពសម្បូរបែបឡើងវិញ   នៅក្នុងសារមន្ទីរនៃប្រទេស កម្ពុជាផងដែរ៕

ដោយ៖ គឿន វេត

The post អាជ្ញាធរជាតិអប្សរា នៅតែបន្តសង្រ្គោះប្រាសាទបុរាណជាច្រើនក្នុងតំបន់អង្គររយៈពេល ១០ឆ្នាំ ទៅមុខទៀត appeared first on Kampuchea Thmey Daily.

ថ្លែង​បិទ​សិក្ខាសាលា​អនាគត​គោលនយោបាយ​ឧស្សាហកម្ម វប្បធម៌ និង​ច្នៃ​ប្រតិដ្ឋ​កម្ពុជា កាលពី​រសៀល​ថ្ងៃទី​ ១១​ មិថុនា នៅ​សណ្ឋាគារ​ហៃ​យ៉ា​ត់​ភ្នំពេញ លោកស្រី​បណ្ឌិត​សភាចា​រ្យ ភឿង សកុណា រដ្ឋមន្ត្រី​ក្រសួង​វប្បធម៌ និង​វិចិត្រ​សិល្បៈ ​បានឱ្យដឹងថា​ «​បើ​និយាយ​ពី​វិស័យ​វប្បធម៌ រាជរដ្ឋាភិបាល តែងតែ​យកចិត្តទុកដាក់​ខ្ពស់​ជាប់​ជានិច្ច ព្រោះ​ជា​ដួង​ព្រលឹង​ ជា​អត្តសញ្ញាណ ជា​កិត្យានុភាព និង​ជា មោទនភាព​របស់​ជាតិ។ ជាពិសេស រាជរដ្ឋាភិបាល មានបំណង​ក្នុង​ការ​កែប្រែ​សក្ដានុពល​វប្បធម៌​ដែល​មាន​ស្រាប់ បូករួម​ជាមួយ​យុទ្ធសាស្ត្រ អភិវឌ្ឍន៍ ឧស្សាហកម្ម​វប្បធម៌ និង​ច្នៃ​ប្រតិដ្ឋ​ថ្មីៗ ដើម្បី​លើក​កម្ពស់​ការ​អភិវឌ្ឍ សេដ្ឋកិច្ច ប្រកបដោយ​ចីរភាព ស្រប​ទៅ​តាម​បរិបទ នៃ​ការ​អភិវឌ្ឍ​វប្បធម៌​នៅ​ក្នុង​តំបន់ និង​ពិភពលោក​»។

លោកស្រី​រដ្ឋមន្ត្រី បាន​បន្តថា ហេតុនេះ ការរៀបចំសិក្ខាសាលា​នេះ គឺជា​ការឆ្លើយតប​ទៅនឹង​គោលដៅ​អភិវឌ្ឍន៍​ជាតិ​ផង និង​ចូលរួម​ផ្សព្វផ្សាយឱ្យមានការយល់ដឹងកាន់តែ​ទូលំទូលាយ និង​កាន់តែ​ប្រសើរ​អំពី​ឧស្សាហកម្ម​វប្បធម៌ និង​ច្នៃប្រតិដ្ឋ​ផង​ ដើម្បី​ធ្វើយ៉ាងណាឱ្យ​វិស័យ​ឯកជន និង​រដ្ឋ បាន​យល់ដឹង ហើយ​ចូលរួម​លើកស្ទួយ​ទិសដៅសម្រាប់​ការអភិវឌ្ឍ​វិស័យនេះឱ្យសមស្រប​ទៅ​នឹង​គោលនយោបាយ​វប្បធម៌ជាតិ​នៅ​កម្ពុជា។

លោកស្រី​រដ្ឋមន្ត្រី បាន​បន្តទៀតថា ឧស្សាហកម្ម​វប្បធម៌ និង​ច្នៃ​ប្រតិដ្ឋ ជា​វិស័យ​ថ្មី​មួយ​មែន តែ​មាន​ការ​រីកចម្រើន​ជាងគេ​ក្នុង​ពិភពលោក។ វិស័យនេះ អាចជួយ​ឱ្យសេដ្ឋកិច្ច​រីកចម្រើនតាមរយៈ​ផលិត​ផល និង សេវាកម្ម​វប្បធម៌។

ជាក់ស្ដែង​បើ​តាម​របាយការណ៍​របស់ យូណេស្កូ ឆ្នាំ ២០២២ ស្ដីពី «រៀបចំ និង​កែសម្រួល​គោល​នយោបាយ​វប្បធម៌ ជំរុញ​ការ​ច្នៃ​ប្រតិដ្ឋ ដើម្បី​ការ​អភិវឌ្ឍ​» ក៏បាន​បញ្ជាក់​ដែរ​ថា វិស័យ​ឧស្សាហកម្ម វប្បធម៌ និង​ការ​ច្នៃ​ប្រតិដ្ឋ​ បាន​ចូលរួម​ចំណែក​ដល់​ផលិតផល​ក្នុងស្រុក សរុប​ចំនួន ៣.១% និង​អត្រា​អ្នក​ធ្វើការ​ក្នុង​វិស័យ​នេះ​មាន​ចំនួន ៦.២% ហើយ​ផ្នែក​នាំចេញ ផលិតផល​វប្បធម៌ និង​សេវា ​បាន​កើន​ឡើង​ទ្វេដង បើ​ប្រៀបធៀប​ពី​ឆ្នាំ​ ២០០៥ រហូតដល់​ឆ្នាំ ២០១៩ ដោយ​គិត​ជា​ទឹកប្រាក់​មាន​ចំនួន​សរុប ៣៨៩.១ ប៊ី​លាន​ដុល្លារ​សហរដ្ឋអាមេរិក។

