លោក Sergei Lavrov Archives - Kampuchea Thmey Daily

រដ្ឋមន្ត្រីការបរទេសរុស្ស៊ីនិងអ៊ីរ៉ង់ សន្ទនាគ្នាតាមទូរស័ព្ទ ក្នុងពេលតានតឹងខ្លាំងបំផុត

សាង ស្រីល័ក្ខ — Wed, 04 Mar 2026 10:26:34 +0000

រដ្ឋមន្ត្រីការបរទេសរុស្ស៊ី លោក Sergei Lavrov បានជំរុញឲ្យមានការបន្ធូរបន្ថយភាពតានតឹងក្នុងសង្គ្រាមនៅមជ្ឈិមបូព៌ា បន្ទាប់ពីសន្ទនាគ្នាតាមទូរស័ព្ទជាមួយសមភាគីអ៊ីរ៉ង់ លោក Abbas Araghchi កាលពីថ្ងៃអង្គារទី៣មីនា។ នេះបើយោងតាមរបាយការណ៍ពីក្រសួងការបរទេសទីក្រុងមូស្គូ។

(រូបភាព៖Reuters)

យោងតាម themoscowtimes ក្នុងអំឡុងពេលនៃការហៅទូរស័ព្ទជាមួយលោក Araghchi លោក Lavrov បានសង្កត់ធ្ងន់លើតម្រូវការក្នុងការ «ធានាសុវត្ថិភាពប្រជាជនស៊ីវិល និងហេដ្ឋារចនាសម្ព័ន្ធស៊ីវិលនៅក្នុងប្រទេសទាំងអស់ក្នុងតំបន់»។

រដ្ឋមន្ត្រីរូបនេះក៏បានបញ្ជាក់ជាថ្មីនូវការអំពាវនាវរបស់ភាគីរុស្ស៊ី សម្រាប់ការបន្ធូរបន្ថយភាពតានតឹង បដិសេធការប្រើប្រាស់កម្លាំង ព្រមទាំងជំរុញឲ្យមានដំណោះស្រាយនយោបាយ និងការទូត ដោយលើកឡើងថា «ទីក្រុងមូស្គូត្រៀមខ្លួនជួយជានិច្ច»។

គួរបញ្ចាក់ដែរថា ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ដែលបានចាប់ផ្តើមកាលពីថ្ងៃសៅរ៍ បានជំរុញឲ្យប្រទេសជាច្រើនបិទដែនអាកាសរបស់ពួកគេរៀងៗខ្លួន។ ការបិទច្រកទាំងនេះ ក៏បានបណ្តាលឲ្យមានការលុបចោលជើងហោះហើររាប់ពាន់ជើងនៅទូទាំងប្រទេសឈូងសមុទ្រ ស្របពេលដែលគោលដៅវិស្សមកាលដ៏ពេញនិយមសម្រាប់ភ្ញៀវទេសចររុស្ស៊ី បានក្លាយជាការរំខានដ៏ធំបំផុតចំពោះការធ្វើដំណើរទូទាំងពិភពលោកចាប់តាំងពីជំងឺរាតត្បាតកូវីដ៕

អត្ថបទ៖ សាង ស្រីល័ក្ខ

The post រដ្ឋមន្ត្រីការបរទេសរុស្ស៊ីនិងអ៊ីរ៉ង់ សន្ទនាគ្នាតាមទូរស័ព្ទ ក្នុងពេលតានតឹងខ្លាំងបំផុត appeared first on Kampuchea Thmey Daily.

រុស្ស៊ី លុបពាក្យចចាមអារ៉ាមថា ពូទីន លែងទុកចិត្ត លោក Lavrov

សាង ស្រីល័ក្ខ — Sat, 08 Nov 2025 04:28:48 +0000

អ្នកនាំពាក្យវិមានក្រឹមឡាំង លោក Dmitry Peskov កាលពីថ្ងៃទី ៧ ខែវិច្ឆិកា បានធ្វើការឆ្លើយតបទៅកាន់របាយការណ៍របស់ប្រព័ន្ធផ្សព្វផ្សាយបរទេស អំពីរដ្ឋមន្ត្រីការបរទេស Sergei Lavrov ដែលបាត់បង់ការគាំទ្រឬការទុកចិត្តពីប្រធានាធិបតីរុស្ស៊ី គឺមិនពិតទាំងស្រុងឡើយ។

តាមព័ត៌មានពី Yahoo បានចុះផ្សាយថា លោកបានឆ្លើយបតនូវសំណួររបស់អ្នកសារព័ត៌មានដែលសួរថា «តើលោក Lavrov នៅតែបន្តកាន់តួនាទីជារដ្ឋមន្ត្រីការបរទេសរុស្ស៊ីឬអត់» លោក Peskov បានឆ្លើយថា ពិតប្រាកដណាស់! បុរសអាយុ ៧៦ ឆ្នាំរូបនេះ នៅតែជារដ្ឋមន្ត្រីការបរទេសប្រចាំប្រទេសដដែល។

រូបភាព៖Reuters

ទោះជាយ៉ាងណាក៏ដោយ នៅក្នុងរយៈពេលពីរសប្តាហ៍ជាប់ៗគ្នា ក្រសួងការបរទេសរុស្ស៊ីមិនបានបង្ហាញផែនការទស្សនកិច្ច និងសុន្ទរកថារបស់រដ្ឋមន្ត្រីការបរទេសរបស់ Lavrov សម្រាប់សប្តាហ៍ធ្វើការបន្ទាប់ទេ។ ការវិវឌ្ឍទាំងនេះបានបង្កើនការសង្ស័យថា លោកអាចបានបាត់បង់ការគាំទ្រពីប្រធានាធិបតីរុស្ស៊ី វ្ល៉ាឌីមៀរ ពូទីន ដោយសារផែនការបរាជ័យក្នុងការធ្វើជាម្ចាស់ផ្ទះនៃកិច្ចប្រជុំកំពូលរុស្ស៊ី-អាមេរិកនៅទីក្រុង Budapest ប្រទេសហុងគ្រី។

ជាងនេះទៅទៀតនោះ កាសែតឯករាជ្យមួយដែលមានមូលដ្ឋាននៅប្រទេសហូឡង់ The Moscow Times បានរាយការណ៍នៅថ្ងៃទី ៦ខែវិច្ឆិកាដែរថា ពូទីន លែងគោរព Lavrov ហើយរដ្ឋមន្ត្រីរូបនេះមិនបានបង្ហាញខ្លួនជាសាធារណៈទេ បន្ទាប់ពីសហរដ្ឋអាមេរិកបានលុបចោលកិច្ចប្រជុំកំពូលជាមួយរុស្ស៊ីនៅទីក្រុង Budapest ភ្លាមៗ។

