លោក អាន់វ៉ា អ៊ីប្រាហ៊ីម Archives - Kampuchea Thmey Daily

ម៉ាឡេស៊ីប្រកាសឱ្យបុគ្គលិករដ្ឋធ្វើការពីផ្ទះ ដើម្បីសន្សំសំចៃថាមពល

Huon Dina — Thu, 02 Apr 2026 02:59:53 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសកាលពីថ្ងៃពុធ (១ មេសា) ថា បុគ្គលិករដ្ឋាភិបាលម៉ាឡេស៊ីទាំងអស់នឹងចាប់ផ្តើមធ្វើការពីផ្ទះនៅខែមេសានេះ ដែលជាផ្នែកមួយនៃកិច្ចប្រឹងប្រែងរបស់រដ្ឋាភិបាលដើម្បីកាត់បន្ថយការប្រើប្រាស់ និងការចំណាយថ្លៃថាមពល ចំពេលតម្លៃប្រេងឥន្ធនៈហក់ឡើងដោយសារតែជម្លោះនៅមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

គោលនយោបាយនេះ នឹងចូលជាធរមានចាប់ពីថ្ងៃទី ១៥ ខែមេសា ហើយនឹងគ្របដណ្ដប់លើបុគ្គលិកនៅតាមក្រសួង ស្ថាប័នរដ្ឋាភិបាល និងក្រុមហ៊ុនដែលមានទំនាក់ទំនងជាមួយរដ្ឋ។

លោក អាន់វ៉ា បានថ្លែងក្នុងសេចក្តីថ្លែងការណ៍មួយកាលពីល្ងាចថ្ងៃពុធថា គោលបំណងរបស់រដ្ឋាភិបាល «គឺដើម្បីកាត់បន្ថយការប្រើប្រាស់ប្រេងឥន្ធនៈ និងធានាបាននូវនិរន្តរភាពនៃការផ្គត់ផ្គង់ថាមពល»។

លោកបានបន្តថា ព័ត៌មានលម្អិតបន្ថែមលើគោលនយោបាយនេះ នឹងត្រូវបានប្រកាសនៅពេលក្រោយ ដោយបន្ថែមថា ក្រុមហ៊ុនប្រេងរដ្ឋ Petronas និងក្រុមហ៊ុនផ្សេងទៀត កំពុងប្រឹងប្រែងដើម្បីធានាបាននូវការផ្គត់ផ្គង់ប្រេងឥន្ធនៈ និងថាមពល។

នាយករដ្ឋមន្រ្តីដដែលលោកបាននិយាយផងដែរថា ម៉ាឡេស៊ីនឹងបង្កើនការអនុវត្តច្បាប់ប្រឆាំងនឹងអ្នកដែលផ្សព្វផ្សាយព័ត៌មានមិនពិតអំពីវិបត្តិថាមពលតាមអ៊ិនធឺណិត។

គួរគូសបញ្ជាក់ថា ម៉ាឡេស៊ីកំពុងចំណាយប្រាក់ជិត ១ ប៊ីលានដុល្លារ/ខែ លើវិធានការឧបត្ថម្ភធនថាមពល ដើម្បីរក្សាតម្លៃប្រេងឥន្ធនៈលក់រាយឱ្យនៅទាបសម្រាប់ប្រជាពលរដ្ឋ។

ក្រសួងហិរញ្ញវត្ថុក្នុងសេចក្តីថ្លែងការណ៍ដាច់ដោយឡែកកាលពីថ្ងៃពុធដូចគ្នា បានប្រកាសពីកំណើនតម្លៃប្រេងម៉ាសូតដែលមិនស្ថិតនៅក្នុងគោលការណ៍ឧបត្ថម្ភធនជាលើកទីបួនជាប់ៗគ្នា ដែលនេះបង្ហាញថា ម៉ាឡេស៊ីនៅតែរងផលប៉ះពាល់ពីការហក់ឡើងនៃតម្លៃថាមពលសកល៕

The post ម៉ាឡេស៊ីប្រកាសឱ្យបុគ្គលិករដ្ឋធ្វើការពីផ្ទះ ដើម្បីសន្សំសំចៃថាមពល appeared first on Kampuchea Thmey Daily.

លោក អាន់វ៉ា៖ អ៊ីរ៉ង់ត្រៀមរួចរាល់សម្រាប់ការចរចាបញ្ចប់សង្គ្រាមជាមួយអាមេរិក

Rann Reuy — Fri, 27 Mar 2026 02:58:15 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បានជួបពិភាក្សាដោយផ្ទាល់តាមប្រព័ន្ធទូរស័ព្ទជាមួយប្រធានាធិបតីអ៊ីរ៉ង់ លោក Masoud Pezeshkian ដោយអះអាងថា អ៊ីរ៉ងត្រៀមខ្លួនរួចរាល់ដើម្បីចរចា និងថា សង្គ្រាមនឹងបញ្ចប់យ៉ាងពិតប្រាកដ។

នាយករដ្ឋមន្ត្រីម៉ាឡេស៊ី ហាក់បានប្រឹងប្រែងជាងបណ្តាប្រទេសនានាក្នុងតំបន់អាស៊ានក្នុងការរកដំណោះស្រាយក្នុងជម្លោះរវាងអ៊ីរ៉ង់និងសហរដ្ឋអាមេរិកក្នុង១ខែចុងក្រោយនេះ។ លោក អាន់វ៉ា អ៊ីប្រាហ៊ីម ក៏បានបង្ហាញការគាំទ្រដល់នាយករដ្ឋមន្ត្រីប៉ាគីស្ថាន លោក Shehbaz Sharif ដើម្បីសម្របសម្រួលភាគីជម្លោះគឺអឺរ៉ង់ និងសហរដ្ឋអាមេរិក ដើម្បីបញ្ចប់ការប្រយុទ្ធគ្នា។ ជាមួយគ្នានោះ លោក អាន់វ៉ា បានជួបតាមទូរស័ព្ទជាមួយមេដឹកនាំសំខាន់ៗជាច្រើនរូបនៅក្នុងតំបន់មជ្ឈិមបូព៌ា។

នៅក្នុងសំណេរបង្ហោះតាមបណ្តាញសង្គមហ្វេសប៊ុក នាយករដ្ឋមន្ត្រី អាន់វ៉ា អ៊ីប្រាហ៊ីម បានសរសេរថា៖‍«ខ្ញុំក៏កត់សម្គាល់អំពីការត្រៀមខ្លួនរួចរាល់របស់អ៊ីរ៉ង់ដើម្បីចរចា ដោយបញ្ជាក់ថា សង្គ្រាមនឹងបញ្ចប់យ៉ាងពិតប្រាកដ»។

នាយករដ្ឋមន្ត្រី អាន់វ៉ា ក៏បានអះអាងថា ម៉ាឡេស៊ីថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែលគាំទ្រដោយអាមេរិកលើប្រទេសអ៊ីរ៉ង់ ហើយ នៅពេលជាមួយគ្នានេះ ម៉ាឡេស៊ីក៏បង្ហាញនូវក្តីកង្វល់ចំពោះប្រទេសជាមិត្តក្នុងតំបន់ឈូងសមុទ្រដែលរងផលប៉ះពាល់ពីជម្លោះនេះ។

ប្រទេសម៉ាឡេស៊ី ថ្កោលទោសសកម្មភាពណាមួយដែលសំដៅដល់សាធារណៈ ព្រោះវារំលោភយ៉ាងពិតប្រាកដនូវច្បាប់អន្តរជាតិ គោលការណ៍មនុស្សធម៌និងតម្លៃនៃយុត្តិធម៌។

