លោក កែវ រ៉េមី Archives - Kampuchea Thmey Daily

លោក កែវ រ៉េមី៖ UPR ជាយន្តការតែមួយគត់របស់ ក្រុមប្រឹក្សាសិទ្ធិមនុស្សអង្គការសហប្រជាជាតិ ផ្តល់ឱកាសឱ្យរដ្ឋសមាជិកផ្លាស់ប្តូរយោបល់គ្នាលើបញ្ហាសិទ្ធិមនុស្ស

Thoeun Vansong — Thu, 28 May 2026 04:16:11 +0000

ប្រធានគណៈកម្មាធិការសិទ្ធិមនុស្សកម្ពុជា ទេសរដ្ឋមន្ត្រី កែវ រ៉េមី លើកឡើងថា យន្ដការពិនិត្យឡើងវិញជាសកលតាមកាលកំណត់ (UPR) គឺជាយន្តការដ៏សំខាន់តែមួយគត់របស់ក្រុមប្រឹក្សាសិទ្ធិមនុស្សអង្គការសហប្រជាជាតិ ដែលផ្តល់ឱកាសឱ្យប្រទេសសមាជិកទាំងអស់ ចែករំលែកនូវឧត្តមានុវត្តន៍ និងផ្លាស់ប្តូរយោបល់គ្នាទៅវិញទៅមកលើវិស័យសិទ្ធិមនុស្ស។

លោក កែវ រ៉េមី បានលើកឡើងយ៉ាងដូច្នេះកាលពីព្រឹកថ្ងៃទី២៧ ខែឧសភា ឆ្នាំ២០២៦ ក្នុងសិក្ខាសាលាផ្សព្វផ្សាយរបាយការណ៍ជាតិ ស្តីពីយន្តការពិនិត្យឡើងវិញជាសកលតាមកាលកំណត់ (UPR) ក្រោមកិច្ចសហការរវាងគណៈកម្មាធិការសិទ្ធិមនុស្សកម្ពុជា និងរដ្ឋបាលខេត្តបន្ទាយមានជ័យ។

លោកទេសរដ្ឋមន្ត្រី បន្ថែមថា ប្រទេសកម្ពុជាបានចូលរួមយ៉ាងសកម្មក្នុងយន្ដការនេះចំនួនបួនជុំរួចមកហើយ ដែលជាក់ស្ដែងសម្រាប់ជុំទីបួន មានប្រទេសសមាជិកអង្គការសហប្រជាជាតិចំនួន១០០ បានចូលរួមផ្តល់អនុសាសន៍លើករបាយការណ៍ជាតិរបស់កម្ពុជាសរុបចំនួន២៧៥អនុសាសន៍ ដែលអនុសាសន៍ភាគច្រើនជាការកោតសរសើរ លើកទឹកចិត្ត និងជំរុញឱ្យកម្ពុជាបន្តអនុវត្តកម្មវិធីគោលនយោបាយ និងផែនការយុទ្ធសាស្រ្តផ្សេងៗបន្តទៀតសំដៅពង្រឹងវឌ្ឍនភាពលើគ្រប់វិស័យ។

ការណ៍នេះ លោក ថា បានឆ្លុះបញ្ចាំងពីការទទួលស្គាល់នូវកិច្ចខិតខំប្រឹងប្រែង និងការដាក់ចេញនូវចក្ខុវិស័យដ៏ត្រឹមត្រូវរបស់រាជរដ្ឋាភិបាលកម្ពុជា តាំងពីអតីតកាល ដឹកនាំរបស់សម្តេចតេជោ ហ៊ុន សែន រហូតដល់បច្ចុប្បន្នក្រោមការដឹកនាំរបស់សម្តេចធិបតី ហ៊ុន ម៉ាណែត ក្នុងការលើកកម្ពស់ និងការការពារសិទ្ធិមនុស្សរបស់ប្រជាជនទូទៅ ស្របតាមច្បាប់ និងលិខិតតុបករណ៍សិទ្ធិមនុស្សអន្តរជាតិ រួមទាំងបរិបទជាក់ស្ដែងនៃសង្គមកម្ពុជា។

ពាក់ព័ន្ធនឹងបញ្ហាព្រំដែនកម្ពុជា-ថៃ លោកទេសរដ្ឋមន្រ្តី កែវ រ៉េមី បានបញ្ជាក់ថា គណៈកម្មាធិការសិទ្ធិមនុស្សកម្ពុជា បានចូលរួមយ៉ាងសកម្មជាមួយរាជរដ្ឋាភិបាលក្នុងការការពារបូរណភាពទឹកដី និងសិទ្ធិសេរីភាពរបស់ប្រជាជនកម្ពុជា តាមរយៈការចេញញត្តិថ្កោលទោស និងដាក់ពាក្យបណ្តឹងទៅកាន់យន្តការសិទ្ធិមនុស្សតំបន់ និងអន្តរជាតិចំនួន៦០ច្បាប់ ព្រមទាំងការបំពេញបេសកកម្មសិទ្ធិមនុស្សនៅក្រុមប្រឹក្សាសិទ្ធិមនុស្សអង្គការសហប្រជាជាតិ នាទីក្រុងហ្សឺណែវ និងការចុះសួរសុខទុក្ខកងទ័ព និងជនភៀសសឹកចំនួន១០លើកផងដែរ។

លោក ក៏បានសម្ដែងការកោតសរសើរ និងវាយតម្លៃចំពោះកិច្ចខិតខំប្រឹងប្រែង និងយកចិត្តទុកដាក់ក្នុងការការពារ ព្រមទាំងដោះស្រាយបញ្ហាប្រឈមនានាជូនប្រជាពលរដ្ឋរងគ្រោះយ៉ាងមានប្រសិទ្ធភាព ក្នុងអំឡុងពេលឈ្លានពានរបស់ថៃទាំងពីរលើក រហូតមកដល់បច្ចុប្បន្ន។

លោក បានថ្លែងអំណរគុណចំពោះកិច្ចសហការរបស់រដ្ឋបាលខេត្ត ក្នុងការផ្សព្វផ្សាយរបាយការណ៍ UPR នាពេលនេះ ដែលបង្ហាញពីការយកចិត្តទុកដាក់ និងជាការរួមចំណែកក្នុងការបំពេញកាតព្វកិច្ចក្រោមច្បាប់ និងយន្ដការសិទ្ធិមនុស្សអន្តរជាតិជាមួយរដ្ឋាភិបាលក្នុងការអនុវត្តអនុសាសន៍ទាំងថ្នាក់ជាតិ និងថ្នាក់ក្រោមជាតិ ដើម្បីកិត្យានុភាពជាតិនៅឆាកតំបន់និងអន្តរជាតិ ក៏ដូចជាឧត្តមប្រយោជន៍របស់ប្រជាជនខ្មែរទូទៅផងដែរ៕ ដោយអ ពៅ

The post លោក កែវ រ៉េមី៖ UPR ជាយន្តការតែមួយគត់របស់ ក្រុមប្រឹក្សាសិទ្ធិមនុស្សអង្គការសហប្រជាជាតិ ផ្តល់ឱកាសឱ្យរដ្ឋសមាជិកផ្លាស់ប្តូរយោបល់គ្នាលើបញ្ហាសិទ្ធិមនុស្ស appeared first on Kampuchea Thmey Daily.

