លោក Aleksandar Vucic Archives - Kampuchea Thmey Daily

ក្រុមអ្នកតវ៉ានៅស៊ែប៊ីនឹងធ្វើដំណើរ៩០គីឡូម៉ែត្រ បង្កើនការដាក់សម្ពាធលោក Vucic

Rann Reuy — Sat, 01 Feb 2025 11:43:30 +0000

ក្នុងខួប៣ខែនៃការបាក់រលំពិដានស្ថានីយរថភ្លើងនៅទីក្រុង Novi Sad នៅស៊ែប៊ី ដែលបណ្តាលឲ្យមនុស្ស១៥នាក់បានស្លាប់ក្នុងហេតុការណ៍នោះ ក្រុមអ្នកតវ៉ាបានរៀបចំក្បួនតវ៉ាដោយដើរចម្ងាយផ្លូវ៩០គីឡូម៉ែត្រ និងមិនទទួលការការសម្បទានរបស់ប្រធានាធិបតី Aleksandar Vucic នោះទេ។

ក្រុមអ្នកតវ៉ានៅស៊ែប៊ីចេញដំណើរក្នុងការតវ៉ាទាមទារយុត្តិធម៌ដល់អ្នកស្លាប់។ TVP World

ការផ្សាយរបស់សារព័ត៌មាន TVP World មានមូលដ្ឋាននៅប្រទេសប៉ូឡូញ បានឲ្យដឹងថា ក្រុមអ្នកតវ៉ានៅទីក្រុង Novi Sad ភាគខាងជើងនៃប្រទេសស៊ែប៊ី បានស្វាគមន៍អ្នកតវ៉ាផ្សេងទៀតដែលបានធ្វើដំណើរពីរដ្ឋធានី Belgrade កាលពីថ្ងៃសុក្រ មុនពេលបាតុកម្មដ៏ធំរយៈពេលបីខែ

កាលថ្ងៃព្រហស្បតិ៍ ប្រធានាធិបតី Aleksandar Vucic បានប្រើប្រាស់សិទ្ធិលើកលែងការចោទប្រកាន់ដល់អ្នកចូលរួមតវ៉ាដែលត្រូវបានចាប់ខ្លួនចំនួន១៣នាក់ ក្នុងនោះមាននិស្សិត នាយកសាលវិទ្យាល័យ ព្រឹទ្ធបុរសមហាវិទ្យាល័យ ជាដើម ដើម្បីបន្ធូរបន្ថយភាពតានតឹងកាន់តែខ្លាំង។

កាលកថ្ងៃអង្គារដើមសប្តាហ៍នេះ នាយករដ្ឋមន្ត្រីស៊ែប៊ី លោក Milos Vucevic បានប្រកាសលាលែងពីអំណាចដោយសារតែសម្ពាធនៃការទាមទារនោះកាន់តែកញ្ជ្រោលឡើង។ មានសេចក្តីរាយការណ៍ខ្លះបង្ហាញថា សមាជិករដ្ឋាភិបាលខ្លះក៏បានចូលរួមតវ៉ា ដោយការមិនទៅបំពេញការងាររបស់ខ្លួន។

ដោយសារផែនការតវ៉ាមានដំណើរផ្លូវឆ្ងាយ ក្រុមអ្នកតវ៉ាបានអបអរអ្នកជិះកង់ និងអ្នកបើកបរដែលបានមកចូលរួមក្នុងបាតុកម្មប្រឆាំងនឹងរដ្ឋាភិបាលរបស់ប្រធានាធិបតី Aleksandar Vucic។

យោងតាមការដកស្រង់សម្តីផ្ទាល់របស់ TVP World អ្នកតវ៉ាចូលរួមតវ៉ាឈ្មោះ Veljko Ristic បាននិយាយថា «ក្នុងនាមជាប្រទេសមួយ យើងត្រូវរក្សាការតាំងចិត្ត និងជំរុញឱ្យអាជ្ញាធរ និងរដ្ឋទទួលខុសត្រូវខាងសីលធម៌ និងនាំខ្លួនពួកគេឱ្យមានសណ្តាប់ធ្នាប់»។

មនុស្ស១៤នាក់បានស្លាប់នៅក្នុងការបាក់ដួលរលំនៅស្ថានីយរថភ្លើង Novi Sad កាលពីថ្ងៃទី១ខែវិច្ឆិកា ខណៈដែលក្រោយមកទៀតបានស្លាប់ដោយសាររបួសរបស់ពួកគេ។ ក្រុមអ្នកតវ៉ានិយាយថា អំពើពុករលួយរបស់រដ្ឋាភិបាលនិងការត្រួតពិនិត្យមិនល្អនាំឱ្យមានមហន្តរាយនេះកើតឡើង។

ក្រុមអ្នកតវ៉ា គណបក្សប្រឆាំង និងក្រុមសិទ្ធិមនុស្សក៏បានចោទប្រកាន់លោក Vucic និងគណបក្សជឿនលឿនស៊ែប៊ី (SNS) របស់ប្រធានាធិបតីពីបទសូកប៉ាន់អ្នកបោះឆ្នោត អំពើហិង្សាប្រឆាំងនឹងគូប្រជែង ការរារាំងសេរីភាពប្រព័ន្ធផ្សព្វផ្សាយ និងទំនាក់ទំនងជាមួយឧក្រិដ្ឋកម្មដែលបានរៀបចំ។ ប៉ុន្តែតាមសេចក្តីរាយការណ៍ ប្រធានាធិបតី និងគណបក្សSNS បានបដិសេធ។

ក្រុមអ្នកតវ៉ានៅស៊ែកាន់តែច្រើនឡើងចូលរួមតវ៉ាប្រឆាំងរដ្ឋាភិបាលរបស់លោក Vucic។ Reuters

