សុខភាពថ្លើម Archives - Kampuchea Thmey Daily

អនុវត្ដប៉ុន្មានចំណុចនេះបាន នឹងជួយឲ្យថ្លើមមាន សុខភាពល្អ

សាង ស្រីល័ក្ខ — Wed, 06 Apr 2022 03:42:41 +0000

ថ្លើមគឺជាសរីរាង្គមួយដែលមានតួនាទីយ៉ាងសំខាន់ក្នុងរាងកាយ។ ថ្លើមទទួលបន្ទុកក្នុងការ គ្រប់គ្រងកម្រិតគីមីក្នុងខ្លួន ដោយបំបែកជាតិពុល រក្សាលំនឹងជាតិខ្លាញ់ក្នុងឈាម និង ផលិតសារធាតុចិញ្ចឹមទ្រទ្រង់រាងកាយបញ្ជូនតាមរយៈសរសៃឈាម។ នៅមានតួនាទីជាង៥០០ប្រភេទទៀតរបស់ថ្លើមដែលយើងមិនអាចរៀបរាប់អស់ ហើយទាំងនេះគូសបង្ហាញឲ្យដឹងច្បាស់ថា ថ្លើមពិតជាមានសារៈសំខាន់សម្រាប់រាងកាយ ដែលទាមទារឲ្យមានការថែរក្សាឲ្យបានល្អ។ យ៉ាងនេះហើយ ខាងក្រោមនេះមាន៧ចំណុចសំខាន់ៗ គួរអនុវត្ដដើម្បីរក្សាសុខភាពថ្លើម។

១.រក្សាតុល្យភាពទម្ងន់

ការរក្សារតុល្យភាពទម្ងន់ គឺជារឿងដែលចាំបាច់សម្រាប់សុខភាពថ្លើមដែលអាចជៀសផុតពីជំងឺផ្សេងៗបាន។ ក្នុងចំណុចនេះទាក់ទងទៅនឹងការបង្កើតទម្លាប់នៃការញ៉ាំអាហារ និងការគ្រប់គ្រងពេលវេលានៃការញ៉ាំឲ្យបានត្រឹមត្រូវ។ កាលណាដែលយើងមិនអាចគ្រប់គ្រងតុល្យភាពទម្ងន់បានល្អ ដូចជាការឡើងគីឡូជាដើម នោះថ្លើមនឹងប្រឈមនឹងបញ្ហាជំងឺខ្លាញ់រុំថ្លើម ដែលជាជំងឺងាយនឹងកើតឡើងបំផុត ប្រសិនជា យើងមិនអាចគ្រប់គ្រងតុល្យភាពទម្ងន់បាននោះទេ។

២.រក្សាតុល្យាភាពរបបអាហារ

ក្នុងការរក្សារបបអាហារឲ្យបានល្អ យើងគប្បីត្រូវស្វែងយល់ឲ្យបានច្បាស់ ពីការជ្រើសរើសរបបអាហារដែលគួរញ៉ាំ។ ជាក់ស្ដែងណាស់មានអាហារ មួយចំនួនធំ ដែលយើងគួជៀសវាង ទាំងនោះមានដូជា ប្រភេទអាហារសាច់ដែលមានកម្រិតកាឡូរីខ្ពស់ អាហារមានជាតិខ្លាញ់ឆ្អែត អាហារមានជាតិកាបូនអ៊ីដ្រាតចម្រាញ់ (ពពួកនំប៉័ង ផាស្ដារ) និង អាហារមានជាតិស្ករខ្ពស់។ សម្រាប់អាហារដែលគួរញ៉ាំ គឺមានដូចជា បន្លែផ្លែឈើស្រស់ គ្រាប់ធញ្ញជាតិ ត្រីសាច់ ដែលចម្អិនបានឆ្អិនល្អ ជាពិសេសពពួកសាច់ក្រហម គួតែកំណត់ការញ៉ាំ មិនត្រូវឲ្យលើបរិមាណច្រើនពេកនោះទេ។ កត្ដាសំខាន់មួយទៀតគួរតែញ៉ាំទឹកឲ្យបានច្រើនផងដែរ។

៣.ការហាត់ប្រាណ

ការហាត់ប្រាណជាប្រចាំ ក៏អាចរួមចំណែកក្នុងការការពារសុខភាពថ្លើមរបស់យើងបានល្អផងដែ ព្រោះថា ការហាត់ប្រាណបានធ្វើឲ្យរាងកាយទាំងមូលមានសកម្មភាព វាអាចដុតរំលាយខ្លាញ់ triglycerides ដែលមាននៅក្នុងរាងកាយ ហើយបំប្លែងទៅជាថាមពល មិនត្រឹមតែប៉ុណ្ណោះក៏អាចកាត់បន្ថយជំងឺខ្លាញ់រុំថ្លើមបានមួយកម្រិត។

៤.កាត់បន្ថយជាតិអាល់កុល

ការកំណត់ការញ៉ាំគ្រឿងស្រវឹងកាន់តែតិច គឺជារឿងដែលល្អបំផុត សម្រាប់សុខភាព។ ជាក់ស្ដែង ជាតិអាល់កុលក្នុងស្រាបៀរ គឺអាចបង្កឲ្យមានជំងឺជាច្រើនប្រភេទប៉ះពាល់ដល់សុខភាពថ្លើម។ ការកាត់បន្ថយទម្លាប់នៃការញ៉ាំគ្រឿងស្រវឹង កាន់តែតិចគឺកាន់តែល្អ។ បន្ថែមពីនោះចំពោះគ្រឿងញៀនក៏ត្រូវតែជៀសវាង។

៥.កុំប្រើប្រាស់របស់ផ្ទាល់ខ្លួនរួម

ក្នុងន័យនេះ សំដៅទៅលើប្រភេទរបស់ប្រើប្រាស់មួយចំនួនដូចជា ច្រាស់ដុះធ្មេញ កន្ដ្រៃកាត់ក្រចក ឬឡាមកោរោម ជាដើម។ របស់ទាំងនេះអាចមានជាប់ជាមួយឈាម ឬសារធាតុរាវនៅលើដងខ្លួន ក៏ជាហេតុបង្កឲ្យមានការចម្លងមេរោគថ្លើមបានដែរ។ ការប្រុងប្រយ័ត្នចាប់ផ្ដើមពីចំណុចទាំងនេះ គឺជារឿងល្អបំផុតសម្រាប់សុខភាពរបស់យើង។