លោក កែវ រ៉េមី ស្នើឱ្យ WSJ សុំទោសកម្ពុជាចំពោះការប្រើប្រាស់ពាក្យ Scambodia លើចំណងជើងអត្ថបទរបស់ខ្លួន

hun sirivadh — Wed, 22 Apr 2026 07:35:01 +0000

ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី បានផ្ញើលិខិតមួយច្បាប់ទៅកាន់សារព័ត៌មាន The Wall Street ស្នើឱ្យសារព័ត៌មាននេះកែតម្រូវ និងសុំទោសជាផ្លូវការចំពោះការប្រើប្រាស់ចំណងជើងដែលហៅកម្ពុជាថាជា Scambodia ។

ក្នុងលិខិតដែលផ្ញើទៅនិពន្ធនាយក WSJ លោកស្រី Emma Tucker ថ្ងៃទី២២ ខែមេសា ឆ្នាំ២០២៦នេះលោក កែវ រ៉េមី បានបញ្ជាក់ថា ការប្រើប្រាស់ពាក្យ Scambodia ដើម្បីសំដៅលើប្រទេសកម្ពុជានោះគឺជាការធ្វើឱ្យខូចកេរ្តិ៍ឈ្មោះ និងបង្កឱ្យមានការប៉ះពាល់ផ្លូវចិត្ត វាយតម្លៃលើរដ្ឋអធិបតេយ្យមួយទៅជាប្រភពនៃឧក្រិដ្ឋកម្ម បង្កឱ្យមានការស្អប់ខ្ពើម និងរើសអើងប្រឆាំងនឹងប្រជាជន។ ក្នុងលិខិតនោះក៏បានបង្ហាញនូវក្ដីបារម្ភផងដែរដល់ផលប៉ះពាល់លើសិទ្ធិមនុស្សដែល WSJ ហាក់បីដូចជាបំពាក់ស្លាកលើប្រជាជាតិខ្មែរទាំងអស់ឱ្យខូចសេចក្ដីថ្លៃថ្នូរ និងបំផ្លាញដល់កេរ្តិ៍ឈ្មោះរបស់ប្រជាជនដែលជាសមាសធាតុសំខាន់នៃគោលការណ៍សិទ្ធិមនុស្សដែលអន្តរជាតិទទួលស្គាល់។

ក្នុងលិខិតបានសរសេរថា៖ «ការរាយការណ៍ដែលមានទំនួលខុសត្រូវត្រូវតែឆ្លុះបញ្ចាំងពីជំហានចាំបាច់ដែលបានអនុវត្តនៅក្នុងពាក្យពេចន៍ ជ្រុងព័ត៌មាន និងការត្រួតពិនិត្យការពិត ជៀសវាងការបញ្ចេញមតិចំអក និងការបង្កាច់បង្ខូចដែលរួមចំណែកដល់ការរើសអើង ការស្ដីបន្ទោសរួមគ្នា និងការបំផ្លាញទំនុកចិត្តពីការវិនិយោគបរទេស។ ការស៊ើបអង្កេតសារព័ត៌មានត្រូវតែចាកចេញពីការអះអាងដោយផ្អែកលើប្រភពដែលមិនបានផ្ទៀងផ្ទាត់ ឬបុគ្គល ឬក្រុមណាមួយដែលមានចេតនាអាក្រក់»។

គណៈកម្មាធិការសិទ្ធិមនុស្សកម្ពុជាបានស្នើឱ្យស្ថាប័ននេះលុបចោលពាក្យ Scambodia ចេញពីអត្ថបទរបស់ខ្លួន កែតម្រូវ ឬបំភ្លឺឡើងវិញ ចៀសវាងការប្រើប្រាស់ពាក្យពេចន៍ប្រមាថបែបនេះនាពេលអនាគត និង«ធ្វើការសុំទោសជាផ្លូវការ» ចំពោះការប្រើប្រាស់ចំណងជើងនេះផងដែរ។

បន្ថែមលើនេះលោក កែវ រ៉េមី បានសរសេរលើហ្វេសបុករបស់លោកផងដែរនៅថ្ងៃទី២២ ខែមេសានេះដោយបានលើកឡើងថា៖ «ឧក្រិដ្ឋជនscam online និងមន្ត្រីឃុបឃិតប្រព្រឹត្តអំពើឆបោកគឺជារឿងមួយដាច់ដោយឡែកផ្សេងពីគ្នា តែអ្នកឯងដាក់ឈ្មោះបង្ខូចកេរ្តិ៍ឈ្មោះប្រទេសរបស់ខ្ញុំដែលមានប្រជាជនជិត ១៨លាននាក់គឺជាការប៉ះពាល់យ៉ាងធ្ងន់ធ្ងរដល់កិត្តិយសរបស់ប្រទេស និងជាតិសាសន៍របស់ខ្ញុំ»។

គួរឱ្យដឹងផងដែរថាកាលពីថ្ងៃទី១៩ ខែមេសា ឆ្នាំ២០២៦ សារព័ត៌មាន The Wall Street Journal របស់សហរដ្ឋអាមេរិកបានចេញអត្ថបទព័ត៌មានស៊ើបអង្កេតមួយពីឧក្រិដ្ឋកម្មឆបោកអនឡាញនៅកម្ពុជា ដោយបានដាក់ចំណងជើងថា How Cybercrime Became a Leading Industry in Scambodia ដែលមានន័យថា របៀបដែលឧក្រិដ្ឋកម្មអនឡាញក្លាយជាឧស្សាហកម្មដែលឈានមុខនៅ Scambodia ។

ការប្រើប្រាស់ពាក្យ Scambodia ជំនួស Cambodia នេះត្រូវបានអ្នកនាំពាក្យក្រសួងព័ត៌មានលោក ទេព អស្នារិទ្ធ បានបង្ហាញការសោកស្ដាយដែលសារព័ត៌មានអាមេរិកបានប្រើប្រាស់ខ្លឹមសារមាក់ងាយមកលើកម្ពុជា ជាចេតនាធ្វើឱ្យមានការរើសអើងចំពោះប្រទេសមួយទាំងមូលដែលបានប្រាស់ចាកគុណតម្លៃនៃក្រមសីលធម៌ វិជ្ជាជីវៈ របស់អ្នកសារព័ត៌មាន។ លោកថាពេលនេះក្រសួងបានដាក់លិខិតទៅនិពន្ធនាយក WSJ ស្នើឱ្យស្ថាប័នពិនិត្យ និងកែសម្រួលការចេញផ្សាយរបស់ខ្លួនឡើងវិញ៕

អត្ថបទដោយ ហ៊ុន សិរីវវឌ្ឍន៍

The post លោក កែវ រ៉េមី ស្នើឱ្យ WSJ សុំទោសកម្ពុជាចំពោះការប្រើប្រាស់ពាក្យ Scambodia លើចំណងជើងអត្ថបទរបស់ខ្លួន appeared first on Kampuchea Thmey Daily.

