លោក សោម សុផារ៉ាត Archives - Kampuchea Thmey Daily

គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥%

Dy Bunnara — Mon, 01 Jun 2026 07:33:03 +0000

ប្រាសាទបុរាណនៅតំបន់អង្គរដែលមានអាយុកាលរាប់ពាន់ឆ្នាំ បានរងការសឹករិចរិលនិងទ្រុឌទ្រោមជារៀងរាល់ថ្ងៃ ដែលតម្រូវឲ្យមានការជួសជុលថែទាំជាប្រចាំ។

យ៉ាងណាមិញ មុនអនុវត្តកិច្ចការជួសជុលក៏ត្រូវឆ្លងកាត់ការពិនិត្យ និងការវាយតម្លៃពីផលប៉ះពាល់យ៉ាងហ្មត់ចត់ពីមន្រ្តីជំនាញរបស់អង្គការយូណេស្កូ។

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យា

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យានៃអាជ្ញាធរជាតិអប្សរាបានគូសបញ្ជាក់ថា រាល់ការជួសជុលប្រាសាទនៅតំបន់រមណីយដ្ឋានអង្គរ ត្រូវតែគោរពយ៉ាងតឹងរ៉ឹងតាមលក្ខខណ្ឌនៃធម្មនុញ្ញអង្គរ។

តាមរយៈគណៈកម្មាធិការសម្របសម្រួលអន្តរជាតិ ដើម្បីការការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ហៅកាត់ថា ICC-Angkor) គោលការណ៍គ្រឹះនៃធម្មនុញ្ញអង្គរ គឺរាល់ការជួសជុលប្រាសាទទាំងអស់ដាច់ខាតត្រូវតែគោរព និងអនុវត្តតាមលក្ខខណ្ឌបច្ចេកទេសដែលបានកំណត់ក្នុងធម្មនុញ្ញនេះ ដោយមិនអាចធ្វើតាមតែអំពើចិត្តបានឡើយ។

«ក្នុងធម្មនុញ្ញអង្គរបានកំណត់ភាគរយច្បាស់លាស់ណាស់ ដោយមិនអនុញ្ញាតិឱ្យប្រើប្រាស់ថ្មថ្មីលើសពី ២៥% នៃការជួសជុលនោះទេ»។ សោម សុផារ៉ាត់ បញ្ជាក់ មុនលោកបន្តថា «បើសិនថ្មចាស់ខូចគុណភាពបាក់បែកខ្លាំងមិនអាចទ្រទ្រង់ទម្ងន់បានតទៅទៀត នោះគេអាចប្រើថ្មថ្មីជំនួស ឬបើថ្មចាស់បាត់បង់រកមិនឃើញ ហើយទីតាំងត្រូវជួសជុលចាំបាច់ត្រូវមានថ្មថ្មីជំនួស ដើម្បីបង្គុំឱ្យទៅជារចនាសម្ព័ន្ធពេញលេញ»។

«បើថ្មចាស់នៅមានគុណភាពអាចប្រើប្រាស់បាន មានសភាពបាក់បែកបន្តិចបន្តួច គេនឹងមិនបោះបង់ចោលទេគឺយកមកតភ្ជាប់ប្រើប្រាស់ឡើងវិញ»។ លោក សោម សុផារ៉ាត់ បន្ថែម។

ពាក់ព័ន្ធការងារជួសជុលប្រាសាទបុរាណ លោក សោម សុផារ៉ាត់ មើលឃើញមានភាពខុសគ្នាស្រឡះពីការសាងសង់សំណង់សម័យទំនើប។

មន្រ្តីជំនាញអាជ្ញាធរជាតិអប្សរារូបនេះ លើកឡើងពីភាពស្មុគស្មាញក្នុងកិច្ចការងារជួសជុលសំណង់ប្រាសាទបុរាណក្នុងតំបន់អង្គរ ដោយសារតែដុំថ្មប្រាសាទនីមួយៗមានទម្ងន់ធ្ងន់ ដែលការជួសជុលតម្រូវឱ្យមានការប្រុងប្រយ័ត្នខ្ពស់ ដោយត្រូវប្រើប្រាស់ឡានស្ទូច ដើម្បីងាយស្រួលក្នុងការផ្លាស់ទី។ ក្នុងករណីទីតាំងចង្អៀតដែលឡានស្ទូចចូលមិនដល់ មន្រ្តីជំនាញត្រូវប្រើបច្ចេកទេសតម្លើងរន្ទា និងកៅលាក់ដើម្បីអូសឬយោងថ្ម។

