លោក Mark Rutte Archives - Kampuchea Thmey Daily

មេណាតូ គាំទ្រលោកត្រាំ ដែលមិនប្រគល់មីស៊ីល Tomahawk ឲ្យអ៊ុយក្រែន

Chheang — Thu, 23 Oct 2025 06:58:43 +0000

អគ្គលេខាធិការអង្គការណាតូលោក ម៉ាក រូតេ បានគាំទ្រការសម្រេចចិត្តរបស់ប្រធានាធិបតីអាមេរិក ដូណាល់ ត្រាំ ដែលមិនផ្តល់ឲ្យអ៊ុយក្រែននូវមីស៊ីលគ្រូស Tomahawk ដោយនិយាយថា ចំណាត់ការនេះគឺ «ត្រឹមត្រូវណាស់»។

លោក ដូណាល់ ត្រាំ និងលោក ម៉ាក រូតេ (រូបថត៖ Reuters)

ថ្លែងទៅកាន់ CNN បន្ទាប់ពីជួបលោកត្រាំនៅសេតវិមានកាលពីថ្ងៃពុធទី២២ខែតុលា លោករូតេ បានពន្យល់ថា ភាពស្មុគស្មាញនៃប្រព័ន្ធនេះ ធ្វើឲ្យវាមិនអាចអនុវត្តបានសម្រាប់អ៊ុយក្រែនក្នុងរយៈពេលខ្លីទេ។ លោកបាននិយាយថា «វាត្រូវចំណាយពេលរាប់ខែសម្រាប់អ្នកផ្សេងក្រៅពីទាហានអាមេរិក ដើម្បីទទួលបានការហ្វឹកហ្វឺនលើពួកវា។ វាមិនមែនថាប្រសិនបើអ្នកសម្រេចចិត្តថ្ងៃនេះ ប្រជាជនអ៊ុយក្រែនអាចប្រើប្រាស់វានៅថ្ងៃស្អែកទេ»។

លោកត្រាំ បានប្រាប់អ្នកយកព័ត៌មានថា Tomahawk ត្រូវការរយៈពេលប្រហែលមួយឆ្នាំនៃ«ការហ្វឹកហ្វឺនខ្លាំង» ដោយហៅវាថាជា«អាវុធដ៏មានអានុភាព និងច្បាស់លាស់» ដែល«ស្មុគ្រស្មាញពេក»ក្នុងការប្រគល់ឲ្យអ៊ុយក្រែននៅពេលនេះ។

លោករូតេ បានលើកឡើងថា ទាំងលោក និងលោកត្រាំ បានយល់ព្រមលើការរក្សា«សម្ពាធជានិរន្តរភាព»លើសេដ្ឋកិច្ចរបស់រុស្ស៊ី ដោយបន្ថែមថា ការលំបាករបស់ទីក្រុងមូស្គូកាន់តែឃើញច្បាស់ហើយ។ លោករូតេ បានកត់សម្គាល់ថា «នៅពេលដែលលោកពូទីនមានអារម្មណ៍ថាអ្វីៗកំពុងផ្លាស់ទីក្នុងទិសដៅខុស គាត់នឹងចាប់ផ្តើមមានប្រតិកម្ម។ ប្រជាជនរុស្ស៊ី និងសេដ្ឋកិច្ចមិនដំណើរការល្អទេ»។

ការអត្ថាធិប្បាយនេះ បានកើតឡើងខណៈដែលក្រសួងរតនាគារអាមេរិកបានដាក់ទណ្ឌកម្មថ្មីលើក្រុមហ៊ុនប្រេងយក្សរុស្ស៊ី Rosneft និង Lukoil។ វិធានការនេះ បានធ្វើតាមការសម្រេចចិត្តរបស់លោកត្រាំ ក្នុងការលុបចោលកិច្ចប្រជុំលើកទីពីរដែលបានគ្រោងទុកជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន នៅទីក្រុងប៊ុយដាប៉ែសនៃប្រទេសហុងគ្រី ដោយលើកហេតុផលថា លោកមិនចង់«ខ្ជះខ្ជាយពេលវេលា»៕