លោក អាន់វ៉ា បានលើកឡើងថា បទពិសោធន៍អតីតកាល បានបង្ហាញថា បទឈប់បាញ់ដែលគ្មានការធានាយ៉ាងម៉ឺងម៉ាត់នឹងធ្វើឱ្យវដ្តនៃអំពើហិង្សាកើតឡើងម្តងទៀត ដូចដែលវាបានកើតឡើងនៅហ្គាហ្សា និងប្រទេសលីបង់។ ដូច្នេះ កិច្ចខិតខំប្រឹងប្រែងដើម្បីសន្តិភាពត្រូវតែបន្តដោយយុត្តិធម៌ ការទទួលខុសត្រូវ និងការប្តេជ្ញាចិត្តយូរអង្វែង។

ប្រទេសម៉ាឡេស៊ីជឿជាក់ថា សន្តិភាពពិតប្រាកដទាមទារដំណោះស្រាយយ៉ាងហ្មត់ចត់ ដើម្បីធានាសុវត្ថិភាពរបស់គ្រប់ភាគីទាំងអស់ និងស្តារសេចក្តីថ្លៃថ្នូររបស់មនុស្សជាតិឡើងវិញនៅក្នុងតំបន់អាស៊ីខាងលិច។

លោក អាន់វ៉ា បានលើកឡើងដែរថា៖«ខ្ញុំក៏សូមកោតសរសើរចំពោះការកោតសរសើររបស់ប្រធានាធិបតី Pezeshkian ចំពោះការគាំទ្ររបស់ប្រទេសម៉ាឡេស៊ី ហើយប្តេជ្ញាបន្តពង្រឹងសាមគ្គីភាពនេះ។

ជម្លោះនៅប្រទេសអ៊ីរ៉ង់បានផ្ទុះឡើងនៅពេលការវាយប្រហាររបស់អ៊ីស្រាអែលគាំទ្រដោយសហរដ្ឋអាមេរិក ចាប់ផ្តើមនៅថ្ងៃទី២៨ខែកុម្ភៈ ដោយសម្លាប់មេដឹកនាំកំពូលៗរបស់អ៊ីរ៉ង់ ហើយជម្លោះនេះបានបណ្តាលឲ្យមនុស្សរាប់ពាន់នាក់បានស្លាប់ និងអ្នករបួសរាប់ពាន់រហូតដល់ម៉ឺននាក់ទូទាំងតំបន់មជ្ឈិមបូព៌ារហូតដល់ពេលនេះ៕

រ៉ាន់ រើយ

The post លោក អាន់វ៉ា៖ អ៊ីរ៉ង់ត្រៀមរួចរាល់សម្រាប់ការចរចាបញ្ចប់សង្គ្រាមជាមួយអាមេរិក appeared first on Kampuchea Thmey Daily.

សម្តេច ហ៊ុន ម៉ាណែត៖ ទ័ពថៃកាន់កាប់ចូលជ្រៅក្នុងទឹកដីកម្ពុជា បញ្ហាព្រំដែននៅតែ«ផុយស្រួយ»

Rann Reuy — Wed, 18 Feb 2026 04:34:33 +0000

ក្នុងដំណើរទៅចូលរួមកិច្ចប្រជុំក្រុមប្រឹក្សាសន្តិភាព (Board of Peace) លើកដំបូងនៅទីក្រុងវ៉ាស៊ីនតោន សហរដ្ឋអាមេរិក សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រាប់ទីភ្នាក់ងារសារព័ត៌មានអន្តរជាតិ ថា កងទ័ពថៃនៅតែកាន់កាប់ចូលជ្រៅក្នុងទឹកដីកម្ពុជា លើសពីអ្វីដែលពួកគេធ្លាប់ទទួលស្គាល់ខ្សែរបន្ទាត់ព្រំដែនដែលមានជាយូរមកហើយ។

នៅក្នុងបទសម្ពាសន៍ផ្តាច់មុខ ( Inclusive Interview) ជាមួយសារព័ត៌មានរ៉យទ័រនៅថ្ងៃទី១៧ខែកុម្ភៈ សម្តេចបវរធិបតី ហ៊ុន ម៉ាណែត លើកឡើងថា កងកម្លាំងរបស់ប្រទេសថៃកំពុងកាន់កាប់ទឹកដីកម្ពុជា បើទោះបីជាមានកិច្ចព្រមព្រៀងសន្តិភាពដែលសម្របសម្រួលដោយប្រធានាធិបតីអាមេរិក ដូណាល់ ត្រាំ និង នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានអាស៊ាន។

ក្រោមកិច្ចខិតខំប្រឹងប្រែងរបស់ប្រធានអាស៊ាន និងរដ្ឋាភិបាលសហរដ្ឋអាមេរិក ក៏ដូចជា ការអន្តរាគមន៍ជាច្រើនលើក ពីរដ្ឋាភិបាលទីក្រុងប៉េកាំង ជម្លោះប្រដាប់អាវុធរវាងថៃនិងកម្ពុជាបានបញ្ជប់ក្រោមបទឈប់បាញ់ចំនួនពីរលើក និង កិច្ចព្រមព្រៀងសន្តិភាពដែលភាគីថៃនិងកម្ពុជាបានចុះហត្ថលេខាកាលថ្ងៃទី២៦ខែតុលាឆ្នាំ២០២៥ នៅទីក្រុងកូឡាឡាំពូ។

ប៉ុន្តែចាប់តាំងពីសង្គ្រាមផ្ទុះឡើងលើកទី២រយៈពេល២១ថ្ងៃ ពីថ្ងៃទី៧ដល់ថ្ងៃទី២៧ខែធ្នូឆ្នាំ២០២៥ ភាគីថៃបានប្រើប្រាស់មធ្យោបាយប្រយុទ្ធដ៏សាហាវបំផុតក្នុងនោះ មានការប្រើប្រាស់យន្តហោះចម្បាំង F-16 ជាដើម ទម្លាក់គ្រប់បែកធុនធ្ងន់លើប្រាសាទបុរាណប្រវត្ថិសាស្រ្ត ហេដ្ឋារចនាសម្ព័ន្ធស៊ីវិល ស្ពាន់ វត្តអារាម ដោយការឈ្លានពានចូលកាន់កាប់ទឹកដីកម្ពុជាជាច្រើនកន្លែងផ្ទុយពីការអំពាវនាវរបស់អន្តរជាតិ។

លោក ហ៊ុន ម៉ាណែត បានប្រាប់រ៉យទ័រនៅក្នុងបទសម្ភាសន៍លើកដំបូងរបស់លោកជាមួយប្រព័ន្ធផ្សព្វផ្សាយអន្តរជាតិថា «យើងនៅតែឃើញមានកងកម្លាំងថៃកាន់កាប់ចូលជ្រៅចូលទៅក្នុងទឹកដីកម្ពុជានៅក្នុងតំបន់ជាច្រើន។ ការកាន់កាប់របស់ថៃគឺហួសពីផែនទីសូម្បីកំណត់ដោយឯកតោភាគីរបស់ភាគីថៃ»។

ដោយបន្ថែមថា កងទ័ពថៃបានដាក់កុងតឺន័រ និងរាយលួសបន្លានៅខាងក្នុងអ្វី [ព្រំដែន]ដែលប្រទេសថៃបានទទួលស្គាល់ជាយូរមកហើយថាជាទឹកដីកម្ពុជា ហើយប្រជាជនមិនអាចត្រឡប់ទៅផ្ទះវិញបានទេ។

