រដ្ឋបាល ស្រុកស្រីសន្ធរ បានជ្រើសយកទីអារាម វត្តកោះកែវ ដែលស្ថិតនៅ ឃុំព្រែកដំបូក ជាកន្លែងសម្រាប់រៀបចំសង្ក្រាន្តដ៍ធំមួយ ខណៈបច្ចុប្បន្ន ព្រះសង្ឃ រួមនឹងគណៈគ្រប់គ្រង វត្ដកោះកែវ មមាញឹក រៀបចំតុបតែងផ្កាផ្ញី ភ្លើងពណ៌ ដំឡើងរោង កន្លែងថតរូបប្លែកៗ និងបានបង្កើតកម្មវិធីកម្សាន្តសប្បាយៗជាច្រើនផងដែរ។

ព្រះអង្គ វិសុទ្ធមុនី រស់ លឹមខូយ ព្រះរាជាគណៈថ្នាក់កិត្តិយស ព្រះធម្មធរគុណខេត្ត និងជាព្រះគ្រូសិរិវិជ្ជាព្រះអនុគុណស្រុកស្រីសន្ធរ និងជាព្រះចៅអធិការវត្តកោះកែវ បានមានសង្ឃដិកាថា ឆ្នាំនេះ រដ្ឋបាល ស្រុកស្រីសន្ធរ បានជ្រើសយកទីអារាមមួយនេះធ្វើសង្ក្រាន្តប្រចាំស្រុក ដោយគណៈកម្មាធិការបានរៀបចំស្តង់ពិរពណ៍ភូមិមួយផលិតផលមួយប្រចាំឃុំនីមួយៗមកតាំងបង្ហាញ និងមានដាក់តាំងនំចំណីអាហារ ដើម្បីដាក់ផ្តល់ជូនអ្នកមកលេងកម្សាន្តសង្ក្រាន្តស្រុកស្រីសន្ធរ ពិសារដោយសេរីផងដែរ។

លើសពីនេះទៀត សង្ក្រាន្តវត្តកោះកែវឆ្នាំនេះ ក៏បានរៀបចំពិធីរំលឹកដឹងគុណដល់វីរៈកងទ័ព ដែលកំពុងឈរការពារទឹកដីនៅតាមព្រំដែន ហើយក៏បានរៀបចំបង្កើតកម្មវិធីសប្បាយៗជាច្រើនដូចជា៖ លេងល្បែងប្រជាប្រិយខ្មែរ ក្នុងរយៈពេល៣ថ្ងៃ នៃប្រារព្ធពិធីបុណ្យចូលឆ្នាំប្រពៃណីជាតិខ្មែរ។

គួរជម្រាបថា គ្រប់បណ្តាវត្តអារាម និងតាមតំបន់រមណីយដ្ឋានទូទាំងខេត្ត ក៏ត្រៀមចំតុបតែងសង្ក្រានឆ្នាំថ្មីនេះ តាមលក្ខណៈតូច ឬធំ ក្នុងន័យបង្កភាពសប្បាយរីករាយ។

ក្នុងនោះដែរ សង្ក្រាន្តឆ្នាំថ្មីក្នុងវត្តកោះកែវ គណៈកម្មាធិការវត្ត រួមជាមួយរដ្ឋបាលស្រុក ក៍បានដាក់តាំងនំអាកោរ តាប៉ែ ពងស្ងោរ ស្វាយ និងនំចំណីអាហារខ្មែរ ជាច្រើនមុខ​ ដែលបង្ហាញពីផលិតផលតាមបណ្តាភូមិនៅទូទាំងស្រុកស្រីសន្ធរ​ សម្រាប់ផ្តល់ជូនបងប្អូនប្រជាពលរដ្ឋដែលមកលេងកម្សាន្តនៅសង្ក្រាន្តវត្តនកោះកែវនេះបានទទួលទានដោយសេរី ពុំមានគិតថ្លៃអ្វីឡើយ និងមានលេងល្បែងប្រជាប្រិយ៍ខ្មែរ ដើម្បីបង្កការកម្សាន្ត និងអភិរក្សល្បែងប្រជាប្រយ៍ខ្មែរផងដូចជា៖ ទាញព្រ័ត វាយក្អម ស្តេចចង់ បោះអង្គុញ ចាប់កូនខ្លែង រាំលេងកម្សាន្ត និងកម្មវិធី សប្បាយៗជាច្រើនទៀត ដើម្បីធ្វើយ៉ាងណាឱ្យប្លែក និងល្អជាងឆ្នាំមុនៗ មិនតែប៉ុណ្ណោះ អាជ្ញាធរ ខេត្ត ក៏ពង្រឹងការការពារសន្តិសុខ សុវត្ថិភាព សណ្តាប់ធ្នាប់ ឱ្យបានល្អក្នុងឱកាសនោះផងដែរ៕

អត្ថបទ ​និង​រូបភាព​ ៖ ​ឡេក​ ចាន់ពេជ្រ

The post រដ្ឋបាលស្រុកស្រីសន្ធរជ្រើសរើសវត្តកោះកែវធ្វើសង្ក្រាន្តឆ្នាំថ្មី ខណៈក៏មានពិធីរំលឹកគុណដល់វីរៈកងទ័ពពលី appeared first on Kampuchea Thmey Daily.

