ជាក់ស្តែង នៅចុងសប្តាហ៍ថ្មីៗនេះ លោក ចាប សុីដាណាល់ និងនាដការរបាំរួមក្រុម បានរួមគ្នាបង្ហាញវីដេអូខ្លីជាង ២នាទី ដោយលើកយកចំណុចសម្គាល់ចម្បង ២ចំណុច នៃទម្រង់ «ល្ខោនខោល»។

បើតាមការបញ្ជាក់ ចំណុចដែលមើលទៅស្គាល់ថាជាទម្រង់ល្ខោនខោលតែម្តង គឺទី១ សម្តែងបានតែក្នុងរឿងរាមកេរ្ត៍ និងទី២ អ្នករបាំ សុទ្ធតែតួប្រុស ឯការសម្តែងគឺធ្វើកាយវិការតាមអ្នកពោល។ ក្នុងនោះ ក៏មានបញ្ជាក់ដែរថា ទម្រង់ល្ខោននេះមានវត្តមានប្រហាក់ប្រហែលមុនសម័យអង្គរ ដែលដើមឡើយជា «ល្ខោនប្រុស» មិនទាន់មានសាច់រឿងឡើយ តែក្រោយមកក៏ត្រូវបានតម្លើងជាទម្រង់ «ល្ខោនខោល» ដែលមានឈុតឆាករឿងរាមកេរ្ត៍។

ការចែករំលែកជាចំណេះដឹងនេះ ធ្វើឡើងក្រោយការចូលរួមសម្តែងទស្សនីយភាពល្ខោនខោល រឿងរាមកេរ្ត៍ ដកស្រង់ត្រង់ឈុត «ហនុមានអុកឡុកក្រុងលង្ការ» ក្នុងកម្មវិធី «ប្រកាសទទួលស្គាល់សមាសភាពក្រុមការងារសហភាពសហព័ន្ធយុវជនកម្ពុជា ក្នុងវិស័យវប្បធម៌ និងវិចិត្រសិល្បៈ» ថ្មីៗនេះ។

តួយ៉ាង ទស្សនីយភាពល្ខោនខោលដែលលើកយកមកសម្តែង គឺជាស្នាដៃតម្លើងដោយ មន្ទីរវប្បធម៌ និងវិចិត្រសិល្បៈ រាជធានីភ្នំពេញ សម្រាប់យកមកសម្តែងជូនថ្នាក់ដឹកនាំទស្សនា ក្នុងកម្មវិធីខាងលើ ក្រោមអធិបតីភាព ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ ។

នាដការរបាំ លោក ចាប សុីដាណាល់ ដែលមហាជនស្គាល់ថា ជាយុវជនដ៏លេចធ្លោមួយរូបក្នុងទម្រង់សិល្បៈបុរាណ «ល្ខោនខោល» និងធ្លាប់បានដឹកនាំក្រុមសិល្បករបុរាណ ទៅសម្តែងលើឆាកព្រឹត្តិការណ៍ជាតិ និងអន្តរជាតិជាច្រើន។ ក្នុងនោះ ក៏មានការសម្តែងទស្សនីយភាពលើឆាកប្រគំតន្ត្រីសម័យ ជាមួយលោក G-Devith និងអ្នកនាង ទេព បូព្រឹក្ស ផងដែរ។

ក្នុងនាមជាអ្នកជំនាន់ក្រោយនៃសិល្បៈបុរាណខ្មែរមួយរូប នាដការរបាំរូបនេះ តាមរយៈគណនីបណ្តាញទំនាក់ទំនងសង្គមផ្ទាល់ខ្លួនកន្លងមក តែងតែប្រឹងប្រែងជំរុញផ្សព្វផ្សាយ និងចែករំលែកពីអត្តសញ្ញាណនៃសិល្បៈវប្បធម៌ជាតិ៕

The post ជំនាន់ក្រោយសិល្បៈបុរាណ ប្រាប់ចំណុចងាយចងចាំពី «ល្ខោនខោល» បំណងជំរុញផ្សព្វផ្សាយអត្តសញ្ញាណវប្បធម៌ជាតិ appeared first on Kampuchea Thmey Daily.