៦. ការរួមភេទដោយការពារ

ការរួមភេទដោយមិនបានការពារ ក៏ជាឱកាសនៃការឆ្លងមេរោគថ្លើមបាន ដូចជាមេរោគថ្លើមប្រភេទB និងប្រភេទC។ ក្នុងករណីនេះ ប្រសិនជាការរួមភេទជាមួយនឹងដៃគូច្រើន ឬដៃគូមិនធ្លាប់ស្គាល់ ដោយមិនបានប្រើប្រាស់ស្រោមអនាម័យ ក៏ជាកត្ដាបង្កហារនិភ័យ មកកាន់យើង។ បន្ថែមពីនេះទៀត ត្រូវតែសម្អាតរាងកាយឲ្យបានស្អាតល្អជាមួយនឹងសាប៊ូ ក្រោយពេលរួមភេទជាមួយដៃគូ។

៧.ការចាក់វាក់សាំង

ការចាក់វាក់សាំងក៏ជាវិធីសាស្ដ្រចុងក្រោយហើយល្អផងដែរ ព្រោះវាអាចជួយការពារ ពីការឆ្លងមេរោគថ្លើមបាន ២ប្រភេទ គឺប្រភេទ A និង B ៕

អត្ថបទផ្ដល់ដោយ៖Hello Krupet

ចុចអាន៖ដឹង ៣ ចំណុចនេះ អ្នកឈប់ ឬខ្ជិលហាត់ប្រាណ នឹងភ្ញាក់ខ្លួន

ចុចអាន៖អ្នកឧស្សាហ៍សូណា ដឹងអត់ថា ជួយសុខភាពស្បែកអ្វីខ្លះ?

The post អនុវត្ដប៉ុន្មានចំណុចនេះបាន នឹងជួយឲ្យថ្លើមមាន សុខភាពល្អ appeared first on Kampuchea Thmey Daily.

ការរលាកថ្លើមធ្ងន់ធ្ងរដោយសារគ្រឿងស្រវឹង!

Sorn Phanith — Wed, 07 Jul 2021 01:29:42 +0000

ការរលាកថ្លើមធ្ងន់ធ្ងរ ជាផលវិបាកគ្រោះថ្នាក់មួយនៃការទទួលទានសុរាលើសលប់ ដែលអ្នកជំងឺមានអត្រាស្លាប់លើសពី៥០% ប្រសិនបើគ្មានការប្តូរសរីរាង្គថ្លើមជាបន្ទាន់នោះទេ។

ជាទូទៅបរិមាណសុរាអាស្រ័យទៅនឹងចំនួន និងកម្រិតជាតិអាល់កុលរបស់សុរាដែលយើងពិសា។ គេចាត់ ការពិសាគ្រឿងស្រវឹងក្នុងចំនួនច្រើនលើសលប់គឺ ចាប់ពីបរិមាណលើសពី ៤កែវស្តង់ដារក្នុងមួយថ្ងៃ ឬ១៥កែវស្តង់ដារក្នុងមួយសប្តាហ៍ចំពោះបុរស និងលើសពី ៣កែវស្តង់ដារក្នុងមួយថ្ងៃ ឬ៧កែវស្តង់ដារក្នុងមួយសប្តាហ៍ ចំពោះស្ត្រី ។

– (១កែវស្តង់ដា ស្មើនឹង 340មល ប៊ីយែរ (អាល់កុល5%)

– 150មល ស្រាក្រហម (អាល់កុល12%)

– 45-50មល ស្រាwhiskey (អាល់កុល40-45%))

ជំងឺរលាកថ្លើមដែលបង្កឡើងដោយសុរា វាអាចលេចឡើងក្រោមរូបភាពជា ការរលាកថ្លើមស្រួចស្រាវ ការរាកថ្លើមរ៉ាំរ៉ៃ និងខ្លាញ់រុំថ្លើមផងដែរ។ រោគសញ្ញារបស់អ្នកជំងឺជាទូទៅមិនស្តែងចេញជាសញ្ញាអ្វីទាំងអស់ ដែលទាមទារឲ្យគាត់មកពិគ្រោះពិនិត្យជាមួយវេជ្ជបណ្ឌិត និងពិនិត្យមើលឈាមអំពីមុខងារថ្លើមផ្សេងៗ និងសញ្ញានៃការរលាកថ្លើម។ នៅក្នុងករណីខ្លះអ្នកជំងឺអាចស្តែងចេញជាសញ្ញា លឿងភ្នែក ទឹកនោមលឿងចាស់ខុសពីធម្មតា ចុកសៀតក្រោមឆ្អឹងជំនីខាងស្តាំ ឬរហូតដល់វង្វេងវង្វាន់ស្មារតី ឬរហូតដល់សន្លប់ ដែលជាសញ្ញាគ្រោះថ្នាក់ នៃការរលាកថ្លើមស្រួចស្រាវ។

“សូមបងប្អូនប្រជាពលរដ្ឋយកចិត្តទុកដាក់ខ្ពស់លើសុខភាពថ្លើមរបស់លោកអ្នក និងកុំទទួលទានគ្រឿងស្រវឹងក្នុងកម្រិតលើសលប់ ដែលជាហានិភ័យខ្ពស់បង្កឲ្យមានការរលាកថ្លើមធ្ងន់ធ្ងរ”៕

អត្ថបទ៖ រស្មី

សូមចុចអាន៖ មូលហេតុនៃការកើតជំងឺមហារីកក្រពះ និងវិធីបង្ការ

The post ការរលាកថ្លើមធ្ងន់ធ្ងរដោយសារគ្រឿងស្រវឹង! appeared first on Kampuchea Thmey Daily.

