សហគមន៍កសិកម្មទំនើប Archives - Kampuchea Thmey Daily

សហគមន៍កសិកម្មខេត្តបាត់ដំបង ចុះកិច្ចព្រមព្រៀងផ្គត់ផ្គង់ស្រូវឱ្យក្រុមហ៊ុនអេមរុរាយស៍មានទំហំជិត ១០ លានដុល្លារ

deth leng — Fri, 12 Jun 2026 07:18:12 +0000

កិច្ចសន្យាផ្គត់ផ្គង់ស្រូវទំហំជិត ១០ លានដុល្លារ ត្រូវបានធ្វើឡើងរវាងសហគមន៍កសិកម្មនៅខេត្តបាត់ដំបង និងក្រុមហ៊ុនអេមរុរាយស៍កម្ពុជា (Amru Rice Cambodia) កាលពីថ្ងៃទី ០៩ ខែមិថុនា ២០២៦។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា នេះគឺជាជំហានថ្មីមួយទៀត សម្រាប់សហគមន៍កសិកម្មទំនើប សហគមន៍កសិកម្ម និងសហភាពសហគមន៍កសិកម្ម ដែលបានចុះកិច្ចសន្យារួមគ្នា ដើម្បីធានាស្ថិរភាពទីផ្សារជូនដល់កសិករជាសមាជិក ជាពិសេសក្នុងបរិបទដែលមានភាពមិនច្បាស់លាស់ និងកម្រិតហានិភ័យខ្ពស់នៃការប្រែប្រួលទីផ្សារថ្លៃស្រូវ។

លោកឧកញ៉ា សុង សារ៉ន ប្រធានក្រុមហ៊ុន Amru Rice មានប្រសាសន៍ថា៖ «យើងបានចុះហត្ថលេខាទៅលើការដាំដុះស្រូវ ជាមួយនឹងសហគមន៍កសិកម្មទំនើបចំនួន ២ ហើយនឹងសហភាពសហគមន៍កសិកម្ម ខេត្តបាត់ដំបង ក៏ដូចជាការចុះហត្ថលេខាផលិតស្រូវចំណីប្រមាណ ៣ ម៉ឺនតោន ដែលមានទឹកប្រាក់ប្រមាណ ១០ លានដុល្លារ»។

លោកឧកញ៉ា សុង សារ៉ន បន្ថែមថា កិច្ចព្រមព្រៀងទាំងអស់នេះ គឺធ្វើឡើងតែប្រភេទស្រូវ ៣ ប្រភេទ ដែលភាគច្រើន ស្រូវសែនក្រអូប និងស្រងែក្រអូប និងផ្ការំដួល។

កិច្ចសន្យាផលិត និងផ្គត់ផ្គង់ស្រូវពូជ និងស្រូវចំណីស្តង់ដាសុវត្ថិភាព (SRP) ចំនួន៦កិច្ចសន្យានេះ រួមមាន ៤កិច្ចសន្យាសម្រាប់ស្រូវចំណី និង២កិច្ចសន្យាទៀតសម្រាប់ស្រូវពូជ ដែលជាកិច្ចសន្យាសម្រាប់រយៈពេលពេញមួយឆ្នាំ ឬពីរដូវកាលដាំដុះ៕

The post សហគមន៍កសិកម្មខេត្តបាត់ដំបង ចុះកិច្ចព្រមព្រៀងផ្គត់ផ្គង់ស្រូវឱ្យក្រុមហ៊ុនអេមរុរាយស៍មានទំហំជិត ១០ លានដុល្លារ appeared first on Kampuchea Thmey Daily.

