លោក អាន់វ៉ា អ៊ីប្រាហ៊ីម Archives - Kampuchea Thmey Daily

ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ

Rann Reuy — Sun, 28 Dec 2025 02:53:00 +0000

ប្រទេសជាច្រើនបានទម្លាក់សារអបអរសាទរចំពោះបទឈប់ដែលកម្ពុជានិងថៃ ចុះហត្ថលេខាកាលថ្ងៃទី២៧ខែធ្នូ បន្ទាប់ពីការប្រយុទ្ធអស់រយៈពេល២១ថ្ងៃ ចាប់ពីថ្ងៃទី៧ខែធ្នូដែលភាគីថៃបើកការវាយប្រហារមើលលើបូរណៈភាពរបស់ប្រទេសកម្ពុជា រហូតដល់ថ្ងៃទី២៧ខែធ្នូ។

ក្រោយការចុះហត្ថលេខាលើកិច្ចព្រមព្រៀងបទឈប់បាញ់នោះប៉ុន្មានម៉ោង សហរដ្ឋអាមេរិកបានប្រកាសស្វាគមន៍ភ្លាម ក្រោយរដ្ឋបាលសហរដ្ឋអាមេរិក បានប្រឹងប្រែងជាញឹកញាប់ដើម្បីទាញភាគីទាំងពីរឲ្យអនុវត្តបទឈប់បាញ់។ ជាមួយសារស្វាគមន៍របស់រដ្ឋមន្ត្រីការបរទេសសហរដ្ឋអាមេរិកលោក Marco Rubio ក៏បានជំរុញឱ្យប្រទេសទាំងពីរអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ។

រដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីយ៉ូ (Marco Rubio) បានជំរុញឱ្យកម្ពុជា និងថៃ៖«គោរពការប្តេជ្ញាចិត្តនេះភ្លាមៗ និងអនុវត្តឱ្យបានពេញលេញនូវលក្ខខណ្ឌនៃកិច្ចព្រមព្រៀងសន្តិភាពទីក្រុងគូឡាឡាំពួ»។ នេះបើយោងតាមសេចក្តីថ្លែងការណ៍។

អគ្គលេខាធិការអង្គការសហប្រជាជាតិ លោក Antonio Guterres បានហៅកិច្ចព្រមព្រៀងបទឈប់បាញ់ដែលបានចុះហត្ថលេខាកាលថ្ងៃសៅរ៍នោះ ថា «ជាជំហានវិជ្ជមានឆ្ពោះទៅរកការបន្ធូរបន្ថយការឈឺចាប់របស់ជនស៊ីវិល បញ្ចប់អរិភាពបច្ចុប្បន្ន និងបង្កើតបរិយាកាសអំណោយផលដល់ការសម្រេចបាននូវសន្តិភាពយូរអង្វែង»។

អគ្គលេខាធិការអង្គការសហប្រជាជាតិ ក៏បានកោតសរសើរចំពោះប្រធានអាស៊ាន ម៉ាឡេស៊ី ចិន និងសហរដ្ឋអាមេរិក ចំពោះ «កិច្ចខិតខំប្រឹងប្រែងរបស់ពួកគេក្នុងការគាំទ្រដល់ដំណោះស្រាយដោយសន្តិវិធីនៃស្ថានភាព»។

លោក Guterres បានបន្ថែមថា អង្គការសហប្រជាជាតិ «ត្រៀមខ្លួនរួចជាស្រេច ដើម្បីគាំទ្រកិច្ចខិតខំប្រឹងប្រែង សំដៅរក្សាសន្តិភាព និងស្ថិរភាពក្នុងតំបន់»។

មហាអំណាចចិនក៏បានចេញសារស្វាគមន៍បទឈប់បាញ់នេះដែរ។ អ្នកនាំពាក្យក្រសួងការបរទេសចិន បានបង្ហោះសារតាមប្រព័ន្ធបណ្តាញសង្គម X ថា «នេះបង្ហាញថាការសន្ទនា និងការពិគ្រោះយោបល់គឺជាមធ្យោបាយដែលអាចសម្រេចបាន និងមានប្រសិទ្ធភាពក្នុងការដោះស្រាយជម្លោះដ៏ស្មុគស្មាញ»។

សេចក្តីថ្លែងការណ៍បានបន្ថែមថា៖«ប្រទេសចិន អាស៊ាន និងសហគមន៍អន្តរជាតិបានខិតខំប្រឹងប្រែងរួមគ្នាដើម្បីបញ្ចប់បញ្ហានេះ។ ប្រទេសចិនបានត្រៀមខ្លួនរួចជាស្រេចក្នុងការបន្តផ្តល់វេទិកា និងបង្កើតលក្ខខណ្ឌសម្រាប់កម្ពុជា និងថៃក្នុងការទំនាក់ទំនងកាន់តែពេញលេញ និងលម្អិតល្អន់បន្ថែមទៀត»។

ជាមួយការបង្ហាញសារសាទរនេះ រដ្ឋមន្ត្រីការបរទេសចិន លោក វ៉ាង យី (Wang Yi) ក៏បានរៀបចំកិច្ចប្រជុំត្រីភាគីដើម្បីសម្របសម្រួលកម្ពុជានិងថៃនៅខេត្តយូណាន ដោយមានវត្តមានប្រតិភូកម្ពុជាដឹកនាំ ដោយ លោក ប្រាក់ សុខុន និងសមភាគីថៃ លោក ស៊ីហាសាក់ ភូងកេតកែវ (Sihasak Phuangketkeow) ចាប់ពីថ្ងៃអាទិត្យ ដល់ថ្ងៃចន្ទ។ តាមការបញ្ជាក់របស់អ្នកនាំពាក្យក្រសួងការបរទេសចិន កិច្ចប្រជុំនោះក៏មានវត្តមានចូលរួមជាមួយតំណាងយោធាផងដែរ។

ប្រទេសជប៉ុន អាល្លឺម៉ង់ អូស្ត្រាលី ប្រទេសម៉ាឡេស៊ីក្នុងនាមប្រធានអាស៊ាន សុទ្ធតែបានបង្ហាញនូវសារអបអរសាទរ ដោយប្រទេសទាំងនោះបានបង្ហាញនូវតួនាទីសំខាន់របស់អាស៊ានក្នុងការដំណើរការទៅអនុវត្តពេញលេញនូវបទឈប់បាញ់ និងអនុវត្តកិច្ចព្រមព្រៀងសន្តិភាពដែលភាគីទាំងពីរបានចុះហត្ថលេខារួចហើយកាលពីចុងខែតុលាឆ្នាំនេះ៕

ដោយ រ៉ាន់ រើយ

The post ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ appeared first on Kampuchea Thmey Daily.