ទេសរដ្ឋមន្ត្រី កែវ រ៉េមី ថាការធ្វើផ្ទះជូនជនភៀសសឹកមិនមែនជាការទទួលស្គាល់ការបាត់បង់ទឹកដីទេ

hun sirivadh — Tue, 17 Feb 2026 02:10:45 +0000

ប្រធានគណៈកម្មាធិការសិទ្ធិមនុស្សកម្ពុជា ទេសរដ្ឋមន្ត្រី កែវ រ៉េមី បានលើកឡើងថារដ្ឋាភិបាលកម្ពុជាកំពុងប្រើប្រាស់គ្រប់មធ្យោបាយទាំងអស់ដើម្បីទាមទារទឹកដីពីទាហានថៃវិញ ហើយការសាងសង់ផ្ទះជូនជនភៀសសឹកស្នាក់នៅក៏មិនមែនជាការទទួលស្គាល់ចំពោះការបាត់បង់ទឹកដីដែរ។

លោក កែវ រ៉េមី បានសរសេរលើហ្វេសបុករបស់លោកនៅព្រឹកថ្ងៃទី១៧ ខែកុម្ភៈនេះដោយថាការសាងសង់ផ្ទះជូនជនភៀសសឹកដែលបាត់បង់ផ្ទះសំបែងដោយការឈ្លានពានពីថៃគឺជាការគិតគូរវែងឆ្ងាយព្រោះការទាមទារពីជនឈ្លានពានមិនមែនធ្វើត្រឹមរយៈពេលខ្លីទេ។

លោកសរសេរថា៖ «ការទាមទារនេះមិនមែនជារឿងលេងសើច ដោយប្រើរយ:ពេលខ្លី ឬប្រើពេលមួយសប្តាហ៍ ឬមួយខែបានទេ។ បើត្រូវប្រើរយ:ពេលវែងក្នុងការទាមទារទឹកដីនិងផ្ទះសម្បែងមកឲ្យប្រជាជនយើងវិញ យើងបានគិតគូរដល់បងប្អូនភៀសសឹករបស់យើងតើត្រូវនៅក្រោមតង់កៅស៊ូរាប់សិបឆ្នាំ ឬរាប់ទសវត្សរ៍ ឬយ៉ាងណា? តើក្មេងៗរស់នៅដោយមិនបានបន្តការរៀនសូត្រតទៅទៀតដែរឬទេ? នេះគឺជាការគិតគូរយ៉ាងហ្មត់ចត់របស់រាជរដ្ឋាភិបាលដែលដឹកនាំដោយសម្តេចធិបតី។»

លោកបានបញ្ជាក់បន្ថែមថា ការសាងសង់ផ្ទះ ឬជម្រកបណ្តោះអាសន្នឲ្យជនភៀសសឹក មិនមែនជាការទទួលស្គាល់ការបាត់បង់ទឹកដី ឬផ្ទះសម្បែងដូចការឃោសនារបស់អ្នកដែល មាននិន្នាការផ្ទុយពីរាជរដ្ឋាភិបាលនោះទេ តែផ្ទុយទៅវិញទឹកដីផ្ទះសម្បែងត្រូវតែតវ៉ាយកមកវិញ ហើយ «ការរស់នៅរបស់បងប្អូនយើងត្រូវតែគិតគូរឲ្យបានមុនរដូវវស្សាមកដល់»។

រដ្ឋាភិបាលកម្ពុជាបានសម្រេចសាងសង់ជម្រកបណ្ដោះអាសន្នជូនជនភៀសសឹកកម្ពុជាកាលពីចុងសប្ដាហ៍មុនឱ្យបានហើយមុនខែវស្សា ដោយធ្វើផ្ទះមួយខ្នងលើទំហំដី២០ គុណ និង៣០ម៉ែត្រ ព្រមទាំងហេដ្ឋារចនាសម្ព័ន្ធតភ្ជាប់គាំទ្រដល់ការរស់នៅផងដែរ។ ផ្ទះទាំងនេះនឹងត្រូវប្រគល់ជូនរដ្ឋាភិបាលវិញពេលដែលព្រំដែនត្រូវបានដោះស្រាយចប់រួចរាល់ហើយពលរដ្ឋត្រលប់ទៅកាន់ភូមិឋានវិញ។

ចាប់តាំងពីថៃបានបើកការឈ្លានពានខ្មែរជាលើកទី២ ក្នុងឆ្នាំ២០២៥ បានរំលោភបំពានលើទឹកដីកម្ពុជាចំនួន១៤ទីតាំង ចាប់តាំងពីព្រំដែនខេត្តពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងព្រះវិហារ ដែលប៉ះពាល់ដល់ប្រជាពលរដ្ឋរាប់សែននាក់ ខណៈបច្ចុប្បន្នក្រោយពេលមានបទឈប់បាញ់ហើយក្ដីក៏ពលរដ្ឋប្រមាណជា៧ម៉ឺន៥សែននាក់នៅមិនទាន់អាចត្រលប់ទៅកាន់ផ្ទះសំបែងពួកគេបានវិញនៅឡើយទេ៕

អត្ថបទដោយ ហ៊ុន សិរីវឌ្ឍន៍

The post ទេសរដ្ឋមន្ត្រី កែវ រ៉េមី ថាការធ្វើផ្ទះជូនជនភៀសសឹកមិនមែនជាការទទួលស្គាល់ការបាត់បង់ទឹកដីទេ appeared first on Kampuchea Thmey Daily.