ដោយ៖ ឈាង

ពូទីនចេញបញ្ជាឲ្យធ្វើសមយុទ្ធនុយក្លេអ៊ែរ ក្រោយត្រាំពន្យារពេលកិច្ចប្រជុំកំពូលស្ដីពីអ៊ុយក្រែន

The post មេណាតូ គាំទ្រលោកត្រាំ ដែលមិនប្រគល់មីស៊ីល Tomahawk ឲ្យអ៊ុយក្រែន appeared first on Kampuchea Thmey Daily.

ប្រមុខណាតូ ព្រមានថា បទឈប់បាញ់នៅអ៊ុយក្រែនគ្រាន់តែជាការទុកពេលឲ្យរុស្ស៊ីពង្រឹងយោធាប៉ុណ្ណោះ

Chheang — Wed, 11 Jun 2025 08:06:03 +0000

អគ្គលេខាធិការអង្គការណាតូ លោក ម៉ាក រូតេ បានព្រមានថា បទឈប់បាញ់ដែលអូសបន្លាយក្នុងប្រទេសអ៊ុយក្រែន អាចធ្វើឲ្យរុស្ស៊ីមានពេលពង្រីកឃ្លាំងអាវុធរបស់ខ្លួន ដែលបង្កើនហានិភ័យកាន់តែខ្លាំងសម្រាប់សម្ព័ន្ធមិត្តទាំងមូល។

លោក ម៉ាក រ៉ូតេ (រូបថត៖ Reuters)

យោងតាមការចុះផ្សាយរបស់សារព័ត៌មាន Ukrainska Pravda កាលពីថ្ងៃទី១០ខែមិថុនា លោក រូតេ បាននិយាយថា បទឈប់បាញ់ណាមួយក្នុងសង្គ្រាម នឹងគ្រាន់តែផ្តល់ឱកាសដល់ទីក្រុងមូស្គូ ក្នុងការកសាងឡើងវិញនូវសមត្ថភាពយោធារបស់ខ្លួន ដូចជា កាំភ្លើងធំ យន្តហោះគ្មានមនុស្សបើក និងមីស៊ីល ជាដើម។ លោកបានសង្កត់ធ្ងន់ថា នេះអាចបង្កើនហានិភ័យសម្រាប់រដ្ឋជាសមាជិកអង្គការណាតូនៅពេលអនាគត។

ប្រមុខណាតូរូបនេះ បានរៀបរាប់ថា «សូម្បីតែឥឡូវនេះ រុស្ស៊ីកំពុងគ្រប់គ្រងការបង្កើនស្តុករបស់ខ្លួនខ្លះៗហើយ។ សាកស្រមៃមើលថា តើវាអាចធ្វើអ្វីបានខ្លះនៅក្នុងអំឡុងពេលបទឈប់បាញ់»។ លោកបានព្រមានថា បទឈប់បាញ់ដែលគាំទ្រការចំណេញរបស់រុស្ស៊ីគឺមិនមែនជាសន្តិភាពទេ វាជាគ្រាប់បែកកំណត់ម៉ោង។

សេចក្ដីថ្លែងការណ៍នេះ មិនបានន័យថា លោក រូតេ ប្រឆាំងនឹងការបញ្ចប់សង្គ្រាមនៅអ៊ុយក្រែនឡើយ ប៉ុន្តែលោកជំទាស់នឹងបទឈប់បាញ់ដែលអូសបន្លាយ ដោយគ្មានកិច្ចព្រមព្រៀងបញ្ចប់សង្គ្រាមពិតប្រាកដ ដើម្បីធានាបាននូវអធិបតេយ្យភាព ឬសន្តិសុខយូរអង្វែងសម្រាប់ទីក្រុងកៀវ ក៏ដូចជាអឺរ៉ុបទាំងមូល។

