សង្រ្គាមពាណិជ្ជកម្មអាមេរិកខាងជើង Archives - Kampuchea Thmey Daily

ត្រាំ ដាក់ពន្ធ ៣៥% លើកាណាដា បង្កើនកម្ដៅសង្រ្គាមពាណិជ្ជកម្មអាមេរិកខាងជើងជាថ្មី

Huon Dina — Fri, 11 Jul 2025 02:47:42 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃព្រហស្បតិ៍ថា សហរដ្ឋអាមេរិកនឹងដាក់ពន្ធ ៣៥ ភាគរយ លើទំនិញនាំចូលពីកាណាដា ចាប់ផ្ដើមពីខែក្រោយទៅ ខណៈកំណត់អត្រាពន្ធ ចន្លោះ ១៥-២០ ភាគរយ សម្រាប់ដៃគូពាណិជ្ជកម្មផ្សេងៗទៀត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្នុងលិខិតដែលបង្ហោះនៅលើបណ្ដាញសង្គម លោក ត្រាំ បាននិយាយថា ពន្ធ ៣៥ ភាគរយ នឹងចូលជាធរមាននៅថ្ងៃទី ១ សីហា ដំណាលគ្នានឹងការអនុវត្តសម្រាប់ប្រទេសដែលទទួលរងពន្ធខ្ពស់ផ្សេងទៀតដែរ។ លោក ត្រាំ បានព្រមានកាណាដាកុំឱ្យសងសឹក បើមិនដូច្នោះទេ ពន្ធខ្ពស់នឹងត្រូវដំឡើងបន្ថែមទៀត។

មែនទែនទៅ ៣៥ ភាគរយ ជាកំណើនពីត្រឹម ២៥ ភាគរយ ដែលលោក ត្រាំ បានប្រកាសលើកាណាដា កាលពីខែកុម្ភៈ ដោយបំផ្ទុះសង្រ្គាមពាណិជ្ជកម្មអាមេរិកខាងជើង ក្រោយកាណាដាប្ដេជ្ញាសងសឹក ដោយការដាក់ពន្ធលើទំនិញអាមេរិកដូចគ្នា។

មន្ត្រីរដ្ឋបាល ត្រាំ ម្នាក់និយាយថា ពន្ធថ្មីនឹងមិនរាប់បញ្ជូលទំនិញនៅក្រោមកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា (USMCA) និងពន្ធ ១០ ភាគរយ លើថាមពល និងជី នោះទេ ខណៈ ត្រាំ មិនទាន់សម្រេចចុងក្រោយ។

ត្រាំ បានទទូចថា ការដំឡើងពន្ធ ៣៥ ភាគរយ គឺដោយសារតែតួនាទីរបស់កាណាដាក្នុងលំហូរថ្នាំញៀនហ្វេនតានីលចូលមកសហរដ្ឋអាមេរិក និងគោលនយោបាយ និងរបាំងពាណិជ្ជកម្មពន្ធ និងមិនមែនពន្ធគយ ដែលបង្កជាឱនភាពពាណិជ្ជកម្មសម្រាប់អាមេរិក ហើយគំរាមកំហែងដល់សេដ្ឋកិច្ច និងសន្តិសុខជាតិ។ លោក ត្រាំ និយាយថា ប្រសិនបើកាណាដា ដោះស្រាយបញ្ហាហ្វេនតានីល លោកនឹងពិចារណាកែសម្រួលអត្រាពន្ធ។

ជុំវិញការប្រកាសពន្ធចុងក្រោយ រដ្ឋាភិបាលកាណាដារបស់លោកនាយករដ្ឋមន្រ្តី Mark Carney មិនទាន់ប្រតិកម្មយ៉ាងណាទេ។ ខណៈបង្ហាញចេតនាក្នុងការចរចា កាណាដាក៏មានជំហរសងសឹកពន្ធរបស់ ត្រាំ ផងដែរ។ កាលពីខែមុន លោក Carney បាននិយាយថា លោក និងលោក ត្រាំ បានព្រមគ្នាបញ្ចប់កិច្ចព្រមព្រៀងសេដ្ឋកិច្ច និងសន្តិសុខថ្មី ត្រឹមរយៈពេល ៣០ ថ្ងៃ។

គួរគូសបញ្ជាក់ថា លោក ត្រាំ បានបង្កើនសង្រ្គាមពាណិជ្ជកម្មពិភពលោកជាថ្មី ក្រោមការដាក់ពន្ធខ្ពស់លើដៃគូពាណិជ្ជកម្មសំខាន់ៗ រួមទាំងពន្ធ ២៥ ភាគរយ លើជប៉ុន និងកូរ៉េខាងត្បូង ខណៈបណ្ដាប្រទេសអាស៊ីអាគ្នេយ៍ដែលជាប្រភពផ្គត់ផ្គង់ទំនិញច្រើន ក៏រងនូវអត្រាខ្ពស់ចន្លោះពី ២០-៤០ ភាគរយ ផងដែរ។

ការដាក់ពន្ធរបស់លោក ធ្វើ ឡើងទោះបីមានក្ដីបារម្ភពាក់ព័ន្ធនឹងកំណើនតម្លៃសម្រាប់អ្នកប្រើប្រាស់អាមេរិក ក្នុងចំណោលផលប៉ះពាល់សេដ្ឋកិច្ចផ្សេងៗទៀត។ មែនទែនទៅ កាណាដាគឺជាដៃគូពាណិជ្ជកម្មធំទី ២ របស់អាមេរិក បន្ទាប់ពីម៉ិកស៊ិក ហើយកាណាដា ក៏ជាអ្នកទិញធំបំផុតនៃទំនិញអាមេរិក ក្នុងចំនួនប្រមាណ ៣៤៩,៤ ប៊ីលានដុល្លារ កាលពីឆ្នាំមុន។ ក្នុងឆ្នាំដដែល កាណាដាបាននាំចេញទំនិញទៅសហរដ្ឋអាមេរិកប្រមាណ ៤១២,៧ ប៊ីលានដុល្លារ។ នេះបើយោងតាមទិន្នន័យពីរដ្ឋាភិបាលអាមេរិក។

