កំណាត់ផ្លូវជាតិលេខ ២៣ មានចំណុច​ចាប់ផ្តើមចេញ​ពីគីឡូម៉ែត្រលេខ ៣៤+៤០០ (ពី​គល់​ស្ពានកោះធំ) ស្ថិតក្នុងឃុំ ជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក (តភ្ជាប់ជាមួយផ្លូវជាតិ​លេខ​១៤) ត្រង់គីឡូម៉ែត្រលេខ ៥៤+២៣៣ នៃភូមិសាស្រ្តខេត្តកណ្តាល។

ផ្លូវ​ដែ​ល​សម្ពោធ​ដាក់​ឲ្យ​ប្រើប្រាស់​នេះ​មានទទឹងតួផ្លូវប្រវែង ១១ ម៉ែត្រ ជាប្រភេទផ្លូវក្រាលកៅស៊ូ AC កម្រាស់ ៨ សង់​ទី​ម៉ែត្រ មានគន្លងផ្លូវសម្រាប់រថយន្តនិងទោចក្រយានធ្វើចរាចរណ៍ (២ គន្លង ទៅ-មក)។

ការ​ស្ថាបនា​ផ្លូវ​នេះ​រួមបញ្ចូលការស្ថាបនាស្ពានចំនួន ៣ កន្លែង ប្រវែងសរុប ១១៦,៤០ ម៉ែត្រ ការដាក់លូគ្រប់ប្រភេទកាត់ទទឹងផ្លូវចំនួន ៤៨ កន្លែង និងលូតាមប្រឡាយផ្លូវចំនួន ៨ កន្លែងប្រវែងសរុប ២ ៣៤២ ម៉ែត្រ បំពាក់អំពូលសូឡា LED ចំនួន ៨០ កន្លែង ព្រមទាំងការបំពាក់ផ្លាកសញ្ញា គូសគំនូសសញ្ញា ដាំបង្គោលគីឡូម៉ែត្រ និងបង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់។ លើសពីនេះ គម្រោងក៏មានការស្ថាបនារង្វង់មូល ១ កន្លែង នៅត្រង់ចំណុចផ្លូវប្រសព្វទិស ចុះពីស្ពានកោះធំ ដើម្បីសម្រួលនិងបញ្ចៀសទិសដៅចរាចរណ៍ទៅមកប្រកបដោយសុវត្ថិភាព។

គួរបញ្ជាក់ថា កំណាត់ផ្លូវជាតិលេខ ២៣ បានបើកការដ្ឋានសាងសង់កាលពីថ្ងៃទី២០ ខែមិថុនា ឆ្នាំ២០២៣ ក្រោមអធិបតីភាព​លោក​ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕

The post ផ្លូវកាត់​ថ្មី​ប្រវែង ១៩,៨៣ គីឡូម៉ែត្រ ពីគល់ស្ពានកោះធំបន្ត​ដល់ស្ពានអ្នក​លឿងសម្ពោធ​ដាក់​ឲ្យដំណើរការ​ជា​ផ្លូវការ appeared first on Kampuchea Thmey Daily.

ក្នុងកិច្ចប្រជុំ ជាបឋម អង្គភាពប្រតិបត្តិបានបង្ហាញជូនអង្គប្រជុំក្រុមប្រឹក្សាបរធនបាលថា ក្នុងឆ្នាំ២០២៥ កន្លងទៅថ្មីៗនេះ, មូលនិធិគន្ធបុប្ផាកម្ពុជាមានចំណូលសរុបចំនួនជាង ២៩ លានដុល្លារអាម៉េរិក ឬកើនឡើង ៦%  បើធៀបនឹងឆ្នាំ២០២៤ ដែលចំណូលនេះទទួលបានពីប្រភពសំខាន់ៗ ដូចជាវិភាគទានប្រចាំឆ្នាំរបស់រាជរដ្ឋាភិបាល, វិភាគទានប្រចាំឆ្នាំរបស់កាកបាទក្រហមកម្ពុជា, ការកាត់កម្រៃសំបុត្រចូលទស្សនារមណីយដ្ឋានអង្គរ, ការបរិច្ចាគរបស់សប្បុរសជនជាង ៤០ម៉ឺននាក់ និងចំណូលផ្សេងៗទៀត ជាពិសេសចំណូលដែលទទួលបានពីការបរិច្ចាគដើម្បីគាំទ្រយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ របស់មូលនិធិគន្ធបុប្ផាកម្ពុជា ដែលដឹកនាំដោយ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា កាលពីអំឡុងខែមិថុនា ឆ្នាំ២០២៥។

ស្របពេលជាមួយគ្នានេះ, មូលនិធិគន្ធបុប្ផាកម្ពុជាក៏បានផ្ទេរថវិកាជាបន្តបន្ទាប់ចំនួនជាង ១២លានដុល្លារអាម៉េរិក ជូនមន្ទីរពេទ្យគន្ធបុប្ផា បន្ថែមលើថវិកាចំនួន ១០លានដុល្លារអាម៉េរិក ដែលរាជរដ្ឋាភិបាលផ្ដល់ជូនតាមរយៈក្រសួងសុខាភិបាល និងមូលនិធិគន្ធបុប្ផាស្វីស ដើម្បីគាំទ្រប្រតិបត្តិការប្រចាំឆ្នាំរបស់មន្ទីរពេទ្យគន្ធបុប្ផាកម្ពុជា។

 អង្គប្រជុំបានពិនិត្យ ពិភាក្សា និងសម្រេចលើទិសដៅការងារ និងផែនការសកម្មភាពឆ្នាំ២០២៦ របស់មូលនិធិគន្ធបុប្ផាកម្ពុជា ដែលផ្តោតលើចង្កោមសកម្មភាពសំខាន់ៗចំនួន ៤ រួមមានការកៀរគរថវិកា និងសហការជាមួយក្រសួង-ស្ថាប័នផ្សេងៗ, ការផ្សព្វផ្សាយ និងទំនាក់ទំនងសាធារណៈ, ការអភិវឌ្ឍ និងធ្វើទំនើបកម្មឌីជីថល (គេហទំព័រ និង App), និងកម្មវិធីរម្លឹកឱ្យមានការបន្តចូលរួមបរិច្ចាគ និងព្រឹត្តិការណ៍សំខាន់ៗមួយចំនួនទៀត។ ក្រុមប្រឹក្សាបរធនបាល ក៏បានគាំទ្របេសកកម្មរបស់ក្រុមការងារ ក្នុងការជួបសំណេះសំណាល និងពិភាក្សាការងារជាមួយតំណាងសហគមន៍ខ្មែរនៅបរទេសបន្តទៀត ក្នុងគោលបំណងបញ្ជ្រាបការយល់ដឹងអំពីមូលនិធិគន្ធបុប្ផាកម្ពុជា និងបំផុសចលនាកៀរគរថវិកាបរិច្ចាគ ព្រមទាំងជំរុញឱ្យបន្តកិច្ចសហការជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំក្រសួង-ស្ថាប័ន និងរដ្ឋបាលរាជធានី-ខេត្ត ឱ្យបានកាន់តែសកម្ម និងទៀងទាត់ផងដែរ។

តាមសេចក្ដីប្រកាសព័ត៌មាន អង្គប្រជុំក៏បានពិនិត្យលើរបាយការណ៍លទ្ធផល ឆ្នាំ២០២៥ របស់មន្ទីរពេទ្យគន្ធបុប្ផា ដោយក្នុងនោះមន្ទីរពេទ្យបានផ្តល់សេវាពិនិត្យ និងព្យាបាលជំងឺជូនទារក កុមារ និងស្ត្រីមានផ្ទៃពោះសរុបចំនួនជាង ១, ៤ លានករណី ដែលក្នុងនេះរួមមាន ៖ ការពិនិត្យ និងព្យាបាលនៅផ្នែកពិគ្រោះជំងឺក្រៅ ចំនួន ១ ០៧១ ៦៣៧ ករណី។ ទារក និងកុមារមានជំងឺធ្ងន់ធ្ងរដាក់ឱ្យសម្រាកព្យាបាលនៅក្នុងមន្ទីរពេទ្យ ចំនួន ២៣៣ ២៤៣ នាក់។ កុមារឆ្លងជំងឺគ្រុនឈាម ចំនួន ២២ ៩៨២ នាក់។ កុមារដែលត្រូវព្យាបាល និងវះកាត់ទូទៅ ចំនួន ៣៤ ៨៨៩ នាក់។ កុមារមានជំងឺបេះដូងពីកំណើតដែលត្រូវវះកាត់ ចំនួន ១ ១៦៣ នាក់។ ស្រ្តីមានផ្ទៃពោះបានមកទទួលសេវាពិនិត្យ និងតាមដានផ្ទៃពោះនៅផ្នែកជំងឺក្រៅនៅមន្ទីរពេទ្យគន្ធបុប្ផា សៀមរាប ចំនួន ១០៨ ១៣៤ ករណី និងសម្រាលកូន ចំនួន ២៥ ៧៣៦ នាក់។