លោក ចំរើន សុខលីម ប្រធានគណៈកម្មការគ្រប់គ្រងផ្សារទួលទំពូង បានឲ្យដឹងថា ក្រុមការងារគណៈកម្មការផ្សារ បានត្រៀមលក្ខណៈរួចរាល់ពីចំងាយហើយ សម្រាប់កម្មវិធីនគរសង្ក្រាន្តខាងមុខ ដោយបច្ចុប្បន្នក្រុមការងារបានរៀបចំតុបតែងលំអរទីធ្លា និងបរិវេណនៅជុំវិញផ្សារជាបណ្តើរៗ ដើម្បីបង្កើនសោភ័ណ្ឌភាព។

លោក ចំរើន សុខលីម ប្រធានគណៈកម្មការគ្រប់គ្រងផ្សារទួលទំពូង

លោកប្រធានផ្សារបានបញ្ជាក់ថា ក្នុងឪកាសបុណ្យចូលឆ្នាំថ្មីខាងមុខ សង្ក្រាន្តនៅផ្សារទួលទំពូង គ្រោងនិងប្រព្រឹត្តទៅរយះពេល០៩ថ្ងៃ ដោយគិតចាប់ពីថ្ងៃទី១១ ដល់ថ្ងៃទី១៩ ខែមេសា ឆ្នាំ២០២៦នេះ។

អាជីវករលក់ដូរនៅផ្សារទួលទំពូង បានសម្តែងក្តីមោទកភាព និងរីករាយដែលរដ្ឋាភិបាល បានជ្រើសយកផ្សារលក់ដូររបស់ពួកគាត់ជាទីតាំងរៀបចំសង្ក្រាន្តឆ្នាំថ្មី។ ចំពោះការលក់ដូរវិញ ក្រុមអាជីវករ សម្រេចលក់តែផលិតខ្មែរប៉ុណ្ណោះ ព្រោះវាជាផ្នែកក្នុងការជួយលើកស្ទួយសេដ្ឋកិច្ចជាតិ និងអត្តសញ្ញាណជាតិ ។ អាជីវករបន្តលើកឡើងទៀតថា ពេលមានកម្មវិធីសង្ក្រាន្តនៅផ្សារផ្ទាល់ដូច្នេះក្រុមអាជីវកលក់ដូរងាយស្រួលនិងសប្បាយរីករាយ លក់បណ្ដើរលេងល្បែងប្រជាប្រិយបណ្ដើរ។

គួរបញ្ជាក់ផងដែរកាលពីវេលាល្ងាចថ្ងៃទី១៨ ខែមីនា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក៏បានអញ្ជើញចុះពិនិត្យទីតាំងត្រៀមរៀបចំនគរសង្ក្រាន្តនៅផ្សារទួលទំពូងខាងលើផងដែរ ក្នុងនោះឯកឧត្តមក៏ជួបសំណេះសំណាលជាមួយបងប្អូនអាជីវករជាអ្នកលក់ដូរប្រកបដោយមនោសញ្ចេតនារាប់អាន និងកក់ក្តៅជាទីបំផុត។

គួរបញ្ជាក់ថា ព្រឹត្តិការណ៍សង្ក្រាន្តឆ្នាំថ្មី គ្រោងនឹងធ្វើឡើងរយៈពេល ០៦ថ្ងៃ គិតចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងធំៗមួយចំនួន រួមមាន ៖ វត្តភ្នំ , ផ្លូវថ្មើរជើងចតុមុខ (Walk street) សួនវត្តបទុមវតី , ផ្សារទួលទំពូង និងបណ្ដាទីតាំងមួយចំនួនដទៃផ្សេងទៀតផងដែរ៕ អត្ថបទ៖ សុភា

The post ផ្សារទួលទំពូងជាគោលដៅ សំខាន់មួយក្នុងរាជធានីភ្នំពេញ ដែលនឹងរៀបចំនគរសង្ក្រាន្ត ក្នុងឱកាសបុណ្យចូលឆ្នាំថ្មីខាងមុខ appeared first on Kampuchea Thmey Daily.

លោក​ Nakano Hiromasa រដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន ​និង​ទេសចរណ៍​ បាន​លើក​ឡើង​ថា​ពិធីបុណ្យ​ចូល​ឆ្នាំ​ថ្មី​ប្រពៃណីជាតិ​ខ្មែរ​ជា​ពិធីបុណ្យ​ដែល​មាន​សារៈ​សំខាន់​បំផុត​សម្រាប់​ប្រជាជន​ខ្មែរ​ និង​ជា​ឱកាស​​ជួប​ជុំ​ជាមួយ​ក្រុមគ្រួសារ ​និង​ញាតិមិត្ត​ទាំង​អស់ ​ដើម្បី​អបអរ​ទទួល​ឆ្នាំថ្មី​។ លោក​សង្ឃឹមថា ពិធីបុណ្យនេះ មិនត្រឹមតែបង្ហាញពីវប្បធម៌ ​និង​ប្រពៃណីដ៏សម្បូរបែប និង​ទឹក​ចិត្ត​ដ៏​កក់​ក្តៅ​របស់​ប្រជាជន​​ខ្មែរ​នោះ​ទេ ​ប៉ុន្តែ​ក៏​ជា​ស្ពាន​ដើម្បី​ ដែល​បង្កើន​ចំណង​មិត្តភាព​រវាង​ជប៉ុន​ និង​កម្ពុជា​ផង​ដែរ​។​