ផលគ្រោះថ្នាក់របស់ជំងឺថ្លើមប្រភេទ បេ សេ និងការវិវត្តន៍ទៅជំងឺក្រិនថ្លើម ឬដល់អាយុជីវិត

Sorn Phanith — Tue, 04 May 2021 01:20:25 +0000

ជំងឺរលាកថ្លើមដោយវីរុសប្រភេទបេ (Hépatite B) និងប្រភេទសេ (Hépatite C) ត្រូវបានគេសង្កេតឃើញកើត មានជាញឹកញាប់នៅប្រទេសកម្ពុជា ដែលប្រជាជនភាគច្រើនមានការព្រួយបារម្ភ ព្រោះវាជាហានិភ័យអាចបង្ក គ្រោះថ្នាក់ដល់អាយុជីវិត។ យោងតាមវេជ្ជបណ្ឌិតឯកទេសផ្នែកថ្លើម ក្រពះ ពោះវៀន វិធីសាស្ត្រមួយក្នុងចំណោមការ ព្យាបាលជំងឺប្រភេទនេះ គឺតម្រូវឲ្យមានការតាមដាន ការកើនឡើងចំនួនវីរុសប្រភេទបេ និងប្រភេទសេ ដែលមាន នៅក្នុងឈាម។

ដោយសារមានតម្រូវការចាំបាច់ ដើម្បីបម្រើសេវា និងសេចក្តីត្រូវការរបស់ប្រជាពលរដ្ឋ នាពេលបច្ចុប្បន្ននេះ ផ្នែកមន្ទីរពិសោធន៍ម៉ូលេគុលជីវសាស្ត្រនៃមន្ទីរពេទ្យកាល់ម៉ែត បានបំពាក់នូវម៉ាស៊ីនមានគុណភាពខ្ពស់ COBAS AmpliPrep និង COBAS TaqMan ព្រមជាមួយនឹងប្រតិករ ដែលមានការសហការផលិតពីប្រទេសស្វីស និង ប្រទេសអាល្លឺម៉ង់។ ផ្នែកនេះផ្ទាល់អាចបម្រើសេវាផ្តល់ជូនលទ្ធផលរហ័ស នៃការវិភាគរាប់វីរុសថ្លើមប្រភេទបេ (PCR HBV) ចាប់ពី 20UI/ml និងប្រភេទសេ (PCR HCV) ចាប់ពី 15UI/ml ឡើងទៅ។

ការអនុវត្តតាមវិធីសាស្ត្រព្យាបាលរបស់គ្រូពេទ្យជំនាញ មានសារៈសំខាន់បំផុត ហើយប្រជាពលរដ្ឋគួរតែមាន ការយកចិត្តទុកដាក់ខ្ពស់ក្នុងការទទួលសេវាពិនិត្យព្យាបាលជំងឺរលាកថ្លើមទាំង២ប្រភេទ ដើម្បីជៀសផុតពីការប៉ះពាល់ ដល់អាយុជីវិត (ការវិវត្តន៍ទៅជំងឺក្រិនថ្លើមជាដើម…..)។ ការព្យាបាលជំងឺថ្លើមទាន់ពេលវេលា ទើបអាចសង្គ្រោះជីវិតបាន !៕

អត្ថបទ៖ រស្មី

សូមចុចអាន៖ ជំងឺគ្រោះថ្នាក់សរសៃឈាមខួរក្បាល គឺត្រូវការព្យាបាលបន្ទាន់បំផុត!

The post ផលគ្រោះថ្នាក់របស់ជំងឺថ្លើមប្រភេទ បេ សេ និងការវិវត្តន៍ទៅជំងឺក្រិនថ្លើម ឬដល់អាយុជីវិត appeared first on Kampuchea Thmey Daily.

ការយល់ដឹងពីស្ដ្រីមានផ្ទៃពោះ និងទារក ជាមួយជំងឺថ្លើមប្រភេទ បេ

Sorn Phanith — Thu, 29 Apr 2021 01:23:16 +0000

ជំងឺរលាកថ្លើមប្រភេទ បេ ជាជំងឺថ្លើមមួយប្រភេទ ដែលបង្កឡើងដោយពពួកវីរុស ដែលស្ថិតនៅក្នុងក្រុម Hepadnaviridae។ ពពួកវីរុសនេះ បង្កឲ្យរលាកថ្លើមស្រួចស្រាវ និងរ៉ាំរ៉ៃដែលបណ្តាលឲ្យអ្នកជំងឺប្រឈមទៅនឹងជំងឺក្រិនថ្លើម និងមហារីកថ្លើម។

ជារៀងរាល់ឆ្នាំ មានមនុស្សប្រមាណជា ៦៨៦០០០នាក់ ទទួលមរណៈភាពនៅលើពិភពលោក ដោយសាររលាកថ្លើមប្រភេទបេនេះ ដែលភាគច្រើនមូលហេតុបង្កមកពីការវិវត្តន៍នៃជំងឺនេះទៅជាមហារីកថ្លើម។ បច្ចុប្បន្ននេះ មានវ៉ាក់សាំងការពារជំងឺថ្លើមប្រភេទបេ ដែលមានប្រសិទ្ធភាពដល់ទៅ៩៥% ក្នុងការទប់ស្កាត់ការវិវត្តន៍ជំងឺនេះ ពីការរលាកថ្លើមស្រួចស្រាវ ទៅជារលាកថ្លើមរ៉ាំរ៉ៃ និងដំណាក់កាលឈានទៅរកមហារីកថ្លើម។

ក) ការចម្លងរោគ៖

ពពួកវីរុសដែលបង្កឲ្យរលាកថ្លើមប្រភេទ បេ អាចរស់នៅក្នុងបរិយាកាសខាងក្រៅខ្លួនមនុស្សយូរជាង ៧ថ្ងៃ ហើយវាមានលទ្ធភាពជ្រៀតចូលទៅក្នុងខ្លួនមនុស្សដែលពុំបានទទួលការព្យាបាលដោយចាក់វ៉ាក់សាំងការពារជំងឺថ្លើមប្រភេទបេ។ ពេលដែលពពួកវីរុសនេះចូលក្នុងខ្លួនមនុស្សវាអាចសម្ងំនៅក្នុងខ្លូនមនុស្សម្នាក់រយៈពេលយូរហើយបង្កឲ្យរលាកថ្លើមរ៉ាំរ៉ៃ។ ការចំលងមេរោគនេះ ធ្វើឡើងដោយការប៉ះផ្ទាល់ជាមួយវត្ថុរាវ ឬឈាមរបស់អ្នកជំងឺដែលផ្ទុកមេរោគថ្លើមប្រភេទបេ ការចំលងដោយការរួមភេទ និងការចំលងពីម្តាយដែលមានផ្ទុកមេរោគថ្លើមប្រភេទបេទៅទារក នៅអំឡុងពេលពរពោះក្នុងត្រីមាសទី៣ ក៏ដូចជាក្នុងពេលសម្រាល និងការបំបៅដោះទារក។