មន្ទីរពេទ្យគន្ធបុប្ផាបានចំណាយថវិកាសរុបចំនួនជាង ៤៦ លានដុល្លារអាម៉េរិក ដើម្បីបន្តបេសកកម្មរបស់ខ្លួន ក្នុងផ្តល់សេវាពិនិត្យ និងព្យាលជំងឺទារក និងកុមារ ព្រមទាំងសេវាសម្ភពជូនស្ត្រីមានផ្ទៃពោះ ដោយឥតគិតថ្លៃ និងប្រកបដោយគុណភាព៕

The post លោក អូន ព័ន្ធមុនីរ័ត្ន ឱ្យក្រុមការងារមន្ទីរពេទ្យគន្ធបុប្ផាខំបំពេញការងារ ដើម្បីសង្គ្រោះជីវិត នាំភាពញញឹម និងក្ដីសង្ឃឹមដល់ទារក និងស្រ្តី appeared first on Kampuchea Thmey Daily.

ថ្លែង​នៅក្នុង​ពិធី​ប្រកាស​ដាក់​ឲ្យ​អនុវត្ត «កម្មវិធីលើកកម្ពស់ភាពប្រកួតប្រជែង បង្កើន​ពិពិធកម្ម និង ពង្រឹងភាពធន់ ដើម្បី​ជំរុញ​កំណើន​សេដ្ឋកិច្ច​ក្នុង​បរិការណ៍​សកលដែល​មាន​ភាពមិនប្រាកដប្រជា» ​នៅ​ព្រឹកមិញនេះ លោក អូន ព័ន្ធមុនីរ័ត្ន​រដ្ឋមន្រ្តី​ក្រសួង​សេដ្ឋកិច្ច​ និង​ហិរញ្ញវត្ថុ​បាន​ឲ្យ​ដឹង​ថា សេដ្ឋកិច្ចកម្ពុជាបានស្ទុះ​ងើប​ឡើង​វិញ​យ៉ាងរហ័ស និងបន្តឈរលើមាគ៌ា​នៃកំណើនដ៏រឹងមាំបន្ទាប់ពីវិបត្តិនៃជំងឺ កូវីដ-១៩ ជា​សកល។

ទោះបីជាត្រូវបន្តពុះពារជម្នះនូវបញ្ហាប្រឈម និងភាពមិនប្រាកដប្រជាខ្ពស់នៃស្ថានភាព​តំបន់និងសកល ការបែក​ខ្ញែក​នៃសេដ្ឋកិច្ចសកល ដែលប៉ះពាល់ដល់កិច្ចស​ហប្រតិបត្តិការ និងពាណិជ្ជកម្មអន្តរជាតិ​ ក៏សេដ្ឋកិច្ចកម្ពុជាត្រូវបានរំពឹងថា អាចនឹងសម្រេចបានកំណើនសម្រាប់ឆ្នាំ ២០២៦ នេះ។

«ឆ្នាំ ២០២៥ សេដ្ឋកិច្ច​កម្ពុជា​សម្រេច​បាន​ក្នុង​រង្វង់ប្រមាណ ៥,២% និងរំពឹង​សម្រេច​បាន​​ប្រមាណ ៥% ក្នុង​ឆ្នាំ ២០២៦ នេះ»។ លោក អូន ព័ន្ធមុនីរ័ត្ន​ បញ្ជាក់។

លោករដ្ឋមន្រ្តី​បន្ត​ថា ចាប់តាំងពីដើមនីតិកាល ទី ៧ នៃ​រដ្ឋសភា រាជរដ្ឋាភិបាលបានដាក់ចេញនិងកំពុងជំរុញអនុវត្ត​នូវ​យុទ្ធសាស្ត្រ​បញ្ចកោណ​ដំណាក់​កាល​ទី ១ សំដៅ​កែលម្អបរិយាកាសសម្រាប់ធុរកិច្ច និងការវិនិយោគ ដែល​បាន​ជំរុញឲ្យ​ការវិនិយោគ​ផ្ទាល់ពីក្រៅប្រទេសបន្តកើនខ្ពស់គួរជាទីមោទនៈ។

ផ្អែកតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា ការចុះបញ្ជីគម្រោង​វិនិយោគ​ពី​បរទេសក្នុងឆ្នាំ ២០២៥ កន្លងទៅមានទំហំទុនសរុបប្រមាណ ១០ ប៊ីលានដុល្លារអាម៉េរិក មាន​កំណើន ៤៥% បើធៀបនឹងឆ្នាំ ២០២៤។

ជាមួយគ្នា​នេះ ក្នុងវិស័យពាណិជ្ជកម្មក្រៅប្រទេស ការនាំចេញរបស់កម្ពុជាក្នុងឆ្នាំ ២០២៥ ក៏​បន្តរក្សា​បាននូវ​ចលនការ​កំណើនល្អគួរឲ្យកត់សម្គាល់។ ជាក់ស្តែង ការនាំចេញសរុប ក្នុងឆ្នាំ ២០២៥ បានកើន​ប្រមាណជាង ១៧%, បើធៀបនឹងឆ្នាំ ២០២៤។ ចំពោះរំហូរភ្ញៀវទេសចរណ៍ ការ​ធ្វើដំណើរ និងកញ្ចប់ទេសចរណ៍ទីផ្សារឆ្ងាយរបស់ទេសចរបរទេស មកកាន់​កម្ពុជា ក៏នៅដំណើរ​ការជា​ធម្មតា និងមាននិន្នាការកើនផងដែរតួយ៉ាងដូចជា ទេសចរពីអឺរ៉ុប, អូស្ត្រាលី និង ឥណ្ឌា។

រដ្ឋាភិបាល​បាន​ប្រកាស​ដាក់​​ឲ្យ​អនុវត្ត​ «កម្មវិធីលើកកម្ពស់ភាពប្រកួតប្រជែង បង្កើន​ពិពិធកម្ម និងពង្រឹង​ភាព​ធន់ ដើម្បីជំរុញ​កំណើនសេដ្ឋកិច្ច ក្នុងបរិការណ៍​សកល​ដែល​មាន​ភាពមិនប្រាកដប្រជា» តាមរយៈ​ការ​ដាក់​ចេញ​វិធានការ​ជា​កញ្ចប់​ដែល​មាន​​លក្ខណៈ​ច្បាស់លាស់ និង​ជាក់ស្តែង ដែល​​​​ផ្អែកលើ​សសរ​ស្តម​ធំៗចំនួន ៣​ រួមមាន៖​

ទី១. ការ​​គាំទ្រសេដ្ឋកិច្ចតាមវិស័យក្នុងរយៈពេលខ្លីទៅមធ្យម នៅ​ក្នុងវិស័យ​ដែលត្រូវ​បានរំពឹង​ទុក​ថានឹង​មាន​កំណើន​យឺត​។ រាជរដ្ឋាភិបាលបានសម្រេចផ្តល់ការ​លើកលែង អនុគ្រោះនិងពន្យារ​ពេល​អនុវត្តពន្ធក្នុង​វិស័យ​គន្លឹះ​មួយចំនួនដូចជា វិស័យកសិកម្ម, ទេសចរណ៍, សំណង់ និង អចលទ្រព្យ, អប់រំ, អាកាសចរណ៍, សិល្បៈ និងភាពយន្ត​ជាដើម។

