វេជ្ជបណ្ឌិត Archives - Kampuchea Thmey Daily

កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេសច្រើនជាងគេ ទៅបន្តកម្មសិក្សានៅបារាំង

អ៊ិន ពិសី — Thu, 16 Oct 2025 08:57:00 +0000

លោកស្រី Marie Buscail ទីប្រឹក្សាទី ១ នៃស្ថានទូតបារាំង ប្រចាំព្រះរាជាណាចក្រកម្ពុជា បានមានប្រសាសន៍ថា ប្រទេសកម្ពុជា គឺជាប្រទេសឈរលេខរៀងទី ១ ក្នុងពិភពលោក ដែលបញ្ជូននិស្សិតវេជ្ជបណ្ឌិតឯកទេសច្រើនជាងគេទៅបន្តកម្មសិក្សានៅប្រទេសបារាំង។

លោកស្រីបានលើកឡើងបែបនេះកាលពីព្រឹកថ្ងៃទី ១៦ ខែតុលា ឆ្នាំ ២០២៥ ក្នុងពិធីសំណេះសំណាលជាមួយនិស្សិតវេជ្ជបណ្ឌិតឯកទេសដែលត្រូវបន្តការសិក្សានៅសាធារណរដ្ឋបារាំង ឆ្នាំសិក្សា ២០២៥-២០២៦ ក្រោមអធិបតីភាពលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។

បើតាមលោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល (ស.វ.ស) បានឱ្យដឹងថា ចាប់ពីឆ្នាំ ១៩៩៦ មក តាមរយៈកិច្ចសហប្រតិបត្តិការជាយូរលង់ ជាមួយដៃគូបារាំង ដោយមានការគាំទ្រពីស្ថានទូតបារាំង ប្រចាំព្រះរាជាណាចក្រកម្ពុជា ស.វ.ស បានបញ្ជូននិស្សិតចុះកម្មសិក្សាតាមមន្ទីរពេទ្យនៅប្រទេសបារាំង ចំនួនពី ៣០ ទៅ ១២៤ នាក់ ក្នុងមួយឆ្នាំៗ ពោលបើគិតចាប់ពីឆ្នាំ ១៩៩៦ មកដល់ឆ្នាំ ២០២៤ សាកលវិទ្យាល័យបានបញ្ជូននិស្សិតចំនួន ១ ១៦១ នាក់ ទៅបន្តការសិក្សា ឬធ្វើកម្មសិក្សានៅប្រទេសបារាំង។ ដោយឡែកសម្រាប់ឆ្នាំ ២០២៥ នេះ មាននិស្សិតថ្នាក់វេជ្ជបណ្ឌិតឯកទេសសរុបចំនួន ៨៤ នាក់ បានទទួលអាហារូបករណ៍ទៅបន្តការសិក្សានៅប្រទេសបារាំង។

លោកសាស្ត្រាចារ្យ បានបន្តថា បច្ចុប្បន្ននេះ សាកលវិទ្យាល័យ មានដៃគូជាតិ និងអន្តរជាតិ ចំនួន ៩០ ស្ថាប័ន និងបានចូលរួមជាបណ្ដាញសាកលវិទ្យាល័យជាតិ និងអន្តរជាតិ ចំនួន ១៤ បណ្ដាញ។ ជាមួយនឹងសក្តានុពល នៃកិច្ចសហប្រតិបត្តិការដ៏ខ្លាំងក្លានេះ សាកលវិទ្យាល័យ មានឱកាសរៀបចំកម្មវិធីអន្តរជាតិ ចំនួន ៣ កម្មវិធីសិក្សាដែលទទួលបានសញ្ញាបត្រពីរ ចំនួន ៣ ក៏ដូចជាសកម្មភាពផ្លាស់ប្តូរសាស្ត្រាចារ្យ មន្ត្រី បុគ្គលិក និស្សិត គម្រោងអភិវឌ្ឍន៍-ស្រាវជ្រាវ ផ្សេងៗ ទៀត ក្នុងទិសដៅជំរុញទៅរកឧត្ដមភាព នៃការបណ្តុះបណ្តាល ការស្រាវជ្រាវ និងការផ្តល់សេវា។