ពាក្យចចាមអារ៉ាមបានបន្តរាលដាលនៅលើប្រព័ន្ធផ្សព្វផ្សាយសង្គម បន្ទាប់ពីអ្នកការទូតចាស់វស្សារូបនេះបានអវត្តមានពីវិមានក្រឹមឡាំងនៅថ្ងៃទី ៥ ខែវិច្ឆិកា នៅពេលដែលប្រធានាធិបតីរុស្ស៊ី បានប្រកាសពីការពិចារណានៃការបន្តការសាកល្បងអាវុធនុយក្លេអ៊ែរ។

ព័ត៌មាននៅលើគេហទំព័ររបស់ក្រសួងការបរទេសរុស្ស៊ីបង្ហាញបន្ថែមទៀតថា ការបង្ហាញខ្លួនជាសាធារណៈចុងក្រោយបំផុតរបស់រដ្ឋមន្ត្រីការបរទេស Sergei Lavrov គឺនៅថ្ងៃទី ២៨ ខែតុលា នៅពេលដែលលោកបានចូលរួមសន្និសីទអន្តរជាតិ Minsk ស្តីពីសន្តិសុខអាស៊ី-អឺរ៉ុប នៅរដ្ឋធានីបេឡារុស។

សូមបញ្ចាក់ដែរថា រដ្ឋមន្ត្រីការបរទេស Sergei Lavrov បច្ចុប្បន្ននេះមានវ័យ ៧៦ ឆ្នាំ។ លោកបានធ្វើជាប្រធានក្រសួងការបរទេសរុស្ស៊ីដ៏យូរអង្វែង ពោលអស់រយៈពេលជាង ២១ ឆ្នាំកន្លងមកមកហើយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អាមេរិក-អ៊ីស្រាអែល ចោទប្រកាន់អ៊ីរ៉ង់ រៀបផែនការធ្វើឃាតឯកអគ្គរដ្ឋទូតប្រចាំ ម៉ិកស៊ិក

The post រុស្ស៊ី លុបពាក្យចចាមអារ៉ាមថា ពូទីន លែងទុកចិត្ត លោក Lavrov appeared first on Kampuchea Thmey Daily.

រុស្ស៊ីប្រឹងបង្កើនសកម្មភាពការទូតអន្តរជាតិដ៏ខ្លាំងក្លានិងរហ័សបំផុត ក្រោយ ដូណាល់ ត្រាំ បើកផ្លូវ

Rann Reuy — Wed, 21 May 2025 09:00:45 +0000

ចាប់តាំងពីការបើកផ្លូវរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ តម្រូវឲ្យមានការស្តារឡើងវិញនូវទំនាក់ទំនងជាមួយមហាអំណាចរុស្ស៊ី ក្រោយប្រទេសទាំងពីរមានអរិភាពក្នុងវិស័យការទូតនឹងគ្នាយ៉ាងខ្លាំងក្នុងរដ្ឋបាលរបស់អតីត ប្រធានាធិបតី ចូ បៃដិន រដ្ឋាភិបាលរុស្ស៊ីរបស់ប្រធានាធិបតី វ៉្លាឌីមៀរ ពូទីន បានខិតខំស្តារទំនាក់ទំនងការទូតរបស់ខ្លួនយ៉ាងខ្លាំង ក្រោយទទួលរងនូវភាពឯកោយ៉ាងខ្លាំងរយៈពេល៣ឆ្នាំ។

រដ្ឋមន្ត្រីការបរទេសរុស្ស៊ី លោក Sergey Lavrov។ Reuters

ចាប់តាំងពីលើកទ័ពចូលលុកលុយប្រទេសអ៊ុយក្រែនកាលថ្ងៃទី២៤ខែកុម្ភៈ ឆ្នាំ២០២២ រដ្ឋាភិបាលនៃមហាអំណាចរុស្ស៊ីក្រោមការដឹកនាំរបស់ប្រធានាធិបតី វ៉្លាឌីមៀរ ពូទីន បានក្លាយជាប្រទេសដ៏ឯកោផ្នែកការទូតមួយ ក្រោមការថ្កោលទោសជាអន្តរជាតិ តាមរយៈយន្តការរបស់អង្គការសហប្រជាជាតិ ដែលរុស្ស៊ីមិនដែលអនុវត្តតាមម្តងណានោះទេ។

ប៉ុន្តែអ្វីៗបានផ្លាស់ប្តូរប្រែប្រួលយ៉ាងឆាប់រហ័ស ក្រោយគណបក្សសាធារណៈរដ្ឋរបស់លោក ដូណាល់ ត្រាំ បានឈ្នះការបោះឆ្នោត និងការចូលកាន់កាប់អំណាចនៅសហរដ្ឋអាមេរិក ដែលលោក ត្រាំ ដែលបានបើកផ្លូវឲ្យស្តារទំនាក់ទំនងការទូតជាមួយរុស្ស៊ីវិញ ដើម្បីបន្តដំណើរទៅរកដំណោះស្រាយជម្លោះនៅអ៊ុយក្រែន។

ក្រោយការបើកផ្លូវរបស់ លោក ដូណាល់ ត្រាំ ដែលបាននិយាយតាមទូរស័ព្ទលោកដំបូងជាមួយ លោក ពូទីន កាលថ្ងៃទី១២ខែកុម្ភៈឆ្នាំ២០២៥ រដ្ឋាភិបាលរបស់លោក ពូទីន បានប្រឹងប្រែងស្តារប្រជាប្រិយភាពទំនាក់ទំនងការទូតរបស់ខ្លួនឡើងវិញយ៉ាងរហ័សជាមួយបណ្តាប្រទេសនានាក្នុងរយៈពេលតែប៉ុន្មានខែចុងក្រោយនេះ។

ប្រធានាធិបតីរុស្ស៊ី លោក Vladimir Putin និយាយជាមួយរដ្ឋមន្ត្រីការបរទេស Sergey Lavrov។ REUTERS

រដ្ឋមន្ត្រីការបរទេសរុស្ស៊ីលោក Sergey Lavrov បានបង្កើនទំនាក់ទំនងការទូតនៅទូទាំងតំបន់ផ្សេងៗ ចាប់តាំងពីទំនាក់ទំនងជាមួយសហរដ្ឋអាមេរិកត្រូវបានសម្រួលឡើងវិញ ក្រោមការគាំទ្រដ៏ខ្លាំងពីប្រធានាធិបតីអាមេរិក លោក ដូណាល់ ត្រាំ ដែលខកខានម្តងហើយ ម្តងទៀតក្នុងការនាំយករុស្ស៊ីឲ្យបញ្ចប់សង្គ្រាមនៅអ៊ុយក្រែន។

ក្នុងចន្លោះពេលជាង៣ខែមកនេះ តើរដ្ឋមន្ត្រីការបរទេសរុស្ស៊ី លោក Sergey Lavrov បានធ្វើដំណើរការទូតទៅកាន់ប្រទេសណាខ្លះ?

