សព្វាវុធ Archives - Kampuchea Thmey Daily

អាមេរិក នៅតែជាប់ឈ្មោះនាំចេញអាវុធធំបំផុតលើលោក ទោះបីជា បរិមាណអាវុធថយចុះ

Minea Neu — Tue, 16 Jun 2026 03:20:11 +0000

សហរដ្ឋអាមេរិក នៅតែជាប្រទេសនាំចេញអាវុធធំជាងគេបំផុតរបស់ពិភពលោក ប៉ុន្តែសង្គ្រាមជាមួយអ៊ីរ៉ង់កាលពីថ្មីៗនេះ កំពុងធ្វើឱ្យសន្និធិ (Stock) អាវុធមានភាពរអាក់រអួល ថែមទាំងពន្យារពេលការដឹកជញ្ជូនទៅឱ្យសម្ព័ន្ធមិត្ត បង្កើនជាសំណួរថ្មីៗ លើភាពជឿជាក់នៃការផ្គត់ផ្គង់សម្ភារៈយោធារបស់សហរដ្ឋអាមេរិក អំឡុងពេលមានវិបត្តិ។ នេះបើយោងតាមសារព័ត៌មាន CNA ផ្សាយនៅថ្ងៃទី១៥ ខែមិថុនា ឆ្នាំ២០២៦ ។

យោងតាមទិន្នន័យពីវិទ្យាស្ថានស្រាវជ្រាវសន្តិភាពអន្តរជាតិស្តុកហូម (Stockholm) ឱ្យដឹងថា សហរដ្ឋអាមេរិក បាននាំចេញអាវុធសំខាន់ៗចំនួន ៤២ភាគរយនៅទូទាំងពិភពលោក រួមទាំងយន្តហោះប្រយុទ្ធ និងប្រព័ន្ធមីស៊ីល ចន្លោះ ឆ្នាំ២០២១ និង ២០២៥ ។ តួលេខនេះគឺខ្ពស់ជាងការនាំចេញរួមគ្នារបស់រុស្ស៊ី ចិន និងសហភាពអឺរ៉ុបទៅទៀត។

យន្តហោះចម្បាំង F-22 របស់អាមេរិក។ រូបភាព៖ Reuters

យ៉ាងណា ទោះបីជាខ្លួនមានឥទ្ធិពលលើទីផ្សារអាវុធសកលក៏ដោយ ទីក្រុងវ៉ាស៊ីនតោនកំពុងប្រឈមនឹងសម្ពាធកាន់តែខ្លាំងឡើង ក្នុងការបំពេញស្តុកអាវុធដែលអស់ដោយសារការប្រយុទ្ធគ្នាជាច្រើនខែជាមួយអ៊ីរ៉ង់។

ក្នុងចំណោមប្រទេសរងផលប៉ះពាល់គឺប្រទេសប៉ូឡូញ ទទួលបានយន្តហោះចម្បាំង F-35A Lightning II ត្រឹមតែបីគ្រឿងដំបូងប៉ុណ្ណោះ ក្នុងចំណោមយន្តហោះ ៣២គ្រឿង ដែលផលិតនៅសហរដ្ឋអាមេរិកកាលពីខែឧសភា ដោយយន្តហោះចំនួន ២៩គ្រឿងនៅសល់ គ្រោងនឹងដឹកជញ្ជូននាចុងទសវត្សរ៍នេះ។

ប៉ុន្តែរបាយការណ៍បង្ហាញថា ទីក្រុងវ៉ាស៊ីនតោនបានព្រមានសម្ព័ន្ធមិត្ត រួមទាំងប្រទេសប៉ូឡូញ ត្រូវទទួលយកការពន្យារពេលក្នុងការដឹកជញ្ជូនអាវុធ ខណៈអាមេរិកកំពុងស្តារស្តុកអាវុធខ្លួនឡើងវិញ។

កាលពីខែមេសា រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth ទទួលស្គាល់ នៅចំពោះមុខគណៈកម្មាធិការព្រឹទ្ធសភាថា ការបំពេញស្តុកអាវុធឡើងវិញអាចត្រូវការពេលវេលា។

ប៉ុន្មានសប្តាហ៍ក្រោយមក រដ្ឋមន្ត្រីក្រសួងការពារជាតិសហរដ្ឋអាមេរិកស្តីទី លោក Hung Cao និយាយថា មន្ទីរបញ្ចកោណបានផ្អាកកញ្ចប់អាវុធចំនួន ១៤ប៊ីលានដុល្លារអាមេរិកសម្រាប់តៃវ៉ាន់ ដើម្បីធានាថាយោធាសហរដ្ឋអាមេរិករក្សាគ្រាប់រំសេវគ្រប់គ្រាន់សម្រាប់ជម្លោះជាមួយអ៊ីរ៉ង់។

មិនតែប៉ុណ្ណោះ របាយការណ៍បង្ហាញទៀតថា ការដឹកជញ្ជូនទៅកាន់ដៃគូអាមេរិកផ្សេងទៀត រួមមានប្រទេសជប៉ុន ចក្រភពអង់គ្លេស ន័រវែស អេស្តូនី លីទុយអានី និងស្វីស ក៏ត្រូវពន្យារពេលផងដែរ៕

សម្រួល៖ ណឺ មិនា

The post អាមេរិក នៅតែជាប់ឈ្មោះនាំចេញអាវុធធំបំផុតលើលោក ទោះបីជា បរិមាណអាវុធថយចុះ appeared first on Kampuchea Thmey Daily.

ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ

Minea Neu — Fri, 29 May 2026 12:45:00 +0000

ប្រទេសប៉ូឡូញកំពុងស្ថិតលើគន្លងដ៏រឹងមាំមួយ ដើម្បីក្លាយជាប្រទេសផលិតអាវុធធំជាងគេមួយនៅអឺរ៉ុបខាងកើត។ ដោយមានការគាំទ្រ ដោយផ្ទេរបច្ចេកវិទ្យាសំខាន់ៗរបស់សហរដ្ឋអាមេរិក និងការផ្តល់ប្រាក់កម្ចីការពារជាតិរាប់សិបពាន់លានដុល្លារពីអឺរ៉ុប ទីក្រុងវ៉ាសូវីកំពុងផ្លាស់ប្តូរពីប្រទេសនាំចូលប្រព័ន្ធការពារជាតិពីបរទេសទៅជាមជ្ឈមណ្ឌលផលិតកម្ម និងផ្គត់ផ្គង់ខ្សែសង្វាក់ក្នុងស្រុកវិញ។

យន្តហោះចម្បាំងប៉ូឡូញ។ រូបភាព៖ AN

យោងតាមសារព័ត៌មាន Politico ចេញផ្សាយកាលពីដើមខែឧសភា ឆ្នាំ២០២៦ មានកត្តាជំរុញកំណើនផលិតកម្មអាវុធនៅប៉ុឡូញសំខាន់ៗ ចំនួនបី៖

១. កិច្ចព្រមព្រៀងបច្ចេកវិទ្យា និងផលិតកម្មរបស់សហរដ្ឋអាមេរិក៖ ទីក្រុងវ៉ាស៊ីនតោនកំពុងបើកទ្វារឱ្យប្រទេសប៉ូឡូញផ្លាស់ប្តូរពីការទិញឧបករណ៍ដែលមានស្រាប់ទៅជាការផលិតរួមគ្នាក្នុងស្រុក។

ជាពិសេស ក្រសួងការបរទេសសហរដ្ឋអាមេរិកបានអនុម័តបណ្ដោះអាសន្ននូវការផលិតមីស៊ីល Patriot PAC-3 MSE ក្នុងស្រុកក្នុងប្រទេសប៉ូឡូញ។ លើសពីនេះ ក្រុមហ៊ុនអាមេរិក Northrop Grumman កំពុងសហការជាមួយក្រុមការពារជាតិប៉ូឡូញ ដើម្បីផលិតគ្រាប់កាំភ្លើងធំរហូតដល់ ១៨០ ០០០គ្រាប់ ជារៀងរាល់ឆ្នាំ។

២. មូលនិធិអឺរ៉ុប៖ ប្រទេសប៉ូឡូញទទួលបានប្រាក់កម្ចី ជាមួយអត្រាការប្រាក់ទាប រហូតដល់ ៥២ប៊ីលានដុល្លារ ពីគម្រោងសកម្មភាពសន្តិសុខសម្រាប់អឺរ៉ុប(SAFE) របស់សហភាពអឺរ៉ុប។

ទីក្រុងវ៉ាសូវីនឹងប្រើប្រាស់មូលនិធិអឺរ៉ុបមួយចំនួនធំ ដើម្បីវិនិយោគលើឧស្សាហកម្មក្នុងស្រុក ដោយផ្តោតលើ ដ្រូន ពង្រឹងសមត្ថភាពប្រឆាំងដ្រូន និងគ្រាប់រំសេវដែលមានភាពជាក់លាក់ខ្ពស់រយៈចម្ងាយឆ្ងាយ។

៣. ការចំណាយលើការការពារជាតិខ្ពស់បំផុតមិនធ្លាប់មាន៖ ប្រទេសប៉ូឡូញចំណាយជិត៥% នៃផលិតផលក្នុងស្រុកសរុបសម្រាប់វិស័យការពារជាតិ ដែលសមាមាត្រខ្ពស់បំផុតក្នុងចំណោមប្រទេសសមាជិកណាតូទាំងអស់។

អ្នកជំនាញព្យាករណ៍ថា ការផ្ទេរបច្ចេកវិទ្យានិងខ្សែសង្វាក់ផលិតកម្មដ៏ធំទាំងនេះអាចចាត់ថ្នាក់ប្រទេសប៉ូឡូញក្នុងចំណោមក្រុមហ៊ុនផលិតសព្វាវុធកំពូលទាំងបី ឬ៤របស់អឺរ៉ុប នាពេលអនាគតដ៏ខ្លីខាងមុខ៕

សម្រួល៖ ណឺ មិនា

The post ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ appeared first on Kampuchea Thmey Daily.

បារាំងជាប្រទេសនាំចេញសព្វាវុធ ឈានមុខគេចេញពីតំបន់អឺរ៉ុប

Minea Neu — Wed, 27 May 2026 05:00:59 +0000

ស្របពេលដែលពិភពលោក កំពុងប្រឈមសង្គ្រាមស្ទើរគ្រប់តំបន់ ទីផ្សារអាវុធបានក្លាយជាពាណិជ្ជកម្មដ៏ពេញនិយម សម្រាប់ប្រទេសដែលគ្មានលទ្ធភាពផលិតអាវុធ។ គ្រប់ប្រទេសមហាអំណាចសុទ្ធសឹងតែមានឧស្សាហកម្មផលិតអាវុធ និង មានទីផ្សារនាំចេញរបស់ពួកគេ។

យោងតាមទិន្នន័យវិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) ដែលមានមូលដ្ឋាននៅប្រទេសស៊ុយអែត បណ្តាប្រទេសនានានៅអឺរ៉ុបសុទ្ធតែមានលទ្ធភាពផលិតអាវុធ និងការនាំចេញអាវុធទៅកាន់បណ្តាប្រទេសនានាទាំងនៅទ្វីបអាស៊ី និងទ្វីបអាហ្វ្រិក ហើយបារាំងជាប្រទេសឈានមុខគេក្នុងការចែកចាយសព្វាវុធចេញពីទ្វីបអឺរ៉ុប។