លោកសាស្ត្រាចារ្យ បានបន្តទៀតថា នៅឆ្នាំ ២០២៥ នេះ សាកលវិទ្យាល័យ បានទទួលចំណាត់ថ្នាក់លេខ ១៤៩ ក្នុងចំណោមសាកលវិទ្យាល័យនវានុវត្តន៍កម្រិតពិភពលោក ចំនួន ៤០០ ដែលចូលរួម ប្រកួតប្រជែងក្នុងប្រព័ន្ធ World University Ranking for Innovation (WURI)។ សាកលវិទ្យាល័យ ក៏បានទទួលនូវការទទួលស្គាល់គុណភាពបណ្ដុះបណ្ដាលពីគណៈកម្មាធិការទទួលស្គាល់គុណភាពអប់រំនៅកម្ពុជាពីឆ្នាំ ២០២៤-២០២៨ ដែលនេះជាការទទួលស្គាល់លើកទី ២ បន្ទាប់ពីការទទួលស្គាល់លើកទី ១ ពីឆ្នាំ ២០១៨-២០២៣។ បន្ថែមនេះ សាកលវិទ្យាល័យ ក៏បានទទួលស្គាល់ជា Associate Membership នៃ AUN-QA ដែលការទទួលស្គាល់នេះ ផ្តល់លទ្ធភាពឱ្យ ស.វ.ស អាចដាក់បេក្ខភាពទទួលការវាយតម្លៃកម្មវិធីសិក្សាថ្នាក់តំបន់ផងដែរ។

មានប្រសាសន៍សំណេះសំណាលក្នុងឱកាសនោះដែរ លោកសាស្ត្រាចារ្យ ឈាង រ៉ា បានវាយតម្លៃខ្ពស់ និងកោតសរសើរសាកលវិទ្យាល័យវិទ្យាសាស្ត្រសុខាភិបាល ដែលបានខិតខំពង្រឹងគុណភាពបណ្តុះបណ្តាលនិស្សិត។ លោកសាស្ត្រាចារ្យ បានថ្លែងនូវអំណរគុណដ៏ជ្រាលជ្រៅចំពោះរដ្ឋាភិបាលបារាំង ដែលបាននិងកំពុងបន្តគាំទ្រដល់ការអភិវឌ្ឍវិស័យសុខាភិបាល ជាពិសេសការបណ្តុះបណ្តាលនៅសាកលវិទ្យាល័យវិទ្យាសាស្ត្រសុខាភិបាល។ លោកសាស្ត្រាចារ្យ ឈាង រ៉ា បានកោតសរសើរចំពោះនិស្សិតជ័យលាភីអាហារូបករណ៍ទាំងអស់ ដែលបានខិតខំប្រឹងប្រែងសិក្សាស្រាវជ្រាវតាមឯកទេសរៀងៗ ខ្លួន។

ជាមួយគ្នានេះដែរ លោកសាស្ត្រាចារ្យ បានផ្តល់អនុសាសន៍រំឭកជូននិស្សិតជ័យលាភីទាំងអស់ ត្រូវថែរក្សាសុខភាព , ខិតខំរក្សាអត្តសញ្ញាណ និងលើកកម្ពស់កិត្យានុភាពប្រទេសជាតិ , បង្កើតបណ្ដាញមិត្តភាពអន្តរជាតិ និងសហការវិទ្យាសាស្ត្រជាមួយសាស្ត្រាចារ្យបារាំង , និស្សិតបរទេស , និងសិក្សាស្រូបចំណេះដឹងថ្មីៗ ទៅតាមជំនាញរៀងៗ ខ្លួន ឱ្យអស់ពីលទ្ធភាព សំដៅខិតខំឱ្យស្មើនឹងកម្ពស់កាលានុវត្តភាពដែលបានទទួល។