ប្រធានាធិបតី Aleksandar Vucic បានកាន់អំណាចអស់រយៈពេល១៥ឆ្នាំ តាំងពីឆ្នាំ២០១០មក ហើយលោកមានទំនាក់ទំនងយ៉ាងស្អិតរមួតជាមួយប្រធានាធិបតីរុស្ស៊ី លោក វ៉្លាឌីមៀរ ពួទីន រដ្ឋាភិបាលហុងគ្រីដែលតែងតែប្រឆាំងគោលជំហរអឺរ៉ុប និងជាពិសេស ទំនាក់ទំនងយ៉ាងជិតស្និទ្ធបំផុតជាមួយរដ្ឋាភិបាលចិន។

ការដួលរលំបាក់ពិដានស្ថានីយរថភ្លើងនោះ ក៏ត្រូវបានភ្ជាប់ទៅនឹងគម្រោងជុសជុលដែលក្រុមអ្នកតវ៉ាចោទថា ក្រុមហ៊ុនចិនជាអ្នកធ្វើ ដែលគ្មានគុណភាព ព្រោះខ្វះការត្រួតពិនិត្យនិងមានអំពើពុករលួយ។ ប៉ុន្តែ ប្រធានាធិបតីស៊ែប៊ី ចោទបស្ចឹមប្រទេសនៅពីក្រោយការតវ៉ា ហើយថា ការតវ៉ានោះជាផ្នែកនៃយុទ្ធសាស្រ្ត «បដិវត្តន៍ពណ៌» ដើម្បីទម្លាក់រដ្ឋាភិបាលលោក៕

ដោយ រ៉ាន់ រើយ

The post ក្រុមអ្នកតវ៉ានៅស៊ែប៊ីនឹងធ្វើដំណើរ៩០គីឡូម៉ែត្រ បង្កើនការដាក់សម្ពាធលោក Vucic appeared first on Kampuchea Thmey Daily.

ក្រោមសម្ពាធតវ៉ាខ្លាំងពេក ប្រធានាធិបតីស៊ែប៊ី ប្រកាសលើកលែងទោសអ្នកតវ៉ា

Rann Reuy — Thu, 30 Jan 2025 10:15:31 +0000

ប្រឈមសម្ពាធកាន់តែខ្លាំងឡើងៗ ប្រធានាធិបតីស៊ែប៊ី លោក អាលិកសាន់ឌ័រ វូស៊ិក (Aleksandar Vucic) បានប្រើសិទ្ធិអំណាចប្រធានាធិបតីលើកលែងទោស និងបន្ធូរបន្ថយការកាត់ទោសឧក្រិដ្ឋកម្មជាលើកដំបូងដល់និស្សិត សាស្រ្តាចារ្យ និង នាយកសាលា សរុបចំនួន១៣នាក់ដែលកំពុងជាប់ឃុំ។

ប្រធានាធិបតីស៊ែប៊ី លោក Aleksandar Vucic ប្រកាសលើកលែងទោសដល់អ្នកតវ៉ាដែលជាប់ឃុំ១៣រូប។ DW

កាលប្រកាសលើកលែងទោសដល់អ្នកចូលរួមក្នុងមហាបាតុកម្មដែលស្ថិតនៅក្នុងការឃុំឃាំងនេះ កើតឡើងក្រោយការលាលែងពីអំណាចរបស់នាយករដ្ឋមន្ត្រី មីឡូស វូសេវិក (Milos Vucevic) កាលពីថ្ងៃអង្គារ ខណៈដែលសមាជិករដ្ឋាភិបាលខ្លះបានចូលរួមតវ៉ាដោយការមិនបំពេញការងារ។

ការសម្រេចរបស់ប្រធានាធិបតី Vucic ត្រូវបានផ្ទេរទៅក្រសួងយុត្តិធម៌សម្រាប់បន្តនីតិវិធី ដោះលែង។ អ្នកជាប់ឃុំដែលទទួលបានការលើកលែងរបស់ប្រធានាធិបតី រួមមាន និស្សិតចំនួន៦នាក់ នាយកសាលា៤នាក់ ព្រឹទ្ធបុរសមហាវិទ្យាល័យម្នាក់ សាស្ត្រាចារ្យរងម្នាក់ និងបុគ្គលិកសាលាម្នាក់។ យោងទីភ្នាក់ងារព័ត៌មានបារាំង AFP ផ្សាយកាលថ្ងៃទី២៩ខែមករា។

ចំណែកទីភ្មាក់ងារព័ត៌មានរុស្ស៊ី TASS បានផ្សាយថា មេដឹកនាំស៊ែប៊ីបានប្រើសិទ្ធិលើកដំបូងក្នុងការលើកលែងទោសក្រោយការតវ៉ាអស់រយៈពេលជិត៣ខែ ជុំវិញការតវ៉ាទាមទារយុត្តិធម៌ ក្រោយកើតមានឧបទ្ទវហេតុបាក់ពិដានដំបូលស្ថានីយរថភ្លើងបណ្តាលឲ្យមានអ្នកស្លាប់១៥នាក់។

លោក បានគូសបញ្ជាក់ថា នេះជាការទាមទារមួយក្នុងចំណោមការទាមទារដែលក្រុមនិស្សិតតវ៉ាទាមទារ ប៉ុន្តែជំហាននេះ «ប្រថុយខ្លាំងណាស់ ព្រោះអ្នកមិនអាចយកយុត្តិធម៌មកដាក់ក្នុងដៃរបស់អ្នកផ្ទាល់ ហើយក្នុងករណីមានបទល្មើសស្រដៀងគ្នានេះ អ្នកមិនអាចលើកលែងទោសបានទេ ដល់អ្នកខ្លះ ហើយបដិសេធចំពោះអ្នកដទៃ»។