ក្រៅតែពីការដាក់ពន្ធខ្ពស់លើកាណាដា និងប្រទេសជាង ២០ រួមទាំងពន្ធ ៥០ ភាគរយ លើប្រេស៊ីល ដែលលោក ត្រាំ បានប្រកាសឡើងនៅសប្ដាហ៍នេះ ប្រធានាធិបតីរូបនេះបានបញ្ជាក់ថា មិនមែនគ្រប់ប្រទេសទាំងអស់នឹងទទួលបានលិខិតរបស់លោកនោះទេ។ លោកថ្លែងក្នុងបទសម្ភាសន៍ជាមួយ NBC ដែលចេញផ្សាយកាលពីថ្ងៃព្រហស្បតិ៍ យ៉ាងដូច្នេះថា៖ «មិនមែនគ្រប់ប្រទេសសុទ្ធតែទទួលបានលិខិតនោះទេ។ យើងគ្រាន់តែកំណត់ពន្ធគយរបស់យើងប៉ុណ្ណោះ។ យើងនឹងនិយាយថា ប្រទេសដែលនៅសល់ទាំងប៉ុន្មាន នឹងជាប់ពន្ធ មិនថា ២០ ឬ ១៥ ភាគរយ នោះទេ។ យើងកំពុងធ្វើការលើបញ្ហានេះ»៕

The post ត្រាំ ដាក់ពន្ធ ៣៥% លើកាណាដា បង្កើនកម្ដៅសង្រ្គាមពាណិជ្ជកម្មអាមេរិកខាងជើងជាថ្មី appeared first on Kampuchea Thmey Daily.

ខេត្ត Ontario កាណាដា ដាក់ពន្ធ ២៥ ភាគរយ លើអគ្គិសនីនាំចេញទៅអាមេរិក

Huon Dina — Tue, 11 Mar 2025 02:38:29 +0000

អភិបាលខេត្ត Ontario នៃប្រទេសកាណាដា លោក Doug Ford កាលពីថ្ងៃចន្ទ បានប្រកាសដាក់ពន្ធ ២៥ ភាគរយ លើអគ្គិសនីនាំចេញទៅសហរដ្ឋអាមេរិក ដែលគ្របដណ្ដប់លើការប្រើប្រាស់របស់ប្រជាជនអាមេរិកប្រមាណ ១,៥ លាននាក់ ដើម្បីជាការឆ្លើយតបទៅនឹងវិធានការពន្ធរបស់ប្រធានាធិបតីអាមេរិក លោក ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

ខេត្ត Ontario ផ្គត់ផ្គង់អគ្គិសនីប្រើប្រាស់ទៅរដ្ឋចំនួន ៣ របស់សហរដ្ឋអាមេរិក រួមមាន មីនីសូតា ញូវយ៉ក និងមីឈីហ្គែន។

លោក Ford បាននិយាយក្នុងសេចក្តីថ្លែងការណ៍ថា៖ «ពន្ធរបស់ប្រធានាធិបតី ត្រាំ គឺជាគ្រោះមហន្តរាយសម្រាប់សេដ្ឋកិច្ចសហរដ្ឋអាមេរិក។ វាកំពុងគ្រួសារ និងអាជីវកម្មអាមេរិកកាន់តែចំណាយច្រើន»។ នេះបើតាមសម្រង់សម្ដីរបស់ទីភ្នាក់ងារសារព័ត៌មានរ៉យទ័រ។

លោកបន្តថា៖ «ដរាបណាការគំរាមកំហែងនៃពន្ធនៅតែមាន នោះខេត្ត Ontario នឹងមិនដកថយក្រោយឡើយ។ យើងនឹងឈរយ៉ាងរឹងមាំ ដោយប្រើប្រាស់គ្រប់ឧបករណ៍ដែលយើងមាន និងធ្វើអ្វីគ្រប់យ៉ាងដែលត្រូវការ ដើម្បីការពារខេត្ត Ontario»។

បន្ថែមពីលើនេះ លោកនិយាយក្នុងក្រុង Toronto នៃខេត្ត Ontario៖ «ខ្ញុំនឹងមិនស្ទាក់ស្ទើរក្នុងការបង្កើនអត្រាពន្ធនោះទេ។ ប្រសិនបើសហរដ្ឋអាមេរិកបង្កើនភាពតានតឹង ខ្ញុំក៏នឹងមិនស្ទាក់ស្ទើរក្នុងការបិទការផ្គត់ផ្គង់ភ្លើងទាំងស្រុងនោះដែរ»។ លោកបន្ថែមថា៖ «ខ្ញុំមិនចង់ធ្វើបែបនេះ។ ខ្ញុំមានអារម្មណ៍សោកស្ដាយចំពោះប្រជាជនអាមេរិក ដែលមិនមែនជាអ្នកចាប់ផ្តើមសង្គ្រាមពាណិជ្ជកម្មនេះ។ មានតែមនុស្សម្នាក់ប៉ុណ្ណោះដែលត្រូវទទួលខុសត្រូវ គឺលោកប្រធានាធិបតី ត្រាំ»។

គួរគូសបញ្ជាក់ថា នេះគឺជាការវិវត្តចុងក្រោយនៃសង្រ្គាមពាណិជ្ជកម្មអាមេរិកខាងជើង ដែលផ្ទុះឡើងក្រោមចំណាត់ការពន្ធរបស់លោក ដូណាល់ ត្រាំ ដែលបង្កជាការសងសឹកពីកាណាដា តាមរយៈវិធានការពន្ធដូចគ្នា។ យ៉ាងណាមិញ ការប្រកាសរបស់លោក Ford ធ្វើឡើង ទោះបីជាវិធានការពន្ធរវាងកាណាដា និងអាមេរិក ត្រូវបានពន្យារពេលរហូតដល់ខែក្រោយក៏ដោយ។

លោក Ford លើកឡើងថា ការពន្យារពេលជាថ្មីនេះ គ្រាន់តែបន្ថែមភាពស្រពិចស្រពិលប៉ុណ្ណោះ ខណៈថា ការដំឡើងពន្ធលើអគ្គិសនីនាំចេញ នឹងធ្វើឱ្យខេត្តរបស់លោករកប្រាក់បានពី ៣០០ ០០០-៤០០ ០០០ ដុល្លារកាណាដា/ថ្ងៃ។

ខេត្ត Quebec របស់កាណាដា ក៏មានគម្រោងដាក់ពន្ធដូចខេត្ត Ontario ផងដែរ៕

The post ខេត្ត Ontario កាណាដា ដាក់ពន្ធ ២៥ ភាគរយ លើអគ្គិសនីនាំចេញទៅអាមេរិក appeared first on Kampuchea Thmey Daily.

