លោក ស៊ូ សុជាតិ Archives - Kampuchea Thmey Daily

កម្ពុជា-ជប៉ុន រួមគ្នាជំរុញការប្រើប្រាស់បច្ចេកវិទ្យាក្នុងការអភិវឌ្ឍវិស័យមូលបត្រ

Din Thary — Thu, 05 Mar 2026 08:10:21 +0000

និយ័តករមូលបត្រកម្ពុជា និងក្រុមហ៊ុន GFTN Japan Ltd. របស់ជប៉ុន បានចុះអនុស្សរណៈយោគយល់គ្នា (MoU) ដើម្បីជំរុញការប្រើប្រាស់នូវបច្ចេកវិទ្យាហិរញ្ញវត្ថុ ( Fintech) ក្នុងការអភិវឌ្ឍវិស័យមូលបត្ររបស់កម្ពុជាឱ្យកាន់តែភាពសម្បូរបែប និងផ្តល់ភាពងាយស្រួលដល់វិនិយោគិន។

លោក ស៊ូ សុជាតិ បានឱ្យ «កម្ពុជាថ្មី» ដឹងនៅថ្ងៃទី០៥ ខែមិនា ឆ្នាំ២០២៦ នេះថា និយ័តករមូលបត្រកម្ពុជា បានចុះMoU ជាមួយនឹងក្រុមហ៊ុនGFTN Japan Ltd. របស់ជប៉ុន ដែលជាក្រុមហ៊ុនផ្នែករៀបចំ និងយល់ដឹងការងារផ្នែកតួនាទីនៃការប្រើប្រាស់ឌីជីថល និង បច្ចេកវិទ្យាហិរញ្ញវត្ថុ (Fintech)។

លោកបានគូសបញ្ជាក់ថា ក្រុមហ៊ុននេះ ជាក្រុមនៃផ្នែកហិរញ្ញវត្ថុ និងបច្ចេកវិទ្យា (Finance and technology)ដែលមានឈ្មោះថា បណ្តាញហិរញ្ញវត្ថុ និងបច្ចេកវិទ្យាសកល (Global Finance and technology network ) ដោយមានតួនាទីជាអ្នករៀបចំផង ជាអ្នកជំនាញផង ហើយក៏ជាអ្នកជំនាញផងផ្នែក technology មានស្នាក់ការនៅសង្ហបុរី និងទីក្រុងតូក្យូ។

លោកថា៖«ការចុះអនុស្សរណៈនៃការយោគយល់គ្នារវាងនិយ័តករមូលបត្រ និងក្រុមហ៊ុនជប៉ុននេះ ធ្វើឡើងនៅក្នុងគោលដៅសំខាន់ គឺដើម្បីចែករំលែកនូវបទពិសោធន៍គ្នាទៅវិញទៅមកផ្នែកហិរញ្ញវត្ថុ និងបច្ចេកវិទ្យា (Finance and technology) ។ ជាពិសេសពាក់ព័ន្ធនិងវិស័យមូលបត្រ លើការបង្កើតកិច្ចសហប្រតិបត្តិការ ដោយផ្តោត លើអត្ថប្រយោជន៍រួមនៃការជំរុញនវានុវត្តន៍បច្ចេកវិទ្យាហិរញ្ញវត្ថុ, ការធ្វើបរិវត្តកម្មឌីជីថលនៅក្នុងវិស័យមូលបត្រ និងស្ថាប័ន, ការកសាងសមត្ថភាពរបស់មន្ត្រីជំនាញពាក់ព័ន្ធនឹងបច្ចេកវិទ្យាហិរញ្ញវត្ថុ និងការបង្កើតកិច្ចសហការ អន្តរជាតិ»។

លោក ស៊ូ សុជាតិ បានបញ្ជាក់ថា ការងារនេះបាននឹងកំពុងចាប់ផ្តើមជាមួយគ្នា មានន័យថាបច្ចុប្បន្នកម្ពុជា និងជប៉ុន ជាដៃគូជាមួយគ្នាផ្នែកនិយ័តករ និងពិនិត្យមើលរឿងផ្នែកបទបញ្ញាត្តិ ដោយខាងក្រុមហ៊ុនជប៉ុនជាអ្នកចែករំលែកបទពិសោធន៍មកកាន់កម្ពុជាលើការរីកចម្រើននៃបច្ចេកវិទ្យាថ្មីៗ ការប្រកួតប្រជែង និងហានិភ័យនានា ដែលកម្ពុជាត្រូវការចាំបាច់នូវអ្នកជំនាញដើម្បីអាចឱ្យនិយ័តករមូលបត្រអាចធ្វើការងារគ្រប់គ្រងក៏ដូចជាបទបញ្ញាត្តិកាន់តែអាចទទួលយកបាននៅក្នុងវិស័យបច្ចេកវិទ្យាថ្មីៗ។

ទន្ទឹមនេះ លោក ស៊ូ សុជាតិ បានបន្ថែមថា ដំណាងក្រុមហ៊ុនលោក Takeshi Kito ក៏នឹងរៀបចំការធ្វើពិព័រណ៍បច្ចេកវិទ្យា (Fintech) សម្រាប់វិស័យហិរញ្ញវត្ថុជារួមនៅកម្ពុជានៅចុងឆ្នាំ២០២៦ នេះ ដោយនិយ័តករមូលបត្រកម្ពុជា ក៏នឹងចូលរួមជាមួយក្រុមហ៊ុនក្នុងការបង្ហាញនូវការរីកចម្រើនវិស័យហិរញ្ញវត្ថុ និងបច្ចេកវិទ្យាពីប្រទេសជប៉ុនមកកាន់កម្ពុជា៕

ដោយ៖ ឌិន ថារី

The post កម្ពុជា-ជប៉ុន រួមគ្នាជំរុញការប្រើប្រាស់បច្ចេកវិទ្យាក្នុងការអភិវឌ្ឍវិស័យមូលបត្រ appeared first on Kampuchea Thmey Daily.

