ព័ត៌មានអន្ដរជាតិ

បីប្រទេសប៉ុណ្ណោះក្នុងអង្គការណាតូ ដែលមានក្បាលគ្រាប់នុយក្លេអ៊ែរសរុបជាង ៥ ៧០០គ្រាប់

បានផុស

៤ ថ្ងៃ មុន

នៅ

ថ្ងៃអង្គារ ១០ មិថុនា ២០២៥

ដោយ

Chheang

នៅក្នុងចំណោមរដ្ឋជាសមាជិកទាំង៣២របស់អង្គការណាតូ មានតែប្រទេសចំនួន៣ប៉ុណ្ណោះ ដែលមានអាវុធនុយក្លេអ៊ែរជាផ្លូវការ ដោយនោះគឺ សហរដ្ឋអាមេរិក ចក្រភពអង់គ្លេស និងបារាំង។ យោងតាមរបាយការណ៍ពីអង្គការ FAS (Federation of American Scientists) ក្បាលគ្រាប់នុយក្លេអ៊ែរសរុបរបស់សមាជិកណាតូទាំង៣ប្រទេស មានប្រហែល ៥ ៧១៥គ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាមេរិក អង់គ្លេស និងបារាំង ត្រូវបានទទួលស្គាល់ថាជារដ្ឋប្រដាប់អាវុធនុយក្លេអ៊ែរក្រោមសន្ធិសញ្ញាស្តីពីការមិនរីកសាយភាយនៃអាវុធនុយក្លេអ៊ែរ (NPT) និងរក្សាឃ្លាំងអាវុធរបស់ពួកគេដោយឯករាជ្យ ទោះបីជាពួកគេត្រូវបានបញ្ចូលទៅក្នុងយុទ្ធសាស្ត្រទប់ស្កាត់រួមរបស់អង្គការណាតូក៏ដោយ។

សហរដ្ឋអាមេរិក

សហរដ្ឋអាមេរិក មានឃ្លាំងអាវុធនុយក្លេអ៊ែរធំជាងគេក្នុងចំណោមសមាជិកណាតូ ហើយដើរតួនាទីយ៉ាងសំខាន់បំផុតនៅក្នុងជំហរនុយក្លេអ៊ែររបស់សម្ព័ន្ធមិត្ត។ ក្បាលគ្រាប់នុយក្លេអ៊ែរសរុបរបស់អាមេរិក មានប្រហែល ៥ ២០០គ្រាប់ ហើយត្រូវបានដាក់ពង្រាយទាំងនៅលើដីអាមេរិក និងនៅមូលដ្ឋានអង្គការណាតូមួយចំនួននៅអឺរ៉ុប ដែលជាផ្នែកនៃកម្មវិធីចែករំលែកនុយក្លេអ៊ែរ។

ចក្រភពអង់គ្លេស

ចក្រភពអង់គ្លេស មានក្បាលគ្រាប់នុយក្លេអ៊ែរប្រមាណ ២២៥គ្រាប់ ដើម្បីប្រតិបត្តិការដោយឯករាជ្យតាមរយៈកម្មវិធីមីស៊ីលនុយក្លេអ៊ែរ Trident នៃកងនាវាមុជទឹក Vanguard។ អង់គ្លេសមានសិទ្ធិសម្រេចដោយខ្លួនឯងពេញលេញលើការប្រើប្រាស់អាវុធនុយក្លេអ៊ែរ ហើយសមត្ថភាពនុយក្លេអ៊ែរនេះគឺជាផ្នែកដ៏សំខាន់មួយនៃការការពារសមូហភាពរបស់ណាតូ។

ប្រទេសបារាំង

បារាំងក៏រក្សាបាននូវកម្លាំងនុយក្លេអ៊ែរឯករាជ្យផងដែរ ដែលគេស្គាល់ថា «Force de frappe» ដែលរួមបញ្ចូលទាំងអាវុធនុយក្លេអ៊ែរបាញ់ពីនាវាមុជទឹក និងតាមអាកាស។ បារាំងមិនចូលរួមក្នុងការរៀបចំចែករំលែកនុយក្លេអ៊ែររបស់ណាតូទេ ប៉ុន្តែបានអះអាងម្តងហើយម្តងទៀតនូវការប្តេជ្ញាចិត្តរបស់ខ្លួនចំពោះការការពាររួមរបស់ណាតូក្រោមមាត្រា៥។ ក្បាលគ្រាប់នុយក្លេអ៊ែរសរុបរបស់បារាំង មានប្រហែល ២៩០គ្រាប់។