ត្រាំ ផ្អាកអនុវត្តពន្ធជាថ្មី លើទំនិញក្រោមកិច្ចព្រមព្រៀងអាមេរិកខាងជើង

Huon Dina — Fri, 07 Mar 2025 02:40:10 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានផ្អាកជាថ្មីនូវការអនុវត្តវិធានការពន្ធ ២៥ ភាគរយ លើទំនិញម៉ិកស៊ិក និងកាណាដា ដែលចូលជាធរមានកាលពីថ្ងៃអង្គារ ដែលជាវិវត្តន៍ចុងក្រោយ ចំពេលមានការព្រួយបារម្ភអំពីអតិផរណា និងភាពយឺតយ៉ាវនៃកំណើនសេដ្ឋកិច្ចអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការពន្យាពេលនេះ នឹងមានរហូតទៅដល់ថ្ងៃទី ២ មេសា ពោលគឺចំថ្ងៃដែលលោក ត្រាំ គ្រោងអនុវត្តលើពន្ធឆ្លើយតបឱ្យស្មើភាពគ្នា លើបណ្ដាប្រទេសផ្សេងៗទូទាំងពិភពលោក រួមទាំងដៃគូពាណិជ្ជកម្ម ដែលដាក់ពន្ធលើទំនិញអាមេរិក ខ្ពស់ជាងអាមេរិកដាក់ពន្ធលើទំនិញរបស់ពួកគេ។

ដើមឡើយ លោក ត្រាំ បានលើកឡើងពីការលើកលែងអនុវត្តពន្ធ ២៥ ភាគរយ តែលើទំនិញម៉ិកស៊ិកប៉ុណ្ណោះកាលពីព្រឹកថ្ងៃព្រហស្បតិ៍ ប៉ុន្តែក្រោយមក ការកែសម្រួលបទបញ្ជាដែលលោកបានចុះហត្ថលេខានារសៀលថ្ងៃដដែល ក៏គ្របដណ្តប់លើទំនិញកាណាដាផងដែរ។

ប្រទេសទាំង ៣ គឺជាដៃគូនៅក្នុងកិច្ចព្រមព្រៀងពាណិជ្ជកម្មសេរីសហរដ្ឋអាមេរិក-កាណាដា-ម៉ិកស៊ិក (USMCA) ខណៈមន្រ្តីសេតវិមានគូសបញ្ជាក់ថា ការលើកលែងពន្ធមានលើទំនិញដែលស្ថិតនៅក្រោមកិច្ចព្រមព្រៀងនេះ។ ប្រហែល ៥០ ភាគរយ នៃទំនិញនាំចូលពីម៉ិកស៊ិក និង ៣៨ ភាគរយ នៃទំនិញនាំចូលពីកាណាដា ស្ថិតនៅក្រោមកិច្ចព្រមព្រៀងពាណិជ្ជកម្មដដែល។

ជាការឆ្លើយតប រដ្ឋមន្រ្តីក្រសួងហិរញ្ញវត្ថុកាណាដា លោក Dominic LeBlanc បានឱ្យដឹងថា កាណាដានឹងលើកលែងពន្ធសងសឹក ២៥ ភាគរយ ក្នុងជុំទី២ លើទំនិញអាមេរិក តម្លៃប្រមាណ ១២៥ ប៊ីលានដុល្លារកាណាដា រហូតដល់ថ្ងៃទី ២ មេសា ដែរ។

គួរគូសបញ្ជាក់ថា លោក ត្រាំ បានដាក់ពន្ធគយបន្ទាប់ពីការប្រកាសភាពអាសន្នជាតិនៅថ្ងៃទី ២០ ខែមករា ដែលជាថ្ងៃលោកឡើងកាន់អំណាចនៅអាណត្តិទី២នេះ ជុំវិញបញ្ហាថ្នាំញៀនហ្វេនតានីល ដែលសម្លាប់ពលរដ្ឋអាមេរិកជាច្រើននាក់ក្នុងមួយឆ្នាំៗ។ លោកអះអាងថា ថ្នាំនេះមានប្រភពពីចិន និងចូលអាមេរិកតាមរយៈម៉ិកស៊ិក និងកាណាដា។

ពន្ធ ២៥ ភាគរយ ត្រូវបានប្រកាសឡើងតាំងតែពីដើមខែកុម្ភៈ ប៉ុន្តែត្រូវពន្យាពេលវិញ ៣០ ថ្ងៃ ក្រោយមានការចរចាគ្នា ហើយចូលជាធរមានជាថ្មីនៅថ្ងៃអង្គារកន្លងទៅ។ ដោយឡែកពន្ធ ២០ ភាគរយ លើទំនិញចិន មិនមានការផ្អាកការអនុវត្តនោះទេ។

ចិន និងកាណាដា សុទ្ធតែប្រកាសពន្ធសងសឹក ខណៈម៉ិកស៊ិក ក៏បានប្ដេជ្ញាថានឹងធ្វើដូចគ្នា ប៉ុន្តែមិនទាន់ឃើញមានជាផ្លូវការនៅឡើយទេ៕

The post ត្រាំ ផ្អាកអនុវត្តពន្ធជាថ្មី លើទំនិញក្រោមកិច្ចព្រមព្រៀងអាមេរិកខាងជើង appeared first on Kampuchea Thmey Daily.