CHRC ថាថៃបង្ហាញការឈ្លានពានយ៉ាងច្បាស់ហើយត្រូវតែទទួលខុសត្រូវចំពោះទង្វើរបស់ខ្លួន

hun sirivadh — Wed, 24 Dec 2025 08:47:34 +0000

គណៈកម្មាធិការសិទ្ធិមនុស្សកម្ពុជាបានថ្កោលទោសចំពោះការបន្តវាយប្រហាររបស់កងទ័ពថៃចូលជ្រៅលើទីតាំងស៊ីវិលកម្ពុជា ដែលបង្ហាញយ៉ាងច្បាស់ថាប្រតិបត្តិការយោធានេះគឺជា «ការឈ្លានពាន» មិនមែនជាជម្លោះព្រំដែនឡើយ។

ក្នុងសេចក្ដីប្រកាសព័ត៌មានថ្ងៃទី២៤ ខែធ្នូ ឆ្នាំ២០២៥នេះ គណៈកម្មាធិការសិទ្ធិមនុស្សបានលើកឡើងថាថៃបានរំលោភលើកិច្ចព្រមព្រៀងសន្តិភាពជាមួយកម្ពុជា ហើយកម្ពុជាពិតជារងគ្រោះអំពីអំពើឈ្លានពាននេះ។ ហើយទង្វើឈ្លានពានរបស់ថៃនេះគឺត្រូវទទួលខុសត្រូវតាមច្បាប់អន្តរជាតិ។

ក្នុងសេចក្ដីប្រកាសនោះបានលើកឡើងថា៖ «ការប្រើកម្លាំងយោធាឆ្លងកាត់ព្រំដែន និងវាយប្រហារលើទឹកដីរដ្ឋអធិបតេយ្យមួយផ្សេងទៀត ដោយគ្មានមូលហេតុដើម្បីការពារខ្លួនស្របតាមច្បាប់អន្តរជាតិគឺជាឧក្រិដ្ឋកម្មនៃការឈ្លានពាន។ ការវាយប្រហារយ៉ាងទូលំទូលាយ និងជាប្រព័ន្ធលើជនស៊ីវិល និងទ្រព្យសម្បត្តិស៊ីវិល ព្រមទាំងបំផ្លាញបេតិកភណ្ឌវប្បធម៌គឺជាឧក្រិដ្ឋកម្មសង្គ្រាម និងជាឧក្រិដ្ឋកម្មប្រឆាំងមនុស្សជាតិ»។

គ.ស.ម.ក នឹងដាក់ញត្តិបន្ទាន់បន្ថែមទៀតប្ដឹងទៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ និងភាគីពាក់ព័ន្ធដទៃទៀត ឱ្យថ្កោលទោស ដាក់សម្ពាធ និងចាត់វិធានការគ្រប់យន្តការដើម្បីឱ្យថៃទទួលខុសត្រូវចំពោះមុខច្បាប់។

សេចក្ដីប្រកាសរបស់គណៈកម្មាធិការសិទ្ធិមនុស្សនៅពេលនេះគឺបន្ទាប់ពីថៃបានបើកការវាយប្រហារជាច្រើនលើកច្រើនសារមកលើកម្ពុជា ដោយប្រើប្រាស់អាវុធគ្រប់ធុន រួមទាំងយន្តហោះចម្បាំង F-16 និង T-50Th ចូលជ្រៅមកលើដែនអធិបតេយ្យកម្ពុជា។

នៅថ្ងៃទី២៤ ខែធ្នូ ថៃបានប្រើប្រាស់យន្តហោះ T-50 ដឹកគ្រាប់បែកមកទម្លាក់នៅស្រុកបាណន់ ខេត្តបាត់ដំបង ស្រុកស្វាយចេក ខេត្តបន្ទាយមានជ័យ ស្រុកស្រីស្នំ ខេត្តសៀមរាប ព្រមជាមួយការបាញ់កាំភ្លើងធំ និងបន្តឈ្លានពានលើទឹកដីកម្ពុជាថែមទៀត។

គិតត្រឹមព្រឹកថ្ងៃទី២៤ ខែធ្នូ ឆ្នាំ២០២៥នេះ មានពលរដ្ឋខ្មែរចំនួន២១នាក់ស្លាប់ និង៨៣រងរបួសពីការឈ្លានពាននេះ ខណៈជនភៀសសឹកកើនដល់ជាង៦០ម៉ឺននាក់ និងហេដ្ឋារចនាសម្ព័ន្ធស៊ីវិលជាច្រើនត្រូវបានបំផ្លាញ៕

អត្ថបទដោយ ហ៊ុន សិរីវឌ្ឍន៍

The post CHRC ថាថៃបង្ហាញការឈ្លានពានយ៉ាងច្បាស់ហើយត្រូវតែទទួលខុសត្រូវចំពោះទង្វើរបស់ខ្លួន appeared first on Kampuchea Thmey Daily.

ទេសរដ្ឋមន្ត្រីកម្ពុជាថាបើកុំតែថៃមានយន្តហោះចម្បាំង ម៉្លេះថៃមិនមែនជាដៃគូររបស់វីរកងទ័ពខ្មែរឡើយ ប៉ុន្តែមិនយូរគេនឹងចុះចាញ់ បែកផ្ទៃក្នុង

Ngoeul Narath — Mon, 15 Dec 2025 10:37:12 +0000

ប្រធានគណៈកម្មាធិការសិទ្ធិមនុស្សកម្ពុជា ទេសរដ្ឋមន្ត្រី កែវ រ៉េមី មើលឃើញថា បើថៃគ្មានយន្តហោះចម្បាំងទេ ម៉្លេះទាហានថៃមិនមែនជាដៃគូររបស់វីរកងទ័ពដ៏អង់អាចក្លាហានរបស់កម្ពុជាឡើយ។ លោកសម្ដែងការដឹងគុណចំពោះវីរៈកងទ័ពកម្ពុជា និងលើកទឹកចិត្តឱ្យខិតខំបន្ថែមទៀត នោះយោធាថៃនឹងចុះចាញ់ ព្រោះពួកគេគ្មានបទពិសោធ៍ហែលកាត់សង្គ្រាមដូចកងទ័ពកម្ពុជាឡើយ ហើយផ្ទៃក្នុងនឹងបែកបាក់។ ទេសរដ្ឋមន្ត្រីរូបនេះ លើកឡើងដូច្នេះ បន្ទាប់ពីយោធាថៃឈ្លាន និិងប្រើយន្តហោះចម្បាំងទម្លាក់គ្រាប់បែកលើកម្ពុជាប្រមាណ១សប្ដាហ៍ពេញ។

ទេសរដ្ឋមន្ត្រី កែវ រ៉េមី សង្កត់ធ្ងន់លើបណ្ដាញសង្គមហ្វេសប៊ុក នារសៀលថ្ងៃទី១៥ ខែធ្នូ ដូច្នេះ៖« សង្រ្គាមមកទល់ថ្ងៃនេះទើបយើងដឹងយ៉ាងច្បាស់ថាបើគង់តែមានយន្តហោះទម្លាក់គ្រាប់បែក ម្ល៉េះទាហានថៃមិនមែនជាដៃគូប្រយុទ្ធជាមួយយើងនោះទេ។ ខ្ញុំសូមសំដែងនូវការគោរពនៃវីរភាពដ៏អង់អាចក្លាហានរបស់កងទ័ពយើង។ យើងខំតស៊ូបន្តទៀត មិនយូរមិនឆាប់ ពួកទាហានសៀមនឹងរួញរាទៅមុខមិនរួច ចុះចាញ់ដោយខ្លួនឯងពីព្រោះពួកនេះមិនអាចស៊ូធន់ក្នុងការធ្វើសង្រ្គាមទេ។ នៅយូរបន្តិចពួកនេះនឹងជួបបញ្ហាបែកបាក់ផ្ទៃក្នុងជាមិនខាន។ »។