សហគមន៍កសិកម្មទំនើបមានដើមទុនប្រមាណ ៥០ ម៉ឺនដុល្លារ នៅខេត្តកំពង់ឆ្នាំងបានបង្កើតឡើងជាផ្លូវការ

Din Thary — Thu, 05 Feb 2026 07:22:39 +0000

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានគូសបញ្ជាក់ថា ទីបំផុត សហគមន៍កសិកម្មទំនើបនៅក្នុងតំបន់សម្បទានដីសង្គមកិច្ច LASED III នៅឃុំប្រស្នឹប ស្រុករលាប្អៀរ ខេត្តកំពង់ឆ្នាំង ដែលមានកញ្ចប់ទុនប្រមាណ ៥០ ម៉ឺនដុល្លារ ត្រូវបានបង្កើតឡើងជាផ្លូវការ។

បើតាមលោក ឃឹម ហ្វីណង់ សហគមន៍ដែលទើបត្រូវបានបង្កើតឡើងជាផ្លូវការ នៅខេត្តកំពង់ឆ្នាំងនេះ មានឈ្មោះជាផ្លូវការថា «សហគមន៍កសិកម្មទំនើបប្រស្នឹបពន្លឺថ្មី» ដោយមានសមាជិកចំនួន ៥០ គ្រួសារ ដែលជាសហគមន៍កសិកម្មទំនើបកូនពៅផ្តោតទៅលើផលិតកម្មនៃដាំដុះបន្លែសុវត្ថិភាពក្នុងផ្ទះសំណាញ់ចំនួន ១០០ ខ្នង។

ក្រសួងកសិកម្ម នឹងធ្វើការគាំទ្រទៅលើទីផ្សារ បច្ចេកទេស ដើមទុន ជាដើម ដោយក្នុងនោះទុនវិនិយោគសរុបប្រមាណ ៥០ ម៉ឺនដុល្លារ មាន ៤០% ជាជំនួយឥតសំណងទៅកាន់សហគមន៍ និង ៦០% ទៀតជាកម្ចីឥណទានការប្រាក់ទាប ពីគម្រោងពិពិធកម្មកសិកម្មកម្ពុជា។

ក្រសួងកសិកម្មសង្ឃឹមថានឹងមានវិនិយោគជាទុនកម្ចីប្រមាណ ៥០ ម៉ឺនដុល្លារ ដើម្បីជួយគាំទ្រដល់ប្រជាពលរដ្ឋនៅក្នុងតំបន់សម្បទានដីសង្គមកិច្ច ហើយការវិនិយោគនេះនឹងជួយប្រែក្លាយធ្វើឱ្យកសិករក្នុងគ្រួសារក្នុងមួយផ្ទះសំណាញ់អាចទទួលបាននូវប្រាក់ចំណេញទុក ១០០ដុល្លារ។

លោក ឃឹម ហ្វីណង់បន្ថែមថា៖ «ចំនួននេះច្បាស់ណាស់ថាមិនអាចគ្រប់គ្រាន់ក្នុងការផ្គត់ផ្គង់បាននោះទេ ប៉ុន្តែវាជាចំណុចចាប់ផ្តើមមួយដែលល្អប្រសើរ ហើយអ្វីដែលយើងរំពឹងទុកទៅពេលខាងមុខទៀតគឺនៅពេលដែលសហគមន៍ឈរជើងរឹងមាំនៅទីនេះហើយ យើងនឹងអាចបង្កើតសកម្មភាពផ្សេងៗទៀតដើម្បីទ្រទ្រង់ទៅដល់ជីវភាពរបស់ពួកគាត់»៕

The post សហគមន៍កសិកម្មទំនើបមានដើមទុនប្រមាណ ៥០ ម៉ឺនដុល្លារ នៅខេត្តកំពង់ឆ្នាំងបានបង្កើតឡើងជាផ្លូវការ appeared first on Kampuchea Thmey Daily.

