ជីវិតកម្សាន្ដ

យុវជនល្ខោនខោលកម្ពុជា នាំយក”ល្ខោនខោលខ្មែរ” ទៅសម្ដែងលើឆាកអន្តរជាតិ នាប្រទេសឥណ្ឌូណេស៊ី

បានផុស

១ year មុន

នៅ

ថ្ងៃពុធ ១៥ វិច្ឆិកា ២០២៣

ដោយ

នៅព្រឹកថ្ងៃទី១៥ ខែវិច្ឆិកា ឆ្នាំ២០២៣នេះ ក្រុមយុវជនល្ខោនខោលកម្ពុជាបានចេញដំណើរទៅប្រទេសឥណ្ឌូណេស៊ីដើម្បីចូលរួមសម្ដែង “ល្ខោនខោលខ្មែរ” នៅលើឆាកអន្តរជាតិក្នុងទីក្រុងសូឡូនៃប្រទេសឥណ្ឌូណេស៊ី។ នេះបើយោងតាមការបញ្ជាក់នៅលើផេកផ្លូវការយុវជនល្ខោនខោលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានឲ្យដឹងដោយខ្លីដូច្នេះថា ជម្រាបលាពុកម៉ែបងប្អូន យើងខ្ញុំទាំង ៦រូបរៀបចំចេញដំណើរទៅសម្តែង ល្ខោនខោល នៅទីក្រុង សូឡូ នៃប្រទេសឥណ្ឌូណេស៊ី។ ល្ខោនខោលខ្មែរលើឆាកអន្តរជាតិរួមគ្នាជ្រោមជ្រែងភាពថ្កុំថ្កើងនៃវប្បធម៌រយីង។

លោក ម៉ូ ខុន ច័ន្ទសិទ្ធិការ្យ ប្រធានយុវជនល្ខោនខោលកម្ពុជាបានបញ្ជាក់បន្ថែមប្រាប់ “កម្ពុជាថ្មី ” តាមទូរស័ព្ទនៅព្រឹកថ្ងៃទី១៥ ខែវិច្ឆិកា នេះថាក្រុមយុវជនល្ខោនខោលដែលមានគ្នា ៦នាក់នេះ នឹង ត្រូវសម្តែងរយៈពេល ២ថ្ងៃ ពោលគឺចាប់ពីថ្ងៃទី១៧ ដល់១៨ ខែវិច្ឆិកា ឆ្នាំ២០២៣។ សម្រាប់ការចេញសម្តែងល្ខោនខោលនេះគឺ ទទួលបានការផ្តល់កិត្តិយសពីក្រសួងវប្បធម៌ និងវិចិត្រសិល្បៈ ដើម្បីតំណាងឲ្យប្រទេសកម្ពុជា។

លោកបន្ថែមថា ក្រុមយុវជន “ល្ខោនខោលកម្ពុជា” នឹងត្រូវចូលរួមសម្តែងនៅក្នុងកម្មវិធី International M ask Festival នៅទីក្រុងសូឡូ ប្រទេសឥណ្ឌូណេស៊ី ដែលត្រៀមលើកយកល្ខោនខោលឈុត “ចម្បាំងទូភី”។ លោករំពឹងថានឹងទទួលបានការគាំទ្រ និងជោគជ័យក្នុងសម្តែងលើឆាកអន្តរជាតិ។

ល្ខោនខោល គឺជាប្រភេទល្ខោនយ៉ាងចំណាស់មួយក្នុងចំណោមទម្រង់សិល្បទស្សនីយភាពនៅកម្ពុជាដែលមាននៅដើមសម័យអង្គរ។ គេជឿថាល្ខោនដែលពាក់មុខខ្មុកសម្ដែងនេះកើតឡើងនាអំឡុងសតវត្សទី៩ ដោយសំអាងលើចម្លាក់នៅជជញ្ជាំងប្រាសាទអង្គរវត្ត។

ល្ខោនខោលត្រូវបានចុះបញ្ជីនាអំឡុងនៃសម័យប្រជុំលើកទី១៣ នៃគណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌ អរូបី នៃមនុស្សជាតិត្រូវការសង្គ្រោះបន្ទាន់នៅថ្ងៃទី២៨ ខែវិច្ឆិកា ឆ្នាំ២០១៨៕

អត្ថបទ៖ ចាន់រ៉ា

Related Topics:ល្ខោនខោល