នៅទូទាំងពិភពលោក ប្រទេសបារាំងជាប់ចំណាត់ថ្នាក់ជាអ្នកនាំចេញអាវុធធំជាងគេទីពីរ ដែលមានចំនួនជិត១០% នៃទីផ្សារនាំចេញអាវុធទូទាំងពិភពលោក។ នេះបើយោងតាមរបាយការណ៍ដដែល។

យន្តហោះចម្បាំងបារាំង។ រូបភាព៖ Reuters

យោងតាមភ្នាក់ងារសារព័ត៌មានរ៉យទ័រចេញផ្សាយកាលពីខែមីនា ឆ្នាំ២០២៦ ប្រទេសដែលនាំចេញអាវុធកំពូលរបស់អឺរ៉ុបរួមមាន៖

បារាំង៖ ប្រទេសនាំចេញអាវុធលំដាប់កំពូលរបស់អឺរ៉ុប ដោយមានតម្រូវការខ្ពស់ គឺយន្តហោះចម្បាំង Rafale ទូទាំងពិភពលោក។

អាល្លឺម៉ង់៖ ថ្មីៗនេះបានវ៉ាដាច់ប្រទេសចិន ដើម្បីក្លាយជាប្រទេសនាំចេញអាវុធលំដាប់ទី៤ នៅទូទាំងពិភពលោក ដោយផ្នែកសំខាន់នៃការនាំចេញរបស់ខ្លួនគឺទៅអ៊ុយក្រែន និងសម្ព័ន្ធមិត្តអឺរ៉ុបផ្សេងទៀត។

អ៊ីតាលី៖ ជាប់ចំណាត់ថ្នាក់ជាអ្នកនាំចេញអាវុធលំដាប់ទី៦ ដោយកើនឡើង១៥៧% នៃការនាំចេញអាវុធ នាប៉ុន្មានឆ្នាំថ្មីៗនេះ។

ចក្រភពអង់គ្លេស៖ ជាប្រទេសដ៏សំខាន់មួយក្នុងទីផ្សារការពារជាតិអឺរ៉ុបនិងសកល ដែលគាំទ្រដោយអ្នកម៉ៅការការពារជាតិកំពូលៗដូចជា ក្រុមហ៊ុន BAE Systems មានទីតាំងនៅសហរដ្ឋអាមេរិក អង់គ្លេស និងស៊ុយអែត។

ខណៈប្រទេសរុស្ស៊ីធ្លាប់កាន់កាប់ចំណែកធំមួយក្នុងចំណោម៥ ប្រទេសទូទាំងពិភពលោក ប៉ុន្តែបរិមាណនាំចេញរបស់ខ្លួនធ្លាក់ចុះគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ដោយសារសង្រ្គាមជាមួយអ៊ុយក្រែន ការដាក់ទណ្ឌកម្មពីអន្តរជាតិជាដើម៕

សម្រួល៖ ណឺ មិនា

The post បារាំងជាប្រទេសនាំចេញសព្វាវុធ ឈានមុខគេចេញពីតំបន់អឺរ៉ុប appeared first on Kampuchea Thmey Daily.

មន្ត្រីអាមេរិក លាតត្រដាងពីការទាមទាររបស់ត្រាំ មិនឱ្យចិនលូកដៃជួយអ៊ីរ៉ង់

Minea Neu — Mon, 18 May 2026 04:11:10 +0000

បេសកជនពាណិជ្ជកម្មជាន់ខ្ពស់របស់ លោក ដូណាល់ ត្រាំ បានលើកឡើងកាលពីថ្ងៃអាទិត្យថា ប្រធានាធិបតីសហរដ្ឋអាមេរិកទាមទារឱ្យមានការប្តេជ្ញាចិត្តពីប្រទេសចិន ថា នឹងមិនផ្តល់ការគាំទ្រណាមួយដើម្បីពង្រឹងសមត្ថភាពអ៊ីរ៉ង់ ប៉ុន្តែសហរដ្ឋអាមេរិកមិនបានស្វែងរកជំនួយដោយផ្ទាល់ពីប្រទេសចិន ដើម្បីបើកច្រកសមុទ្រហ័រមូសឡើងវិញទេ។ នេះបើយោងតាមសារព័ត៌មាន ABC ផ្សាយថ្ងៃទី១៧ ខែឧសភា ឆ្នាំ២០២៦ ។

លោក Jamieson Greer អ្នកតំណាងពាណិជ្ជកម្មសហរដ្ឋអាមេរិក លើកឡើងក្នុងកម្មវិធី «This Week» របស់សារព័ត៌មាន ABC ថា៖ « នៅពេលប្រធានាធិបតីចូលទៅ[ជជែកជាមួយចិន] លោក មិនបានទៅសុំឱ្យពួកគេ [ចិន] ឱ្យចាត់វិធានការក្នុងច្រកសមុទ្រហ័រមូសទេ។ លោកផ្តោតការយកចិត្តទុកដាក់យ៉ាងខ្លាំង ដើម្បីប្រាកដថា ពួកគេមិនផ្តល់ការគាំទ្រសម្ភារៈ[ជំនួយជាក់ស្តែងណាមួយដែលអាចពង្រឹងសមត្ថភាពយោធា ឬយុទ្ធសាស្ត្រ] ដល់អ៊ីរ៉ង់។ នោះជាការប្តេជ្ញាចិត្តដែលលោកទទួល និងបានបញ្ជាក់»។