គួរបញ្ជាក់ថា បច្ចុប្បន្ន សាកលវិទ្យាល័យវិទ្យាសាស្ត្រសុខាភិបាល បានដំណើរការថ្នាក់បណ្តុះបណ្តាលវេជ្ជបណ្ឌិតឯកទេសសរុបចំនួន ២១ និងនៅឆ្នាំសិក្សា ២០២៤-២០២៥ នេះ មាននិស្សិតកំពុងសិក្សាវេជ្ជបណ្ឌិតឯកទេសសរុបទាំង ២១ ឯកទេស មានចំនួន ៩៥០ នាក់៕

អត្ថបទ ៖ សំអឿន

The post កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេសច្រើនជាងគេ ទៅបន្តកម្មសិក្សានៅបារាំង appeared first on Kampuchea Thmey Daily.

គ្រូពេទ្យណែនាំពលរដ្ឋកុំលេបគ្រាប់បំពេញរាជ្យចូលពោះ ព្រោះអាចបង្កគ្រោះថ្នាក់ដល់ជីវិត

អុន ស្រីមាន — Sat, 14 Sep 2024 02:03:32 +0000

វេជ្ជបណ្ឌិត នៅមន្ទីរពេទ្យកាល់ម៉ែតបានផ្សព្វផ្សាយណែនាំដល់ពលរដ្ឋគ្រាប់រូបដែលចូលចិត្តពិសាផ្លែបំពេញរាជ្យ ឬផ្លែឈើណាដែលមានគ្រាប់ធំៗ សូមកុំលេបគ្រាប់វាចូលក្នុងពោះ ព្រោះអាចបង្កជាគ្រោះថ្នាក់ធ្ងន់ធ្ងរដល់ជីវិត ។ នេះបើតាមការផ្សាយរបស់មន្ទីរពេទ្យកាល់ម៉ែតតាមទំព័រហ្វេសប៊ុក នៅថ្ងៃទី១៣ ខែកញ្ញា ឆ្នាំ២០២៤។

ប្រភពដដែលបន្តថា ជាធម្មតាគ្រាប់ផ្លែបំពេញរាជ្យ មិនអាចរំលាយ ឬកិនបំបែក ដោយសារទឹកអាស៊ីតក្រពះ និងសរីរាង្គផ្សេងៗនៃប្រព័ន្ធរំលាយអាហាររបស់មនុស្សបានឡើយ។ គ្រាប់ផ្លែនេះនឹងត្រូវបន្តបញ្ជូនទៅតាមពោះវៀនតូច ហើយមកស្តុកទុកចុងបញ្ចប់ក្នុងផ្នែកខាងចុងនៃពោះវៀនធំ (Rectum និង Sigmoïde) មុនបន្ទោរបង់ចេញមកជាមួយលាមក។ ជាមួយគ្នានេះ ផលវិបាកដែលបង្កឡើងដោយគ្រាប់ផ្លែបំពេញរាជ្យក្នុងប្រព័ន្ធរំលាយអាហារមនុស្ស គឺ រំខានដល់ការរំលាយអាហារ និងចលនាបញ្ជូនចំណីក្នុងក្រពះពោះវៀនដែលធ្វើឲ្យមានអាការៈឆាប់ឆ្អែត ចុកឆ្អល់ ឈឺពោះមួល ចង្អោរ ឬក្អួតជាដើម។ បង្កឲ្យរលាកតាមផ្លូវរំលាយអាហារដែលមានអាការៈ ចុកពោះ រាគមួល និង គ្រុនក្ដៅ ហើយក៏បង្កឲ្យលាមករឹងក្ដៀន ពិបាកបន្ទោរបង់ផងដែរ។