គម្រោងពិពិធកម្មកសិកម្មកម្ពុជា សម្រេចលទ្ធផលជាង ៨០% នារយៈពេល ៦ ឆ្នាំ

Din Thary — Mon, 02 Feb 2026 02:50:21 +0000

រយៈពេល ៦ ឆ្នាំចុងក្រោយ នៃការចូលរួមរបស់គម្រោងពិពិធកម្មកសិកម្មកម្ពុជា (CASDP) ដែលដឹកនាំអនុវត្តដោយក្រសួងកសិកម្ម រុក្ខាប្រមាញ់ និងនេសាទ មានទុនវិនិយោគប្រមាណ ១០០លានដុល្លារ សម្រេចលទ្ធផលបាន ៨៦% នៃសូចនាករគោលដៅរបស់ខ្លួន។

លោក ឃឹម ហ្វីណង់ អ្នកពាក្យក្រសួងកសិកម្ម បានលើកឡើងថា៖ «រយៈពេល ៦ ឆ្នាំចុងក្រោយនេះ គម្រោងពិពិធកម្មកសិកម្មកម្ពុជា (CASDP) ដែលដឹកនាំអនុវត្តដោយក្រសួងកសិកម្ម និងមានទុនវិនិយោគប្រមាណ ១០០ លានដុល្លារ ក្រោមហិរញ្ញប្បទានពីធនាគារពិភពលោក សម្រេចលទ្ធផលបាន ៨៦% នៃសូចនាករគោលដៅរបស់ខ្លួន»។

ក្នុងនោះ សមិទ្ធផលសំខាន់ៗដែលសម្រេចបានរួមមាន ១.ផែនការអាជីវកម្ម៖ អនុម័តជាង ១០០ ជូនសហគមន៍កសិកម្ម ក្នុងនោះប្រហែលជាង ៦០ ផែនការអាជីវកម្ម ជួយទៅដល់សហគមន៍កសិកម្មទូទៅ និងប្រមាណជាង ៤០ ផែនការអាជីវកម្មផ្សេងទៀត ទៅដល់សហគមន៍កសិកម្មទំនើប, ២.ហេដ្ឋារចនាសម្ព័ន្ធ៖ សាងសង់ផ្លូវបាន ១៧០ គីឡូម៉ែត្រ, ៣.ប្រព័ន្ធស្រោចស្រព៖ គ្របដណ្តប់លើផ្ទៃដីជាង ៨,០០០ ហិកតា និងអ្នកទទួលផលដោយផ្ទាល់៖ កសិករជិត ២០,០០០គ្រួសារ។

លោកថា ពាក់ព័ន្ធទៅនឹងការអនុម័តគម្រោងទាំងអស់នេះ ចំពោះថវិកាសរុបជាង ១០០លានដុល្លារនោះក៏បានអនុវត្តបានច្រើន រហូតមកដល់ពេលនេះ បើជាជំនួយឥតសំណង គឺគម្រោងពិពិធកម្មកសិកម្មកម្ពុជាបានជួយជាជំនួយឥតសំណងទៅដល់សហគមន៍កសិកម្មទាំងទំនើប និងទូទៅប្រហែលជា ៨,២ លានដុល្លារ ហើយជួយជាកម្ចីឥណទានការប្រាក់ទាបចំនួនជិត ២២ លានដុល្លារ។

អ្នកនាំពាក្យរូបនេះ បានបន្តថា នៅមានគម្រោងជាច្រើនទៀតដែលកំពុងដឹកនាំ និងចូលរួមអនុវត្តដោយក្រសួងកសិកម្ម ដែលកំពុងជះឥទ្ធិពលជាវិជ្ជមាន ដល់ការលើកកម្ពស់ជីវភាពប្រជាកសិករនៅតាមមូលដ្ឋានឱ្យកាន់តែប្រសើរឡើង៕

The post គម្រោងពិពិធកម្មកសិកម្មកម្ពុជា សម្រេចលទ្ធផលជាង ៨០% នារយៈពេល ៦ ឆ្នាំ appeared first on Kampuchea Thmey Daily.