ប្រទេសអារ៉ាប៊ីសាអូឌីត៖ ក្នុងខែកុម្ភៈ លោក Sergey Lavrov បានដឹកនាំគណៈប្រតិភូរុស្ស៊ីនៅទីក្រុងរីយ៉ាដ (Riyadh) ជារដ្ឋធានីប្រទេសអារ៉ាប៊ី សាអូឌីត សម្រាប់កិច្ចពិភាក្សាកម្រិតខ្ពស់ជាមួយរដ្ឋមន្ត្រីការបរទេសអាមេរិក លោក Marco Rubio ដោយផ្តោតលើការស្តារទំនាក់ទំនងរវាងគ្នានិងគ្នាឡើងវិញ និងរបៀបវារៈនៃបញ្ចប់សង្រ្គាមនៅអ៊ុយក្រែន។

ប្រទេសអ៊ីរ៉ង់៖ កាលពីចុងខែកុម្ភៈ រដ្ឋមន្ត្រីការបរទេសរុស្ស៊ី លោក Sergey Lavrov បានទៅបំពេញទស្សនកិច្ចនៅទីក្រុងតេអេរ៉ង់ ដើម្បីពិភាក្សាអំពីទំនាក់ទំនងទ្វេភាគី និងបញ្ហាក្នុងតំបន់ រួមទាំងការអភិវឌ្ឍន៍នៅក្នុងប្រទេសស៊ីរី និងយេម៉ែន។ ប្រទេសរុស្ស៊ី ក៏បានសន្យាធ្វើខ្លួនជាអ្នកផ្សាភ្ជាប់បង្កើតទំនាក់ទំនងរវាងសហរដ្ឋអាមេរិក និងអ៊ីរ៉ង់ លើការចរចាកម្មវិធីនុយក្លេអ៊ែរផងដែរ។

ប្រទេសអាហ្វ្រិកខាងត្បូង៖ នៅថ្ងៃទី២១ខែកុម្ភៈ រដ្ឋមន្ត្រីការបរទេសរុស្ស៊ី Sergey Lavrov បានធ្វើដំណើរទៅកាន់ប្រទេសអាហ្វ្រិកខាងត្បូង ដែលជាផ្នែកនៃកិច្ចប្រជុំរដ្ឋមន្ត្រីការបរទេសនៃប្រទេសអភិវឌ្ឍន៍សេដ្ឋកិច្ចជឿនលឿន ហៅកាត់ថា G20 ផង និង កិច្ចប្រជុំទ្វេភាគីជាច្រើនប្រទេសនៅតំបន់អាហ្វ្រិកផង។ សកម្មភាពនេះ បានបង្ហាញឲ្យឃើញនូវភាពស្មើមុខស្មើមាត់របស់រុស្ស៊ីលើឆាកអន្តរជាតិ ដែលខ្លួនធ្លាប់តែរងសម្ពាធនិងការរិះគន់ក្រោយការលើកទ័ពឈ្លានពានអ៊ុយក្រែននោះ។ លើសពីនេះ ភាគរុស្ស៊ីនិងអាហ្វ្រិកខាងត្បូងបានសន្យាគាំទ្រគ្នាលើកិច្ចការអន្តរជាតិ ក្នុងវេទិកាអន្តរជាតិនានាដូចជា ក្របខ័ណ្ឌអង្គការសហប្រជាជាតិ វេទិកា BRICS វេទិកាG20 ព្រមទាំងកិច្ចសន្ទនារុស្ស៊ីនិងអាហ្វ្រិកថែមទៀត។

ក្នុងខែមីនា ឆ្នាំ ២០២៥ រដ្ឋមន្ត្រីការបរទេសរុស្ស៊ី បានទៅទស្សនកិច្ចប្រទេសប្រទេសដែលជាសម្ព័ន្ធមិត្តជិតស្និទ្ធផង និងប្រទេសថ្មីៗផង ក្នុងនោះ មានប្រទេសមីយ៉ាន់ម៉ា ប្រទេសហ្ស៊ីមបាវ៉េ ប្រទេសណាមីប៊ី ប្រទេសនីហ្សេរីយ៉ា និងប្រទេសបេឡារុស្សដែលនៅជិតខាងខ្លួនដ៏ជិតស្និទ្ធនោះ។ ការបំពេញទស្សនកិច្ចទាំងនេះឆ្លុះបញ្ចាំងពីការបន្តកិច្ចខិតខំប្រឹងប្រែងរបស់រុស្ស៊ីក្នុងការរក្សា និងពង្រឹងទំនាក់ទំនងការទូតរបស់ខ្លួន ជាពិសេសជាមួយបណ្តាប្រទេសនៅអាហ្វ្រិក និងអាស៊ី។

នៅខែមេសាឆ្នាំ២០២៥ រដ្ឋមន្ត្រីការបរទេសរុស្ស៊ីលោក Sergey Lavrov បានធ្វើសកម្មភាពការទូតជាច្រើនជាមួយបណ្តាប្រទេសមួយចំនួនទាំងក្នុងតំបន់និងក្រៅតំបន់។ រដ្ឋមន្ត្រីការបរទេសរុស្ស៊ី បានធ្វើទស្សនកិច្ចដែលពាក់ព័ន្ធនឹងប្រទេសយ៉ាងហោចណាស់ប្រាំមួយក្នុងអំឡុងពេលនេះ រួមានប្រទេស ម៉ាលី ប៊ូគីណាហ្វាសូ និងនីហ្សេរីយ៉ា នៅតំបន់អាហ្វ្រិក។ លោក Lavrov បានធ្វើជាម្ចាស់ផ្ទះទទួលរដ្ឋមន្ត្រីការបរទេសនៃប្រទេសអាហ្វ្រិក មកពីតំបន់ Sahel ទាំងនេះនៅទីក្រុងមូស្គូ។ លោក Lavrov បានទៅបំពេញទស្សនកិច្ចនៅទីក្រុងប៉េកាំង កាលពីថ្ងៃទី ៨-៩ ខែមេសា ជាកន្លែងដែលលោកបានជួបជាមួយរដ្ឋមន្ត្រីការបរទេសចិន លោក Wang Yi ។ កិច្ចពិភាក្សារបស់ពួកគេបានគ្របដណ្តប់លើសង្រ្គាមរបស់រុស្ស៊ីប្រឆាំងនឹងអ៊ុយក្រែន ស្ថានភាពនៅក្នុងតំបន់ឥណ្ឌូប៉ាស៊ីហ្វិក និងទំនាក់ទំនងទ្វេភាគី។ នៅថ្ងៃទី១២ ខែមេសា លោក Lavrov បានទៅបំពេញទស្សនកិច្ចនៅទីក្រុង Minsk ប្រទេសបេឡារុស ដើម្បីធ្វើជាប្រធានក្រុមប្រឹក្សារដ្ឋមន្ត្រីការបរទេសនៃរដ្ឋឯករាជ្យ (CIS)។