លោក អាន់វ៉ា ពិភាក្សាជាមួយមេដឹកនាំកម្ពុជានិងថៃរកដំណោះស្រាយ មុនកិច្ចប្រជុំពិសេសនៅថ្ងៃ២២ធ្នូ

Rann Reuy — Sun, 21 Dec 2025 04:54:44 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្នុងឋានៈជាប្រធានអាស៊ាន បានជួបពិភាក្សាពិសេសជាមួយនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត និង នាយករដ្ឋមន្ត្រីថៃ លោក អានុទីន ឆានវីរៈគុល មួយថ្ងៃមុនកិច្ចប្រជុំពិសេសកម្រិតរដ្ឋមន្ត្រីការបរទេសអាស៊ានដើម្បីរកដំណោះស្រាយក្នុងជម្លោះព្រំដែនកម្ពុជានិងថៃនៅថ្ងៃទី២២ខែធ្នូនេះ។

នៅក្នុងសំណេរបង្ហោះតាមបណ្តាញសង្គមនៅថ្ងៃទី២១ខែធ្នូ លោក អាន់វ៉ា អ៊ីប្រាហ៊ីម បានលើកឡើងថា កិច្ចប្រជុំរវាងមេដឹកនាំទាំងពីរប្រទេសនេះដើម្បីកិច្ចពិភាក្សាដោះដូរយោបល់គ្នាផ្តោតសំខាន់បំផុតទៅបញ្ចប់ភាពតានតឹងដែលកើតមានឡើងរវាបប្រទេសទាំងពីរ។

លោក អាន់វ៉ា បានសរសេរថា៖‍«ខ្ញុំបញ្ជាក់ម្តងទៀតនូវសារសំខាន់សម្រាប់កម្ពុជានិងថៃ ដើម្បីប្រកាន់ខ្ជាប់ចំពោះស្មារតីនៃការពិភាក្សា បញ្ញាញាណ និងការគោរពគ្នាទៅវិញទៅមក ដើម្បីបញ្ជប់ភាពតានតឹងនិងរក្សាបាននូវសន្តិភាពនិងស្ថិរភាពក្នុងតំបន់»។

ការជួបសន្ទនាតាមទូរស័ព្ទត្រីភាគីនេះ បានកើតឡើងក្រោយពេលដែលមហាអំណាចចិន និងសហរដ្ឋអាមេរិក បានដាក់សម្ពាធរដ្ឋាភិបាលថៃ វិលទៅរកការចរចារកដំណោះស្រាយដោយសន្តិវិធី បញ្ជប់ជម្លោះប្រដាប់អាវុធ និងត្រឡប់ទៅអនុវត្តកិច្ចព្រមព្រៀងដែលភាគីថៃបានចុះហត្ថលេខាជាមួយកម្ពុជាកាលថ្ងៃទី២៦ខែតុលាឆ្នាំ២០២៥នៅទីក្រុងកូឡាំពួ។

កាលពីថ្ងៃព្រហស្បតិ៍កន្លងទៅ ទាំងរដ្ឋមន្ត្រីការបរទេសសហរដ្ឋអាមេរិក លោក ម៉ាកូ រ៉ូប៊ីយ៉ូ និង រដ្ឋមន្ត្រីការបរទេសចិន លោក វ៉ាង យី បាននិយាយតាមទូរស័ព្ទជាមួយរដ្ឋមន្ត្រីការបរទេសថៃ លោក សីហាសាក់ ភូងកេតុកែវ ដោយប្រាប់ភាគីថៃឲ្យចាត់វិធានការជាក់ស្តែងបញ្ចប់ភាពតានតឹង និង ត្រឡប់ទៅអនុវត្តកិច្ចព្រមព្រៀងដែលមានស្រាប់។

សម្រាប់រដ្ឋមន្ត្រីការបរទេសចិន លោក វ៉ាង យី មិនត្រឹមតែប្រាប់ឲ្យថៃវិលទៅរកដំណោះស្រាយតាមមធ្យោបាយចរចាការទូត ដោយប្រើប្រាស់យន្តការអាស៊ានទេ ថែមទាំងបានប្រដៅថៃមិនឲ្យបង្ហហេតុប៉ះពាល់ដល់គម្រោងរបស់ចិន និង បុគ្គលិករបស់ចិនទៀតផង។

កិច្ចប្រជុំត្រីភាគីសម្របសម្រួលដោយលោក អាន់វ៉ា នៅថ្ងៃអាទិត្យនេះ កើតឡើងតែមួយថ្ងៃប៉ុណ្ណោះដែលជម្លោះព្រំដែនបង្កឡើងដោយភាគីថៃនេះ នឹងត្រូវដាក់ទៅក្នុងកិច្ចប្រជុំពិសេសថ្នាក់រដ្ឋមន្ត្រីការបរទេសអាស៊ាននៅទីក្រុងកូឡាឡាំពួ ដែលលោក អាន់វ៉ា លើកឡើងថា ជាវេទិកាសមរម្យនិងស្ថាបនា ដើម្បីកែសម្រួលប្រទេសទាំងពីរទៅរកការចរចាដោយបើកចំហ ដោះស្រាយវិវាទដោយសន្តិភាពនិងទទួលបានដំណោះស្រាយយុត្តិធម៌ និងយូរអង្វែង៕

រ៉ាន់ រើយ

The post លោក អាន់វ៉ា ពិភាក្សាជាមួយមេដឹកនាំកម្ពុជានិងថៃរកដំណោះស្រាយ មុនកិច្ចប្រជុំពិសេសនៅថ្ងៃ២២ធ្នូ appeared first on Kampuchea Thmey Daily.