ប្រភពដដែលបានសរសេរថា៖ “នាសប្ដាហ៍នេះ មន្ទីរវប្បធម៌ និងវិចិត្រសិល្បៈរាជធានីភ្នំពេញ និងលើកយកនូវផ្ទាំងទស្សនីយភាពសិល្បៈពីរ ដើម្បីសម្ដែងជូនភ្ញៀវជាតិ អន្តរជាតិ និងពុក ម៉ែ បងប្អូន ទាំងអស់គ្នាបានទស្សនា នាផ្លូវថ្មើរជើង ( Walk Street )។ ១/ ទស្សនីយភាពសិល្បៈ ល្ខោនខោល, ២/ ទស្សនីយភាពសិល្បៈ ល្ខោនបាសាក់”។

ទ​ន្ទឹមនេះ មន្ទីរវប្បធម៌ ក៏បានអំពាវនាវដល់ពលរដ្ឋ ភ្ញៀវជាតិ និងអន្តរជាតិ ចូលរួមទស្សនាការសម្តែងសិល្បៈខ្មែរទាំង២ប្រភេទនេះ ឱ្យបានច្រើនកុះករផងដែរ។

បច្ចុប្បន្ន ផ្លូវថ្មើរជើង (Walk Street) គឺជាទីដ៏ពេញនិយមរបស់ប្រជាជនខ្មែរ រួមទាំងជនជាតិបរទេស។ ពីមួយសប្តាហ៍ ទៅមួយសប្តាហ៍ នៅផ្លូវថ្មើរជើង (Walk Street) មានអ្នកទៅលេងកម្សាន្តរាប់ពាន់នាក់ ព្រមទាំងមានការបង្ហាញពីវប្បធម៌ខ្មែរជាច្រើនរួមទាំងការកម្សាន្ត និងម្ហូបអាហារចម្រុះ ជាពិសេស នំបញ្ចុកខ្មែរ ជាអាហារដ៏ពេញនិយមនៅទីនោះ៕

The post ផ្លូវថ្មើរជើង (Walk Street) សប្តាហ៍នេះ នឹងមានការសម្តែងល្ខោនខោល និងល្ខោនបាសាក់ appeared first on Kampuchea Thmey Daily.

នៅក្នុងសារអបអរសាទរ របស់សម្តេចតេជោ ហ៊ុន សែន បានបញ្ជាក់ថា «ល្ខោនខោល» ជាស្នាដៃសិល្បៈបុរាណ ដ៏វិសេសវិសាលអស្ចារ្យរបស់កម្ពុជា ត្រូវបានអង្គការយូណេស្កូ សម្រេចដាក់ចូលក្នុងបញ្ជី បេតិកភណ្ឌពិភពលោក អរូបីនៃមនុស្សជាតិ ក្នុងឱកាសកិច្ចប្រជុំលើកទី១៣ ក្នុងទីក្រុងព័រល្វីស នៃសាធារណរដ្ឋម៉ូរីស នៅថ្ងៃទី២៨ ខែវិច្ឆិកា ឆ្នាំ២០១៨ ។

បន្ថែមពីនេះ ខ្លឹមសាររបស់សម្តេចតេជោក៏បញ្ជាក់ថា ការដាក់បញ្ចូល «ល្ខោនខោល» ទៅក្នុងបញ្ជីអរូបីនៃមនុស្សជាតិនាពេលនេះ គឺជាការរួមចំណែកធ្វើឲ្យកេរ្តិ៍ឈ្មោះ របស់ព្រះរាជាណាចក្រកម្ពុជា កាន់តែល្បីសុះសាយទូទាំងពិភពលោក ព្រមទាំងធ្វើឱ្យកម្ពុជាក្លាយ ជាតួអង្គកាន់តែលេចធ្លោថែមទៀត នៅលើវេទិកាបេតិកភណ្ឌពិភពលោកថែមទៀតផង។