ខ) រោគសញ្ញា៖

ភាគច្រើនអ្នកជំងឺដែលផ្ទុកមេរោគរលាកថ្លើមប្រភេទបេ ពុំស្តែងចេញមកខាងក្រៅនូវរោគសញ្ញាធំដុំនោះទេ។ អ្នកផ្ទុកជំងឺរលាកថ្លើមប្រភេទបេ ស្រួចស្រាវមួយភាគតូច ស្តែងចេញមកនូវរោគសញ្ញា អស់កម្លាំងល្ហិតល្ហៃខ្លាំង ឈឺពោះ ក្អួតចង្អោរ រួមទាំងស្បែកនិងភ្នែកឡើងពណ៌លឿងរយៈពេលមួយសប្តាហ៍ ឬក៏យូរជាងនេះ។

គ) ការធ្វើរោគវិនិច្ឆ័យ៖

ការធ្វើរោគវិនិច្ឆ័យត្រូវពឹងផ្អែក ទៅលើការពិនិត្យឈាម (AgHbs, AcHbs, AcHbc, និង PCR HBV) ក្នុងដំណាក់កាលរលាកថ្លើមស្រួចស្រាវ។ រាល់ស្ត្រីដែលមានផ្ទៃពោះ ការធ្វើរោគវិនិច្ឆ័យមេរោគរលាកថ្លើមប្រភេទបេ ត្រូវបានធ្វើឡើងនៅអំឡុងត្រីមាសទី ២ ប្រហាកប្រហែលនឹងគក៌បាន ៦ខែ។

ប្រសិនជាការពិនិត្យឈាមបញ្ជាក់ថា ស្ត្រីមានផ្ទុក AntigéreHbsវិជ្ជមាននោះ ស្ត្រីជាម្តាយតម្រូវឲ្យពិនិត្យឈាមមួយចំនួនបន្ថែមទៀត ដើម្បីរាប់ចំនួនមេរោគថ្លើមប្រភេទបេ។

ឃ) ការព្យាបាល៖

នៅដំណាក់កាលរលាកថ្លើមប្រភេទបេស្រួចស្រាវ ការព្យាបាលពឹងផ្អែកទៅលើរោគសញ្ញាគ្លីនិកដែលស្តែងចេញមកក្រៅ ដូចជាការបំពេញជាតិទឹកដោយសារការក្អួត។ ចំពោះស្ត្រីមានផ្ទៃពោះ ដែលលទ្ធផលពិនិត្យឈាមមាន AntigèneHbsវិជ្ជមាន គឺតម្រូវឲ្យរាប់មេរោគ Charge Virale de VHB។ បើកាលណាវត្តមានមេរោគនៅក្នុងឈាមមានចំនួនលើសពី ១០ម៉ឺន UI ស្ត្រីមានផ្ទៃពោះតម្រូវឲ្យប្រើថ្នាំប្រឆាំងនឹងមេរោគរលាកថ្លើមប្រភេទបេ (Tenofovir)រហូតដល់ពេលសម្រាលទារក ដើម្បីកាត់បន្ថយការចំលងមេរោគទៅទារក នៅជុំវិញការសម្រាល។ ក្រោយពីសម្រាលនៅអំឡុងពេល ២៤ម៉ោង ទារកត្រូវបានការពារដោយការចាក់ថ្នាំបង្ការដែលណែនាំដោយវេជ្ជបណ្ឌិតឯកទេស ដើម្បីការពារកុំឲ្យមេរោគរលាកថ្លើមប្រភេទបេ ជ្រៀតចូលទៅក្នុងខ្លួនទារក។ ក្រោយពីការចាក់ថ្នាំបង្ការ ២៤ ម៉ោង ទារកអាចទទួលការបំបៅដោះបានដោយសុវត្ថិភាព។

ង) វិធីបង្ការ៖

– ទារកទាំងឡាយត្រូវមកទទួលការចាក់វ៉ាក់សាំងបង្ការមេរោគថ្លើមប្រភេទបេ នៅអំឡុងពេល ២៤ម៉ោងក្រោយសម្រាល ហើយបន្តចាក់ឲ្យបានគ្រប់ ៣ដង (នៅ១ខែបន្ទាប់ និង៦ខែបន្ទាប់)។

– ស្ត្រីមានផ្ទៃពោះគ្រប់រូបគួរតែពិនិត្យឈាមរកមេរោគរលាកថ្លើមប្រភេទបេ ឲ្យបានមុនត្រីមាសទី៣។

– សូមជៀសវាងការប្រើរបស់របររួមគ្នា ជាមួយអ្នកជំងឺដែលផ្ទុកមេរោគរលាកថ្លើមប្រភេទបេ (ប្រដាប់កោពុកមាត់ ច្រាសដុសធ្មេញ កន្ត្រៃកាត់ក្រចក ជាដើម ។ល។)។

– ទារកនៅក្នុងផ្ទៃដែលម្តាយផ្ទុកមេរោគរលាកថ្លើមប្រភេទបេ ចាំបាច់ត្រូវចាក់ថ្នាំបង្ការអំឡុង ២៤ម៉ោងក្រោយសម្រាល

– គ្រប់សមាជិកគ្រួសាររបស់ស្ត្រីមានផ្ទៃពោះដែលមានផ្ទុកមេរោគរលាកថ្លើមបេ គួរតែធ្វើការស្រាវជ្រាវរកមេរោគ ដើម្បីចាក់វ៉ាក់សាំងបង្ការ និងព្យាបាលឲ្យបានទាន់ពេល។

– មនុស្សប្រុសស្រីគ្រប់រូបគប្បីមកទទួលការចាក់ថ្នាំបង្ការលាកថ្លើមប្រភេទបេឲ្យបានមុនអាយុ១៨ឆ្នាំ។

– គ្រប់ស្ត្រីដែលពុំបានទទួលការចាក់វ៉ាក់សាំងការពារមេរោគរលាកថ្លើមបេ គួរគប្បីចាក់វ៉ាក់សាំងការពារមេរោគរលាកថ្លើមបេ មុនពពោះទារកដំបូង។

“អ្នកម្តាយគ្រប់រូបគួរធ្វើតេស្តឈាមរុករកមេរោគថ្លើមប្រភេទបេ។ ប្រសិនបើវិជ្ជមាន គួរជួបពិគ្រោះជាមួយក្រុមការងារវេជ្ជបណ្ឌិតជំនាញនៅមន្ទីរពេទ្យកាល់ម៉ែត ដើម្បីទទួលការប្រឹក្សា និងការព្យាបាលត្រឹមត្រូវ ជៀសវាងការចម្លងមេរោគនេះទៅកូនរបស់អ្នក”៕

អត្ថបទ៖ រស្មី

សូមចុចអាន៖ អ្វីទៅជំងឺច្រាលទឹកអាស៊ីតក្រពះ?