លោកស្រី​រដ្ឋមន្ត្រី បាន​បញ្ជាក់​ថា «យើង​ឃើញថា យើង​អាច​ទាញ​ផលប្រយោជន៍​បាន​យ៉ាង​ច្រើន​ឥត​គណនា​ពី​វិស័យ​វប្បធម៌ ព្រោះ​វិស័យនេះជា​ប្រភព​មិនចេះ​រីងស្ងួត​ក្នុងការ​អភិវឌ្ឍ​សេដ្ឋកិច្ចជាតិ​ប្រកប​ដោយ​ចីរភាព​។ ហេតុដូច្នេះ មិន​ថា​ រដ្ឋ ឬ​ឯកជន សុទ្ធតែ​អាច​ចូលរួម​ចំណែក​លើកស្ទួយ​កំណើន​សេដ្ឋកិច្ច​ជាតិ និង​បង្កើន​ចំណូល​ជូន​ប្រជាជន​តាមរយៈ​ការ​ច្នៃ​ប្រតិដ្ឋ​វប្បធម៌​»។

លោកស្រី​រដ្ឋមន្ត្រី លើក​ឡើង​ទៀត​ថា សិក្ខាសាលា​អនាគត​គោលនយោបាយ​ឧស្សាហកម្ម​វប្បធម៌ និង​ច្នៃ​ប្រតិដ្ឋ​កម្ពុជា គឺមានសារៈសំខាន់​ណាស់សម្រាប់​ការអភិវឌ្ឍប្រទេសជាតិ ជាពិសេស​ខ្មែរ​ដែល​ជា​ជាតិ​ដែល​សំបូរ​ទៅ​ដោយ​មត៌ក វប្បធម៌ រូបី និង​អរូបី ដែល​ជា​ទី​ចាប់អារម្មណ៍​របស់​មនុស្ស​ទូទាំង​សកលលោក។

លោកស្រី​រដ្ឋមន្ត្រី បញ្ជាក់​បន្ថែម​ទៀត​ថា សិក្ខាសាលា​នាពេលនេះ​ នឹង​នាំ​យើង​ងាក​មក​ចាប់អារម្មណ៍​កាន់តែខ្លាំង និង​គិតគូរ យកមក​ពិចារណា​បន្ថែមទៀត ដើម្បី​ផ្សព្វផ្សាយ​បន្ត និង​ធ្វើយ៉ាងណាឱ្យ​វិស័យ​វប្បធម៌​ក្លាយជា​វិស័យ​ធំ​មួយក្នុងការ​ចូលរួមចំណែក​អភិវឌ្ឍន៍​សេដ្ឋកិច្ច​ប្រកបដោយ​ចីរភាព​តាមរយៈ​ការ​បង្កើត​សេវា និង​ផលិតផល​វប្បធម៌​ថ្មីៗ ប្រកបដោយ​ភាព​ច្នៃ​ប្រតិដ្ឋ។ ដូចនេះ​យើង​ត្រូវ​ប្រឹងប្រែង​រួមគ្នា​ក្នុង​ស្មារតី​លើកស្ទួយ​តម្លៃ​វប្បធម៌ ការពារ លើក​តម្កើង​កេរដំណែល​វប្បធម៌​ជាតិ ពង្រឹង​សក្ដានុពល​វប្បធម៌ ផ្សព្វផ្សាយ​អំពី​ផលិតផល​វប្បធម៌​ដ៏​សម្បូរបែប ដើម្បី​រួមចំណែក​អភិវឌ្ឍន៍​សេដ្ឋកិច្ច​សង្គមជាតិ​យើង និង​ដើម្បី​សម្រេច​ចក្ខុវិស័យ​រាជរដ្ឋាភិបាល ដែល​ប្រទេស​កម្ពុជា នឹង​ក្លាយ​ជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ ២០៣០ និង​ជា​ប្រទេស​មាន​ចំណូល​ខ្ពស់​នៅ​ឆ្នាំ ២០៥០ គឺ សម្រេច​គោលដៅ​អភិវឌ្ឍន៍​ប្រកប​ដោយ​ចីរភាព៕

អត្ថបទ ៖ សំអឿន

The post រាជរដ្ឋាភិបាល ចាត់ទុកវិស័យវប្បធម៌រួមចំណែកយ៉ាងសំខាន់ក្នុងការ លើកកម្ពស់ការអភិវឌ្ឍសេដ្ឋកិច្ចប្រកបដោយចីរភាព appeared first on Kampuchea Thmey Daily.