មេដឹកនាំកាណាដា ទ្រូដូ ហៅវិធានការពន្ធ ត្រាំ ថាជារឿង «ល្ងង់ខ្លាំង»

Huon Dina — Wed, 05 Mar 2025 03:43:21 +0000

នាយករដ្ឋមន្រ្តីកាណាដា លោក ចាស្ទីន ទ្រូដូ បានហៅវិធានការពន្ធ ២៥ ភាគរយ របស់ប្រធានាធិបតីអាមេរិក ដូណាល់ ត្រាំ លើទំនិញកាណាដា ថាជារឿង «ល្ងង់ខ្លាំង» ក្រោយពេលលោកបានប្រកាសពន្ធសង់សឹក ២៥ ភាគរយ ដូចគ្នាវិញ ទៅលើទំនិញអាមេរិក ដែលមានទំហំទឹកប្រាក់ប្រមាណ ១០៥ ប៊ីលានដុល្លារ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្នុងសន្និសីទកាសែតស្ដីពីពន្ធកាលពីថ្ងៃអង្គារ លោក ទ្រូដូ លោកលើកឡើងថា៖ «ថ្ងៃនេះ សហរដ្ឋអាមេរិកបានចាប់ផ្តើមសង្រ្គាមពាណិជ្ជកម្មប្រឆាំងនឹងប្រទេសកាណាដា ដែលជាដៃគូ និងសម្ព័ន្ធមិត្តជិតស្និទ្ធបំផុតរបស់ខ្លួន។ ក្នុងពេលជាមួយគ្នានេះ ពួកគេក៏និយាយអំពីការធ្វើការជាវិជ្ជមានជាមួយរុស្ស៊ី ដោយផ្គាប់ចិត្តលោក វ្ល៉ាឌីមៀ ពូទីន ដែលជាមេដឹកនាំ(រុស្ស៊ី)ផ្តាច់ការ ពោរពេញដោយការកុហក និងការសម្លាប់។ គួរតែយល់ហើយ»។

ថ្លែងអំពីរដ្ឋបាល ត្រាំ លោក ទ្រូដូ និយាយយ៉ាងដូច្នេះថា៖ «ពួកគេបានជ្រើសរើសធ្វើសង្គ្រាមពាណិជ្ជកម្ម ដែលនឹងធ្វើឱ្យប៉ះពាល់ដល់គ្រួសារជនជាតិអាមេរិកមុនគេ ហើយនេះជារឿងល្ងង់ណាស់ដែលត្រូវធ្វើ»។

គួរគូសបញ្ជាក់ថា វិធានការពន្ធ ២៥ ភាគរយ របស់ ត្រាំ លើទំនិញម៉ិកស៊ិក និងកាណាដា និង ១០ ភាគរយ លើប្រេងកាតកាណាដា និង ២០ ភាគរយ លើចិន បានចូលជាធរមានកាលពីថ្ងៃអង្គារ។

លោក ទ្រូដូ បន្តយ៉ាងដូច្នេះថា៖ «អ្វីដែលលោក (ត្រាំ) ចង់ឃើញ គឺការដួលរលំទាំងស្រុងនៃសេដ្ឋកិច្ចកាណាដា ព្រោះវានឹងធ្វើឱ្យវាកាន់តែងាយស្រួលក្នុងការកាត់ទឹកដីរបស់ពួកយើង។ វាមិនដែលកើតឡើងនោះទេ។ យើងនឹងមិនក្លាយជារដ្ឋទី ៥១ នោះទេ»។ លោកថ្លែងបែបនេះ ដោយសំដៅលើការលើកឡើងរបស់ ត្រាំ ដែលចង់ឱ្យម៉ិកស៊ិក ក្លាយជារដ្ឋថ្មីរបស់អាមេរិក។

ទោះបីជាយ៉ាងណាក៏ដោយ មានសេចក្ដីរាយការណ៍ពីបណ្ដាញទូរទស្សន៍ CNN ថា លោក ត្រាំ និងលោក ទ្រូដូ គ្រោងនឹងនិយាយចរចាគ្នាជាថ្មីនៅថ្ងៃពុធនេះ ខណៈលេខាធិការពាណិជ្ជកម្មរបស់លោក ត្រាំ លោក Howard Lutnick បានកាលពីរសៀលថ្ងៃអង្គារថា លោក ត្រាំ អាចប្រកាសកិច្ចព្រមព្រៀងពាណិជ្ជកម្មជាមួយម៉ិកស៊ិក និងកាណាដា បានឆាប់នៅថ្ងៃពុធផងដែរ។

យ៉ាងណាមិញ ក្នុងបរិបទដ៏ក្ដៅនៃសង្រ្គាមពាណិជ្ជកម្មអាមេរិកខាងជើង លោក ត្រាំ គំរាមដាក់ពន្ធឱ្យកាន់តែខ្ពស់លើទំនិញកាណាដា។ លោកបានសរសេរនៅលើបណ្ដាញសង្គមរបស់លោកថា៖ «សូមពន្យល់ទៅមេដឹកនាំកាណាដា លោក ទ្រូដូ ថា នៅពេលដាក់ពន្ធសងសឹកលើសហរដ្ឋអាមេរិក នោះពន្ធឆ្លើយតបឱ្យស្មើភាពគ្នារបស់យើង នឹងបង្កើនអត្រាភ្លាម»។

ជាថ្មីម្ដងទៀតនៅយប់ថ្ងៃអង្គារនេះ លោក ត្រាំ ដែលថ្លែងទៅកាន់សភាជាលើកដំបូងរាប់តាំងពីលោកឡើងកាន់អំណាចលើកនេះ បានបញ្ជាក់ពីការដាក់ពន្ធឆ្លើយតបឱ្យស្មើភាពគ្នា ទៅលើប្រទេសទាំងអស់ដែលដាក់ពន្ធលើទំនិញអាមេរិកខ្ពស់ជាងអាមេរិកដាក់ពន្ធលើទំនិញរបស់ពួកគេ។ ដោយរំឭកថា វានឹងចូលជាធរមាននៅថ្ងៃទី ២ មេសា លោកបានហៅចំឈ្មោះប្រទេសផ្សេងៗ រួមមានកាណាដា ម៉ិកស៊ិក ប្រេស៊ីល ឥណ្ឌា ចិន កូរ៉េខាងត្បូង និងសហភាពអឺរ៉ុបជាដើម។