ទន្ទឹមនោះ លោក រូតេ បានសង្កត់ធ្ងន់ថា រុស្ស៊ីកំពុងផលិតគ្រាប់រំសេវក្នុងល្បឿនដ៏លឿនមួយ ដែលលើសពីចំនួនរបស់អង្គការណាតូទៅទៀត ដោយអះអាងថា ទីក្រុងមូស្គូចាយពេលផលិតតែ៣ខែប៉ុណ្ណោះ ដែលសម្ព័ន្ធភាពទាំងមូលផលិតក្នុងពេល១ឆ្នាំពេញ។ លោកបានបន្ថែមថា បើគ្មានវិធានការបន្ទាន់ទេ រុស្ស៊ីអាចត្រៀមខ្លួនជាស្រេចក្នុងការវាយប្រហារប្រឆាំងអង្គការណាតូក្នុងរយៈពេល ៥ឆ្នាំខាងមុខ៕

ដោយ៖ ឈាង

ចុចអាន៖ បីប្រទេសប៉ុណ្ណោះក្នុងអង្គការណាតូ ដែលមានក្បាលគ្រាប់នុយក្លេអ៊ែរសរុបជាង ៥ ៧០០គ្រាប់

The post ប្រមុខណាតូ ព្រមានថា បទឈប់បាញ់នៅអ៊ុយក្រែនគ្រាន់តែជាការទុកពេលឲ្យរុស្ស៊ីពង្រឹងយោធាប៉ុណ្ណោះ appeared first on Kampuchea Thmey Daily.

លោក Rutte៖ រុស្ស៊ីផលិតគ្រាប់រំសេវតែ៣ខែ ស្មើនឹងណាតូទាំងមូលផលិតក្នុង១ឆ្នាំ

Chheang — Tue, 10 Jun 2025 07:54:22 +0000

អគ្គលេខាធិការអង្គការណាតូ លោក Mark Rutte បានព្រមានថា រុស្ស៊ីកំពុងផលិតគ្រាប់រំសេវក្នុងល្បឿនដ៏លឿនមួយ ដែលលើសពីចំនួនរបស់អង្គការណាតូទៅទៀត ដោយអះអាងថា ទីក្រុងមូស្គូចាយពេលផលិតតែ៣ខែប៉ុណ្ណោះ ដែលសម្ព័ន្ធភាពទាំងមូលផលិតក្នុងពេល១ឆ្នាំពេញ។

លោក Mark Rutte (រូបថត៖ Getty)

ថ្លែងចេញពីវិទ្យាស្ថាន Chatham House នៃទីក្រុងឡុងដ៍កាលពីថ្ងៃទី៩ខែមិថុនា លោក Rutte បានឲ្យដឹងថា ការផលិតសព្វាវុធរបស់រុស្ស៊ី បានបង្កើនល្បឿនដល់កម្រិតដែលមិនធ្លាប់ឃើញចាប់តាំងពីសង្គ្រាមត្រជាក់មក។ យោងតាមការប៉ាន់ប្រមាណដែលចែករំលែកដោយមន្ត្រីណាតូ រុស្ស៊ីកំពុងរៀបចំផលិតរថក្រោះចំនួន ១ ៥០០គ្រឿង រថពាសដែក ៣ ០០០គ្រឿង និងមីស៊ីលទំនើប Iskander ២០០គ្រាប់នៅឆ្នាំ២០២៥នេះ ដែលភាគច្រើនដើម្បីទ្រទ្រង់សង្រ្គាមដែលកំពុងបន្តនៅក្នុងប្រទេសអ៊ុយក្រែន។

លោក Rutte បាននិយាយថា «សមត្ថភាពអាវុធសង្គ្រាមរបស់ (មេដឹកនាំរុស្ស៊ី វ្ល៉ាឌីមៀរ) ពូទីន កំពុងតែបង្កើនល្បឿន មិនមែនថមថយល្បឿននោះឡើយ។ រុស្ស៊ីកំពុងបង្កើតកងកម្លាំងរបស់ខ្លួនឡើងវិញ ដោយបច្ចេកវិទ្យាចិន ហើយផលិតសព្វាវុធបានលឿនជាងការគិតរបស់យើងទៅទៀត»។