ការលើកឡើងនេះ ធ្វើឡើងនាល្ងាចថ្ងៃទី២១ ខែមីនា ឆ្នាំ២០២៥ ក្នុងឱកាសសម្ពោធមហោស្រពភាពយន្តអន្តរជាតិកម្ពុជា លើកទី១៤ ដោយមានការចូលរួមពីអ្នកសិល្បៈ ផលិតករ ជាច្រើនរូប។ មហោស្រពនឹងរៀបចំចាប់ពីថ្ងៃទី២១ ដល់ថ្ងៃទី២៩ ខែមីនា ឆ្នាំ២០២៥ មានភាពយន្តចំនួន១៥១រឿង មកពីបណ្តាប្រទេសផ្សេងចំនួន៤១ប្រទេស ក្នុងនោះ កម្ពុជា មានភាពយន្តចំនួន ៦០រឿង។ ចំពោះភាពយន្តទាំង១៥១រឿង មានទាំងប្រភេទរឿងប្រតិដ្ឋកម្ពុជា រឿងប្រតិដ្ឋអន្តរជាតិ រឿងរ៉ាវជុំវិញពិភពលោក ពិភពគួរឱ្យខ្លាចខ្នាតខ្លី ភាពយន្តឯកសារ ជាដើម។ ចំណែកការចួលទស្សនាគឺមិនគិតប្រាក់ឡើយ ដែលធ្វើនៅតាមបណ្តារោងភាពយន្ត និងសណ្ឋាគារ មហោស្រពចំនួន១០ទីតាំងនៅកម្ពុជា។

ក្នុងពិធីសម្ពោធ លោកស្រី ភឿង សកុណា មានប្រសាសន៍ថា៖ “មហោស្រពភាពយន្តអន្តរជាតិកម្ពុជា គឺជាកន្លែងជួបជុំសម្រាប់ការផ្លាស់គំនិតយោបល់ ដែលផលិតករភាពយន្តទាំងអស់អាចសិក្សាស្វែងយល់ និងចែករំលែកបទពិសោធ ហើយក៏ជាវេទិកាបើកជើងមេឃដល់យុវជនកម្ពុជាយើង ដើម្បីស្វែងយល់ពីប្រភពខាងក្រៅ ទាំងសង្គម និងវប្បធម៌ តាមរយៈភាពសម្បូរបែបនៃស្នាដៃភាពយន្តរបស់ប្រទេសនានា ដែលបានយកមកចាក់បញ្ចាំងក្នុងមហោស្រពនេះ”។

ចំពោះលោក Cedric Eloy ប្រធានមហោស្រព មហោស្រពភាពយន្តអន្តរជាតិកម្ពុជា (CIFF) បានបញ្ជាក់ថា មហោស្រពឆ្នាំនេះ ជាស្ពានរវាងកម្ពុជា និងសហគមន៍ជនភៀសខ្លួនខ្មែរសម្រាប់ការភ្ជាប់ទំនាក់ទំនងឡើងវិញ។ លោកបន្តថា ចំណុចពិសេស ឆ្នាំនេះ គឺស្នាដៃ ជីវិតកូនថ្លៃ កូនត្រូវតែរស់ ដែលជាបទពិសោធពិភពនិម្មិត ជាជីវិតពិតរបស់លោក ពិន យ៉ាថៃ អ្នកដែលរស់រានមានជីវិតពីរបបខ្មែរក្រហម។

មហោស្រពឆ្នាំនេះ រដ្ឋមន្ត្រីក្រសួងវប្បធម៌ ជឿជាក់ថា នឹងទទួលបានជោគជ័យត្រចះត្រចង់ ព្រមទាំងក្លាយជាព្រឹត្តិការណ៍ដ៏សំខាន់មួយក្នុងវិស័យភាពយន្តកម្ពុជា។

សូមជម្រាបថា មហោស្រពភាពយន្តអន្តរជាតិកម្ពុជា លើកទី១៤ នឹងមានចាក់បញ្ចាំងភាពយន្តឥតគិតថ្លៃ មាននៅរោងភាពយន្ត Legend (Exchange Square, Olympia), រោងភាពយន្ត Major Cineplex (AEON Mall 1, AEON Mall 3), រោងភាពយន្តFable សណ្ឋាគារ Rosewood វិទ្យាស្ថានបារាំង មជ្ឈមណ្ឌលសហប្រតិបត្តិការកម្ពុជា-ជប៉ុន STP Gallery និង Cine Hub។ ចំពោះសំបុត្រគឺមិនគិតថ្លៃឡើយ ហើយទស្សនិកជនអាចទទួលសំបុត្រ មុនភាពយន្តចាក់បញ្ចាំងមួយម៉ោង៕

ដោយ៖ អុន ស្រីមាន

The post រដ្ឋមន្ត្រីវប្បធម៌៖ មហោស្រពភាពយន្តអន្តរជាតិកម្ពុជា ធ្វើឱ្យភាពយន្តកម្ពុជាកាន់តែរីកចម្រើន appeared first on Kampuchea Thmey Daily.