ការលើកលែងពន្ធលើចំណេញមូលធន នឹងទាក់ទាញវិនិយោគិនឱ្យចូលមកក្នុងវិស័យមូលបត្រកាន់តែច្រើន

Din Thary — Fri, 20 Feb 2026 04:13:53 +0000

ពាក់ព័ន្ធនឹងការសម្រេចអនុម័តរបស់ក្រសួងសេដ្ឋកិច្ច ស្តីពី ការលើកលែងពន្ធលើចំណេញមូលធនសម្រាប់ផលិតផលក្នុងវិស័យមូលបត្រ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) បានមានប្រសាសន៍ថា នេះគឺជាផ្នែកមួយនៃការលើកទឹកចិត្តពន្ធរបស់រាជរដ្ឋាភិបាលសម្រាប់វិស័យមូលបត្រ។

ថ្លែងប្រាប់«កម្ពុជាថ្មី» នៅថ្ងៃទី២០ ខែកុម្ភៈ ឆ្នាំ២០២៦ នេះ លោក ស៊ូ សុជាតិ បានលើកឡើងកន្លងមកជុំវិញវិស័យមូលបត្រក៏មានអនុក្រឹតផ្សេងដែលការលើកទឹកចិត្តដល់វិនិយោគិនក្នុងវិស័យមួយនេះផងដែរ។

ជាក់ស្តែង ការសម្រេចអនុម័តរបស់ក្រសួងសេដ្ឋកិច្ចនេះទៀតសោទ គឺជាការបញ្ជាក់ជំហរមួយផ្សេងទៀតសម្រាប់ពន្ធថ្មី ព្រោះកាលពីក្នុងឆ្នាំ២០២៥ ក្រសួងសេដ្ឋកិច្ច និងហិរញ្ញវត្ថុ ក៏បានប្រកាសស្តីពីការយកពន្ធលើចំណេញមូលធន ដូច្នេះហើយការសម្រេចអនុម័តលើកលែងពន្ធលើចំណេញមូលធនសម្រាប់ផលិតផលក្នុងវិស័យមូលបត្រនេះបញ្ជាក់បន្ថែមថា ជាការគាំទ្រ និងជាការលើកទឹកចិត្តសម្រាប់ឱ្យវិនិយោគិនធ្វើការជួញដូរក្នុងវិស័យមូលបត្រដោយមិនទាន់មានការយកពន្ធលើចំណេញមូលធន ដែលនេះជាផ្នែកនៃការគាំទ្ររបស់រាជរដ្ឋាភិបាលសម្រាប់អភិវឌ្ឍន៍បន្តនៅក្នុងវិស័យមួយនេះ។

សម្រាប់ឆ្នាំ២០២៦ នេះ លោក ស៊ូ សុជាតិ បានអះអាងថា និយ័តករមូលបត្រកម្ពុជាមានសុទិដ្ឋិនិយមថា បន្ទាប់ពីការប្រកាសលើកលែងពន្ធលើចំណេញមូលធននេះហើយនឹងមានក្រុមហ៊ុនជាច្រើនដែលនឹងចាប់ផ្តើមចូលទីផ្សារ មានការបោះផ្សាយមូលបត្រកម្មសិទ្ធ ប៉ុន្តែការបោះផ្សាយមូលបត្រកម្មសិទ្ធ គឺអាចនៅមានទំហំតូចៗនៅឡើយ។ ដោយឡែក និយ័តករមូលបត្រកម្ពុជា ក៏នឹងមានការបោះផ្សាយមូលបត្របំណុលដែលមានទំហំធំៗនៅក្នុងឆ្នាំ២០២៦ នេះ។

ជាមួយគ្នានេះ លោក ស៊ូ សុជាតិ ជឿជាក់ថា ទំហំនៃការបោះផ្សាយ ឆ្នាំ២០២៦ នេះ និយ័តករមូលបត្រនឹងខិតខំជំរុញឱ្យបានរហូតដល់ទំហំប្រហាក់ប្រហែល ៣០០លានដុល្លារអាមេរិកសម្រាប់ចុះផ្សាយនៅក្នុងផ្សារមូលបត្រ។

សូមជម្រាបថា ក្រសួងសេដ្ឋកិច្ច និងហិរញ្ញវត្ថុនៅថ្ងៃទី១៩ ខែកុម្ភៈ ឆ្នាំ២០២៦ បានប្រកាសអនុម័តដាក់ឱ្យប្រើប្រាស់ជាផ្លូវការនូវការលើកលែងពន្ធលើចំណេញមូលធនសម្រាប់ផលិតផលក្នុងវិស័យមូលបត្រ សំដៅធ្វើយ៉ាងដើម្បីទាក់ទាញវិស័យឯកជនធ្វើការបោះផ្សាយមូលបត្រនៅលើផ្សារមូលបត្រកម្ពុជា ដែលត្រូវបានចាត់ទុកថាជាប្រភពទុនថ្មី។

ការសម្រេចដាក់ឱ្យប្រើប្រាស់នូវការលើកលែងពន្ធលើចំណេញមូលធនសម្រាប់ផលិតផលក្នុងវិស័យមូលបត្រនេះ គឺធ្វើឡើងនៅក្នុងគោលបំណងផ្តល់ការលើកលែងពន្ធលើចំណេញ មូលធនសម្រាប់ផលិតផលមូលបត្រស្របតាមអនុក្រឹត្យលេខ ៣៩ អនក្រ.បក ចុះថ្ងៃទី១៤ ខែមីនា ឆ្នាំ២០២៥ ស្តីពីការលើកទឹកចិត្តពន្ធដារក្នុងវិស័យមូលបត្រ និងការពន្យារពេលអនុវត្តពន្ធលើចំណេញមូលធនសម្រាប់ ផលិតផលផ្សេងទៀតក្នុងវិស័យមូលបត្រ៕

ដោយ៖ ឌិន ថារី

The post ការលើកលែងពន្ធលើចំណេញមូលធន នឹងទាក់ទាញវិនិយោគិនឱ្យចូលមកក្នុងវិស័យមូលបត្រកាន់តែច្រើន appeared first on Kampuchea Thmey Daily.