សូមជម្រាបថា បើតាមសៀវភៅបញ្ជីសារពើភណ្ឌមរតកវប្បធម៌អរូបីកម្ពុជា ដែលរៀបរៀងដោយក្រសួងវប្បធម៌ និងវិចិត្រសិល្បៈ បានឱ្យដឹងថា ល្ខោនខោល ជាល្ខោនមួយបែបដែលពាក់មុខខ្មុកសម្តែង ហើយជាទូទៅតួអង្គសុទ្ធតែមនុស្សប្រុស និងសម្តែងបានតែក្នុង ឈុតឆាករឿង រាមកេរ្តិ៍ តែប៉ុណ្ណោះ។ ល្ខោននេះធ្វើកាយវិការតាមសំឡេងពោល ហើយកំដរដោយភ្លេងពិណពាទ្យ៕

The post សម្តេចតេជោ អបអរសាទរខួប៦ឆ្នាំ នៃការបញ្ចូលល្ខោនខោល ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ appeared first on Kampuchea Thmey Daily.

ប្រភព​បាន​ឲ្យ​​ដឹង​ដោយ​ខ្លី​ដូច្នេះ​ថា ជម្រាប​លា​ពុក​ម៉ែ​បងប្អូន​ យើង​ខ្ញុំ​ទាំង ៦រូប​​រៀប​ចំ​ចេញ​​ដំណើរ​​ទៅ​សម្តែង ល្ខោនខោល នៅ​ទី​ក្រុង សូឡូ នៃ​ប្រទេស​ឥណ្ឌូណេស៊ី។ ល្ខោន​ខោល​​ខ្មែរ​លើ​ឆាក​អន្តរជាតិ​រួមគ្នា​​ជ្រោមជ្រែង​ភាព​ថ្កុំថ្កើង​នៃ​​វប្បធម៌​រយីង។

លោក ម៉ូ ខុន ច័ន្ទសិទ្ធិការ្យ ប្រធាន​យុវជន​ល្ខោនខោល​កម្ពុជា​​បាន​បញ្ជាក់​បន្ថែម​ប្រាប់ “កម្ពុជាថ្មី ” តាម​ទូរស័ព្ទ​​នៅ​ព្រឹក​​ថ្ងៃទី១៥ ខែ​វិច្ឆិកា​ នេះ​ថា​ក្រុម​យុវជន​ល្ខោនខោល​ដែល​មាន​គ្នា ៦នាក់​នេះ នឹង ត្រូវ​សម្តែង​រយៈ​ពេល ២ថ្ងៃ ពោល​គឺ​ចាប់​ពីថ្ងៃទី១៧ ដល់១៨ ខែវិច្ឆិកា ឆ្នាំ២០២៣។ សម្រាប់​ការ​ចេញ​សម្តែង​ល្ខោន​​ខោល​នេះ​គឺ ទទួល​បាន​ការ​ផ្តល់​កិត្តិយស​ពី​ក្រសួង​វប្បធម៌ និង​វិចិត្រសិល្បៈ ដើម្បី​តំណាង​ឲ្យ​ប្រទេស​កម្ពុជា។

លោក​បន្ថែម​ថា ក្រុម​យុវជន “ល្ខោន​ខោល​កម្ពុជា” នឹង​ត្រូវ​ចូលរួម​សម្តែង​នៅ​ក្នុង​កម្មវិធី International M ask Festival នៅ​ទីក្រុង​សូឡូ ប្រទេស​ឥណ្ឌូណេស៊ី ដែល​ត្រៀម​លើក​យក​ល្ខោនខោល​ឈុត “ចម្បាំង​ទូភី”។ លោក​រំពឹង​ថា​នឹង​ទទួល​បាន​​ការគាំទ្រ និង​ជោគជ័យ​ក្នុង​សម្តែង​លើ​​ឆាក​អន្តរជាតិ។