ចាប់តាំងពីខែវិច្ឆិកា ឆ្នាំ២០២៤ ការតវ៉ាប្រឆាំងរដ្ឋាភិបាលស៊ែប៊ីដែលរៀបចំឡើងដោយនិស្សិត និងតំណាងគណបក្សប្រឆាំង បានផ្ទុះឡើងធំឡើងរហូតដល់មានការបិទផ្លូវ និងរីកដល់ការគាំទ្រពីកសិករថែមទៀត។

មូលហេតុចម្បងនៃការតវ៉ាកើតឡើងដោយសារសោកនាដកម្មនៅស្ថានីយរថភ្លើង Novi Sad ដែលបានកើតឡើងកាលពីថ្ងៃទី១ខែវិច្ឆិកា ហើយបណ្តាលឱ្យមនុស្ស១៥នាក់ស្លាប់។

ចាប់តាំងពីការចាប់ផ្តើមនៃការតវ៉ាតាមដងផ្លូវ ក្រុមប្រឆាំងបានទាមទារ «ការលាលែងពីតំណែងរបស់នាយករដ្ឋមន្ត្រី Milos Vucevic និង Novi Sad អភិបាលក្រុង Milan Djuric ការចាប់ខ្លួនអ្នកដែលទទួលខុសត្រូវផ្ទាល់ចំពោះការបរាជ័យក្នុងការធ្វើឱ្យប្រសើរឡើងនៃស្ថានីយរថភ្លើង និងការបង្ហាញកិច្ចសន្យាជាមួយនឹងក្រុមហ៊ុនចិន [ដែលអនុវត្តការងារនេះ]»។

ប្រធានាធិបតី Aleksandar Vucic ដែលច្រានចោលការទាមទាររបស់ក្រុមតវ៉ា បានចោទប្រកាន់ការតវ៉ាទាមទាររបស់ពួកគេថា ជាចេតនារបស់លោកខាងលិចក្នុងការផ្តល់ការគាំទ្រដើម្បីទម្លាក់រដ្ឋាភិបាលរបស់លោក ដោយប្រើប្រាស់យុទ្ធសាស្រ្ត «បដិវត្តន៍ពណ៌»៕

ដោយ រ៉ាន់ រើយ

The post ក្រោមសម្ពាធតវ៉ាខ្លាំងពេក ប្រធានាធិបតីស៊ែប៊ី ប្រកាសលើកលែងទោសអ្នកតវ៉ា appeared first on Kampuchea Thmey Daily.

ប្រធានាធិបតីស៊ែប៊ី Vucic ចោទបស្ចឹមប្រទេសនៅពីក្រោយបាតុកម្មនិស្សិតទម្លាក់លោក

Rann Reuy — Sun, 19 Jan 2025 05:49:36 +0000

លោកប្រធានាធិបតីស៊ែប៊ី លោក Aleksandar Vucic ដែលស្និទ្ធនឹងប្រធានាធិបតីរុស្ស៊ីលោក វ៉្លាឌីមៀរ ពូទីន បានចោទលោកខាងលិចនៅពីក្រោយបាតុករដែលដឹកនាំដោយក្រុមនិស្សិតក្នុងការប៉ុនប៉ងទម្លាក់រូបលោក។

ប្រធានាធិបតី Aleksandar Vucic ពេលចេញទៅទស្សនកិច្ចនៅក្រៅប្រទេស។ FB

តាមការចុះផ្សាយរបស់បណ្តាញភ្នាក់ងារព័ត៌មានរុស្ស៊ី លោក Vucic បាននិយាយនៅលើកញ្ចក់ទូរទស្សន៍ Happy TV ថា ពួកបស្ចឹមប្រទេសជាប់ពាក់ព័ន្ធក្នុងការប៉ុនប៉ងធ្វើបដិវត្តន៍ពណ៌នៅក្នុងប្រទេសស៊ែប៊ីដោយប្រើប្រាស់ក្រុមនិស្សិតចេញមុខតវ៉ា។

និស្សិតច្រើនសកលវិទ្យាល័យនៅប្រទេសស៊ែប៊ី បានចេញមុខតវ៉ាជាបន្តបន្ទាប់អស់រយៈពេលជាង១ខែកន្លងមកនេះ ដោយផ្តើមពីការរកយុត្តិធម៌ជូនអ្នកស្លាប់ក្នុងហេតុការណ៍បាក់ដំបូលពិដានស្ថានីយរថភ្លើងបណ្តាលឲ្យមានអ្នកសា្លប់ជិត២០នាក់កាលថ្ងៃទី១ខែវិច្ឆិកា។

ក្រុមអ្នកតវ៉ាបានភ្ជាប់ការបាក់ពិដាននោះទៅនឹងគម្រោងពុករលួយ ដែលរដ្ឋាភិបាលលោក Vucic សហការជាមួយក្រុមហ៊ុនចិន ដោយការសាងសង់គ្មានគុណភាព និងការជុសជុលញឹកញាប់ ប៉ុន្តែក្រុមហ៊ុនចិនដែលទទួលបានគម្រោងជុសជុលនោះ បានបដិសេធថាខ្លួនមិនបានជុសជុសកន្លែងដែលបាក់នោះទេ។

គោលដៅនៃការទាមទារបានប្រែក្លាយពីការរកយុត្តិធម៌សម្រាប់អ្នករងគ្រោះ ពង្រីកដល់ការទាមទារឲ្យរដ្ឋាភិបាលបង្ហាញតម្លាភាព និង ការទាមទារឲ្យប្រធានាធិបតីចុះចេញពីអំណាច ដោយបង្កើតរដ្ឋាភិបាលឯករាជ្យ។ លោក Vucic បានកាន់អំណាចតាំងពីឆ្នាំ២០១០ និងមានទំនោរស្និទ្ធទៅរករុស្ស៊ីនិងចិន។