លោក ស៊ូ សុជាតិ៖ ការដាក់ឱ្យដំណើរការថ្នាលជួញដូរទ្រព្យឌីជីថលក្នុងវិស័យមូលបត្រ បង្ហាញពីវឌ្ឍនភាពនៃការអភិវឌ្ឍបច្ចេកវិទ្យាហិរញ្ញវត្ថុ

Din Thary — Thu, 05 Feb 2026 02:58:02 +0000

លោក ស៊ូ សុជាតិ អគ្គនាយកនិយ័តករមូលបត្រកម្ពុជាបានលើកឡើងថា ការដាក់ឱ្យដំណើរកាថ្នាលជួញដូរទ្រព្យឌីជីថលនៅក្នុងវិស័យមូលបត្រ គឺបង្ហាញពីវឌ្ឍនភាពនៃការអភិវឌ្ឍបច្ចេកវិទ្យាហិរញ្ញវត្ថុនៅក្នុងវិស័យមូលបត្រ តាមរយៈការជំរុញការអនុវត្តក្របខ័ណ្ឌគោលនយោបាយរបស់រាជរដ្ឋាភិបាលពាក់ព័ន្ធនឹងបច្ចេកវិទ្យាហិរញ្ញវត្ថុ។

លោកបានលើកឡើងបែបនេះ នៅក្នុងកម្មវិធីដាក់ឱ្យដំណើរការផ្ទាល់ជួញដូរទ្រព្យឌីជីថលនៅក្នុងបរិស្ថាន សាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្ររបស់ក្រុមហ៊ុន ស៊ីធីអ៊ុច-98 កាលពីពេលថ្មីៗនេះ។

បើតាមលោក ស៊ូ សុជាតិ ការដាក់ឱ្យដំណើរកាថ្នាល ជួញដូរទ្រព្យឌីជីថលរបស់ក្រុមហ៊ុន ស៊ីធីអ៊ុច-98 ឯ.ក នៅក្នុងបរិស្ថានសាកល្បងបច្ចេកវិទ្យាហិរញ្ញវត្ថុ ក្នុងវិស័យមូលបត្រ គឺបង្ហាញពីវឌ្ឍនភាពនៃការអភិវឌ្ឍបច្ចេកវិទ្យាហិរញ្ញវត្ថុនៅក្នុងវិស័យមូលបត្រ តាមរយៈការជំរុញការអនុវត្តក្របខ័ណ្ឌគោលនយោបាយរបស់រាជរដ្ឋាភិបាលពាក់ព័ន្ធនឹងបច្ចេកវិទ្យា ហិរញ្ញវត្ថុ។

លោកបានគូសបញ្ជាក់ថា៖ «បន្ទាប់ពីក្រុមហ៊ុនជោគជ័យក្នុងការសាកល្បងផ្ទាល់ជួញដូរទ្រព្យឌីជីថលក្នុងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្រ ក្រុមហ៊ុនអាចស្នើសុំអាជ្ញាបណ្ណ ដើម្បីធ្វើអាជីវកម្មផ្តល់សេវាទ្រព្យឌីជីថល ស្របតាមបទប្បញ្ញត្តិជាធរមានផងដែរ»។

កម្មវិធីដាក់ឱ្យដំណើរការថ្នាល ជួញដូរទ្រព្យឌីជីថល ត្រូវបានរៀបចំឡើងក្នុងគោលបំណងបង្ហាញដល់សាធារណជន និងវិនិយោគិន សក្តានុពលអំពីការដាក់ឱ្យដំណើរការផ្ទាលជួញដូរទ្រព្យឌីជីថល របស់ក្រុមហ៊ុន ស៊ីធីអ៊ុច-98 ឯ.ក ដែល ជាក្រុមហ៊ុនទទួលបានការអនុញ្ញាតពីនិយ័តករមូលបត្រកម្ពុជា ឱ្យដាក់ថ្នាលជួញដូរទ្រព្យឌីជីថលចូលរួមក្នុងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្រ។

ជាក់ស្តែង ថ្នាលជួញដូរទ្រព្យឌីជីថល ជាថ្នាលជួញដូរដែលប្រើប្រាស់បច្ចេកវិទ្យាប្លុកឆេន ដែលត្រូវបានមជ្ឈដ្ឋានទូទាំងពិភពលោកចាត់ទុកថាជាបច្ចេកវិទ្យាថ្មីមួយ ដែលអាចជួយបង្កើននូវប្រសិទ្ធិភាព សុវត្ថិភាព និងតម្លាភាពនៃប្រតិបត្តិការហិរញ្ញវត្ថុ ព្រមទាំងបង្កើតនូវកាលានុវត្តភាពជាផលិតផល និងសេវាកម្មហិរញ្ញវត្ថុថ្មីៗនៅក្នុងវិស័យមូលបត្រ៕

The post លោក ស៊ូ សុជាតិ៖ ការដាក់ឱ្យដំណើរការថ្នាលជួញដូរទ្រព្យឌីជីថលក្នុងវិស័យមូលបត្រ បង្ហាញពីវឌ្ឍនភាពនៃការអភិវឌ្ឍបច្ចេកវិទ្យាហិរញ្ញវត្ថុ appeared first on Kampuchea Thmey Daily.

ផ្សារមូលបត្រកៀរគរទុនប្រមាណ ៧០០ លានដុល្លារ

Din Thary — Mon, 26 Jan 2026 04:26:49 +0000

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានបញ្ជាក់ប្រាប់ឱ្យដឹងថា គិតរហូតមកដល់ពេលនេះ ក្រុមហ៊ុនដែលបានបោះផ្សាយ និងចុះបញ្ជីលក់មូលបត្រ នៅផ្សារមូលបត្រកម្ពុជា បានប្រមូលសាច់ប្រាក់ពីទីផ្សារក្នុងរង្វង់ ៧០០ លានដុល្លារអាមេរិក។