The post ការយល់ដឹងពីស្ដ្រីមានផ្ទៃពោះ និងទារក ជាមួយជំងឺថ្លើមប្រភេទ បេ appeared first on Kampuchea Thmey Daily.

ការព្យាបាលជំងឺដុំមហារីកថ្លើម សម័យទំនើប !

Sorn Phanith — Wed, 07 Apr 2021 01:57:16 +0000

ក) ការយល់ដឹងទូទៅ៖

ប្រភេទជំងឺដុំមហារីកសាច់ថ្លើម (HCC) គឺជាប្រភេទជំងឺថ្លើម ដែលក្រុមការងារវេជ្ជបណ្ឌិតឯកទេសយើងខ្ញុំតែងតែបានជួបប្រទះ និងទទួលព្យាបាលអ្នកជំងឺជាញឹកញាប់នៅក្នុងផ្នែកឯកទេសជំងឺថ្លើមនៃមន្ទីរពេទ្យកាល់ម៉ែត។

បើទោះបីសព្វថ្ងៃនេះយើងមានវិធីសាស្ត្រទំនើបៗ ហើយមានថ្នាំដែលមានប្រសិទ្ធភាពខ្ពស់ក្នុងការព្យាបាលជំងឺយ៉ាងណាក៏ដោយ ក៏ជំងឺមួយនេះ គឺនៅតែមានភាពកាចសារហាវ ហើយក៏មានភាពលំបាកនៅក្នុងការថែរទាំព្យាបាលចំពោះអ្នកជំងឺ និងបានកំពុងតែសម្លាប់ជីវិតមនុស្សជាច្រើនលើពិភពលោកក្នុងមួយឆ្នាំៗ។

ខ)មូលហេតុ៖

ដុំមហារីកសាច់ថ្លើម ភាគច្រើនគឺបណ្តាលមកពីការរលាកសាច់ថ្លើមរ៉ាំរៃ (Chronic Hepatitis)។ ដោយសារមេរោគរលាកថ្លើមប្រភេទ សេ ប្រភេទ បេ និងការពិសាគ្រឿងស្រវឹងច្រើនហើយរយៈពេលយូរជាដើម ហើយវិវត្តន៍ទៅជាថ្លើមក្រិន និងដំណាក់កាលចុងក្រោយ គឺការលេចចេញនៃដុំមហារីក នៅលើសាច់ថ្លើមដែលក្រិននោះ (80-90%)។

មូលហេតុខ្លះៗបន្ថែមទៀតមាន៖

– សត្វល្អិតម្យ៉ាងរស់តាមដងទន្លេមេគង្គលើ ម្តុំខេត្តក្រចេះ និងស្ទឹងត្រែង (liver fluke) អាចឆ្លងមកមនុស្សដោយការទទួលទានខ្ចៅ ខ្យង ឬត្រីដែលមានពង ឬកូនសត្វល្អិតប៉ារ៉ាស៊ីតនេះហើយចម្អិនមិនឆ្អិនល្អ។

– ការបរិភោគអាហារផ្អាប់យូរ មានដុះផ្សិត Beta Aflatoxin ជាប្រចាំ អាចបណ្តាលឲ្យកើតមហារីកថ្លើម មានអត្រាខ្ពស់ជាង មេរោគរលាកថ្លើម បេ និង សេ រួមបញ្ចូលគ្នាទៅទៀត។

ចំណាំ៖ ដុំមហារីកថ្លើមក៏អាចមាននៅលើអ្នកជំងឺដែលមិនទាន់មានបញ្ហាក្រិនថ្លើមផងដែរ (១០% ទៅ ២០%) ជាពិសេស គឺអ្នកជំងឺដែលមានផ្ទុកមេរោគរលាកថ្លើមប្រភេទ បេ រ៉ាំរៃ (chronic hepatitis B )។

គ) រោគសញ្ញា៖

រោគសញ្ញាដែលអាចឲ្យយើងដឹងអំពីជំងឺមួយនេះគឺមានដូចជា:

– មានការឈឺចុកចាប់នៅផ្នែកខាងស្តាំនៃពោះ

– ថ្លើមរីកធំ (ដោយការពិនិត្យរបស់វេជ្ជបណ្ឌិត)

– អ្នកជំងឺភាគច្រើនមានមកជាមួយរោគសញ្ញានៃជំងឺក្រិនថ្លើម (លឿងភ្នែក និងស្បែក ទាចទឹកក្នុងស្រោមពោះ ហើមជើង…)

– មានពេលខ្លះអ្នកជំងឺបានរកឃើញដុំសាច់មហារីកថ្លើមនេះ ដោយការពិនិត្យមើលអេកូពោះ (Medical checkup)…។

ឃ) ការធ្វើរោគវិនិច្ឆ័យ៖

យើងអាចធ្វើឡើងបានតាមរយៈ

– ការសាកសួរអំពីប្រវត្តិរបស់ជំងឺ

– ការពិនិត្យរបស់វេជ្ជបណ្ឌិត (Physical examination)

– ការធ្វើអេកូពោះរកមើលដុំសាច់ថ្លើម

– ការពិនិត្យឈាមមើលជាតិ AFP ដែលជា Tumors marker

– ការចាក់យកសាច់ថ្លើមទៅវិភាគ (Hepatic biopsy)