ទន្ទឹមនឹងនេះ លោកជំទាវ KATAYAMA SATSUKI សមាជិកព្រឹទ្ធសភា និង​ជា​ប្រធាន​គណៈកម្មការ​កិច្ចការ​ស្រាវជ្រាវ ហិរញ្ញវត្ថុ និង​ជា​អនុប្រធាន​គណៈកម្មការស្រាវជ្រាវប្រព័ន្ធពន្ធ​ នៃ​គណបក្ស​ប្រជាធិប​តេយ្យសេរី (LDP) ដែលជាបក្សកាន់អំណាចនៅជប៉ុន បាន​បង្ហាញ​ការ​សោកស្តាយ​ដែល​មិន​អាច​ចូលរួមកម្មវិធីសង្ក្រាន្តខ្មែរនៅជប៉ុនដោយផ្ទាល់ ប៉ុន្តែ​បាន​បង្ហាញ​ជំនឿយ៉ាង​មុត​មាំ​ថា​ ព្រឹត្តិការណ៍​នេះ​បាន​ឆ្លុះ​បញ្ចាំង​អំពី​វប្បធម៌ ​ទំនៀម​ទម្លាប់​ដ៏​សម្បូរ​បែប​របស់​ខ្មែរ​ និង​ជា​ឱកាស​ដែល​ប្រជាពលរដ្ឋ​ខ្មែរ​នៅ​ជប៉ុន ​ព្រម​ទាំង​ភ្ញៀវអន្តរជាតិអាចជួបជុំ ដើម្បីចែករំលែកវប្បធម៌ទៅវិញទៅមក ព្រម​ទាំងជូនពរឱ្យមិត្តភាព និងការអភិវឌ្ឍរបស់ប្រទេសជប៉ុន និងកម្ពុជា កាន់តែ​មាន​ភាព​រីកចម្រើន​បន្ថែម​ទៀត។

ដោយឡែក ថ្លែងក្នុងពិធីបើកកម្មវិធីសង្កា្រន្តខ្មែរនៅជប៉ុន លោក Hirosawa Ichiro អភិបាល​ក្រុងណា​ហ្គូយ៉ា ក៏បានសម្តែងនូវការអបអរសាទរចំពោះការៀបចំព្រឹត្តការណ៍សង្ក្រាន្តខ្មែរនៅជប៉ុនឆ្នាំ២០២៥ នេះ ដែលមានអ្នកចូលរួមយ៉ាងច្រើនកុះករ និងបានពាំនាំនូវប្រពៃណី និងវប្បធម៌ខ្មែរ មកបង្ហាញ​ជូន​ប្រជាពលរដ្ឋ​នៃ​ក្រុងណាហ្គូយ៉ា ព្រមទាំងអ្នកចូលរួមទាំងអស់ក្នុងព្រឹត្តិការណ៍នេះ។ កម្មវិធីនេះពិតជាបានចូលរួមចំណែកយ៉ាងក្នុងការជំរុញកិច្ចសហប្រតិបត្តិការផ្នែកវប្បធម៌រវាងប្រទេសជប៉ុន និងប្រទេសកម្ពុជា។ លោកអភិបាលក្រុង ក៏បានថ្លែងអំណរគុណដល់​រាជរដ្ឋាភិបាល​កម្ពុជា​ដែល​បាន​ជ្រើសរើសទីក្រុងណាហ្គូយ៉ាសម្រាប់ប្រារព្ធព្រឹត្តិការណ៍​សង្រ្កាន្តខ្មែរនៅ​ជប៉ុន​យ៉ាង​គគ្រឹក​គគ្រេង​នេះ​ផង​ដែរ​។

សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយស្ថានឯក​អគ្គរាជទូត​នៃ​ព្រះរាជាណាចក្រកម្ពុជាប្រចាំប្រទេសជប៉ុន ក្រុមការងារ ESEA សមាគមមិត្តយើង សមាគម​កម្ពុជា-​ជប៉ុន គិបូ និងសមាគមនិស្សិតខ្មែរនៅណាហ្គូយ៉ា បានរៀបចំកម្មវិធីសង្រ្កាន្តខ្មែរនៅជប៉ុន ដើម្បី​អបអរសាទរ​ពិធីបុណ្យចូលឆ្នាំថ្មីប្រពៃណីខ្មែរ ឆ្នាំម្សាញ់ សប្តស័ក ព.ស ២៥៦៩ នៅ​សួន​ Garden Pier ទីក្រុង​ណាហ្គូយ៉ា នៃខេត្តអាយឈិ ប្រទេសជប៉ុន ក្រោមសហអធិបតីភាព លោក​ ហាំង តុលា រដ្ឋលេខាធិការ និង​ជា​តំណាង​ដ៏​ខ្ពង់ខ្ពស់ លោក​ ហេង សួរ រដ្ឋមន្ត្រីក្រសួងការងារ និង​បណ្តុះ​បណ្តាល​វិជ្ជាជីវៈ និងលោក​ ទុយ រី ឯកអគ្គរាជទូតកម្ពុជាប្រចាំប្រទេសជប៉ុន ដោយមាន​ការ​ចូលរួម​ពី​តំណាងរដ្ឋាភិបាលជប៉ុន បងប្អូនសហគមន៍ខ្មែរ និស្សិត កម្មសិក្សាការី ពលករ និងភ្ញៀវកិត្តិយស​ជាតិ​ និង​អន្តរជាតិសរុបប្រមាណជិត ១ម៉ឺននាក់។