ក្នុងពិធីចុះបញ្ជីលក់សញ្ញាបណ្ណជាផ្លូវការរបស់ ក្រុមហ៊ុន ជូនពេញ អាហ្វ្រិកូ នៅផ្សារមូលបត្រកម្ពុជា នៅថ្ងៃទី ២១ ខែមករា ឆ្នាំ ២០២៦ លោក ស៊ូ សុជាតិ មានប្រសាសន៍ថា តាមរយៈការដាក់ចេញនូវបទប្បញ្ញត្តិថ្មីៗ និងគំនិតផ្តួចផ្តើមដើម្បីបង្កើនចំណេះដឹងផ្នែកហិរញ្ញវត្ថុដល់សាធារណជន និងបណ្តាក្រុមហ៊ុននានា ទីផ្សារមូលបត្រកម្ពុជាបានទទួលការចាប់អារម្មណ៍យ៉ាងខ្លាំង ដោយក្នុងនោះមានក្រុមហ៊ុនជាច្រើនដែលកំពុងត្រៀមខ្លួនធ្វើការបោះពុម្ភផ្សាយលក់ទាំងមូលបត្រកម្មសិទ្ធិ និងមូលបត្រចំណូល ហើយនឹងអាចធ្វើការចុះបញ្ជីលក់មូលបត្ររបស់ខ្លួនជាបន្តបន្ទាប់នាពេលឆាប់ៗខាងមុខនេះ។

គិតមកដល់ពេលនេះ ក្រុមហ៊ុនដែលបានបោះផ្សាយ និងចុះបញ្ជីលក់មូលបត្រនៅផ្សារ មូលបត្រកម្ពុជា បានប្រមូលសាច់ប្រាក់ពីទីផ្សារក្នុងរង្វង់ ៧០០ លានដុល្លារអាម៉េរិក។ ក្នុងនោះ មានក្រុមហ៊ុនចំនួន ១២ បានបោះផ្សាយលក់មូលបត្រកម្មសិទ្ធិ និងក្រុមហ៊ុនចំនួន ១៥ បានបោះផ្សាយលក់ មូលបត្របំណុល ដោយរួមបញ្ចូលទាំងសញ្ញាបណ្ណបៃតង និងសញ្ញាបណ្ណចីរភាព ដែលនេះជាមោទនភាពមួយសម្រាប់កម្ពុជា។

លោក ស៊ូ សុជាតិ បានអះអាងថា «ថ្វីត្បិតតែប្រទេសកម្ពុជាយើងចាប់ផ្តើមទីផ្សារក្រោយគេ ហើយទំហំទីផ្សារនៅតូច ប៉ុន្តែការអនុវត្ត និងការអភិវឌ្ឍទីផ្សារ គឺស្របទៅនឹងនិន្នាការថ្នាក់តំបន់ និងសកល»។

ទន្ទឹមនេះ លោក ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃផ្សារមូលបត្រកម្ពុជា បានលើកឡើងដែរថា សក្តានុពលនៃទីផ្សារមូលបត្រ គឺពុំមានដែនកំណត់នោះទេ ក្រុមហ៊ុនដែលមានកំណើនអាជីវកម្មអាចកៀរគរទុនម្តងហើយម្តងទៀត ដោយវិសាលភាពនៃវិនិយោគិនរបស់យើងធំទូលាយ និងមានពីគ្រប់វិស័យ ទាំងរូបវ័ន្តបុគ្គល និងនីតិបុគ្គល ទាំងក្នុងស្រុក និងក្រៅស្រុក។

តាមរយៈសមិទ្ធិផលកន្លងមក និងការប្រមូលទុនយ៉ាងគំហុកនៅក្នុងឆ្នាំមុននេះ ការកៀរគរទុនបានកើនឡើងរហូតដល់ប្រមាណ ២៦៥ លានដុល្លារអាមេរិក។

ពាក់ព័ន្ធទៅនឹងទីផ្សារភាគហ៊ុន លោក ហុង សុហួរ ក៏បានឱ្យដឹងដែរថា គិតត្រឹមបច្ចុប្បន្ននេះ ផ្សារមូលបត្រកម្ពុជាមានក្រុមហ៊ុនចុះបញ្ជីសរុបចំនួន ២៧ ដែលរួមមានក្រុមហ៊ុនចំនួន ១២ បានចុះបញ្ជីលក់មូលបត្រកម្មសិទ្ធិ និងក្រុមហ៊ុន ១៥ ទៀត បានចុះបញ្ជីជាសញ្ញាបណ្ណសាជីវកម្ម។ ក្រុមហ៊ុនទាំង ២៧ នេះ បានប្រមូលទុនសរុបពីផ្សារមូលបត្រប្រមាណជា ៧០៣ លានដុល្លារអាមេរិក។

បើក្រលេកមើលទិន្នន័យទីផ្សារវិញ ក្នុងឆ្នាំ២០២៥ ទីផ្សារមានស្ថិរភាព និងមានភាពធន់ ដោយសន្ទស្សន៍ទីផ្សារបានបិទនៅ ៤២៣,០៦ពិន្ទុ កើនឡើង២,៥% បើធៀប នឹងឆ្នាំ២០២៤ ហើយទំហំជួញដូរភាគហ៊ុនជាមធ្យមក្នុងមួយថ្ងៃមានប្រមាណ ១១ ម៉ឺនដុល្លារ ជាមួយនឹងបរិមាណជួញដូរភាគហ៊ុនជាមធ្យមមានប្រមាណជា ១០ ម៉ឺនភាគហ៊ុន ដោយមានការជួញដូរតាមការចរចាបានកើតឡើងជាច្រើនដងក្នុងឆ្នាំ២០២៥ កន្លងទៅនេះ។

រីឯចំនួនគណនីជួញដូរបានហក់ទៅដល់ប្រមាណជា ៧៣.០០០ គណនីជួញដូរ គិតត្រឹមឆ្នាំ២០២៥ ដោយមានកើន ឡើងប្រមាណជា ១៤.៥០០ គណនី បើធៀបនឹងឆ្នាំ២០២៤។

លោក ហុង សុហួរ បានសង្កត់ធ្ងន់ថា ទោះបីជាស្ថានភាពសេដ្ឋកិច្ចជា សកលហាក់មានភាពមិននឹងនរ បន្ថែមដោយការឈានពានពីសំណាក់ប្រទេសជិតខាងមកលើប្រទេសកម្ពុជាក្តី តែផ្សារមូលបត្រកម្ពុជានៅតែធ្វើដំណើរយ៉ាងស្វាហាប់ទៅមុខ និងរក្សាបានភាពធន់ ពោលគឺធ្វើដំណើរឆ្ពោះទៅមុខជានិច្ច ទោះបីជាជំហ៊ានតូចៗក្តី តែនៅតែបន្តឥតឈប់ឈរ៕

The post ផ្សារមូលបត្រកៀរគរទុនប្រមាណ ៧០០ លានដុល្លារ appeared first on Kampuchea Thmey Daily.