យោធាថៃបានបើកការបាញ់ប្រហារឈ្លានពានមកលើកម្ពុជា នៅរសៀលថ្ងៃទី៧ ដោយប្រើប្រាស់យុទ្ធោបករណ៍ជាច្រើនប្រភេទមកលើដែនអធិបតេយ្យដូចជាកាំភ្លើងធំ ដ្រូនអត្តឃាត គ្រាប់បែកចង្កោម រថក្រោះជាច្រើនគ្រឿង ផ្សែងពុល និងយន្តហោះចម្បាំងF-16ជាដើម។

យោធាថៃចាប់ផ្ដើមប្រើប្រាស់យន្តហោះចម្បាំងF-16វាយប្រហារ ឈ្លានពានចូលក្នុងដែនអធិបតេយ្យជាថ្មីម្ដងទៀត នៅព្រឹកថ្ងៃទី៨ ខែធ្នូ ឆ្នាំ២០២៥ ដោយបានវាយប្រហារមិនរើសគោលដៅ ទម្លាក់គ្រាប់បែកលើទីតាំងជនស៊ីវិលបណ្ដាលឱ្យពលរដ្ឋខ្មែរចំនួន១៣នាក់ របួសជាង៧០នាក់ និងពលរដ្ឋជាង៤០ម៉ឺននាក់ត្រូវភៀសសឹកទៅកាន់ទីតាំងសុវត្ថិភាព។

ក្នុងការប្រយុទ្ធប្រមាណ១សប្ដាហ៍មកនេះ យោធាថៃបានប្រើយន្តហោះចម្បាំងF-16បាញ់កម្ទេចហេដ្ឋរចនាសម្ព័ន្ធទីតាំងស៊ីវិលជាច្រើន តួយ៉ាងដូចជាប្រាសាទតាក្របីឱ្យខ្ទេចរូបរាងនៅថ្ងៃទី៩ និងទី១០ ទម្លាក់គ្រាប់បែកកាត់ផ្ដាច់ស្ពានជ័យជម្នះ ឬស្ពានមេទឹកនៅតំបន់ថ្មដា ខេត្តពោធិ៍សាត់ កាលពីថ្ងៃទី១៣ និងនៅព្រឹកថ្ងៃទី១៥ ខែធ្នូ បានទម្លាក់គ្រាប់បែកលើភូមិសាស្ត្រស្ពានអូរជីក នៃព្រំប្រទល់ ស្រុកស្រីស្នំ និងប្រើយន្តហោះចម្បាំង F-16 បានពង្រីកសមរភូមិបើកការបាញ់ប្រហារយ៉ាងកំរោល ទម្លាក់គ្រាប់បែក២គ្រាប់ ក្បែរជំរុំជនភៀសសឹក ក្នុងភូមិសាស្រ្ត ស្រុកស្រីស្នំ ខេត្តសៀមរាប។

អ្នកនាំពាក្យក្រសួងការពារជាតិកម្ពុជា កត់សម្គាល់ឃើញថាចំនួននៃការប្រើប្រាស់យន្តហោះចម្បាំងF-16 ពីសំណាក់យោធាថៃវាយប្រហារមកលើកម្ពុជាកាន់តែមានចំនួន និងទំហំកើនឡើងជាលំដាប់ និងកាន់តែចូលមកជ្រៅដូចនៅថ្ងៃទី១៥ ខែធ្នូ នេះ ចូលមកទម្លាក់គ្រាប់នៅខេត្តសៀមរាបជាដើម។

អ្នកនាំពាក្យការពារជាតិបញ្ជាក់ថា គិតមកទល់ម៉ោងជិត៥ ថ្ងៃទី១៥ ខែធ្នូ វីរកងទ័ព និងវីរនគរបាលកម្ពុជា បាននឹងកំពុងបន្តឈរជើងយ៉ាងរឹងមាំ ស្វាហាប់ មោះមុត និងនៅតែតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាន និងប្រុងប្រយ័ត្នខ្ពស់ជានិច្ចក្នុងការ បំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា។ កម្ពុជា ក៏បញ្ជាក់ឡើងវិញនូវសិទ្ធិស្វ័យការពារដែនអធិបតេយ្យរបស់ខ្លួន ដូចដែលមានចែងនៅក្នុងច្បាប់អន្តរជាតិ ដើម្បីការពារបូរណភាពទឹក ដី និងប្រជាជន ទោះក្នុងតម្លៃណាក៏ដោយ។ កម្ពុជានឹងមិនចុះចាញ់នឹងការបង្ខិតបង្ខំ ឬការបំភិត បំភ័យទោះក្នុងទម្រង់ណាមួយឡើយ៕

ដោយ៖ ង៉ិល ណារ៉ាត់

The post ទេសរដ្ឋមន្ត្រីកម្ពុជាថាបើកុំតែថៃមានយន្តហោះចម្បាំង ម៉្លេះថៃមិនមែនជាដៃគូររបស់វីរកងទ័ពខ្មែរឡើយ ប៉ុន្តែមិនយូរគេនឹងចុះចាញ់ បែកផ្ទៃក្នុង appeared first on Kampuchea Thmey Daily.

ទេសរដ្ឋមន្ត្រីកម្ពុជាប្រាប់អ្នកសុរិន្ទឱ្យភ្ញាក់ខ្លួនកុំប្ដូរជីវិតច្បាំងជាមួយកម្ពុជាអី ព្រោះស្លាប់ទៅថៃមិនខ្វល់ឡើយ ជាក់ស្ដែងអនុទីនច្រៀងលេងយ៉ាងរំភើយ

Ngoeul Narath — Mon, 15 Dec 2025 02:52:11 +0000

ទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា លើកឡើងថាយោធាថៃ តែងតែរុញឱ្យអ្នករស់នៅសូរិន្ទ សុីសាកេត បុរីរាំ និងឧបុនរាជធានី ចូលច្បាំងតាមបន្ទាត់ព្រំដែនឈ្លានពានលើកម្ពុជា ព្រោះក្រុមទាំងនេះគិតថាពួកគេជាសៀម មិនដែលគិតថាមានដើមកំណើតជាខ្មែរ។ លោក កែវ រ៉េមី ប្រាប់អ្នកទាំងនោះថា ល្មមភ្ញាក់ខ្លួនហើយ ឈប់ប្ដូរជីវិតចូលច្បាំងដើម្បីមហិច្ឆតាថៃទៀត ព្រោះស្លាប់ទៅក៏ថៃមិនខ្វល់ដែរ តួយ៉ាងពេលទាហានកំពុងស្លាប់នាយករដ្ឋមន្ត្រីអនុទីន ច្រៀងលេងយ៉ាងរំភើយ មិនកាន់ទុក្ខសោះឡើយ។