លោកប្រៀបធៀបការជួសជុលប្រាសាទបុរាណ មិនងាយស្រួលដូចការសាងសង់សំណង់សម័យថ្មីនោះទេ។ ការជួសជុលថ្មបុរាណទាមទារការរើ រៀប និងពង្រឹងគ្រឹះយ៉ាងសម្រិតសម្រាំង។ បន្ថែមពីនេះ ការជួសជុលក៏ត្រូវចំណាយពេលយូរ ដោយសារថ្មប្រាសាទមានល្បាក់មិនស្មើគ្នាមានទាបមានខ្ពស់ ដូច្នេះដើម្បីដាក់ថ្មមួយដុំឲ្យចូលស៊ីគ្នា អ្នកបច្ចេកទេសត្រូវរើរៀបនិងកែតម្រូវជាច្រើនដង ទើបធ្វើឱ្យការជួសជុលប្រាសាទមួយៗត្រូវចំណាយពេលយូររាប់ឆ្នាំ។

បើតាមលោក សោម សុផារ៉ាត់ ថ្មប្រាសាទបុរាណជាទូទៅប្រើប្រាស់សម្ភារៈ ៣ ប្រភេទគឺ ឥដ្ឋ ថ្មភក់ និងថ្មបាយក្រៀម។ ចំពោះរចនាសម្ព័ន្ធប្រាសាទធំៗ គេច្រើនជួបប្រទះថ្ម ២ ប្រភេទ ដែលផ្នែកខាងក្រៅគឺជាថ្មភក់ ដែលមើលឃើញពីខាងក្រៅទៅមានសោភ័ណភាព និងមានក្បូរក្បាច់រចនាស្អាត ប៉ុន្តែផ្នែកខាងក្នុងគឺសុទ្ធតែជាថ្មបាយក្រៀម។

លោកលើកឡើងឧទាហរណ៍ជាក់ស្តែងប្រាសាទអង្គរវត្ត គឺមានការប្រើប្រាស់ថ្មពីរបញ្ចូលគ្នា ដោយសំបកខាងក្រៅជាថ្មភក់ រីឯរចនាសម្ព័ន្ធផ្នែកខាងក្នុង និងគ្រឹះប្រាសាទគឺជាថ្មបាយក្រៀម៕

The post គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥% appeared first on Kampuchea Thmey Daily.

អ្នកស្រុកអង្គរបន្តជំនាញដូនតា ជួសជុលប្រាសាទតជំនាន់ពីឪពុកដល់កូន

Dy Bunnara — Wed, 27 May 2026 01:57:21 +0000

ដោយសារតែទំនាក់ទំនងមិនអាចកាត់ផ្តាច់បានរវាងប្រជាជននិងប្រាសាទ ការងារជួសជុលប្រាសាទបុរាណនៅក្នុងតំបន់រមណីយដ្ឋានអង្គរ ត្រូវបានបន្តវេនពីឪពុកទៅកូនពីពលរដ្ឋម្ចាស់ស្រុករស់នៅក្នុងតំបន់អង្គរ។

ទោះបីពលករចំណាស់ៗមួយចំនួនបានចាស់ជរា និងមួយចំនួនបានបាត់បង់ជីវិត ក៏ការងារមរតកដូនតានេះនៅតែមានអ្នកបន្តវេនឥតដាច់។

លោក សោម សុផាន់រ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានបញ្ជាក់ថា ការងារជួសជុលប្រាសាទនៅតំបន់អង្គរ ត្រូវបានផ្ទេរចំណេះដឹងពីអ្នកស្រុករស់នៅក្នុងតំបន់អង្គរបន្តពីមួយជំនាន់ទៅមួយជំនាន់។

លោកអះអាងយ៉ាងដូច្នេះថា «នៅពេលត្រូវការអ្នកជួសជុលប្រាសាទជំនួសពលករចាស់ៗដែលបាត់បង់ទៅ គេមិនជ្រើសរើសយកអ្នកមកពីចម្ងាយដូចជាមកពីភ្នំពេញ ឬបណ្តាខេត្តផ្សេងៗមកធ្វើការងារបន្តនោះទេ គឺការងារនេះត្រូវបន្តទៅកូនចៅ និងសាច់ញាតិរបស់ពលករដែលរស់នៅក្នុងតំបន់នោះស្រាប់ ដែលសបញ្ជាក់ថាកិច្ចការងារនេះគឺជាជំនាញដូនតាពិតប្រាកដ»។