លោក Jamieson Greer អ្នកតំណាងពាណិជ្ជកម្មសហរដ្ឋអាមេរិក។ រូបភាព៖ Reuters

លោក Greer បន្ថែមថា៖ « ប្រទេសចិនមានចំណាប់អារម្មណ៍យ៉ាងច្បាស់លាស់ក្នុងការបើកច្រកសមុទ្រឡើងវិញ។ ខ្ញុំបានចូលរួមក្នុងកិច្ចប្រជុំទាំងនោះ[ត្រាំ-ស៊ី នៅទីក្រុងប៉េកាំង] ហើយនេះជាអ្វីដែលប្រទេសចិនបាននិយាយ។ ប៉ុន្តែគ្មានការចូលរួមដោយផ្ទាល់ទេ វាមិនច្បាស់ថាតើជំហររបស់ប្រទេសចិននឹងធ្វើអ្វីមួយ ដើម្បីដាក់សម្ពាធលើអ៊ីរ៉ង់ឬអត់នោះទេ»។

លោក Greer បន្តថា៖ « ប្រធានាធិបតីមិនបានស្វែងរកការធ្វើប្រតិបត្តិការយោធារួមគ្នាជាមួយចិនទេ។ ខ្ញុំមិនគិតថាប្រធានាធិបតីអាមេរិកធ្វើបែបនោះទេ។ ប៉ុន្តែជាក់ស្តែង យើងចង់ធ្វើឱ្យប្រាកដថា ពួកគេមិនរារាំងអ្វីដែលយើងកំពុងធ្វើ […]»។

គួរបញ្ជាក់ថា លោក ដូណាល់ ត្រាំ បានធ្វើទស្សនកិច្ចទៅប្រទេសចិនកាលពីថ្ងៃទី១៣ ដល់ថ្ងៃទី១៥ ខែឧសភា ឆ្នាំ២០២៦ សម្រាប់កិច្ចប្រជុំកំពូលរយៈពេល២ថ្ងៃជាមួយលោកប្រធានាធិបតី ស៊ី ជីនពីង។

អំឡុងពេលនៃដំណើរទស្សនកិច្ច អ៊ីរ៉ង់គឺជាប្រធានបទសំខាន់មួយដ៏សំខាន់និងក្តៅបំផុតនៃការពិភាក្សារបស់មេដឹកនាំកំពូលទាំងពីរ។ លោក ត្រាំ បានដាក់សម្ពាធលើប្រទេសចិនមិនឱ្យផ្តល់ការគាំទ្រផ្នែកយោធាណាមួយដល់អ៊ីរ៉ង់ និងបានស្វែងរកជំនួយពីទីក្រុងប៉េកាំងក្នុងការលើកទឹកចិត្តទីក្រុងតេហេរ៉ង់ឱ្យប្រកាន់ខ្ជាប់នូវបទឈប់បាញ់ក្នុងសង្គ្រាមអ៊ីរ៉ង់ដែលកំពុងបន្ត៕

សម្រួល៖ ណឺ មិនា

The post មន្ត្រីអាមេរិក លាតត្រដាងពីការទាមទាររបស់ត្រាំ មិនឱ្យចិនលូកដៃជួយអ៊ីរ៉ង់ appeared first on Kampuchea Thmey Daily.

រដ្ឋបាល ត្រាំ លក់សម្ភារៈយោធាតម្លៃសរុបជាង ៨.៦ប៊ីលានដល់អ៊ីស្រាអែលនិងប្រទេសបីនៅឈូងសមុទ្រ ដោយមិនឆ្លងសភា

Minea Neu — Sat, 02 May 2026 08:57:08 +0000

រដ្ឋបាល ប្រធានាធិបតីសហរដ្ឋអាមេរិក លោក ដូណាល់ ត្រាំ បានរំលងការពិនិត្យឡើងវិញរបស់សភាអាមេរិក ដើម្បីអនុម័តការលក់សម្ភារៈយោធាតម្លៃសរុបជាង ៨.៦ប៊ីលានដុល្លារដល់អ៊ីស្រាអែល កាតា គុយវ៉ែត និងអារ៉ាប់រួម នាពេលថ្មីៗនេះ។

យោងតាមភ្នាក់ងារសារព័ត៌មានរ៉យទ័រ នៅថ្ងៃទី០២ ខែ៥ ឆ្នាំ២០២៦ ការប្រកាសរបស់ក្រសួងការបរទេស កាលពីថ្ងៃសុក្របានកើតឡើងពេលសង្គ្រាមរបស់សហរដ្ឋអាមេរិកនិងអ៊ីស្រាអែលប្រឆាំងនឹងអ៊ីរ៉ង់ ក្នុងរយៈពេលប្រាំបួនសប្តាហ៍ចាប់តាំងពីការចាប់ផ្តើមនិងជាងបីសប្តាហ៍ចាប់តាំងពីបទឈប់បាញ់ដ៏ផុយស្រួយបានចូលជាធរមាន។

លោក ត្រាំ និងរដ្ឋមន្រ្តីក្រសួងការពារជាតិអាមេរិក។ រូបភាព៖ Reuters

ការសម្រេចចិត្តរបស់ប្រធានាធិបតី លោក ត្រាំ បានបង្កើនល្បឿនសមត្ថភាពការពារជាតិទៅកាន់តំបន់នោះ អំឡុងពេលនៃអស្ថិរភាពគួរឱ្យកត់សម្គាល់។