– ការធ្វើស្កាន់នែពោះដោយចាក់ថ្នាំ (Injection abdominal CT scan) ។

ង)ការព្យាបាល៖

វិធីសាស្ត្រនៃការព្យាបាលមានដូចជា ការវះកាត់, ការចាក់បញ្ចូលជាតិអាល់កុល និង សារជាតិគីមី (Chemo embolisation) ដើម្បីកម្ទេចដុំសាច់មហារីកនេះ និងការប្រើប្រាស់ថ្នាំដើម្បីជួយពន្យារការលូតលាស់របស់ដុំសាច់នេះ។ គោលបំណងសំខាន់របស់ការព្យាបាលទាំងអស់នេះ គឺដើម្បីលើកកម្ពស់ការស់នៅរបស់អ្នកជំងឺ និងពន្យារពេលនៃការរស់នៅរបស់អ្នកជំងឺឲ្យបានកាន់តែយូរបំផុតតាមលទ្ធភាពដែលអាចធ្វើទៅបាន។

បច្ចុប្បន្ននេះមានការព្យាបាលទំនើបថ្មីមានដូចជា៖

១. ការព្យាបាលដោយថ្នាំឆ្លាតកម្ទេចហ្សែន អាចពន្យាជីវិតអ្នកជំងឺបានយូរដល់២ឆ្នាំភាគច្រើន ហើយគុណភាពជីវិតរបស់អ្នកជំងឺប្រសើរជាងការមិនព្យាបាលឆ្ងាយណាស់។ អ្នកជំងឺភាគច្រើនរស់នៅដូចមនុស្សធម្មតា មិនមានការឈឺចាប់អ្វីទាំងអស់។

២. មហារីកថ្លើមដំណាក់កាលដំបូងៗ ការព្យាបាលដោយវះកាត់ប្តូរថ្លើមថ្មី បន្ទាប់មកបន្តការព្យាបាលដោយថ្នាំឆ្លាត រយៈពេល២ឆ្នាំ អ្នកជំងឺរស់បានលើសពី៥ឆ្នាំ ៥០%។

បញ្ជាក់៖ ការប្រើប្រាស់ថ្នាំគីមីចាក់តាមសរសៃ (Chemotherapy) និងការបាញ់កាំរស្មី (Radiotherapy) ទៅលើដុំសាច់មហារីកនេះ គឺមិនមានចម្លើយល្អជាវិជ្ជមាននោះទេសម្រាប់ប្រភេទនៃដុំមហារីកមួយនេះ។ ជំងឺមហារីកថ្លើមមិនអាចបង្ការបាន100%ទេ។

“ដំបូន្មានរបស់ក្រុមការងារវេជ្ជបណ្ឌិតឯកទេសនៃមន្ទីរពេទ្យកាល់ម៉ែត គឺមានតែការបង្ការ និងការពារតែមួយគត់ ដែលជាវិធីល្អបំផុតសម្រាប់គ្រប់អ្នកជំងឺ។ ការព្យាបាលមេរោគរលាកថ្លើមប្រភេទ បេ និង សេ ឲ្យបានត្រឹមត្រូវ និងប្រាកដប្រជា មុនពេលវិវត្តទៅដល់ដំណាក់កាលក្រិនថ្លើមនេះ ការចាក់ថ្នាំបង្ការការពារមេរោគរលាកថ្លើមប្រភេទ បេ ពីដំបូងទី និងជៀសវាងការពិសាគ្រឿងស្រវឹងរយៈពេលយូរជាដើម គឺជាវិធានការដ៏ប្រសើរបំផុត”៕

អត្ថបទ៖ រស្មី

សូមចុចអាន៖ តើជំងឺបូសថ្លើម បណ្តាលមកពីអ្វី?

The post ការព្យាបាលជំងឺដុំមហារីកថ្លើម សម័យទំនើប ! appeared first on Kampuchea Thmey Daily.

តើជំងឺបូសថ្លើម បណ្តាលមកពីអ្វី?

Sorn Phanith — Tue, 06 Apr 2021 01:27:02 +0000

បូសថ្លើម ជាការរលាកថ្លើម ដែលបណ្ដាលមកពីមេរោគឡើងតាមទឹកប្រម៉ាត់។ បូសថ្លើមច្រើនកើតលើមនុស្រដែលមានអាយុ ៥០-៦០ឆ្នាំ ហើយគេសង្កេតឃើញថា មនុស្សប្រុសអាចកើតមានច្រើនជាងមនុស្រី។

ក) ការចម្លងរោគតាម៖

– ផ្លូវទឹកប្រម៉ាត់(៣០%-៧០%)

– សរសៃវ៉ែន Porte(១០%-២០%)

– សរសៃឈាមក្រហម(១០%-១៥%)

– ការរលាកនៅជិតខាងថ្លើម(១%-៥%)

– ការប៉ះទង្គិចលើថ្លើម(១%-៣%)

– Abcès cryptogénétique(១០%-៤០%)

ខ) មេរោគបង្កហេតុ៖

– អាអេរ៉ូប៊ីក្រាម អវិជ្ជមាន (Aérobie à gram négatif): ៤0%-៦0%

– អាអេរ៉ូប៊ីក្រាម វិជ្ជមាន (Aérobie à gram positif): ១0%-២0%

– អាណាអេរ៉ូប៊ីក្រាម (Anaérobie): ៣៥%-៤៥%

– ប៉ូលីមីក្រូបប៊ីស (Polymicrobisme): ២០%-៦០%

– ពពួកមេរោគពិសេស (១%)

គ) រោគវិនិច្ឆ័យ៖

– គ្លីនិច៖

• គ្រុនក្តៅរហូតដល់ញាក់

• ឈឺចុកចាប់នៅក្រោមឆ្អឹងជំនីខាងស្ដាំ

• សភាពទូទៅអ្នកជំងឺស្រុតចុះយ៉ាងខ្លាំង

• ថ្លើមរីកធំ ធ្លាក់ចុះក្រោមឆ្អឹងជំនីចាងស្ដាំ

• លឿងគ្រាប់ភ្នែក ស្បែក ២០%-៥០%

• ទឹកស្រោមសួតខាងស្តាំ ហត់ ក្អក

– ពិនិត្យឈាម៖

• គ្រាប់ឈាមសកើនឡើង

• CRP កើនឡើង

• Phosphatase alcalin កើនឡើង

• Taux prothrombine អូសបន្លាយ

– រូបភាពវេជ្ជសាស្ត្រ៖

• RX សួត : មានទឹកក្រោមសួតខាងស្តាំ និង សន្ទះទ្រូងផ្នែកស្ដាំឡើងខ្ពស់

• Echographie : គេដឹងពីចំនួន ទំហំ ទីតាំងនៃបូសថ្លើម

ឃ) ការព្យាបាល ៖

– ការប្រើឱសថ

– ការចោះបង្ហូរខ្ទុះ (Ponction percutanée) ជាវិធីមួយកំពុងពេញនិយមនៅមន្ទីរពេទ្យកាល់ម៉ែត ដោយសហការជាមួយផ្នែករូបភាពវេជ្ជសាស្ត្រ