ក្នុងព្រឹត្តិការណ៍នោះ ក៏មានការរៀបចំពិធីសាសនា ដូចជា បង្សុកូល រាប់បាត្រ ស្រង់ព្រះ ពូនភ្នំខ្សាច់ ប្រគេនចង្ហាន់ព្រះសង្ឃ ទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ និងការដាក់​បង្ហាញ​ស្តង់ម្ហូបអាហារខ្មែរ ផលិតផលខ្មែរជាច្រើនដូចជានំអន្សម នំគម ម្រេចខ្មែរ សម្លៀកបំពាក់​ប្រពៃណី​ខ្មែរ និងការលេងល្បែងប្រជាប្រិយ ដូចជាបោះអង្គញ់ ចោលឈូង ទាញព្រ័ត្រ លាក់កន្សែង ព្រមទាំងការប្រគុំតន្រ្តី និងរាំលេងកម្សាន្ត ប្រកបដោយបរិយាកាសស្និទ្ធស្នាល និងសប្បាយរីករាយ។

គួររំលឹកផងដែរថា ក្រៅតែពីការប្រារព្ធសង្ក្រាន្តឆ្នាំថ្មីនៅក្នុងទីក្រុងណាហ្គូយ៉ា ដែលរដ្ឋមន្ត្រី​ក្រសួង​ដែន​ដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ សមាជិកសភា និងអភិបាលក្រុងណាហ្គូយ៉ា​របស់​ជប៉ុន អបអរសាទរនាពេលនោះ ក្រុមការងារដែលដឹកនាំដោយក្រសួងការងារ និងបណ្តុះ​បណ្តាលវិជ្ជាជីវៈ ក៏បានរៀបចំព្រឹត្តិការណ៍សង្ក្រាន្តឆ្នាំថ្មីនេះចំនួន ៩ទីតាំងផ្សេងទៀត​នៅ​តាម​តំបន់​នានា​ក្នុង​ប្រទេសជប៉ុនផងដែរ៕

The post រដ្ឋាភិបាល​ និង​សភាជប៉ុន ​កោត​សរសើរ ​និង​អបអរសាទរ​ការ​រៀប​ចំ​សង្ក្រាន្ត​ឆ្នាំ​ថ្មី​របស់​ខ្មែរ​នៅ​ជប៉ុន appeared first on Kampuchea Thmey Daily.

សង្ក្រាន្ត រតនគិរី ឆ្នាំ២០២៥ នេះនៅក្នុងបរិវេណមន្ទីរវប្បធម៌ និងវិចិត្រសិល្បៈខេត្ត ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគិរី។ ចំពោះការរៀបចំព្រឹត្តិការណ៍ សង្ក្រាន្តរតនគិរីឆ្នាំ២០២៥នេះ គឺជាទំនៀមទំលាប់ប្រពៃណីជាតិខ្មែរដ៏ល្អឯក តាំងពីបុរាណកាលមកដែលប្រជាពលរដ្ឋខ្មែរគ្រប់ៗរូបប្រារព្ធធ្វើឡើង ក្នុងគោលបំណងអបអរពិធីបុណ្យចូលឆ្នាំខ្មែរប្រពៃណីជាតិ។ បើតាមរដ្ឋបាលខេត្តរតនគិរី បញ្ជាក់ថា ព្រឹត្តិការណ៍សង្ក្រាន្តរតនគិរី ឆ្នាំ២០២៥នេះ នឹងមានការប្រគំតន្រ្តីសម័យ បុរាណ ការរាំលេងកម្សាន្ត ការតាំងពិព័រណ៍ផលិតផល សម្ភារប្រើប្រាស់ក្នុងស្រុក ការបង្ហោះគោម បាញ់កាំជ្រួចជាដើម។ បន្ថែមពីនេះ ក៏មានជាការលេងល្បែងប្រជាប្រិយដូចជា ចោលឈូង បោះអង្គុញ ទាញព្រ័ត លាក់កន្សែង ផងដែរ។

ឆ្លៀតក្នុងឱកាសនេះ រដ្ឋបាលខេត្តបានអំពាវនាវឱ្យពលរដ្ឋចូលរួមឱ្យបានច្រើនកុះករ ដើម្បីរួមចំណែកជួយលើកកម្ពស់វប្បធម៌ ប្រពៃណីជាតិខ្មែរ កិត្យានុភាព និងសក្តានុពលនៅក្នុងខេត្តរតនគិរី។