ពលរដ្ឋនៅក្នុងតំបន់អង្គរមានការផ្សារភ្ជាប់ខ្លួននៅក្នុងការថែរក្សាមរតកដូនតា និងមានឫសគល់ជាអ្នកជួសជុលនិងថែរក្សាប្រាសាទបន្តជំនាន់ ហើយអ្នកខ្លះថែមទាំងមានបទពិសោធន៍ធ្វើការតាំងពីសម័យអាណានិគមបារាំងថែមទៀត។

លោក សោម សុផារ៉ាត់ អះអាងថា ទោះបីការអភិវឌ្ឍផ្នែកវិទ្យាសាស្ត្រមានការជឿនលឿន ហើយកិច្ចការជួសជុលប្រាសាទបុរាណមានការចូលរួមពីអ្នកបច្ចេកទេសអន្តរជាតិ ក៏អ្នកទាំងនោះត្រូវតែគោរពជំនាញដូនតារបស់អ្នកស្រុកអង្គរ ដោយផ្អែកលើលក្ខខណ្ឌបច្ចេកទេសនៃការជួសជុលប្រាសាទ ដែលត្រូវបានអនុវត្តបន្តពីបុរាណកាលមក៕

The post អ្នកស្រុកអង្គរបន្តជំនាញដូនតា ជួសជុលប្រាសាទតជំនាន់ពីឪពុកដល់កូន appeared first on Kampuchea Thmey Daily.

ប្រាសាទបាយ័នសាងសង់សម័យក្រោយ ទ្រុឌទ្រោមជាងប្រាសាទអង្គរវត្ត អ្នកជំនាញប្រាប់មូលហេតុ

Dy Bunnara — Tue, 26 May 2026 01:54:45 +0000

ប្រាសាទបាយ័ន កសាងឡើងក្នុងរាជ្យព្រះបាទជ័យវរ្ម័នទី ៧ ក្រោយសំណង់ប្រាសាទអង្គរវត្ត។ ប៉ុន្តែបើមើលសភាពប្រាសាទនេះវិញឃើញថា មានភាពទ្រុឌទ្រោមនិងរងការខូចខាតជាងប្រាសាទអង្គរវត្ត ដែលសាងសង់ក្នុងសម័យព្រះបាទសូរ្យវរ្ម័នទី ២។

លោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរាលើកពីមូលហេតុមួយចំនួន ដែលប្រាសាទបាយ័នសាងសង់សម័យកាលក្រោយរងការខ្ទេចខ្ទាំច្រើន និងមានសភាពឆាប់ចាស់ទ្រុឌទ្រោម គឺដោយសារកត្តាបច្ចេកទេសនៃការសាងសង់ និងកត្តាខាងក្រៅមួយចំនួន។

លោកប្រៀបធៀបលក្ខណៈបច្ចេកទេសនៃការសាងសង់ប្រាសាទបាយ័ន និងប្រាសាទអង្គរវត្តសាងសង់សម័យកាលពីរខុសគ្នា ខណៈប្រាសាទបាយ័នសាងសង់ក្នុងរាជ្យព្រះបាទជ័យវរ្ម័នទី ៧ និងប្រាសាទអង្គរវត្តសាងសង់សម័យក្នុងរាជ្យព្រះបាទសូរ្យវរ្ម័នទី ២ ។

«ខុសពីប្រាសាទអង្គរវត្តដែលសាងសង់ក្នុងរាជ្យព្រះបាទសូរ្យវរ្ម័នទី ២ គឺប្រើប្រាស់ប្រភេទថ្មធំៗ ខណៈប្រាសាទបាយ័នសាងសង់ឡើងដោយប្រើប្រាស់ថ្មតូចៗ។ ការប្រើប្រាស់ថ្មតូចៗគួបផ្សំនឹងទម្ងន់នៃសំណង់ដ៏ធំ ធ្វើឱ្យប្រាសាទមានហានិភ័យខ្ពស់ និងងាយរងការខូចខាតជាងប្រាសាទដែលប្រើថ្មធំៗ»។ លោក សោម សុផារ៉ាត់ អះអាង។