សហគមន៍កសិកម្មទំនើប ១៧ ទទួលបានការគាំទ្រទុនពីគម្រោងពិពិធកម្មកសិកម្មកម្ពុជា ជិត ៩ លានដុល្លារ

Din Thary — Thu, 29 Jan 2026 03:02:45 +0000

សហគមន៍កសិកម្មទំនើបចំនួន ១៧ ទទួលបានការគាំទ្រទុនពីគម្រោងពិពិធកម្មកសិកម្មកម្ពុជា(CASDP) សរុបជាទឹកប្រាក់ជិត ៩ លានដុល្លារអាមេរិក។ នេះបើតាមការឱ្យដឹងពីលោក ឃឹម ហ្វីណង់ អ្នកនាំពាក្យក្រសួកសិកម្ម នៅព្រឹកថ្ងៃទី២៩ ខែមករា ឆ្នាំ២០២៦។

បើតាមលោក ឃឹម ហ្វីណង់ គម្រោងទុនសរុបជិត ៩ លានដុល្លារអាមេរិក ពី CASDP ក្នុងនោះ ២,៧ លានដុល្លារជាជំនួយឥតសំណង និងប្រមាណ ៦ លានដុល្លារ ទៀតជាកម្ចីដើមទុនការប្រាក់ទាប។

លោកក៏បានឱ្យដឹងបន្តថា មាន ១១ សហគមន៍នៃសហគមន៍ទាំង ១៧ នេះ គឺជាសហគមន៍កសិកម្មទំនើប ក្នុងនោះខេត្តសៀមរាប មានរហូតដល់ទៅ ៦ សហគមន៍ ដែលជាចំនួនច្រើនជាងគេក្នុងចំណោមខេត្តទាំង ៨ ដែលទទួលបានអត្ថប្រយោជន៍ពីគម្រោងនៅក្នុងវគ្គនេះ។

សហគមន៍ទាំងនេះ គឺជាក្រុមចុងក្រោយដែលទទួលបានការអនុម័តគាំទ្រការវិនិយោគ មុននឹងគម្រោងដែលដឹកនាំដោយក្រសួងកសិកម្ម និងគាំទ្រហិរញ្ញប្បទានដោយធនាគារពិភពលោកមួយនេះត្រូវបានបិទបញ្ចប់ជាផ្លូវការនៅក្នុងអំឡុងពេល ៦ ខែទៀត។

លោក ឃឹម ហ្វីណង់ បានបន្តថា ដោយហេតុផលនេះហើយទើបក្រុមការងារសម្រេចរៀបចំពិធីចុះហត្ថលេខាលើកិច្ចព្រមព្រៀងរួមគ្នាតែម្តងនៅក្រសួងកសិកម្ម ដើម្បីចំណេញពេលវេលា និងបង្កើនល្បឿនអនុវត្តផែនការវិនិយោគនៅតាមសហគមន៍នីមួយៗឱ្យបានទាន់ពេលនិងត្រឹមត្រូវទៅតាមនីតិវិធីតម្រូវ៕

The post សហគមន៍កសិកម្មទំនើប ១៧ ទទួលបានការគាំទ្រទុនពីគម្រោងពិពិធកម្មកសិកម្មកម្ពុជា ជិត ៩ លានដុល្លារ appeared first on Kampuchea Thmey Daily.

សហគមន៍កសិកម្ម ៤ នៅបាត់ដំបង ទទួលបានជំនួយឥតសំណង ១៩ ម៉ឺនដុល្លារ

Din Thary — Wed, 28 Jan 2026 03:34:30 +0000

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានឱ្យដឹងថា សហគមន៍កសិកម្មចំនួន ៤ នៅខេត្តបាត់ដំបង ទទួលបានជំនួយឥតសំណង ១៩ ម៉ឺនដុល្លារ ពីគម្រោងពិពិធកម្មកសិកម្មកម្ពុជា(CASDP) ដើម្បីគាំទ្រដល់ផែនការវិនិយោគរបស់ខ្លួន។