– ការវះកាត់បង្ហូរបូសថ្លើម (Laparotomie)

«សូមមេត្តាមកពិគ្រោះយោបល់ជាមួយក្រុមវេជ្ជបណ្ឌិតជំនាញនៃមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យច្បាស់លាស់ និងទទួលការព្យាបាលវះកាត់បានទាន់ពេលវេលា»៕

អត្ថបទ៖ រស្មី

សូមចុចអាន៖ ស្វែងយល់អំពី ជំងឺដុំសាច់របស់ស្រោមខួរក្បាល!

The post តើជំងឺបូសថ្លើម បណ្តាលមកពីអ្វី? appeared first on Kampuchea Thmey Daily.

ខ្លីៗអំពីដំណាក់កាលផ្សេងៗ នៃការព្យាបាលជំងឺរលាកថ្លើមប្រភេទ បេ!

Sorn Phanith — Mon, 05 Apr 2021 01:11:55 +0000

យើងសង្កេតឃើញថាជំងឺក្រិនថ្លើម និងដុំសាច់មហារីកថ្លើម មានអត្រាកើនឡើងជាលំដាប់។

ជំងឺនេះបង្កឡើងដោយមូលហេតុចម្បងបីគឺ៖

– វីរុសរលាកថ្លើមប្រភេទ B ឬ C

– ការបរិភោគស្រាច្រើនហួសកម្រិតជាដើម

– ការប្រើប្រាស់ថ្នាំច្រើនហួសកម្រិត និងរយៈពេលវែង

នៅប្រទេសកម្ពុជាយើង វីរុសរលាកថ្លើមប្រភេទ B មានអត្រាច្រើនជាង ហើយក៏ជាមូលហេតុដ៏ចម្បង ដែលបង្កជាជំងឺមហារីកថ្លើម។ ការយល់ដឹងពីវិធីសាស្ត្រនៃការព្យាបាល ជាគោលសំខាន់ៗ សម្រាប់វីរុសរលាកថ្លើមប្រភេទ B នេះ គឺមានសារសំខាន់បំផុត។

ការព្យាបាលជំងឺរលាកថ្លើមប្រភេទ B នេះមាន ២ ដំណាក់កាលសំខាន់គឺ៖

១- ដំណាក់កាលទី ១៖ ការប្រើថ្នាំដើម្បីកម្ចាត់វីរុស មិនឲ្យមានវីរុសក្នុងឈាមទៀត ដែលជាទូទៅវាត្រូវការរយៈពេលចាប់ពី ៣ខែ ទៅ៦ខែ ទៅតាមបរិមាណនៃចំនួនវីរុស។ ប៉ុន្តែពេលដែលអស់វីរុសនេះ មិនមែនមានន័យថា អ្នកជំងឺបានជាសះស្បើយនោះទេ ព្រោះវានៅមានវីរុសនៅជាប់នឹងកោសិកាថ្លើមរបស់យើង ដែលវាអាចបង្កើតវីរុសមកវិញបានគ្រប់ពេល។

២- ដំណាក់កាលទី ២៖ ការគ្រប់គ្រងកុំឲ្យមានវីរុសឡើងវិញ។ ដំណាក់កាលនេះមានសារៈសំខាន់ណាស់ ដើម្បីទប់កុំឲ្យ មានការផលិតវីរុសនេះចូលមកក្នុងឈាមវិញ ដែលអាចបង្កឲ្យខូចសាច់ថ្លើមបន្តទៀត។ ការព្យាបាលនេះវាត្រូវការរយៈពេល អាចពី ១ឆ្នាំ ទៅ ៥ឆ្នាំ ព្រោះវាអាស្រ័យលើប្រព័ន្ធការពាររបស់យើង ថាអាចបង្កើតអង់ទីករបានឬទេ (ជាទូទៅមានប្រហែល ៥%ប៉ុណ្ណោះ ដែលអ្នកទទួលការព្យាបាល អាចមានការកកើតប្រព័ន្ធការពារវីរុសនេះ) បើអង់ទីករដុះ និងមានចំនួនគ្រប់គ្រាន់ទើបយើងអាចបញ្ឈប់ការព្យាបាលបាន។

ទោះយ៉ាងណាក៏ដោយ លោក លោកស្រីមិនត្រូវអស់សង្ឃឹមនោះទេ ព្រោះថាបើអនុវត្តន៍តាមដានពិនិត្យ និងព្យាបាលបានត្រឹមត្រូវ គ្រូពេទ្យជំនាញអាចជួយព្យាបាលជំងឺថ្លើមបាន ដោយជៀសវាងពីការក្រិន និងមានដុំសាច់ក្នុងថ្លើម។

“ប្រសិនបើលោក លោកស្រីមានបញ្ហាប្រឈមដូចខាងលើនេះ សូមមេត្តាប្រញាប់មកពិគ្រោះជាមួយក្រុមការងារវេជ្ជបណ្ឌិតឯកទេសជំនាញនៃមន្ទីរពេទ្យកាល់ម៉ែត ដើម្បីទទួលបានរោគវិនិច្ឆ័យ និងវិជ្ជាសាស្ត្រនៃការព្យាបាលឲ្យបានឆាប់រហ័ស ប្រសិទ្ធភាពខ្ពស់”៕

អត្ថបទ៖ រស្មី

សូមចុចអាន៖ សារៈប្រយោជន៍នៃការឈប់ពិសាបារី!

The post ខ្លីៗអំពីដំណាក់កាលផ្សេងៗ នៃការព្យាបាលជំងឺរលាកថ្លើមប្រភេទ បេ! appeared first on Kampuchea Thmey Daily.

សូមប្រុងប្រយ័ត្ន លោកអ្នកអាចនឹងកំពុងកើតជំងឺមហារីកថ្លើមដោយមិនដឹងខ្លួនបាន!

Sorn Phanith — Mon, 29 Mar 2021 01:13:54 +0000

១). អ្វីទៅជាជំងឺមហារីកថ្លើម?