បន្ថែមពីនេះ អ្នកជំនាញរូបនេះបានក៏លើកឡើងពីកត្តាមនុស្សមកពាក់ព័ន្ធផងដែរ ដោយសារការផ្លាស់ប្ដូរសាសនា ឥទ្ធិពលនៃសង្គ្រាម និងអំពើចោរកម្មដូចជាការគាស់កកាយក្នុងសម័យសង្គ្រាម។

លោក សោម សុផារ៉ាត់ បានលើកពីកត្តាធម្មជាតិក៏ជាហេតុផលមួយទៀតដូចជា ការបំផ្លាញដោយដើមឈើ កត្តាខ្យល់ ទឹកសំណើម ក៏ធ្វើឱ្យមានការប្រែប្រួលដល់គ្រឹះប្រាសាទ និងបណ្តាលឱ្យរចនាសម្ព័ន្ធមួយចំនួនងាយនឹងដួលរលំ។

ប្រាសាទអង្គរវត្តត្រូវបានសាងសង់ឡើងក្នុងសតវត្សទី ១២ អំឡុងឆ្នាំ ១១២២ នៃគ.ស. ក្នុងរាជ្យព្រះបាទសូរ្យវរ្ម័នទី ២ ដើម្បីឧទ្ទិសដល់ព្រះវិស្ណុនៃព្រហ្មញ្ញសាសនា ខណៈប្រាសាទបាយ័នសាងសង់ឡើងនៅចុងសតវត្សទី ១២ ឬដើមសតវត្សទី១៣ ក្នុងរាជ្យព្រះបាទជ័យវរ្ម័នទី៧ សម្រាប់ឧទ្ទិសថ្វាយដល់ព្រះពុទ្ធសាសនាមហាយាន៕

The post ប្រាសាទបាយ័នសាងសង់សម័យក្រោយ ទ្រុឌទ្រោមជាងប្រាសាទអង្គរវត្ត អ្នកជំនាញប្រាប់មូលហេតុ appeared first on Kampuchea Thmey Daily.

ចាយពេលជាង ៣០ ឆ្នាំ ផ្នែកណាខ្លះនៃប្រាសាទបាយ័នកំពុងបន្តជួសជុល និងបានជួសជុលបញ្ចប់ទាំងស្រុង?

Dy Bunnara — Fri, 22 May 2026 03:06:12 +0000

តាមរយៈកិច្ចសហការជាមួយស្ថាប័នប្រទេសជប៉ុន ប្រាសាទបាយ័នបានទទួលការយកចិត្តទុកដាក់ក្នុងការជួសជុលនិងអភិរក្សតាំងពីឆ្នាំ ១៩៩៣ មក។

ស្របពេលដែលរមណីយដ្ឋានអង្គរ ត្រូវបានដាក់បញ្ចូលជាសម្បត្តិបេតិកភណ្ឌពិភពលោក ប្រទេសជប៉ុន ដែលជាសហប្រធាននៃអង្គការយូណេស្កូ គឺជាប្រទេសដំបូងគេដែលបានមកជួយធ្វើការស្រាវជ្រាវ និងជួសជុលនៅប្រាសាទបាយ័នក្នុងរយៈពេលជាង ៣០ ឆ្នាំមកនេះ។

លោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា

លោក សោម សុផារ៉ាត់ ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានគូសបញ្ជាក់ថា តាមរយៈកិច្ចសហការគ្នានេះ ក្រុមការងារបានបញ្ចប់ការជួសជុលបណ្ណាល័យខាងជើងមុនគេ ដែលបានចំណាយពេលដល់ទៅ ១០ ឆ្នាំ និងថវិកាប្រមាណ ១០ លានដុល្លារ ខណៈការងារបន្តកំពុងជួសជុលបណ្ណាល័យខាងត្បូង និងផ្នែកជាច្រើនទៀតជាបន្តបន្ទាប់។