ទេសរដ្ឋមន្ត្រី កែវ រ៉េមី ដាស់តឿនអ្នកសូរិន្ទតាមគណនីហ្វេសប៊ុកផ្លូវការ នាថ្ងៃទី១៤ ខែធ្នូ ដូច្នេះ៖« ខ្ញុំបានទទួលព័ត៌មានមួយដែលពួកនៅក្នុងរដ្ឋាភិបាល និងយោធាថៃនៅបាងកកមិនដែលគិតក្រុមរស់នៅខេត្តសូរិន្ទ សុីសាកេត បុរីរាំ និងឧបុនរាជធានីជាថៃនោះទេ។ អញ្ចឹងហើយបើទោះជាក្រុមនេះស្លាប់គរជើងគ្នាក៏នាយករដ្ឋមន្ត្រីថៃ និងយោធាថៃមិនខ្វល់ដែរ។ បងប្អូនអើយល្មមភ្ញាក់ខ្លួនហើយ កុំប្តូរជីវិតមកច្បាំងជាមួយខ្មែរកណ្តាលអី។ បើមិនជឿមើលទៅ អានុទីនកំពុងច្រៀងយ៉ាងសប្បាយ…។ »។

យោធាថៃបានបើកការឈ្លានពានបាញ់ប្រហារមកលើកម្ពុជាទ្រង់ទ្រាយធំម្ដងទៀត នៅដើមខែធ្នូ ដោយប្រើប្រាស់យុទ្ធោបករណ៍ល្មើសច្បាប់អន្តរជាតិជាច្រើនប្រភេទរាប់ចាប់ផ្សែងពុល គ្រាប់បែកចង្កោម និងយន្តហោះចម្បាំងជាដើម។ ក្រុមទាហានថៃ ដែលថ្នាក់លើរុញឱ្យចូលច្បាំងឈ្លានពានលើកម្ពុជាមួយចំនួនត្រូវបានគេកត់សម្គាល់ឃើញថាជាទាហានដែលចេះភាសាខ្មែរ ឬអ្នករស់នៅសូរិន្ទ បុរីរ៉ាំ និងឧបុនរាជធានី។ នៅក្នុងការប្រយុទ្ធជាច្រើនថ្ងៃមកនេះ មានសេចក្ដីរាយការណ៍ប្រភពសម្ងាត់ផ្ទៃក្នុងរបស់យោធាថៃមកថា មានទាហានថៃស្លាប់ និងរបួសជាច្រើននាក់។

ទោះបីជាទាហានថៃកំពុងប្រយុទ្ធ ស្លាប់ជាច្រើននាក់ក៏ដោយ នៅល្ងាចថ្ងៃទី១៤ ខែធ្នូ ហាក់មិនខ្វាយខ្វល់ មិនទៅពិធីបុណ្យសព្វ ឬកាន់ទុក្ខទាហានដែលស្លាប់ឡើយ ពោលគឺបែជាផ្សាយផ្ទាល់លើទំព័រហ្វេសប៊ុករបស់ខ្លួនស្ដីពីសកម្មភាពច្រៀងលេងយ៉ាងរំភើយទៅវិញ។

គួរឱ្យដឹងដែរថា កាលពីរសៀលថ្ងៃទី១៣ ខែធ្នូ ទេសរដ្ឋមន្ត្រី កែវ រ៉េមី បានប្រាប់ឱ្យ ក្រុមបញ្ញាវ័ន្ត ធុរជន អ្នកនយោបាយថៃ ត្រូវបោះឆ្នោតជ្រើសរើសមេដឹកនាំថ្មីដែលមិនល្មោភសង្គ្រាម មិនយកប្រទេសជិតខាងធ្វើជាសត្រូវ ចេះចាប់ដៃរួមគ្នាបង្កើតកិច្ចសហប្រតិបត្តិការ និងការអភិវឌ្ឍន៍ បើចង់ឱ្យកម្ពុជា-ថៃ មានសន្តិភាព លែងមានសង្គ្រាម បង្ហូរឈាមគ្នា ងាយស្រួលធ្វើធុរកិច្ច ប្រជាជនមានប្រាក់ចំណូលខ្ពស់៕

ដោយ៖ ង៉ិល ណារ៉ាត់

The post ទេសរដ្ឋមន្ត្រីកម្ពុជាប្រាប់អ្នកសុរិន្ទឱ្យភ្ញាក់ខ្លួនកុំប្ដូរជីវិតច្បាំងជាមួយកម្ពុជាអី ព្រោះស្លាប់ទៅថៃមិនខ្វល់ឡើយ ជាក់ស្ដែងអនុទីនច្រៀងលេងយ៉ាងរំភើយ appeared first on Kampuchea Thmey Daily.

មេសិទ្ធិមនុស្សកម្ពុជាថា អនុទីនជាមនុស្សព្រៃផ្សៃ មិនឱ្យតម្លៃជីវិតមនុស្ស ដុតកំហឹងឱ្យខ្មែរក្រោកតស៊ូមិនខ្លាចស្លាប់ដើម្បីការពារទឹកដី និងជាតិ

Ngoeul Narath — Sat, 13 Dec 2025 07:52:10 +0000

ប្រធានគណៈកម្មាធិការសិទ្ធិមនុស្សកម្ពុជា ទេសរដ្ឋមន្ត្រីកែវ រ៉េមី ថានាយករដ្ឋមន្ត្រីចាំផ្ទះថៃ គ្មានអំណាច អនុទីន ឆានវីរៈគុល ជាមនុស្សសាហាវព្រៃផ្សៃ ប្រមាថមាក់ងាយជីវិតមនុស្ស និងកំពុងតែដុតបញ្ឆេះកំហឹងឲ្យកូនខ្មែរក្រោកតស៊ូមិនខ្លាចស្លាប់ ដើម្បីការពារបូរណភាពទឹកដី ប្រឆាំងការឈ្លានពានរបស់ថៃ។ លោកកែវ រ៉េមី លើកឡើងដូច្នេះតាមរយៈបណ្ដាញសង្គម facebook ផ្លូវការនារសៀលថ្ងៃ១៣ ខែធ្នូ ក្រោយ អនុទីន ប្រកាសថា ថៃនឹងបន្តវាយប្រហារមកលើកម្ពុជាបន្តទៀតទាល់តែកម្ពុជាលែងទៅជាប្រទេសដែលមានការគំរាមកំហែង លែងទៅជាប្រទេសគ្រោះថ្នាក់សម្រាប់ថៃ។