លោក Rutte បានសង្កត់ធ្ងន់ថា ការកើនឡើងនេះកំពុងត្រូវបានគាំទ្រ ដោយការបង្កើនកិច្ចសហប្រតិបត្តិការរវាងរុស្ស៊ី និងបណ្ដាសម្ព័ន្ធមិត្តរបស់ខ្លួន ដូចជា អ៊ីរ៉ង់ កូរ៉េខាងជើង និងចិន។ លោកបានអំពាវនាវឲ្យសមាជិកណាតូ បង្កើនទំហំឧស្សាហកម្មការពារជាតិរបស់ពួកគេជាបន្ទាន់ និងបង្កើនការចំណាយយោធា ដើម្បីឆ្លើយតបទៅនឹងការគំរាមកំហែងដែលកំពុងតែកើនឡើងនេះ។

លោក Rutte បានបញ្ជាក់ថា «យើងត្រូវតែត្រៀមខ្លួន» មិនត្រឹមតែសម្រាប់បញ្ហាប្រឈមនាពេលបច្ចុប្បន្នប៉ុណ្ណោះទេ ប៉ុន្តែសម្រាប់អ្វីដែលអាចនឹងកើតឡើងក្នុងរយៈពេល ៥ឆ្នាំខាងមុខ។ រុស្ស៊ីមិនមែនគ្រាន់តែរៀបចំសម្រាប់អ៊ុយក្រែនប៉ុណ្ណោះទេ គឺកំពុងរៀបចំសម្រាប់អ្វីដែលធំជាងនេះទៅទៀត។

ការកត់សម្គាល់នេះ កើតឡើងចំពេលមានសម្ពាធកាន់តែខ្លាំងឡើងនៅក្នុងអង្គការណាតូក្នុងការបង្កើនគោលដៅចំណាយលើវិស័យការពារជាតិ និងបង្កើនសមត្ថភាពផលិតអាវុធនៅទូទាំងអឺរ៉ុប និងអាមេរិកខាងជើង។ ក្រុមមេដឹកនាំរដ្ឋជាសមាជិកណាតូ ត្រូវបានគេរំពឹងថានឹងដោះស្រាយកង្វល់ទាំងនេះនៅក្នុងកិច្ចប្រជុំកំពូលនាថ្ងៃទី២៤-២៥ខែមិថុនាខាងមុខ៕

ដោយ៖ ឈាង

ចុចអាន៖ ប្រមុខណាតូ អំពាវនាវឲ្យសមាជិកបង្កើនចំណាយ៤០០%លើវិស័យការពារអាកាស និងមីស៊ីល

The post លោក Rutte៖ រុស្ស៊ីផលិតគ្រាប់រំសេវតែ៣ខែ ស្មើនឹងណាតូទាំងមូលផលិតក្នុង១ឆ្នាំ appeared first on Kampuchea Thmey Daily.

លោក Mark Rutte Archives - Kampuchea Thmey Daily

មេណាតូ គាំទ្រលោកត្រាំ ដែល​មិន​ប្រគល់​មីស៊ីល Tomahawk ឲ្យអ៊ុយក្រែន

លោក Rutte៖ រុស្ស៊ី​ផលិត​គ្រាប់​រំសេវ​តែ​៣ខែ ស្មើ​នឹង​ណាតូ​ទាំង​មូល​ផលិត​ក្នុង​១ឆ្នាំ

មេណាតូ គាំទ្រលោកត្រាំ ដែលមិនប្រគល់មីស៊ីល Tomahawk ឲ្យអ៊ុយក្រែន

លោក Rutte៖ រុស្ស៊ីផលិតគ្រាប់រំសេវតែ៣ខែ ស្មើនឹងណាតូទាំងមូលផលិតក្នុង១ឆ្នាំ