រដ្ឋអនុម័តសេចក្តីព្រាង ប្រកាសស្តីពី “ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល”

Din Thary — Thu, 25 Dec 2025 04:13:43 +0000

នៅថ្ងៃទី២៤ ខែធ្នូ ឆ្នាំ២០២៥ នេះ សមាជិកក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានសម្រេចអនុម័តជាផ្លូវការលើសេចក្តីព្រាង ប្រកាសស្តីពី “ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល” របស់និយ័តករមូលបត្រកម្ពុជា (ន.ម.ក.)។

ការអនុម័តលើសេចក្តីព្រាងច្បាប់នេះ ត្រូវបានធ្វើឡើងនៅក្នុងប្រជុំក្រុមប្រឹក្សា អ.ស.ហ. លើកទី២៧ អាណត្តិទី១ ក្រោមអធិបតេយ្យភាពបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន ក្រុមប្រឹក្សា អ.ស.ហ. លើរបៀបវារៈចំនួន ៧ ដោយក្នុងនោះក៏មានផងដែរនូវការស្នើសុំអនុម័តលើសេចក្តីព្រាង ប្រកាសស្តីពី “ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល” របស់ ន.ម.ក.។

បន្ទាប់ពីធ្វើបទ បង្ហាញជូនអង្គប្រជុំរួចមក អង្គប្រជុំបានពិភាក្សាផ្លាស់ប្តូរយោបល់ទាំងកម្រិតបច្ចេកទេស និងគោលនយោបាយលើ របៀបវារៈដែលបានរៀបចំដោយមន្ត្រីជំនាញ ន.ម.ក.។

ជាលទ្ធផល ក្រុមប្រឹក្សា អ.ស.ហ. បានអនុម័តលើសេចក្តី-ព្រាងប្រកាសស្តីពី “ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល” របស់ ន.ម.ក.។

សេចក្តីព្រាង ប្រកាសនេះ បានបែងចែកជា ៩ ជំពូក ៦៣ ប្រការ ដោយបានកំណត់ពីលក្ខខណ្ឌ និងនីតិវិធីក្នុងការផ្តល់អាជ្ញាបណ្ណ បន្តអាជ្ញាបណ្ណ និងកាតព្វកិច្ចផ្សេងៗរបស់ក្រុមហ៊ុនផ្តល់សេវាទ្រព្យឌីជីថល ភ្នាក់ងារទ្រព្យឌីជីថល និងបុគ្គលពាក់ព័ន្ធ ផ្សេងទៀត ក្នុងទិសដៅធានាឱ្យមាននូវសុច្ចរិតភាពទីផ្សារ តម្លាភាព សណ្តាប់ធ្នាប់ និងកិច្ចការពារវិនិយោគិន។

សេចក្តីព្រាងប្រកាសនេះ មានវិសាលភាពអនុវត្តចំពោះគ្រប់សកម្មភាពពាក់ព័ន្ធនឹងអាជីវកម្មទ្រព្យឌីជីថល ដែលមិនជាប់ពាក់ព័ន្ធនឹងការប្រើប្រាស់ទ្រព្យឌីជីថលជាយន្តការនៃការទូទាត់នៅក្នុងព្រះរាជាណាចក្រកម្ពុជា។

ការអនុម័តលើសេចក្តីព្រាងប្រកាសស្តីពី ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល របស់ ន.ម.ក. បានចូលរួមចំណែកអនុវត្តគោលនយោបាយរបស់រាជរដ្ឋាភិបាលក្នុងការជំរុញកំណើនសេដ្ឋកិច្ចជាតិ ដោយស្របតាមការចង្អុលបង្ហាញផ្លូវដោយគោលនយោបាយអភិវឌ្ឍន៍បច្ចេកវិទ្យាហិរញ្ញវត្ថុកម្ពុជា២០២៣-២០២៨ របស់រាជរដ្ឋាភិបាល ព្រមទាំងស្របតាមតម្រូវការចាំបាច់ចំពោះមុខសម្រាប់ការបន្តអភិវឌ្ឍទីផ្សារមូលបត្រកម្ពុជា៕

The post រដ្ឋអនុម័តសេចក្តីព្រាង ប្រកាសស្តីពី “ការផ្តល់អាជ្ញាបណ្ណ និងការគ្រប់គ្រងអាជីវកម្មទ្រព្យឌីជីថល” appeared first on Kampuchea Thmey Daily.

កម្ពុជា-ចិនចាប់ដៃគ្នាអភិវឌ្ឍន៍វិស័យមូលបត្រដើម្បីកៀរគរទុនពីវិស័យឯកជនជំរុញកំណើនសេដ្ឋកិច្ច

Din Thary — Wed, 24 Dec 2025 10:14:00 +0000

និយ័តករមូលបត្រកម្ពុជា (SERC) និង សមាគមអ្នកវិនិយោគចិននៅកម្ពុជា (CICA) បានចុះអនុស្សរណៈយោគយល់ជាមួយគ្នាមួយ ស្តីពីការផ្តល់អំណាចផ្នែកហិរញ្ញវត្ថុសម្រាប់ឧស្សាហកម្ម ការកសាងខ្សែក្រវ៉ាត់ផ្លូវមួយរួមគ្នា និងវេទិកាសហប្រតិបត្តិការហិរញ្ញវត្ថុ និងឧស្សាហកម្ម ចិន-កម្ពុជា”។