នាពេលកន្លងមក សេដ្ឋវិទូបានព្រមានថា គោលនយោបាយពន្ធគយរបស់អាមេរិក នឹងធ្វើឱ្យអតិផរណាក្នុងស្រុកកើនឡើង ខណៈធ្វើឱ្យធ្លាក់ចុះពាណិជ្ជកម្ម និងសេដ្ឋកិច្ចសកល និងផ្លាស់ប្ដូរសន្តិសុខសណ្ដាប់ធ្នាប់ពាណិជ្ជកម្មនាពេលបច្ចុប្បន្ន៕

The post មេដឹកនាំកាណាដា ទ្រូដូ ហៅវិធានការពន្ធ ត្រាំ ថាជារឿង «ល្ងង់ខ្លាំង» appeared first on Kampuchea Thmey Daily.

សង្រ្គាមពាណិជ្ជកម្មអាមេរិកខាងជើងផ្ទុះជាថ្មី ក្រោយពន្ធ ត្រាំ លើកាណាដា និងម៉ិកស៊ិក ចូលជាធរមាន

Huon Dina — Tue, 04 Mar 2025 09:02:00 +0000

សង្រ្គាមពាណិជ្ជកម្មរវាងសម្ព័ន្ធមិត្តនៅអាមេរិកខាងជើងផ្ទុះឡើងជាថ្មី ក្រោយវិធានការពន្ធ ២៥ ភាគរយ លើទំនិញនាំចូលពីកាណាដា និងម៉ិកស៊ិក របស់ប្រធានាធីបតីអាមេរិក លោក ដូណាល់ ត្រាំ ចូលជាធរមាននៅម៉ោង ១២ រំលងអធ្រាត្រ នាថ្ងៃអង្គារ ទី ៤ មីនា នេះ (ម៉ោងនៅសហរដ្ឋអាមេរិក)។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការចូលជាធរមាននេះ កើតឡើងក្នុងរយៈពេល ១ ខែ ក្រោយវិធានការពន្ធដដែលត្រូវបានពន្យារពេលអនុវត្ត ក្រោយលោក ត្រាំ និងមេដឹកនាំកាណាដា ក៏ដូចជាម៉ិកស៊ិក ធ្វើការចរចាគ្នា ដោយសង្កត់ធ្ងន់លើការទាមទាររបស់ ត្រាំ ពាក់ព័ន្ធនឹងបញ្ហាអន្តោប្រវេសន៍ខុសច្បាប់ និងលំហូរថ្នាំញៀនហ្វេនតានីល ទៅអាមេរិក។ អាមេរិកក៏បង្កើនពន្ធដល់ ២០ ភាគរយ លើទំនិញចិនផងដែរ។

ក្រោយការចូលជាធរមាន ចិនបានប្រកាសពន្ធសងសឹកភ្លាមៗ ដោយដាក់ពន្ធថ្មី ១០-១៥ ភាគរយ លើបណ្ដាផលិតកម្មកសិកម្ម និងស្បៀងអាមេរិក ខណៈក៏កំណត់ការរឹតត្បឹតលើការនាំចេញ និងការវិនិយោគសម្រាប់ក្រុមហ៊ុនអាមេរិក ផងដែរ ដោយចូលជាធរមានចាប់ពីថ្ងៃទី ១០ ទៅ។

ជាមួយគ្នានោះ ដូចការព្រមានទុក នាយករដ្ឋមន្រ្តីកាណាដា លោក ចាស្ទីន ទ្រូដូ បាននិយាយកាលពីថ្ងៃចន្ទថា កាណាដានឹងឆ្លើយតបភ្លាមៗជាមួយនឹងពន្ធ ២៥ ភាគរយ លើទំនិញនាំចូលពីសហរដ្ឋអាមេរិក សរុបតម្លៃ ២០,៧ ប៊ីលានដុល្លារ សម្រាប់ជុំបន្ទាន់ និងជុំក្រោយ ៣ សប្ដាហ៍ខាងមុខ លើទំនិញសរុបជាទឹកប្រាក់ ៨៦,២ ប៊ីលានដុល្លារ)។

កន្លងមក កាណាដាបានបញ្ចេញបញ្ជីគោលដៅលើទំនិញអាមេរិក ដែលរួមមានបសុបក្សីរស់ ផលិតផលទឹកដោះគោ បន្លែ កាហ្វេ និងតែ ផលិតផលពីឧស្សាហកម្មកិន គ្រាប់ប្រេង ស្ករ ភេសជ្ជៈរួមទាំងគ្រឿងស្រវឹង ថ្នាំជក់ ផ្លាស្ទិច កៅស៊ូ ឈើ ក្រដាស សំលៀកបំពាក់ និងគ្រឿងប្រើប្រាស់ក្នុងផ្ទះផ្សេងៗ បន្ថែមពីលើផលិតជាច្រើនមុខទៀត។

នាយករដ្ឋមន្រ្តីដដែលបន្តថា៖ «ពន្ធគយនឹងរំខានដល់ទំនាក់ទំនងពាណិជ្ជកម្មដែលសម្រេចបានដោយជោគជ័យមិនគួរឱ្យជឿ» ដោយលោកបន្ថែមថា វាបំពានលើកិច្ចព្រមព្រៀងពាណិជ្ជកម្មសេរីអាមេរិក-ម៉ិកស៊ិក-កាណាដា ដែលបានចុះហត្ថលេខាដោយលោក ត្រាំ នៅអាណត្តិដំបូងរបស់លោក។