ដោយឡែក រដ្ឋមន្ត្រីការបរទេស លោក Marco Rubio បានកំណត់ថា៖ « មានអាសន្នដែលតម្រូវឱ្យមានការលក់ជាបន្ទាន់ដល់ប្រទេសទាំងនោះ ដែលលើកលែងតម្រូវការពិនិត្យឡើងវិញតាមស្តង់ដាររបស់សភា»។

ការអនុម័តទាំងនោះរួមមានការលក់ប្រព័ន្ធការពារមីស៊ីល Patriot ឡើងវិញ សម្រាប់យោធាទៅកាន់ប្រទេសកាតា មានតម្លៃ ៤.០១ ប៊ីលានដុល្លារ និងប្រព័ន្ធអាវុធសម្លាប់ដោយភាពជាក់លាក់ខ្ពស់ (APKWS) មានតម្លៃ ៩៩២.៤ លានដុល្លារ។

គួរបញ្ជាក់ថា ការលក់នេះក៏រួមបញ្ចូលទាំងប្រព័ន្ធបញ្ជាការប្រយុទ្ធរួមបញ្ចូលគ្នាសម្រាប់ប្រទេសគុយវ៉ែតមានតម្លៃ ២.៥ ប៊ីលានដុល្លារ និង APKWS សម្រាប់ប្រទេសអ៊ីស្រាអែលក្នុងតម្លៃ ៩៩២.៤ លានដុល្លារ។

ក្រសួងការបរទេសក៏បានអនុម័តការលក់ APKWS ទៅឱ្យប្រទេសអារ៉ាប់រួម ក្នុងតម្លៃ ១៤៧.៦លានដុល្លារផងដែរ។

សហរដ្ឋអាមេរិកនិងអ៊ីស្រាអែលបានវាយប្រហារអ៊ីរ៉ង់នៅថ្ងៃទី ២៨ ខែកុម្ភៈ ជំរុញឱ្យមានការវាយប្រហារសងសឹកលើអ៊ីស្រាអែលនិងរដ្ឋឈូងសមុទ្រដែលមានមូលដ្ឋានទ័ពអាមេរិក។ ខណៈទីក្រុងវ៉ាស៊ីនតោនបានប្រឈមនឹងការត្រួតពិនិត្យយ៉ាងម៉ត់ចត់លើទំនាក់ទំនងយោធារបស់ខ្លួនជាមួយប្រទេសគុយវ៉ែត អារ៉ាប់រួម និងកាតា រដ្ឋបាលនេះបានរក្សាការគាំទ្រដល់សម្ព័ន្ធមិត្តរបស់ខ្លួន។

ការសម្រេចចិត្តរបស់ក្រសួងការបរទេសសហរដ្ឋអាមេរិកផ្តល់អាទិភាពដល់ស្ថិរភាពក្នុងតំបន់ជាងពេលវេលាត្រួតពិនិត្យតាមស្តង់ដារប្រទេសខ្លួន៕

ប្រែសម្រួល៖ ណឺ មិនា

The post រដ្ឋបាល ត្រាំ លក់សម្ភារៈយោធាតម្លៃសរុបជាង ៨.៦ប៊ីលានដល់អ៊ីស្រាអែលនិងប្រទេសបីនៅឈូងសមុទ្រ ដោយមិនឆ្លងសភា appeared first on Kampuchea Thmey Daily.

ក្រុមហ៊ុន ផលិតអាវុធអាមេរិកជាច្រើន ទទួលបានការបញ្ជាទិញច្រើន

Minea Neu — Fri, 24 Apr 2026 13:30:00 +0000

ជម្លោះភូមិសាស្ត្រនយោបាយ សង្គ្រាមរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ និងជម្លោះរវាងរុស្ស៊ីជាមួយអ៊ុយក្រែន ជំរុញឱ្យមានតម្រូវការកើនឡើងសម្រាប់ក្រុមហ៊ុនផលិតសម្ភារៈការពារជាតិរបស់សហរដ្ឋអាមេរិក ប៉ុន្តែលទ្ធផលត្រីមាសទីមួយ បានបង្ហាញថា កំណើនប្រាក់ចំណេញមានកម្រិត ផ្ទុយពីភាពជាក់ស្តែង ដែលបណ្តាលមកពីពេលវេលា និងការកកស្ទះការផ្គត់ផ្គង់ ខណៈមន្ទីរបញ្ចកោណកំពុងប្រណាំងប្រជែងបំពេញស្តុកអាវុធនិងយន្តហោះ។ នេះបើយោងតាមសារព័ត៌មាន Al Jazeera និង Reuters ផ្សាយថ្ងៃទី២៣ ខែមេសា ឆ្នាំ២០២៦ ។

យន្តហោះចម្បាំង F-35 របស់ក្រុមហ៊ុន Lockheed Martin. Reuters

លទ្ធផលត្រីមាសទីមួយ បង្ហោះនៅសប្តាហ៍នេះ ពីក្រុមហ៊ុន Lockheed Martin, Northrop Grumman, RTX Corporation និង Boeing រកឃើញកំណើនមានកម្រិត ខណៈខ្សែសង្វាក់ផ្គត់ផ្គង់និងពន្យារពេលផលិតកម្មបានជះឥទ្ធិពលដល់ឧស្សាហកម្មនេះ។ ក្រុមហ៊ុន Lockheed Martin រាយការណ៍ពីប្រាក់ចំណូលត្រីមាសទីមួយរបស់ខ្លួននៅថ្ងៃព្រហស្បតិ៍ថា ចំណូលធ្លាក់ចុះទាបជាងការរំពឹងទុក ហើយប្រាក់ចំណេញត្រីមាសទីមួយក៏ទាបដែរ។