នៅព្រឹកថ្ងៃទី២៨ ខែមករា ឆ្នាំ២០២៦ នេះ លោក ឃឹម ហ្វីណង់ បានលើកឡើងថា សហគមន៍កសិកម្មចំនួន ៤ ទៀតនៅក្នុងខេត្តបាត់ដំបង ទទួលបានជំនួយឥតសំណងពីគម្រោងពិពិធកម្មកសិកម្មកម្ពុជា(CASDP) សរុបជាទឹកប្រាក់ប្រមាណ ១៩ ម៉ឺនដុល្លារអាមេរិកដើម្បីគាំទ្រដល់ផែនការវិនិយោគរបស់ខ្លួន។

សហគមន៍ទាំង ៤ ដែលទើបទទួលបានជំនួយឥតសំណងនោះរួមមាន សហគមន៍កសិកម្មចម្រើនផលរាំងកេសី ទទួលបានទំហំទុន ៧៥៨០០ ដុល្លារ, សហគមន៍កសិកម្មសម្រស់កំពង់ល្ពៅ ទទួលបានទំហំទុន ៣៤៨៦៤ ដុល្លារ, សហគមន៍កសិកម្មកំពីងពួយបង្កើនផល ទទួលបាន ៥០៧៦៨ ដុល្លារ និងសហគមន៍កសិកម្មផលិតពូជស្រូវសង្ហាផល ទទួលបានទំហំទុន ២៩៤៨៨ ដុល្លារផងដែរ។

លោកបានបន្តដែរថា កិច្ចព្រមព្រៀងដ៏មានសារៈសំខាន់នេះត្រូវបានធ្វើឡើងរួមគ្នានៅមន្ទីរកសិកម្មខេត្តបាត់ដំបង រវាងគម្រោងCASDP ដែលជាគម្រោងរបស់ក្រសួងកសិកម្ម និងទទួលបានថវិកាហិរញ្ញប្បទានពីធនាគារពិភពលោក ជាមួយនឹងសហគមន៍ផលិតស្រូវពូជចំនួន ៣ និងសហគមន៍ផលិតពោតក្រហមចំនួន ១ ។

គម្រោងនឹងផ្តល់ការគាំទ្រដើមទុនចំនួន ៤០% ដើម្បីឱ្យសហគមន៍អាចមានលទ្ធភាពវិនិយោគលើគ្រឿងម៉ាស៊ីន និងឧបករណ៍សម្ភារៈកសិកម្មចាំបាច់មួយចំនួន ដើម្បីបង្កើតប្រសិទ្ធភាពផលិតកម្មនៅតាមសហគមន៍នីមួយៗ៕

The post សហគមន៍កសិកម្ម ៤ នៅបាត់ដំបង ទទួលបានជំនួយឥតសំណង ១៩ ម៉ឺនដុល្លារ appeared first on Kampuchea Thmey Daily.

សហគមន៍កសិកម្មទំនើបស្វាយចន្ទីភ្នំគូលែន គ្រោងពង្រីកខ្សែច្រវាក់ផលិតកម្មឱ្យដល់ការកែច្នៃ

deth leng — Sat, 24 Jan 2026 02:10:03 +0000

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាជាមួយសមាជិកនៃ សហគមន៍កសិកម្មទំនើបស្វាយចន្ទីភ្នំគូលែន នៅខេត្តសៀមរាប ដើម្បីពិភាក្សាអំពីផែនការការអាជីវកម្មទំហំជិត៦០ ម៉ឺនដុល្លារ និងផែនការគ្រប់គ្រប់ ការតភ្ជាប់ទីផ្សារទុកជាមុន និងគម្រោងកម្ចីឥណទានដើមទុន។

លោក ឃឹម ហ្វីណង់ ថ្លែងថា៖ «សហគមន៍ដែលមានសមាជិកជាង១០០គ្រួសារនេះគ្រោងនឹងពង្រឹកខ្សែច្រវាក់ផលិតកម្មស្វាយចន្ទីរបស់ខ្លួនឱ្យដល់ការកែច្នៃតែម្តង ដើម្បីទទួលបានតម្លៃបន្ថែមច្រើនពីដាំដុះស្វាយចន្ទីពូជប្រពៃណី ដែលច្រើនមានទិន្នផលទាបតែមិនប្រើប្រាស់សារជាតិគីមីឡើយ ហើយអាចនឹងមានភាពទាក់ទាញសម្រាប់អ្នកបរិភោគចុងក្រោយ។ ភ្ញៀវទេសចរដែលឡើងមកទស្សនាផ្ទាល់នៅលើភ្នំគូលែនគឺជាអតិថិជនគោលដៅមួយដ៏សំខាន់»។