លោក សោម សុផារ៉ាត់ បន្តថា សព្វថ្ងៃដោយសារមានកិច្ចសហការពិសេសមួយទៀតរវាងសាកលវិទ្យាល័យវ៉ាសេដាពីប្រទេសជប៉ុន និងអាជ្ញាធរជាតិអប្សរា ក្រុមការងារបានកំពុងធ្វើការពង្រឹងតួប៉មកណ្តាលជាន់ទី ៣ ដែលបានបិទអស់រយៈពេលជាង ៣០ ឆ្នាំ រួមទាំងតួប៉មទាំង ៨ ជុំវិញ និងកម្រាលបង្កាន់ដៃនាគនៅផ្នែកខាងក្រោម និងប្រាង្គអមផ្សេងៗទៀត។

បើតាមមន្រ្តីជំនាញអាជ្ញាធរជាតិអប្សរា ដោយសារប្រាសាទមានការខូចខាតច្រើន ទីតាំងផ្សេងៗត្រូវបានបែងចែកជួសជុលទៅតាមកម្រិតហានិភ័យជាផ្នែកម្តងបន្តិចៗជារៀងរាល់ឆ្នាំ។

លោក សោម សុផារ៉ាត់ បានអះអាងថា កិច្ចការជួសជុលនិងអភិរក្សត្រូវបានចាត់ទុកថាជាការងារដែលធ្វើគ្មានថ្ងៃបញ្ចប់ ពោលគឺត្រូវធ្វើជាបន្តបន្ទាប់ពីមួយជំនាន់ទៅមួយជំនាន់ ដើម្បីធានាស្ថិរភាពប្រាសាទដែលមានអាយុកាលរាប់ពាន់ឆ្នាំនេះសម្រាប់បន្តដល់កូនចៅជំនាន់ក្រោយ។

យ៉ាងណាមិញ មន្រ្តីបច្ចេកទេសអាជ្ញាធរអប្សរាបានគូសបញ្ជាក់ថា គ្រប់សកម្មភាពជួសជុលទាំងអស់គឺតែងតែគោរពតាមអនុសាសន៍របស់អ្នកជំនាញការ ICC យ៉ាងខ្ជាប់ខ្ជួនជានិច្ច។

ពាក់ព័ន្ធដំណើរការជួសជុលនៅប្រាសាទបាយ័ន លោក សោម សុផារ៉ាត់ បានបញ្ជាក់ថា ជាចក្ខុវិស័យអាជ្ញាធររំពឹងថានឹងបើកឲ្យភ្ញៀវទេសចរអាចចូលទស្សនានៅទីតាំង ដែលបានជួសជុលរួចក្នុងពេលឆាប់ៗឬអាចនៅឆ្នាំនេះក្រោយការងាររួចរាល់ទាំងស្រុង៕

The post ចាយពេលជាង ៣០ ឆ្នាំ ផ្នែកណាខ្លះនៃប្រាសាទបាយ័នកំពុងបន្តជួសជុល និងបានជួសជុលបញ្ចប់ទាំងស្រុង? appeared first on Kampuchea Thmey Daily.

បុគ្គលិកជំនាញ ១៦០ នាក់ រួមគ្នាគ្នាអភិរក្សនិងជួសជុលប្រាសាទនៅតំបន់អង្គរ

Dy Bunnara — Thu, 21 May 2026 02:37:45 +0000

នៅក្នុងនាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា មានមន្ត្រីជំនាញនិងបុគ្គលិកបច្ចេកទេសសរុបចំនួន ១៦០ នាក់ ដែលកំពុងធ្វើកិច្ចការងារពាក់ព័ន្ធការអភិរក្សនិងជួសជុលប្រាសាទបុរាណនៅតំបន់រមណីយដ្ឋានអង្គរ។

លោក សោម សុផារ៉ាត ប្រធាននាយកដ្ឋានអភិរក្សប្រាសាទ និងបុរាណវិទ្យាបានឲ្យដឹងថា នាយកដ្ឋានអភិរក្សប្រាសាទ និងបុរាណវិទ្យាមានការិយាល័យចំនួន ៣ និងមានមន្រ្តីបច្ចេកទេសចំនួន ១៦០ នាក់ដែលទទួលខុសត្រូវតាមផ្នែកនីមួយៗ។ ក្នុងនោះនៅក្នុងការិយាល័យកិច្ចការអភិរក្ស និងជួសជុលប្រាសាទមានមន្ត្រីជំនាញប្រមាណ ៦០ នាក់ ដែលទទួលខុសត្រូវ និងមានជំនាញខុសៗគ្នា។