ប្រាក់ចំណូលសុទ្ធនៅក្នុងត្រីមាសទីមួយនៃឆ្នាំ២០២៦ មានចំនួន ១.៥ប៊ីលានដុល្លារ ធ្លាក់ចុះពី ១.៧ប៊ីលានដុល្លារ ក្នុងត្រីមាសទីមួយនៃឆ្នាំ ២០២៥ ។

ក្រុមហ៊ុនការពារជាតិយក្សដែលមានមូលដ្ឋាននៅទីក្រុង Bethesda រដ្ឋ Maryland និយាយថា ផ្នែកអាកាសចរណ៍របស់ខ្លួនត្រូវបានរងផលប៉ះពាល់ដោយការពន្យារពេលក្នុងការអភិវឌ្ឍយន្តហោះចម្បាំង F-១៦ ទៅនឹងការធ្វើតេស្តហោះហើរ ខណៈភាពតានតឹងខ្សែសង្វាក់ផ្គត់ផ្គង់មានទម្ងន់លើយន្តហោះដឹកជញ្ជូន C-១៣០ របស់ក្រុមហ៊ុន។

នាយកប្រតិបត្តិម្នាក់របស់ក្រុមហ៊ុន Lockheed លើកឡើងថា៖ « ការចំណាយរួមគ្នានៃការកែលម្អនិងការពង្រីកកាលវិភាគបានឆ្លងកាត់ការប៉ាន់ស្មានកម្មវិធីរបស់យើង»។

ការលក់បានធ្លាក់ចុះ ខណៈបរិមាណនៃកម្មវិធីសម្ងាត់ថយចុះ ៣២៥លានដុល្លារពីត្រីមាសមុន ទោះយ៉ាងណា ការខាតបង់ត្រូវបានទូទាត់ដោយការកើនឡើងនៃការលក់យន្តហោះចម្បាំង F-៣៥ ។ រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ ស្នើទិញយន្តហោះចម្បាំង F-៣៥ ថ្មីចំនួន ៨៥គ្រឿង នៅឆ្នាំ២០២៧ ។

លោក Seth Seifman អ្នកវិភាគនៅធនាគារ JP Morgan និយាយថា៖ « យើងមិនមានការភ្ញាក់ផ្អើលទេ ដោយសារបំណងប្រាថ្នារបស់ថ្នាក់គ្រប់គ្រងក្នុងការតម្រឹមជាមួយរបៀបវារៈរបស់អតិថិជន»។

គួរបញ្ជាក់ថា ភាគហ៊ុនរបស់ក្រុមហ៊ុន Lockheed កំពុងធ្លាក់ចុះនៃការជួញដូរ ធ្លាក់ចុះ ៥.១ភាគរយ ចាប់តាំងពីទីផ្សារបានបើកនៅថ្ងៃព្រហស្បតិ៍ ហើយធ្លាក់ចុះជាង ១២ភាគរយក្នុងរយៈពេល៥ថ្ងៃចុងក្រោយនេះ៕

ប្រែសម្រួល៖ ណឺ មិនា

The post ក្រុមហ៊ុន ផលិតអាវុធអាមេរិកជាច្រើន ទទួលបានការបញ្ជាទិញច្រើន appeared first on Kampuchea Thmey Daily.

ជប៉ុនបើកឲ្យនាំអាវុធទៅក្រៅប្រទេស ចំណេញទាំងសេដ្ឋកិច្ចជាតិ និងកើនសម្ព័ន្ធមិត្ត

Minea Neu — Wed, 22 Apr 2026 13:00:00 +0000

ប្រទេសជប៉ុនបានលុបចោលគោលការណ៍ហាមឃាត់នូវការនាំចេញអាវុធទៅកាន់ប្រទេសដទៃទៀតនៅថ្ងៃអង្គារ ទី២១ ខែមេសា ឆ្នាំ២០២៦ ដែលអនុញ្ញាតឱ្យប្រទេសនេះអាចលក់ឧបករណ៍ការពារជាតិទៅកាន់ប្រទេសដៃគូចំនួន១៧ ដោយដាក់ទីតាំងឧស្សាហកម្មការពារជាតិរបស់ខ្លួនក្នុងកម្រិតបច្ចេកវិទ្យាខ្ពស់ និងក្នុងតម្លៃមួយសមរម្យ។

នាយករដ្ឋមន្រ្តីជប៉ុន លោក ស្រី សាណាអេ តាកាអ៊ិឈិ។ រូបភាព៖ Reuters

តើការលក់អាវុធនេះនឹងជួយអ្វីខ្លះដល់ប្រទេសដែលជាសម្ព័ន្ធមិត្តនិងជប៉ុនផ្ទាល់?

យោងតាមសារព័ត៌មាន Financial Times ផ្សាយថ្ងៃទី២១ ខែមេសា ឆ្នាំ២០២៦ ខាងក្រោមនេះ ជាហេតុផលដែលជះឥទ្ធិពលលើសេដ្ឋកិច្ចនិងយុទ្ធសាស្ត្រសំខាន់ៗដល់ប្រទេសជប៉ុន៖

១. កំណើនឧស្សាហកម្មការពារជាតិ៖ ក្រុមហ៊ុនផលិតអាវុធជប៉ុនដូចជា Mitsubishi Heavy Industries, NEC និង Kawasaki Heavy Industries កំពុងពង្រីកសមត្ថភាព ដើម្បីបំពេញតម្រូវការ ផ្លាស់ប្តូរពីការពឹងផ្អែកលើកិច្ចសន្យាតូចៗក្នុងស្រុក ទៅជាភាពជាដៃគូអន្តរជាតិ។