ឃុំខ្នងភ្នំនៃភ្នំគូលែន មានអ្នកដាំស្វាយចន្ទីប្រមាណ៨០០គ្រួសារ នៅលើផ្ទៃដីជាង៣០០០ហិកតា ប៉ុន្តែភាគច្រើនមានទិន្នផលទាប ពូជប្រពៃណី ដាំខុសស្តង់ដាបច្ចេកទេស និងជាប្រភេទកសិកម្មយថាផល។

លោក ឃឹម ហ្វីណង់ ធ្លាប់លើកឡើងថា នៅទីនេះមានទាំងបញ្ហាប្រឈម និងឱកាស ជាពិសេសសក្តានុពលពាក់ព័ន្ធនឹងវិស័យទេសចរណ៍ ដែលអាចអនុញ្ញាតឱ្យបងប្អូនកសិករកែច្នៃរួចនាំចេញនៅនឹងកន្លែង។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជានាំចេញគ្រាប់ស្វាយចន្ទីឆៅ ប្រមាណ ១ លានតោន កើនឡើង ២៧% គិតជាទឹកប្រាក់ ១,៥ ពាន់លានដុល្លារ។

កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺនហិកតា (១៤៧ ៧០៣) ខេត្តក្រចេះជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្តត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

The post សហគមន៍កសិកម្មទំនើបស្វាយចន្ទីភ្នំគូលែន គ្រោងពង្រីកខ្សែច្រវាក់ផលិតកម្មឱ្យដល់ការកែច្នៃ appeared first on Kampuchea Thmey Daily.

ធនាគារស្ថាបនា ចុះ MoU ជាមួយក្រសួងកសិកម្មផ្ដល់ទុនកម្ចីការប្រាក់ទាបដល់សហគមន៍កសិកម្មទំនើប

Din Thary — Wed, 21 Jan 2026 03:12:17 +0000

ធនាគារ ស្ថាបនា (Sathapana Bank Plc.) បានក្លាយជាធនាគារដៃគូទី៥ ដែលបានចុះ MoU ជាមួយក្រសួងកសិកម្មដើម្បីផ្ដល់ទុនកម្ចីការប្រាក់ទាបជូនដល់សហគមន៍កសិកម្មទំនើប ដោយនឹងត្រៀមកញ្ចប់ថវិកាពិសេសចំនួន ៣ លានដុល្លារអាមេរិកសម្រាប់ផ្តល់ជាឥណទានជូនដល់សហគមន៍ក្នុងលក្ខខណ្ឌសមស្របមួយ។

នៅថ្ងៃទី២០ ខែមករា ឆ្នាំ២០២៦ នេះ ក្រសួងកសិកម្ម រុក្ខាប្រមាញ់ និងនេសាទ បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយធនាគារ ស្ថាបនា និងក្រុមហ៊ុន ខាបូន ខេភីថល ឯ.ក (Carbon Capital Co., Ltd)។

ក្នុងឱកាសនោះលោករដ្ឋមន្ត្រីក្រសួងកសិកម្ម ឌិត ទីណា បានមានប្រសាសន៍ស្វាគមន៍ក្នុងការបង្កើតកិច្ចសហប្រត្តិបត្តិការថ្មីជាមួយវិស័យឯកជន ដោយអនុស្សរណៈនៃការយោគយល់គ្នាទាំងពីរនេះនឹងចូលរួមចំណែកយ៉ាងសំខាន់ ក្នុងបង្កើនការអភិវឌ្ឍវិស័យកសិកម្ម លើកកម្ពស់ជីវភាពប្រជាពលរដ្ឋ និងបង្កើននិរន្តភាព។