ពាក់ព័ន្ធកិច្ចការជួសជុល និងអភិរក្សប្រាសាទនៅតំបន់រមណីយដ្ឋានអង្គរ លោក សោម សុផារ៉ាត បានបញ្ជាក់ថា ទាមទារការសហការគ្នារវាងជំនាញសំខាន់ៗចំនួន ៣ គឺជំនាញស្ថាបត្យកម្ម ជំនាញវិស្វកម្ម និងជំនាញបុរាណវិទ្យា។

«ជំនាញទាំង ៣ នេះ គឺសំខាន់ណាស់ដែលត្រូវរួមគ្នា ហើយត្រូវបែកចែងភារកិច្ចគ្រប់គ្រងតាមការដ្ឋានជួសជុលប្រាសាទនីមួយៗ»។

ខណៈទំហំការងារជួសជូសប្រាសាទបុរាណនៅតំបន់អង្គរមានវិសាលភាពធំ ហើយជាកិច្ចការដែលត្រូវចំណាយពេលបន្តពីមួយជំនាន់ទៅមួយជំនាន់ បច្ចុប្បន្នចំនួនមន្ត្រីជំនាញគឺមិនទាន់អាចឆ្លើយតបបានគ្រប់គ្រាន់ ដែលធ្វើឲ្យអ្នកជំនាញត្រូវរ៉ាប់រងបន្ទុកការងារបន្ថែម។ នេះបើតាមលោក សោម សុផារ៉ាត។

បើតាមលោក សោម សុផារ៉ាត កិច្ចការជួសជុសប្រាសាទទាមទាមរការលះបង់បេះដូង និងសេចក្តីស្រឡាញ់ចំពោះបេតិកភណ្ឌ។ ការចុះទៅបំពេញការងារតាមការដ្ឋានប្រាសាទមិនមែនដូចការសាងសង់សំណង់ទំនើបៗនោះឡើយ ប៉ុន្តែទាមទារឲ្យមន្ត្រីទាំងអស់ត្រូវលះបង់កម្លាំងកាយចិត្ត បើកបេះដូងស្រឡាញ់មរតកបេតិកភណ្ឌ និងចាត់ទុកខ្លួនឯងជាម្ចាស់ប្រាសាទ ទើបអាចបំពេញកិច្ចការងារដ៏មានតម្លៃនេះបាន។

តំបន់រមណីយដ្ឋានអង្គរគ្របដណ្តប់លើផ្ទៃដីទំហំ ៤០១ គីឡូម៉ែត្រការ៉េ។ នៅក្នុងតំបន់រមណីយដ្ឋានអង្គរមានប្រាសាទបុរាណចំនួន ៩១ ស្ថិតនៅក្នុងដែនគ្រប់គ្រងរបស់អាជ្ញាធរជាតិអប្សរា។

ប្រាសាទក្នុងតំបន់អង្គរមួយចំនួន កំពុងត្រូវបានជួសជុលថែទាំយ៉ាងយកចិត្តទុកដាក់ ក្រោមកិច្ចសហការជាមួយអង្គការអន្តរជាតិនានា និងប្រទេសជាដៃគូ៕

The post បុគ្គលិកជំនាញ ១៦០ នាក់ រួមគ្នាគ្នាអភិរក្សនិងជួសជុលប្រាសាទនៅតំបន់អង្គរ appeared first on Kampuchea Thmey Daily.

ជិត ១០០ ឆ្នាំមុន ជនជាតិបារាំងស្រាវជ្រាវរកឃើញរូបព្រះពុទ្ធប្រក់នាគលើកំពូលប្រាសាទបាយ័ន

Dy Bunnara — Wed, 13 May 2026 00:30:00 +0000

នៅជាន់ទី ៣ ផ្នែកខាងលើប្រាសាទបាយ័ន បានបិទមិនឱ្យភ្ញៀវទេសចរចូលទស្សនារយៈពេលជាង ៣០ ឆ្នាំមកហើយ ដោយសារមានហានិភ័យខ្ពស់អាចបង្កគ្រោះថ្នាក់ ដោយអាជ្ញាធរបានដាក់ផ្លាកហាមឃាត់មិនឱ្យទេសចរឡើងឬជាន់ឡើយ។