ទី២. ដោះស្រាយ​បញ្ហា​ប្រឈម​ចម្បងៗរបស់​វិស័យឯកជនដូចជា៖ ការលើកកម្ពស់​បរិយាកាស​សម្រាប់​ធុរកិច្ច និងការ​វិនិយោគ; ការជំរុញការផលិត និង ការប្រើប្រាស់ផលិតផលក្នុងស្រុក ​ការ​លើក​កម្ពស់កិច្ចគាំពារសង្គម និង ការធានាចីរភាពបរិស្ថាន; ព្រមទាំង​ការបង្កើតតំបន់​សេដ្ឋកិច្ច​ពិសេស និងតំបន់ឧស្សាហកម្មសមាហរណ និង ការអភិវឌ្ឍប៉ូលសេដ្ឋកិច្ច​សំខាន់ៗតាម​បណ្តា​ខេត្ត​នៅ​ភូមិភាគឦសាន, ព្រមទាំង​ខេត្តបាត់ដំបង, ពោធិ៍សាត់, បន្ទាយមានជ័យ, ប៉ៃលិន និងសៀមរាប។

ទី៣. កម្មវិធីសម្របខ្លួនទៅនឹងការប្រែប្រួលរបបពាណិជ្ជកម្មអន្តរជាតិ ផ្តោតលើ​ការបន្តជំរុញ​ការ​ប្រើប្រាស់​ប្រព័ន្ធអនុគ្រោះ​នៃកិច្ចព្រមព្រៀងពាណិជ្ជកម្មសេរីដែលមានស្រាប់​ឲ្យអស់លទ្ធភាព, លើក​កម្ពស់​ការទុកចិត្តលើការនាំចេញពីកម្ពុជា, ជំរុញការធ្វើពិពិធកម្មទីផ្សារនាំចេញ, ត្រៀម និងសម្រប​ខ្លួន ក្នុងការទទួលយក និងអនុវត្តបទប្បញ្ញត្តិដែលមានស្តង់ដា និង កាតព្វកិច្ចខ្ពស់ជាងមុន, ពង្រឹង​ស្ថិរភាព និង ភាពធន់ ព្រមទាំងជំរុញភាពស៊ីជម្រៅនៃការអភិវឌ្ឍវិស័យហិរញ្ញវត្ថុ, និងបន្តជំរុញការ​អភិវឌ្ឍ បច្ចេកវិទ្យា និង នវានុវត្តន៍៕

The post សេដ្ឋកិច្ច​កម្ពុជា​រំពឹង​សម្រេច​បាន​កំណើន​រង្វង់​ខ្ទង់ ៥% ក្នុង​ឆ្នាំ ២០២៦ appeared first on Kampuchea Thmey Daily.

ក្រុមប្រឹក្សាជាតិគាំពារសង្គមបានរៀបចំពិធី ប្រកាសដាក់ឱ្យអនុវត្តកម្មវិធីជាតិគាំពារសង្គមដើម្បីជំរុញការចាកចេញពីភាពក្រីក្រ ក្នុងស្រុកទឹកផុស ខេត្តកំពង់ឆ្នាំង និងស្រុករវៀង ខេត្តព្រះវិហារ» ក្រោមអធិបតីភាពដ៏ខ្ពង់ខ្ពស់ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម និងលោកស្រី Kanni Wignaraja ឧបការីអគ្គលេខាធិការអង្គការសហប្រជាជាតិ និងជានាយិកាប្រចាំតំបន់អាស៊ី និងប៉ាស៊ីហ្វិក នៃកម្មវិធីអភិវឌ្ឍន៍សហប្រជាជាតិ (UNDP) និងសមាជិករាជរដ្ឋាភិបាលកម្ពុជា និងដៃគូអភិវឌ្ឍន៍ពាក់ព័ន្ធ។

កម្មវិធីនេះមានគោលដៅជំរុញគ្រួសារគោលដៅសរុបប្រមាណ ២០ ម៉ឺនគ្រួសារ ឱ្យស្ថិតលើគន្លងនៃការចាកចេញពីភាពក្រីក្រ ដោយក្នុងរយៈពេល២៤ ខែ នៃការចូលរួមកម្មវិធី គ្រួសារនីមួយៗនឹងទទួលបានកញ្ចប់អត្ថប្រយោជន៍ដែលមានភាពប្រទាក់ក្រឡា និងបំពេញឱ្យគ្នា ចំនួន ៤ សំខាន់ៗ រួមមាន៖ ទី១). ការបណ្តុះបណ្តាល និងបង្វឹកអំពីការបង្កើតមុខរបរ និងបំណិនជីវិត។ ទី២). ការឧបត្ថម្ភសាច់ប្រាក់សម្រាប់ចូលរួមវគ្គបណ្តុះបណ្តាល និងបង្វឹក។ ទី៣). ការផ្តល់ប្រាក់ដើមទុនសម្រាប់ទិញទ្រព្យសកម្ម, និងទី៤). ការចុះសួរសុខទុក្ខ និងបង្វឹកតាមខ្នងផ្ទះ។

បើតាមសេចក្ដីប្រកាសព័ត៌មានផ្អែកតាមការចង្អុលបង្ហាញក្នុង យុទ្ធសាស្ត្របញ្ចកោណ-ដំណាក់កាលទី ១ និង ក្របខណ្ឌ គោលនយោបាយជាតិគាំពារសង្គម ឆ្នាំ២០២៤-២០៣៥, រាជរដ្ឋាភិបាល បានរៀបចំដាក់ឱ្យអនុវត្ត «កម្មវិធីជាតិគាំពារសង្គមដើម្បីជំរុញការចាកចេញពីភាពក្រីក្រ» ក្នុងគោលបំណងកសាងសមត្ថភាព និងភាពធន់ ព្រមទាំងលើកកម្ពស់ជីវភាពរបស់គ្រួសារគោលដៅ។ កម្មវិធីនេះ នឹងក្លាយជាគន្លងថ្មីមួយ សម្រាប់គ្រួសារគោលដៅ ក្នុងដំណើរឆ្ពោះទៅការចាកចេញពីភាពក្រីក្រ ជាជំហានៗ និងប្រកបដោយចីរភាព ព្រមទាំងរួមចំណែកក្នុងការលើកកម្ពស់ និងការអភិវឌ្ឍសេដ្ឋកិច្ចមូលដ្ឋាន ស្របតាមចក្ខុវិស័យដ៏ពិសិដ្ឋ របស់ សម្តេចធិបតីនាយករដ្ឋមន្ត្រី ពោលគឺ «ការបង្រៀនពលរដ្ឋស្ទូចត្រី បន្ថែមលើការផ្តល់ត្រីដល់ពួកគាត់»។

ក្នុងពិធីប្រកាសដាក់ឱ្យអនុវត្តកម្មវិធីជាតិគាំពារសង្គមដើម្បីជំរុញការចាកចេញពីភាពក្រីក្រថា ឧបការីអគ្គលេខាធិការអង្គការសហប្រជាជាតិ និងជានាយិកាប្រចាំតំបន់អាស៊ី និងប៉ាស៊ីហ្វិក នៃកម្មវិធីអភិវឌ្ឍន៍សហប្រជាជាតិ (UNDP)លោកស្រី Kanni Wignaraja  បង្ហាញមោទនភាព ក្នុងការគាំទ្ររាជរដ្ឋាភិបាល សម្រាប់ការដាក់ឱ្យអនុវត្តគម្រោងសាកល្បងកិច្ចគាំពារសង្គមដើម្បីចាកចេញពីភាពក្រីក្រ រហូតឈានដល់ការប្រកាសដាក់ឱ្យអនុវត្តជាផ្លូវការនូវកម្មវិធីនេះ នៅថ្ងៃនេះ។ UNDP នឹងនៅតែបន្តការគាំទ្រជានិច្ច ក្នុងការពង្រីកវិសាលភាពនៃការអភិវឌ្ឍប្រព័ន្ធគាំពារសង្គម ជាពិសេសក្នុងការជំរុញគ្រួសារគោលដៅឱ្យស្ថិតលើគន្លងនៃការចាកចេញពីភាពក្រីក្រ។ ការអភិវឌ្ឍប្រព័ន្ធគាំពារសង្គម គឺជាការអភិវឌ្ឍលើមូលធនមនុស្ស, លើកកម្ពស់កម្រិតជីវភាពពលរដ្ឋ, និងកាត់បន្ថយភាពក្រីក្រ ព្រមទាំងកសាងភាពធន់របស់ពលរដ្ឋទប់ទល់នឹងការប្រែប្រួលអាកាសធាតុ។

បណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម ថ្លែងថា «កម្មវិធីជាតិគាំពារសង្គម ដើម្បីជំរុញការចាកចេញពីភាពក្រីក្រ» ដែលដាក់ចេញនាពេលនេះ  សរបញ្ជាក់ឱ្យកាន់តែច្បាស់អំពីការប្តេជ្ញាចិត្តថ្មីមួយទៀត របស់រាជរដ្ឋាភិបាល ក្នុងការអភិវឌ្ឍមនុស្ស, ការលើកកម្ពស់ជីវភាពពលរដ្ឋ, ការកាត់បន្ថយភាពក្រីក្រ, រួមទាំងការកសាងភាពធន់របស់ពលរដ្ឋ ទប់ទល់នឹងការប្រែប្រួលអាកាសធាតុ តាមរយៈប្រព័ន្ធគាំពារសង្គម នៅកម្ពុជា។

អគ្គបណ្ឌិតសភាចារ្យ ឧបនាយករដ្ឋមន្ត្រី ក៏បានថ្លែងអំណរគុណ UNDP ចំពោះភាពជាដៃគូក្នុងការផ្តល់ការគាំទ្រដល់រាជរដ្ឋាភិបាល ដើម្បីអភិវឌ្ឍប្រទេសកម្ពុជា ជាពិសេស ការបន្តជំរុញការអភិវឌ្ឍប្រព័ន្ធគាំពារសង្គម និងបានផ្ដល់អនុសាសន៍សំខាន់ៗចំនួន២ គឺ ១). អគ្គលេខាធិការដ្ឋាន ក្រុមប្រឹក្សាជាតិគាំពារសង្គម បន្តសម្របសម្រួល និងសហការស្អិតល្មួត ជាមួយក្រសួង-ស្ថាប័ន, រដ្ឋបាលថ្នាក់ក្រោមជាតិ, និងដៃគូពាក់ព័ន្ធ, និង ២). មូលនិធិជាតិជំនួយសង្គម ដែលមានក្រសួងសង្គមកិច្ច អតីតយុទ្ធជន និងយុវនីតិសម្បទា ជាអាណាព្យាបាលបច្ចេកទេស, ព្រមទាំងក្រសួងផែនការ និងរដ្ឋបាលថ្នាក់ក្រោមជាតិ ត្រូវយកចិត្តទុកដាក់ខ្ពស់ក្នុងការបន្តពង្រឹងសមត្ថភាពស្ថាប័ន និងមន្ត្រីពាក់ព័ន្ធជាប្រចាំ ដើម្បីធានាថាការអនុវត្តកម្មវិធីនេះ ប្រព្រឹត្តទៅដោយរលូន និងមានប្រសិទ្ធភាព ស្របតាមគោលនយោបាយរបស់រាជរដ្ឋាភិបាល៕

The post ពីឆ្នាំ២០២៦ កម្មវិធីជាតិគាំពារសង្គមដើម្បីជំរុញការចាកចេញពីភាពក្រីក្រ នឹងដាក់ឱ្យអនុវត្តនៅស្រុកទឹកផុស ខេត្តកំពង់ឆ្នាំង និងស្រុករវៀង ខេត្តព្រះវិហារលើគ្រួសារចំនួន៥ពាន់ appeared first on Kampuchea Thmey Daily.

កម្ចីដែលកម្ពុជាទទួលបានពីរដ្ឋាភិបាលអាល្លឺម៉ងនេះ ត្រូវបានចុះហត្ថលេខា​រួម​គ្នាលើ​កិច្ច​ព្រមព្រៀង​ឥណទាន​សម្បទាន​ចំនួនពីរ និងកិច្ចព្រមព្រៀងដោយឡែក រវាងលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងលោកស្រី Thao NGUYEN អ្នកគ្រប់គ្រងប្រចាំប្រទេសកម្ពុជា ឡាវ និងវៀតណាម ប្រចាំការិយាល័យកណ្តាល នៃ ធនាគារអភិវឌ្ឍន៍អាល្លឺម៉ង់ (KW)។

នៅក្នុងទំហំទឹកប្រាក់សរុបចំនួន ៤៧,៥ លានអឺរ៉ូ ត្រូវ​ជា​ប្រមាណ ៥៥ លានដុល្លារអាម៉េរិក ក្នុង​នោះ​ទឹក​ប្រាក់ចំនួន ៣០ លានអឺរ៉ូ សម្រាប់ អនុវត្ត​គម្រោង​ប្រសិទ្ធភាព​ថាមពល​សម្រាប់​ការ​ផ្គត់ផ្គង់​អគ្គិសនី​នៅ​ជនបទ ជំហានទី២ និង​ទឹកប្រាក់​ចំនួន ១៧,៥ លានអឺរ៉ូ សម្រាប់​គម្រោង​នេះ​ជំហានទី៣។

គម្រោង​ទាំង​ពីរ​ជំហាន​ខាង​លើនេះ មាន​ទិសដៅ​ធានា​ដល់​ការផ្គត់ផ្គង់ថាមពលប្រកបដោយ ប្រសិទ្ធភាព និងនិរន្តភាពដល់បរិស្ថាន និងសង្គម នៅតាមតំបន់ជនបទនៃប្រទេសកម្ពុជា តាមរយៈការវិនិយោគ ទៅលើប្រព័ន្ធបញ្ជូន និងចែកចាយអគ្គិសនី។

ការវិនិយោគនេះ នឹងផ្តោតលើការពង្រីកបណ្តាញតង់ស្យុងមធ្យម ២២ KV នៅតាមតំបន់ជុំវិញខេត្តសៀមរាប និងតាមតំបន់ជនបទនៅក្នុងខេត្តឧត្តរមានជ័យ ខេត្តកំពង់ធំ និងខេត្តព្រះវិហារ, ការសាងសង់ និង​ពង្រីក​អនុស្ថានីយ៍ ព្រមទាំងការសាងសង់ខ្សែបញ្ជូនក្រោមដី និងប្រព័ន្ធ អាគុយស្តុកថាមពល។

ក្នុងឱកាសនោះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច បានមាន​ប្រសាសន៍​ថា ពិធី ចុះហត្ថលេខានេះ គឺជាសក្ខីភាពនៃការបន្តឧបត្ថម្ភគាំទ្ររបស់រដ្ឋាភិបាលអាល្លឺម៉ង់ ដល់រាជរដ្ឋាភិបាលកម្ពុជា។

ឆ្លៀតក្នុងឱកាសនោះដែរ លោក​ឧបនាយករដ្ឋមន្ត្រី បាន​អបអរសាទរចំពោះកិច្ចចរចា ស្តីពី​កិច្ចសហប្រតិបត្តិការ​អភិវឌ្ឍន៍​ឆ្នាំ២០២៥ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធ អាល្លឺម៉ង់ កាលពីថ្ងៃទី១៨-១៩ ខែវិច្ឆិកា ឆ្នាំ២០២៥ ដែលសម្រេចបានលទ្ធផលប្រកបដោយផ្លែផ្កា ដែលបាន ឯកភាពគ្នាលើបញ្ជីគម្រោង/កម្មវិធី ដោយផ្តោតលើវិស័យសេដ្ឋកិច្ច ពាណិជ្ជកម្ម គាំពារ និងសុខមាលភាពសង្គម សុខាភិបាល អភិវឌ្ឍន៍ផ្លូវជនបទ រួមទាំងការពង្រឹងវិស័យវាយនភណ្ឌនៅកម្ពុជា។

ជាការឆ្លើយតប ឯកអគ្គរដ្ឋទូតអាល្លឺម៉ង់ បានគូសបញ្ជាក់ថា ក្នុងនាមជាដៃគូអភិវឌ្ឍន៍ ដ៏សំខាន់មួយ ក្នុងចំណោម​ដៃគូ​អភិវឌ្ឍន៍​ដទៃ​ទៀត រដ្ឋាភិបាល​សាធារណរដ្ឋសហព័ន្ធអាល្លឺម៉ង់ប្តេជ្ញាចិត្ត យ៉ាងមុតមាំ​ក្នុងការ​ជំរុញ​កិច្ច​សហ​ប្រតិបត្តិការ​ក្នុងភាពជាដៃគូរយៈពេលយូរអង្វែងជាមួយនិងរាជរដ្ឋាភិបាលកម្ពុជា។