ប្រធានគណៈកម្មាធិការសិទ្ធិមនុស្សកម្ពុជា ចាត់ទុកដូច្នេះថា ៖” ពាក្យសម្តីរបស់អានុទីនបានឆ្លុះបញ្ចាំងពីការគិតរបស់មេដឹកនាំចាំផ្ទះរូបនេះ និងក្រុមរបស់ពួកគេចង់ឃើញកម្ពុជាធ្លាក់ខ្លួនជាប្រទេសទន់ខ្សោយនិងក្រីក្រ។ សម្តីបានបង្ហាញថាគាត់ជាមនុស្សគ្មានមេត្តាធម៌ ជាមនុស្សព្រៃផ្សៃ ជាមនុស្សមិនគោរព និងឲ្យតម្លៃទៅលើជីវិតរបស់មនុស្ស ។ “។

ទេសរដ្ឋមន្ត្រី កែវ រ៉េមី ថា ៖ “សម្តីអានុទីនរូបនេះបាននិងកំពុងដុតកំហឹងដល់កូនចៅខ្មែរគ្រប់ជំនាន់ក្រោកឈរឡើងតស៊ូដោយមិនខ្លាចបាត់បង់ជីវិតក្នុងបុព្វហេតុការពារគ្រួសារ និងទឹកដីពីការឈ្លានពានរបស់សត្រូវប្រវត្តិសាស្ត្រ។ ” ។

ប្រធានគណៈកម្មាធិការសិទ្ធិមនុស្សកម្ពុជាមើលឃើញថា សម្ដីឥតកោតក្រែង បញ្ឆេះកំហឹងជាតិនិយមខ្មែររបស់អនុទីនបែបនេះ នឹងធ្វើប្រជាជនខ្មែរ និងថៃ គ្មានថ្ងៃអាចរស់នៅក្នុងសន្តិភាពបានទេ។លោកថា បើចង់ឱ្យពលរដ្ឋទាំងពីររស់នៅក្នុងសន្តិភាពបាន ដំណោះស្រាយមានតែបញ្ញាវ័ន្តថៃ ប្រជាជនថៃ អាជីវករថៃ និង អ្នកនយោបាយថៃដែលស្រឡាញ់សន្តិភាព មិត្តភាព ស្រឡាញ់ជីវិតមនុស្ស និងការអភិវឌ្ឍត្រូវរួបរួមគ្នាជ្រើសរើសមេដឹកនាំថៃដែលមានគុណសម្បត្តិល្អ ដើម្បីកសាងព្រំដែនសន្តិភាពជាមួយកម្ពុជា រួមគ្នាបង្កើនមិត្តភាព សហប្រត្តិបត្តការ និងការអភិវឌ្ឍយូរអង្វែង។ បើមិនដូច្នេះទេ ការបង្ហូរឈាមនៃប្រជាជននៃប្រទេសទាំងពីរនឹងបន្តហូរគ្មានទីបញ្ចប់។ គូរគូសបញ្ជាក់ថាការលើកឡើងរបស់អនុទីន

គូរគូសបញ្ជាក់ថាការលើកឡើងរបស់អនុទីននាយករដ្ឋមន្ត្រីចាំផ្ទះរបស់ថៃ ធ្វើឡើងបន្ទាប់ពីប្រធានាធិបតីសហរដ្ឋអាមេរិកលោកដូណាល់ត្រាំ ទូរសព្ទមកកាន់នាយករដ្ឋមន្ត្រីកម្ពុជា-ថៃ កាលពីយប់ថ្ងៃទី១២ ខែធ្នូ សម្របសម្រួលឱ្យបញ្ឈប់ជម្លោះប្រដាប់អាវុធងាកទៅគោរពកិច្ចព្រមព្រៀងសន្តិភាព។

ប៉ុន្មានម៉ោងក្រោយប៉ុណ្ណោះក្រោយកិច្ចសន្ទនារវាងប្រធានាធិបតីសហរដ្ឋអាមេរិក ជាមួយប្រធានអាស៊ាន និងភាគីជម្លោះប្រដាប់អាវុធកម្ពុជា-ថៃបញ្ចប់ទៅ ពោលនៅម៉ោងជិត៦ព្រឹកថ្ងៃទី១៣ ខែធ្នូ យោធាថៃនៅតែបន្តបើកការវាយប្រហារមកលើកម្ពុជា ឈ្លានពានឥតឈប់ និងថែមទាំងប្រើប្រាស់យន្តហោះចម្បាំងរបស់សហរដ្ឋអាមេរិកទម្លាក់គ្រាប់បែកលើស្ពានជម្នះ (ស្ពានស្ទឹងមេទឹក) ដែលជាជំនួយរបស់ចិនដល់កម្ពុជាសាងសង់ឡើងនៅក្នុងភូមិសាស្ត្រតំបន់ថ្មដា ខេត្តពោធិ៍សាត់។

ក្រសួងការពារជាតិកម្ពុជានៅព្រឹកថ្ងៃទី១៣ ខែធ្នូ នេះ បានចោទប្រកាន់ថា យោធាថៃបានរំលោភបំពានយ៉ាងច្បាស់ក្រឡែតនៅធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងគោលការណ៍ជាមូលដ្ឋានគ្រឹះនៃច្បាប់អន្តរជាតិ ពីព្រោះបានបើកការវាយប្រហារមកលើកម្ពុជាកាលពីថ្ងៃទី៧ ខែធ្នូ ដោយប្រើយកយុទ្ធោបករណ៍ អាវុធធុនធ្ងន់ជាច្រើនប្រភេទដូចជាយន្តហោះចម្បាំងF-16 ទម្លាក់គ្រាប់បែក គ្រាប់បែកចង្កោម ការដាក់ពង្រាយទាហានយ៉ាងច្រើនលើសលប់ដើម្បីទន្ទ្រានយកទឹកដីកម្ពុជា។ ក្រសួងថា

ក្រសួងថាសកម្មភាពដែលគ្មានទំនួលខុសត្រូវ និងខុសច្បាប់របស់យោធាថៃបែបនេះ បង្កគ្រោះថ្នាក់ធ្ងន់ធ្ងន់បំផុតមិនត្រឹមតែសន្តិភាព ស្ថិរភាពនៅក្នុងតំបន់តែប៉ុណ្ណោះទេ ប៉ុន្តែថែមទាំងរំលោភបំពានដល់គោលការណ៍ជាមូលដ្ឋានគ្រឹះនៃសណ្ដាប់ធ្នាប់អន្តរជាតិផងដែរ។

បើតាមរបាយការណ៍របស់ក្រសួងបានឲ្យដឹងថា ពលរដ្ឋកម្ពុជាស្លូតត្រង់១១នាក់ ក្នុងនោះទារកម្នាក់បានស្លាប់បាត់បង់ជីវិត ជាង៧០នាក់ផ្សេងទៀតរងរបួស និងពលរដ្ឋភៀសសឹកកើនឡើងដល់ជាង៣០ម៉ឺននាក់ ព្រោះតែការឈ្លានពានដ៏ព្រៃផ្សៃ បាញ់ប្រហារមនុស្សគោលដៅទម្លាក់គ្រាប់បែកលើកទីតាំងស៊ីវិលពីសំណាក់យោធាថៃ៕

ដោយ៖ ង៉ិល ណារ៉ាត់

The post មេសិទ្ធិមនុស្សកម្ពុជាថា អនុទីនជាមនុស្សព្រៃផ្សៃ មិនឱ្យតម្លៃជីវិតមនុស្ស ដុតកំហឹងឱ្យខ្មែរក្រោកតស៊ូមិនខ្លាចស្លាប់ដើម្បីការពារទឹកដី និងជាតិ appeared first on Kampuchea Thmey Daily.