នៅក្នុងបទសម្ភាសន៍ចេញផ្សាយនៅថ្ងៃទី១៨ខែកុម្ភៈនេះ សម្តេច ហ៊ុន ម៉ាណែត បានអំពាវនាវឱ្យប្រទេសថៃអនុញ្ញាតឱ្យគណៈកម្មការព្រំដែនរួម (JBC) ចាប់ផ្តើមធ្វើការលើព្រំដែនដែលមានជម្លោះរបស់ពួកគេ។

នាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត (កណ្តាល) ចាប់ដៃជាមួយនាយករដ្ឋមន្ត្រីថៃ លោក អានុទីន ឆានវីរៈគុល ក្នុងពិធីចុះហត្ថលេខាតលើកិច្ចព្រមព្រៀងសន្តិភាពកាលថ្ងៃទី២៦ខែតុលាឆ្នាំ២០២៥។

ភ្លាមៗក្រោយថ្ងៃចុះហត្ថលេខាលើបទឈប់បាញ់លើកទី២កាលថ្ងៃទី២៧ខែធ្នូឆ្នាំ២០២៥ គណៈកម្មការព្រំដែនរួម (JBC) ភាគីកម្ពុជា បានបញ្ជូនលិខិតស្នើបើកកិច្ចប្រជុំលើបញ្ហាបច្ចេកទេសកំណត់បង្គោលសីមា ប៉ុន្តែភាគីថៃបានយកលេសរដ្ឋាភិបាលរបស់ខ្លួនមិនទាន់រៀបរយ ក្នុងចេតនាពន្យាពេលនៃកិច្ចចរចារកដំណោះស្រាយ ប៉ុន្តែក្រុមយោធារបស់ពួកគេ បានធ្វើសកម្មភាពស្ថាបនាផ្លូវ ជីកប្រឡាយ សាងសង់សំណង់ផ្សេងៗនៅលើតំបន់ដែលពួកគេឈ្លានពាន។

តាមរ៉យទ័រ សម្តេច ហ៊ុន ម៉ាណែត បានធ្វើដំណើរទៅកាន់ទីក្រុងវ៉ាស៊ីនតោន ដើម្បីចូលរួមកិច្ចប្រជុំក្រុមប្រឹក្សាសន្តិភាពដែលដឹកនាំដោយប្រធានាធិបតី ដូណាល់ ត្រាំ ក្នុងសប្តាហ៍នេះ ដោយសង្ឃឹមថា ស្ថាប័នថ្មីនេះអាចដើរតួនាទីក្នុងការបន្ធូរបន្ថយស្ថានការណ៍នៅតាមព្រំដែននៃប្រទេសទាំងពីរ ដោយសម្តេច ពណ៌នាថា ស្ថានការណ៍នៅព្រំដែននៅតែ«ផុយស្រួយ»នៅឡើយ៕

រ៉ាន់ រើយ

The post សម្តេច ហ៊ុន ម៉ាណែត៖ ទ័ពថៃកាន់កាប់ចូលជ្រៅក្នុងទឹកដីកម្ពុជា បញ្ហាព្រំដែននៅតែ«ផុយស្រួយ» appeared first on Kampuchea Thmey Daily.

អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត

Minea Neu — Wed, 31 Dec 2025 10:21:56 +0000

នាយករដ្ឋមន្រីម៉ាឡេស៊ី លោក អាន់វ៉ា អ៊ីប្រាហ៊ីម [Anwar Ibrahim] បាននិយាយកាលពីថ្ងៃអង្គារ៍ ថាមេដឹកនាំនៅតំបន់អាស៊ីអាគ្នេយ៍ (អាស៊ាន) នឹងពិចារណាក្នុងការវិវត្តន៍នានានៅប្រទេសមីយ៉ាន់ម៉ា បន្ទាប់ពីដំណាក់កាលដំបូងនៃការបោះឆ្នោតរបស់ខ្លួនពេញមួយសប្តាហ៍។

លោក Anwar Ibrahim នាយករដ្ឋមន្រីម៉ាឡេស៊ី។ Reuters

សេចក្តីរាយការណ៍របសសារព័ត៌មានរ៉យទ័រ ឱ្យដឹងថា ការបោះឆ្នោតត្រូវបានធ្វើឡើងក្នុងដំណាក់កាលជាច្រើនចំពេលមានសង្រ្គាមស៊ីវិលដែលកំពុងបន្ត ហើយបានបំផ្លាញផ្នែកខ្លះនៃប្រទេសមីយ៉ាន់ម៉ា និងនាំឱ្យមានវិបត្តិមនុស្សធម៌ដ៏អាក្រក់បំផុតមួយនៅអាស៊ី។

ការបោះឆ្នោតនេះត្រូវបានអង្គការសហប្រជាជាតិមានការមិនពេញចិត្តយ៉ាងខ្លាំង ជាពិសេសរដ្ឋាភិបាលលោកខាងលិច និងក្រុមសិទ្ធិមនុស្សថាវាជាការបោកប្រាស់ និងការប៉ុនប៉ងរបស់របបយោធាដែលកំពុងកាន់អំណាចដើម្បីពង្រឹងការគ្រប់គ្រងដោយយោធាតាមរយៈតំណាងអ្នកនយោបាយ។

របបយោធាមីយ៉ានម៉ាបានបដិសេធការស្នើនានារបស់បណ្តាអ្នកដឹកនាំពិភពលោកនិងអង្គការសហប្រជាជាតិ ហើយនិយាយថាការបោះឆ្នោតមិនត្រូវបានធ្វើឡើងដោយការបង្ខិតបង្ខំ ឬដោយបង្ខំឡើយ វាជាការគាំទ្រពីសាធារណជនពិតប្រាកដ។

លោក Anwar ដែលជាប្រធាននៃសមាគមប្រជាជាតិអាស៊ីអាគ្នេយ៍ (Asean) បច្ចុប្បន្ន បាននិយាយថាមេដឹកនាំទាំងអស់ ដែលមានសមាជិកចំនួន ១១ប្រទេស នឹងតាមដានស្ថានភាពនៅក្នុងប្រទេសមីយ៉ាន់ម៉ាដោយយកចិត្តទុកដាក់ រួមទាំងជំហានផ្សេងទៀតដែលកំពុងដំណើរការដែលទាក់ទងនឹងនយោបាយក្នុងប្រទេសនេះ។

លោកបាននិយាយនៅសន្នីសីទសារព័ត៌មានមួយថា៖ «នឹងការវាយតម្លៃណាមួយដំណើរការតាមលំដាប់លំដោយ ចំណែកការដឹកនាំគឺតម្រូវឱ្យកាត់បន្ថយអំពើហិង្សា ជៀសវាងសកម្មភាពដែលអាចធ្វើឱ្យមានការបែកបាក់កាន់តែខ្លាំង ផ្តល់ភាពស្របច្បាប់ចំពោះការបញ្ចេញមតិ និងគួរលើកទឹកចិត្តឱ្យមនុស្សគ្រប់រូបអាចមានសិទ្ធិទាមទាអ្វីដែលពួកគេចង់បានផងដែរ»។

រដ្ឋមន្ត្រីការបរទេសម៉ាឡេស៊ី ធ្លាប់បាននិយាយកាលពីមុនថា អាស៊ានចង់ឱ្យការបោះឆ្នោតមានភាពយុត្តិធម៌ និងរាប់បញ្ចូល ហើយក៏បានជំរុញឱ្យរបបយោធាមីយ៉ាន់ម៉ា ប្រកាន់ខ្ជាប់នូវកិច្ចព្រមព្រៀងសន្តិភាពដែលខ្លួនបានព្រមព្រៀងជាមួយ ASEAN នៅឆ្នាំ ២០២១ ផងដែរ។

ផែនការសន្តិភាព ដែលជាការយល់ស្របប្រាំចំណុច ត្រូវបានគេមើលឃើញថាបរាជ័យ ដោយមេដឹកនាំយោធាមីយ៉ាន់ម៉ាបានបដិសេធមិនជួបនិយាយគ្នាជាមួយបក្សគូប្រជែងទេ ដែលខ្លួនចាត់ទុកថាជាភេរវករ។

គួរឱ្យដឹងផងដែរថាប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីរបបយោធាបានផ្តួលរំលំរដ្ឋាភិបាលប្រជាធិបតេយ្យស៊ីវិលនៅក្នុងរដ្ឋប្រហារឆ្នាំ២០២១ ដែលបង្កឱ្យមានការបះបោរដោយប្រដាប់អាវុធដែលបានដណ្តើមកាន់កាប់ទឹកដីទូទាំងប្រទេស៕

ប្រែសម្រួល៖ ណឺ មិនា

The post អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត appeared first on Kampuchea Thmey Daily.

ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន

Rann Reuy — Sun, 28 Dec 2025 05:41:04 +0000

ការឈានទៅដល់ចំណុចត្រូវរ៉ូវគ្នារវាងកម្ពុជានិងថៃនៅមុនដំណាច់ឆ្នាំ២០២៥ អាចជាពរជ័យមួយសម្រាប់ប្រទេសហ្វីលីពីនដែលនឹងក្លាយជាប្រធានអាស៊ាននៅឆ្នាំ២០២៦។

លោក អាន់វ៉ា អ៊ីប្រាហ៊ីមប្រគល់ញញូរក្នុងឋានៈប្រធានអាស៊ានទៅឲ្យប្រធានាធិបតីហ្វីលីពីន។ FB/anwar

លោក អាន់វ៉ា អ៊ីប្រាហ៊ីម ក្នុងឋានៈជាប្រធានអាស៊ាននៅក្នុងឆ្នាំ២០២៥ ត្រូវបានគេមើលឃើញថា បានប្រឹងប្រែងយ៉ាងខ្លាំងក្នុងមធ្យោបាយការទូតដើម្បីសម្របសម្រួលក្នុងជម្លោះថៃនិងកម្ពុជាដែលបានផ្ទុះអាវុធផ្អើលពិភពលោកនៅថ្ងៃទី២៤ខែតុលាឆ្នាំ២០២៥ ហើយ តាមរយៈការផ្សះផ្សារបស់លោក អាន់វ៉ា ដោយមានការជួយគាំទ្រពីសំណាក់សហរដ្ឋអាមេរិកនិងចិន។

តាមរយៈការខិតខំប្រឹងប្រែងនោះ បទឈប់បាញ់លើកទី១ ត្រូវបានរកឃើញនៅថ្ងៃទី២៨ខែកក្កដា និង ការខិតខំចរចាបន្តបន្ទាប់ទៀតរបស់ប្រធានអាស៊ាន ភាគីជម្លោះបានសម្រេចបានកិច្ចព្រមព្រៀងសន្តិភាពផ្លូវការចុះថ្ងៃទី២៦ខែតុលាឆ្នាំ២០២៥ ដែលចុះហត្ថលេខាក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ។

ប៉ុន្តែកិច្ចព្រមព្រៀងដ៏ផុយស្រួយនោះ បានធ្លុះធ្លាយទៅវិញដោយសារតែថៃប្រកាសលុបចោលជាឯកតោភាគី និង បង្កការផ្ទុះអាវុធជាថ្មីនៅថ្ងៃទី៧ខែធ្នូឆ្នាំ២០២៥ ដែលធ្វើឲ្យអន្តរជាតិប្រឹងប្រែងជាថ្មីដើម្បីផ្សះផ្សាជម្លោះនេះអស់រយៈពេល២១ថ្ងៃ ទើបកិច្ចព្រមព្រៀងថ្មីមួយទៀតរកឃើញ ដោយចាប់ផ្តើមអនុវត្តពីថ្ងៃទី២៧ខែធ្នូ និងមានតែរយៈពេលប៉ុន្មានថ្ងៃប៉ុណ្ណោះ ដែលប្រធានអាស៊ានត្រូវប្តូរ។

លោក អាន់វ៉ា អ៊ីប្រាហ៊ីម ដែលប្រឹងប្រែងក្នុងដំណាក់កាលចុងក្រោយក្នុងឋានៈជាប្រធានអាស៊ាននេះ បានបង្ហាញការស្វាគមន៍ចំពោះបទឈប់បាញ់ថ្មីដែលកម្ពុជានិងថៃសម្រេចបាន ដែលបទឈប់បាញ់នេះនឹងបញ្ឈប់រាល់ការប្រយុទ្ធគ្នា។

ទោះបីជាផុតតួនាទីជាប្រធានអាស៊ាននៅពាក់កណ្តាលរាត្រីថ្ងៃទី៣១ខែធ្នូឈានចូលថ្ងៃទី១ខែមករាឆ្នាំ២០២៦ លោក អាន់វ៉ា បានបង្ហាញការគាំទ្រគ្រប់បែបយ៉ាងដល់ប្រធានអាស៊ានថ្មី គឺប្រទេសហ្វីលីពីន។

លោក អាន់វ៉ា សរសេររៀបរាប់ថា៖«យើងនឹងគាំទ្ររាល់កិច្ចខិតខំប្រឹងប្រែងដើម្បីធានាថាកិច្ចការទាំងនេះត្រូវបានផ្តល់កិត្តិយស ហើយកិត្យានុភាព និងភាពជឿជាក់របស់អាស៊ានក្នុងនាមជាតំបន់សន្តិភាពត្រូវបានរក្សាទុក»។

រដ្ឋាភិបាលហ្វីលីពីនមិនទាន់បង្ហាញជំហរអ្វីមួយពាក់ព័ន្ធនឹងបទឈប់បាញ់ចុងក្រោយរវាងកម្ពុជានិងប្រទេសថៃចុងក្រោយនេះទេ ប៉ុន្តែប្រធានាធិបតីហ្វីលីពីន លោក Ferdinand R. Marcos Jr. បាននិយាយកាលពីខែកញ្ញាឆ្នាំ២០២៥ ក្នុងពេលដែលប្រទេសកម្ពុជានិងថៃអនុវត្តបទឈប់បាញ់លើកដំបូង ថា ប្រទេសហ្វីលីពីននឹងដាក់ពង្រាយតំណាងក្រុមអ្នកសង្កេតការណ៍បណ្តោះអាសន្នដែលត្រូវបានបង្កើតឡើងដើម្បីត្រួតពិនិត្យការអនុវត្តបទឈប់បាញ់នៅក្នុងតំបន់ព្រំដែនកម្ពុជា-ថៃ។

ក្នុងការជ្រុមជ្រែងប្រទេសម៉ាឡេស៊ីក្នុងការអនុវត្តការតាមដានការអនុវត្តបទឈប់បាញ់ ហ្វីលីពីនបានបញ្ជូនបុគ្គលិកយោធាដើម្បីចូលរួមជាមួយក្រុមអង្កេតការណ៍អាស៊ាន ដឹកនាំដោយម៉ាឡេស៊ី និងបង្ហាញការប្តេជ្ញាចិត្តចំពោះការអនុវត្តបទឈប់បាញ់នោះឲ្យមានប្រសិទ្ធភាព។