រដ្ឋាភិបាលម៉ាឡេស៊ីត្រៀមកម្រិតខ្ពស់ ទប់ទល់ព្យុះ Senyar ដែលបង្កទឹកជំនន់បន្ថែម

Rann Reuy — Fri, 28 Nov 2025 07:23:50 +0000

រដ្ឋាភិបាលម៉ាឡេស៊ី បានបង្គាប់ឲ្យត្រៀមលក្ខណៈពេញលេញចំពោះមជ្ឈមណ្ឌលត្រួតពិនិត្យប្រតិបត្តិការរបស់រដ្ឋនៅក្នុងរដ្ឋចំនួន១៤ និងមជ្ឈមណ្ឌលត្រួតពិនិត្យប្រតិបត្តិការស្រុកចំនួន១៩៨ បន្ទាប់ពីការវិវត្តន៍នៃព្យុះត្រូពិច Senyar ដែលបានធ្វើឱ្យមានការបាក់ដីនៅលើឆ្នេរសមុទ្រម៉ាឡេស៊ីនៅពាក់កណ្តាលអធ្រាត្រយប់មិញ ដែលនឹងមានឥទ្ធិពលបង្កើនទឹកជំនន់។

រូបភាពបង្ហាញពីឥទ្ធិពលព្យុះ Senyar ដែលនឹងប៉ះពាល់ម៉ាឡេស៊ី។ New Straits times

ឧបនាយករដ្ឋមន្រ្តី Ahmad Zahid Hamidi បាននិយាយថា ទោះបីជាព្យុះនេះត្រូវបានបន្ថយឥទ្ធិពលទៅជាប្រព័ន្ធសម្ពាធទាបក៏ដោយ ប៉ុន្តែកម្លាំងកួចនៃខ្យល់នៅតែមានសក្តានុពលក្នុងការនាំមកនូវភ្លៀងធ្លាក់ជាបន្តបន្ទាប់នៅក្នុងតំបន់ជាច្រើនក្នុងឧបទ្វីបម៉ាឡេស៊ីក្នុងរយៈពេល២៤ម៉ោងបន្ទាប់។

តាមការចេញផ្សាយរបស់ទីភ្នាក់ងារព័ត៌មានម៉ាឡេស៊ី BERNAMA លោក Ahmad Zahid បាននិយាយថា ក្នុងនាមជាប្រធានគណៈកម្មាធិការគ្រប់គ្រងគ្រោះមហន្តរាយថ្នាក់កណ្តាល លោកបានទទួលរបាយការណ៍សង្ខេបពីឧតុនិយមម៉ាឡេស៊ី (MetMalaysia) ទីភ្នាក់ងារគ្រប់គ្រងគ្រោះមហន្តរាយជាតិ (Nadma) និងកងកម្លាំងការពារជនស៊ីវិលម៉ាឡេស៊ី (APM) ស្តីពីផលប៉ះពាល់នៃអាកាសធាតុលើប្រជាជន និងហេដ្ឋារចនាសម្ព័ន្ធសំខាន់ៗ។

យោងតាមលោក មជ្ឈមណ្ឌលគ្រប់គ្រងប្រតិបត្តិការគ្រោះមហន្តរាយនៅថ្នាក់រដ្ឋ និងស្រុកក៏ត្រូវបានបើកផងដែរ ដើម្បីធានាថាការសម្របសម្រួលប្រតិបត្តិការ ការជម្លៀសជនរងគ្រោះ និងការផ្សព្វផ្សាយព័ត៌មានអាចត្រូវបានអនុវត្តដោយគ្មានការពន្យារពេល។

លោកបាននិយាយនៅក្នុងសេចក្តីថ្លែងការណ៍មួយនៅថ្ងៃនេះថា «វិធានការនេះអនុញ្ញាតឱ្យរាល់ការវិវត្តន៍ និងតម្រូវការនៅលើមូលដ្ឋានត្រូវបានដោះស្រាយក្នុងពេលជាក់ស្តែងដោយទីភ្នាក់ងារគ្រប់គ្រងគ្រោះមហន្តរាយ»។

លោកបាននិយាយថា កងកម្លាំងការពារជនស៊ីវិលម៉ាឡេស៊ី (APM) បានចល័តបុគ្គលិកជាង ២០០០ នាក់ដើម្បីល្បាត និងតាមដានតំបន់ដែលមានហានិភ័យខ្ពស់ពាក់ព័ន្ធនឹងទឹកជំនន់ ខ្យល់ព្យុះ និងរលកខ្លាំងនៅលើឆ្នេរសមុទ្រ។

គ្រឿងសម្ភារត្រៀមសំខាន់ៗរួមមាន ទូកសង្គ្រោះ រថយន្តសង្គ្រោះ រថយន្តប្រភេទប៉ុង៤ ម៉ាស៊ីនភ្លើង ម៉ាស៊ីនបូមទឹកចល័ត និងយន្តហោះគ្មានមនុស្សបើក (ដ្រូន) ត្រូវបានគេដាក់ពង្រាយ ដើម្បីធានាថា ប្រតិបត្តិការជួយសង្គ្រោះ ការជម្លៀស និងជំនួយសង្គ្រោះបន្ទាន់អាចត្រូវបានអនុវត្តភ្លាមៗ៕