កម្មវិធីចែករំលែកនុយក្លេអ៊ែររបស់ណាតូ

នៅក្រោមកិច្ចព្រមព្រៀងកម្មវិធីចែករំលែកនុយក្លេអ៊ែររបស់ណាតូ អាមេរិកបានផ្ដល់ក្បាលគ្រាប់នុយក្លេអ៊ែរប្រហែល ១០០គ្រាប់ទៅឲ្យរដ្ឋជាសមាជិកចំនួន ៥ប្រទេស ដូចជា បែលហ្សិក អាល្លឺម៉ង់ អ៊ីតាលី ហូឡង់ និងតួកគី។ ការរៀបចំនេះ គឺជាផ្នែកមួយនៃគោលនយោបាយទប់ស្កាត់បន្ថែមទៀតរបស់អង្គការណាតូ ហើយត្រូវបានរៀបចំឡើងដើម្បីបង្ហាញពីសាមគ្គីភាពនៃសម្ព័ន្ធមិត្ត និងចែកចាយបន្ទុកលើវិស័យការពារជាតិនុយក្លេអ៊ែរ។

គោលនយោបាយនុយក្លេអ៊ែររបស់ណាតូ

អង្គការណាតូបានពិពណ៌នាខ្លួនឯងថាជា «សម្ព័ន្ធមិត្តនុយក្លេអ៊ែរ» ប៉ុន្តែសង្កត់ធ្ងន់ថា គោលដៅរបស់ខ្លួនគឺពិភពលោកដែលគ្មានអាវុធនុយក្លេអ៊ែរ។ ណាតូរក្សានូវគោលនយោបាយរារាំង និងទទូចថា អាវុធនុយក្លេអ៊ែរជាមធ្យោបាយចុងក្រោយបំផុត ដែលត្រូវប្រើតែក្នុងកាលៈទេសៈធ្ងន់ធ្ងរប៉ុណ្ណោះ ដើម្បីការពារសន្តិសុខនៃប្រទេសជាសមាជិក។

សូមជម្រាបថា នៅលើពិភពលោក អាវុធនុយក្លេអ៊ែរ ធ្លាប់ត្រូវបានប្រើប្រាស់ចំនួនតែ២ដងប៉ុណ្ណោះ ដោយសហរដ្ឋអាមេរិក កាលពីកំឡុងសង្គ្រាមលោកលើកទី២។ គ្រាប់បែកនុយក្លេអ៊ែរដំបូងគេបង្អស់ ដែលមានឈ្មោះថា «Little Boy» ត្រូវបានទម្លាក់កាលពីថ្ងៃទី៦ខែសីហាឆ្នាំ១៩៤៥ ក្នុងទីក្រុងហ៊ីរ៉ូស៊ីម៉ា ប្រទេសជប៉ុន បណ្ដាលឲ្យមនុស្សស្លាប់ប្រមាណ ១៤០ ០០០នាក់។ គ្រាប់បែកនុយក្លេអ៊ែរបន្ទាប់ ក៏ត្រូវអាមេរិកទម្លាក់នៅក្នុងប្រទេសជប៉ុនដូចគ្នា ស្ថិតនៅក្នុងទីក្រុងណាហ្គាសាគី កាលពីថ្ងៃទី៨ខែសីហាឆ្នាំ១៩៤៥។ គ្រាប់បែកនុយក្លេអ៊ែរនោះមានឈ្មោះថា «Fat Man» បណ្ដាលឲ្យមានមនុស្សបាត់បង់ជីវិតប្រមាណ ៧០ ០០០នាក់។

ចាប់ពីពេលនោះមក គ្មានអាវុធនុយក្លេអ៊ែរណាផ្សេងទៀតដែលត្រូវបានប្រើប្រាស់ក្នុងសង្គ្រាមនោះទេ។ ទោះបីជាយ៉ាងណា ការសាកល្បងនុយក្លេអ៊ែរនៅតែមាន ដោយក្បាលគ្រាប់នុយក្លេអ៊ែរជាង ២ ០០០គ្រាប់ ត្រូវបានធ្វើតេស្តនៅទូទាំងពិភពលោក ដោយបណ្ដាប្រទេសផ្សេងៗសម្រាប់ការបង្កើនសមត្ថភាពអភិវឌ្ឍ និងការរារាំង៕

ដោយ៖ ឈាង