បន្ទាប់ពីការចុះ MoU នេះ ធនាគារ ស្ថាបនា បានក្លាយជាធនាគារដៃគូទី៥ ដែលបានចុះ MoU ជាមួយក្រសួងកសិកម្មដើម្បីផ្ដល់ទុនកម្ចីការប្រាក់ទាបជូនដល់សហគមន៍កសិកម្មទំនើប ដោយធនាគារ ស្ថាបនា នឹងត្រៀមកញ្ចប់ថវិកាពិសេសចំនួន ៣ លានដុល្លារអាមេរិកសម្រាប់ផ្តល់ជាឥណទានជូនដល់សហគមន៍ក្នុងលក្ខខណ្ឌសមស្របមួយ។

ចំណែកឯក្រុមហ៊ុន ខាបូន ខេភីថល គឺជាក្រុមហ៊ុនដែលធ្វើការប្រមូលកាកសំណល់លាមកពីកសិដ្ឋានចិញ្ចឹមជ្រូកមកធ្វើផលិតកម្មជីកំប៉ុស ក្នុងបំណងកាត់បន្ថយការបំភាយឧស្ម័នកាបូន ផ្គត់ផ្គង់ជីកំប៉ុសគុណភាពខ្ពស់ បង្កើតប្រភពចំណូលបន្ថែមជូនកសិករចិញ្ចឹមជ្រូក ព្រមទាំងធ្វើអាជីវកម្មឥណទានកាបូនផងដែរ។

លោករដ្ឋមន្ត្រី សង្ឃឹមថា តាមរយៈMoUនេះ ក្រុមហ៊ុន ខានបូន ខេភីថល នឹងធ្វើវិភាគទានប្រាក់ចំណូលមួយផ្នែកសម្រាប់គាំទ្រដល់មូលនិធិអភិវឌ្ឍន៍សហគមន៍កសិកម្ម។

ជាមួយគ្នានេះ លោករដ្ឋមន្ត្រី ឌិត ទីណា ក៏បានអរគុណធនាគារ ស្ថាបនា ចំពោះការបង្ហាញទំនុកចិត្តផ្ដល់ទុនកម្ចីដើម្បីគាំទ្រសហគមន៍កសិកម្មទំនើប ព្រមទាំងក្រុមហ៊ុន ខាបូន ខេភីថល ចំពោះការវិនិយោគប្រកបដោយទំនួលខុសត្រូវខ្ពស់ ដែលចែករំលែកចំណូលដើម្បីគាំទ្រផលប្រយោជន៍រួមរបស់សង្គម ជាពិសេសការគាំទ្រមូលនិធិអភិវឌ្ឍន៍សហគមន៍កសិកម្ម។ បន្ថែមពីនេះ លោកក៏លើកទឹកចិត្តឱ្យស្ថាប័នវិស័យឯកជនដទៃទៀតចូលរួមលើកស្ទួយវិស័យកសិកម្មតាមគំរូរបស់ដៃគូទាំងពីរនេះ៕

The post ធនាគារស្ថាបនា ចុះ MoU ជាមួយក្រសួងកសិកម្មផ្ដល់ទុនកម្ចីការប្រាក់ទាបដល់សហគមន៍កសិកម្មទំនើប appeared first on Kampuchea Thmey Daily.