ទន្ទឹមនឹងការប្រកាសជាថ្មីរបស់លោក ទ្រូដូ លោក Doug Ford ដែលជាអភិបាលខេត្ត Ontario របស់កាណាដា បានប្រាប់ទូរទស្សន៍ NBC ថា លោកបានត្រៀមខ្លួនរួចជាស្រេចក្នុងការកាត់ផ្តាច់ការនាំចេញនីកែល និងអគ្គិសនីពីខេត្តរបស់លោក ទៅកាន់សហរដ្ឋអាមេរិក ដើម្បីជាការសងសឹក លុះត្រាតែ ត្រាំ ដកពន្ធចេញ។

ចំណែកឯម៉ិកស៊ិកវិញ ក្រសួងសេដ្ឋកិច្ចរបស់ប្រទេសនេះបាននិយាយថា លោកស្រីប្រធានាធិបតី Claudia Sheinbaum នឹងប្រកាសការឆ្លើយតបរបស់ខ្លួនក្នុងសន្និសីទសារព័ត៌មាន នៅព្រឹកថ្ងៃអង្គារនេះ (ម៉ោងនៅម៉ិកស៊ិក)៕

The post សង្រ្គាមពាណិជ្ជកម្មអាមេរិកខាងជើងផ្ទុះជាថ្មី ក្រោយពន្ធ ត្រាំ លើកាណាដា និងម៉ិកស៊ិក ចូលជាធរមាន appeared first on Kampuchea Thmey Daily.

ត្រាំ ប្រកាសពន្ធថ្មី ១០ ភាគរយ បន្ថែមទៀតលើទំនិញចិន

Huon Dina — Fri, 28 Feb 2025 03:49:29 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានអះអាងកាលពីថ្ងៃព្រហស្បតិ៍ថា សហរដ្ឋអាមេរិកនឹងបង្កើនពន្ធ ១០ ភាគរយ បន្ថែមទៀតលើទំនិញនាំចូលពីចិន ដែលធ្វើឱ្យអត្រានេះកើនដល់ ២០ ភាគរយ រាប់ទាំងពន្ធដែលចូលជាធរមានកាលពីដើមខែកុម្ភៈ។ នេះបើតាមការចុះផ្សាយរបស់បណ្ដាញទូរទស្សន៍ CNBC។

លោក ត្រាំ បានបញ្ជាក់ថា ពន្ធបន្ថែមថ្មី នឹងចូលជាធរមានចាប់ពីថ្ងៃទី ៤ មីនា តទៅ ពោលគឺចំថ្ងៃដែលវិធានការពន្ធ ២៥ ភាគរយ លើទំនិញនាំចូលពីកាណាដា និងម៉ិកស៊ិក នឹងត្រូវបានចាប់ផ្ដើមអនុវត្ត ក្រោយពន្យាពេលអស់រយៈពេល ៣០ ថ្ងៃ ។

កន្លងមក លោក ត្រាំ បានលើកឡើងថា ពន្ធប្រឆាំងនឹងចិន កាណាដា និងម៉ិកស៊ិក ធ្វើឡើងដោយសារតែការពាក់ព័ន្ធរបស់ប្រទេសទាំងនេះលើលំហូរនៃខ្សែចង្វាក់ផ្គត់ផ្គង់ថ្នាំញៀនហ្វេនតានីល បន្ថែមពីលើបញ្ហាអន្តោប្រវេសន៍ និងអតិរេកពាណិជ្ជកម្ម។

ជាថ្មីម្ដងទៀត ប្រធានាធិបតីរូបនេះបានសរសេរលើបណ្ដាញសង្គម Social Truth របស់លោក ដោយមិនផ្ដល់ភស្តុតាងជាក់លាក់ថា គ្រឿងញៀនខុសច្បាប់នៅតែហូរចូលអាមេរិកពីម៉ិកស៊ិក និងកាណាដាក្នុងកម្រិតខ្ពស់ «និងមិនអាចទទួលយកបាន» បើទោះបីជាមានការសន្យាពីប្រទេសជិតខាងទាំង២ ក្នុងការជំរុញកិច្ចខិតខំប្រឹងប្រែងទប់ស្កាត់តាមព្រំដែន។

លោកបន្តថា៖ «យើងមិនអាចអនុញ្ញាតឱ្យគ្រោះមហន្តរាយនេះ បន្តធ្វើឱ្យប៉ះពាល់ដល់សហរដ្ឋអាមេរិកទេ បើវាមិនឈប់ ឬកាត់បន្ថយខ្លាំងនោះទេ នោះពន្ធដែលគ្រោងនឹងចូលជាធរមាននៅថ្ងៃទី ៤ ខែមិនា នឹងចូលជាធរមានតាមការគ្រោងទុក»។

ក្រៅពីពន្ធលើប្រទេសទាំង ៣ លោក ត្រាំ ក៏បានបញ្ជាក់ផងដែរថា ការដាក់ពន្ធឆ្លើយតបឱ្យស្មើគ្នា ដែលសំដៅលើពន្ធដាក់លើទំនិញរបស់ប្រទេសដទៃក្នុងអត្រាដែលប្រទេសទាំងនោះដាក់លើទំនិញអាមេរិក ក៏នឹងចូលជាធរមានផងដែរ នៅថ្ងៃទី ២ ដើមខែមេសា។

គួរគូសបញ្ជាក់ថា វិធានការពន្ធគឺជារបៀបវារៈស្នូលរបស់លោក ត្រាំ នៅអាណត្តិទី២បច្ចុប្បន្ន ដោយលោកលើកឡើងពីការជំរុញផលិតកម្មក្នុងស្រុក និងកាត់បន្ថយឱនភាពពាណិជ្ជកម្មជាដើម ខណៈអ្នកវិភាគព្រមានពីកំណើនអតិរផណាក្នុងស្រុក និងការធ្លាក់ចុះនៃពាណិជ្ជកម្ម និងសេដ្ឋកិច្ចសកល ជុំវិញគោលនយោបាយនេះ។

ក្រៅពីកំណត់គោលដៅលើប្រទេសនីមួយៗ ក៏ដោយដូចជា គំរាមកំហែងលើប្រទេសផ្សេងៗទៀត លោក ត្រាំ បានបញ្ជាឱ្យដាក់ពន្ធ ២៥ ភាគរយ លើដែកថែប និងអាលុយមីញ៉ូមនាំចូល ខណៈមានគម្រោងដាក់ពន្ធផងដែរលើរថយន្ត ឱសធ និងបន្ទះឈីប៕

The post ត្រាំ ប្រកាសពន្ធថ្មី ១០ ភាគរយ បន្ថែមទៀតលើទំនិញចិន appeared first on Kampuchea Thmey Daily.