ជាមួយគ្នានេះ គ្រូពេទ្យបានបញ្ជាក់ថា ផលវិបាកធ្ងន់ធ្ងរនៃការលេបគ្រាប់បំពេញរាជ្យចូលពោះ គឺ គ្រាប់បំពេញរាជ្យកកស្ទះយូរក្នុងពោះវៀនធំ ដែលនៅលាយឡំនឹងលាមកក្ដៀនបង្កឲ្យពោះវៀនបាត់បង់សមត្ថភាពរុញកាកសំណល់ចេញមកក្រៅ ធ្វើឲ្យអ្នកជំងឺមិនអាចបន្ទោបង់លាមកច្រើនថ្ងៃ រហូតដល់តឹងពោះខ្លាំង ហូបមិនបាន និងមានការក្អួតខ្លាំងក្រោយហូបអាហារ។ មិនតែប៉ុណ្ណោះ គ្រាប់បំពេញរាជ្យដែលកកស្ទះយូរក្នុងពោះវៀន បានកកិតនឹងភ្នាសពោះវៀនដែលកំពុងរលាក គឺអាចបង្កឲ្យមានការចាក់មុតធ្លុះដាច់ធ្លាយពោះវៀនសាយភាយលាមកនិងមេរោគ បណ្ដាលឲ្យរលាកស្រោមពោះធ្ងន់ធ្ងរ(Péritonite) ដែលពេលខ្លះការមកដល់មន្ទីរពេទ្យយឺតយាវរបស់អ្នកជំងឺ ធ្វើឲ្យមានការលំបាកក្នុងការសង្រ្គោះអាយុជីវិត ទោះបីបានព្យាបាលដោយការវះកាត់ក៏ដោយ។

គ្រូពេទ្យប្រាបើបន្តថា ជាទូទៅផលវិបាកធ្ងន់ធ្ងរទាំងនេះងាយកើតលើមនុស្សដែលមានវ័យចំណាស់ ដែលមានប្រព័ន្ធរំលាយអាហារខ្សោយស្រាប់។ មនុស្សមានជំងឺផ្លូវរំលាយអាហារស្រាប់ អ្នកឧស្សាហ៍ក្ដៀនលាមកដែលជារឿយៗពិបាកបន្ទោរបង់។ មនុស្សមានជំងឺប្រចាំកាយ និងប្រព័ន្ធភាពស៊ាំចុះខ្សោយដែលងាយឆ្លងរោគ ហើយងាយរលាកផ្លូវអាហារ ដូចជាអ្នកកើតជំងឺទឹកនោមផ្អែម និងអ្នកកើតជំងឺឱកាសនិយមផ្សេងៗជាដើម។ មនុស្សប្រើថ្នាំជំងឺប្រចាំកាយស្រាប់មួយចំនួន ដែលថ្នាំខ្លះមានសកម្មភាពឲ្យចលនាពោះវៀនថយចុះ (ថ្នាំមួយចំនួនក្នុងជំងឺប្រព័ន្ធប្រសាទ និងជំងឺផ្លូវចិត្ត)។

វិធីព្យាបាលផលវិបាកនៃការលេបគ្រាប់ផ្លែបំពេញរាជ្យ៖ ក្នុងករណីហូបគ្រាប់ផ្លែកំពីងរាជ្យចំនួនតិច អាចបង្កផលវិបាកកម្រិតស្រាល ដែលទាមទារការព្យាបាលដោយប្រើថ្នាំបន្ទន់លាមក ក្នុងគោលបំណងឲ្យបានបន្ទោរបង់គ្រាប់កំពីងរាជ្យទាំងនោះចេញមកវិញ។ ប៉ុន្តែ ក្នុងករណីអ្នកជំងឺមានផលវិបាកធ្ងន់ធ្ងរទាំងពីរដូចបានរៀបរាប់ខាងលើ គឺចាំបាច់ព្យាបាលដោយការវះកាត់ក្នុងគោលបំណងយកគ្រាប់ផ្លែបំពេញរាជ្យ និងលាមកដែលកកស្ទះក្នុងពោះវៀនចេញ ហើយលាងសម្អាតស្រោមពោះ ព្រមទាំងវះកាត់ពោះវៀនធ្លាយទៅតាមក្បួនវេជ្ជសាស្រ្ត៕

The post គ្រូពេទ្យណែនាំពលរដ្ឋកុំលេបគ្រាប់បំពេញរាជ្យចូលពោះ ព្រោះអាចបង្កគ្រោះថ្នាក់ដល់ជីវិត appeared first on Kampuchea Thmey Daily.