លោក Sergey Lavrov និងរដ្ឋមន្ត្រីជាច្រើនប្រទេសនៃសមាជិក ដែលត្រៀមប្រជុំនៅទីក្រុង Rio de Janeiro, ប្រទេសប្រេស៊ីល កាលចុងខែមេសា។ REUTERS

កាលពីថ្ងៃទី១២ ខែមេសា រដ្ឋមន្ត្រីការបរទេសរុស្ស៊ី លោក Lavrov បានចូលរួមវេទិកាការទូតនៅទីក្រុង Antalya នៃប្រទេសតួកគី ដោយបានចូលរួមក្នុងកិច្ចប្រជុំសំខាន់ៗរបស់វេទិកា និងធ្វើកិច្ចចរចាទ្វេភាគីជាមួយសមភាគីបរទេសជាច្រើន។

លោក Lavrov ជួបពិភាក្សា ជាមួយឧបនាយករដ្ឋមន្ត្រីឡាវ លោក Saleumxay Kommasith នៅទីក្រុងមូស្គូ នៅថ្ងៃទី២១ខែមេសា ភាគីទាំងពីរបានពិភាក្សាអំពីការពង្រឹងកិច្ចសន្ទនានយោបាយ និងការពង្រីកកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។

សាធារណរដ្ឋដូមីនីកែន៖ នៅថ្ងៃទី៣០ខែមេសា លោក Lavrov បានទៅបំពេញទស្សនកិច្ចនៅសាធារណរដ្ឋដូមីនីកែន ដោយជួបជាមួយប្រធានាធិបតី Luis Abinader និងរដ្ឋមន្ត្រីការបរទេស Roberto Álvarez។ ដំណើរទស្សនកិច្ចនេះបានកត់សម្គាល់ការបើកស្ថានទូតដំបូងរបស់រុស្ស៊ីនៅក្នុងប្រទេស និងការពិភាក្សាលើការពង្រឹងទំនាក់ទំនងសេដ្ឋកិច្ច និងពាណិជ្ជកម្ម។

លោក Lavrov ពេលត្រៀមជួបប្រធានាធិបតីហ្ស៊ីបាវ៉េ លោក Emmerson Mnangagwa នៅប្រទេសរុស្ស៊ី។REUTERS

នៅខែឧសភាឆ្នាំ ២០២៥នេះវិញ រដ្ឋមន្ត្រីការបរទេសរុស្ស៊ីលោក Sergey Lavrov បានធ្វើសកម្មភាពការទូតជាមួយប្រទេសមួយចំនួន រួមមាន ការជួបសន្ទនាជាមួយរដ្ឋមន្ត្រីការបរទេសវៀតណាម Bui Thanh Son នៅទីក្រុងមូស្គូ នាថ្ងៃទី១០ឧសភា ដោយកិច្ចពិភាក្សាបានផ្តោតសំខាន់លើការពង្រឹងទំនាក់ទំនង និងកិច្ចសហប្រតិបត្តិការទ្វេភាគីរវាងរុស្ស៊ី និងវៀតណាម។

នៅថ្ងៃទី២០ខែឧសភា រដ្ឋមន្ត្រីការបរទេសរុស្ស៊ី លោក Lavrov បានទៅទស្សនកិច្ចទីក្រុង Yerevan ប្រទេសអាមេនី ដែលមានភាពល្អក់កករក្នុងទំនាក់ទំនងការទូត ក្រោយប្រទេស អាស៊ែបៃហ្សង់ ដណ្តើមបានទឹកដីប្រទាញប្រទង់កាលឆ្នាំ២០២៣ ដែលកាលនោះរុស្ស៊ីជាអ្នកធានាសន្តិសុខ៕

ដោយ រ៉ាន់ រើយ

The post រុស្ស៊ីប្រឹងបង្កើនសកម្មភាពការទូតអន្តរជាតិដ៏ខ្លាំងក្លានិងរហ័សបំផុត ក្រោយ ដូណាល់ ត្រាំ បើកផ្លូវ appeared first on Kampuchea Thmey Daily.

រុស្ស៊ីពង្រឹងការទូតយ៉ាងខ្លាំង ក្រោយអាមេរិកផ្សះផ្សាវិញ ប៉ុន្តែដូណាល់ ត្រាំបំបែកសម្ព័ន្ធមិត្ត

Rann Reuy — Sat, 01 Mar 2025 08:51:39 +0000

ក្រោយពីការបើកផ្លូវរបស់រដ្ឋបាលដូណាល់ ត្រាំ ដែលទើបឡើងកាន់អំណាចប្រធានាធិបតីសហរដ្ឋអាមេរិកជាង១ខែ សម្រាប់ការស្តារទំនាក់ទំនងការទូតជាមួយរុស្ស៊ីឡើងវិញ និងឈានទៅស្តារទំនាក់ទំនងសេដ្ឋកិច្ចពាណិជ្ជកម្ម រដ្ឋមន្ត្រីការបរទេសរុស្ស៊ី លោក Sergei Lavrov ហាក់មមាញឹកយ៉ាងខ្លាំងក្នុងដំណើរទំនាក់ទំនងការទូតជាមួយបណ្តាប្រទេសផ្សេងៗ។

រដ្ឋមន្ត្រីការបរទេសរុស្ស៊ីលោក Sergei Lavrov ទៅទស្សនកិច្ចនៅស៊ែប៊ី។ TASS

ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយទូរស័ព្ទជាមួយប្រធានាធិបតីរុស្ស៊ី វ៉្លាឌីមៀរ ពូទីន កាលថ្ងៃទី១២ខែកុម្ភៈ ដែលជាការបើកផ្លូវសម្រាប់ការស្តារទំនាក់ទំនងប្រទេសទាំងពីរឡើងវិញ ក្រោយការផ្តាច់ចំណងការទូតជិត៣ឆ្នាំ បន្ទាប់ពីរុស្ស៊ីលើកទ័ពឈ្លានពានអ៊ុយក្រែនកាលថ្ងៃទី២៤ខែកុម្ភៈឆ្នាំ២០២២។