ទីភ្នាក់ងារព័ត៌មាន TASS របស់រុស្ស៊ី បានស្រង់សម្តីលោកប្រធានាធិបតី Vucic ដូចបាននិយាយថា៖«អ្វីគ្រប់យ៉ាងដែលពួកគេកំពុងធ្វើគឺការប៉ុនប៉ងធ្វើបដិវត្តន៍ពណ៌។ ខ្ញុំមិនមានការសង្ស័យទេ។ នេះមិនមែនជាបញ្ហាទេ យើងនឹងរង់ចាំរហូតដល់ពេលចុងក្រោយដែលយើងនឹងត្រូវឆ្លើយតប នៅពេលដែលពួកគេនឹងចាប់ផ្តើមបិទផ្លូវដោយបង្ខំ»។

លោក Vucic បានបន្ថែមថា លោកទទួលបានត៌មានថា៖«ភ្នាក់ងារបរទេសតាមរយៈទំនាក់ទំនងរបស់ពួកគេបានបញ្ជូនទៅសិស្សមួយចំនួន» ការហៅទៅកាន់ផ្លូវប្រសព្វសំខាន់ៗ និងបិទចរាចរណ៍។

លោក Vucic ចោទថា នេះត្រូវបានធ្វើក្រោមការគ្រប់គ្រងរបស់ «គ្រូបរទេស»។ លោក បញ្ជាក់ថា៖‍យើងដឹងរួចហើយថាអ្នកណាកំពុងធ្វើបែបនោះ និងដោយរបៀបណា។ ពួកគេខ្លះមកពីប្រទេសលោកខាងលិចមួយចំនួន និងខ្លះទៀតមកពីបូព៌ា ជាកន្លែងដែលពួកគេបានធ្វើការងារកខ្វក់សម្រាប់បណ្តាញភ្នាក់ងារលោកខាងលិច។ យើងនឹងអត់ធ្មត់រហូតដល់ពេលជាក់លាក់មួយហើយបន្ទាប់មក យើងនឹងអនុវត្តទៅតាមច្បាប់ដែលរដ្ឋគួរគោរព»៕

ដោយ រ៉ាន់ រើយ

The post ប្រធានាធិបតីស៊ែប៊ី Vucic ចោទបស្ចឹមប្រទេសនៅពីក្រោយបាតុកម្មនិស្សិតទម្លាក់លោក appeared first on Kampuchea Thmey Daily.

បាតុករដឹកនាំដោយនិស្សិតស៊ែប៊ី ប្រែក្លាយជប់លៀងឆ្លងឆ្នាំទៅជាបាតុកម្មទាមទារយុត្តិធម៌

Rann Reuy — Thu, 02 Jan 2025 07:56:47 +0000

នៅថ្ងៃឆ្លងឆ្នាំសកល ប្រជាជនស៊ែប៊ីរាប់ពាន់នាក់ជាពិសេសក្រុមនិស្សិតមហាវិទ្យាល័យ បានប្រែក្លាយពិធីអបអរសាទរឆ្លងឆ្នាំសកលទៅជាការតវ៉ាទាមទារស្រែករកយុត្តិធម៌ដោយប្រើប្រាស់មូលហេតុពីហេតុការបាក់ដំបូលនៃស្ថានីយរថភ្លើងដែលបណ្តាលឲ្យមនុស្ស១៥នាក់បានស្លាប់កាលពី២ខែមុន។

ការតវ៉ារបស់ប្រជាជនដឹកនាំដោយក្រុមនិស្សិតមិនមែនប្រមូលផ្តុំគ្នានៅតែរដ្ឋធានីបែលក្រាដនោះទេ ប៉ុន្តែនៅបណ្តាក្រុងតូចៗជាច្រើនទៀត ដើម្បីទាមទារឲ្យមានកំណែទម្រង់នយោបាយនិងប្រព័ន្ធយុត្តិធម៌នៅក្នុងប្រទេសតំបន់បាល់កង់នេះ។

ក្រុមអ្នកតវ៉ាក្នុងប្រទេសស៊ែរប៊ីក្នុងពេលកន្ងលមក។ Reuter

តាមសេចក្តីរាយការណ៍របស់ទីភ្នាក់ងារព័ត៌មាន AP ក្រុមនិស្សិតពីសកលវិទ្យាល័យនានានៅទីក្រុងបែលក្រាដ បានរៀបចំការតវ៉ានោះឡើងដោយនាំគ្នាស្រែកថា «គ្មានទេចូលឆ្នាំថ្មី អ្នកនៅតែជំពាក់ពួកយើងរឿងមួយ (There is No New Year-You Still Owe Us for the Old One»។

ក្រុមអ្នកតវ៉ាបានស្រែកពាក្យថា «យើងចង់បានយុត្តិធម៌» ដោយស្មិងស្មាធិ័នៅម៉ោង១១និង៥២នាទី ដោយរំឭកទៅដល់វិញ្ញាណក្ខន្ធរបស់អ្នកស្លាប់នៅក្នុងហេតុការណ៍បាក់ដំបូលស្ថានីយរថភ្លើងនៅ Novi Sad កាលថ្ងៃទី១ខែវិច្ឆិកា ដែលបណ្តាលឱ្យមានអ្នកស្លាប់រហូតដល់១៥នាក់។

ការតវ៉ារបស់និស្សិតនៃប្រទេសស៊ែប៊ីកើតឡើងជាបន្តបន្ទាប់ ហាក់បានទាញការយកចិត្តទុកដាក់ពីសំណាក់ប្រធានាធិបតីស៊ែរប៊ី លោក Aleksandar Vucic ដែលយល់ថា ពួកនិស្សិតតាមមហាវិទ្យាល័យទាំងនោះត្រូវការប្រាក់ដើម្បីលើកកម្ពស់ការសិក្សា និងជីវភាព ហើយលោកក៏បានដាក់ចេញនូវការសន្យាមួយចំនួន ដូចជាការសន្យាផ្តល់ប្រាក់សម្រាប់ទិញលំនៅឋានជាដើម។

