លីទុយអានី ប្រកាសអនុញ្ញាតឲ្យទំនិញជាប់ទណ្ឌកម្មរបស់រុស្ស៊ី ឆ្លងកាត់ទៅតំបន់ Kaliningrad

សមាជិកសហភាពអឺរ៉ុប (EU) គឺប្រទេស លីទុយអានី នឹងអនុញ្ញាតឲ្យទំនិញដែលជាប់ទណ្ឌកម្មរបស់រុស្ស៊ី ឆ្លងកាត់ទឹកដីរបស់ខ្លួន តាមផ្លូវឆ្ពោះទៅកាន់តំបន់ Kaliningrad។

នេះបញ្ជាក់ពីការផ្លាស់ប្តូរគោលនយោបាយរបស់ខ្លួន បន្ទាប់ពីមានការណែនាំថ្មីដោយគណៈកម្មការអឺរ៉ុប។

គោលការណ៍ណែនាំថ្មីកាលពីថ្ងៃពុធទី១៣ខែកក្កដា បានធ្វើឡើង បន្ទាប់ពីមានភាពតានតឹងរយៈពេលជាច្រើនសប្តាហ៍រវាងទីក្រុងមូស្គូ លីទុយអានី និង EU ពាក់ព័ន្ធការអនុវត្តទណ្ឌកម្ម លើប្រទេសរុស្ស៊ី។

តំបន់ Kaliningrad ដែលមានព្រំប្រទល់ជាប់នឹងរដ្ឋ EU ហើយពឹងផ្អែកលើផ្លូវដែក និងផ្លូវថ្នល់ឆ្លងកាត់ប្រទេសលីទុយអានីសម្រាប់ទំនិញភាគច្រើន គឺបានកាត់ផ្តាច់ការដឹកជញ្ជូនទំនិញពីរុស្ស៊ីដីគោក ចាប់តាំងពីថ្ងៃទី១៧ខែមិថុនាមក ក្រោមទណ្ឌកម្មដែលដាក់ដោយទីក្រុងព្រុចសែល។

ទណ្ឌកម្ម​ត្រូវ​បាន​រៀបចំ​ឡើង ​ដើម្បី​រារាំង​ការ​នាំចូល​ផលិតផល​រុស្ស៊ី​មួយ​ចំនួន​ដូចជា ​វ៉ូដកា និង​ដែក ទៅក្នុង EU។

មុននេះ ទីក្រុងមូស្គូនិយាយថា ការរឹតបន្តឹងការដឹកជញ្ជូនទំនិញពីប្រទេសរុស្ស៊ីទៅ Kaliningrad គឺជាការបិទផ្លូវខុសច្បាប់។ យ៉ាងណាក្តី លីទុយអានី និយាយថា ខ្លួនគ្មានជម្រើសអ្វីក្រៅពីការអនុវត្តច្បាប់ដែលកំណត់ដោយទីក្រុងព្រុចសែល នោះទេ។

ទន្ទឹមនោះ អភិបាលតំបន់ Kaliningrad លោក Anton Alikhanov បានសរសេរនៅលើ Telegram ថា គោលការណ៍ណែនាំថ្មីនេះ គឺគ្រាន់តែជាជំហានដំបូងប៉ុណ្ណោះ ដែលយើងត្រូវការដើម្បីដោះស្រាយភាពជាប់គាំង។ យើងនឹងបន្តធ្វើការឆ្ពោះ ទៅរកការដកការរឹតបន្តឹងទាំងស្រុង។

សេចក្តីណែនាំដែលចេញផ្សាយកាលពីថ្ងៃពុធបាននិយាយថា ទណ្ឌកម្មពាណិជ្ជកម្ម មិនគួរអនុវត្តចំពោះការដឹកជញ្ជូនរវាងប្រទេសរុស្ស៊ី និងតំបន់ Kaliningrad របស់ខ្លួនទេ ដរាបណាបរិមាណមិនលើសពីកម្រិតមធ្យមរបស់ពួកគេ ក្នុងរយៈពេលបីឆ្នាំចុងក្រោយនេះ។

ទោះបីជាយ៉ាងណាក៏ដោយ ការដឹកជញ្ជូនទំនិញយោធា និងបច្ចេកវិទ្យាដែលជាប់ទណ្ឌកម្មនៅតែត្រូវបានហាមឃាត់យ៉ាងពេញទំហឹង៕

ប្រែសម្រួល៖ Vann Vann

ប្រភព៖ Reuters

ចុចអាន៖ អាមេរិក គំរាមរុស្ស៊ី បើហ៊ានវាយប្រហារ លីទុយអានី