សេដ្ឋកិច្ច

សហគមន៍កសិកម្ម ៤ នៅបាត់ដំបង ទទួលបានជំនួយឥតសំណង ១៩ ម៉ឺនដុល្លារ

បានផុស

៤ ខែ មុន

នៅ

ថ្ងៃពុធ ២៨ មករា ២០២៦

ដោយ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានឱ្យដឹងថា សហគមន៍កសិកម្មចំនួន ៤ នៅខេត្តបាត់ដំបង ទទួលបានជំនួយឥតសំណង ១៩ ម៉ឺនដុល្លារ ពីគម្រោងពិពិធកម្មកសិកម្មកម្ពុជា(CASDP) ដើម្បីគាំទ្រដល់ផែនការវិនិយោគរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី២៨ ខែមករា ឆ្នាំ២០២៦ នេះ លោក ឃឹម ហ្វីណង់ បានលើកឡើងថា សហគមន៍កសិកម្មចំនួន ៤ ទៀតនៅក្នុងខេត្តបាត់ដំបង ទទួលបានជំនួយឥតសំណងពីគម្រោងពិពិធកម្មកសិកម្មកម្ពុជា(CASDP) សរុបជាទឹកប្រាក់ប្រមាណ ១៩ ម៉ឺនដុល្លារអាមេរិកដើម្បីគាំទ្រដល់ផែនការវិនិយោគរបស់ខ្លួន។

សហគមន៍ទាំង ៤ ដែលទើបទទួលបានជំនួយឥតសំណងនោះរួមមាន សហគមន៍កសិកម្មចម្រើនផលរាំងកេសី ទទួលបានទំហំទុន ៧៥៨០០ ដុល្លារ, សហគមន៍កសិកម្មសម្រស់កំពង់ល្ពៅ ទទួលបានទំហំទុន ៣៤៨៦៤ ដុល្លារ, សហគមន៍កសិកម្មកំពីងពួយបង្កើនផល ទទួលបាន ៥០៧៦៨ ដុល្លារ និងសហគមន៍កសិកម្មផលិតពូជស្រូវសង្ហាផល ទទួលបានទំហំទុន ២៩៤៨៨ ដុល្លារផងដែរ។

លោកបានបន្តដែរថា កិច្ចព្រមព្រៀងដ៏មានសារៈសំខាន់នេះត្រូវបានធ្វើឡើងរួមគ្នានៅមន្ទីរកសិកម្មខេត្តបាត់ដំបង រវាងគម្រោងCASDP ដែលជាគម្រោងរបស់ក្រសួងកសិកម្ម និងទទួលបានថវិកាហិរញ្ញប្បទានពីធនាគារពិភពលោក ជាមួយនឹងសហគមន៍ផលិតស្រូវពូជចំនួន ៣ និងសហគមន៍ផលិតពោតក្រហមចំនួន ១ ។

គម្រោងនឹងផ្តល់ការគាំទ្រដើមទុនចំនួន ៤០% ដើម្បីឱ្យសហគមន៍អាចមានលទ្ធភាពវិនិយោគលើគ្រឿងម៉ាស៊ីន និងឧបករណ៍សម្ភារៈកសិកម្មចាំបាច់មួយចំនួន ដើម្បីបង្កើតប្រសិទ្ធភាពផលិតកម្មនៅតាមសហគមន៍នីមួយៗ៕