ការលក់ទង់ជាតិកាណាដាហក់ឡើង ជុំវិញភាពតានតឹងជាមួយអាមេរិក

Huon Dina — Mon, 17 Feb 2025 02:24:11 +0000

ក្រុមហ៊ុនផលិតទង់ជាតិកាណាដា Flags Unlimited បានរាយការណ៍ថា ការលក់ទង់ជាតិរបស់ខ្លួនបានកើនឡើងទ្វេដងធៀបនឹងឆ្នាំមុន ចំពេលដែលភាពតានតឹងជាមួយសហរដ្ឋអាមេរិក បានជំរុញឱ្យរលកស្នេហាជាតិពុះកញ្ជ្រោលឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីសប្ដាហ៍មុន។

កំណើននៃការលក់ស្ទុះឡើងមុនទិវាទង់ជាតិកាណាដានៅថ្ងៃទី ១៥ ខែកុម្ភៈ ដែលជាការប្រារព្ធខួបទី ៦០ ឆ្នាំ នៃទង់ជាតិបច្ចុប្បន្នរបស់ប្រទេស។ សហម្ចាស់កម្មសិទ្ធិក្រុមហ៊ុន Flags Unlimited លោក Matt Skipp បានផ្សារភ្ជាប់កំណើនទៅនឹងការគំរាមកំហែងរបស់ប្រធានាធិបតីអាមេរិក លោក ដូ ណាល់ ត្រាំ លើអធិបតេយ្យភាពរបស់កាណាដា។

លោក Skipp បានលើកឡើងថា៖ «វាគឺជាការឆ្លើយតបដោយផ្ទាល់ទៅនឹងបរិយាកាសនយោបាយ ដោយជនជាតិកាណាដាបានប្រមូលផ្តុំគ្នានៅពីក្រោយទង់ជាតិរបស់ខ្លួនជានិមិត្តរូបនៃការរួបរួមគ្នា»។

សារព័ត៌មានក្នុងស្រុក CBC បានផ្សាយថា ក្រុមហ៊ុនផលិតទង់ជាតិផ្សេងទៀត ដូចជា ក្រុមហ៊ុន Flying Colours International ក៏ឃើញពីកំណើននៃការលក់ទង់ជាតិកាណាដាផងដែរ។

គួរគូសបញ្ជាក់ថា ចំពេលដែលភាពតានតឹងកើនឡើង អ្នកនយោបាយកាណាដាបានអំពាវនាវឱ្យពលរដ្ឋខ្លួនដាក់បង្ហាញទង់ជាតិនៅចុងសប្តាហ៍មុន ដើម្បីបង្ហាញពីការរួបរួម និងមោទនភាពជាតិកាណាដា។

កន្លងមក មានសេចក្ដីរាយការណ៍ថា ប្រជាជនកាណាដាបានលុបចោលការធ្វើដំណើរកំសាន្តទៅសហរដ្ឋអាមេរិក ធ្វើពហិការចំពោះគ្រឿងស្រវឹង និងផលិតផលផ្សេងៗរបស់អាមេរិក ហើយថែមទាំងបានស្រែកហ៊ោចំអកក្នុងព្រឹត្តិការណ៍កីឡាជាច្រើន បន្ទាប់ពីលោក ត្រាំ បានប្រកាសពន្ធ ២៥ ភាគរយ លើគ្រប់មុនទំនិញ និង ១០ ភាគរយ លើប្រេងកាត របស់កាណាដា នៅថ្ងៃទី៣ កុម្ភៈ ប៉ុន្តែក្រោយមកប្រកាសពន្យារពេល ៣០ ថ្ងៃចិន។

ក្រៅពីនេះ ក៏មានសេចក្ដីរាយការណ៍ផងដែរថា លោកនាយករដ្ឋមន្ត្រីកាណាដា ចាស្ទីន ទ្រូដូ បានប្រាប់មេដឹកនាំអាជីវកម្មក្នុងស្រុក ថាលោក ត្រាំ «ពិតជានិយាយមែន» ជុំវិញការចង់ឱ្យកាណាដាក្លាយជារដ្ឋទី ៥១ របស់សហរដ្ឋអាមេរិក ដោយសារតែកាណាដាមានធនធានធម្មជាតិដ៏សម្បូរបែប៕

The post ការលក់ទង់ជាតិកាណាដាហក់ឡើង ជុំវិញភាពតានតឹងជាមួយអាមេរិក appeared first on Kampuchea Thmey Daily.

EU រិះគន់វិធានការពន្ធរបស់ ត្រាំ ខណៈប្ដេជ្ញាឆ្លើយតប

Huon Dina — Mon, 03 Feb 2025 03:14:48 +0000

ក្នុងភាពវឹកវរនៃភាពតានតឹងជម្លោះពាណិជ្ជកម្មចុងក្រោយ សហភាពអឺរ៉ុប (EU) បានរិះគន់វិធាកការពន្ធរបស់សហរដ្ឋអាមេរិកលើម៉ិកស៊ិក កាណាដា និងចិន ខណៈបានប្ដេជ្ញាថា ប្លុកនឹងសងសឹងពេញទំហឹងប្រសិនបើប្រធានាធិបតីសហរដ្ឋអាមេរិក លោក ដូណាល់ ត្រាំ ពិតជានឹងប្រកាសដាក់ពន្ធលើទំនិញរបស់ខ្លួននាពេលខាងមុខតាមការគំរាម។ នេះបើតាមការចុះផ្សាយរបស់សារព័ត៌មានអន្តរជាតិផ្សេងៗ។