ថ្លែងក្នុងកម្មវិធីនេះនៅថ្ងៃទី២០ ខែធ្នូ ឆ្នាំ២០២៥ នៅទីក្រុងសៀងហៃ លោក ស៊ូ សុជាតិ អគ្គនាយក SERC បានគូសបញ្ជាក់ថា បន្ទាប់ពីដំណើរទស្សនកិច្ចជាផ្លូវការរបស់ប្រធានាធិបតី ស៊ី ជីនពីង មកកាន់ប្រទេសកម្ពុជាចាប់ពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥ ទំនាក់ទំនង ទ្វេភាគីរបស់យើងទទួលបានសន្ទុះថ្មី ភាពជាដៃគូដែលបានពង្រឹងនេះលើសពីការចូលរួមនយោបាយ ហើយត្រូវបាន ឆ្លុះបញ្ចាំងកាន់តែខ្លាំងឡើងនៅក្នុងកិច្ចសហប្រតិបត្តិការជាក់ស្តែងនៅទូទាំងការវិនិយោគ ឧស្សាហកម្ម និងហិរញ្ញវត្ថុ។ ទំនាក់ទំនងចិន-កម្ពុជា កំពុងត្រូវបានលើកកម្ពស់ទៅជា “សហគមន៍វាសនារួមគ្រប់រដូវកាល ក្នុងយុគសម័យថ្មី” ក្នុង គុណភាពខ្ពស់ កម្រិតខ្ពស់ និងស្តង់ដារខ្ពស់។

លោក ស៊ូ សុជាតិ បានអះអាងថា «ព្រឹត្តិការណ៍សំខាន់នេះ មិនត្រឹមតែឆ្លុះបញ្ចាំងពីការជឿទុកចិត្តខាងនយោបាយយ៉ាងជ្រាលជ្រៅប៉ុណ្ណោះទេ ប៉ុន្តែថែមទាំងចក្ខុវិស័យជាយុទ្ធសាស្ត្ររួមគ្នាសម្រាប់កិច្ចសហប្រតិបត្តិការរយៈពេលវែងក្នុងការវិនិយោគ ពាណិជ្ជកម្ម ហិរញ្ញវត្ថុ និងការអភិវឌ្ឍឧស្សាហកម្ម។ នៅពេលដែលចំណងសេដ្ឋកិច្ចរបស់យើងបន្តកាន់តែស៊ីជម្រៅ ការតភ្ជាប់ហិរញ្ញវត្ថុកំពុងដើរតួនាទីជាយុទ្ធ-សាស្ត្រ និងអាចឱ្យដំណើរការបាន»។

លោក ស៊ូ សុជាតិ ក៏បានបន្តដែរថា ប្រទេសកម្ពុជាសព្វថ្ងៃនេះមានទីផ្សារមូលធនដែលដំណើរការ និងកំពុងអភិវឌ្ឍន៍ ឥតឈប់ឈរ ដោយមានការគាំទ្រពីផ្សារមូលបត្រ ក្រុមហ៊ុនមូលបត្រដែលមានអាជ្ញាបណ្ណ និងក្របខណ្ឌបទប្បញ្ញត្តិ ដែលបានបង្កើតឡើងសម្រាប់ការបោះផ្សាយភាគហ៊ុន និងមូលបត្របំណុល។ ប្រព័ន្ធអេកូឡូស៊ីទីផ្សាររបស់យើងក៏បាន ពង្រីកផងដែរ ដើម្បីរួមបញ្ចូលផលិតផលនិស្សន្ទ គម្រោងវិនិយោគរួម និងSandbox ដែលមានគោលបំណងលើកទឹក ចិត្តការច្នៃប្រឌិតដែលមានទំនួលខុសត្រូវ ខណៈពេលដែលការពារសុចរិតភាពទីផ្សារ។

ជាមួយគ្នានេះ លោក ស៊ូ សុជាតិ បានលើកឡើងថា កម្ពុជាស្វាគមន៍សហគ្រាសបរទេស រួមទាំងក្រុមហ៊ុនចិនផងដែរ ដើម្បី មើលឃើញប្រទេសកម្ពុជាមិនត្រឹមតែជាគោលដៅវិនិយោគប៉ុណ្ណោះទេ ប៉ុន្តែក៏ជាវេទិកាសម្រាប់ការបង្កើតដើមទុនរយៈ-ពេលវែងផងដែរ។ ការចូលទៅកាន់ទីផ្សារមូលធនអនុញ្ញាតឱ្យសហគ្រាសគាំទ្រដល់ការពង្រីកអន្តរជាតិ ធ្វើពិពិធកម្ម ប្រភពហិរញ្ញប្បទាន និងបង្កើនតម្លាភាព អភិបាលកិច្ច និងភាពជឿជាក់នៃទីផ្សារ។

SERC ជឿជាក់យ៉ាងមុតមាំថា ភាពជាដៃគូដ៏រឹងមាំរវាងរដ្ឋាភិបាល ដៃគូសហការ និងវិស័យឯកជន ចូលរួម ជំរុញការអភិវឌ្ឍសេដ្ឋកិច្ច វិស័យហិរញ្ញវត្ថុ តាមរយៈទីផ្សារមូលបត្រ៕

The post កម្ពុជា-ចិនចាប់ដៃគ្នាអភិវឌ្ឍន៍វិស័យមូលបត្រដើម្បីកៀរគរទុនពីវិស័យឯកជនជំរុញកំណើនសេដ្ឋកិច្ច appeared first on Kampuchea Thmey Daily.

និយ័តករមូលបត្រកម្ពុជា-ហុងកុង គ្រោងបង្កើតប្រតិបត្តិការរួមគ្នាពាក់ព័ន្ធនឹងសញ្ញាបណ្ណ DIM SUM

Din Thary — Wed, 24 Dec 2025 08:19:00 +0000

តាមការបញ្ជាក់ពីលោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) បានឱ្យដឹងថា និយ័តករមូលបត្រកម្ពុជា-ហុងកុង គ្រោងបង្កើតប្រតិបត្តិការរួមគ្នាពាក់ព័ន្ធនឹងសញ្ញាបណ្ណ DIM SUM ។

ក្នុងដំណើរទស្សនកិច្ចនៅក្រុមហ៊ុនផ្សារមូលបត្រហុងកុង និងភាគីពាក់ព័ន្ធ ស្តីពី «ការបោះផ្សាយលក់មូលបត្របំណុលជាសាធារណៈ និងសញ្ញាបណ្ណ DIM SUM» លោក ស៊ូ សុជាតិ បានមានប្រសាសន៍ថា ក្រុមហ៊ុនទាំង ២ ក្រុមហ៊ុន Haitong International Securities Company Limited និងក្រុមហ៊ុន ខេមបូឌា ស៊ីឃ្យូរីធី ម.ក មានគម្រោងបង្កើតប្រតិបត្តិការជាមួយគ្នាពាក់ព័ន្ធនឹងសញ្ញាបណ្ណ DIM SUM ។