រដ្ឋាភិបាលសាធារណរដ្ឋសហព័ន្ធអាល្លឺម៉ង់ បាននឹងកំពុងបន្តជួយគាំទ្រដល់ការអភិវឌ្ឍសង្គម និង សេដ្ឋកិច្ចនៅកម្ពុជា ដោយប្រកាន់ខ្ជាប់នូវគោលនយោបាយផ្តល់ហិរញ្ញប្បទានដែលឆ្លើយតបទៅនឹងតម្រូវ ការអាទិភាពរបស់រាជរដ្ឋាភិបាលកម្ពុជា ស្របតាមយុទ្ធសាស្ត្របញ្ចកោណ ដំណាក់កាលទី១។

ជាក់ស្តែង គម្រោងប្រសិទ្ធភាពថាមពលសម្រាប់ការផ្គត់ផ្គង់អគ្គិសនីនៅជនបទ ជំហានទី២ និងជំហានទី៣ ដែល​ត្រូវ​បានចុះហត្ថលេខាលើកិច្ចព្រមព្រៀងឥណទានសម្បទាននៅថ្ងៃនេះ បានឆ្លើយតបនឹងតម្រូវការអាទិភាព របស់​រាជរដ្ឋាភិបាល​កម្ពុជា ក្នុងការអភិវឌ្ឍវិស័យថាមពលសំដៅរក្សាលំនឹងថ្លៃ និង ពិនិត្យលទ្ធភាពបញ្ចុះថ្លៃ អគ្គិសនី ព្រមទាំងធានាភាពគ្រប់គ្រាន់ និងស្ថិរភាព នៃការផ្គត់ផ្គង់អគ្គិសនីសម្រាប់ឧស្សាហកម្ម និងកសិកម្ម ជំរុញ​ការ​ប្រើប្រាស់ថាមពលក៏កើតឡើងវិញ និងអនុវត្តកម្មវិធីប្រសិទ្ធភាពថាមពលឱ្យអស់សក្តានុពលដើម្បី ធានាបាននូវសន្តិសុខថាមពល៕

The post អាល្លឺម៉ង់ ផ្តល់កម្ចី ៥៥ លានដុល្លារដល់កម្ពុជា អភិវឌ្ឍន៍ប្រសិទ្ធភាពថាមពលអគ្គិសនីនៅជនបទ appeared first on Kampuchea Thmey Daily.

យោងតាមឯកសារស្រាវជ្រាវគោលនយោបាយដែលមានចំណងជើងថា « ផលប៉ះពាល់សេដ្ឋកិច្ចនៃពន្ធគយរបស់របស់សហរដ្ឋអាមេរិកលើប្រទេសកម្ពុជា» ចេញផ្សាយនៅថ្ងៃទី១១ ខែវិច្ឆិកានេះ  ​ADB​ បានពិនិត្យលើសក្តានុពលសេដ្ឋកិច្ច និងសង្គម នៃការដំឡើងពន្ធគយរបស់សហរដ្ឋអាមេរិក លើទំនិញនាំចូលពីកម្ពុជា ក្នុងឆ្នាំ២០២៦ និងឆ្នាំបន្តបន្ទាប់ ដោយរំលេចពីភាពធន់ និងភាពងាយរងគ្រោះនៃសេដ្ឋកិច្ចជំរុញដោយការនាំចេញរបស់កម្ពុជា។

ឯកសារស្រាវជ្រាវនេះត្រូវបានចងក្រងដោយមានការគាំទ្រពី​ វិទ្យាស្ថានបណ្តុះបណ្តាល និង ស្រាវជ្រាវដើម្បីអភិវឌ្ឍន៍កម្ពុជា (CDRI)។ ឯកសារនេះពិនិត្យលើករណីកម្រិតពន្ធគយចំនួនបីគឺ ទាប (១០%) មធ្យម (១៩%) និងខ្ពស់ (៣៦%) និងផលប៉ះពាល់របស់វាដល់កំណើនសេដ្ឋកិច្ច ការងារ ភាពក្រីក្រ និងហិរញ្ញវត្ថុរបស់រដ្ឋាភិបាល នៃប្រទេសកម្ពុជា។

«ការវិភាគបង្ហាញថាពន្ធគយ ១៩% ជាក់ស្តែងនាពេលបច្ចុប្បន្ន ដែលសម្រេចបានពីការចរចាទ្វេភាគី ក្នុងខែសីហា ឆ្នាំ២០២៥ នេះ នឹងមានផលប៉ះពាល់តិចតួចលើប្រទេសកម្ពុជាក្នុងរយៈពេលប៉ុន្មានឆ្នាំខាងមុខនេះ»។  នេះបើតាម ADB។

ជាមួយគ្នានេះដែរ ​ស​ម្រាបការស្រាវជ្រាវនេះ​ក៏​រំលេចដែរ​ថា ស្ថានភាព​នៅ​តែ​មិន​ច្បាស់លាស់ និង​ផុយស្រួយ។ ពន្ធគយខ្ពស់នឹងពន្យឺតកំណើនសេដ្ឋកិច្ចជិត ១ ភាគរយ ធ្វើឱ្យពលរដ្ឋប្រមាណ ១00 000 អត់ការងារធ្វើ និងបង្កើនអត្រាភាពក្រីក្រលើសពី ១ ភាគរយ ដែលអាចទាញថយក្រោយនូវការវិវត្តថ្មីៗរបស់ប្រទេសក្នុងការកាត់បន្ថយភាពក្រីក្រ។

ឯកសារដដែលនេះរំលេចថា៖«ផលប៉ះពាល់នឹងធ្ងន់ធ្ងរជាពិសេសសម្រាប់កម្មករក្នុងវិស័យកាត់ដេរ​ និងអេឡិចត្រូនិច ដែលអាចនាំដល់ការផ្លាស់ប្តូរទៅវិស័យដែលមានប្រាក់ចំណូលទាបជាងមុនដូចជាវិស័យកសិកម្ម និងសេវាកម្មទូទៅ»។

សេដ្ឋវិទូ​របស់​​ ADB ប្រចាំប្រទេសកម្ពុជា លោកបណ្ឌិត Milan Thomas ដែលជា​អ្នកដឹកនាំ​ចងក្រងឯកសារស្រាវជ្រាវ​នេះមានប្រសាសន៍ថា «មន្ត្រីជំនាញរបស់រាជរដ្ឋាភិបាល​ និង វិស័យឧស្សាហកម្មកំពុងបន្តតាមដានស្ថានការណ៍យ៉ាងដិតដល់ក្នុងរយៈពេលជាច្រើនខែ។ ការវិភាគរបស់ពួកគាត់បង្ហាញថា ពន្ធគយខ្ពស់ដែលបានដាក់កាលពីដើមឆ្នាំអាចជាបន្ទុកសេដ្ឋកិច្ចដ៏ធ្ងន់ ប៉ុន្តែអត្រាពន្ធ ១៩% ក្នុងពេលបច្ចុប្បន្នគឺមិនអីទេ។»

លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក្នុងវេទិកាសារធារណកន្លងមក បានទទួលស្គាល់ពីបញ្ហាប្រឈម​ ដោយបានបញ្ជាក់ថា សេដ្ឋកិច្ចកម្ពុជា បានកើនឡើង ៦.០% ក្នុងឆ្នាំ ២០២៤ ប៉ុន្តែគេរំពឹងថា នឹងធ្លាក់ចុះទៅ ៤.៩% ក្នុងឆ្នាំ ២០២៥ ដោយសារប៉ះពាល់ពីអត្រាពន្ធនាំចេញ។ លោកបានថ្លែងថា«រដ្ឋាភិបាលនៅតែប្តេជ្ញាដើម្បីរក្សាស្ថិរភាពសេដ្ឋកិច្ច និងការពារប្រជាជនដែលងាយរងគ្រោះ។ ឥឡូវនេះយើងកំពុងស្វែងរកវិធានការហិរញ្ញវត្ថុជាក់លាក់ និងយុទ្ធសាស្ត្រពិពិធកម្មទីផ្សារដើម្បីបន្ថយហានិភ័យដែលបណ្តាលមកពីការប៉ះពាល់ខាងក្រៅ»។

បើតាម ADB ឯកសារស្រាវជ្រាវនេះផ្តល់ជាអនុសាសន៍ថា បើមានស្ថានភាពនៃការដំឡើងពន្ធគយ វិធានការសង្គ្រោះ​     បណ្តោះអាសន្ន រួមមានជំនួយសង្គម សេវាកម្មការងារ និងកម្មវិធីបណ្តុះបណ្តាល អាចត្រូវបានពង្រឹងដើម្បីសម្រួលការប្រែប្រួលទីផ្សារការងារ និងការពារពលរដ្ឋដែលងាយរងគ្រោះ។ ក្នុងរយៈពេលវែងជាងនេះ ការ វិនិយោគដែលកំពុងបន្ត លើសមត្ថភាពប្រកួតប្រជែងផ្នែកសេដ្ឋកិច្ច តាមរយៈហេដ្ឋារចនាសម្ព័ន្ធ មូលធនមនុស្ស និងកំណែទម្រង់អាជីវកម្ម នឹងកសាងភាពធន់របស់កម្ពុជាសម្រាប់វិបត្តិនាពេលអនាគត៕

The post ADB៖ ការនាំចេញរបស់កម្ពុជានឹងទទួលរងផលប៉ះពាល់ពីអត្រាពន្ធគយរបស់អាមេរិក appeared first on Kampuchea Thmey Daily.