សហគមន៍កសិកម្មទំនើបបន្លែសុវត្ថិភាព កោះខ្សាច់ទន្លា ទទួលបានទុន និងជំនួយជាង ៤០ ម៉ឺនដុល្លារ ពីគម្រោង CASDP

Din Thary — Thu, 08 Jan 2026 08:11:57 +0000

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ នៅថ្ងៃទី០៨ ខែមករា ឆ្នាំ២០២៦ នេះ បានឱ្យដឹងថា ផែនការអាជីវកម្មទំហំជាង ៤០ ម៉ឺនដុល្លារ នៃសហគមន៍កសិកម្មទំនើបបន្លែសុវត្ថិភាពកោះខ្សាច់ទន្លា ស្រុកស្អាង ខេត្តកណ្តាល ត្រូវបានគាំទ្រទាំងស្រុងដោយគម្រោង CASDP នៃក្រសួងកសិកម្ម និងទទួលបានថវិកាហិរញ្ញប្បទានពីធនាគារពិភពលោក។

លោក ឃឹម ហ្វីណង់ បានគូសបញ្ជាក់ថា ផែនការអាជីវកម្មទំហំជាង ៤០ ម៉ឺនដុល្លារ ត្រូវបានចុះហត្ថលេខាធ្វើឡើងដើម្បីឱ្យពលរដ្ឋនៅក្នុងសហគមន៍ យកទៅសាងសង់ផ្ទះសំណាញ់ថ្មីចំនួន ១១៧ខ្នង ដើម្បីធ្វើការដាំដុះបន្លែនៅក្នុងផ្ទះសំណាញ់នេះតែម្តង។

ដោយឡែកក្នុងទំហំអាជីវកម្មទាំងជាង ៤០ ម៉ឺនដុល្លារនេះ ក្នុងនោះនោះ ៤០% គឺជាជំនួយឥតសំណង ចំណែកឯ ៦០% ទៀតត្រូវបានផ្តល់ជូនដល់សហគមន៍ក្រោមរូបភាពជាកម្ចីដើមទុនមានការប្រាក់ទាបតាមរយៈធនាគារ ARDB។

អ្នកនាំពាក្យរូបនេះ បានអះអាងថា បើមិនមានអ្វីប្រែប្រួលទេ ផ្ទះសំណាញ់របស់សហគមន៍ទាំងអស់នេះនឹងអាចចាប់ផ្តើមផលិតកម្មបានក្នុងរយៈពេល ២-៣ ខែ ខាងមុខនេះ ជាមួយនឹងសមត្ថភាពផ្គត់ផ្គង់បន្លែសុវត្ថិភាពជាប្រចាំក្នុងរង្វង់ ២តោនក្នុងមួយថ្ងៃ។

លោក ឃឹម ហ្វីណង់ បានបន្តទៀតថា តាមពិតទៅសហគមន៍កសិកម្មទំនើបបន្លែសុវត្ថិភាពកោះខ្សាច់ទន្លា ត្រូវបានបង្កើតឡើងរយៈពេលជាង ១ ឆ្នាំរួចមកហើយ ប៉ុន្តែដោយសារតែស្ថានភាពភូមិសាស្រ្តមានលក្ខណៈស្មុកស្មាញជាងតំបន់ដទៃ ប៉ុន្តែទើបតែបច្ចុប្បន្នក្រសួងរកវិធីសាស្ត្រឃើញ និងឈានការចុះកិច្ចសន្យា។

លោកថា នេះគ្រាន់តែជាជំហានដំបូងប៉ុណ្ណោះ តទៅមុខទៀតក្រសួងកសិកម្មនឹងជួយទៅលើការតភ្ជាប់ទីផ្សារ ការគាំទ្រផ្នែកបច្ចេកទេស ជួយការកាត់បន្ថយថ្លៃដើម ហើយតាមរយៈគម្រោងពិពិធកម្មកសិកម្មកម្ពុជា ក៏ដូចជាគម្រោងផ្សេងៗមួយចំនួនទៀតក៏នឹងជួយគាំទ្រផ្នែកហេដ្ថារចនាសម្ព័ន្ធដល់ប្រជាសហគមន៍ផងដែរ៕

The post សហគមន៍កសិកម្មទំនើបបន្លែសុវត្ថិភាព កោះខ្សាច់ទន្លា ទទួលបានទុន និងជំនួយជាង ៤០ ម៉ឺនដុល្លារ ពីគម្រោង CASDP appeared first on Kampuchea Thmey Daily.