២. ពង្រឹងសម្ព័ន្ធភាព៖ តាមរយៈការនាំចេញទៅកាន់សម្ព័ន្ធមិត្តដូចជាសហរដ្ឋអាមេរិក ចក្រភពអង់គ្លេស និងនៅអាស៊ីអាគ្នេយ៍ (ហ្វីលីពីន) ប្រទេសជប៉ុនកំពុងពង្រឹងតួនាទីរបស់ខ្លួននៅក្នុងខ្សែសង្វាក់ផ្គត់ផ្គង់ការពារជាតិសកល។

៣. កិច្ចសហការបច្ចេកវិទ្យា៖ ការផ្លាស់ប្តូរនេះអនុញ្ញាតឱ្យមានគម្រោងអភិវឌ្ឍន៍រួមគ្នា ដូចជាកម្មវិធីអាកាសចរណ៍ប្រយុទ្ធសកល (GCAP) ជាមួយចក្រភពអង់គ្លេស និងអ៊ីតាលី អនុញ្ញាតឱ្យមានការចំណាយអភិវឌ្ឍន៍រួមគ្នានិងការចែករំលែកបច្ចេកវិទ្យាទំនើប។

៤. ការផ្លាស់ប្តូរសក្ដានុភាពសន្តិសុខតំបន់៖ ការផ្លាស់ប្តូរគោលនយោបាយ ដែលជាការឆ្លើយតបទៅនឹងក្តីបារម្ភសន្តិសុខតំបន់ អាចបង្កើនល្បឿននៃការប្រណាំងប្រជែងសព្វាវុធនៅក្នុងតំបន់អាស៊ីប៉ាស៊ីហ្វិក ដោយទាក់ទាញទាំងការគាំទ្រ និងរិះគន់ទាក់ទងនឹងឥរិយាបថសន្តិភាពនិយមក្រោយសង្គ្រាមលោកលើកទី២ របស់ជប៉ុន។

៥. រឹតបន្តឹងការនាំចេញ៖ ខណៈការរឹតបន្តឹងត្រូវបានលើកលែងលើអាវុធជាច្រើន តែការនាំចេញទៅកាន់ប្រទេសដែលមានជម្លោះសកម្ម នៅតែត្រូវបានរឹតបន្តឹងយ៉ាងខ្លាំង ទោះបីជាករណីលើកលែងអាចធ្វើទៅបានក៏ដោយ។ ការណ៍នេះ ជប៉ុនអនុញ្ញាតឱ្យមានការនាំចេញដែលមានគោលដៅនិងជាយុទ្ធសាស្ត្រ។

សរុបមក ការជះឥទ្ធិពលរយៈពេលវែងទំនងជានឹងពង្រឹងសមត្ថភាពបច្ចេកវិទ្យានៃវិស័យការពារជាតិរបស់ជប៉ុន ខណៈការធ្វើសមាហរណកម្មក្នុងប្រទេសនេះកាន់តែស៊ីជម្រៅទៅក្នុងក្របខ័ណ្ឌសន្តិសុខសកល ជាពិសេសប្រឆាំងនឹងហានិភ័យសន្តិសុខនិងការប្រកួតប្រជែងជាមួយក្រុមហ៊ុនផលិតអាវុធធំៗផ្សេងទៀត៕

ប្រែសម្រួល៖ ណឺ មិនា

The post ជប៉ុនបើកឲ្យនាំអាវុធទៅក្រៅប្រទេស ចំណេញទាំងសេដ្ឋកិច្ចជាតិ និងកើនសម្ព័ន្ធមិត្ត appeared first on Kampuchea Thmey Daily.

ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល

Minea Neu — Sat, 21 Mar 2026 07:12:32 +0000

ប្រទេសស្វីសលើកឡើងថាខ្លួននឹងមិនចេញអាជ្ញាប័ណ្ណសម្រាប់ក្រុមហ៊ុនក្នុងប្រទេសស្វីសនាំចេញអាវុធទៅកាន់សហរដ្ឋអាមេរិកនោះទេ ខណៈសង្គ្រាមកំពុងបន្តលើប្រទេសអ៊ីរ៉ង់ ដោយលើកឡើងពីគោលការណ៍អព្យាក្រឹតយូរអង្វែងរបស់ប្រទេសនេះ។

សារព័ត៌មាន Al Jazeera មានមូលដ្ឋាននៅប្រទេសកាតា បានចេញផ្សាយថ្ងៃទី២០ខែមីនា ឆ្នាំ២០២៦ រដ្ឋាភិបាលលើកឡើងនៅក្នុងសេចក្តីថ្លែងការណ៍មួយកាលពីថ្ងៃសុក្រថា ៖«ការនាំចេញឧបករណ៍សង្គ្រាមទៅកាន់ប្រទេសដែលពាក់ព័ន្ធនឹងជម្លោះប្រដាប់អាវុធអន្តរជាតិជាមួយអ៊ីរ៉ង់ មិនអាចត្រូវបានអនុញ្ញាតអំឡុងពេលជម្លោះនោះទេ»។

សព្វាវុធរបស់ប្រទេសស្វីស។ រូបភាព៖ Getty Images

សេចក្តីថ្លែងការណ៍ដដែលបន្តថា៖ «ការនាំចេញឧបករណ៍សង្គ្រាមទៅកាន់សហរដ្ឋអាមេរិកមិនអាចត្រូវបានអនុញ្ញាតក្នុងពេលនេះឡើយ»។

ការប្រកាសនេះកើតឡើងពេលដែលសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ឈានចូលសប្តាហ៍ទី៤ នាំឱ្យមានវិបត្តិមនុស្សធម៌កាន់តែធ្ងន់ធ្ងរនៅទូទាំងមជ្ឈិមបូព៌ា និងថាមពលសកលកើនឡើងផងដែរ។