បើតាមប្រភពពីមន្រ្តីអាជ្ញាធរជាតិអប្សរាបានឲ្យដឹងថា ទីតាំងទីនោះកាលពីជាង ១០០ ឆ្នាំមុន ត្រូវបានក្រុមអ្នកស្រាវជ្រាវបារាំងបានជីកកកាយរកឃើញរូបសំណាក់ព្រះពុទ្ធប្រក់នាគ ដែលត្រូវបានគេវាយកម្ទេចកប់ចោលនៅទីនោះ។

ផ្តល់បទសម្ភាសន៍ដល់ក្រុមអ្នកសារព័ត៌មានប្រមាណ ១០ ស្ថាប័ន ដែលធ្វើដំណើរចុះទៅសិក្សាស្វែងយល់ពីតំបន់បេតិកភណ្ឌនៅតំបន់រមណីយដ្ឋានអង្គរ លោក សោម សុផារ៉ាត ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានឲ្យដឹងថា នៅជាន់ទី ៣ កំពូលប្រាសាទបាយ័នគឺជាជាន់ខ្ពស់ជាងគេបំផុតនិងជាកន្លែងទីសក្ការៈដ៏សំខាន់បំផុតសម្រាប់តម្កល់អាទិទេព។

លោកបានប្រៀបធៀបជាន់ទី ៣ លើកំពូលប្រាសាទបាយ័នដូចជាន់បាកាននៅប្រាសាទអង្គរវត្តដែលជាជាន់ខ្ពស់ជាងគេ និងជាទីសក្ការៈសម្រាប់គោរពបូជា។

ពាក់ព័ន្ធប្រវត្តិព្រះពុទ្ធរូបប្រក់នាគដែលត្រូវបានរកឃើញកាលពីជិត ១០០ ឆ្នាំមុននៅជាន់កំពូលប្រាសាទបាយ័នដោយអ្នកស្រាវជ្រាវបារាំង លោក សោម សុផារ៉ាត បានរៀបរាប់ប្រាប់ថា នៅទសវត្សរ៍ឆ្នាំ ១៩៣០ ជនជាតិបារាំងបានស្រាវជ្រាវរកឃើញព្រះពុទ្ធរូបប្រក់នាគដែលត្រូវបានគេវាយបំបែក និងកប់ចោលនៅខាងក្នុង។ ក្រោយមកអតីតព្រះមហាក្សត្រព្រះបាទ មុនីវង្ស បានបញ្ជាឱ្យគេជួសជុលនិងដង្ហែព្រះពុទ្ធរូបប្រក់នាគនោះយកទៅតម្កល់នៅវិហារប្រាំពីរល្វែងនិងបន្តស្ថិតនៅទីនោះរហូតមកដល់ពេលនេះ។

បើតាមលោក សោម សុផារ៉ាត បច្ចុប្បន្នក្រុមការងារកំពុងដំណើរការជួសជុលទីតាំងទាំងនោះ ហើយយោងតាមលក្ខខណ្ឌនៃកិច្ចការអភិរក្ស អាជ្ញាធរនឹងបើកឱ្យភ្ញៀវទេសចរចូលទស្សនាវិញនៅពេលដែលការជួសជុលរួចរាល់ និងធានាបានថាអស់ហានិភ័យទាំងស្រុង៕

The post ជិត ១០០ ឆ្នាំមុន ជនជាតិបារាំងស្រាវជ្រាវរកឃើញរូបព្រះពុទ្ធប្រក់នាគលើកំពូលប្រាសាទបាយ័ន appeared first on Kampuchea Thmey Daily.

ប្រាសាទអង្គរវត្តអាយុជិត ១ ពាន់ឆ្នាំ បញ្ចប់ការជួសជុលផ្នែកណាខ្លះ និងផ្នែកណាខ្លះបន្តជួសជុល?

Dy Bunnara — Thu, 12 Jun 2025 02:39:05 +0000

ប្រាសាទអង្គរវត្តដែលមានអាយុកាលជិត ១ ពាន់ឆ្នាំ បានទទួលរងការខូចខាតដោយអន្លើដោយសារអាយុកាលផង និងកត្តាធម្មជាតិផង ដែលតម្រូវឲ្យមានការជួសជុលថែទាំជាប្រចាំ ដើម្បីឲ្យសំណង់ជាសម្បត្តិបេតិកភណ្ឌពិភពលោកបន្តរក្សាបានភាពរឹងមាំ។