ក្នុងនោះដែរ ក្រុមការងារមកពីកម្ពុជាមានបំណងសិក្សាស្វែងយល់អំពីសញ្ញាបណ្ណ DIM SUM ស្វែងយល់អំពីនីតិវិធីដែលក្រុម ហ៊ុនបោះផ្សាយមូលបត្រនៅកម្ពុជាអាចធ្វើការបោះផ្សាយនៅហុងកុង និងក្រុមហ៊ុនបោះផ្សាយមូលបត្រពីហុងកុងអាចធ្វើការបោះផ្សាយនៅកម្ពុជា វិធីសាស្ត្រនៃការតភ្ជាប់រវាងផ្សារមូលបត្រហុងកុង និងផ្សារមូលបត្រកម្ពុជា រវាងក្រុមហ៊ុនមូលបត្រ នៅហុងកុង និងក្រុមហ៊ុនមូលបត្រនៅកម្ពុជា ដើម្បីឱ្យដំណើរការនៃការបោះផ្សាយលក់សញ្ញាបណ្ណ DIM SUM នេះ អាច ប្រព្រឹត្តទៅដោយរលូន និងប្រកបដោយកិច្ចសហប្រតិបត្តិការខ្ពស់ ដែលនាំឱ្យទីផ្សារមូលបត្រទាំងហុងកុង និងកម្ពុជាអាច រីកចម្រើនជាមួយគ្នានាពេលខាងមុខ។

លោក ស៊ូ សុជាតិ បានបន្តថា ទីផ្សារមូលបត្រនៅកម្ពុជាបច្ចុប្បន្នមានក្រុមហ៊ុនចុះបញ្ជីចំនួន ២៦ ក្រុមហ៊ុន ដោយក្នុងនោះមាន ក្រុមហ៊ុនចំនួន ១២ បានចុះបញ្ជីលក់មូលបត្រកម្មសិទ្ធិ និងក្រុមហ៊ុនចំនួន ១៤ បានចុះបញ្ជីលក់មូលបត្របំណុល។

យ៉ាងណាមិញ ដោយទីផ្សារមូលបត្រនៅកម្ពុជាមានទំហំតូច ប៉ុន្តែ ន.ម.ក. និងដៃគូអភិវឌ្ឍន៍ ព្រមទាំងភាគីពាក់ព័ន្ធនានាបានខិតខំក្នុងការធ្វើពិពិធកម្មឧបករណ៍ហិរញ្ញវត្ថុដើម្បីអាចឱ្យក្រុមហ៊ុនបោះផ្សាយមូលបត្រ និងវិនិយោគិន ទទួលបាន នូវយន្តការនៃការធ្វើហិរញ្ញប្បទានកាន់តែទូលំទូលាយ ដែលអនុញ្ញាតឱ្យការបង្កើនដើមទុនកាន់តែមានប្រសិទ្ធភាព។

លោក ស៊ូ សុជាតិ បានសង្កត់ធ្ងន់ថា «ន.ម.ក. ជឿជាក់យ៉ាងមុតមាំថា ភាពជាដៃគូដ៏រឹងមាំរវាងផ្សារមូលបត្រកម្ពុជា ផ្សារមូលបត្រហុងកុង និងវិស័យ ឯកជន ចូលរួមជំរុញការអភិវឌ្ឍទីផ្សារនេះដោយការបង្កើតឱកាសថ្មីៗសម្រាប់ក្រុមហ៊ុន ក៏ដូចជាវិនិយោគិនទាំងសង ខាង។

សូមជម្រាបថា ដំណើរទស្សនកិច្ចនេះ មានការជួបប្រជុំពិភាក្សាជាមួយថ្នាក់ដឹកនាំជាន់ខ្ពស់នៃផ្សារមូលបត្រហុងកុង (HKEX) ក្រុមហ៊ុន Haitong International Securities Company Limited និងធនាគារចិន។

ដំណើរទស្សនកិច្ចនេះ រៀបចំឡើងក្នុងគោលបំណងដើម្បីបង្កើនការយល់ដឹងអំពីដំណើរការ និងបទប្បញ្ញត្តិ ពាក់ព័ន្ធនឹងការបោះផ្សាយ ការចុះបញ្ជី និងការជួញដូរសញ្ញាបណ្ណ DIM SUM នៅក្រៅប្រទេស ព្រមទាំងនិន្នាការថ្មីៗ ការច្នៃប្រឌិត និងការអភិវឌ្ឍទីផ្សារនៅក្នុងវិស័យនេះ ខណៈពេលដែលទីផ្សារសញ្ញាបណ្ណ DIM SUM នៅក្រៅប្រទេស បន្តកើនឡើងឥតឈប់ឈរ៕

The post និយ័តករមូលបត្រកម្ពុជា-ហុងកុង គ្រោងបង្កើតប្រតិបត្តិការរួមគ្នាពាក់ព័ន្ធនឹងសញ្ញាបណ្ណ DIM SUM appeared first on Kampuchea Thmey Daily.

ទីផ្សារមូលបត្រ ជាសរសៃឈាមសេដ្ឋកិច្ច ជំរុញការអភិវឌ្ឍគ្រប់វិស័យតាយរយៈការផ្តល់ប្រភពទុនក្នុងរយៈពេលវែង

Din Thary — Fri, 05 Dec 2025 08:16:29 +0000

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានគូសបញ្ជាក់ថា វិស័យមូលបត្រ គឺជាសរសៃឈាមសេដ្ឋកិច្ចនៅក្នុងការជំរុញការអភិវឌ្ឍគ្រប់វិស័យ តាមរយៈការផ្តល់នូវប្រភពទុនរយៈពេលវែងដល់សហគ្រាសក្រុមហ៊ុន ដើម្បីពង្រីកអាជីវកម្មរបស់ខ្លួន។

ពាក់ព័ន្ធទៅនឹងវិស័យមូលបត្រនេះដែរ លោក ស៊ូ សុជាតិ បានមានប្រសាសន៍ថា សន្ទុះនៃការរីកចម្រើនក្នុងទីផ្សារមូលបត្រកម្ពុជាកំពុងមានការកើនឡើង តាមរយៈការសហការគ្នាក្នុងការលើកកម្ពស់ចំណេះដឹង និងការចែករំលែកនូវព័ត៌មានពាក់ព័ន្ធនឹងវិស័យមូលបត្រ។