ប៉ុន្តែការតវ៉ាបានផ្ទុះធំឡើងៗក្នុងចលនាទាមទារយុត្តិធម៌ដល់ស្លាប់ទាំងនោះ ដោយចោទប្រកាន់ថា ការរងគ្រោះរបស់ពួកគេដោយសារតែអំពើពុករលួយរបស់រដ្ឋាភិបាលក្នុងការដឹកនាំការធ្វើគម្រោងកែលម្អដំបូលអគារស្ថានីយរថភ្លើងដែលគ្មានគុណភាព។

ការខកខានការបញ្ជាក់ទាន់ពេលវេលា និងប្រកបដោយហេតុផលទទួលយកបានរបស់រដ្ឋាភិបាលរបស់ប្រធានាធិបតី Aleksandar Vucic ក៏ជំរុញចលនាទាមទារនេះកាន់តែខ្លាំងឡើងៗ រហូតដល់ការទាមទារឲ្យកំណែទម្រង់នយោបាយ និងការទាមទារយុត្តិធម៌។

ប្រធានាធិបតីស៊ែប៊ី លោក Aleksandar Vucic ដែលកាន់អំណាចជាង១០ឆ្នាំទៅហើយ មានទំនោរយ៉ាងខ្លាំងទៅរកប្រទេសចិន និងរក្សាមិត្តភាពល្អជាមួយប្រធានាធិបតីរុស្ស៊ី ដែលធ្វើឲ្យបស្ចឹមលោកមិនពេញចិត្តចំពោះអំណាចរបស់លោកដែលផ្អៀងទៅរករុស្ស៊ីនិងចិន។

កាលខែឧសភាឆ្នាំ២០២៤ ប្រធានាធិបតីចិន លោក ស៊ីជីន ភីង បានទៅទស្សនកិច្ចប្រទេស៊ែប៊ី និងបានសង្កត់ធ្ងន់នូវចំណងមិត្តភាពរបស់ពួកគេ ព្រមទាំងបានអត្ថាធិប្បាយថា ចំណងទំនាក់ទំនងរបស់ពួកគេ បង្កើតចេញពីឈាមទៀតផង៕

ដោយ រ៉ាន់ រើយ

ប្រធានាធិបតីស៊ែរប៊ី លោក Aleksandar Vucic។

The post បាតុករដឹកនាំដោយនិស្សិតស៊ែប៊ី ប្រែក្លាយជប់លៀងឆ្លងឆ្នាំទៅជាបាតុកម្មទាមទារយុត្តិធម៌ appeared first on Kampuchea Thmey Daily.

ប្រធានាធិបតីស៊ែប៊ី រងការគំរាមសម្លាប់ មួយថ្ងៃមិនតិចជាង ២០០ដង

Sok Sovann — Mon, 05 Jun 2023 01:59:05 +0000

ប្រធានាធិបតីស៊ែប៊ី លោក Aleksandar Vucic បាននិយាយកាលពីថ្ងៃអាទិត្យទី៤ខែមិថុនាថា លោកទទួលបានការគំរាមកំហែងសម្លាប់ប្រមាណ២០០ដងជារៀងរាល់ថ្ងៃ ប៉ុន្តែលោកបានអត់ឱនឲ្យពួកគេ។

លោក Vucic បានប្រាប់សន្និសីទសារព័ត៌មានមួយថា “ខ្ញុំជាប្រធានាធិបតីនៃសាធារណរដ្ឋ ហើយវាជាការងាររបស់ខ្ញុំ ដើម្បីទប់ទល់នឹងការគំរាមកំហែងសម្លាប់។ ខ្ញុំមិនដឹងថា តើគួរត្រូវកាត់ទោសជាផ្លូវការ ឬជាឯកជនទេ។ សម្រាប់ខ្ញុំ មានការគំរាមកំហែងសម្លាប់ខ្ញុំជាង ២០០ដងជារៀងរាល់ថ្ងៃ ប៉ុន្តែអ្នកជាប្រធានាធិបតី ចូររៀនអត់ធ្មត់”។

ការបញ្ជាក់របស់លោក ធ្វើឡើងបន្ទាប់ពីក្រុមប្រឆាំងស៊ែប៊ី បានធ្វើការហែក្បួនជាលើកទីប្រាំ ក្នុងទីក្រុងបែលក្រាដ កាលពីថ្ងៃសៅរ៍។ ទោះបីជាមិនមានទិន្នន័យផ្លូវការអំពីចំនួនអ្នកចូលរួមក៏ដោយ ប៉ុន្តែប្រព័ន្ធផ្សព្វផ្សាយរបស់គណបក្សប្រឆាំង បានដាក់តួលេខអ្នកចូលរួមជាង ១០០០០នាក់។

កាលពីថ្ងៃទី២៦ខែឧសភា ការជួបជុំទ្រង់ទ្រាយធំបំផុតដើម្បីគាំទ្រលោក Vucic និងរដ្ឋាភិបាល បានធ្វើឡើងនៅក្នុងរដ្ឋធានីស៊ែប៊ី ដោយមានការចូលរួមជាផ្លូវការពីមនុស្ស ២០ម៉ឺននាក់។ នៅថ្ងៃបន្ទាប់ លោកប្រធានាធិបតី បានប្រកាសថាលោកនឹងចុះចេញពីតំណែង ជាមេដឹកនាំនៃគណបក្សរីកចម្រើនស៊ែប៊ី ដែលកំពុងកាន់អំណាច ហើយស្នើឲ្យឧបនាយករដ្ឋមន្ត្រី Milos Vucevic ចូលជាអ្នកជំនួសតំណែងរបស់គាត់។