លោក Ahmad Zahid ក៏បានក្រើនរំលឹកអ្នកស្រុកនៅតំបន់រងផលប៉ះពាល់ និងតំបន់ដែលមានហានិភ័យ ត្រូវតែអនុវត្តតាមការប្រកាសផ្លូវការពី បណ្តាញផ្លូវការរបស់រដ្ឋ និងបុគ្គលិកភ្នាក់ងាររបស់រដ្ឋាភិបាលនៅមូលដ្ឋាន និងអាជ្ញាធរ និងគោរពតាមបញ្ជាជម្លៀសប្រសិនបើមានការណែនាំ។

លោក ក្រើនរំឭកថា៖«សាធារណជនត្រូវបានណែនាំឱ្យចៀសវាងទៅលេងតាមតំបន់សមុទ្រ និងឆ្នេរ ដោយសារខ្យល់បក់ខ្លាំង និងរលកខ្ពស់ ខណៈត្រូវធានាថា សម្ភារៈសង្គ្រោះបន្ទាន់ត្រូវត្រៀមជាប់ជានិច្ច ហើយឯកសារសំខាន់ៗត្រូវរក្សាទុកនៅកន្លែងសុវត្ថិភាព»។

លោកបានមានប្រសាសន៍ថា «ខ្ញុំក៏សង្កត់ធ្ងន់ថាសាធារណជនមិនគួរផ្សព្វផ្សាយព័ត៌មានដែលមិនបានផ្ទៀងផ្ទាត់ដែលអាចបង្កឲ្យមានការភាន់ច្រឡំ ឬភ័យស្លន់ស្លោឡើយ»៕

រ៉ាន់ រើយ

ឧបនាយករដ្ឋមន្រ្តី Ahmad Zahid Hamidi។ FB

The post រដ្ឋាភិបាលម៉ាឡេស៊ីត្រៀមកម្រិតខ្ពស់ ទប់ទល់ព្យុះ Senyar ដែលបង្កទឹកជំនន់បន្ថែម appeared first on Kampuchea Thmey Daily.

អានុទីនធ្វើឲ្យលោកអាន់វ៉ាភ្ញាក់ផ្អើល ជុំវិញការអះអាងរបស់ក្រុមអ្នកប្រឆាំងថៃ

Rann Reuy — Wed, 26 Nov 2025 10:18:26 +0000

នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) បានចេញមុខការពារនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្រោយពីមានការរិះគន់ដោយក្រុមអ្នកជាតិនិយមជ្រុលថៃមួយចំនួនដែលបានចោទប្រកាន់ លោក អាន់វ៉ា ថាបានជ្រៀតជ្រែកក្នុងកិច្ចការផ្ទៃក្នុងរបស់ថៃ។

សារព័ត៌មាន New Straits Times បានផ្សាយថា នាយករដ្ឋមន្ត្រីថៃ លោក អានុទីន បាននិយាយទូរស័ព្ទជាមួយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្នុងអំឡុងពេលដែលលោកស្ថិតនៅក្នុងបេសកកម្មនៅតំបន់អាហ្វ្រិក ដោយអះអាងថា លោកអានុទីន បានធានាថា អ្វីដែលក្រុមជ្រុលនិយមថៃចោទប្រកាន់នាយករដ្ឋមន្ត្រីម៉ាឡេស៊ី ជារឿងមិនពិត។

លោក អាន់វ៉ា ត្រូវបានស្រង់សម្តីដូចបាននិយាយថា៖«គាត់ [អានុទីន] បានទូរស័ព្ទមកខ្ញុំពេលព្រឹកដើម្បីធានាខ្ញុំថាអ្វីដែលបានចោទប្រកាន់ (ដោយក្រុមថៃ) មិនពិត»។

លោក អាន់វ៉ា អ៊ីប្រាហ៊ីម បានសរសើរលោក អានុទីន ថា«មានចិត្តល្អ» ហើយគាត់គិតថាការរិះគន់នេះអយុត្តិធម៌ ដោយលោកអាន់វ៉ា បញ្ជាក់តាមន័យដើមរបស់លោក អានុទីនថា៖‍«អាន់វ៉ា សូមមេត្តា… តាមដែលយើងបារម្ភ យើងដឹងពីតួនាទីរបស់អ្នក។ អ្នកសម្របសម្រួលរឿងនេះ (ធានាសន្តិភាពរវាងថៃ និងកម្ពុជា)»។

ការបញ្ជាក់របស់ អាន់វ៉ា បែបនេះទៅកាន់អ្នកកាសែតនៅលើជើងហោះហើរត្រឡប់ពីតំបន់អាហ្វ្រិក ទៅកាន់ទីក្រុង កូឡាំឡាំពូវិញ។ លោក អាន់វ៉ា ចាត់ទុកការអះអាងរបស់លោកអានុទីន ជាអ្វីដែលធ្វើឱ្យគាត់ភ្ញាក់ផ្អើលជាងការរិះគន់ប្រឆាំងនឹងរូបលោកដោយក្រុមថៃគឺការឆ្លើយតបដោយជនជាតិម៉ាឡេស៊ីមួយចំនួន។

សារព័ត៌មាន New Straits Times ស្រង់សម្តី លោកអាន់វ៉ា ដូចបាននិយាយថា៖«អ្វីដែលធ្វើឱ្យខ្ញុំភ្ញាក់ផ្អើលជាងនេះទៅទៀតនោះគឺថា ប្រជាជនម៉ាឡេស៊ីមួយចំនួនមានការរំភើបហួសហេតុដែលពួកយើងកំពុងរងការរិះគន់នៅក្នុងប្រទេសថៃ… តើដើម្បីអ្វីទៅ?»។

លោក បញ្ជាក់ថា៖«វាមិនមែនជារឿងរបស់អាន់វ៉ាម្នាក់ឯងទេ…មានអ្នកផ្សេងទៀតចូលរួម (ជួយបញ្ចប់ជម្លោះព្រំដែនកម្ពុជា-ថៃ)។ អ្នករិះគន់ហាក់ដូចជាគិតថាវាជាតួនាទីរបស់មនុស្សម្នាក់… វាមិនពិតទេ»។