លោក កែវ រ៉េមី ៖ លោក វីទីត ម៉ុនតាប៊ន បានលាលែងតំណែងអ្នករាយការណ៍ពិសេសសិទ្ធិមនុស្សនៅកម្ពុជា

អ៊ិន ពិសី — Sat, 06 Dec 2025 07:41:43 +0000

ទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ថា លោក វីទីត ម៉ុនតាប៊ន អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា ត្រូវបានបញ្ចប់អាណត្តិ និងបានធ្វើលិខិតលាលែងពីតំណែងរួចហើយ។

លោក កែវ រ៉េមី បានឲ្យដឹងថា នៅថ្ងៃទី ១០ ខែវិច្ឆិកា កាលពីពេលជួបពិភាក្សាជាមួយ លោក Rory Mungoven អ្នកទទួលបន្ទុកសិទ្ធិមនុស្សរបស់ UN នៅតំបន់អាស៊ី–ប៉ាស៊ីហ្វិក កម្ពុជា បានបញ្ជូនលិខិតបណ្តឹងទាក់ទងនឹងការរំលោភសិទ្ធិមនុស្សដោយកងទ័ពថៃ ទៅកាន់ស្ថាប័នអន្តរជាតិទាំងអស់ លើកលែងតែលោក វីទីត តែមួយគត់ ដែលមិនបានផ្ញើ។

ទេសរដ្ឋមន្ត្រី បានបញ្ជាក់ថា មូលហេតុដែលមិនបានផ្ញើលិខិតទៅលោក វីទីត គឺដោយក្តីកង្វល់ថា ការចោទប្រកាន់កងទ័ពថៃថា រំលោភសិទ្ធិមនុស្ស អាចធ្វើឲ្យគាត់ជួបបញ្ហាក្នុងការបំពេញមុខងារ និងប្រទេសជាតិរបស់គាត់ ព្រោះតែគាត់ជាជនជាតិថៃ។ លោក កែវ រ៉េមី បានប្រាប់ថា ប្រសិនបើលោក វីទីត ថ្កោលទោសកងទ័ពថៃ ដោយឡែកពីការតែងតាំងឯករាជ្យរបស់ UN ក៏ដោយ គាត់អាចនឹងជួបការរើសអើង មិនអាចចូលប្រទេសរបស់គាត់វិញបាន និងអាចត្រូវគេចោទថាជា “ជនក្បត់ជាតិ” ពីក្រុមជ្រុលនិយមខ្លះៗ នៅថៃ។

ដើម្បីជៀសវាងបញ្ហានេះក្នុងអនាគត លោក កែវ រ៉េមី បានស្នើសុំឲ្យអង្គការសហប្រជាជាតិ មិនតែងតាំងជនជាតិប្រទេសជិតខាង ឬមានភូមិផងរបងជាមួយកម្ពុជា ជាអ្នករាយការណ៍ពិសេសសិទ្ធិមនុស្សនៅកម្ពុជា ព្រោះកាលៈទេសៈនយោបាយព្រំដែនអាចធ្វើឲ្យពួកគាត់ជួបការលំបាកក្នុងការងារ។

ទោះបីជាមានការព្រួយបារម្ភ ប៉ុន្តែ លោក កែវ រ៉េមី បានលើកឡើងថា មិនដែលមានភាពរើសអើងចំពោះលោក វីទីត ទេ។ ផ្ទុយទៅវិញ គាត់បានកោតសរសើរចំណេះដឹង ជំនាញ និងការងារដែលបានសហការក្នុងអំឡុងអាណត្តិរបស់គាត់ ហើយបានបង្ហាញការសង្ឃឹមថា លោក វីទីត នឹងទទួលបានតួនាទីថ្មី ដែលអាចបន្តជ្រោមជ្រែង និងលើកស្ទួយការការពារសិទ្ធិមនុស្សបានកាន់តែប្រសើរជាងមុន។

ចុងក្រោយ លោក កែវ រ៉េមី បានលើកឡើងពីការខានប្រើប្រាស់ធនធានមនុស្សមានសមត្ថភាពនៅប្រទេសថៃ ដោយសារកត្តាជ្រុលនិយម និងទំនៀមគំនិតអគតិរបស់ក្រុមតូចមួយ និងទាហានខ្លះៗ ដែលបង្កឲ្យបុគ្គលមានសមត្ថភាពពិបាកបម្រើប្រទេសជាតិរបស់ខ្លួនតាមសមត្ថភាពពិតប្រាកដ៕

The post លោក កែវ រ៉េមី ៖ លោក វីទីត ម៉ុនតាប៊ន បានលាលែងតំណែងអ្នករាយការណ៍ពិសេសសិទ្ធិមនុស្សនៅកម្ពុជា appeared first on Kampuchea Thmey Daily.

លោក កែវ រ៉េមី Archives - Kampuchea Thmey Daily

លោក កែវ រ៉េមី ស្នើ​ឱ្យ ​WSJ សុំទោស​កម្ពុជា​ចំពោះ​ការ​ប្រើប្រាស់​ពាក្យ Scambodia លើ​ចំណង​ជើង​អត្ថបទ​របស់​ខ្លួន

CHRC ​ថា​ថៃ​បង្ហាញ​ការ​ឈ្លាន​ពាន​យ៉ាង​ច្បាស់​ហើយ​ត្រូវ​តែ​ទទួល​ខុស​ត្រូវ​ចំពោះ​ទង្វើ​របស់​ខ្លួន​

លោក កែវ រ៉េមី ៖ លោក វីទីត ម៉ុនតាប៊ន បានលាលែងតំណែងអ្នករាយការណ៍ពិសេសសិទ្ធិមនុស្សនៅកម្ពុជា

លោក កែវ រ៉េមី ស្នើឱ្យ WSJ សុំទោសកម្ពុជាចំពោះការប្រើប្រាស់ពាក្យ Scambodia លើចំណងជើងអត្ថបទរបស់ខ្លួន

CHRC ថាថៃបង្ហាញការឈ្លានពានយ៉ាងច្បាស់ហើយត្រូវតែទទួលខុសត្រូវចំពោះទង្វើរបស់ខ្លួន