សូមជម្រាបថា គិតចាប់ពីថ្ងៃ១៣ ដល់ថ្ងៃទី១៦ ខែមេសា ឆ្នាំ២០២៤ កន្លងទៅ ខេត្តរតនគិរី ទទួលបានភ្ញៀវទេសចរទៅលេងកម្សាន្តក្នុងឱកាសបុណ្យចូលឆ្នាំខ្មែរសរុបចំនួន១៣៤,២៩១នាក់ កើនឡើង ១៧.៥៥% បើធៀបនឹងឆ្នាំ២០២៣ មានភ្ញៀវទេសចរជាតិ និងអន្តរជាតិ ទៅកម្សាន្តក្នុងឱកាសពិធីបុណ្យចូលឆ្នាំខ្មែរចំនួន ១១៤,២៤៥ នាក់។ 

យ៉ាងណា នៅមុនពេលពិធីបុណ្យចូលឆ្នាំមកដល់ ប្រជាជនកម្ពុជា តែងសំអាតផ្ទះសម្បែង រៀបចំគ្រឿងរណ្តាប់ទទួលទេវតាឆ្នាំថ្មីរួមមានដូចជា ស្បៀងអាហារ,  រែកទឹកដាក់ពាង, រកអុសទុក, និង កាត់សំលៀកបំពាក់ថ្មីៗជាដើម ។ ថ្ងៃចូលឆ្នាំមកដល់ គេរៀបគ្រឿងសក្ការៈបូជា សំរាប់ទទួលទេវតាថ្មីមាន៖ បាយសី១គូ, ស្លាធម៌១គូ, ធូប៥, ទៀន៥, ទឹកអប់១គូ, ផ្កាភ្ញី, លាជ, ទឹក១ផ្តិល និង ភេសជ្ជៈ, នំនែក, ផ្លែឈើគ្រប់មុខ ។គ្រឿងរណ្ដាប់មានដូចជា៖ ទឹកផ្ដិលអប់ដោយផ្កា, ទៀន៥, ធូប៥, ផ្កាភ្ញី, ភេសជ្ជៈ, និងនំចំណី, ផ្លែឈើជាច្រើន។  បន្ទាប់មក ពួកគេនឹងធ្វើការសែនព្រេន ដោយមានអុជធូប និង ទៀន តាមគេហដ្ឋានរបស់ខ្លួន។

តាមទំនៀមពិធីចូលឆ្នាំប្រព្រឹត្តទៅចំនួន៣ថ្ងៃ។ ថ្ងៃដំបូងជាថ្ងៃមហាសង្ក្រាន្ត, ថ្ងៃទី២ ជាថ្ងៃ វនបត, ថ្ងៃទី៣ ជាថ្ងៃឡើងស័ក ។ រីឯការកំណត់ខែ ថ្ងៃទី១៤ ខែ មេសា ឆ្នាំ ២០២៥ ម៉ោង ០៤ៈ៤៨ នាទី ព្រឹក ជាមហាសង្គ្រាន្ត ដែលឆ្នាំចាស់ត្រូវផុតកំណត់នៅថ្ងៃទី១៦ ខែ មេសា ឆ្នាំ ២០២៥ ជាវិរៈឡើងស័ក ហើយទេព្តាឆ្នាំថ្មីត្រូវចុះមកទទួលតំណែងពីទេព្តាឆ្នាំចាស់នោះ គេអាចដឹងបានដោយប្រើក្បួនហោរាសាស្ត្របុរាណ គឺក្បួនមហាសសង្ក្រាន្តត ។ សម្រាប់ឆ្នាំម្សាញ់ សប្តស័ក ព.ស. ២៥៦៨ ទេពធីតាព្រះនាម «គោរាគទេវី» សៀតផ្កាអង្គារបុស្ស គ្រឿងប្រដាប់កែវបុក្តា (គជខ្យង) ភក្សាហារប្រេង អាវុធស្តាំព្រះខ័ន ឆ្វេងឈើច្រត់ ពាហនៈសត្វខ្លា៕

អត្ថបទ៖ ចាប ខៀវ

The post ខេត្តរតនគិរី នឹងរៀបចំសង្ក្រាន្តឆ្នាំថ្មី ៣ថ្ងៃ នៅបរិវេណមន្ទីរវប្បធម៌ខេត្ត ក្នុងក្រុងបានលុង appeared first on Kampuchea Thmey Daily.

យោងតាមរបាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា រយៈពេល០២ថ្ងៃ គឺថ្ងៃទី១៣ និងថ្ងៃទី១៤ មេសា នៃព្រឹត្តិការណ៍សៀមរាបសង្ក្រាន្តឆ្នាំ២០២៤នេះ ភ្ញៀវទេសចរ និងប្រជាពលរដ្ឋដើរលេងកម្សាន្តក្នុងខេត្តសៀមរាប ចំនួន៤៦៣,៥៤០ នាក់ ក្នុងនោះ ភ្ញៀវទេសចរបរទេសមានចំនួន ៧,៨០៧ នាក់ និងភ្ញៀវទេសចរជាតិ ព្រមទាំងបងប្អូនប្រជាពលរដ្ឋមានចំនួន ប្រមាណ ៤៥៨,០០០ នាក់។

របាយការណ៍ដដែលបានឲ្យដឹងថា ក្នុងចំនួនខាងលើនេះ នៅថ្ងៃទី១៤ ខែ មេសា ឆ្នាំ២០២៤ ដែលជាថ្ងៃទី២ នៃព្រឹត្តិការណ៍សៀមរាបសង្ក្រាន្ត មានភ្ញៀវទេសចរសរុបមានចំនួនប្រមាណ ៤១៧,៨១៩ នាក់ ក្នុងនោះភ្ញៀវទេសចរបរទេសមានចំនួន ៤,៣៥៤ នាក់ រីឯភ្ញៀវទេសចរជាតិ និងបងប្អូនប្រជាពលរដ្ឋមានចំនួន ប្រមាណ ៤១៥,០០០ នាក់។

សូមជម្រាបថា ព្រឹត្តិការណ៍សៀមរាបសង្ក្រាន្តឆ្នាំ២០២៤នេះ ប្រារព្ធធ្វើឡើងរយៈពេល៤ថ្ងៃ ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ដើម្បីអបអរសាទរ បុណ្យចូលឆ្នាំថ្មីប្រពៃណីជាតិខ្មែរ។ ក្នុងព្រឹត្តិការណ៍នេះ មានការរៀបចំកម្មវិធីជាច្រើន រួមមានពិធីសាសនា កម្មវិធីតាំងបង្ហាញវត្ថុសិល្បៈនានា និងកម្មវិធីកម្សាន្តជាច្រើនផងដែរ៕

អត្ថបទ៖ គឿនវេត

The post ២ថ្ងៃ នៃពិធីបុណ្យចូលឆ្នាំ ខេត្តសៀមរាប ទទួលបានអ្នកទេសចរជាតិ អន្តរជាតិមកកម្សាន្ត ជិត៥០ម៉ឺននាក់ appeared first on Kampuchea Thmey Daily.

លោក ស៊ាន សុគន្ធ ប្រធានមន្ទីរទេសចរណ៍ ខេត្តកំពង់ចាម បានបញ្ជាក់បន្ថែមទៀតថា ចំនួនភ្ញៀវដែលមកកាន់ទឹកដី នៃខេត្តកំពង់ចាម បានមកលេង នៅតាមកន្លែងកម្សាន្ត និងរមណីយដ្ឋាននានា ក្នុងនោះមាន ៖រមណីយដ្ឋានទឹកឆា ភ្ញៀវទេសចរជាតិ មានចំនួន ១៨ ៦៩០នាក់ ។

ភ្ញៀវទេសចរជាតិ ចំនួន ១៣ ៥៦២នាក់  បានទៅកម្សាន្តនៅរមណីយដ្ឋានកសិទេសចរណ៍-ថ្មដាទឹកឆា ។ ឯរមណីយដ្ឋានប្រាសាទភ្នំហាន់ជ័យ ទទួលបានភ្ញៀវទេសចរជាតិ មានចំនួន ៤១៣នាក់ ។ សម្រាប់រមណីយដ្ឋានបែមប៊ូរីសត ភ្ញៀវទេសចរជាតិ មានចំនួន ១៣៨នាក់ ភ្ញៀវបរទេស ចំនួន ១៥នាក់ ទៅលេងកម្សាន្ត ។

រមណីយដ្ឋានភ្នំប្រុស-ភ្នំស្រី ភ្ញៀវទេសចរជាតិ មានចំនួន ៦១៦នាក់ ។ រមណីយដ្ឋាននគរបាជ័យ ភ្ញៀវទេសចរជាតិ មានចំនួន ៩០៨នាក់ ។ រមណីយដ្ឋានប្រាសាទភ្នំជើងព្រៃ ភ្ញៀវទេសចរជាតិ មានចំនួន ១៧៥នាក់ ។ រមណីយដ្ឋានឆ្នេរខ្សាច់កោះប៉ែន ភ្ញៀវទេសចរជាតិ មានចំនួន ៥ ១៩៧នាក់ ភ្ញៀវបរទេស មានចំនួន ០៦នាក់ ។ អាហារដ្ឋានស្មៅទន្លេ ភ្ញៀវទេសចរជាតិ មានចំនួន ១៦៥នាក់ ។ ក្រុងកំពង់ចាម ភ្ញៀវទេសចរជាតិ មានចំនួន ៥៧៨ ១១០នាក់ ភ្ញៀវបរទេស មានចំនួន ៣៦នាក់ ។

ភ្ញៀវមកចូលរួមទស្សនាការប្រគុំតន្ត្រី របស់ក្រុមហ៊ុនស្រាបៀវឌ្ឍនៈ  មានចំនួន ១៨ ៥៣៥នាក់ ។ ភ្ញៀវមកលេងកំសាន្តមុខទីលានសាលាខេត្តកំពង់ចាម មានចំនួន ៨៧៤ ៩២០នាក់ ។ ស្នាក់នៅតាមផ្ទះសំណាក់ និងសណ្ឋាគារ ភ្ញៀវទេសចរណជាតិ មានចំនួន ៤ ៧៧៨នាក់ និងភ្ញៀវបរទេសចំនួន ២៤នាក់ ។

ដោយឡែក ចំពោះការងារសន្តិសុខ និងសណ្ដាប់ធ្នាប់សាធារណៈ នៅក្នុងឱកាសថ្ងៃចូលឆ្នាំថ្មី ថ្ងៃទី២នេះដែរ គឺពុំមានអ្វីកើតឡើង គួរឲ្យកត់សម្គាល់ឡើយ ពោលគឺអាស្រ័យដោយការរៀបចំរបស់ ឯកឧត្តម អ៊ុន ចាន់ដា អភិបាលខេត្តកំពង់ចាម តាមរយៈ ការដាក់កម្លាំងល្បាត យាមកាមនៅគ្រប់ទីកន្លែង ដើម្បី បង្កសប្បាយភាព ជូនដល់ប្រជាពលរដ្ឋយើង នៅគ្រប់មជ្ឈដ្ឋាន៕

អត្ថបទ និង រូបភាព ៖ ឡេក  ចាន់ពេជ្រ

The post ថ្ងៃចូលឆ្នាំទី២ ខេត្តកំពង់ចាម ទទួលបានភ្ញៀវទេសចរជាង១លាន៥សែននាក់ appeared first on Kampuchea Thmey Daily.

ក្នុងនោះផងដែរ យោងតាមរបាយការណ៍ដដែលបានគូសបញ្ចាក់ទៀតថា ប្រជាជនថៃជាច្រើនពុំបានដឹងច្បាស់លាស់ ហើយបែរជាមានការយល់ច្រឡំយ៉ាងធំថា អាវប្រភេទនេះគឺជាវប្បធម៌របស់ខ្លួន។ តាមពិតទៅអាវ​ម៉ូដ​ផ្កា​មិន​មាន​នៅ​ប្រទេស​ថៃ​ពី​មុន​មក​ទេ។ ប៉ុន្តែ​វា​ជា​ការ​ពេញ​និយម​ដែល​បាន​មក​ពី​លោក​ខាង​លិច ហើយប្រជាជនថៃរងនូវឥទ្ធិពលពីកោះហាវ៉ៃ​ ទឹកដីសហអាមេរិក​។

ជាពិសេសទៀតនោះ​​ ដោយសារតែអាវកោះហាវ៉ៃមានសាច់ក្រណាត់ទន់ស្រួល និងពណ៌ដ៏ស្រស់ស្អាត ជាពិសេសប្រសិនវាមានលំនាំផ្កាដែលទំនងជាបង្ហាញពីអត្ថន័យដ៏ល្អ ត្រូវនឹងពិធីបុណ្យសង្ក្រាន្ត ឬចាត់ទុកជាថ្ងៃចូលឆ្នាំរបស់ថៃ ទើបអាវ​ផ្កា​ត្រូវ​បាន​គេ​យក​មក​ធ្វើ​ជា​សំលៀក​បំពាក់​ដែល​មនុស្ស​ចូល​ចិត្ត​ស្លៀក ​ក្នុង​ថ្ងៃ​បុណ្យ​សង្ក្រាន្តមកទល់សព្វថ្ងៃនេះ។

សូមបញ្ចាក់ដែរថា រដ្ឋាភិបាលថៃបាននិងកំពុងរៀបចំពិធីបុណ្យសង្ក្រាន្តនៅទូទាំងប្រទេសចាប់ពីថ្ងៃទី ០១ ដល់ថ្ងៃទី ២១ ខែមេសាក្នុងឆ្នាំនេះ ដែលជាពិធីបុណ្យសង្រ្កាន្តដ៏យូរមួយធ្វើឡើង បន្ទាប់ពីអង្គការយូណេស្កូបានទទួលស្គាល់ជាផ្លូវការនូវពិធីបុណ្យសង្ក្រាន្តនាពេលថ្មីៗនេះថា​ ជាបេតិកភណ្ឌវប្បធម៌អរូបីនៃមនុស្សជាតិ៕

អត្ថបទ៖ សាង ស្រីល័ក្ខ

ចុចអាន៖ប៉ូលិសបញ្ចាក់ការស្លាប់របស់តារាចម្រៀងកូរ៉េ Park Bo Ram

The post ថៃ ទទួលស្គាល់ថា អាវផ្កាពាក់ថ្ងៃសង្ក្រាន្តគឺយកលំនាំតាមលោកខាងលិច appeared first on Kampuchea Thmey Daily.