ដោយឡែក កាលពីដើមខែឧសភា លោក Vucic និយាយថា សេវាកម្មពិសេសនៃប្រទេសជាមិត្តមកពីតំបន់បូព៌ា បានព្រមានលោកអំពីការប៉ុនប៉ងធ្វើបដិវត្តន៍ពណ៌នៅក្នុងប្រទេស។ លោក Vucic ក៏បាននិយាយផងដែរថា ប្រទេសស៊ែប៊ី នឹងរក្សាគោលនយោបាយការបរទេសឯករាជ្យ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ស៊ែប៊ី ព្រមានឲ្យគ្រប់គ្នា ត្រៀមខ្លួនសម្រាប់សង្រ្គាម

The post ប្រធានាធិបតីស៊ែប៊ី រងការគំរាមសម្លាប់ មួយថ្ងៃមិនតិចជាង ២០០ដង appeared first on Kampuchea Thmey Daily.

ស៊ែប៊ី ព្រមានឲ្យគ្រប់គ្នា ត្រៀមខ្លួនសម្រាប់សង្រ្គាម (មានវីដេអូ)

Sok Sovann — Wed, 22 Feb 2023 02:23:28 +0000

ប្រធានាធិបតីស៊ែប៊ីលោក Aleksandar Vucic បាននិយាយកាលពីថ្ងៃអង្គារទី២១ខែកុម្ភៈថា ឧស្សាហកម្មយោធារបស់ប្រទេសស៊ែប៊ី បានបង្កើនការផលិតសព្វាវុធ និងគ្រាប់រំសេវ ដើម្បីបំពេញតម្រូវការដែលកំពុងកើនឡើងយ៉ាងគំហុក ដោយសារតែជម្លោះនៅក្នុងប្រទេសអ៊ុយក្រែន។

ប្រធានាធិបតីស៊ែប៊ីលោក Aleksandar Vucic ទស្សនាការតាំងពិព័រណ៍អាវុធនៅ អារ៉ាប់រួម

អំឡុងពេលទៅទស្សនាពិព័រណ៍អាវុធ IDEX នៅប្រទេសអារ៉ាប់រួម លោក Vucic និយាយថា ពិភពលោកកំពុងរៀបចំសម្រាប់សង្គ្រាម។ មនុស្សគ្រប់រូបត្រូវការគ្រាប់រំសេវ។ អ្នករាល់គ្នាកំពុងទិញអ្វីគ្រប់យ៉ាង អ្វីដែលយើងអាចធ្វើបានគឺការលក់អាវុធ។

ប្រធានាធិបតីស៊ែប៊ីបានបន្ថែមថា តម្រូវការសម្រាប់របស់នានា ដូចជាគ្រាប់រ៉ុកកែតសម្រាប់ប្រព័ន្ធបាញ់បង្ហោះពហុមុខងារ “Grad” គឺបានកើនឡើង៧០%។ លោកកត់សម្គាល់ថា ទីក្រុង Belgrade កំពុងព្យាយាមពង្រីកការផលិតគ្រាប់រំសេវមួយចំនួនរបស់ខ្លួន។ គ្រាប់រំសេវលក់ដូចជានំខេកអ៊ីចឹង។

ប្រធានាធិបតីស៊ែប៊ីលោក Aleksandar Vucic

យោងតាមលោក Vucic, រុស្ស៊ីប្រើប្រាស់រហូតដល់ទៅ ៣៥០០០ គ្រាប់ក្នុងមួយថ្ងៃ ហើយអ៊ុយក្រែនប្រហែល ១៦០០០គ្រាប់។ ប្រទេសស៊ែប៊ី ក៏កំពុងព្យាយាមទុកគ្រាប់សម្រាប់ប្រើខ្លួនឯងដែរ។

លោកអះអាងថា “យើងត្រូវតែគិតជាចម្បងដល់កងទ័ព និងប្រទេសរបស់យើង។ យ៉ាងហោចណាស់ ៣០% នៃអ្វីគ្រប់យ៉ាងដែលផលិតនៅក្នុងប្រទេសស៊ែប៊ី គឺត្រូវតែទុកនៅក្នុងប្រទេសស៊ែប៊ី។ យើងអាចលក់តែអ្វីដែលយើងអាចចែកចាយបានប៉ុណ្ណោះ។ មនុស្សគ្រប់គ្នាចង់ប្រយុទ្ធ គ្រប់គ្នាត្រូវតែត្រៀមខ្លួនសម្រាប់សង្គ្រាម”។

គួរបញ្ជាក់ថា ការតាំងពិព័រណ៍ការពារជាតិពិភពលោក IDEX 2023 ដែលប្រារព្ធឡើងនៅទីក្រុង Abu Dhabi គឺជាពិព័រណ៍អាវុធដ៏ធំបំផុតមួយលើពិភពលោក។ ព្រឹត្តិការណ៍សប្តាហ៍នេះមានក្រុមហ៊ុនចូលរួមចំនួន១៣៥០ មកពី៦៥ប្រទេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ស៊ែប៊ី ថា ជម្លោះ នៅ អ៊ុយក្រែន គឺ ជា សង្រ្គាម លោក ដែលបស្ចិមប្រទេស កំពុង ប្រយុទ្ធ នឹង រុស្ស៊ី

The post ស៊ែប៊ី ព្រមានឲ្យគ្រប់គ្នា ត្រៀមខ្លួនសម្រាប់សង្រ្គាម (មានវីដេអូ) appeared first on Kampuchea Thmey Daily.