សារព័ត៌មានហ្វីលីពីន Philippine Daily Inquirer បានស្រង់សម្តី លោក Marcos ដូចបាននិយាយកាលពីខែកញ្ញាថា៖«យើងបន្តនិយាយថា ដរាបណាវាទាក់ទងនឹងហ្វីលីពីន និងអាស៊ាន [សមាគមប្រជាជាតិអាស៊ីអាគ្នេយ៍] យើងនៅទីនេះដើម្បីជួយ។ ហើយចាប់តាំងពីប្រទេសទាំងពីរជាមិត្តរបស់យើង យើងជាមិត្តនឹងកម្ពុជា និងថៃ យើងទាំងអស់គ្នាជាសមាជិកអាស៊ាន យើងមិនចង់ឃើញរដ្ឋសមាជិកអាស៊ានជួបប្រទះបញ្ហានោះទេ»។

លោក Marcos បានបន្ថែមថា៖«នោះហើយជាមូលហេតុដែលខ្ញុំតែងតែពន្យល់ថាហ្វីលីពីនត្រៀមខ្លួនជាស្រេចដើម្បីដើរតួនាទីណាមួយដែលនឹងជួយពង្រឹងបទឈប់បាញ់»។

រហូតមកដល់ពេលនេះ ប្រទេសមហាអំណាចនានានិងស្ថាប័នអន្តរជាតិ កំពុងតាមដានយ៉ាងដិតដល់ចំពោះការអនុវត្តបទឈប់បាញ់រវាងកម្ពុជានិងថៃ ដែលបានចូលជាធរមានអស់រយៈពេលជាង២៤ម៉ោង ក្នុងកាលកំណត់៧២ម៉ោង មុនឈានទៅអនុវត្តបទកិច្ចព្រមព្រៀងសន្តិភាពដែលបានចុះហត្ថលេខានៅទីក្រុងកូឡាឡាំពួកាលពីចុងខែតុលា២០២៥៕

រ៉ាន់ រើយ

រូបភាពទទួលញញួរប្រធានអាស៊ានរបស់ប្រធានាធិបតីហ្វីលីពីន។

The post ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន appeared first on Kampuchea Thmey Daily.

លោក អាន់វ៉ា សាទរចំពោះបទឈប់បាញ់ រវាង កម្ពុជា-ថៃ ខណៈ៤ថ្ងៃទៀត បញ្ចប់តួនាទីជាប្រធានអាស៊ាន

សាង ស្រីល័ក្ខ — Sat, 27 Dec 2025 08:31:27 +0000

បើទោះបីជាសល់ពេលតែ៤ថ្ងៃទៀតនឹងត្រូវបញ្ចប់តួនាទីជាប្រធានអាស៊ានឆ្នាំ២០២៥យ៉ាងណាក្ដី ប៉ុន្តែនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម នៅតែតាំងចិត្តយ៉ាងមុះមុតក្នុងការដើរតួជាអ្នកសម្របសម្រួលកិច្ចព្រងព្រាងសន្តិភាពនិងបទឈប់បាញ់រវាងកម្ពុជា-ថៃ ប្រកបដោយជោគជ័យដែរ។

ជាក់ស្ដែង នាប៉ុន្មានម៉ោងមុននេះ នាយករដ្ឋមន្ត្រីម៉ាឡេស៊ី លោកបានចេញសារចូលរួមអបអរសាទរដលបទឈប់បាញ់ដែលបានព្រមព្រៀងគ្នារវាងប្រទេសកម្ពុជា និងប្រទេសថៃ នៅលើគណនីផ្ទាល់ខ្លួនដោយបង្ហាញអារម្មណ៍រីករាយដែលម៉ាឡេស៊ីបំពេញតួនាទីពេញដោយប្រសិទ្ធភាពក្នុងនាមជាប្រធានប្រធានអាស៊ានឆ្នាំ២០២៥នេះ។

តាមរយៈបណ្ដាញសង្គមហ្វេសបុក លោក អាន់វ៉ា បានសរសេររ៉ាយរាប់ពេញដោយអត្ថន័យជ្រាសជ្រៅថា «ខ្ញុំសូមស្វាគមន៍ចំពោះបទឈប់បាញ់ដែលបានព្រមព្រៀងគ្នាដោយប្រទេសកម្ពុជា និងប្រទេសថៃ ដែលចូលជាធរមាននៅវេលាម៉ោង ១២:០០ថ្ងៃត្រង់(ម៉ោងក្នុងស្រុក)។ ការសម្រេចចិត្តបញ្ឈប់ការប្រយុទ្ធគ្នា និងរក្សាកងកម្លាំងនៅនឹងដើមកន្លែងរៀងៗខ្លួន នោះឆ្លុះបញ្ចាំងពីការទទួលស្គាល់រួមគ្នាថា ការអត់ធ្មត់គឺត្រូវបានទាមទារ ជាពិសេសដើម្បីផលប្រយោជន៍របស់ជនស៊ីវិល។

នៅក្នុងសេចក្តីថ្លែងការណ៍រួមបានកំណត់វិធានការជាក់ស្តែង និងវិជ្ជមាន រួមទាំងការផ្ទៀងផ្ទាត់ដោយក្រុមអ្នកសង្កេតការណ៍អាស៊ាន និងការទំនាក់ទំនងដោយផ្ទាល់រវាងអាជ្ញាធរការពារជាតិ។ ទាំងនេះផ្តល់មូលដ្ឋានសម្រាប់ស្ថិរភាព ហើយខ្ញុំសង្ឃឹមថា ភាគីទាំងពីរនឹងអនុវត្តវាដោយស្មោះត្រង់បំផុត។

នៅក្នុងសំណេរដដែលនោះ លោកអាន់វ៉ា អ៊ីប្រាហ៊ីម ក៏មិនភ្លេចរំលេចពាក្យពេចន៍ខ្លះៗបន្ថែមទៀតថា នៅពេលដែលប្រទេសម៉ាឡេស៊ីប្រគល់តួនាទីប្រធានអាស៊ានទៅឲ្យហ្វីលីពីននៅពាក់កណ្តាលអធ្រាត្រ ឈានចូលថ្ងៃទី ១ ខែមករា ឆ្នាំ ២០២៦ យើងនឹងគាំទ្រកិច្ចខិតខំប្រឹងប្រែងទាំងអស់ ដើម្បីធានាថា កិច្ចខិតខំប្រឹងប្រែងទាំងនេះត្រូវបានគោរព និងថា កិត្យានុភាព និងភាពជឿជាក់របស់អាស៊ានជាតំបន់សន្តិភាពត្រូវបានរក្សា»។

សូមបញ្ចាក់ថា កម្ពុជា និងថៃ យល់ព្រមឲ្យមានបទឈប់បាញ់ជាបន្ទាន់ កាលពីវេលាម៉ោង១២ថ្ងៃត្រង់ នាថ្ងៃទី២៧ ខែធ្នូ ឆ្នាំ២០២៥នេះ ហើយកងទ័ពកម្ពុជា១៨រូបដែលថៃចាប់ឃុំខ្លួន ក៏រំពឹងថា នឹងត្រូវដោះលែងមកវិញ បន្ទាប់ពីបទឈប់បាញ់ត្រូវបានអនុវត្តពេញលេញរយៈពេល៧២ម៉ោង។ នេះជាការអះអាងរបស់រដ្ឋមន្ត្រីការពារជាតិកម្ពុជា ក្រោយការឯកភាពគ្នារវាងកម្ពុជា និងថៃ ក្នុងកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) នៅថ្ងៃទី២៦ ខែធ្នូនេះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ក្រោយបទឈប់បាញ់បន្ទាន់! កម្ពុជា-ថៃ ឯកភាពគ្នាឱ្យពលរដ្ឋនៅតំបន់ព្រំដែនវិលទៅផ្ទះវិញដោយគ្មានការរារាំង

The post លោក អាន់វ៉ា សាទរចំពោះបទឈប់បាញ់ រវាង កម្ពុជា-ថៃ ខណៈ៤ថ្ងៃទៀត បញ្ចប់តួនាទីជាប្រធានអាស៊ាន appeared first on Kampuchea Thmey Daily.