ឆ្លើយតបចំពោះក្រុមជាតិនិយមដែលតវ៉ាកាលពីថ្ងៃទី២២ខែវិច្ឆិកា ដោយចោទប្រកាន់តួនាទីរបស់ម៉ាឡេស៊ី និងសហរដ្ឋអាមេរិក ថាបានជ្រៀតចូលក្នុងកិច្ចការផ្ទៃក្នុងថៃ លោកអាន់វ៉ា បានច្រានចោលការចោទប្រកាន់ដោយក្រុមនៅក្នុងប្រទេសថៃ៕

រ៉ាន់ រើយ

The post អានុទីនធ្វើឲ្យលោកអាន់វ៉ាភ្ញាក់ផ្អើល ជុំវិញការអះអាងរបស់ក្រុមអ្នកប្រឆាំងថៃ appeared first on Kampuchea Thmey Daily.

កម្ពុជា-ថៃ ធានាអនុវត្តកិច្ចព្រមព្រៀងសន្តិភាពឱ្យមានប្រសិទ្ធភាព ជៀសវាងសកម្មភាពញុះញង់ នៅចំពោះមុខម៉ាឡេស៊ី

Ngoeul Narath — Sat, 15 Nov 2025 10:19:25 +0000

នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម តាមរយៈទំព័រ facebook ផ្លូវការ នារសៀលថ្ងៃសៅរ៍ នេះ បានប្រកាសស្វាគមន៍ ចំពោះឆន្ទៈ និងការធានារបស់កម្ពុជា និងថៃ ក្នុងការជ្រើសរើស និងបន្តកិច្ចសន្ទនា និងការខិតខំប្រឹងប្រែងការទូត ដើម្បីធានាការអនុវត្តពេញលេញ និងប្រកបដោយប្រសិទ្ធភាពនៃកិច្ចព្រមព្រៀងសន្តិភាពទីក្រុងគូឡាឡាំពួ និងការស្ដារឡើងវិញនូវសន្តិភាព សន្តិសុខ និងស្ថិរភាពនៅតាមតំបន់ព្រំដែន។

ការចេញមកប្រកាសរបស់នាយករដ្ឋមន្ត្រីម៉ាឡេស៊ី បន្ទាប់ពីថៃបានប្រកាសផ្អាកការអនុវត្តកិច្ចព្រមព្រៀងសន្តិភាព និងឈានដល់បើកការបាញ់ប្រហារមកលើពលរដ្ឋខ្មែរបណ្ដាលឲ្យស្លាប់បាត់បង់ជីវិតកាលពីរសៀលថ្ងៃទី ១២ ខែវិច្ឆិកា។ភាពតានតឹងបានកើនឡើងជាថ្មីបន្ទាប់ពីយោធាថៃបានធ្វើសកម្មភាពមកលើពលរដ្ឋស៊ីវិល។

ទោះបីជាយ៉ាងណារាជរដ្ឋាភិបាលទីក្រុងភ្នំពេញមិនបានជ្រើសរើសវិធីសាស្រ្តប្រើអាវុធ ឬកងកម្លាំងនិងអំពើហិង្សាឆ្លើយតបទៅកាន់ភាគីថៃវិញឡើយ ព្រោះរាជរដ្ឋាភិបាលទីក្រុងភ្នំពេញ យល់ថាការដោះស្រាយបញ្ហាដោយអំពើហឹង្សា ឬប្រើប្រាស់កម្លាំងប្រដាប់អាវុធ គឺមិនផ្តល់ផលប្រយោជន៍ណាមួយ ឬមិនបង្កលក្ខណ:វិជ្ជមានសម្រាប់ការដោះស្រាយបញ្ហា ព្រមទាំងបង្កហានិភ័យគ្រោះថ្នាក់អាយុជីវិត និងទ្រព្យសម្បត្តិរបស់ប្រជាពលរដ្ឋស៊ីវិលស្លូតត្រង់ថែមទៀត។ ចំណែកភាគីថៃបង្កហេតុជាបន្តបន្ទាប់។

ប្រមុខរាជរដ្ឋាភិបាល សម្ដេច ហ៊ុន ម៉ាណែត បានប្រើប្រាស់វិធីសាស្រ្តការទូតធ្វើការថ្កោលទោសនិងតវ៉ាទៅកាន់ភាគីថៃហើយទូរសព្ទទៅកាន់នាយករដ្ឋមន្ត្រីម៉ាឡេស៊ី និងប្រធានាធិបតីសហរដ្ឋអាមេរិក ដើម្បីបញ្ជាក់ពីការវិវត្តថ្មីៗនៅតាមព្រំដែននិងជំហររបស់កម្ពុជាក្នុងការដោះស្រាយបញ្ហាដោយសន្តិវិធី។

នៅថ្ងៃទី១៥ ខែវិច្ឆិកា នេះ ក្រោយពីបានជួបសន្ទនាតាមរយៈខ្សែទូរសព្ទជាមួយនាយករដ្ឋមន្ត្រីថៃ និងកម្ពុជា និងប្រធានាធិបតីសហរដ្ឋអាមេរិកដូណាល់ត្រាំ, លោកអាន់វ៉ាក៏បានសរសើរចំពោះតួនាទីសកម្ម និងការចូលរួមក្នុងន័យស្ថាបនារបស់ប្រធានាធិបតីសហរដ្ឋអាមេរិក Donald J. Trump ក្នុងការលើកកម្ពស់ដំណោះស្រាយដោយសន្តិវិធីចំពោះស្ថានភាពដែលកំពុងបន្ត។

នាយករដ្ឋមន្ត្រីម៉ាឡេស៊ីក៏បានស្វាគមន៍ចំពោះការប្តេជ្ញាចិត្តរបស់កម្ពុជា និងថៃ ក្នុងការធានាការដកអាវុធធុនធ្ងន់ និងឧបករណ៍បំផ្លិចបំផ្លាញ ព្រមទាំងសម្របសម្រួល និងអនុវត្តការដោះមីនមនុស្សធម៌នៅតាមតំបន់ព្រំដែនឱ្យបានទាន់ពេលវេលា និងឆាប់រហ័ស។