ជាក់ស្តែងនៅក្នុងដំណើរឆ្ពោះទៅចក្ខុវិស័យកម្ពុជា ២០៥០ វិស័យមូលបត្រត្រូវបានកំណត់ជាវិស័យអាទិភាពមួយ ក្នុងការជំរុញការអភិវឌ្ឍន៍សេដ្ឋកិច្ចជាតិប្រកបដោយបរិយាបន្ន នវានុវត្តន៍ និងនិរន្តភាព ដោយហេតុថា វិស័យនេះ ជាវិស័យដ៏សំខាន់ដែលផ្តល់ច្រកក្នុងការកៀរគរសាច់ប្រាក់ទាំងក្នុងស្រុក និងក្រៅស្រុក ដើម្បីបង្កើននូវកាលានុវត្តភាពវិនិយោគ និងការធ្វើពិពិធកម្មឧបរកណ៍ហិរញ្ញវត្ថុ។

លោក ស៊ូ សុជាតិ បានសង្កត់ធ្ងន់ថា «វិស័យមូលបត្រ គឺជាសរសៃឈាមសេដ្ឋកិច្ច ដែលមានសក្តានុពលខ្ពស់នៅក្នុងការជំរុញ ការអភិវឌ្ឍគ្រប់វិស័យ តាមរយៈការផ្តល់នូវប្រភពទុនរយៈពេលវែងសម្រាប់សហគ្រាសក្រុមហ៊ុន ដើម្បីពង្រីកអាជីវកម្មរបស់ខ្លួន»។

អាស្រ័យហេតុនេះ ដើម្បីធានាឱ្យបាននូវការអភិវឌ្ឍវិស័យមូលបត្រ នៅកម្ពុជាប្រកបដោយសណ្តាប់ធ្នាប់, តម្លាភាព, ភាពធន់, ជវភាព, បរិយាបន្ន, និរន្តរភាព និង នវានុវត្តន៍ និយ័តករមូលបត្រកម្ពុជា បានដាក់ចេញនូវ យុទ្ធសាស្ត្រអភិវឌ្ឍន៍វិស័យមូលបត្រ ២០២៥-២០៣៥បានទទួលការឯកភាពពីក្រុមប្រឹក្សា អ.ស.ហ. ដែលនៅក្នុងឯកសារយុទ្ធសាស្ត្រអភិវឌ្ឍន៍នេះបានដាក់ចេញនូវក្របខ័ណ្ឌយុទ្ធសាស្រ្តគន្លឹះចំនួន ៣ រួមមាន៖ ក្របខ័ណ្ឌយុទ្ធសាស្រ្តពង្រឹងទីផ្សារ, ពង្រីកទីផ្សារ និងគាំទ្រការអភិវឌ្ឍទីផ្សារ និងមានវិធានការយុទ្ធសាស្ត្រចំនួន ១៣។

លោក ក៏បានបន្តទៀតថា ឯកសារយុទ្ធ-សាស្ត្រអភិវឌ្ឍន៍វិស័យមូលបត្រនេះ ជាឯកសារដ៏សំខាន់ដែលនឹងគាំទ្រដល់ការសម្រេចបាននូវ ចក្ខុវិស័យឆ្នាំ២០៣០ និង២០៥០ របស់កម្ពុជា និងជាឯកសាររស់ដែលត្រូវបានរៀបចំឡើងដោយ មានការវិភាគគ្រប់ជ្រុងជ្រោយលើភាពខ្លាំង, ភាពខ្សោយ, កាលានុវត្តភាព និងការគំរាម, និន្នាការវិវត្តន៍ នៃវិស័យមូលបត្រ និងសេដ្ឋកិច្ចកម្ពុជា និងនិន្នាការវិវត្តន៍ក្នុងតំបន់ និងសាកល ព្រមទាំងមាន សង្គតិភាពជាមួយយុទ្ធសាស្ត្រ និងគោលនយោបាយជាតិសំខាន់ៗ។

តាមរយៈយុទ្ធសាស្ត្រនេះ ផលិតផល សេវា និងទីផ្សារថ្មីៗ នឹងត្រូវបង្កើតឡើង និងដាក់ឱ្យដំណើរការ ដូចជាមូលនិធិដែល អាចជួញដូរបាន (ETF), Depositary Receipt (DR), បរធនវិនិយោគអចលនវត្ថុ (REIT), ឧបករណ៍និស្សន្ទផ្សេងទៀត, ការជួញដូរមូលបត្រតាមម៉ាជីន, ការខ្ចី និងឱ្យខ្ចីមូលបត្រ, ទីផ្សារ ខុម៉ូឌីធីអនាគត, ហិរញ្ញប្បទានវិនិយោគពីបុគ្គលទៅបុគ្គល និងទ្រព្យឌីជីថល ជាដើម។

ទន្ទឹមនេះ លោក ស៊ូ សុជាតិ ជឿជាក់ថា តាមរយៈយុទ្ធសាស្ត្រនេះ ក៏ដូចជាការរួមគ្នាជាធ្លុងមួយរបស់គ្រប់ភាគីពាក់ព័ន្ធនៅក្នុងវិស័យមូលបត្រ នឹងធ្វើឱ្យវិស័យមូលបត្រនៅកម្ពុជារីកចម្រើនយ៉ាងឆាប់រហ័សប្រកបដោយសណ្តាប់ធ្នាប់, តម្លាភាព, ភាពធន់, ជវភាព, បរិយាបន្ន, និរន្តរភាព និងនវានុវត្តន៍ ដូចនេះ វាជាបេសកកម្មរបស់យើងទាំងអស់គ្នានៅក្នុងការអភិវឌ្ឍទីផ្សារនេះ៕

The post ទីផ្សារមូលបត្រ ជាសរសៃឈាមសេដ្ឋកិច្ច ជំរុញការអភិវឌ្ឍគ្រប់វិស័យតាយរយៈការផ្តល់ប្រភពទុនក្នុងរយៈពេលវែង appeared first on Kampuchea Thmey Daily.