ស៊ែប៊ី បញ្ជាយោធាបាញ់ទម្លាក់យន្តហោះដ្រូនរបស់សត្រូវ ដែលហ៊ានចូលក្នុងដែនអាកាសខ្លួន

Sok Chivon — Wed, 02 Nov 2022 05:14:48 +0000

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា ប្រធានាធិបតីស៊ែប៊ី លោក Aleksandar Vucic បានចេញបញ្ជាដល់យោធាកាលពីថ្ងៃអង្គារ ឲ្យកម្ទេចយន្តហោះគ្មានមនុស្សបើក (ដ្រូន) របស់សត្រូវណាមួយ ដែលហ៊ានចូលក្នុងដែនអាកាសរបស់ខ្លួន ក្រោយប្រទះឃើញយាន UAV កំពុងថតមូលដ្ឋានយោធានៅលើតំបន់ជាប់ព្រំដែនកូសូវ៉ូ ។

ពាក់ព័ន្ធនឹងបញ្ហានេះដែរ នាយករដ្ឋមន្ត្រីលោកស្រី Ana Brnabic បានថ្លែងទៅកាន់វិទ្យុ និងទូរទស្សន៍របស់ប្រទេសស៊ែប៊ីថា “ពិតណាស់ យន្តហោះដ្រូនបានថតទីតាំងមួយនៅក្នុងតំបន់សុវត្ថិភាពដីគោក និងបន្ទាយទាហានរបស់យើងចំនួន ២ ទីតាំង” ។

លោកស្រីបញ្ជាក់ថា “ក្រោយមកលោកប្រធានាធិបតី និងជាមេបញ្ជាការកំពូលនៃយោធាស៊ែប៊ី បានបញ្ជាឲ្យបង្កើនការការពារនៅលើដែនអាកាស ជាពិសេសគឺការបាញ់ទម្លាក់យន្តហោះដ្រូនពីការចូលក្នុងទឹកដីណាមួយរបស់យើង ព្រោះនេះគឺជាសុវត្ថិភាពរបស់ប្រទេសស៊ែប៊ីនៅកូសូវ៉ូ” ។

ការណែនាំចុងក្រោយរបស់លោក Vucic កើតឡើង បន្ទាប់ពីយន្តហោះចម្បាំង MiG-29 ត្រូវបានបញ្ជូនទៅការពារយន្តហោះដ្រូន UAVs ដែលប្រទះឃើញនៅពីលើមូលដ្ឋានយោធានៅជិតព្រំដែនជាមួយកូសូវ៉ូ ។

ទន្ទឹមនោះលោក Vucevic បាននិយាយផងដែរថា កងកម្លាំងប្រដាប់អាវុធរបស់ប្រទេសនេះ ស្ថិតក្នុងការប្រុងប្រយ័ត្ន ខណៈដែលភាពតានតឹងកើនឡើងជាមួយប្រទេសជិតខាងកូសូវ៉ូ ជុំវិញបញ្ហាស្លាកលេខរថយន្ត ។

លោកប្រធានាធិបតីបានប្រាប់ទូរទស្សន៍ Happy TV ថា យោធានឹងធ្វើអ្វីគ្រប់យ៉ាងដែលចាំបាច់ ដើម្បីការពារពលរដ្ឋស៊ែប៊ី រួមទាំងអ្នកដែលនៅកូសូវ៉ូផងដែរ ។

កូសូវ៉ូបានព្យាយាមជាច្រើនដងក្នុងឆ្នាំនេះ ដើម្បីធ្វើឲ្យជនជាតិភាគតិចស៊ែប៊ី បន្តស្លាកលេខរថយន្តរបស់ពួកគេ ដែលមានកាលបរិច្ឆេទមុនឆ្នាំ ១៩៩៩ នៅពេលដែលកូសូវ៉ូ ជាផ្នែកមួយនៃប្រទេសស៊ែប៊ី ខណៈទង្វើនេះបានបណ្តាលឲ្យមានការប៉ះទង្គិចគ្នាដោយហិង្សារវាងប៉ូលិស និងអ្នកស្រុកស៊ែប៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក បៃដិន ចោទក្រុមហ៊ុនប្រេងធំៗ កំពុងកើបលុយចំណេញពីសង្គ្រាម

The post ស៊ែប៊ី បញ្ជាយោធាបាញ់ទម្លាក់យន្តហោះដ្រូនរបស់សត្រូវ ដែលហ៊ានចូលក្នុងដែនអាកាសខ្លួន appeared first on Kampuchea Thmey Daily.

ស៊ែប៊ី ថា ជម្លោះនៅ អ៊ុយក្រែន គឺជាសង្រ្គាមលោកដែលបស្ចិមប្រទេស កំពុងប្រយុទ្ធនឹង រុស្ស៊ី

Sok Sovann — Thu, 14 Jul 2022 08:23:42 +0000

ប្រធានាធិបតីស៊ែប៊ី លោក Aleksandar Vucic បាននិយាយកាលពីថ្ងៃពុធទី១៣ខែកក្កដាថា ជម្លោះនៅអ៊ុយក្រែន គឺជាសង្គ្រាមលោក ដែលបស្ចិមប្រទេស កំពុងប្រយុទ្ធជាមួយរុស្ស៊ី តាមរយៈទាហានអ៊ុយក្រែន។

ប្រធានាធិបតីស៊ែប៊ី លោក Aleksandar Vucic

លោកបាននិយាយនៅក្នុងបទសម្ភាសន៍ជាមួយទូរទស្សន៍ Pink ថា “យើងគួរតែយល់ថា ចំពេលមានសង្រ្គាមពិភពលោក កិច្ចពិភាក្សាទាំងអស់មិនថាជាតំបន់ ឬសង្រ្គាមក្នុងតំបន់ទេ គឺត្រូវបានគេទម្លាក់ចោល។ លោកខាងលិចទាំងមូល កំពុងប្រយុទ្ធប្រឆាំងនឹងរុស្ស៊ីតាមរយៈអ៊ុយក្រែន”។

