ព័ត៌មានអន្ដរជាតិ

ពូទីនចេញបញ្ជាឲ្យធ្វើសមយុទ្ធនុយក្លេអ៊ែរ ក្រោយត្រាំពន្យារពេលកិច្ចប្រជុំកំពូលស្ដីពីអ៊ុយក្រែន

បានផុស

៦ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

Chheang

ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃពុធទី២២ខែតុលាឆ្នាំ២០២៥ បានចេញបញ្ជាឲ្យរៀបចំសមយុទ្ធនុយក្លេអ៊ែរជាយុទ្ធសាស្ត្រទ្រង់ទ្រាយធំ ពាក់ព័ន្ធនឹងការបាញ់សាកល្បងមីស៊ីលបាលិស្ទិកអន្តរទ្វីប ត្រឹមតែប៉ុន្មានម៉ោងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសពន្យារពេលផែនការកិច្ចប្រជុំកំពូលសន្តិភាពអ៊ុយក្រែន នៅទីក្រុងប៊ុយដាប៉ែស។ នេះបើយោងតាមការចុះផ្សាយរបស់ទីភ្នាក់ងារព័ត៍មាន AP។

វិមានក្រឹមឡាំង បាននិយាយថា សមយុទ្ធនេះបានសាកល្បងសមាសធាតុទាំងអស់នៃនុយក្លេអ៊ែររបស់រុស្ស៊ី រួមទាំងប្រព័ន្ធនៅលើដី សមុទ្រ និងផ្លូវអាកាស។ មីស៊ីល Yars ICBM មួយគ្រាប់ ត្រូវបានបាញ់ចេញពីទីលានបាញ់បង្ហោះ Plesetsk នៅភាគពាយព្យនៃប្រទេសរុស្ស៊ី ខណៈដែលមីស៊ីលមួយគ្រាប់ទៀត Sineva ត្រូវបានបាញ់ចេញពីនាវាមុជទឹកនៅសមុទ្រ Barents។ យន្តហោះទម្លាក់គ្រាប់បែកយុទ្ធសាស្ត្រ Tu-95 ក៏បានបាញ់មីស៊ីលរយៈចម្ងាយឆ្ងាយផងដែរ អំឡុងពេលធ្វើសមយុទ្ធ។

សមយុទ្ធនេះមានគោលបំណងសាកល្បង«នីតិវិធីសម្រាប់ការអនុញ្ញាតឲ្យប្រើប្រាស់អាវុធនុយក្លេអ៊ែរ»។ នេះបើយោងតាមការលើកឡើងរបស់លោក Valery Gerasimov ប្រធានអគ្គសេនាធិការរុស្ស៊ី ដែលថ្លែងទៅលោកពូទីនតាមរយៈវីដេអូខល។

ខណៈពេលដែលវិមានក្រឹមឡាំងបានប្រាប់ថា សមយុទ្ធត្រូវបានកំណត់ទុកជាមុន តែវាបានទាក់ទាញការចាប់អារម្មណ៍នៅពេលដែលសមយុទ្ធទាំងនេះគាប់ជួនរៀបចំ បន្ទាប់ពីលោកត្រាំបាននិយាយថា លោកកំពុងពន្យារពេលកិច្ចប្រជុំជាមួយលោកពូទីន ដែលដំបូងឡើយគ្រោងធ្វើនៅទីក្រុងប៊ុយដាប៉ែសនៃប្រទេសហុងគ្រី ដោយលើកហេតុផលថា លោកមិនចង់«ខ្ជះខ្ជាយពេលវេលា»។

ការសម្រេចចិត្តរបស់លោកត្រាំ បានធ្វើឡើងបន្ទាប់ពីមានជំនួបតាមទូរសព្ទកាលពីថ្ងៃចន្ទរវាងរដ្ឋមន្ត្រីការបរទេសអាមេរិក Marco Rubio និងសមភាគីរុស្ស៊ី Sergey Lavrov ដោយក្នុងអំឡុងពេលនោះលោក Lavrov បានរំលឹកឡើងវិញនូវការប្រឆាំងរបស់ទីក្រុងមូស្គូចំពោះបទឈប់បាញ់ភ្លាមៗនៅអ៊ុយក្រែន។

យ៉ាងណាមិញ អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃពុធថា កិច្ចប្រជុំកំពូលនៅតែអាចធ្វើទៅបាន ប៉ុន្តែនឹងត្រូវការ«ការរៀបចំឲ្យបានហ្មត់ចត់»។

លោក Peskov បានរៀបរាប់ថា «គ្មាននរណាម្នាក់ចង់ខ្ជះខ្ជាយពេលវេលាទេ ទាំងប្រធានាធិបតីត្រាំ និងប្រធានាធិបតីពូទីន។ អ្នកទាំងពីរធ្លាប់ធ្វើការជាមួយគ្នាប្រកបដោយប្រសិទ្ធភាព ប៉ុន្តែប្រសិទ្ធភាពតែងតែទាមទារការរៀបចំ»។

សូមជម្រាបថា សមយុទ្ធនុយក្លេអ៊ែរនេះ ធ្វើឡើងនៅពេលដែលភាពតានតឹងនៅតែមានកម្រិតខ្ពស់លើការវាយលុកដែលកំពុងបន្តរបស់រុស្ស៊ីនៅភាគខាងកើតអ៊ុយក្រែន និងកិច្ចខិតខំប្រឹងប្រែងរបស់លោកខាងលិចក្នុងការពង្រឹងការការពាររបស់ទីក្រុងកៀវ។ ក្រុមអ្នកវិភាគលោកខាងលិចបានប្រាប់ថា ពេលវេលានៃសមយុទ្ធនេះបានធ្វើឡើងជាការរំលឹកពីសមត្ថភាពនុយក្លេអ៊ែររបស់រុស្ស៊ី ចំពេលមានភាពមិនច្បាស់លាស់ជាថ្មីក្នុងទំនាក់ទំនងការទូតអាមេរិក-រុស្ស៊ី៕