រដ្ឋមន្ត្រីការបរទេសរុស្ស៊ីនិងសហរដ្ឋអាមេរិក បានជួបពិភាក្សាគ្នាលើកដំបូងនៅថ្ងៃទី១៨ខែកុម្ភៈនៅទីក្រុងរីយ៉ាដប្រទេសអារ៉ាប៊ីសាអូឌីត ដែលជាការពិភាក្សាលម្អិតលើដំណើរការស្តារទំនាក់ទំនងការទូតនេះឈានទៅរកប្រក្រតីភាពឡើងវិញ។

ចាប់តាំងពីពេលនោះមក រដ្ឋមន្ត្រីការបរទេសរុស្ស៊ី លោក Sergei Lavrov បានបំពេញទស្សនកិច្ចការទូតទៅកាន់បណ្តាប្រទេសជាសម្ព័ន្ធមិត្តរបស់ខ្លួនស្រាប់ ដូច អ៊ីរ៉ង់ ប្រទេសមួយចំនួនក្នុងតំបន់អារ៉ាប់ដូចជា កាតា និងទៅកាន់ប្រទេសនៅតំបន់អាហ្រ្វិក ដូចជាចូលរួមកិច្ចប្រជុំរដ្ឋមន្ត្រីការបរទេសនៃក្រុមប្រទេសអភិវឌ្ឍន៍សេដ្ឋកិច្ចហៅកាត់ថា G20។ ក្នុងប៉ុន្មានថ្ងៃនេះ លោក Lavrov បានទៅបំពេញទស្សនកិច្ចនៅតួកគី និង សម្ព័ន្ធមិត្តស៊ែប៊ីនៅតំបន់បាល់កង់ជាដើម។

ផ្ទុយពីរដ្ឋបាលរបស់លោក ដូណល់ ត្រាំ ក្នុងរយៈពេលចុងក្រោយនេះ ជាពិសេសលើដំណោះស្រាយបញ្ហានៅអ៊ុយក្រែន រដ្ឋបាលសហរដ្ឋអាមេរិកបានបង្កភាពរកាំរកូតជាខ្លាំងជាមួយសម្ព័ន្ធមិត្តអឺរ៉ុប ដែលអាចឈានទៅដល់ការបែកបាក់មិនអាចផ្សះផ្សាទៀតផង។

ក្នុងជម្លោះចុងក្រោយជាមួយប្រធានាធិបតីអ៊ុយក្រែន លោក Volodymyr Zelensky នៅសហរដ្ឋអាមេរិក ដែលភាគីទាំងពីរស្ទើរតែចុះហត្ថលេខាលើកិច្ចព្រមព្រៀងមូលនិធិវិនិយោគលើវិស័យធនធានរ៉ែនៅប្រទេសអ៊ុយក្រែនទៅហើយនោះ បានធ្វើឲ្យប្រទេសក្នុងតំបន់អឺរ៉ុបងាកទៅគាំទ្រអ៊ុយក្រែន និងបង្ហាញថា ពួកគេលែងជឿទុកចិត្តលើរដ្ឋបាលអាមេរិក ដឹកនាំដោយប្រធានាធិបតី ដូណាល់ ត្រាំ៕

ដោយ រ៉ាន់ រើយ

ជម្លោះពាក្យសម្តីរបស់ថ្នាក់ដឹកនាំអាមេរិក និង ប្រធានាធិបតីអ៊ុយក្រែននៅក្នុងសេតវិមាន។ REUTERS

The post រុស្ស៊ីពង្រឹងការទូតយ៉ាងខ្លាំង ក្រោយអាមេរិកផ្សះផ្សាវិញ ប៉ុន្តែដូណាល់ ត្រាំបំបែកសម្ព័ន្ធមិត្ត appeared first on Kampuchea Thmey Daily.

កិច្ចប្រជុំរដ្ឋមន្ត្រីការបរទេសរុស្ស៊ី-អាមេរិក ធ្វើឡើងនៅនិវេសនដ្ឋានអគ្គកុងស៊ុលអាមេរិកនៅតួកគី

Rann Reuy — Thu, 27 Feb 2025 10:20:18 +0000

ជំនួបលើកទី២រវាងរដ្ឋមន្ត្រីការបរទេសរុស្ស៊ី និងសហរដ្ឋអាមេរិក នៅទីក្រុងអ៊ីស្តង់ប៊ុលប្រទេសតួកគី កំពុងតែប្រព្រឹត្តទៅក្នុងជំនួបបិទទ្វានៅឯនិវេសនដ្ឋានរបស់អគ្គកុងស៊ុលអាមេរិកប្រចាំទីក្រុងអ៊ីស្តង់ប៊ុល ក្រោមការតាមប្រមាញ់របស់អ្នកសារព័ត៌មានពីច្រើនប្រទេស។

អ្នកឆ្លើយឆ្លងព័ត៌មាន TASS បានរាយការណ៍ថា កិច្ចពិភាក្សារវាងរដ្ឋមន្ត្រីការបរទេសរុស្ស៊ី លោក Sergei Lavrov និងសមភាគីសហរដ្ឋអាមេរិក លោក Marco Rubio ផ្តោតសំខាន់លើការស្តារទំនាក់ទំនងការទូតឲ្យវិលទៅរកភាពប្រក្រតីឡើងវិញ។

សារព័ត៌មានរុស្ស៊ី ដោយយោងតាមរដ្ឋមន្ត្រីការបរទេសរុស្ស៊ី លោក Sergey Lavrov កិច្ចពិភាក្សានេះ មានការចូលរួមពី «អ្នកការទូត និងអ្នកជំនាញជាន់ខ្ពស់»។ ជំនួបនេះបានប្រើប្រាស់ពេលជាង២ម៉ោង ប៉ុន្តែមិនទាន់ដឹងថា ប្រធានបទអ្វីខ្លះដែលភាគីទាំងពីរនឹងផ្តោតបន្ថែមនោះទេ។

អ្នកកាសែតមកពីប្រទេសផ្សេងៗដែលបានប្រមូលផ្តុំគ្នានៅជិតគេហដ្ឋានកំពុងរង់ចាំការសង្ខេបខ្លឹមសារ ក្រោយការបញ្ចប់កិច្ចចរចា។

អ្នកសារព័ត៌មានរង់ចាំផ្តិតយករូបភាពនិងខ្លឹមសារពីជំនួបរដ្ឋមន្ត្រីការបរទេសរុស្ស៊ីនិងអាមេរិកនៅអ៊ីស្តង់ប៊ុល។ TASS