បើតាមសម្តីមេដឹកនាំស៊ែប៊ីរូបនេះ, ស្ថានភាពនៅអ៊ុយក្រែន ក៏កំពុងប្រាប់អំពីស្ថានភាពនៅតំបន់បាល់កង់ផងដែរ។ យ៉ាងណាក៏ដោយ លោកបានប្ដេជ្ញាថា ប្រទេសស៊ែប៊ីនឹងខិតខំប្រឹងប្រែងដើម្បីរក្សាសន្តិភាពក្នុងតំបន់។

គួរបញ្ជាក់ជាថ្មីថា កាលពីថ្ងៃទី២៤ ខែកុម្ភៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសប្រតិបត្តិការយោធាពិសេសមួយ ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass។

លោកបានសង្កត់ធ្ងន់ថា ទីក្រុងមូស្គូមិនមានផែនការកាន់កាប់ទឹកដីអ៊ុយក្រែនទេ ប៉ុន្តែមានគោលបំណងធ្វើឲ្យគ្មានយោធា និងលុបបំបាត់លទ្ធិណាស៊ីនិយមក្នុងប្រទេសនេះ។ ក្រោយមក បណ្តាប្រទេសលោកខាងលិច បានដាក់ទណ្ឌកម្មយ៉ាងតឹងរ៉ឹងប្រឆាំងនឹងរុស្ស៊ី៕

ប្រែសម្រួល៖ Vann Vann

ប្រភព៖ TASS

ចុចអាន៖ លីទុយអានី ប្រកាសអនុញ្ញាតឲ្យទំនិញជាប់ទណ្ឌកម្មរបស់រុស្ស៊ី ឆ្លងកាត់ទៅតំបន់ Kaliningrad

The post ស៊ែប៊ី ថា ជម្លោះនៅ អ៊ុយក្រែន គឺជាសង្រ្គាមលោកដែលបស្ចិមប្រទេស កំពុងប្រយុទ្ធនឹង រុស្ស៊ី appeared first on Kampuchea Thmey Daily.

លោក Aleksandar Vucic Archives - Kampuchea Thmey Daily

​ក្រុម​​អ្នកតវ៉ា​នៅស៊ែប៊ី​​នឹ​ងធ្វើ​ដំណើរ​៩០គីឡូម៉ែត្រ បង្កើន​ការ​ដាក់សម្ពាធ​​​លោក Vucic

​ក្រោម​សម្ពាធ​​តវ៉ា​ខ្លាំងពេក ប្រធានាធិបតីស៊ែប៊ី ប្រកាស​លើកលែងទោស​​​អ្នកតវ៉ា​

ប្រធានាធិបតី​ស៊ែប៊ី Vucic ចោទ​បស្ចឹមប្រទេស​​នៅ​ពីក្រោយ​បាតុកម្ម​និស្សិត​ទម្លាក់​លោក​

បាតុករ​ដឹកនាំដោយ​និស្សិត​​​​ស៊ែប៊ី ​ប្រែក្លាយ​​ជប់​លៀង​​ឆ្លងឆ្នាំ​ទៅ​ជាបាតុកម្ម​ទាមទារ​​យុត្តិធម៌​

ប្រធានាធិបតីស៊ែប៊ី រងការគំរាមសម្លាប់​ មួយថ្ងៃមិនតិចជាង ២០០ដង

ស៊ែប៊ី ព្រមានឲ្យគ្រប់គ្នា ត្រៀមខ្លួនសម្រាប់សង្រ្គាម (មានវីដេអូ)

ស៊ែប៊ី បញ្ជាយោធាបាញ់ទម្លាក់យន្តហោះដ្រូនរបស់សត្រូវ ដែលហ៊ានចូល​ក្នុងដែនអាកាសខ្លួន

​ស៊ែប៊ី​ ថា ជម្លោះ​នៅ ​អ៊ុយក្រែន គឺ​ជា​សង្រ្គាម​លោក​ដែលបស្ចិមប្រទេស ​កំពុង​ប្រយុទ្ធ​​នឹង ​រុស្ស៊ី

ក្រុមអ្នកតវ៉ានៅស៊ែប៊ីនឹងធ្វើដំណើរ៩០គីឡូម៉ែត្រ បង្កើនការដាក់សម្ពាធលោក Vucic

ក្រោមសម្ពាធតវ៉ាខ្លាំងពេក ប្រធានាធិបតីស៊ែប៊ី ប្រកាសលើកលែងទោសអ្នកតវ៉ា

ប្រធានាធិបតីស៊ែប៊ី Vucic ចោទបស្ចឹមប្រទេសនៅពីក្រោយបាតុកម្មនិស្សិតទម្លាក់លោក

បាតុករដឹកនាំដោយនិស្សិតស៊ែប៊ី ប្រែក្លាយជប់លៀងឆ្លងឆ្នាំទៅជាបាតុកម្មទាមទារយុត្តិធម៌

ប្រធានាធិបតីស៊ែប៊ី រងការគំរាមសម្លាប់ មួយថ្ងៃមិនតិចជាង ២០០ដង

ស៊ែប៊ី បញ្ជាយោធាបាញ់ទម្លាក់យន្តហោះដ្រូនរបស់សត្រូវ ដែលហ៊ានចូលក្នុងដែនអាកាសខ្លួន

ស៊ែប៊ី ថា ជម្លោះនៅ អ៊ុយក្រែន គឺជាសង្រ្គាមលោកដែលបស្ចិមប្រទេស កំពុងប្រយុទ្ធនឹង រុស្ស៊ី