វេជ្ជបណ្ឌិតស៊ុយអែតណែនាំ មិនឲ្យកុមារអាយុក្រោម ២ ឆ្នាំ ប្រើឧបករណ៍ឌីជីថល

Boa Sokunveary — Mon, 06 Nov 2023 07:50:00 +0000

តាមការណែនាំរបស់វេជ្ជបណ្ឌិតស៊ុយអែត កូនក្មេងអាយុក្រោម ២ ឆ្នាំមិនគួរប្រើឧបករណ៍ឌីជីថលដូចជា ទូរស័ព្ទ ទូរទស្សន៍ ឬ iPad ឡើយ ។

ទន្ទឹមនេះ សមាគមគ្រូពេទ្យកុមារស៊ុយអែតបានបញ្ជាក់ថា កុមារដែលមានអាយុចាប់ពី ២ ទៅ ៥ ឆ្នាំ អាចមើលឧបករណ៍ទាំងនោះត្រឹមរយៈពេល ១ ម៉ោងប៉ុណ្ណោះ ក្នុងមួយថ្ងៃ ។

ជាការពិតណាស់ ទោះបីជាឧបករណ៍ឌីជីថលមានប្រយោជន៍សម្រាប់ការរស់នៅក៏ដោយ ប៉ុន្តែខួរក្បាលរបស់កុមារមិនទាន់មានភាពចាស់ទុំគ្រប់គ្រាន់ដើម្បីទទួលយកអត្ថប្រយោជន៍ទេ ។ ផ្ទុយទៅវិញ វាអាចប៉ះពាល់ដល់ការអភិវឌ្ឍន៍របស់កុមារទៀតផង ។

ក្មេងតូចៗ ជាវ័យត្រូវការបំផុតសម្រាប់ការអភិវឌ្ឍន៍ខួរក្បាលដែលទទួលបានពីពិភពខាងក្រៅ ដើម្បីស្វែងយល់ពីបរិស្ថានជុំវិញពួកគេ ក៏ដូចជាការអភិវឌ្ឍន៍សកម្មភាពប្រចាំថ្ងៃជាពិសេស ។

ជាក់ស្ដែងកុមារដែលប្រើឧបករណ៍ឌីជីថលជាប្រចាំមានភាពឆេវឆាវ មិនអាចផ្ដោតអារម្មណ៍បានល្អ និងមានការចងចាំអន់ជាងក្មេងដែលមិនប្រើ ។ លើសពីនេះកុមារដែលប្រើឧបករណ៍ឌីជីថលយូរម៉ោងក៏ប្រឈមនឹងជំងឺបាក់ទឹកចិត្តពីកុមារភាពផងដែរ ៕

ប្រែសម្រួល៖ វារី

ប្រភព៖ Dailymail

ចុចអាន៖ អ្នកជំនាញបង្ហាញក្ដីបារម្ភខ្លាំង ស្របពេលក្មេងអាយុក្រោម ២ឆ្នាំ មានទម្លាប់មើលអេក្រង់ឌីជីថលរយៈពេលយូរ

The post វេជ្ជបណ្ឌិតស៊ុយអែតណែនាំ មិនឲ្យកុមារអាយុក្រោម ២ ឆ្នាំ ប្រើឧបករណ៍ឌីជីថល appeared first on Kampuchea Thmey Daily.