ការស្ទង់មតិដែលធ្វើឡើងដោយមជ្ឈមណ្ឌលព្យាករណ៍សេដ្ឋកិច្ច និងធុរកិច្ចនៃសាកលវិទ្យាល័យសភាពាណិជ្ជកម្មថៃ បានវាយតម្លៃមតិរបស់មនុស្សចំនួន ១,២៨០ នាក់ក្នុងមុខរបរផ្សេងៗគ្នា ចាប់ពីថ្ងៃទី ២៥ ដល់ថ្ងៃទី ៣០ ខែមីនា រហូតដល់ទៅ ៦៦% នៃអ្នកឆ្លើយសំណួរបាននិយាយថា ពួកគេមានបំណងប្រារព្ធពិធីបុណ្យសង្ក្រាន្ត ដោយការធ្វើបុណ្យ, ៤២%, ការគោរពដល់ចាស់ឬសាច់ញាតិ ៤១.៦%, ការលេងជះទឹកគ្នាទៅវិញទៅមក​ និងនៅក្នុងពិធីជប់លៀង ត្រឹម ៣៩.២% ។

ទន្ទឹមនោះផងដែរ ជាងពាក់កណ្តាលនៃអ្នកឆ្លើយសំណួរបាននិយាយថា ពួកគេនឹងធ្វើដំណើរ ប៉ុន្តែភាគច្រើននៅក្នុងខេត្តរៀងៗខ្លួន ២៦% បាននិយាយថាពួកគេនឹងស្នាក់នៅផ្ទះ ១០.៦% បាននិយាយថាពួកគេនឹងធ្វើដំណើរទៅខេត្តផ្សេងទៀត។

គោលដៅទេសចរណ៍ក្នុងស្រុកដែលពេញនិយមបំផុតគឺ ឈុនបុរី, អយុធ្យា, រ៉ាយ៉ុង, សុខោទ័យ, ឈៀងម៉ៃ, នគររាជសីម៉ា, ភូកេត, ក្រាប៊ី, នគរស៊ីធម្មរាត និងបាងកក។ ការចំណាយធ្វើដំណើរក្នុងស្រុកជាមធ្យមក្នុងមួយម្ដងត្រូវបានប៉ាន់ប្រមាណថាមានចំនួន ៦,៤២៥បាត (១៧៥ ដុល្លារអាមេរិក) ខណៈដែលការចំណាយលើការធ្វើដំណើរក្រៅប្រទេសជាមធ្យមត្រូវបានគេប៉ាន់ប្រមាណថាមានចំនួន ៤០,១២៩បាត ក្នុងមួយដំណើរកម្សាន្តម្ដង។

ដោយឡែក លោក Thanawat Pholvichai ទីប្រឹក្សាមជ្ឈមណ្ឌលព្យាករណ៍ និងសាកលវិទ្យាធិការនៃសាកលវិទ្យាល័យ បាននិយាយថា ការចំណាយរបស់ភ្ញៀវទេសចរបរទេស និងក្នុងស្រុកក្នុងអំឡុងពេលពិធីបុណ្យក្នុងខែនេះ ត្រូវបានគេប៉ាន់ស្មានថាមានចន្លោះពី ១៤០ ពាន់លាន ទៅ ២០០ ពាន់លានបាត។

លោក​បាន​បន្ត​ថា សង្ក្រាន្ត​ឆ្នាំ​នេះ​ទំនង​ជា​មាន​ភាព​រស់​រវើក ហើយ​ព្រឹត្តិការណ៍​បុណ្យ​នានា​ត្រូវ​បាន​គេ​រំពឹង​ថា​នឹង​បង្កើត​ការ​ចំណាយ​កើន​ឡើង ដោយ​លោក​បាន​បន្ថែម​ថា ​ក្នុង​ខែ​មេសា​តែ​ឯង ភ្ញៀវ​ទេសចរ​បរទេស​ប្រមាណ ៣.២ លាន​នាក់​ត្រូវ​បាន​រំពឹង​ថា​នឹង​មក​លេង​ប្រទេស​ថៃ។ លោក​ក៏ប៉ាន់​ប្រមាណ​ទៀតថា ពិធីបុណ្យ​សង្ក្រាន្ត​នឹង​ជំរុញ​កំណើន​សេដ្ឋកិច្ច​ពី ២,០១% ទៅ ២,៥០% ឯណោះ៕

សូមជម្រាបជូនថា ពិធីបុណ្យសង្រ្កាននឹងត្រូវប្រារព្ធឡើងនៅទូទាំងប្រទេសថៃក្នុងរយៈពេល ២១ ថ្ងៃ ជាពិសេសរយៈពេល ៥ ថ្ងៃចាប់ពីថ្ងៃទី ១២-១៦ ខែមេសា ដើម្បីសម្គាល់ថា ​វាត្រូវបានទទួលស្គាល់ជាបេតិកភណ្ឌវប្បធម៌អរូបីដោយអង្គការអប់រំ វិទ្យាសាស្ត្រ និងយូណេស្កូ៕

អត្ថបទ៖​ សាង ស្រីល័ក្ខ

ចុចអាន៖បុរសថៃ ដាច់សរសៃឈាមខួរក្បាលស្លាប់ ព្រោះផឹកស្រា ទាំងពេលមេឃកំពុងក្តៅខ្លាំង

The post ការស្ទង់មតិ ៖ សង្ក្រាន្តឆ្នាំនេះ ប្រជាជន ថៃ រាងពិបាកចាយវាយ ព្រោះម្នាក់ៗសុទ្ធតែជាប់បំណុលគេច្រើន appeared first on Kampuchea Thmey Daily.