ល្ខោនខោល​ គឺជា​ប្រភេទ​ល្ខោន​យ៉ាង​ចំណាស់​មួយ​ក្នុង​ចំណោម​ទម្រង់​សិល្ប​ទស្សនីយភាព​នៅ​កម្ពុជា​ដែល​មាននៅ​ដើម​សម័យ​អង្គរ​។ គេ​ជឿ​​ថា​ល្ខោន​ដែល​ពាក់​មុខ​ខ្មុក​សម្ដែង​នេះ​កើត​ឡើង​នា​អំឡុង​សតវត្ស​ទី​៩ ដោយ​សំអាង​លើ​ចម្លាក់​នៅ​ជ​ជញ្ជាំង​ប្រាសាទ​អង្គរវត្ត​។

ល្ខោន​​ខោល​ត្រូវ​​បាន​​ចុះ​បញ្ជី​នា​​អំឡុង​នៃ​សម័យ​ប្រជុំ​លើក​ទី១៣ នៃ​គណៈកម្មាធិការ​អន្តររដ្ឋាភិបាល​សម្រាប់​ការ​ថែរក្សា​បេតិកភណ្ឌ​វប្បធម៌ អរូបី នៃ​មនុស្ស​ជាតិ​ត្រូវ​​ការ​សង្គ្រោះ​បន្ទាន់​នៅ​ថ្ងៃ​​ទី២៨ ខែ​វិច្ឆិកា ឆ្នាំ២០១៨៕

អត្ថបទ៖ ចាន់រ៉ា

The post យុវជនល្ខោនខោលកម្ពុជា នាំយក”ល្ខោនខោលខ្មែរ” ទៅសម្ដែងលើឆាកអន្តរជាតិ នាប្រទេសឥណ្ឌូណេស៊ី appeared first on Kampuchea Thmey Daily.

​យុវជនល្ខោនខោលកម្ពុជា បានបង្ហោះថា៖ “ជម្រាបសួរបងប្អូនអ្នកគាំទ្រ​ប្រសិនបើពួកយើងរៀបចំ ការសម្តែង​ល្ខោនខោល​ដ៏ធំមួយនាខែវិច្ឆិកា​ឆ្នាំ២០២៣​ខាងមុខនេះ ​តើបងប្អូនគាំទ្រដែរឬទេ​?”​ តាមរយ: នេះមានមតិមួយចំនួនបានបង្ហាញការគាំទ្រដូចគ្នា ដោយចង់ឲ្យមានកម្មវិធីសម្តែងនេះកើតឡើង។

ល្ខោនខោល ​គឺជា​ប្រភេទ​ល្ខោន​យ៉ាង​ចំណាស់​មួយ​ក្នុងចំណោម​ទម្រង់​សិល្បៈ​ទស្សនីយភាព​នៅ​កម្ពុជា ដែល​មាននៅ​ដើម​សម័យអង្គរ​។ គេ​ជឿថា ល្ខោន​ដែល​ពាក់​មុខ​ខ្មុកសម្តែង​នេះ កើតឡើង​​អំឡុង​សតវត្សរ៍​ទី​៩ ដោយ​សំអាង​លើ​ចម្លាក់​នៅតាម​ជ​ញ្ជាំ​ងប្រាសាទអង្គរវត្ត​។