មិនតែប៉ុណ្ណោះ រឿងនេះកើតឡើងបន្ទាប់ពីរដ្ឋាភិបាលស្វីសសម្រេចចិត្ត បិទដែនអាកាសរបស់ខ្លួន ចំពោះជើងហោះហើររបស់យោធាអាមេរិកដែលភ្ជាប់ដោយផ្ទាល់ទៅនឹងអ៊ីរ៉ង់។

គួរបញ្ជាក់ថា ច្បាប់សហព័ន្ធប្រទេសស្វីសត្រូវបានអនុម័តក្នុងឆ្នាំ ១៩៩៦ ចែងថាការនាំចូល នាំចេញ និងការឆ្លងកាត់ដោយសម្ភារៈសង្គ្រាមនិងបច្ចេកវិទ្យាពាក់ព័ន្ធ តម្រូវឱ្យមានអាជ្ញាប័ណ្ណនាំចេញដោយផ្អែកលើគោលការណ៍សិទ្ធិមនុស្ស និងអព្យាក្រឹតភាព។

ចាប់តាំងពីសង្គ្រាមអ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ ប្រទេសស្វីសប្រកាសថា មិនមានអាជ្ញាប័ណ្ណនាំចេញថ្មីណាមួយចេញឱ្យសហរដ្ឋអាមេរិកនោះទេ។

រដ្ឋាភិបាលក៏បានសង្កត់ដែរថា មិនមានអាជ្ញាប័ណ្ណច្បាស់លាស់ណាសម្រាប់ការនាំចេញសម្ភារៈសង្គ្រាមទៅកាន់អ៊ីស្រាអែលអស់រយៈពេលជាច្រើនឆ្នាំមកហើយ ហើយចំពោះអ៊ីរ៉ង់ក៏ដូចគ្នា។

ចំណែកអាជ្ញាប័ណ្ណអាមេរិកដែលមានស្រាប់បច្ចុប្បន្នប្រឈមមុខនឹងការពិនិត្យឡើងវិញជាប្រចាំដោយក្រុមអ្នកជំនាញ ដើម្បីវាយតម្លៃថាតើជំហាននានាត្រូវបានទាមទារក្រោមច្បាប់អព្យាក្រឹតភាពឬអត់។

យោងតាមទិន្នន័យរបស់រដ្ឋាភិបាលស្វីស សហរដ្ឋអាមេរិកគឺជាអ្នកទិញ អាវុធពីប្រទេសស្វីសធំជាងគេទីពីរកាលពីឆ្នាំមុនដែលមានតម្លៃ ១១៩លានដុល្លារ៕

ប្រែសម្រួល៖ ណឺ មិនា

The post ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល appeared first on Kampuchea Thmey Daily.

សព្វាវុធ Archives - Kampuchea Thmey Daily

អាមេរិក ​នៅ​តែ​ជាប់ឈ្មោះ​​នាំ​ចេញ​អាវុធ​ធំ​​បំផុត​​លើ​លោក ទោះបី​​ជា​ បរិមាណ​​អាវុធ​ថយ​ចុះ​

ប៉ូឡូញ​នឹង​ក្លាយ​ជា​ប្រទេសផលិតសព្វា​វុធធំ​​ទី​៣​ នៅ​អឺរ៉ុប​ នាពេល​ខ្លី​ខាង​មុខ​​

បារាំង​ជា​ប្រទេស​នាំ​ចេញ​សព្វា​វុធ​ ឈាន​មុខ​គេ​​ចេញ​ពី​តំបន់​​អឺរ៉ុប​

មន្ត្រី​អាមេរិក លាតត្រដាង​ពី​ការ​​ទាម​ទាររបស់​ត្រាំ​ ​មិន​ឱ្យ​ចិន​​​លូកដៃ​​ជួយ​​អ៊ីរ៉ង់​

ក្រុម​ហ៊ុន ផលិត​អាវុធអាមេរិក​​ជាច្រើន​ ​ទទួលបាន​ការបញ្ជាទិញច្រើន​

​ជប៉ុនបើក​ឲ្យ​នាំ​អាវុធ​ទៅ​ក្រៅ​ប្រទេស ​ចំណេញ​ទាំងសេដ្ឋកិច្ច​​ជាតិ​ និង​កើន​សម្ព័ន្ធមិត្ត​

ស្វីស​មិន​​ឲ្យ​នាំ​ចេញ​អាវុធទៅ​អាមេរិក​ទេ​ ខណៈ​សង្រ្គាម​នៅ​អ៊ីរ៉ង់​​​​​កំពុង​រាលដាល​​

អាមេរិក នៅតែជាប់ឈ្មោះនាំចេញអាវុធធំបំផុតលើលោក ទោះបីជា បរិមាណអាវុធថយចុះ

ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ

បារាំងជាប្រទេសនាំចេញសព្វាវុធ ឈានមុខគេចេញពីតំបន់អឺរ៉ុប

មន្ត្រីអាមេរិក លាតត្រដាងពីការទាមទាររបស់ត្រាំ មិនឱ្យចិនលូកដៃជួយអ៊ីរ៉ង់

ក្រុមហ៊ុន ផលិតអាវុធអាមេរិកជាច្រើន ទទួលបានការបញ្ជាទិញច្រើន

ជប៉ុនបើកឲ្យនាំអាវុធទៅក្រៅប្រទេស ចំណេញទាំងសេដ្ឋកិច្ចជាតិ និងកើនសម្ព័ន្ធមិត្ត

ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល