ការចុះពិនិត្យនេះ បានធ្វើឡើងនៅថ្ងៃទី៦ ខែកក្កដា ឆ្នាំ២០២៦ ដឹកនាំដោយលោក អៀម អឿន ប្រធានមន្ទីរអភិវឌ្ឍន៍ជនបទ ខេត្តរតនគិរី រួមជាមួយលោក ស៊ឹម ស៊ីដែន អនុប្រធានមន្ទីរ លោក លាវ ប៉ារ៉ាហ្វ័ស្ស ប្រធានការិយាល័យផ្លូវជនបទ លោក លីវ ប្រធានក្រុមទីប្រឹក្សាគ្រប់គ្រងគម្រោងភាគីចិន និងមន្ត្រីបច្ចេកទេសជាច្រើនរូបទៀត។

លោក កែវ សិគុណ អនុរដ្ឋលេខាធិការក្រសួងអភិវឌ្ឍន៍ជនបទ បានឱ្យដឹងថា គម្រោងកែលម្អផ្លូវជនបទ ជំហានទី៣ (CRRIP III) ក្រោមជំនួយឥតសំណងរបស់សាធារណរដ្ឋប្រជាមានិតចិន គ្រោងអនុវត្តផ្លូវចំនួន៣ខ្សែ នៅក្នុងខេត្តរតនគិរី។

ក្នុងនោះមានផ្លូវចំនួន ០២ ខ្សែជាគម្រោងផ្លូវចាស់ និងបន្ថែម ០១ខ្សែទៀត , ផ្លូវទៅ សង្កាត់យក្ខឡោម ក្រុងបានលុង ឃុំបាតាង ឃុំកាឡែង ស្រុកលំផាត់ ជាផ្លូវកម្រាលកៅស៊ូពីរជាន់ និងបេតុង សរុបប្រវែង ៣៧,១០គ.ម , ផ្លូវទៅឃុំឯកភាព ឃុំសាមគ្គី ស្រុកអូរជុំ ខេត្តរតនគិរី ជាផ្លូវកម្រាលកៅស៊ូពីរជាន់ មានប្រវែង ១២,២៥គ.ម និង ផ្លូវចំនួន ០១ ខ្សែទៀតចាប់ពីភូមិកាម៉ែន ឃុំសាមគ្គី ស្រុកអូរជុំ ឆ្ពោះទៅកាន់ភូមិយឺន ឃុំកក់ ស្រុកបរកែវ ខេត្តរតនគិរី ជាផ្លូវកម្រាលកៅស៊ូពីរជាន់ មានប្រវែង ១២គ.ម ដើម្បីរៀបចំឯកសារដេញថ្លៃ។

ប្រភពដដែលបញ្ជាក់ថា គម្រោងមួយចំនួនបានបញ្ចប់នីតិវិធីដេញថ្លៃ និងចាប់ផ្តើមសាងសង់ជាបណ្តើរៗហើយ។ នៅពេលបញ្ចប់ការសាងសង់ ផ្លូវទាំងនេះនឹងរួមចំណែកសម្រួលការធ្វើដំណើររបស់ប្រជាពលរដ្ឋ កាត់បន្ថយពេលវេលាដឹកជញ្ជូនកសិផលពីស្រែចម្ការទៅកាន់ទីផ្សារ ព្រមទាំងជួយលើកកម្ពស់សកម្មភាពសេដ្ឋកិច្ច និងជំរុញការអភិវឌ្ឍវិស័យទេសចរណ៍នៅតំបន់បឹងយក្សឡោម និងរមណីយដ្ឋានអូរប្រាំពីរជាន់ឱ្យកាន់តែមានសក្តានុពល៕

ដោយ៖ ខៀវ ចាប

The post អាជ្ញាធរចុះពិនិត្យគម្រោងផ្លូវពីបឹងយក្សឡោមឆ្ពោះទៅកាន់រមណីយដ្ឋានទឹកជ្រោះ៧ជាន់ត្រៀមជួសជុលក្រោមជំនួយឥតសំណងពីចិន appeared first on Kampuchea Thmey Daily.

ការងារជួសជុលផ្លូវនេះ មានប្រវែងសរុប ១១,៧០០ម៉ែត្រ ស្ថិតនៅភូមិសាយ៉ស់ ក្នុងភូមិសាស្ត្រស្រុកលំផាត់ និងក្រុងបានលុង។ កាលពីថ្ងៃទី១៥ ខែមិថុនា ឆ្នាំ២០២៦ មន្ត្រីជំនាញបានចុះពិនិត្យវឌ្ឍនភាពការងារ ខណៈការជួសជុលសម្រេចបានប្រមាណ ៧០ភាគរយហើយ ដោយគ្រោងបញ្ចប់ការស្ថាបនាដ៏ឆា​ប់ខាងមុខនេះ។

លោក អៀន អឿន ប្រធានមន្ទីរអភិវឌ្ឍន៍ជនបទខេត្តរតនគិរី បានឱ្យដឹងថា ផ្លូវនេះមានសារៈសំខាន់សម្រាប់ការធ្វើដំណើររបស់ប្រជាពលរដ្ឋក្នុងឃុំសេដា ឃុំកាឡែង ឃុំបាតាង នៃស្រុកលំផាត់ ឃុំលុងឃុង នៃស្រុកបរកែវ និងសង្កាត់យក្ខឡោម នៃក្រុងបានលុង។ លោកបន្តថា បន្ទាប់ពីការជួសជុលរួចរាល់ ផ្លូវនេះនឹងជួយកាត់បន្ថយពេលវេលាធ្វើដំណើរ សម្រួលដល់ការទំនាក់ទំនង ការដឹកជញ្ជូនកសិផល និងការអន្តរាគមន៍ករណីបន្ទាន់នានាឱ្យកាន់តែមានប្រសិទ្ធភាព។

ជាពិសេស កំណាត់ផ្លូវនេះនឹងជួយលើកកម្ពស់វិស័យទេសចរណ៍ក្នុងខេត្តរតនគិរី ដោយបង្កភាពងាយស្រួលដល់ភ្ញៀវទេសចរជាតិ និងអន្តរជាតិ ក្នុងការធ្វើដំណើរទៅកាន់រមណីយដ្ឋានបឹងយក្ខឡោម ដែលជាបឹងភ្នំភ្លើងបុរាណមានប្រវត្តិសាស្ត្រយូរលង់ និងទឹកជ្រោះធម្មជាតិអូរស៊ិនលែរ៍។

គួរបញ្ជាក់ថា កំណាត់ផ្លូវនេះធ្លាប់រងការខូចខាតយ៉ាងខ្លាំងអស់រយៈពេលជាច្រើនឆ្នាំ ទាំងនៅរដូវប្រាំង និងរដូវវស្សា ដែលបង្កការលំបាកដល់ការធ្វើដំណើរ ការដឹកជញ្ជូនកសិផល ការដឹកអ្នកជំងឺសង្គ្រោះបន្ទាន់ និងការធ្វើដំណើរទៅសាលារៀនរបស់សិស្សានុសិស្ស។ ក្រោយការជួសជុលរួច ផ្លូវនេះត្រូវបានរំពឹងថានឹងក្លាយជាសរសៃឈាមសេដ្ឋកិច្ច និងទេសចរណ៍ដ៏សំខាន់មួយរបស់ខេត្តរតនគិរី៕

ដោយ៖ ខៀវ ចាប

The post អាជ្ញាធរជួសជុលកំណាត់ផ្លូវឆ្ពោះទៅកាន់តំបន់ប្រវត្តិសាស្ត្រ និងរមណីយដ្ឋានបឹងយក្ខឡោម សម្រេចបាន៧០% appeared first on Kampuchea Thmey Daily.

ក្រុងបានលុងជាក្រុងមួយក្នុងចំណោមក្រុងស្រុកទាំង ៩ នៃខេត្តរតនគិរី ដែល​មានព្រំប្រទល់ខាងជើងទល់នឹង​ស្រុកអូរជុំ ខាង​ត្បូងទល់នឹងស្រុកលំផាត់ ខាងកើតទល់នឹងស្រុកបរកែវ និង​ខាង​លិចទល់នឹងស្រុកកូនមុំ និង​មាន​ចម្ងាយប្រមាណ ៥៨៨ គីឡូម៉ែត្រ​ពី​រាជធានីភ្នំពេញ​។

រដ្ឋបាល​ក្រុង​ចែកចេញជា ៤ សង្កាត់ (សង្កាត់​យក្សឡោម សង្កាត់​បឹង​កន្សែង សង្កាត់​ឡាបានសៀក និង​សង្កាត់​កា​ចាញ)  និង ១៩ ភូមិ។ ក្រុង​បានលុង​​​មាន​វិសាលភាព​​​ផ្ទៃដីទំហំ​​ ១២០,២២ គីឡូម៉ែត្រការ៉េ ជាមួយ​ចំនួន​​ប្រជាជន​រស់នៅ​សរុប​ ៣៥.៤៨២ នាក់ (ស្រី ១៧.៧១៩ នាក់) ស្មើនឹង ៨.៣៧១ គ្រួសារ។

រចនាសម្ព័ន្ធរដ្ឋបាលក្រុងបានលុង៖

-ក្រុមប្រឹក្សាក្រុងសរុបមាន​ចំនួន ១៥ រូប (ស្ត្រី ០៤ រូប)
-គណៈអភិបាលក្រុង​មាន​ចំនួន ០៧ រូប (ស្ត្រី ០២ រូប)
-នាយករដ្ឋបាលមាន​​ចំនួន ០១ រូប និង​នាយករងរដ្ឋបាលមាន​ចំនួន ០៣ រូប

វិស័យសុខាភិបាល

-ក្នុង​ក្រុង​មានមន្ទីរពេទ្យបង្អែកខេត្ត​​ចំនួន ០១ កន្លែង, មណ្ឌលសុខភាព​​ចំនួន ០២ កន្លែង ​មន្ទីរស​ម្រាក​ព្យាបាល​ជំងឺ​​ចំនួន ០៧ កន្លែង បន្ទប់ថែទាំជំងឺ​​ចំនួន ២០ កន្លែង

វិស័យអប់រំ

-វិទ្យាល័យរដ្ឋក្នុងក្រុង​បានលុង​មាន​ចំនួន ០៣ កន្លែង (វិទ្យាល័យអន្តេវាសិកដ្ឋានក្រុងបានលុង វិទ្យាល័យ សម្តេចឪសម្តេច​ម៉ែ វិទ្យាល័យ ហ៊ុន សែន ភូមិថ្មី) អនុវិទ្យាល័យរដ្ឋ​ចំនួន ០៦ កន្លែង បឋមសិក្សារដ្ឋ​ចំនួន ១១ កន្លែង សាលាបង្រៀនឯកជនចំនួន ០៦ កន្លែង និង​ថ្នាក់​ឧត្តមសិក្សា (សាកលវិទ្យាល័យ​បៀលប្រាយ និង​វិទ្យាស្ថាន​ពហុបច្ចេកវិទ្យា​អាស៊ី)។

ហេដ្ឋារនាសម្ព័ន្ធ​ផ្លូវថ្នល់

-ផ្លូវបេតុង​ក្នុងក្រុង​មាន​ចំនួន ៩៥ ខ្សែ ប្រវែងសរុប ២២ គ.ម និង​ផ្លូវកៅស៊ូចំនួន ៦០ ខ្សែ ប្រវែង​សរុប ៤៣ គ.ម

សេវាស្នាក់នៅ

នៅទីក្រុងបានលុងមានសណ្ឋាគារចំនួន ១៦ កន្លែង និងផ្ទះសំណាក់ចំនួន ៣២។ ភោជនីយដ្ឋានមានចំនួន ៤៧ កន្លែង ដែលអាចបំរើសេវាកម្មម្ហូបអាហារតាមបម្រូវការរបស់ភ្ញៀវទេសចរជាតិ និងអន្តរជាតិ។

តំបន់​គោល​ដៅ​ទេសចរណ៍​សំខាន់ៗ​ក្នុង​ក្រុង​មាន​៖

-បឹងយក្សឡោម​
-បឹងកន្សែង
-ទឹកជ្រោះកាចាញ
-ភ្នំ​ឥសីបតមៈឬ​ភ្នំ​ស្វាយ

The post ​ស្វែង​យល់​ពី​ភូមិសាស្រ្ត​ក្រុងបានលុង​ មាន​ចម្ងាយ​ជិត​ ៦០០ គីឡូម៉ែត្រពីរាជធានី​ភ្នំពេញ appeared first on Kampuchea Thmey Daily.

លោក ញ៉ែម សំអឿន អភិបាលខេត្តរតនគិរី បានថ្លែងប្រាប់កម្ពុជាថ្មីថា​ បណ្ណាល័យនេះនៅមិនទាន់កំណត់ថ្ងៃសម្ពោធជាក់លាក់ទេ ព្រោះកំពុងស្ថិតក្នុងដំណាក់កាលសាងសង់ ប៉ុន្តែអាជ្ញាធរមានការប្តេជ្ញាចិត្តបញ្ចប់ការងារឱ្យបានត្រឹម​ដំណាច់ឆ្នាំ២០២៦។ លោកបញ្ជាក់ថា ថវិកាសាងសង់ភាគច្រើនបានមកពីធនធានផ្ទាល់ខ្លួន និងការចូលរួមបរិច្ចាគពីសប្បុរសជន ខណៈដែលនៅមានបញ្ហាប្រឈមខ្លះៗផ្នែកហិរញ្ញវត្ថុក្នុងអំឡុងពេលសាងសង់។

លោកបញ្ជាក់ថា៖«បណ្ណាល័យថ្មីនេះ ត្រូវបានបង្កើតឡើងក្នុងគោលបំណងបណ្តុះទម្លាប់អាននៅតាមទីសាធារណៈ និងផ្តល់ឱកាសសិក្សាស្រាវជ្រាវដល់យុវជន កុមារ និងមនុស្សពេញវ័យ ដោយមិនមានការរើសអើង»។ បណ្ណាល័យនេះ មានការរៀបចំ​នៅផ្នែកខាងក្នុង រួមមានផ្នែកសម្រាប់កុមារ និងមនុស្សពេញវ័យ ដែលផ្តោតលើវិស័យចំណេះដឹងជាច្រើន ដូចជា វប្បធម៌ អប់រំ បច្ចេកវិទ្យា កម្សាន្ត និងបរិស្ថាន ព្រមទាំងបើកចំហសម្រាប់សៀវភៅសាសនាផ្សេងៗដែលមានបំណងបរិច្ចាគមកបណ្ណាល័យ។

លោកអភិបាលខេត្តបន្ថែមថា បន្ទាប់ពីសាងសង់រួចរាល់ បណ្ណាល័យដ៏ធំនេះ នឹងត្រូវការការគាំទ្របន្ថែមពីសហគមន៍ និងសប្បុរសជន ដូចជាការបរិច្ចាគសៀវភៅ និងឧបត្ថម្ភសម្ភារៈបណ្ណាល័យ ដើម្បីបំពេញឱ្យបានគ្រប់គ្រាន់សម្រាប់ការប្រើប្រាស់។ ការចូលរួមរបស់សប្បុរសជនទាំងថវិកា និងសម្ភារៈ នឹងត្រូវកត់ត្រាទុក ដើម្បីលើកទឹកចិត្ត និងថ្លែងអំណរគុណចំពោះអ្នកគាំទ្រគម្រោងនេះ។

ក្រោមគំនិតផ្តួចផ្តើមសាងសង់បណ្ណាល័យនេះ អភិបាលខេត្តបានបញ្ជាក់ថា ថវិកាសាងសង់ភាគច្រើនមកពីហោប៉ៅផ្ទាល់ខ្លួនរបស់លោក ខណៈលោក គិត ម៉េង បានចូលរួមឧបត្ថម្ភថវិកា ៥,០០០ ដុល្លារ ហើយក៏មានសប្បុរសជនផ្សេងៗទៀតបានបរិច្ចាគទាំងថវិកាតិចក្តី ច្រើនក្តី (ខ្លះប្រហែល ១,០០០ ដុល្លារ) និងសៀវភៅ ដើម្បីគាំទ្រគម្រោងនេះផងដែរ។ ទោះជាយ៉ាងណា ក្នុងអំឡុងពេលសាងសង់ គម្រោងនៅតែប្រឈមបញ្ហាហិរញ្ញវត្ថុខ្លះៗ។

អគារបណ្ណាល័យត្រូវបានរចនាសាងសង់ជាពីរជាន់ មានទទឹងប្រហែល ១៦ ម៉ែត្រ និងបណ្តោយប្រមាណ៦ ម៉ែត្រ សមស្របទៅនឹងទំហំដី និងថវិកាដែលមាន។ បច្ចុប្បន្ន ក៏កំពុងមានការកៀរគរធនធាន និងការចូលរួមពីសហគមន៍បន្តទៀត ដើម្បីធានាឱ្យគម្រោងអាចបញ្ចប់បានដោយជោគជ័យ៕

ដោយ៖ ខៀវ ចាប

The post គម្រោងសាងសង់បណ្ណាល័យនៅចំកណ្តាលក្រុងបានលុង កំពុងជួបបញ្ហាផ្នែកហិរញ្ញវត្ថុ អំពាវនាវសប្បុរសជនចូលរួម appeared first on Kampuchea Thmey Daily.

លោក​អភិបាល​ខេត្ត​បាន​លើក​ឡើង​វិស័យ​សំខាន់ៗ​ចំនួន ៣ ដែល​ខេត្ត​ជំរុញ​ឲ្យ​មាន​ការ​វិនិយោគ​ក្នុង​នោះ​មាន​វិស័យ​កសិកម្ម ទេសចរណ៍ និង​ធនធាន​រ៉ែ​ធម្មជាតិ។

លោក​អភិបាល​ខេត្ត​បាន​លើក​​ពី​ដំណាំ​​សក្តានុពលក្នុង​ខេត្ត​​មាន​ដូចជា ស្វាយចន្ទី​ដែល​មាន​ផ្ទៃដី​ដាំ​ដុះ​ប្រមាណ ១០ ម៉ឺន​ហិចតា ​កៅស៊ូ​មាន​ប្រមាណ ៧ ទៅ ៨ ម៉ឺន​ហិចតា រួម​ទាំង​ដំណាំ​ផ្សេង​ទៀត​មាន​ចេក​អំបូង​លឿង ទុរេន ម្រេច ដំឡូងមី សណ្ដែក កាកាវ និង​កាហ្វេ។

ពាក់ព័ន្ធ​ដំណាំ​ស្វាយចន្ទី លោកអភិបាល​ខេត្ត​បានអះអាង​ថា ​តាម​លោក​ដឹង​ខេត្ត​រតនគីរី​ជាប់លេខ​២ ឬ​លេខ ៣ បន្ទាប់​ពី​ខេត្ត​ក្រចេះ និង​កំពង់ធំ ដែលមានផ្ទៃដីដាំដុះ​ដំណាំស្វាយចន្ទីច្រើនជាងគេ។

បើទោះបី​ជា​ខេត្ត​មាន​សក្តានុពលលើដំណាំ​កសិឧស្សាហកម្ម​ ប៉ុន្តែ​​ខេត្ត​ខ្វះខាត​រោងចក្រកែច្នៃដែលអាជ្ញាធរ​បាន​កំពុង​​ជំរុញ​ឲ្យ​មាន​​ការ​វិនិយោគបន្ថែម​​ ដើម្បី​ចៀស​វាង​ការ​នាំ​ចេញ​តែវត្ថុធាតុដើម​ទៅក្រៅប្រទេសដោយផ្ទាល់។

ក្នុង​ការផ្តល់​បទសម្ភាសន៍ដល់អ្នកសារព័ត៌មានក្នុងដំណើរទស្សនកិច្ចក្នុងខេត្តរតនគិរិ លោក ញ៉ែម សំអឿន ក៏​បានលើកឡើងពី​ការ​វិនិយោគកសិដ្ឋាន​ចិញ្ចឹម​គោ​រាប់​ម៉ឺន​ក្បាល​ពីសំណាក់​​​ក្រុមហ៊ុនវិនិយោគ​ក្នុង​ខេត្ត​​ធំៗ​​ និង​​មាន​គោល​ដៅ​ពង្រីក​ការ​ចិញ្ចឹម​ដល់ ១០ ម៉ឺនក្បាល ជាមួយ​គោល​នយោបាយ​ចែក​កូន​គោព្រមទាំង​បច្ចេកទេស​ដល់​ប្រជាពលរដ្ឋ​ជុំវិញ​ដើម្បី​ចិញ្ចឹម រួច​ក្រុមហ៊ុន​ប្រមូល​ទិញ​យក​មក​វិញ​។

បន្ថែមពីនេះ​លោកអភិបាលខេត្ត​បានបញ្ជាក់​ថា ខេត្ត​រតនគិរី​បច្ចុប្បន្ន​មាន​ក្រុមហ៊ុន​វិនិយោគ​ដី​សម្បទាន​សេដ្ឋកិច្ច​ចំនួន ២៧ ក្រុមហ៊ុន ក្នុង​នោះ​ក្នុង​ស្រុក​ចំនួន ១០ ក្រុមហ៊ុន​ចិន​ចំនួន ៣ ក្រុមហ៊ុន​វៀតណាម​ចំនួន ១៣ និង​ក្រុមហ៊ុន​មកពី​សិង្ហបុរី​ចំនួន ១ ដែល​ផ្ដោត​លើ​វិស័យ​កសិកម្ម។

ពាក់ព័ន្ធ​វិស័យ​ទេសចរណ៍ ខេត្ត​មាន​ផ្ទៃដី​គ្រប​ដណ្តប់​ដោយ​ព្រៃឈើ​ប្រមាណ ៨០ ម៉ឺន​ហិចតា និង​មាន​ឧទ្យានជាតិ ដែន​ជម្រក​​សត្វព្រៃ​ដែល​មាន​សត្វ​កម្រ​ដូចជា ស្វាកន្ទុយ​លឿង និង​ទោច​ថ្ពាល់​លឿង។ ខេត្ត​មាន​បឹង​ធម្មជាតិ​ធំៗ​ជាច្រើន​ដូច​ជា​​បឹង​យក្សឡោម បឹង​លំកុដ បឹង​កន្សែង និង​ទឹកជ្រោះ​នៅ​ជាប់ៗ​គ្នា​ជា​ច្រើន​កន្លែង​មាន​ទឹកជ្រោះ​កាចាញ ចាអុង កាទៀង អូរស៊ីនលែរ​ជាដើម។

ខណៈ​ដែល​ខេត្តភាគ​ឦសាន​នេះ​មាន​មាន​ការ​វិនិយោគ​ដំណាំ​កសិកម្ម​ជាមួយ​ចម្ការ​ធំៗ ​កំពុង​ក្លាយ​ជា​ទីតាំង​ទាក់​ទាញ​ទេសចរណ៍​កសិកម្ម ដែលផ្តល់អារម្មណ៍ដូចនៅបរទេសផងដែរ។ លោក​អភិបាលខេត្ត​បន្ថែម។

ផ្សារ​ភ្ជាប់​សក្ដានុពល​របស់​ខេត្ត​ លោក​អភិបាល​ខេត្ត​លើក​ទឹកចិត្ត​ដល់​អ្នក​វិនិយោគ​ទាំង​ក្នុងនិង​ក្រៅ​ប្រទេស ឱ្យ​មក​វិនិយោគ​បន្ថែមជាពិសេស​លើ​វិស័យ​កសិឧស្សាហកម្ម តាមរយៈ​ការ​បង្កើត​រោង​ចក្រ​កែ​ច្នៃ​និង​វេច​ខ្ចប់ រួម​ទាំង​ការ​វិនិយោគ​លើ​វិស័យ​ទេសចរណ៍​ធម្មជាតិ-វប្បធម៌ ដើម្បី​ទាញ​យក​ប្រយោជន៍​ពី​សក្ដានុពល​ដ៏​ធំធេង និង​រួមចំណែក​អភិវឌ្ឍ​សេដ្ឋកិច្ច​ខេត្ត​ភូមិភាគ​ឦសាន​មួយ​នេះ។

ពលរដ្ឋ​ជិត ៦០% ក្នុង​ខេត្ត​រតនគិរី គឺជា​ជនជាតិ​ដើម​ភាគតិច​មាន​ដូចជា ទំពួន ចារាយ គ្រឹង កាចក់ កាវែត គុយ និង​ពូណង។ តាមរយៈ​​វប្បធម៌ របាំ សំលៀកបំពាក់​ប្រពៃណី រួម​ទាំង​ស្រា​ពាង​ជា​អត្តសញ្ញាណ​ដែល​ត្រូវ​បាន​ចុះ​បញ្ជី​ជា​ផលិតផល​ភូមិ ១ ផលិតផល ១ របស់​ខេត្ត​ភាគ​ឦសាន​មួយ​នេះ៕

The post ខេត្ត​រតនគិរី​ជាប់​លេខ ៣ មាន​ផ្ទៃដី​ដាំដុះ​ស្វាយ​ចន្ទី​ច្រើន​ជាង​គេ ​បន្ទាប់​ពី​ខេត្ត​កំពង់ធំ និង​ក្រចេះ appeared first on Kampuchea Thmey Daily.

ផ្តល់​បទ​សម្ភាសន៍​ដល់​ក្រុមអ្នកសារព័ត៌មាន​ដឹកនាំ​ដោយ​ក្លិប​អ្នក​កាសែត​កម្ពុជា​ ក្នុងដំណើរ​ទស្សនកិច្ច​និង​ផ្សព្វផ្សាយ​ពី​សក្តានុពល​ខេត្ត​រតនគរី លោក ញ៉ែម សំអឿន អភិបាល​ខេត្ត​រតនគិរី​បាន​បង្ហើប​ពី​គម្រោង​បើក​ច្រក​ព្រំដែន​ជាមួយ​ប្រទេស​ឡាវ និង​វៀតណាម។

លោក​ ញ៉ែម សំអឿន បាន​បញ្ជាក់ថា ការ​បើក​ច្រក​ព្រំដែន​ជាមួយ​ប្រទេស​ឡាវ គ្រោង​បើក​នៅ​ទីតាំង​បង្គោល​ព្រំដែន​លេខ ១០១-១០២ និង​បង្គោល​លេខ ១៤១។

ច្រក​ព្រំដែន​លេខ ១០១-១០២ តភ្ជាប់រវាង​ស្រុកវើនសៃនៃខេត្តរតនគិរី និង​ស្រុក​ភូវង្សនៃ​ប្រទេស​ឡាវ ដែលមានចម្ងាយប្រមាណ ៣០ ទៅ ៣៥ គីឡូម៉ែត្រពីស្រុកវើនសៃ និងប្រហែលត្រឹម ៥ ទៅ ១០ គីឡូម៉ែត្រប៉ុណ្ណោះពីស្រុកភូវង្សរបស់​ឡាវ។

លោក​អភិបាល​ខេត្តបន្តថា ច្រកនេះ​ក្រៅពីការផ្លាស់ប្តូរទំនិញដែលភាគីម្ខាងៗខ្វះខាត ក៏​​អនុញ្ញាត​ឲ្យ​ប្រជាពលរដ្ឋនិង​ពាណិជ្ជករ​ខ្មែរ​អាច​ធ្វើដំណើរទៅខេត្តអត្តពើ រួចអាចបន្តដំណើរទៅប្រទេសចិនឬ​ប្រទេស​ផ្សេងៗ​ទៀត​បាន។

«យើងក៏ចង់បានច្រកបើកជាមួយនឹងខាងឡាវ ហើយ​ខាងឡាវក៏គេចង់បើក​ដូចគ្នាដែរ​។ លទ្ធភាព​ដែល​បើក​នេះ យើង​សង្កេតឃើញថាមានពីរច្រកហ្នឹងឯង​។ ទីមួយ​នៅ​បង្គោលព្រំដែនលេខ ១០១ និង ១០២ និង​មួយ​ទៀត​​នៅ​បង្គោលព្រំដែន​លេខ ១៤១ គឺ​លទ្ធភាព​អាច​បើក​ទាំងពីរ។ ដូច​ខ្ញុំ​ជម្រាប​អីចឹង​គឺ​វា​ទាក់ទាញ​ការ​វិនិយោគ​ និង​ទេសចរណ៍​ក៏ដូចជា​ពាណិជ្ជកម្មទៅមក»។

បើ​តាម​លោក​អភិបាល​ខេត្ត រាជរដ្ឋាភិបាល​បាន​អនុញ្ញាត​រួចហើយ ដោយ​បច្ចុប្បន្ន​ភាគី​កម្ពុជា​កំពុង​រៀបចំ​វាស់វែង​ទំហំដី និង​រៀបចំ​ទីតាំង។

ដោយឡែក​ជាមួយ​ប្រទេស​វៀតណាម អាជ្ញាធរ​ខេត្តក៏​មានផែនការ​បើក​​​ច្រកព្រំដែន​​បន្ថែមចំនួនពីរ​ទៀត​ដែលច្រក​​ទី​ ១ មានទីតាំង​​​នៅ​ឃុំញ៉ាង ដែល​រាជរដ្ឋាភិបាល​ទើប​តែ​បាន​អនុញ្ញាត​ជា​ផ្លូវការ ដោយ​បច្ចុប្បន្ន​កំពុង​រង់ចាំ​ការរៀបចំ​បច្ចេកទេស ការ​រៀប​ចំដី ការ​សាង​សង់ និង​កញ្ចប់​ថវិកា​ប៉ុណ្ណោះ និង​ច្រកទី ២ ស្ថិតនៅក្បែរ​បង្គោលព្រំដែន​​លេខ ៦ ដែល​ច្រកនេះ​ស្ថិតនៅកៀកនឹង​តំបន់​មុំ​បី​កន្ទុយនាគ។

លោក ញ៉ែម សំអឿន បាន​បញ្ជាក់ថា ច្រកនៅក្បែរ​បង្គោល​លេខ ៦ ជាច្រក​របៀង​សេដ្ឋកិច្ច​ឡាវ-កម្ពុជា-វៀតណាម ដែល​​ទីតាំងតំបន់នេះ​មាន​ចម្ងាយ​ត្រឹ​មតែ ១៦ គីឡូម៉ែត្រ​ប៉ុណ្ណោះ​ពីច្រកបង្គោល​លេខ ១៤១ របស់​ឡាវ ដែលអាច​ឲ្យ​ប្រទេស​​ឡាវ​ប្រើប្រាស់​ជា​ច្រក​ឆ្លង​កាត់​មក​កម្ពុជា ដើម្បីធ្វើដំណើរ​និងដឹកទំនិញបន្តទៅវៀតណាម។

បើតាមលោកអភិបាលខេត្ត ការបើក​ច្រក​នេះ​មាន​សារៈសំខាន់​ខ្លាំង​ណាស់​សម្រា​ប់អ្នកវិនិយោគធំៗ ដោយ​កន្លង​ទៅ​ក៏​មាន​អ្នក​វិនិយោគ​ក្នុង​ស្រុក​ជំរុញ​ឲ្យបើកច្រកនេះ​ ដោយសារ​ការ​ដឹក​ជញ្ជូន​ទំនិញ​និង​កសិផល​​ចូល​មក​ផ្ទៃក្នុង​ប្រទេស​កម្ពុជា​មាន​ការ​លំបាក ទើប​តម្រូវឲ្យ​មាន​ការ​បើក​ច្រក​ ដើម្បី​នាំ​ចេញ​កសិផល​​ទៅ​លក់​នៅ​ក្រៅ​ប្រទេស​តាមរយៈ​ប្រទេស​វៀតណាម៕

The post ខេត្ត​រតនគិរី​ជំរុញ​បើក​ច្រក​ព្រំដែន​ចំនួន ៤ ទៀតជាមួយ​​ឡាវ និង​វៀតណាម ដើម្បី​ដោះដូរ​ពាណិជ្ជកម្ម​​ឆ្លងប្រទេស appeared first on Kampuchea Thmey Daily.

លោក ញ៉ែម សំអឿន អភិបាល​ខេត្ត​រតនគិរី​បាន​ឲ្យ​ដឹង​ថា ខេត្ត​រតនគិរី​មាន​ការ​អភិវឌ្ឍ​ជាពិសេស​លើ​​ហេដ្ឋារចនាសម្ព័ន្ធថាមពល​អគ្គិសនី។

លោក​លើកឡើង​ពី​គម្រោង​អភិវឌ្ឍ​ប្រភព​ថាមពល​អគ្គិសនី​ថ្មី​បន្ថែម​​ ដែលមាន​អនុភាព​ប្រមាណ ១ ០០០ មេហ្គាវ៉ាត់​ នៅ​ស្រុក​លំផាត់​បាន​បញ្ចប់​ការ​សិក្សា​រួចរាល់ ក្រោម​ការ​វិនិយោគ​ដោយ​ក្រុមហ៊ុន Royal Group។

លោកថា គម្រោង​នេះ​រួម​បញ្ចូល​គ្នារវាង​​វារីអគ្គិសនី​ដែល​អាច​ផលិត​បាន ៣៥០ មេហ្គាវ៉ាត់ និង​ប្រភព​ថាមពល​សូឡា​ជាង ៤០០ មេហ្គាវ៉ាត់​ទៀត ដែលបូក​បញ្ចូល​គ្នា​ទៅ​មាន​ទំហំ​ជាង ៩០០ មេហ្គាវ៉ាត់។

«តាមការ​សិក្សា​មាន​ផល​ប៉ះពាល់​ដល់​ប្រជាពលរដ្ឋ​ចំនួន ២ ភូមិ។ ប៉ុន្តែ​ក្រុមហ៊ុនមាន​ទីតាំង​ថ្មី​សម្រាប់​ប្តូរ​ជូន​ប្រជាពលរដ្ឋ ដោយ​ក្រុមហ៊ុន​នឹង​ជួយ​ទូទាត់​សំណង​លើ​ផ្ទះ​សម្បែង ដីចម្ការ ដីស្រែ និង​ដំណាំ​ផ្សេងៗ ហើយ​ថែម​ទាំង​ជួយ​សម្រួល​ដល់​ការប្រើប្រាស់​អគ្គិសនី​ក្នុង​តម្លៃ​អនុគ្រោះ​ទៀត​ផង»។ លោក ញ៉ែម សំអឿន បញ្ជាក់​។

បន្ថែមពីនេះ លោក​អភិបាល​ខេត្ត​ក៏​​បង្ហើប​​ពី​ប្រភព​ថាមពល​អគ្គិសនី​ផ្សេង​ទៀត​​ ដែលកំពុង​សិក្សា​នៅ​ព្រែក​ល្អាង ១ និង​ព្រែក​ល្អាង ​២ នៅ​ខាងជើង​ស្រុក​អណ្ដូង​មាស​ដែល​មាន​ទំហំ ១១០ មេហ្គាវ៉ាត់ ​សរុប​ទាំង​អស់​ក្នុង​ខេត្ត​​គ្រោង​ផលិត​ប្រមាណ​ជាង ១ ០០០ មេហ្គាវ៉ាត់ ដែលអនាគត​នឹង​​ធ្វើ​ឱ្យ​ខេត្ត​ភាគ​ឦសាននេះ​ក្លាយ​ជា​ធុង​អាគុយ​ប្រភព​ផលិតថាមពល​​​​អគ្គិសនី​ ដែល​​​​អាច​ផ្គត់ផ្គង់​តម្រូវការ​ប្រើប្រាស់​ទូទាំង​ប្រទេស។

ខេត្ត​រតនគិរី​ស្ថិត​នៅ​ភូមិ​ភាគ​ឦសាន មាន​ប្រជាពលរដ្ឋ​រស់នៅ​សរុប​ប្រមាណ ២៤ ម៉ឺននាក់។ រចនាសម្ព័ន្ធ​រដ្ឋបាល​ខេត្ត​មាន​ក្រុង​ចំនួន១ គឺ​ក្រុង​បានលុង ស្រុក​ចំនួន ៨ សង្កាត់​ចំនួន ៤ និង​ឃុំ​ចំនួន​៤៦ និង​មាន​ភូមិ​ចំនួន ២៤៣។ ស្ថានភាព​នៃ​ការប្រើប្រាស់​អគ្គិសនី​បច្ចុប្បន្ន​នៅ​ក្នុង​ខេត្ត ​នៅ​ក្នុង​ចំណោម​ភូមិ​សរុប​ទាំង ២៤៣ ភូមិ មាន ២៣៤ ភូមិ (ស្មើនឹង ៩៦.៥៦%) មាន​អគ្គិសនី​ប្រើប្រាស់។

លោក​ ញ៉ែម សំអឿន រំពឹង​ថា ភូមិ​ដែល​សេសសល់​ចំនួន ៩ ភូមិ​ទៀត នឹង​មាន​អគ្គិសនី​ប្រើប្រាស់​ទាំងអស់​នៅ​ពេល​គម្រោង​​វារីអគ្គិសនី​សាងសង់​រួចរាល់៕

បន្តចុចអាន៖ ស្វែងយល់ពីសក្តានុពល និងផែនការអភិវឌ្ឍក្នុង​ខេត្ត​រតនគិរី

The post ប្រភពថាមពលអគ្គិសនីអនុភាពប្រមាណ ១ ០០០ មេហ្កាវ៉ាត់ ស្ថិតនៅក្នុង​ផែនការ​​ជំរុញ​សាងសង់ក្នុងខេត្តរតនគិរី appeared first on Kampuchea Thmey Daily.