បើតាម​សៀវភៅ «​បញ្ជីសារពើភ័ណ្ឌ​បេតិកភណ្ឌ​វប្បធម៌​អរូបី​​កម្ពុជា​» (Inventory of Intangible Cutural Heritageof Cambodia) ល្ខោនខោលបាន​វិ​វ​ឌ្ឍ​ន៍ចេញពី​ល្ខោន​ព្រះរាជ​ទ្រ​ព្យ​ទៅជា​ល្ខោន ​ដែល​សម្តែងដោយ​មនុស្ស​ប្រុស​សុទ្ធ​។ ​ល្ខោនខោលមាន​សម្តែងតែ​រឿង​រាមកេរ្តិ៍​ប៉ុណ្ណោះ ហើយ​ការសម្តែងមាន​អមដោយ​ពំនោល​សាច់រឿង និង​កំដរ​ដោយ​ភ្លេងពិណពាទ្យ​។

ល្ខោនខោល ត្រូវបានចុះបញ្ជី​នាអំឡុងនៃសម័យប្រជុំលើកទី១៣ នៃគណៈកម្មាធិការអន្តររដ្ឋាភិបាល​សម្រាប់ការថែរក្សាបេតិកភណ្ឌវប្បធម៌អរូបីត្រូវការសង្គ្រោះបន្ទាន់នៅថ្ងៃទី២៨ខែវិច្ឆិកាឆ្នាំ២០១៨៕

អត្ថបទ៖ ចាន់រ៉ា

The post យុវជនល្ខោនខោល ស្នើឲ្យមហាជនជួយគាំទ្រ សម្រាប់ការសម្តែង​ដ៏ធំ នៅខែវិច្ឆិកា​ ខាងមុខ appeared first on Kampuchea Thmey Daily.

ចំពោះ​ព្រឹត្តិការណ៍​វប្បធម៌​«រាត្រី​ចងចាំ» ក្នុង​ឆ្នាំ ២០២២ នេះ រៀបចំ​ឡើង​ដើម្បី​ចូល​អបអរ​ខួប​អនុស្សាវរីយ៍ ៣០ ឆ្នាំ នៃ​ការ​ដាក់​បញ្ចូល​តំបន់​អង្គរ​ចូល​ជា​សម្បត្តិ​បេតិកភណ្ឌ​ពិភពលោក​នៅ​លើ​ទឹកដី​អង្គរ​ខេត្ត​សៀមរាប។ ក្នុង​ការ​អបអរ​ព្រឹត្តិការណ៍​ដ៏​អស្ចារ្យ​នេះ​ដែរ នឹង​មាន​ការ​ចូលរួម​សម្ដែង​ដោយ​សិល្បករ​-​សិល្ប​ការិនី​ល្បីៗ​ជាច្រើន​នាក់​ទៀត​ផង។

ព្រឹត្តិការណ៍​វប្បធម៌​«រាត្រី​ចងចាំ​» ដែល​ត្រៀម​ធ្វើ​ឡើង​នៅ​លើ​ទឹកដី​ខេត្ត​សៀមរាប នា​ថ្ងៃ​ទី ១៤ ខែ​ធ្នូ​ខាង​មុខ ក៏​មាន​ការ​បង្ហាញ​ទស្សនីយភាព​ដូចជា ការ​សម្ដែង​របាំ​បុរាណ ,ល្ខោន​ស្រមោល​ស្បែក​ធំ , ល្ខោន​ខោល, គុន​ល្បុក្កតោ នា​បរិវេណ​ខាងកើត​ប្រាសាទ​អង្គរវត្ត។ ក្នុង​នោះ​មហាជន​ជន​ក៏​អាច​ចូលរួម​ទស្សនា​បាន​ដោយ​សេរី​ចាប់ពី​វេលា​ម៉ោង ០៥ ល្ងាច។