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ក៏បានស្វាគមន៍ចំពោះការធានារបស់លោកនាយករដ្ឋមន្ត្រី ហ៊ុន ម៉ាណែត និងលោកនាយករដ្ឋមន្ត្រី Anutin Charnvirakul ដើម្បីជៀសវាងនូវសកម្មភាពបន្ថែមទៀតដែលចាត់ទុកថាជាការញុះញង់ ហើយចាត់វិធានការបន្ថែមទៀតដើម្បីលើកកម្ពស់ទំនុកចិត្ត និងការជឿទុកចិត្តគ្នាទៅវិញទៅមកឆ្ពោះទៅរកការជំរុញការស្តារទំនាក់ទំនងទ្វេភាគីប្រកបដោយផលិតភាពរវាងប្រទេសទាំងពីរ។

កម្ពុជា-ថៃបានចាប់ផ្ដើមអនុវត្តកាត់ដកអាវុធធុនធ្ងន់ដែលមានសមត្ថភាពបំផ្លាញខ្លាំងចេញពីព្រំដែនជម្លោះចំនួន ២ លើកមកហើយ។ ប៉ុន្តែក្រោយថៃប្រកាសផ្អាកអនុវត្តន៍កិច្ចព្រមព្រៀងសន្តិភាពក៏មានសេចក្ដីរាយការណ៍ពីបណ្ដាញផ្សព្វផ្សាយព័ត៌មានបរទេសមួយចំនួនថាថៃបានចល័តអាវុធមកកាន់ព្រំដែនជម្លោះជាមួយកម្ពុជាឡើងវិញ៕

The post កម្ពុជា-ថៃ ធានាអនុវត្តកិច្ចព្រមព្រៀងសន្តិភាពឱ្យមានប្រសិទ្ធភាព ជៀសវាងសកម្មភាពញុះញង់ នៅចំពោះមុខម៉ាឡេស៊ី appeared first on Kampuchea Thmey Daily.

ប្រធានាធិបតី ត្រាំ រាំកម្សាន្តយ៉ាងរីករាយជាមួយតូរ្យតន្ត្រីស្វាគមន៍ ពេលមកដល់ម៉ាឡេស៊ី

Rann Reuy — Sun, 26 Oct 2025 03:12:13 +0000

ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ត្រូវបានគេរាយការណ៍ថា បានរាំលេងកម្សាន្តយ៉ាងសប្បាយជាមួយក្រុមតន្ត្រីកិត្តិយសដែលត្រៀមទទួលស្វាគមន៍ដំណើរប្រធានាធិបតីនៅអាកាសយានដ្ឋានអន្តរជាតិនៅទីក្រុងកូឡាឡាំពូ។

តាមសេចក្តីរាយការណ៍របស់ Reuters ប្រធានាធិបតីសហរដ្ឋអាមេរិក លោក ដូណាល់ ត្រាំ បានចូលរួមរាំលេងបង្ហាញភាពរីករាយជាមួយអ្នកសំដែងក្នុងការរាំក្នុងពេលទទួលស្វាគមន៍ បន្ទាប់ពីបានមកដល់អាកាសយានដ្ឋានអន្តរជាតិ កូឡាឡាំពូ (Kuala Lumpur) ដើម្បីចូលរួមកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន) លើកទី ៤៧ នៅក្នុងទីក្រុងកូឡាឡាំពូ ប្រទេសម៉ាឡេស៊ី នៅថ្ងៃទី២៦ខែតុលា ឆ្នាំ២០២៥។

ប្រធានាធិបតីសហរដ្ឋអាមេរិក លោក ដូណាល់ ត្រាំ ត្រូវបានគេមើលឃើញថា ជាតួអង្គសំខាន់បំផុតក្នុងកិច្ចប្រជុំកំពូលអាស៊ានលើកទី៤៧នៅប្រទេសម៉ាឡេស៊ីក្នុងឆ្នាំនេះ បន្ទាប់ពីលោកបានសម្រុះសម្រួលបញ្ចប់សង្គ្រាមបង្ហូរឈាមរវាងកម្ពុជានិងប្រទេសថៃកាលពីថ្ងៃទី២៨ខែកក្កដា និងជាបន្តបន្ទាប់រដ្ឋបាលរបស់លោក បានផ្តួចផ្តើមឲ្យមានការចរចាឈានទៅបញ្ចប់សង្គ្រាមទាំងស្រុងដោយបង្កើតនូវកិច្ចព្រមប្រៀងសន្តិភាពដែលនឹងត្រូវចុះហត្ថលេខានៅព្រឹកថ្ងៃទី២៦ខែតុលានេះ៕

រ៉ាន់ រើយ

Greeters wave Malaysian and U.S. flags as U.S. President Donald Trump arrives at Kuala Lumpur International Airport in Sepang, Malaysia, October 26, 2025. REUTERS/Evelyn Hockstein

The post ប្រធានាធិបតី ត្រាំ រាំកម្សាន្តយ៉ាងរីករាយជាមួយតូរ្យតន្ត្រីស្វាគមន៍ ពេលមកដល់ម៉ាឡេស៊ី appeared first on Kampuchea Thmey Daily.