គណៈកម្មការអឺរ៉ុប ដែលជាស្ថាប័នប្រតិបត្តិរបស់សហភាពអឺរ៉ុប បាននិយាយថា ខ្លួន «សោកស្តាយ» ចំពោះការសម្រេចចិត្តរបស់លោក ត្រាំ ក្នុងការដាក់ពន្ធលើទំនិញលើកាណាដា ម៉ិកស៊ិក និងចិន កាលពីថ្ងៃសៅរ៍។ ពាក់ព័ន្ធនឹងការគំរាមកំហែងរបស់ ត្រាំ អំពីចំណាត់ការពន្ធលើសហភាពអឺរ៉ុប អ្នកនាំពាក្យរបស់គណៈកម្មការ បាននិយយានៅថ្ងៃអាទិត្យថា៖ «ទំនាក់ទំនងពាណិជ្ជកម្ម និងការវិនិយោគរបស់យើងជាមួយសហរដ្ឋអាមេរិក គឺជាទំនាក់ទំនងដ៏ធំបំផុតនៅក្នុងពិភពលោក។ វាមានហានិភ័យជាច្រើន។ ពន្ធបង្កើតការរំខានសេដ្ឋកិច្ចដែលមិនចាំបាច់ និងជំរុញអតិផរណា។ វាធ្វើឲ្យខូចខាតគ្រប់ភាគី»។

ទោះបីជាយ៉ាងណាក៏ដោយ អ្នកនាំពាក្យបាននិយាយថា៖ «សហភាពអឺរ៉ុបនឹងឆ្លើយតបយ៉ាងម៉ឺងម៉ាត់ចំពោះដៃគូពាណិជ្ជកម្មណាដែលដាក់ពន្ធគយដោយអយុត្តិធម៌ ឬតាមអំពើចិត្តលើទំនិញរបស់សហភាពអឺរ៉ុប»។

ទន្ទឹមនឹងការប្ដេជ្ញានេះ គេឃើញមានការប្រតិកម្មប្រឆាំងនឹងគោលនយោបាយការពារនិយមរបស់ ត្រាំ ផ្សេងៗ ពីសំណាក់មន្រ្តីជាន់ខ្ពស់នៃប្រទេសក្នុងសហភាពអឺរ៉ុប។ អធិការបតីអាល្លឺម៉ង់ លោក អូឡាហ្វ សូលហ៍ (Olaf Scholz) ក៏ដូចជារដ្ឋមន្ត្រីឧស្សាហកម្មបារាំង លោក Marc Ferracci បានលើកពីវិធានការឆ្លើយតប ខណៈខ្លះទៀតជំរុញឱ្យមានការចរចា និងឱ្យសហភាពអឺរ៉ុបរក្សាភាពស្ងៀមស្ថាត់សិន។

ចំណែកឯប្រធានគណៈកម្មាធិការពាណិជ្ជកម្មអន្តរជាតិរបស់សភាអឺរ៉ុប លោក Bernd Lange វិញ បានហៅពន្ធគយរបស់លោក ត្រាំ ថាជាការបំពានច្បាប់អន្តរជាតិ។ លោកបានបន្ថែមថា ឥឡូវនេះ សហភាពអឺរ៉ុប ត្រូវត្រៀម «ដើម្បីការពារផលប្រយោជន៍សេដ្ឋកិច្ចរបស់យើង ១ ទល់នឹង ១» ខណៈលោកបានអំពាវនាវឱ្យទីក្រុងព្រុចសែល «រក្សាស្ថិរភាព និងពង្រីកទំនាក់ទំនងពាណិជ្ជកម្មយ៉ាងឆាប់រហ័ស» ជាមួយប្រទេសដទៃទៀត។

គួរគូសបញ្ជាក់ថា កាលពីថ្ងៃសៅរ៍ លោក ត្រាំ បានចុះហត្ថលេខាលើអធិបញ្ជាដំឡើងពន្ធ ១០ ភាគរយ លើទំនិញនាំចូលពីចិន ២៥ ភាគរយលើទំនិញពីម៉ិកស៊ិក និងកាណាដា និង ១០ ភាគរយ លើប្រេងកាតកាណាដា ដោយចូលជាធរមានចាប់ពីថ្ងៃអង្គារតទៅ។ ចំណាត់ការនេះ បានបំផ្ទុះ «សង្រ្គាមពាណិជ្ជកម្មអាមេរិកខាងជើង» ដោយបានទាក់ទាញការប្រឆាំងទ្រង់ទ្រាយធំ និងការសងសឹកភ្លាមៗពីកាណាដា ក៏ដូចជាការប្ដេជ្ញាសងសឹងពីម៉ិកស៊ិក។

ក្រៅពីនេះ ក្រសួងពាណិជ្ជកម្មចិនឯណោះវិញ បាននិយាយកាលពីថ្ងៃអាទិត្យថា ចិននឹងដាក់ពាក្យបណ្តឹងទៅកាន់អង្គការពាណិជ្ជកម្មពិភពលោក និងចាត់វិធានការតបតគ្នា ដើម្បីការពារយ៉ាងម៉ឺងម៉ាត់នូវសិទ្ធិ និងផលប្រយោជន៍របស់ខ្លួន៕

The post EU រិះគន់វិធានការពន្ធរបស់ ត្រាំ ខណៈប្ដេជ្ញាឆ្លើយតប appeared first on Kampuchea Thmey Daily.

សង្រ្គាមពាណិជ្ជកម្មអាមេរិកខាងជើង Archives - Kampuchea Thmey Daily

ត្រាំ ដាក់ពន្ធ ៣៥% លើកាណាដា ​បង្កើនកម្ដៅសង្រ្គាមពាណិជ្ជកម្មអាមេរិកខាងជើងជាថ្មី ​

ខេត្ត Ontario កាណាដា ដាក់ពន្ធ ២៥ ភាគរយ លើអគ្គិសនីនាំចេញទៅអាមេរិក

ត្រាំ ​ផ្អាក​អនុវត្ត​ពន្ធជាថ្មី លើទំនិញក្រោមកិច្ចព្រមព្រៀង​អាមេរិកខាងជើង