សោកស្តាយ! ត្រឹមមួយថ្ងៃ វេជ្ជបណ្ឌិតឥណ្ឌាដល់ទៅ ៥០នាក់ ត្រូវស្លាប់ដោយសារកូវីដ

Sok Sovann — Fri, 21 May 2021 08:30:23 +0000

សមាគមវេជ្ជសាស្ត្រឥណ្ឌា (IMA) បានបញ្ចេញព័ត៌មានថ្មីបំផុតថា វេជ្ជបណ្ឌិតឥណ្ឌាចំនួន៥០នាក់ បានស្លាប់ដោយសារជំងឺកូវីដ-១៩ ក្នុងរយៈពេលត្រឹមតែមួយថ្ងៃកាលពីថ្ងៃអាទិត្យ។ តួលេខនេះ បានធ្វើឲ្យវេជ្ជបណ្ឌិតឥណ្ឌាសរុបចំនួន២៤៤នាក់ហើយ ដែលបានបាត់បង់ជីវិតដោយសារជំងឺកូវីដ នៅឆ្នាំនេះ។

កាលពីល្ងាចថ្ងៃចន្ទ អតីតប្រធាន IMA លោកវេជ្ជបណ្ឌិត KK Aggarwal បានទទួលមរណភាពបន្ទាប់ពីមានការប្រយុទ្ធជាមួយជំងឺកូវីដ-១៩អស់រយៈពេលយ៉ាងយូរ”។ នេះបើយោងតាមការបង្ហោះលើគណនី Twitter របស់លោក។

IMA និយាយថា មានគ្រូពេទ្យឥណ្ឌាជិត១,០០០នាក់ហើយបានស្លាប់ ចាប់តាំងពីជំងឺរាតត្បាតបានផ្ទុះឡើងកាលពីនិទាឃរដូវឆ្នាំមុន។

ទោះបីជាយ៉ាងណាក៏ដោយ តួលេខនេះត្រូវបានគេគិតថា តំណាងឲ្យមួយផ្នែកប៉ុណ្ណោះនៃចំនួនគ្រូពេទ្យឥណ្ឌាសរុប ដែលទំនងជាបានស្លាប់ដោយសារជំងឺកូវីដ ព្រោះ IMA គ្រាន់តែកត់ត្រាការស្លាប់ក្នុងចំណោមសមាជិកចំនួន៣៥០,០០០នាក់របស់ខ្លួនប៉ុណ្ណោះ។

យោងតាមគេហទំព័រ NDTV បានចុះផ្សាយថា ឥណ្ឌាមានគ្រូពេទ្យជាង ១,២០០,០០០ នាក់។

IMA និយាយថា វេជ្ជបណ្ឌិតជាច្រើនមិនទាន់ទទួលបានវ៉ាក់សាំងនៅឡើយទេ ហើយងាយនឹងឆ្លងមេរោគនេះណាស់ ដោយសារតែធ្វើការងារហួសកម្លាំង៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ គ្រូពេទ្យឥណ្ឌា៣នាក់ រួមគ្នាចាប់រំលោភអ្នកជំងឺកូវីដក្នុងបន្ទប់ ICU

The post សោកស្តាយ! ត្រឹមមួយថ្ងៃ វេជ្ជបណ្ឌិតឥណ្ឌាដល់ទៅ ៥០នាក់ ត្រូវស្លាប់ដោយសារកូវីដ appeared first on Kampuchea Thmey Daily.

ព្យាបាលអ្នកជំងឺនៅគ្លីនិកខ្លួនឯង ទីបំផុត វេជ្ជបណ្ឌិតថៃដំបូងគេ ឆ្លងនិងស្លាប់ដោយសារកូវីដ

Sok Sovann — Thu, 18 Feb 2021 07:19:57 +0000

វេជ្ជបណ្ឌិតម្នាក់នៅខេត្ត Maha Sarakham បានទទួលមរណភាពដោយសារជំងឺកូវីដ១៩។ លោកជាគ្រូពេទ្យជនជាតិថៃដំបូងបំផុតដែលត្រូវបានសម្លាប់ដោយសារជំងឺនេះ។

លោកវេជ្ជបណ្ឌិត Panya Hanphanitphan អាយុ៦៦ឆ្នាំ ត្រូវបានគេប្រកាសថា ស្លាប់ក្នុងមន្ទីរពេទ្យ Srinagrind នៃទីក្រុង Khon Kaen នៅវេលាម៉ោង១:១៩ ព្រឹកថ្ងៃព្រហស្បតិ៍។