Politico៖ កម្ពុជានិងថៃរៀបចំចុះហត្ថលេខាសន្តិភាព ក្រោមអធិបតីភាព ដូណាល់ ត្រាំនៅចុងខែនេះនៅម៉ាឡេស៊ី

Rann Reuy — Tue, 07 Oct 2025 10:36:29 +0000

បើគ្មានអ្វីប្រែប្រួលទេ នៅចុងខែតុលាខាងមុខនេះ ស្របជាមួយកិច្ចប្រជុំកំពូលអាស៊ានដែលនឹងប្រព្រឹត្តទៅប្រទេសម៉ាឡេស៊ី ដែលជាប្រធានប្តូរវេនអាស៊ាន កម្ពុជានិងប្រទេសថៃនឹងចុះហត្ថលេខាលើកិច្ចព្រមព្រៀងសន្តិភាពអចិន្ត្រៃយ៍ ក្រោយអធិបតីភាពរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលជាតួអង្គដ៏សំខាន់ក្នុងការសម្របសម្រួលឲ្យមានបទឈប់បាញ់កាលថ្ងៃទី២៨ខែកក្កដា។

យោងតាមការចេញផ្សាយរបស់ politico ដែលមានស្នាក់ការកណ្តាលនៅសហរដ្ឋអាមេរិក ដោយស្រង់សម្តីប្រភពយ៉ាងហោចណាស់បីនាក់ដែលបានដឹងពីគម្រោងរបស់ប្រធានាធិបតី ដូណាល់ ត្រាំ ដែលគ្រោងធ្វើដំណើរមកចូលរួមកិច្ចប្រជុំកំពូលអាស៊ីបូព៌ា ដែលត្រូវរៀបចំឡើងអំឡុងពេលកិច្ចប្រជុំកំពូលអាស៊ាននៅថ្ងៃទី២៦ដល់ថ្ងៃទី២៨ខែតុលាខាងមុខនេះ។

សេចក្តីរាយការណ៍នោះ បានឲ្យដឹងថា រដ្ឋាភិបាលម៉ាឡេស៊ីដឹកនាំដោយនាយករដ្ឋមន្ត្រី អាន់វ៉ា អ៊ីប្រាហ៊ីម ដែលជាអ្នកតស៊ូយ៉ាងស្វិតស្វាញក្នុងការសម្របសម្រួលបញ្ចប់ជម្លោះប្រដាប់អាវុធរវាងថៃនិងកម្ពុជា បានយល់ព្រមអនុញ្ញាតឲ្យប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើជាប្រធានក្នុងពិធីចុះហត្ថលេខាសន្តិភាពរវាងកម្ពុជានិងថៃ។

តាមសេចក្តីរាយការណ៍ដដែល មន្ត្រីសេតវិមានកំពុងតែរៀបចំលក្ខខណ្ឌឲ្យប្រធានាធិបតី ដូណាល់ ត្រាំ ចូលរួមក្នុងកិច្ចប្រជុំកំពូលនេះ ហើយនិងធ្វើជាប្រធាននៃពិធីចុះហត្ថលេខានោះ។

ប្រធានាធិបតី ដូណាល់ ត្រាំ បានថ្លែងនៅមហាសន្និបាតអង្គការសហប្រជាជាតិកាលពីចុងខែកញ្ញាថា លោកជាអ្នកបញ្ចប់សង្គ្រាមចំនួន៧ ក្នុងរយៈពេល៧ខែនៃការឡើងកាន់អំណាច។ ក្នុងចំណោមសង្ក្រាមទាំងនោះ ក៏មានសង្គ្រាមផ្ទុះអាវុធរវាងថៃនិងកម្ពុជាកាលពីចុងខែកក្កដាដែលបណ្តាលឲ្យយោធាស្លាប់ទាំងសងខាង និង មានជនភៀសសឹករាប់សែននាក់៕

រ៉ាន់ រើយ

The post Politico៖ កម្ពុជានិងថៃរៀបចំចុះហត្ថលេខាសន្តិភាព ក្រោមអធិបតីភាព ដូណាល់ ត្រាំនៅចុងខែនេះនៅម៉ាឡេស៊ី appeared first on Kampuchea Thmey Daily.

លោក អាន់វ៉ា ទន្ទឹងជួប អានុទីន ដើម្បីដោះស្រាយបញ្ហានានា រួមទាំងជម្លោះកម្ពុជា-ថៃ

Rann Reuy — Mon, 08 Sep 2025 06:05:17 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ក្នុងនាមប្រធានប្តូរវេនអាស៊ាន បានទទ្ទឹងជួបធ្វើការជាមួយ លោក អានុទីន ឆានវីរៈគុល (Anutin Charnvirakul) ដែលទើបសភាថៃបោះឆ្នោតផ្តល់សេចក្តីទុកចិត្តឲ្យឡើងជានាយករដ្ឋមន្ត្រីថៃ ដើម្បីដោះស្រាយបញ្ហាទ្វេភាគីរវាងថៃនិងម៉ាឡេស៊ីផង និងបញ្ហាព្រំដែនកម្ពុជានិងថៃផង និងកិច្ចសហប្រតិបត្តិការនៅក្នុងអាស៊ាន។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម។ FB

ស្ថិតក្នុងចំណោមប្រទេសតិចតួចដែលចេញសារអបអរសាទរ លោក អានុទីន នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលត្រូវបានគេទទួលស្គាល់ថា បានប្រឹងប្រែងក្នុងពន្លឿនការបញ្ចប់ជម្លោះរវាងថៃនិងកម្ពុជានៅតាមតំបន់ព្រំដែន ដោយមិនបង្អង់យូរបានហៅទូរស័ព្ទទៅកាន់ នាយករដ្ឋមន្ត្រីជាប់ឆ្នោតថៃ លោក អានុទីន ដើម្បីសំដែងការអបអរសាទរ បន្ទាប់ពីដឹងថា មហាក្សត្រថៃបានចេញព្រះរាជក្រឹត្យតែងតាំងជាផ្លូវការ។

ក្រោយការសន្ទនារបស់ប្រមុខរដ្ឋក្បែរខាងទាំងពីរ លោក អាន់វ៉ា បានសរសេរនៅលើសារបណ្តាញសង្គមរបស់លោក បង្ហោះនៅថ្ងៃអាទិត្យថា៖ «នៅរសៀលថ្ងៃនេះ ខ្ញុំបានទាក់ទងទៅលោក អានុទីន ឆានវីរៈគុល ដើម្បីអបអរសាទរចំពោះការតែងតាំងលោកជានាយករដ្ឋមន្ត្រីថ្មីរបស់ប្រទេសថៃ»។