ក្នុង​ពិធី​ប្រកាស​ដាក់​ឱ្យ​ដំណើរការ ថ្នាលគាំពារ​សង្គម​ឌីជីថលកម្ពុជា លោក​ អូន​ ព័ទ្ធមុនីរ័ត្ន បាន​លើក​ឡើង​ថា ថ្នាលគាំពារសង្គមឌីជីថលកម្ពុជា ឬ DSPP ជំនាន់ទី ២.០ ដែល ជាសមិទ្ធផលរួម​របស់​យើង​ និងជា​កម្មវត្ថុនៃ​ការ​ប្រកាសដាក់​ឱ្យ​យដំណើរការ​នាពេលនេះនឹងក្លាយជាមូលដ្ឋានគ្រឹះដ៏សំខាន់ ក្នុងការអនុវត្ត​គោល​នយោបាយ​ជាតិ​គាំពារ​សង្គម​របស់រាជរដ្ឋាភិបាល។

មិន​តែ​ប៉ុណ្ណោះ ថ្នាល​គាំពារ​សង្គម​ឌីជីថល​កម្ពុជានេះ​មិនត្រឹមតែជា​ការបំពាក់បន្ថែមនូវផ្ទាលឌីជីថលដ៏ទំនើបសម្រាប់​មន្ត្រី​អនុវត្ត​កម្មវិធីនៅរដ្ឋបាលថ្នាក់ក្រោមជាតិប៉ុណ្ណោះទេ ប៉ុន្តែថែមទាំងបំពាក់ឧបករណ៍ចុះបញ្ជីឌីជីថលដែល​រួមមានកុំព្យូទ័រយួរដៃ កាមេរ៉ាថតផ្ទៃមុខ និង​ឯកសារ ម៉ាស៊ីនស្កែនខ្មៅដៃ​ និង​ម៉ាស៊ីនបោះពុម្ពខ្នាតតូច ជូន​ដល់ឃុំ/សង្កាត់ ទូទាំងប្រទេស​ជាដំណាក់កាល​ៗបន្ថែមលើ​ថេប្លែត​ដែលត្រូវបានផ្តល់ជូន​នាពេល​កន្លងទៅ​។

លោកឧបនាយករដ្ឋមន្ត្រី បញ្ជាក់បន្ថែម​ថា «នេះគឺជាការធ្វើទំនើបកម្ម និង​ការធ្វើឌីជីថលូបនីយកម្មដល់កម្រិត អ្នកអនុវត្តផ្ទាល់​នៅថ្នាក់ក្រោមជាតិ​ដែលមិនធ្លាប់មានពីមុនមកនោះទេ»។

លោក អូន ព័ទ្ធមុនីរ័ត្ន ក៏​បាន​មាន​ប្រសាសន៍​ដែរ​ថា សមិទ្ធផល ទាំងនេះ នឹងរួមចំណែក​ដល់ការ​សម្រេច​បាន​នូវ​រដ្ឋាភិបាល​ឌីជីថល ក្នុង​ពេលខាងមុខ។

ជាពិសេស ការបង្កើនប្រសិទ្ធភាពនៃការផ្តល់សេវាគាំពារសង្គម​សំដៅកាត់បន្ថយ​ជា​អតិបរមា​នូវប្រតិបត្តិការចុះបញ្ជី និង​ការបើកផ្តល់អត្ថប្រយោជន៍ស្ងួន ការវិនិយោគ លើ​ហេដ្ឋារចនាសម្ព័ន្ធ​ឌីជីថល​ច្រើន​កន្លែង និងការអភិវឌ្ឍប្រព័ន្ធបច្ចេកវិទ្យាព័ត៌មានដែល​មានមុខងារស្រដៀងគ្នា និយាយជារួម និង​និយាយដោយឡែកសំដៅ «កាត់បន្ថយ ជាអតិបរមា នូវការបែក​ខ្ញែក​នៃការ​គ្រប់គ្រង​ទិន្នន័យ​គាំពារសង្គម​បែបវិមជ្ឈការ ត្រៀមលក្ខណៈឆ្លើយតបទៅនឹងគ្រោះអាសន្ន និង លើកកម្ពស់អភិបាលកិច្ចឌីជីថល» ក្នុង​ទិសដៅ​ប្រែក្លាយ​ប្រព័ន្ធ​គាំពារសង្គមកម្ពុជាទាំងមូលឱ្យក្លាយជាប្រព័ន្ធមួយដែលមានភាព​ប្រទាក់​ក្រឡាគ្នា​ល្អ និង​មានប្រសិទ្ធភាពខ្ពស់​សម្រាប់ការអនុវត្តរយៈពេលវែង។

ទន្ទឹម​នេះ​ក្នុងនាមជាប្រធានក្រុមប្រឹក្សាជាតិគាំពារសង្គម លោក​ឧបនាយករដ្ឋមន្ត្រី បាន​ថ្លែង​ថា លោក​ពិតជាមានមោទ​កភាព ចំពោះសមិទ្ធផលទាំងឡាយ​រួមទាំង​ការដាក់​ឱ្យដំណើរការនូវថ្នាលគាំពារសង្គម ឌីជីថលកម្ពុជា នាថ្ងៃនេះ។

លោក​ថា នេះ​ជាការបោះជំហានដ៏សំខាន់ និង​ជាការសម្រេចបាន​នូវបង្គោលចរថ្មីមួយទៀត​ស្របតាម «និម្មាបនកម្មគាំពារសង្គមឌីជីថល» ដែលត្រូវ​បានកំណត់​ក្នុងផែនការយុទ្ធសាស្ត្របរិវត្តកម្មឌីជីថល​ក្នុងប្រព័ន្ធគាំពារសង្គម ឆ្នាំ ២០២៤-២០២៨។

បន្ទាប់ពីការប្រកាសដាក់ឱ្យដំណើរការ នាថ្ងៃនេះ ថ្នាលគាំពារ សង្គមឌីជីថលកម្ពុជា នឹងរួមចំណែកជាកាតាលិករដ៏សំខាន់ ក្នុងការបង្កើនប្រសិទ្ធភាពនិង ស័ក្តិសិទ្ធភាព នៃការអនុវត្តក្របខណ្ឌគោលនយោបាយជាតិគាំពារសង្គមឆ្នាំ ២០២៤-២០៣៥ ដែលរាជរដ្ឋាភិបាល បានប្រកាសដាក់ឲ្យអនុវត្តកាលពីខែ កុម្ភៈ ឆ្នាំ ២០២៥ កន្លងទៅ៕

The post ថ្នាលគាំពារសង្គមឌីជីផលកម្ពុជា នឹងក្លាយជាមូលដ្ឋានគ្រឹះដ៏សំខាន់ អនុវត្តគោលនយោបាយជាតិគាំពារសង្គម របស់រាជរដ្ឋាភិបាល appeared first on Kampuchea Thmey Daily.

លោកបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម បានថ្លែងថា ជាមួយនឹងគំនិតផ្ដួចផ្ដើមប្រកបដោយចក្ខុវិស័យវែងឆ្ងាយ អគ្គបណ្ឌិតសភាចារ្យ អូន ព័ន្ធមុនីរ័ត្ន បានចង្អុលបង្ហាញឱ្យគិតគូរ និងរៀបចំប្រព័ន្ធចុះបញ្ជី និងការគ្រប់គ្រងទិន្នន័យគាំពារសង្គមសំដៅធានាប្រសិទ្ធភាព ទាំងក្នុងក្របខណ្ឌនៃការអនុវត្តបែបប្រទាក់ក្រឡាផង និងផ្ដល់ភាពងាយស្រួលសម្រាប់មន្ត្រីអនុវត្តកម្មវិធី និងអ្នកទទួលផលផង ដោយចាប់យកអភិក្រម «ធ្វើសុខដុមនីយកម្ម» ជាជាងយកអភិក្រម «ធ្វើសមាហរ័ណកម្ម» ដោយកិច្ចការនេះត្រូវបានធ្វើការអភិវឌ្ឍជាបន្តបន្ទាប់ រហូតសម្រេចបាននូវ «ថ្នាលគាំពារសង្គមឌីជីថលកម្ពុជា» ដែលជាកម្មវត្ថុនៃការប្រកាសដាក់ឱ្យអនុវត្តនៅថ្ងៃនេះ។

ការដាក់ឱ្យដំណើរការ «ថ្នាលគាំពារសង្គមឌីជីថលកម្ពុជា» ឬ “Digital Social Protection Platform” មានគោលដៅបង្ហាញពីសមិទ្ធផល និងការបោះជំហាននៃកិច្ចការបរិវត្តកម្មឌីជីថលក្នុងប្រព័ន្ធគាំពារសង្គម ដោយសង្កត់ធ្ងន់លើការគិតគូរផ្នែកគោលនយោបាយ រហូតដល់ការរៀបចំ និងដាក់ឱ្យដំណើរការនូវថ្នាលគាំពារសង្គមឌីជីថលកម្ពុជា ដែលជាការរៀបចំយ៉ាងល្អិតល្អន់ សម្រាប់រយៈពេលវែង លើផ្នែកប្រព័ន្ធគ្រប់គ្រងទិន្នន័យ និងបច្ចេកវិទ្យាឌីជីថលក្នុងប្រព័ន្ធគាំពារសង្គម ជាពិសេសការរៀបចំពង្រីកវិសាលភាពនៃការអនុវត្តថ្នាលឌីជីថលរួមនេះ ជាជំហានៗនៅទូទាំងប្រទេស ដើម្បីបង្កើនប្រសិទ្ធភាព, ស័ក្តិសិទ្ធិភាព, គណនេយ្យភាព និងតម្លាភាពបន្ថែមទៀត សម្រាប់ការអនុវត្តកម្មវិធីជាតិជំនួយសង្គម និងរបបសន្តិសុខសង្គម។

ថ្នាលគាំពារសង្គមឌីជីថលកម្ពុជា ជាថ្នាលឌីជីថលរួមរបស់រាជរដ្ឋាភិបាល ដែលមានលក្ខណៈសមាហរណ (Integrated Digital Platform) និងត្រូវបានអភិវឌ្ឍឡើង សម្រាប់ធ្វើអន្តរប្រតិបត្តិការក្នុងការចុះបញ្ជី និងផ្ទៀងផ្ទាត់អត្តសញ្ញាណពលរដ្ឋគោលដៅ និងអ្នកទទួលផលក្នុងប្រព័ន្ធគាំពារសង្គម និងត្រូវបានដាក់ឱ្យដំណើរការតាមរយៈអនុក្រឹត្យលេខ ៣៨ អនក្រ.បក ចុះថ្ងៃទី២០ ខែកុម្ភៈ ឆ្នាំ២០២៤។

ថ្នាលឌីជីថលរួមនេះ បានដាក់ឱ្យដំណើរការដោយធ្វើសុខដុមនីយកម្មកម្មវិធីគាំពារសង្គមសំខាន់ៗ រួមមាន៖ ការចុះបញ្ជីកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ, កម្មវិធីឧបត្ថម្ភសាច់ប្រាក់ជូនជនចាស់ជរា, កម្មវិធីឧបត្ថម្ភសាច់ប្រាក់ជូនជនមានពិការភាព, កម្មវិធីអាហារូបករណ៍តាមសាលារៀន, កម្មវិធីឧបត្ថម្ភសាច់ប្រាក់ជូនជនមានផ្ទុកមេរោគអេដស៍, កម្មវិធីឧបត្ថម្ភសាច់ប្រាក់ជូនជនជាប់ឃុំជាស្ត្រីមានផ្ទៃពោះ និងកូនអាយុក្រោម ២ឆ្នាំ តាមម្តាយ, កម្មវិធីកំណត់អត្តសញ្ញាណគ្រួសារក្រីក្រ និងមុខងារបោះពុម្ពបណ្ណសមធម៌ភ្លាមៗ, កម្មវិធីកំណត់អត្តសញ្ញាណជនមានពិការភាព និងមុខងារបោះពុម្ព QR Code នៃកាតសម្គាល់ជនមានពិការភាព, កម្មវិធីជាតិជំនួយសង្គម ដើម្បីជំរុញការចាកចេញពីភាពក្រីក្រ, និងកម្មវិធីបើកផ្តល់ប្រាក់របបសន្តិសុខសង្គមជូន អតីតយុទ្ធជន និងអតីតមន្ត្រីរាជការស៊ីវិល និងអ្នកនៅក្នុងបន្ទុក។

ជាមួយគ្នានេះថ្នាលគាំពារសង្គមឌីជីថលកម្ពុជា បានបំពាក់បន្ថែមនូវមុខងារ «ស្វែងរករហ័ស ឬ Fast Search» ដែលជាមុខងារធ្វើអន្តរប្រតិបត្តិការជាមួយមូលដ្ឋានទិន្នន័យចុះបញ្ជីគាំពារសង្គម និងមូលដ្ឋានទិន្នន័យរបស់ប្រតិបត្តិករគាំពារសង្គម តាមរយៈលេខ «សម្គាល់គាំពារសង្គម ឬ SPID» អាចផ្តល់នូវសមត្ថភាព និងសុក្រឹត្យភាពខ្ពស់ ក្នុងការស្វែងរកអត្តសញ្ញាណចុះបញ្ជីរបស់អ្នកទទួលផល និងពលរដ្ឋគោលដៅភ្លាមៗ ដោយអាចប្រើប្រាស់បណ្ណសម្គាល់ខ្លួន មួយណាក៏បាន រួមមានលេខអត្តសញ្ញាណបណ្ណសញ្ជាតិខ្មែរ, បណ្ណសមធម៌, កាតសម្គាល់ជនមានពិការភាព, ឬកាត ប.ស.ស. ឬអាចប្រើប្រាស់ការស្កែនផ្ទៃមុខ ឬស្កែនខ្ចៅដៃ។ ថ្នាលគាំពារសង្គមឌីជីថលកម្ពុជា ក៏បានបំពាក់ផងដែរ នូវមុខងារចាប់យកតួអក្សរ ពីរូបភាពអត្តសញ្ញាណបណ្ណសញ្ជាតិខ្មែរ ដោយស្វ័យប្រវត្តិ (OCR on National Khmer ID Card) ដែលបង្កើនភាពងាយស្រួល និងឆាប់រហ័សដល់រំហូរនៃការចុះបញ្ជីក្នុងប្រព័ន្ធគាំពារសង្គម ភ្ជាប់ជាមួយនឹងការផ្តល់នូវដំណឹងក្នុងកាលិកពិត (Real-time Notification) ទៅទូរសព្ទដៃរបស់មេឃុំ/ចៅសង្កាត់ បង្កើនលទ្ធភាពក្នុងការត្រួតពិនិត្យ និងអនុម័តការស្នើសុំចុះបញ្ជីគាំពារសង្គមភ្លាមៗ ផងដែរ។

អគ្គលេខាធិការក្រុមប្រឹក្សាជាតិគាំពារសង្គម បណ្ឌិត ចន ណារិទ្ធ  អះអាងថា ថ្នាលគាំពារសង្គមឌីជីថលកម្ពុជានេះ មិនត្រឹមតែអភិវឌ្ឍន៍ឡើងសម្រាប់សម្រួលដល់ការចូលបញ្ជីនិងការបើកផ្ដល់អត្ថប្រយោជន៍ក្នុងប្រព័ន្ធគាំពារសង្គមប៉ុណ្ណោះទេ វាថាទាំងក្លាយទៅជាមូលដ្ឋានគ្រឹះចាំបាច់សម្រាប់ជំរុញឲ្យប្រព័ន្ធគាំពារសង្គមក្លាយជាប្រព័ន្ធមួយដែលមានភាពធន មានភាពទន់ខ្លួនដូចទៅនឹងបណ្ដាប្រទេសជាតិលឿននានា ដោយកសាងនូវមូលដ្ឋានទិន្នន័យចុះបញ្ជីគាំពារសង្គមដែលមានលក្ខណៈពេញលេញ និងគ្រប់ជ្រុងជ្រោយនិងមានទិន្នន័យគោលដូចជា ទិន្នន័យចុះបញ្ជីក្នុងកម្រិតគ្រួសារ និងកម្រិតបុគ្គល ទិន្នន័យជីវមាត្រ ទិន្នន័យប្រជាសាស្ត្រ ទិន្នន័យស្ថានភាពរងគ្រោះ និងទិន្នន័យសង្គមសេដ្ឋកិច្ច ព្រមទាំងទិន្នន័យផ្លាស់ប្ដូរអាស័យដ្ឋានរបស់ក្រុមគោលដៅ។

បើតាមលោក ចន ណារិទ្ធ ចាប់តាំងពីដើមឆ្នាំ២០២៥មក ថ្នាលគាំពារសង្គមឌីជីថលកម្ពុជា   បាននិងកំពុងត្រូវបានដាក់ឱ្យអនុវត្តន៍នៅក្នុងឃុំសង្កាត់ចំនួន២០៩ ក្នុងខេត្តកំពង់ចាម ​និងសៀមរាប។ កាលពីពេលថ្មីៗនេះ ការអនុវត្តថ្នាលគាំពារសង្គមឌីជីថលកម្ពុជានេះ ក៏ត្រូវបានវាយតម្លៃលម្អិតដោយអ្នកជំនាញការមកពីធនាគារពិភពលោក។

តាមលោក ចន ណារិទ្ធ ការណ៍នេះនឹងផ្ដល់សមត្ថភាពគ្រប់គ្រាន់ដល់ប្រព័ន្ធគាំពារសង្គមកម្ពុជាក្នុងការឆ្លើយតបនឹងគ្រោះអាសន្ន និងអាចផ្តល់អន្តរាគមន៍បន្ទាន់នានាស្របតាមគោលការណ៍ណែនាំស្ដីពីក្របខ័ណ្ឌកិច្ចគាំពារសង្គមឆ្លើយតបនឹងគ្រោះអាសន្នរបស់រាជរដ្ឋាភិបាល នឹងសម្រាប់ជាមូលដ្ឋានក្នុងការសម្រេចចិត្ត ផ្នែកគោលនយោបាយដោយផ្អែកលើកទិន្នន័យដែលមានគុណភាព និងបច្ចុប្បន្នកម្ម។នៅក្នុងឱកាសនោះ, អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា ថ្នាលគាំពារសង្គមឌីជីថលកម្ពុជា ឬ DSPP ជាសមិទ្ធផលរួមដែលបានកសាងមូលដ្ឋានគ្រឹះដ៏មានសំខាន់មួយក្នុងការអភិវឌ្ឍ និងអនុវត្តគោលនយោបាយជាតិគាំពារសង្គមរបស់រាជរដ្ឋាភិបាល ដែលនេះមិនត្រឹមតែជាការបំពាក់បន្ថែមនូវថ្នាលឌីជីថលដ៏ទំនើប សម្រាប់មន្ត្រីអនុវត្តកម្មវិធី នៅរដ្ឋបាលថ្នាក់ក្រោមជាតិប៉ុណ្ណោះទេ។ ប៉ុន្តែ ថែមទាំងបំពាក់ឧបករណ៍ចុះបញ្ជីឌីជីថល ដែលរួមមានកុំព្យូទ័រយួរដៃ, កាមេរ៉ាថតផ្ទៃមុខ និងឯកសារ ម៉ាស៊ីនស្កែនខ្ចៅដៃ និងម៉ាស៊ីនបោះពុម្ពខ្នាតតូច ជូនដល់ឃុំ សង្កាត់ទូទាំងប្រទេស ជាដំណាក់កាលៗ បន្ថែមលើថេប្លែតដែលត្រូវបានផ្តល់ជូននាពេលកន្លងទៅ។ នេះជាការធ្វើទំនើបកម្ម និងឌីជីថលូបនីយកម្ម ដល់កម្រិតអ្នកអនុវត្តផ្ទាល់នៅថ្នាក់ក្រោមជាតិ។

អគ្គបណ្ឌិតសភាចារ្យ អូន ព័ន្ធមុនីរ័ត្ន បានបន្តថា សមិទ្ធផលទាំងនេះនឹងរួមចំណែកដល់ការសម្រេចបាននូវរដ្ឋាភិបាលឌីជីថលក្នុងពេលខាងមុខ, ជាពិសេសការបង្កើនប្រសិទ្ធភាពនៃការផ្តល់សេវាគាំពារសង្គម សំដៅកាត់បន្ថយជាអតិបរមានូវប្រតិបត្តិការចុះបញ្ជី និងការបើកផ្តល់អត្ថប្រយោជន៍ស្ទួន ការវិនិយោគលើហេដ្ឋារចនាសម្ព័ន្ធឌីជីថលច្រើនកន្លែង និងការអភិវឌ្ឍប្រព័ន្ធបច្ចេកវិទ្យាព័ត៌មាន ដែលមានមុខងារស្រដៀងគ្នា។ និយាយជារួម និងនិយាយដោយឡែកសំដៅ «កាត់បន្ថយជាអតិបរមានូវការបែកខ្ញែកនៃការគ្រប់គ្រងទិន្នន័យគាំពារសង្គម បែបវិមជ្ឈការ ត្រៀមលក្ខណៈឆ្លើយតបនឹងគ្រោះអាសន្ន និងលើកកម្ពស់អភិបាលកិច្ចឌីជីថល» ក្នុងទិសដៅប្រែក្លាយប្រព័ន្ធគាំពារសង្គមកម្ពុជាទាំងមូលឱ្យក្លាយជាប្រព័ន្ធមួយ ដែលមានភាពប្រទាក់ក្រឡាល្អ និងមានប្រសិទ្ធភាពខ្ពស់ សម្រាប់ការអនុវត្តរយៈពេលវែង។

ជាមួយសមិទ្ធផលដែលសម្រេចបាននេះ, អគ្គបណ្ឌិតសភាចារ្យ អូន ព័ន្ធមុនីរ័ត្ន បានលើកទឹកចិត្ត និងផ្តល់អនុសាសន៍មួយចំនួនដល់ក្រសួង-ស្ថាប័ន និងក្រុមការងារពាក់ព័ន្ធ ដែលទទួលបន្ទុកអនុវត្តគោលនយោបាយជាតិគាំពារសង្គម រួមទាំងលេខាធិការដ្ឋានអនុគណៈកម្មាធិការទទួលបន្ទុកបរិវត្ដកម្មឌីជីថល ក្នុងប្រព័ន្ធគាំពារសង្គម នែអគ្គលេខាធិការដ្ឋានក្រុមប្រឹក្សាជាតិគាំពារសង្គមឱ្យបន្តការគាំទ្រ និងចូលរួមអនុវត្តឱ្យបានពេញលេញ និងស្រុះគ្នាប្រកបដោយស្មារតីបុរេសកម្ម។

អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណក្រសួង- ស្ថាប័នពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិ ព្រមទាំងរដ្ឋបាលឃុំ សង្កាត់, ដៃគូអភិវឌ្ឍន៍នានាចំពោះការចូលរួមចំណែកគាំទ្រ និងអនុវត្តប្រកបដោយស្មារតីទទួលខុសត្រូវខ្ពស់ក្នុងកិច្ចការធ្វើសុខដុមនីយកម្មប្រព័ន្ធចុះបញ្ជី និងគ្រប់គ្រងទិន្នន័យគាំពារសង្គម ជាពិសេសថ្នាលគាំពារសង្គមឌីជីថលកម្ពុជា សំដៅជំរុញ និងធានាប្រសិទ្ធភាព និងស័ក្តិសិទ្ធិភាពនៃការអនុវត្តគោលនយោបាយជាតិគាំពារសង្គម របស់រាជរដ្ឋាភិបាល៕

The post ថ្នាលគាំពារសង្គមឌីជីថលកម្ពុជា ត្រូវបានដាក់ឱ្យប្រើប្រាស់ ដើម្បីជួយឱ្យពលរដ្ឋក្រីក្រ និងងាយរងគ្រោះទទួលបានអត្ថប្រយោជន៍លឿនជាងមុន appeared first on Kampuchea Thmey Daily.