លោក ញ៉ែម សំអឿន អភិបាល​នៃ​គណៈ​អភិបាល​ខេត្ត​រតនគិរី​បាន​ឲ្យ​ដឹង​ថា ​លក្ខណៈ​ពិសេស​បឹង​កន្សែង​គឺ​មាន “កោះអណ្ដែត” ដែល​អាច​អណ្ដែត​ផ្លាស់ទី​តាម​កម្លាំង​ខ្យល់បក់។

នៅ​តំបន់ជុំវិញ​បឹងមាន​ជីវៈចម្រុះ រួមមាន​ផ្នែកទឹក ផ្នែកកោះ ព្រៃឈើចម្រុះ និងវាលស្មៅ។

លោក ញ៉ែម សំអឿន អភិបាល​ខេត្ត​រតនគិរី

ពាក់ព័ន្ធ​ការ​​រៀបចំ​កែ​លម្អ​ហេដ្ឋារចនាសម្ព័ន្ធ​ជុំវិញ​បឹង​ដែល​ជា​បេះដូង​របស់​ខេត្ត​ភូមិ​ភាគ​ឦសាន​នេះលោក ញ៉ែម សំអឿន ​បាន​ឲ្យ​ដឹង​ថា អាជ្ញាធរ​ខេត្ត​បាន​ស្ដារ​បឹង​ឱ្យ​មាន​ទឹកថ្លា​ស្អាត និង​រៀបចំ​បរិស្ថាន​ជុំវិញ​ឱ្យ​មាន​អនាម័យ ដើម្បី​ប្រែ​ក្លាយ​ពី​កន្លែង​ដែល​ធ្លាប់តែ​មាន​សំរាម និង​សកម្មភាព​មិនល្អ​ឱ្យ​ទៅជា​រមណីយដ្ឋាន​ទេសចរណ៍​។

ដើម្បីធានាសន្តិសុខសម្រាប់ប្រជាពលរដ្ឋ អាជ្ញាធរ​ខេត្ត​ក៏​បាន​រៀបចំបណ្ដាញអគ្គិសនី​ឱ្យភ្លឺច្បាស់​នៅ​ពេល​យប់ បន្ថែម​ការ​កែ​លម្អ​សោភ័ណភាព និង​សាងសង់​រូបសំណាក់សត្វ​ជាច្រើន​ឲ្យ​​មាន​ជា​លក្ខណៈជា​គូ ឬ គ្រួសារ ដើម្បីបង្ហាញពីសុភមង្គលក្រោមម្លប់សន្តិភាព។ សត្វទាំង​នោះ​រួម​មាន៖ គ្រួសារ​ក្ដាន់, ដំរី, គោព្រៃ, ខ្ទីង និង​ ខ្លាឃ្មុំ ជាដើម។

ដោយឡែក​រូបសំណាក​អកបឹងកន្សែង ក៏​ត្រូវបានកសាងឡើង​​ជាលក្ខណៈប្ដីប្រពន្ធរំលឹក​ដល់​បទ​ចម្រៀង​អធិរាជ​សំឡេង​​មាស ស៊ីន ស៊ីសាមុត ដើម្បីបង្ហាញពីភាពជួបជុំ។

បន្ថែម​ពី​នេះ​ ក៏​មាន​សាងសង់​ទីតាំងជណ្ដើរជ័យ និង​គម្រោង​សាងសង់ “ស្ពាន​និស្ស័យ​ស្នេហ៍” សម្រាប់​ទាក់ទាញ​ភ្ញៀវ​ទេសចរ​មក​កម្សាន្ត។

ដើម្បី​លើកកម្ពស់វិស័យ​អប់រំនិងការអាន​ អាជ្ញាធរ​កំពុង​សាងសង់បណ្ណាល័យចំនួន ២ ជាន់ នៅ​ក្បែរ​បឹង ដើម្បីឱ្យមាតាបិតា​ឬ​អាណាព្យាបាល​អាច​នាំកូនចៅ​មក​អាន​សៀវភៅ​នៅ​ពេល​សម្រាក​កម្សាន្ត​រួម​ទាំង​ការ​សាងសង់​រូប​សំណាក​ក្មេងអាន​សៀវភៅ ដើម្បី​បំផុស​ស្មារតីនិង​ផ្សព្វផ្សាយ​ពី​សារៈសំខាន់​នៃ​ការ​អាន​សៀវភៅ៕

The post ​បឹង​កន្សែងរៀបចំ​កាន់តែស្អាត ​ទាំំង​ថ្ងៃ​និង​យប់ ទេសចរ​មក​កម្សាន្ត​ឥតដាច់ appeared first on Kampuchea Thmey Daily.