នៅ​លើ​ទំព័រ​ហ្វេស​ប៊ុក​របស់​លោក ទិត្យ ថាវរិទ្ធ ក៏បាន​បង្ហោះ​រូបភាព​ដោយមាន​ខ្លឹមសារ​ថា នៅ​ពេល​ដែល​គ្រប់គ្នា​តែង​និយាយ​ថា ស្រឡាញ់​វប្បធម៌ សូម​បន្ត​នូវ​ក្តី​ស្រឡាញ់​ជា​អមត សូម​ចូលរួម​លើក​ស្ទួយ​ការពារ​វប្បធម៌​របស់​ជាតិ​យើង​សូម្បី​ត្រឹម​ការ​ចូលរួម​ទស្សនា​លើកទឹកចិត្ត ឬ Like & share។

លោក​បន្ត​ថា ឈុត​ល្ខោនខោល​, គុន​ល្បុក្កតោ នឹង​ត្រូវ​បង្ហាញ​វត្តមាន​នៅ​ក្នុង​ព្រឹត្តិការណ៍​វប្បធម៌ «រាត្រី​ចងចាំ​» ដើម្បី​ចូលរួម​អបអរសាទរ​ខួប ៣០ ឆ្នាំ នៃ​ការ​ដាក់​បញ្ចូល​តំបន់​ប្រាសាទ​អង្គរ​ជា​សម្បត្តិ​បេតិកភណ្ឌ​ពិភពលោក​នៅ​ថ្ងៃ​ទី ១៤ ខែ​ធ្នូ ឆ្នាំ ២០២២ ខាង​មុខ​នេះ៕

អត្ថបទ ៖ ចាន់រ៉ា

The post កក្រើកទៀតហើយ! សិល្បករ-សិល្បការិនីល្បីៗជាច្រើនដួង នឹងបង្ហាញខ្លួនក្នុងព្រឹត្តិការណ៍វប្បធម៌ «រាត្រីចងចាំ» appeared first on Kampuchea Thmey Daily.

ល្ខោនខោល ឬល្ខោនពាក់របាំងមុខ ជាប្រភេទសិល្បៈទស្សនីយភាពរបស់ខ្មែរមួយ ដែលមានអាយុកាលអំឡុងសតវត្សរ៍ទី៩ តាមរយៈចម្លាក់លឹប នៅតាមជញ្ជាំងអង្គរ។ លក្ខណៈពិសេសរបស់ល្ខោនខោលគឺ សម្ដែងតែនៅក្នុងរឿង រាមកេរ្តិ៍ខែ្មរតែមួយគត់ មិនយករឿងអ្វីផ្សេងមកសម្ដែងឡើយ ហើយអ្នកសម្តែងសុទ្ធតែជាមនុស្សប្រុស ទោះបីជាតួអង្គស្រីក៏យកប្រុសមកសម្តែងដែរ។

ការសម្ដែងក្នុងល្ខោនដ៏ចំណាស់របស់ខ្មែរនេះ គឺកំដរដោយវង់ភ្លេងពិណពាទ្យ រួមបញ្ចូលទាំងអ្នកពោលរៀបរាប់អំពីដំណើររឿង ហើយតួអង្គធ្វើកាយវិការតាមសម្ដីអ្នកពោលនោះ។

គួរបញ្ជាក់ថា នេះជាឆ្នាំទី៤ហេីយ ដែលអង្គការយូណេស្កូសម្រេចដាក់បញ្ចូល ល្ខោនខោល របស់កម្ពុជា ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ៕

The post អបអរសាទរខួប ៤ឆ្នាំ ល្ខោនខោលវត្តស្វាយអណ្ដែត បញ្ចូលក្នុងបញ្ជីអង្គការយូណេស្កូ appeared first on Kampuchea Thmey Daily.

ផ្អែកទៅលើការសិក្សាតាមរយៈសិលាចារឹកបុរាណ អ្នកស្រាវជ្រាវយល់ថា ល្ខោនខោលមានដើមកំណើតពី ល្ខោនភាណី ជាប្រភេទល្ខោនដែលមានអ្នកពោលរៀបរាប់សាច់រឿង ហើយឃើញមានយ៉ាងហោចណាស់ក៏ចាប់ពី សម័យអង្គរ សតវត្សរ៍ទី ៩-១៤ មកដែរ។

សព្វថ្ងៃនេះ យើងសង្កេតឃើញថាការសម្តែងល្ខោនខោល គឺមានពីរបែប ម្យ៉ាងគឺដើម្បីកម្សាន្ត ឬជាប់នឹងកិច្ចសាសនាបន្តិចបន្តួច និងល្ខោនដែលនៅជាប់នឹងជំនឿក្នុងសហគមន៍។

ក្រុមល្ខោនខោលប្រភេទទី១ មានដូចជាក្រុមល្ខោនលោកតា ជា ហ៊ា ខេត្តបាត់ដំបង ដែលជាក្រុមជួលសម្តែងកម្សាន្តក្នុងពិធីបុណ្យទាននានា។

ចំណែកនៅរាជធានីភ្នំពេញ មានក្រុមល្ខោននៃនាយកដ្ឋានសិល្បៈទស្សនីយភាព និងសាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ និងក្រុមល្ខោនខោលយុវជនល្ខោនខោលកម្ពុជា។

នៅខេត្តកំពង់ធំមានក្រុមល្ខោនខោលមន្ទីរវប្បធម៌ខេត្ត ដែលច្រើនតែតម្លើងល្ខោននេះ សម្រាប់សម្តែងលេងកម្សាន្តក្នុងឱកាសពិសេសនានាក្នុងកម្រិតជាតិ។

ចំណែកល្ខោនប្រភេទទី២នោះ គឺជាប់ជាពិសេសនឹងសហគមន៍ វត្តស្វាយអណ្តែត ហើយល្ខោនវត្តនេះពុំមែនគ្រាន់តែសម្តែងសម្រាប់ការកម្សាន្តសប្បាយប៉ុណ្ណោះទេ គេក៏សម្តែងនៅក្នុងបរិបទជំនឿ ដែលគេជឿថា ពេលសម្តែងល្ខោននេះ នឹងទទួលបាននូវសេចក្តីសុខ ចម្រុងចម្រើន បញ្ចៀសឧបទ្រពចង្រៃ ហើយពិសេសនោះគឺទទួលបានទឹកភ្លៀងគ្រប់គ្រាន់ និង ភោគផលល្អបរិបូរណ៍សម្រាប់រដូវដាំដុះខាងមុខ។

ល្ខោនខោលវត្តស្វាយអណ្តែត តំណាងឱ្យល្ខោនខោលកម្ពុជា ត្រូវបានចុះក្នុងបញ្ជីបេតិកភណ្ឌ វប្បធម៌អរូបីនៃមនុស្សជាតិរបស់អង្គការយូណេស្កូ នៅថ្ងៃទី២៨ ខែវិច្ឆិកា ២០១៨។

យោងតាមសៀវភៅបញ្ជីសារពើភណ្ឌមរតកវប្បធម៌អរូបីកម្ពុជា ដែលរៀបរៀងដោយក្រសួងវប្បធម៌ និងវិចិត្រសិល្បៈ បានបង្ហាញថា ល្ខោនខោល ជាល្ខោនមួយបែបដែលពាក់មុខខ្មុកសម្តែង ហើយជាទូទៅតួអង្គសុទ្ធតែមនុស្សប្រុស និងសម្តែងបានតែក្នុង ឈុតឆាករឿង រាមកេរ្តិ៍ តែប៉ុណ្ណោះ។ ល្ខោននេះធ្វើកាយវិការតាមសំឡេងពោល ហើយកំដរដោយភ្លេងពិណពាទ្យ៕

អត្ថបទ៖ ច័ន្ទ ​វីរៈ

The post ​កូនខ្មែរដឹងទេថា តើសព្វថ្ងៃ ល្ខោនខោល មានប៉ុន្មានប្រភេទ? appeared first on Kampuchea Thmey Daily.