លោក សោម សុផារ៉ាត ប្រធាននាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានឲ្យដឹងថា រយៈពេលជាច្រើនឆ្នាំនេះ ប្រាសាទអង្គរវត្តបានទទួលការជួសជុលជាបន្តបន្ទាប់ ដោយផ្នែកខ្លះបានបញ្ចប់ការជួសជុលទាំងស្រុង និងផ្នែកខ្លះនៅតែបន្តការងារជួសជុលដោយមានកិច្ចសហការពីអ្នកជំនាញក្នុងស្រុកនិងក្រៅស្រុក។

លោកបានលើកឡើងផ្នែកដែលបានបញ្ចប់ការជួសជុលមានដូចជាស្ពានហាល (Causeway) ខាងមុខប្រាសាទអង្គរវត្ត ដែលចំណាយពេលជួសជុលជាង ១០ ឆ្នាំ និងបានបើកឲ្យប្រើប្រាស់ជាផ្លូវការកាលពីឆ្នាំ ២០២៣។

ក្លោងទ្វារខាងកើត ដែលពីដើមមានហានិភ័យខ្ពស់ក្រោយបញ្ចប់ការជួសជុល ក៏បានបើកឲ្យទេសចរអាចធ្វើដំណើរឆ្លងកាត់បាន។ នៅផ្នែកខាងលើនៃថែវកូរសមុទ្រទឹកដោះ ដែលមានទឹកដក់ជ្រាបក៏បានបញ្ចប់ការជួសជុល រួមទាំងស្ពានហាលនាគក៏បានបញ្ចប់ការជួសជុល និងបើកឲ្យទេសចរអាចចូលទស្សនាបាន។

ដោយឡែកខឿនឡើងជាន់បាកាន ក៏កំពុងទទួលការជួសជុលដោយមានកិច្ចសហការពីរដ្ឋាភិបាលប្រទេសកូរ៉េ។

លោក សោម សុផារ៉ាត បន្តថា ក្រៅពីប្រាសាទអង្គរវត្ត អាជ្ញាធរជាតិអប្សរាក៏បានកំពុងជួសជុលប្រាសាទមួយចំនួនទៀតនៅក្នុងរមណីយដ្ឋានអង្គរ ខណៈប្រាសាទដែលមានទំហំធំត្រូវការជួសជុលតាមផ្នែកដែលប្រឈមហានិភ័យខ្ពស់។

លោកលើកឡើងប្រាសាទតូចៗដែលបានបញ្ចប់ការជួសជុលមានដូចជា ប្រាសាទទន្លេស្ងួត និងប្រាសាទព្រហ្មកិល ខណៈប្រាសាទតាព្រហ្មបានបញ្ចប់ការជួសជុលផ្នែកសាលរបាំ និងកំពុងបន្តជួសជុលខ្លោងទ្វារខាងកើត និងខ្លោងទ្វារខាងលិចបន្តទៀត៕

The post ប្រាសាទអង្គរវត្តអាយុជិត ១ ពាន់ឆ្នាំ បញ្ចប់ការជួសជុលផ្នែកណាខ្លះ និងផ្នែកណាខ្លះបន្តជួសជុល? appeared first on Kampuchea Thmey Daily.

លោក សោម សុផារ៉ាត Archives - Kampuchea Thmey Daily

គោលការណ៍​ធម្មនុញ្ញ​អង្គរ ការ​ជួសជុល​ប្រាសាទ​បុរាណមិន​ឲ្យ​ប្រើ​ថ្ម​ថ្មី​លើ​សពី ២៥%​

អ្នក​ស្រុក​អង្គរ​បន្ត​​ជំនាញ​ដូនតា ជួសជុល​ប្រាសាទ​ត​ជំនាន់​ពី​ឪពុក​ដល់​កូន

ប្រាសាទ​បាយ័ន​សាងសង់​សម័យ​ក្រោយ​ ​ទ្រុឌទ្រោម​​ជាង​ប្រាសាទ​អង្គរ​វត្ត អ្នកជំនាញប្រាប់មូលហេតុ

​ចាយពេលជាង ៣០ ឆ្នាំ ​ផ្នែក​ណា​ខ្លះ​នៃ​ប្រាសាទ​បាយ័ន​​កំពុងបន្ត​ជួសជុល និង​បាន​ជួសជុល​បញ្ចប់ទាំងស្រុង?