ជំនួបលើកទី២កម្រិតរដ្ឋមន្ត្រីការបរទេសរវាងមហាអំណាចទាំងពីរ បន្ទាប់ពីបានធ្វើឡើងលើកដំបូងកាលថ្ងៃទី១៨ខែកុម្ភៈនៅទីក្រុងរីយ៉ាដប្រទេសអារ៉ាប៊ីសាអូឌីតនៅតំបន់មជ្ឈិមបូព៌ា ដែលជាការបើកផ្លូវដ៏សំខាន់មួយសម្រាប់ស្តារទំនាក់ទំនងឡើងវិញ ក្រោយពីមហាអំណាចប្រជែងឥទ្ធិពលគ្នាទាំងពីរនេះមិនមានទំនាក់ទំនងអស់រយៈពេលជិត៣ឆ្នាំ ដោយសារសង្គ្រាមនៅអ៊ុយក្រែន។

ទីភ្នាក់ងារព័ត៌មាន AFP របស់បារាំង បានផ្សាយថា រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយថា ការជួបប្រជុំគ្នានៅទីក្រុងអ៊ីស្តង់ប៊ុលនៅថ្ងៃព្រហស្បតិ៍ នឹងពិភាក្សាអំពីបញ្ហាលេចធ្លោទាក់ទងនឹងស្ថានទូតរបស់ពួកគេ។

សេចក្តីរាយការណ៍របស់ទីភ្នាក់ងារព័ត៌មាន Reuters ដែលបានស្រង់សារឆ្លើយតបរបស់មន្ត្រីការបរទេសសហរដ្ឋអាមេរិក បានអះអាងថា ការពិភាក្សាទ្វេភាគីនោះនឹងមិនផ្តោសំខាន់លើជម្លោះនៅអ៊ុយក្រែនទេ។

ប្រធានាធិបតីអាមេរិក លោក ដូណាល់ ត្រាំ (Donald Trump) បានគាំទ្រគោលនយោបាយការបរទេសរបស់សហរដ្ឋអាមេរិកចាប់តាំងពីចូលកាន់តំណែងកាលពីខែមករា ដោយបានឈានដល់ការជួបតាមទូរស័ព្ទជាមួយ ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) កាលថ្ងៃទី១២ខែកុម្ភៈដែលជាចំណុចរបត់ដ៏សំខាន់ក្នុងនយោបាយសកលលោក៕

The post កិច្ចប្រជុំរដ្ឋមន្ត្រីការបរទេសរុស្ស៊ី-អាមេរិក ធ្វើឡើងនៅនិវេសនដ្ឋានអគ្គកុងស៊ុលអាមេរិកនៅតួកគី appeared first on Kampuchea Thmey Daily.

រដ្ឋមន្ត្រីការបរទេសអាមេរិកនិងរុស្ស៊ីជួបពិភាក្សាគ្នាលើកទី២នៅថ្ងៃនេះនៅតួកគី

Rann Reuy — Thu, 27 Feb 2025 04:36:14 +0000

រដ្ឋមន្ត្រីការបរទេសសហរដ្ឋអាមេរិក លោក Marco Rubio និងសមភាគីរុស្ស៊ី លោក លោក Sergei Lavrov នឹងជួបប្រជុំទ្វេភាគីលើកទី២នៅថ្ងៃព្រហស្បតិ៍នេះនៅទីក្រុងអ៊ីស្តង់ប៊ុលប្រទេសតួកគី ដោយមិននិយាយពីបញ្ហាអ៊ុយក្រែន ប៉ុន្តែផ្តោតសំខាន់លើការបង្កើតទំនាក់ទំនងការទូតងាកទៅរកប្រក្រតីភាពឡើងវិញ។

រដ្ឋមន្ត្រីការបរទេសអាមេរិកលោក Marco Rubio (ស្តាំ) និងសមភាគីរុស្ស៊ី លោក Sergei Lavrov ក្នុងជំនួបកាលសប្តាហ៍មុននៅទីក្រុងរីយ៉ាដ។ Reuters

ដោយ រ៉ាន់ រើយ

The post រដ្ឋមន្ត្រីការបរទេសអាមេរិកនិងរុស្ស៊ីជួបពិភាក្សាគ្នាលើកទី២នៅថ្ងៃនេះនៅតួកគី appeared first on Kampuchea Thmey Daily.

រុស្ស៊ី ថា អឺរ៉ុប កំពុងចាក់សាំងលើភ្លើងសង្គ្រាមនៅអ៊ុយក្រែន

Sok Sovann — Thu, 27 Feb 2025 01:12:58 +0000

ក្រោយមានការលើកសំណើជាបន្តបន្ទាប់ពីសំណាក់មេដឹកនាំអឺរ៉ុបជាពិសេសបារាំងនិងអង់គ្លេស ឲ្យបញ្ជូនកងរក្សាសន្តិភាពទៅអ៊ុយក្រែននោះ ពេលនេះទីក្រុងមូស្គូបានបញ្ចេញប្រតិកម្មខ្លាំងៗ ដោយរដ្ឋមន្ត្រីការបរទេសរុស្ស៊ីលោក Sergei Lavrov បានចេញមុខប្រឆាំងយ៉ាងដាច់អហង្ការចំពោះផែនការនេះ ហើយថែមទាំងចោទប្រកាន់ថា អឺរ៉ុបកំពុងចាក់សាំងលើភ្លើងហើយ។ នេះបើតាមការចុះផ្សាយរបស់ Reuters នៅថ្ងៃព្រហស្បតិ៍ទី២៧ខែកុម្ភៈឆ្នាំ២០២៥។

លោក Sergei Lavrov (រូបថត៖ ក្រសួងការបរទេសរុស្ស៊ី)

ក្នុងដំណើរទស្សនកិច្ចទៅកាន់ប្រទេសកាតា, លោក Lavrov បានចង្អុលចំឈ្មោះនាយករដ្ឋមន្ត្រីដាណឺម៉ាក Mette Frederiksen តែម្តង ដោយនិយាយថា គេកំពុងដុតអ៊ុយក្រែនឲ្យបន្តអរិភាពតាមរយៈការអះអាងថា សន្តិភាពក្នុងស្ថានភាពបច្ចុប្បន្ននេះ គឺអាក្រក់ជាងសង្គ្រាមទៅទៀត។ វិធីសាស្រ្តរបស់អឺរ៉ុបចំពោះអ៊ុយក្រែនគឺ ព្យាយាមចាក់សាំងលើភ្លើង ទាំងមិនព្រមមើលឫសគល់នៃជម្លោះហើយរកមធ្យោបាយដោះស្រាយ។ ការបញ្ជូនកងរក្សាសន្តិភាពទៅអ៊ុយក្រែន គឺមិនអាចទទួលយកបានដាច់ខាតសម្រាប់រុស្ស៊ី។

កាលពីសប្តាហ៍មុន មហាអំណាចអឺរ៉ុបបានបង្ហាញនូវផែនការបញ្ជូនទ័ព ៣០០០០នាក់ ទៅអ៊ុយក្រែន ដើម្បីធ្វើជាកងរក្សាសន្តិភាព នៅពេលភាគីជម្លោះ ឈានដល់កិច្ចព្រមព្រៀងបញ្ចប់សង្គ្រាម។

ទ័ពណាតូ (រូបថត៖ AP)

អង់គ្លេសនិងបារាំង គឺជាប្រទេសចេញមុខចេញមាត់ជាងគេ ដើម្បីប្រកូកប្រកាសឲ្យអឺរ៉ុប បង្កើតសម្ព័ន្ធភាពមួយកែនទ័ពឲ្យបាន ៣០ ០០០នាក់ សម្រាប់បញ្ជូនទៅអ៊ុយក្រែន ព្រោះតែមើលឃើញស្ថានការណ៍ថា ប្រធានាធិបតីអាមេរិក កំពុងដកដៃចេញពីទីក្រុងកៀវ និងបែរជាបន្ទន់ជំហរទៅខាងរុស្ស៊ីទៅវិញ។

តាមការចុះផ្សាយរបស់កាសែត Guardian, កងទ័ពដែលស្ថិតក្នុងផែនការនេះ គឺនឹងរ៉ាប់រងធានាសន្តិភាពដែនទឹកនិងដែនអាកាស ខ្លាំងជាងជើងគោក ប៉ុន្តែនឹងមិនបញ្ជូនទៅព្រំដែនភាគខាងត្បូង ប្រទេសអ៊ុយក្រែនឡើយ។ កងទ័ពនឹងត្រូវដាក់ឲ្យឈរជើងនៅតាមទីក្រុង និងកំពង់ផែសំខាន់ៗ ព្រមទាំងនៅរោងចក្រនុយក្លេអ៊ែរ ផងដែរ ដោយមានជំនួយពីសំណាក់យន្តហោះឈ្លបយកការណ៍។

សូមជម្រាបថា អឺរ៉ុបបានបង្ហាញផែនការនេះ ស្របពេលសម្ព័ន្ធភាពយោធាដឹកនាំដោយសហរដ្ឋអាមេរិក កំពុងបែកបាក់ ចាប់តាំងពីលោក ត្រាំ ចូលកាន់តំណែងនៅសេតវិមាន។ ទីក្រុងវ៉ាស៊ីនតោន បែរជាងាកទៅរករុស្ស៊ី ធ្វើឲ្យបារាំងនិងអង់គ្លេស មិនពេញចិត្ត រួចក៏ចេញមុខដឹកនាំយុទ្ធនាការជួយអ៊ុយក្រែនតែម្តង៕

អត្ថបទ៖ សុខ សុវណ្ណ

ចុចអាន៖ ទីប្រឹក្សាលោក ត្រាំ៖ សង្គ្រាមនៅអ៊ុយក្រែន មានអ្នកអុជឲ្យឆេះ កុំបន្ទោសរុស្ស៊ីតែម្ខាង

The post រុស្ស៊ី ថា អឺរ៉ុប កំពុងចាក់សាំងលើភ្លើងសង្គ្រាមនៅអ៊ុយក្រែន appeared first on Kampuchea Thmey Daily.

រដ្ឋមន្ត្រីការបរទេសអាមេរិកនិងរុស្ស៊ីត្រៀមជំនួបកំពូល «ត្រាំ-ពូទីន» និងស្តារទំនាក់ទំនងទៅរកប្រក្រតីភាពវិញ

Rann Reuy — Sun, 16 Feb 2025 03:40:32 +0000

ក្រសួងការបរទេសសហរដ្ឋអាមេរិក និង រុស្ស៊ីបានកំណត់កាលវីភាគទំនាក់ទំនងគ្នាជាប្រចាំ ដើម្បីឈានទៅកំណត់កាលបរិច្ឆេទសម្រាប់ជំនួបកំពូលរបស់ប្រធានាធិបតីនៃប្រទេសមហាអំណាចទាំងពីរដើម្បីឈានទៅកំណត់របៀបវារៈសម្រាប់បញ្ចប់សង្គ្រាមអ៊ុយក្រែនដែលអូសបន្លាយអស់រយៈពេលបីឆ្នាំ។

រដ្ឋមន្ត្រីការបរទេសអាមេរិក Marco Rubio (ឆ្វេង) និងសមភាគីរុស្ស៊ី លោក Sergey Lavrov។

រដ្ឋមន្ត្រីការបរទេសរុស្ស៊ី លោក Sergey Lavrov និងរដ្ឋមន្ត្រីការបរទេសអាមេរិក Marco Rubio បានព្រមព្រៀងគ្នាក្នុងអំឡុងកិច្ចសន្ទនាតាមទូរស័ព្ទស្តីពីការប្រាស្រ័យទាក់ទងគ្នាជាប្រចាំលើបញ្ហាជាច្រើន រួមទាំងការរៀបចំសម្រាប់កិច្ចប្រជុំរវាងប្រធានាធិបតីរុស្ស៊ីលោក វ៉្លាឌីមៀរ ពូទីន (Vladimir Putin) និងសមភាគីអាមេរិក លោក ដូណាល់ ត្រាំ (Donald Trump)។ យោងការផ្សាយរបស់ទីភ្នាក់ងារព័ត៌មានរុស្ស៊ី TASS។

ក្រសួងការបរទេសរុស្ស៊ីបាននិយាយថា៖«ពួកគេបានយល់ព្រមលើទំនាក់ទំនងទៀងទាត់ រួមទាំងការត្រៀមរៀបចំសម្រាប់កិច្ចប្រជុំកំពូលរុស្ស៊ី-អាមេរិក»។

ប្រមុខការទូតរុស្ស៊ី និងអាមេរិក បានយល់ព្រមរក្សាបណ្តាញទំនាក់ទំនងមួយដើម្បីដោះស្រាយបញ្ហាដែលកើតមាននៅក្នុងទំនាក់ទំនងអាមេរិក-រុស្ស៊ី សម្រាប់ការដករបាំងឯកតោភាគី ដែលបានទទួលមរតកពីរដ្ឋបាលមុន ដល់កិច្ចសហប្រតិបត្តិការពាណិជ្ជកម្ម សេដ្ឋកិច្ច និងការវិនិយោគដែលមានផលប្រយោជន៍ទៅវិញទៅមក។

តាមរយៈសេចក្តីរាយការណ៍នោះ ក្រសួងការបរទេសរុស្ស៊ី បានលើកឡើងថា ភាគីសហរដ្ឋអាមេរិកនិងរុស្ស៊ី បានគូសបញ្ជាក់ពីឆន្ទៈទៅវិញទៅមករបស់ពួកគេក្នុងកិច្ចសហប្រតិបត្តិការលើបញ្ហាអន្តរជាតិសំខាន់ៗ រួមទាំងការតាំងទីលំនៅជុំវិញអ៊ុយក្រែន ស្ថានភាពជុំវិញប៉ាឡេស្ទីន និងបញ្ហាទូទៅនៅមជ្ឈិមបូព៌ា និងតំបន់ផ្សេងទៀត។

រដ្ឋមន្ត្រីការបរទេសអាមេរិកនិងរុស្ស៊ី បានផ្លាស់ប្តូរទស្សនៈលើមធ្យោបាយនៃការបញ្ចប់គោលនយោបាយដែលបានចាប់ផ្តើមដោយរដ្ឋបាលអតីតប្រធានាធិបតី បារ៉ាក់ អូបាម៉ា( Barack Obama) ក្នុងឆ្នាំ២០១៦សម្រាប់ការរឹតបន្តឹងអតិបរមានៃលក្ខខណ្ឌសម្រាប់ប្រតិបត្តិការបេសកកម្មការទូតរុស្ស៊ីនៅសហរដ្ឋអាមេរិក ដែលរួមបញ្ចូលវិធានការសងសឹក។

ក្រសួងការបរទេសរុស្ស៊ីបាននិយាយថា៖«វាត្រូវបានព្រមព្រៀងគ្នាក្នុងការរៀបចំកិច្ចប្រជុំអ្នកជំនាញនាពេលខាងមុខ ដើម្បីយល់ព្រមលើជំហានជាក់ស្តែង ដើម្បីដកចេញនូវឧបសគ្គទៅវិញទៅមកចំពោះការងាររបស់បេសកកម្មការបរទេសរុស្ស៊ី និងសហរដ្ឋអាមេរិក»។

ក្រសួងការបរទេសសហរដ្ឋអាមេរិក បានចេញសេចក្តីប្រកាសបញ្ជាក់ខ្លីលើគេហទំព័របស់ខ្លួនថា ការសន្ទនាតាមទូរស័ព្ទរបស់រដ្ឋមន្ត្រីការបរទេសទាំងពីរគឺជាការតាមដានការសន្ទនារបស់ប្រធានាធិបតី ដូណាល់ ត្រាំ ជាមួយប្រធានាធិបតីរុស្ស៊ី វ៉្លាឌីមៀរ ពូទីន កាលពីដើមសប្តាហ៍នេះ។

រដ្ឋមន្ត្រីការបរទេសអាមេរិក Marco Rubio បានបញ្ជាក់ជាថ្មីនូវការប្តេជ្ញាចិត្តរបស់ប្រធានាធិបតី ត្រាំ ក្នុងការស្វែងរកការបញ្ចប់ជម្លោះនៅអ៊ុយក្រែន។ លើសពីនេះទៀត ពួកគេបានពិភាក្សាអំពីឱកាសដើម្បីធ្វើការរួមគ្នាលើបញ្ហាទ្វេភាគីមួយចំនួនទៀត។

ក្នុងកិច្ចប្រជុំសន្និសីទស្តីពីសន្តិសុខនៅទីក្រុងមុយនិច ប្រទេសអាល្លឺម៉ង់ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី ហាក់បានបង្ហាញនូវប្រតិកម្មចម្រុះជុំវិញទំនាក់ទំនងរវាងលោក ដូណាល់ ត្រាំ និង លោក វ៉្លាឌីមៀរ ពូទីន ក្នុងដំណាក់កាលចុងក្រោយនេះ ដោយអះអាងថា អ៊ុយក្រែនទំនងមិនទទួលយកកិច្ចព្រមព្រៀងសន្តិភាពណាមួយដែលគ្មានវត្តមានអ៊ុយក្រែនចូលរួមចរចាដោយផ្ទាល់៕

ដោយ រ៉ាន់ រើយ

The post រដ្ឋមន្ត្រីការបរទេសអាមេរិកនិងរុស្ស៊ីត្រៀមជំនួបកំពូល «ត្រាំ-ពូទីន» និងស្តារទំនាក់ទំនងទៅរកប្រក្រតីភាពវិញ appeared first on Kampuchea Thmey Daily.

លោក Sergei Lavrov Archives - Kampuchea Thmey Daily

រដ្ឋមន្ត្រីការបរទេសរុស្ស៊ី​និងអ៊ីរ៉ង់ សន្ទនាគ្នាតាម​ទូរស័ព្ទ​​ ក្នុងពេល​តានតឹងខ្លាំងបំផុត​

​រុស្ស៊ី លុបពាក្យចចាមអារ៉ាមថា ពូទីន លែងទុកចិត្ត លោក Lavrov

​រុស្ស៊ី​ពង្រឹងការទូតយ៉ាងខ្លាំង ក្រោយ​អាមេរិក​​​ផ្សះផ្សាវិញ ប៉ុន្តែដូណាល់ ត្រាំបំបែក​សម្ព័ន្ធ​មិត្ត​

រដ្ឋមន្ត្រី​​ការបរទេស​អាមេរិក​និង​រុស្ស៊ី​ជួបពិភាក្សា​គ្នា​លើក​ទី២នៅថ្ងៃនេះ​​នៅតួកគី​

រុស្ស៊ី ថា អឺរ៉ុប កំពុងចាក់សាំងលើភ្លើងសង្គ្រាមនៅអ៊ុយក្រែន

រដ្ឋមន្ត្រីការបរទេសរុស្ស៊ីនិងអ៊ីរ៉ង់ សន្ទនាគ្នាតាមទូរស័ព្ទ ក្នុងពេលតានតឹងខ្លាំងបំផុត

រុស្ស៊ី លុបពាក្យចចាមអារ៉ាមថា ពូទីន លែងទុកចិត្ត លោក Lavrov

រុស្ស៊ីពង្រឹងការទូតយ៉ាងខ្លាំង ក្រោយអាមេរិកផ្សះផ្សាវិញ ប៉ុន្តែដូណាល់ ត្រាំបំបែកសម្ព័ន្ធមិត្ត

រដ្ឋមន្ត្រីការបរទេសអាមេរិកនិងរុស្ស៊ីជួបពិភាក្សាគ្នាលើកទី២នៅថ្ងៃនេះនៅតួកគី