អាន់វ៉ា អ៊ីប្រាហ៊ីម ឈានមុខសម្របសម្រួលជម្លោះដើម្បីសន្តិភាព ខណៈថៃរំលោភស្មារតីអាស៊ាន

Rann Reuy — Thu, 25 Dec 2025 07:38:07 +0000

នៅប៉ុន្មានថ្ងៃទៀតប៉ុណ្ណោះឆ្នាំ២០២៥នឹងត្រូវបញ្ចប់ ហើយតួនាទីប្រធានអាស៊ានក៏នឹងត្រូវផ្លាស់ប្តូរដែរ។ អ្វីដែលគួរឲ្យចង់ចាំបំផុតសម្រាប់ឆ្នាំ២០២៥ គឺជម្លោះប្រដាប់អាវុធរវាងថៃនិងកម្ពុជា ដែលមេដឹកនាំពិភពលោកទាំងអស់បានផ្តោតការយកចិត្តទុកដាក់យ៉ាងខ្លាំងបំផុត ព្រមទាំងបានបង្ហាញជំហរដូចគ្នាឲ្យដោះស្រាយគ្នាដោយសន្តិភាព។

កិច្ចព្រមព្រៀងសន្តិភាពរវាងកម្ពុជានិងថៃ ចុះហត្ថលេខាក្រោមវត្តមានប្រធានាធិបតីអាមេរិក លោក ដូណាល់ ត្រាំ និង សម្របសម្រួលដោយនាយករដ្ឋមន្ត្រីម៉ាឡេស៊ី។ FB/Anwar

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលត្រូវបានគេមើលឃើញថា បានបំពេញតួនាទីជាប្រធានអាស៊ានប្តូរវេនដ៏ល្អក្នុងពេលដែលវិបត្តិកើតមានក្នុងតំបន់និងពិភពលោក ព្រមទាំងទទួលបានការកោតសរសើរចំពោះភាពសកម្មសម្របសម្រួលដោយឥតលម្អៀងក្នុងជម្លោះថៃនិងកម្ពុជា។

លោក អាន់វ៉ា អីប្រាហ៊ីម ត្រូវបានគេចាត់ទុកថាជាអ្នកសម្របសម្រួលដ៏មានប្រសិទ្ធភាពក្នុងជម្លោះកម្ពុជា-ថៃ ដោយសារភាពសកម្មភាពវិស័យការទូតដ៏លេចធ្លោរ និងរក្សាបាននូវក្នុងឋានៈជាភាគីទីបីដែលមានអព្យាក្រឹត និងសមត្ថភាពក្នុងការភ្ជាប់អាស៊ានទៅស្ថាប័នអន្តរជាតិ និងប្រទេសមហាអំណាចដែលកំពុងប្រជែងឥទ្ធិពលក្នុងតំបន់។

ក្នុងរយៈពេលដ៏ខ្លីក្រោយការផ្ទុះអាវុធរវាងថៃនិងកម្ពុជា បានកើតឡើងកាលថ្ងៃទី២៤ខែកក្កដាឆ្នាំ២០២៥ រដ្ឋាភិបាលម៉ាឡេស៊ី ដឹកនាំដោយលោក អាវ៉ាន់ អ៊ីប្រាហ៊ីម បានដឹកនាំសម្របសម្រួលនាំយកបទឈប់បាញ់ដំបូងកាលថ្ងៃទី២៨ខែកក្កដាឆ្នាំ២០២៥ ដោយមានការជ្រុមជ្រែងពីមហាអំណាចសហរដ្ឋអាមេរិក និង មហាអំណាចចិនធ្វើជាសាក្សីផង ដែលនាំឲ្យពិភពលោកមានការស្ងើចសរសើរ និងអបអរសាទរស្ទើរតែគ្រប់មេដឹកនាំនៃបណ្តាប្រទេសនិងស្ថាប័ននានា។

ដើម្បីធានាដល់ការតាមដានបទឈប់បាញ់ដ៏ផុយស្រួយនាពេលនោះ នាយករដ្ឋមន្ត្រី អាន់វ៉ា អ៊ីប្រាហ៊ីម ស្នើដាក់ចេញនូវក្រុមអង្កេតការណ៍បណ្តោះអាស៊ាន (IOT) ដឹកនាំដោយយោធាម៉ាឡេស៊ី និងការកំណត់ពេលវេលាប្រជុំជាបន្តបន្ទាប់ រួមមានកិច្ចប្រជុំគណៈកម្មាធិការព្រំដែនរួម (JBC) គណៈកម្មាធិការព្រមដែនទូទៅ (GBC) និង គណកម្មាធិការព្រំដែនថ្នាក់ភូមិភាគ (RBC) រហូតអាចសរុបរបាយការណ៍ដើម្បីសម្រេចបាននូវ «សេចក្តីប្រកាសរួម (Joint Declaration» នៅទីក្រុងកូឡាឡាំពួកាលថ្ងៃទី២៦ខែតុលាឆ្នាំ២០២៥ ដែលជាការឆ្លើយតបចំពោះការចង់បានរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។

នៅក្នុងការស្នើវិធានការតាមដាននោះដែរ នាយករដ្ឋមន្ត្រី អាន់វ៉ា ក៏បានស្នើម្តងហើយម្តងទៀតក្នុងការបំពាក់បច្ចេកវិទ្យាផ្កាយរណបដើម្បីតាមដាននៅតាមបណ្តោយព្រំដែនដែលមានជម្លោះ ប៉ុន្តែជារឿយៗ មានឧបសគ្គក្នុងការអនុវត្តដែលគេជឿថា ភាគីថៃបានជំទាស់ដោយសារតែសកម្មភាពបង្កហេតុរបស់ខ្លួន។ ផែនការនៃការបំពាក់ផ្កាយរណបនេះ ត្រូវបានលោកអាន់វ៉ា ព្រលយចុងក្រោយនៅថ្ងៃទី១៤ខែធ្នូ ដែលជាការជួយជ្រុមជ្រែងពីសហរដ្ឋអាមេរិក ប៉ុន្តែលទ្ធផលនៃការតាមដាននោះ បានត្រឹមបង្ហាញដល់កិច្ចប្រជុំពិសេសរបស់រដ្ឋមន្ត្រីការបរទេសអាស៊ាននៅថ្ងៃទី២២ខែធ្នូ ដោយមិនត្រូវបានបង្ហាញជាសាធារណៈទេ។

នាយករដ្ឋមន្ត្រីថៃ លោគ អានុទីន ឆានវីរៈគុល រងការចោទថា បានប្រើប្រាស់សង្គ្រាមដើម្បីបង្កើនប្រជាប្រិយភាពតាមរយៈមនោគមន៍ជាតិនិយម។

ក្នុងឋានៈជាប្រធានអាស៊ានឆ្នាំ២០២៥ លោក អាន់វ៉ា អ៊ីប្រាហ៊ីម មិនត្រឹមតែត្រូវបានកត់សម្គាល់ពីភាពសកម្មក្នុងការសម្របសម្រួលបទឈប់បាញ់ថៃ-កម្ពុជា ប៉ុណ្ណោះទេ ប៉ុន្តែ លោក អាន់វ៉ា បានធ្វើឱ្យទំនាក់ទំនងរវាងសហរដ្ឋអាមេរិក និងម៉ាឡេស៊ីកាន់តែស៊ីជម្រៅក្នុងវិស័យពាណិជ្ជកម្មនិងការពារជាតិ និងការដាក់ឲ្យអាស៊ានស្ថិតនៅកណ្តាលក្នុងចន្លោះឥទ្ធ៊ិពលនៃមហាអំណាចអាមេរិកនិងចិននាពេលនេះ។ នេះយោងតាមសេចក្តីប្រកាសរួមនៃកិច្ចប្រជុំកំពូល អាស៊ាន-អាមេរិកលើកទី១៣នៅទីក្រុងកូឡាឡាំពួ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកសរសើរ លោក នាយករដ្ឋមន្ត្រី អាន់វ៉ា អ៊ីប្រាហ៊ីម ម្តងហើយម្តងទៀតចំពោះកិច្ចការរបស់លោកក្នុងការសម្របសម្រួលក្នុងការដោះស្រាយជម្លោះថៃនិងកម្ពុជា។ មិនថាថ្លែងនៅទីក្រុងវ៉ាស៊ីនតោន ថ្លែងនៅទីក្រុងកូឡាឡាំពួ ការថ្លែងនៅទីប្រទេសកូរ៉េខាងត្បូង ឬក៏ថា ការបញ្ចេញសារតាមបណ្តាញសង្គមទាក់ទិនដល់ជម្លោះថៃនិងកម្ពុជា ប្រធានាធិបតី ដូណាល់ ត្រាំ តែងលើកនូវគុណសម្បត្តិរបស់លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី។

លោក ត្រាំ បានពិភាក្សាជាមួយលោក អាន់វ៉ា ក្នុងទីក្រុងកូឡាឡាំពូ កាលថ្ងៃទី២៦ខែតុលាឆ្នាំ២០២៥។ FB/Anwar

ជាក់ស្តែងណាស់ លោក ដូណាល់ ត្រាំ បានថ្លែងនៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសកូរ៉េខាងត្បូងកាលពីចុងតុលា ដោយពណ៌នាអំពីស្ថានភាពជម្លោះថៃនិងកម្ពុជា ថា «ក្តៅពេកជាមួយនឹងគ្រាប់កាំភ្លើងហោះគ្រប់កន្លែង» ប៉ុន្តែ ដោយមានជំនួយពីប្រទេសម៉ាឡេស៊ី កិច្ចព្រមព្រៀងសន្តិភាពត្រូវបានចុះហត្ថលេខាដោយជោគជ័យរវាងប្រទេសទាំងពីរនៅក្រៅកិច្ចប្រជុំកំពូលអាស៊ានលើកទី៤៧ និងកិច្ចប្រជុំពាក់ព័ន្ធដែលបានធ្វើឡើងនៅទីក្រុងគូឡាឡាំពួ។

ថ្លែងនាពេលនោះ លោក ត្រាំ បានលើកឡើងថា៖«ម៉ាឡេស៊ីអស្ចារ្យណាស់ ហើយពួកគេបានជួយអនុវត្តវា (ការចុះហត្ថលេខា)។ នាយករដ្ឋមន្ត្រី [អាន់វ៉ា] ពិតជាអស្ចារ្យ បុរសដ៏អស្ចារ្យ។ [ខ្ញុំ]ទើបតែចាកចេញពីគាត់ ហើយក្នុងរយៈពេលពីរថ្ងៃ យើងបានចុះហត្ថលេខាលើកិច្ចព្រមព្រៀង។ ប្រជាជនទាំងពីរ [ថៃ និងកម្ពុជា] ទៅវិញទៅមក ពួកគេដូចជាមិត្តល្អបំផុត។

សម្រាប់រដ្ឋាភិបាលចិនវិញ តួនាទីដឹកនាំអាស៊ានរបស់ម៉ាឡេស៊ីក្នុងការសម្របសម្រួលជម្លោះកម្ពុជានិងថៃ គឺជារឿងចាំបាច់ និងជំរុញឲ្យភាគីជម្លោះងាកទៅរកការចរចាតាមយន្តការរបស់អាស៊ាន ដើម្បីធ្វើបង្ហាញពីការរួបរួមគ្នារបស់អាស៊ាន។ ទោះបីជាបែបណា ថ្នាក់ដឹកនាំរដ្ឋាភិបាលចិនមិនមានការកោតសរសើរចំពោះនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ផ្ទាល់ទេនោះទេ។

អគ្គលេខាធិការអង្គការសហប្រជាជាតិ លោក Antonio Guterres បានកោតសរសើរតួនាទីរបស់ម៉ាឡេស៊ីក្នុងការសម្របសម្រួលបទឈប់បាញ់រវាងកម្ពុជានិងថៃ ដែលជាការចង្អុលបង្ហាញទៅការដោះស្រាយជម្លោះដោយសន្តិវិធី។

ជារួម លោក អាន់វ៉ា អ៊ីប្រាហ៊ីម ខ្លួនឯងហាក់បានបង្ហាញបំណងច្បាស់ក្នុងការនាំយកនូវការឯកភាពក្នុងអាស៊ាន និងការដោះស្រាយជម្លោះប្រកបដោយសន្តិភាពរវាងកម្ពុជានិងថៃ ប៉ុន្តែគួរឲ្យសោកស្តាយ ដែលភាគីរដ្ឋាភិបាលថៃ ដឹកនាំដោយលោក អានុទីន ឆានវីរៈគុល ដែលបានចុះហត្ថលេខាលើកិច្ចព្រមព្រៀងសន្តិភាពនោះ បានធ្វើសកម្មភាពបង្កហេតុ និង មិនស្តាប់ជំហរដោះស្រាយរបស់អន្តរជាតិ៕

ដោយ រ៉ាន់ រើយ

The post អាន់វ៉ា អ៊ីប្រាហ៊ីម ឈានមុខសម្របសម្រួលជម្លោះដើម្បីសន្តិភាព ខណៈថៃរំលោភស្មារតីអាស៊ាន appeared first on Kampuchea Thmey Daily.

ម៉ាឡេស៊ី ប្តេជ្ញានាំយកស្មារតីកីឡាស៊ីហ្គេមមកវិញ ក្រោយថៃធ្វើឲ្យខូចមុខមាត់

Rann Reuy — Mon, 22 Dec 2025 03:32:07 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហោះសារបង្ហាញការបេ្តជ្ញារៀបចំព្រឹត្តិការណ៍កីឡាអាស៊ានលើកទី៣៤ ដែលម៉ាឡេស៊ីនឹងក្លាយជាម្ចាស់ផ្ទះរៀបចំឲ្យបានហ្មត់ចត់និងយុត្តិធម៌ បន្ទាប់ពីព្រឹត្តិការណ៍ស៊ីហ្គេមលើកទី៣៣នៅប្រទេសថៃ រងការរិះគន់ចំពោះភាពអយុត្តិធម៌ និងការរៀបចំដ៏អន់ថយ នាំឲ្យអាប់ឱនដល់ព្រឹត្តិការណ៍ដ៏សំខាន់នេះ។

អត្តពលិកម៉ាឡេស៊ីដែលបានចូលរួមប្រកួតកីឡាស៊ីហ្គេមនៅប្រទេសថៃ។ FB/Anwar

នៅក្នុងសារអបអរចំពោះអត្តពលិកម៉ាឡេស៊ីដែលទទួលបានជោគជ័យក្នុងការចូលរួមប្រកួតកីឡាស៊ីហ្គេមនៅប្រទេសថៃដែលទើបបញ្ចប់កាលថ្ងៃទី២០ខែធ្នូនេះ លោក អាន់វ៉ា បានសរសេររៀបរាប់ពីការប្រកាន់ភ្ជាប់នូវវិន័យខ្ពស់ ការលះបង់ និងស្មារតីតស៊ូរបស់អត្តពលិក គ្រូបង្វិក និងមន្ត្រីដឹកនាំក្រុមអត្តពលិក ដែលមិនចុះញ៉មក្នុងការនាំយកឈ្មោះប្រទេសឲ្យមានភាពយុត្តិធម៌ក្នុងតំបន់។

ការលើកឡើងរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្រោយពេលដែលក្រុមអត្តពលិកម៉ាឡេស៊ី និងគ្រូបង្វិក ប្រភេទកីឡាបញ្ចសីលា បានផ្ទុះការតវ៉ាយ៉ាងខ្លាំងចំពោះភាពអយុត្តិធម៌របស់ក្រុមអាជ្ញាកណ្តាលសម្រាប់ការប្រកួតនៅក្នុងព្រឹត្តិការណ៍ស៊ីហ្គេមក្នុងប្រទេសថៃ។

ម៉ាឡេស៊ី ទទួលទង់កីឡាអាស៊ីអាគ្នេយ៍ជាផ្លូវការ

ព្រឹត្តិការណ៍កីឡាប្រចាំតំបន់អាស៊ាននេះលើកទី៣៣ក្នុងប្រទេសថៃ ត្រូវបានគេរិះគន់យ៉ាងខ្លាំង ថាជាព្រឹត្តិការណ៍អន់បំផុតក្នុងប្រវត្តិសាស្ត្រ៦៦ឆ្នាំ ដែលប្រារព្វធ្វើឡើងលើកដំបូងក្នុងឆ្នាំ១៩៥៩ ក្នុងទីក្រុងបាងកក ប្រទេសថៃនោះដែរ។

ដើម្បីស្តារមុខមាត់ព្រឹត្តិការណ៍កីឡាអាស៊ីអាគ្នេយ៍នេះវិញ លោក អាន់វ៉ា អ៊ីប្រាហ៊ីម បានលើកឡើងថា «ជាមួយគ្នានេះ យើងនឹងធានាថា ការរៀបចំធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៧ ត្រូវបានរៀបចំយ៉ាងហ្មត់ចត់ ប្រតិបត្តិតាមអ្វីដែលបានគ្រោងទុក និងតាមបែបបទ មិនត្រឹមតែពីចំណុចចាប់ផ្តើម និងការធ្វើជាម្ចាស់ផ្ទះប៉ុណ្ណោះទេ ប៉ុន្តែក្នុងការកសាងប្រព័ន្ធអេកូកីឡាប្រកបដោយនិរន្តរភាព ក៏ដូចជាការផលិតទេពកោសល្យលំដាប់ពិភពលោក»។

លោក អាន់វ៉ា បានបន្ថែមទៀតថា៖‍«ជាងនេះទៅទៀត កីឡាគឺជាបណ្តុំសម្រាប់មនុស្សរួបរួមគ្នា ដែលប្រមូលផ្តុំចម្រុះជាតិសាសន៍ គ្រប់តំបន់ និងគ្រប់មជ្ឈដ្ឋាន ក្នុងស្មារតីរួមគ្នា និងមោទនភាពជាតិតែមួយ។ នេះគឺជាកម្លាំងពិតរបស់ម៉ាឡេស៊ី ដែលត្រូវតែបន្តរក្សា និងផ្តល់អំណាច»។

អ្នកជំនាញក្នុងវិស័យកីឡា បានមើលឃើញថា ការរៀបចំព្រឹត្តិការណ៍ស៊ីហ្គេមលើកទី៣៣របស់ប្រទេសថៃ ដែលបានប្រព្រឹត្តកំហុសធំៗជារួមចំនួន៣ គឺ ទី ១-កំហុសខាងបច្ចេកទេស ទី២-កំហុសដោយចេតនារបស់អត្តពលិកថៃ
និង ទី៣-ការកាត់សេចក្តីមានការលំអៀង។ កំហុសទាំងនោះ ត្រូវបានគេមើលឃើញថា បានកើតមានជាមួយប្រទេសស្ទើរទាំងអស់ក្នុងប្រភេទវិញ្ញាសាប្រកួតសំខាន់ៗ៕

រ៉ាន់ រើយ

លោក អាន់វ៉ា អ៊ីប្រាហ៊ីម។

The post ម៉ាឡេស៊ី ប្តេជ្ញានាំយកស្មារតីកីឡាស៊ីហ្គេមមកវិញ ក្រោយថៃធ្វើឲ្យខូចមុខមាត់ appeared first on Kampuchea Thmey Daily.

លោក អាន់វ៉ា អ៊ីប្រាហ៊ីម Archives - Kampuchea Thmey Daily

ម៉ាឡេស៊ីប្រកាសឱ្យបុគ្គលិករដ្ឋធ្វើការពីផ្ទះ ដើម្បីសន្សំសំចៃ​ថាមពល

លោក អាន់វ៉ា៖ អ៊ីរ៉ង់​ត្រៀមរួច​រាល់​​សម្រាប់​ការ​​​ចរចា​បញ្ចប់សង្គ្រាម​ជាមួយអាមេរិក​​

អាស៊ាននឹង​តាម​ដាន​ស្ថាន​ភាព​នៅ​​​មីយ៉ាន់​ម៉ា​ បន្ទាប់​ពី​ការ​បោះ​ឆ្នោត​

លោក អាន់វ៉ា សាទរចំពោះបទឈប់បាញ់ រវាង កម្ពុជា-ថៃ ខណៈ៤ថ្ងៃទៀត បញ្ចប់​តួនាទី​​ជាប្រធានអាស៊ាន

​​អាន់វ៉ា អ៊ីប្រាហ៊ីម ឈានមុខសម្របសម្រួលជម្លោះដើម្បីសន្តិភាព​ ខណៈថៃរំលោភស្មារតីអាស៊ាន​​

​​ម៉ាឡេស៊ី ប្តេជ្ញា​​នាំ​យក​ស្មារតី​កីឡា​​ស៊ីហ្គេម​​មកវិញ ក្រោយ​ថៃ​ធ្វើឲ្យខូច​មុខមាត់​

ម៉ាឡេស៊ីប្រកាសឱ្យបុគ្គលិករដ្ឋធ្វើការពីផ្ទះ ដើម្បីសន្សំសំចៃថាមពល

លោក អាន់វ៉ា៖ អ៊ីរ៉ង់ត្រៀមរួចរាល់សម្រាប់ការចរចាបញ្ចប់សង្គ្រាមជាមួយអាមេរិក

អាស៊ាននឹងតាមដានស្ថានភាពនៅមីយ៉ាន់ម៉ា បន្ទាប់ពីការបោះឆ្នោត

លោក អាន់វ៉ា សាទរចំពោះបទឈប់បាញ់ រវាង កម្ពុជា-ថៃ ខណៈ៤ថ្ងៃទៀត បញ្ចប់តួនាទីជាប្រធានអាស៊ាន

អាន់វ៉ា អ៊ីប្រាហ៊ីម ឈានមុខសម្របសម្រួលជម្លោះដើម្បីសន្តិភាព ខណៈថៃរំលោភស្មារតីអាស៊ាន

ម៉ាឡេស៊ី ប្តេជ្ញានាំយកស្មារតីកីឡាស៊ីហ្គេមមកវិញ ក្រោយថៃធ្វើឲ្យខូចមុខមាត់