សេដ្ឋកិច្ច

សហគមន៍កសិកម្មទំនើប ១៧ ទទួលបានការគាំទ្រទុនពីគម្រោងពិពិធកម្មកសិកម្មកម្ពុជា ជិត ៩ លានដុល្លារ

បានផុស

៥ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

សហគមន៍កសិកម្មទំនើបចំនួន ១៧ ទទួលបានការគាំទ្រទុនពីគម្រោងពិពិធកម្មកសិកម្មកម្ពុជា(CASDP) សរុបជាទឹកប្រាក់ជិត ៩ លានដុល្លារអាមេរិក។ នេះបើតាមការឱ្យដឹងពីលោក ឃឹម ហ្វីណង់ អ្នកនាំពាក្យក្រសួកសិកម្ម នៅព្រឹកថ្ងៃទី២៩ ខែមករា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ឃឹម ហ្វីណង់ គម្រោងទុនសរុបជិត ៩ លានដុល្លារអាមេរិក ពី CASDP ក្នុងនោះ ២,៧ លានដុល្លារជាជំនួយឥតសំណង និងប្រមាណ ៦ លានដុល្លារ ទៀតជាកម្ចីដើមទុនការប្រាក់ទាប។

លោកក៏បានឱ្យដឹងបន្តថា មាន ១១ សហគមន៍នៃសហគមន៍ទាំង ១៧ នេះ គឺជាសហគមន៍កសិកម្មទំនើប ក្នុងនោះខេត្តសៀមរាប មានរហូតដល់ទៅ ៦ សហគមន៍ ដែលជាចំនួនច្រើនជាងគេក្នុងចំណោមខេត្តទាំង ៨ ដែលទទួលបានអត្ថប្រយោជន៍ពីគម្រោងនៅក្នុងវគ្គនេះ។

សហគមន៍ទាំងនេះ គឺជាក្រុមចុងក្រោយដែលទទួលបានការអនុម័តគាំទ្រការវិនិយោគ មុននឹងគម្រោងដែលដឹកនាំដោយក្រសួងកសិកម្ម និងគាំទ្រហិរញ្ញប្បទានដោយធនាគារពិភពលោកមួយនេះត្រូវបានបិទបញ្ចប់ជាផ្លូវការនៅក្នុងអំឡុងពេល ៦ ខែទៀត។

លោក ឃឹម ហ្វីណង់ បានបន្តថា ដោយហេតុផលនេះហើយទើបក្រុមការងារសម្រេចរៀបចំពិធីចុះហត្ថលេខាលើកិច្ចព្រមព្រៀងរួមគ្នាតែម្តងនៅក្រសួងកសិកម្ម ដើម្បីចំណេញពេលវេលា និងបង្កើនល្បឿនអនុវត្តផែនការវិនិយោគនៅតាមសហគមន៍នីមួយៗឱ្យបានទាន់ពេលនិងត្រឹមត្រូវទៅតាមនីតិវិធីតម្រូវ៕