លោកវេជ្ជបណ្ឌិត Panya គឺជាអ្នកជំងឺកូរ៉ូណាទី១៨ដែលត្រូវបានកត់ត្រានៅក្នុងខេត្តភាគឦសានមួយនេះ ចាប់តាំងពីរលកនៃជំងឺកូវីដ១៩ ចាប់ផ្តើមនៅពាក់កណ្តាលខែធ្នូ។

គាត់បានព្យាបាលអ្នកជំងឺ៣នាក់នៅគ្លីនិករបស់គាត់ មុនពេលចុះខ្សោយសុខភាពដោយសារជំងឺនេះ។

នៅថ្ងៃទី១៣ខែមករា អ្នកជំងឺគ្រុនក្តៅម្នាក់បានទៅព្យាបាលនៅគ្លីនិករបស់គាត់។ ក្រោយមក អ្នកជំងឺត្រូវបានគេរកឃើញថាបានឆ្លងមេរោគកូវីដ១៩។

នៅថ្ងៃទី១៤ខែមករា អ្នកជំងឺម្នាក់ទៀតដែលមានអាការៈក្អកតែមិនមានគ្រុនក្តៅ បានមកព្យាបាលនៅគ្លីនិករបស់គាត់។

នៅថ្ងៃទី២៥ខែមករា គាត់បានព្យាបាលអ្នកជំងឺម្នាក់ដែលមានគ្រុនក្តៅខ្លាំង ហើយបានបញ្ជូនពួកគេទៅកាន់ផ្នែកជំងឺផ្លូវដង្ហើមក្នុងមន្ទីរពេទ្យ។ អ្នកជំងឺនោះត្រូវបានគេធ្វើរោគវិនិច្ឆ័យឃើញថា ជាអ្នកជំងឺកូវីដ១៩ ទី២ប្រចាំខេត្ត។

នៅល្ងាចថ្ងៃទី២៨ខែមករា គ្រូពេទ្យបានបិទគ្លីនិករបស់គាត់ក្រោយដឹងថា អ្នកជំងឺបានឆ្លងមេរោគ បន្ទាប់មកបានទៅផ្ទះនិងធ្វើចត្តាឡីស័ក។

នៅព្រឹកបន្ទាប់ គាត់បានទៅមន្ទីរពេទ្យដើម្បីធ្វើតេស្តរកកូវីដ ប៉ុន្តែរកមិនឃើញវីរុសទេ។ គាត់បានវិលត្រឡប់មកផ្ទះវិញហើយបន្តធ្វើចត្តាឡីស័ក។

នៅថ្ងៃទី៣១ខែមករា គ្រូពេទ្យឈឺសាច់ដុំនិងក្តៅខ្លួន។ នៅថ្ងៃទី១ខែកុម្ភៈ គាត់បានទៅមន្ទីរពេទ្យសម្រាប់ការធ្វើតេស្តកូវីដលើកទីពីរ ហើយលទ្ធផលគឺវិជ្ជមាន។

គាត់ត្រូវបានគេបញ្ជូនទៅមន្ទីរពេទ្យ Maha Sarakham ដោយស្ថិតក្រោមការមើលថែយ៉ាងយកចិត្តទុកដាក់មុនពេលបញ្ជូនទៅមន្ទីរពេទ្យ Srinagarind ក្នុងទីក្រុង Khon Kaen។

ស្ថានភាពរបស់គាត់កាន់តែយ៉ាប់យ៉ឺន ហើយវេជ្ជបណ្ឌិត Panya បានស្លាប់នៅព្រឹកថ្ងៃព្រហស្បតិ៍៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ កូវីដនៅថៃបង្ហាញសញ្ញាធូរស្រាល

ចុចអាន៖ សម្តេចតេជោ ចេញបទបញ្ជាបកស័ក្តិអធិការស្រុកកំរៀង ករណីនាំពលករឆ្លងដែនខុសច្បាប់ពីថៃចូលកម្ពុជាគេចពីការធ្វើចត្តាឡីស័ក

The post ព្យាបាលអ្នកជំងឺនៅគ្លីនិកខ្លួនឯង ទីបំផុត វេជ្ជបណ្ឌិតថៃដំបូងគេ ឆ្លងនិងស្លាប់ដោយសារកូវីដ appeared first on Kampuchea Thmey Daily.