នៅក្នុងសារនោះ លោក អាន់វ៉ា បានចាត់ទុកលោក អានុទីន ជាមិត្តចាស់ ដែលតែងតែរួមសុខរួមទុក្ខជាមួយលោកក្នុងពេលកន្លងមកទាំងក្នុងគ្រាអាក្រក់ និងក្នុងគ្រាល្អៗ។ ជាមួយគ្នានោះ លោក អាន់វ៉ា បានបញ្ជាក់អំពីការអញ្ជើញលោក អនុទីនទៅទស្សនកិច្ចនៅប្រទេសម៉ាឡេស៊ីក្នុងពេលឆាប់ៗខាងមុខ។

លោក អាន់វ៉ា បានសរសេរថា៖«ខ្ញុំក៏សូមអញ្ជើញគាត់ [អានុទីន] ទៅបំពេញទស្សនកិច្ចការងារនៅប្រទេសម៉ាឡេស៊ីនាពេលខាងមុខ ដើម្បីពិភាក្សាអំពីបញ្ហាសំខាន់ៗ រួមទាំងការពង្រឹងទំនាក់ទំនងទ្វេភាគី ក្រៅពីបញ្ហានៅព្រំដែនថៃ-កម្ពុជា និងកិច្ចសហប្រតិបត្តិការអាស៊ាន»។

ជាការឆ្លើយតប នាយករដ្ឋមន្ត្រីថៃ អានុទីន បានជូនដំណឹងថា ពិធីស្បថចូលកាន់តំណែងនឹងប្រព្រឹត្តទៅក្នុងរយៈពេលមួយសប្តាហ៍ ហើយលោកទន្ទឹងរង់ចាំជួបលោក អាន់វ៉ា ក្នុងពេលឆាប់ៗនេះ។

រហូតដល់ពេលនេះ មានត្រឹមតែប្រទេសចិន កម្ពុជា និងម៉ាឡេស៊ី ដែលបានបង្ហាញសារអបអរសាទរដល់រដ្ឋាភិបាលរបស់លោក អានុទីន ដែលមានសិទ្ធិកាន់អំណាចត្រឹមតែរយៈពេល៤ខែប៉ុណ្ណោះ ដោយសារតែការសន្យាជាមួយគណបក្សប្រជាជនដែលទាមទារឲ្យរំលាយសភា ដើម្បីរៀបចំការបោះឆ្នោតឡើងវិញ ជាថ្នូរទទួលបានការបោះឆ្នោតគាំទ្រនៅក្នុងសភាកាលពីថ្ងៃទី៥ខែកញ្ញាកន្លងទៅ៕

រ៉ាន់ រើយ

The post លោក អាន់វ៉ា ទន្ទឹងជួប អានុទីន ដើម្បីដោះស្រាយបញ្ហានានា រួមទាំងជម្លោះកម្ពុជា-ថៃ appeared first on Kampuchea Thmey Daily.

លោក​ អាន់វ៉ា អ៊ីប្រាហ៊ីម Archives - Kampuchea Thmey Daily

​ប្រទេស​មាន​ឥទ្ធិពល​​​​សំខាន់ៗ បង្ហា​ញជំហរ​​​​ក្រោយ​កិច្ចព្រមព្រៀង​​បទ​ឈប់​បាញ់​​​កម្ពុជា​​-ថៃ​

​រដ្ឋាភិបាល​ម៉ាឡេស៊ី​ត្រៀម​កម្រិត​ខ្ពស់​ ទប់​ទល់​ព្យុះ Senyar ដែល​បង្ក​ទឹកជំនន់​​​បន្ថែម​​​

​​អានុទីន​ធ្វើ​ឲ្យ​លោកអាន់វ៉ា​ភ្ញាក់ផ្អើល ជុំវិញ​ការ​អះអាង​របស់​​ក្រុម​អ្នក​ប្រឆាំងថៃ​

កម្ពុជា-ថៃ ធានាអនុវត្តកិច្ចព្រមព្រៀងសន្តិភាពឱ្យមានប្រសិទ្ធភាព ជៀសវាងសកម្មភាពញុះញង់ នៅចំពោះមុខម៉ាឡេស៊ី

​ប្រធានាធិបតី ត្រាំ​ រាំកម្សាន្ត​យ៉ាងរីករាយ​ជាមួយ​តូរ្យតន្ត្រី​ស្វាគមន៍​ ពេលមកដល់​ម៉ាឡេស៊ី​​

លោក​ អាន់វ៉ា ទន្ទឹង​​ជួប​ អា​នុទីន​ ដើម្បី​ដោះស្រាយ​បញ្ហា​​​​​នានា​​ រួម​ទាំងជម្លោះ​កម្ពុជា-ថៃ​​

លោក អាន់វ៉ា អ៊ីប្រាហ៊ីម Archives - Kampuchea Thmey Daily

ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ

រដ្ឋាភិបាលម៉ាឡេស៊ីត្រៀមកម្រិតខ្ពស់ ទប់ទល់ព្យុះ Senyar ដែលបង្កទឹកជំនន់បន្ថែម

អានុទីនធ្វើឲ្យលោកអាន់វ៉ាភ្ញាក់ផ្អើល ជុំវិញការអះអាងរបស់ក្រុមអ្នកប្រឆាំងថៃ

ប្រធានាធិបតី ត្រាំ រាំកម្សាន្តយ៉ាងរីករាយជាមួយតូរ្យតន្ត្រីស្វាគមន៍ ពេលមកដល់ម៉ាឡេស៊ី

លោក អាន់វ៉ា ទន្ទឹងជួប អានុទីន ដើម្បីដោះស្រាយបញ្ហានានា រួមទាំងជម្លោះកម្ពុជា-ថៃ