វេជ្ជបណ្ឌិតម្នាក់ព្រមានថា អ្នកជាសះស្បើយពីជំងឺកូវីដ១៩អាចខ្សោយឬងាប់លិង្គ

Sok Sovann — Sun, 06 Dec 2020 23:43:00 +0000

យោងតាមអ្នកជំនាញផ្នែកវេជ្ជសាស្ត្របានឲ្យដឹងថា អ្នកឆ្លងជំងឺកូវីដ១៩អាចនឹងទទួលរងផលប៉ះពាល់សុខភាពរយៈពេលយូរដូចជាការខ្សោយឬងាប់លិង្គជាដើមក្នុងចំណោមមនុស្សប្រុស។

អ្នកជំនាញផ្នែកជំងឺឆ្លងលោកស្រីវេជ្ជបណ្ឌិត Dena Grayson បាននិយាយថា ឥឡូវនេះ មានការភ័យខ្លាចថា ជំងឺនេះអាចប៉ះពាល់ដល់សមត្ថភាពលើគ្រែរបស់បុរសថ្វីបើពួកគេបានជាសះស្បើយក៏ដោយ។

លោកស្រី Grayson បានប្រាប់កម្មវិធី LX របស់ទូរទស្សន៍ NBC Chicago ថា “មានការព្រួយបារម្ភពិតប្រាកដនៅទីនេះដែលថា បុរសអាចមានបញ្ហាខ្សោយលិង្គរយៈពេលយូរដោយសារតែវីរុសកូរ៉ូណាព្រោះយើងដឹងថា វាបណ្តាលឲ្យមានបញ្ហាក្នុងសរសៃឈាម”។

អ្នកជំនាញផ្នែកជំងឺឆ្លងលោកស្រីវេជ្ជបណ្ឌិត Dena Grayson

លោកស្រីបន្ថែមថា “នេះគឺជាអ្វីដែលគួរឲ្យព្រួយបារម្ភបំផុត។ វាមិនត្រឹមតែថាវីរុសនេះអាចសម្លាប់អ្នកបានទេប៉ុន្តែវាក៏អាចបង្កឲ្យមានផលវិបាករយៈពេលយូរអង្វែងនិងមួយជីវិតផងដែរ”។

បើទោះបីជាមនុស្សភាគច្រើនហាក់ដូចជាបានជាសះស្បើយពីជំងឺកូវីដ១៩ក៏ដោយប៉ុន្តែលោកស្រី Grayson បានព្រមានថា នាពេលអនាគត មនុស្សទាំងនោះនឹងជួបប្រទះផលវិបាកអវិជ្ជមានរយៈពេលយូរពីការឆ្លងមេរោគរួមទាំងផលវិបាកផ្នែកសរសៃប្រសាទផងដែរ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ លោកយាយវ័យ ១០១ ឆ្នាំនៅរស់រានមានជីវិត បើទោះឆ្លងកូវីដ ៣ ដងក៏ដោយ

ចុចអាន៖ ប្រយ័ត្នឲ្យមែនទែន! កាណាដា បង្ហាញថា កុមារ១ភាគ៣ដែលឆ្លងកូវីដមិនបង្ហាញរោគសញ្ញាទេ

The post វេជ្ជបណ្ឌិតម្នាក់ព្រមានថា អ្នកជាសះស្បើយពីជំងឺកូវីដ១៩អាចខ្សោយឬងាប់លិង្គ appeared first on Kampuchea Thmey Daily.