ជំងឺមហារីកថ្លើម កើតចេញពីសាច់ថ្លើមខ្លួនឯង ឬមួយក៏ឆ្លងរាលដាលពីសរីរៈដទៃ(Métastase)។ ជំងឺមហារីកថ្លើមមានច្រើនប្រភេទ ក្នុងចំណោមនោះមានតែមួយប្រភេទប៉ុណ្ណោះ ដែលកើតមានញឹកញាប់ និងកាចសាហាវជាងគេ គឺជាពួកប្រភេទកើតចេញពីកោសិកាថ្លើមដែលក្រិនឈ្មោះថា CHC (Carcinome Hépato-Cellulaire)។

២). មូលហេតុអ្វីខ្លះដែលបង្កជាជំងឺមហារីកថ្លើម?

កត្តាមួយចំនួន ដែលជាមូលហេតុបង្កជាជំងឺមហារីកថ្លើមមាន៖

– ពិសាស្រា និងបារី ដែលបង្កឲ្យក្រិនថ្លើម

– ជំងឺរលាកថ្លើម បេ និង សេ (B, C)

– ជំងឺទឹកនោមផ្អែម បារ៉ាស៊ីត ថ្នាំពន្យារកំណើត

– វិទ្យុសកម្ម

– សារធាតុគីមីមួយចំនួន

– ការសាយភាយពីសរីរាង្គដទៃ

៣). តើជំងឺមហារីកថ្លើមមានរោគសញ្ញាអ្វីខ្លះ?

ជាទូទៅក្នុងដំណាក់កាលដំបូង វាមិនស្តែងចេញជាអាការៈអ្វីនោះទេ ហើយមានរោគសញ្ញាមួយចំនួន ដែលសង្កេតឃើញក្នុងដំណាក់កាលជ្រៅទៅហើយដូចជា៖

– ឈឺពោះ

– អស់កម្លាំង មិនសូវឃ្លាន ស្លេកស្លាំង ស្រកទម្ងន់

– មានដុំ ដោយស្ទាបប៉ះនៅពោះ

៤). បើមានជំងឺមហារីកថ្លើម គួរធ្វើបែបណា?

មានវិធីសាស្ត្រជាច្រើន ត្រូវបានគេអនុវត្តមានដូចជា៖

– វិធីវះកាត់យកដុំចេញ ឬវះកាត់ប្តូរថ្លើម

– ការចាក់ថ្នាំគីមី ដើម្បីបិតសរសៃឈាមចិញ្ចឹមដុំសាច់

– ការដុតដុំដោយប្រើបច្ចេកទេស Radiofrequence ឬ Micro-onde ករណីដុំនៅតូច

– បាញ់កាំរស្មី

៥). តើមានវិធីការពារឬទេ?

យើងអាចអនុវត្តវិធីមួយចំនួន ដើម្បីការពារជំងឺមហារីកថ្លើម៖

– ចាក់វ៉ាក់សាំងការពារជំងឺរលាកថ្លើម

– បញ្ឈប់ការពិសាស្រា និងបារី

– តាមដានសុខភាព ចំពោះការប្រើថ្នាំពន្យារកំណើត

– កាត់បន្ថយការប្រើប្រាស់ និងឃ្លាតឲ្យឆ្ងាយពីសម្ភារៈ និងទីតាំងមានរលកវិទ្យុសកម្ម ដែលប៉ះពាល់ដល់សុខភាព។

ជាទូទៅជំងឺមហារីកថ្លើមច្រើនកើតឡើងដោយស្ងៀមស្ងាត់ ហេតុដូចនេះត្រូវគប្បីតានដានសុខភាពជាប្រចាំ និងពិគ្រោះយោបល់ជាមួយវេជ្ជបណ្ឌិតឯកទេសនៃមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យ និងព្យាបាលឲ្យបានទាន់ពេលវេលា ប្រកបដោយប្រសិទ្ធភាព៕

អត្ថបទ៖ រស្មី

សូមចុចអាន៖ តើគួរធ្វើយ៉ាងណា ពេលអ្នកតឹងច្រមុះ និងហៀរសំបោរ?

The post សូមប្រុងប្រយ័ត្ន លោកអ្នកអាចនឹងកំពុងកើតជំងឺមហារីកថ្លើមដោយមិនដឹងខ្លួនបាន! appeared first on Kampuchea Thmey Daily.

សុខភាពថ្លើម Archives - Kampuchea Thmey Daily

អនុវត្ដប៉ុន្មានចំណុចនេះបាន នឹងជួយឲ្យថ្លើមមាន សុខភាពល្អ

ការ​រលាក​ថ្លើម​ធ្ងន់ធ្ងរ​ដោយសារ​គ្រឿង​ស្រវឹង​!

ផល​គ្រោះ​ថ្នាក់​របស់​ជំងឺ​ថ្លើម​ប្រភេទ បេ សេ និងការវិវត្តន៍​ទៅ​ជំងឺ​ក្រិន​ថ្លើម ឬ​ដល់​អាយុ​ជីវិត

ការ​យល់​ដឹង​ពី​ស្ដ្រី​មាន​ផ្ទៃ​ពោះ និង​ទារក ជា​មួយ​ជំងឺ​ថ្លើម​ប្រភេទ បេ

ការព្យាបាល​ជំងឺ​ដុំ​មហារីក​ថ្លើម សម័យ​ទំនើប !

តើ​ជំងឺ​បូស​ថ្លើម​ បណ្តាលមកពី​អ្វី​?

ខ្លីៗ​អំពី​ដំណាក់កាល​ផ្សេងៗ នៃ​ការព្យាបាល​ជំងឺ​រលាក​ថ្លើម​ប្រភេទ បេ​!

សូម​ប្រុងប្រយ័ត្ន លោកអ្នក​អាច​នឹង​កំពុង​កើត​ជំងឺមហារីក​ថ្លើម​ដោយ​មិនដឹង​ខ្លួន​បាន​!

ការរលាកថ្លើមធ្ងន់ធ្ងរដោយសារគ្រឿងស្រវឹង!

ផលគ្រោះថ្នាក់របស់ជំងឺថ្លើមប្រភេទ បេ សេ និងការវិវត្តន៍ទៅជំងឺក្រិនថ្លើម ឬដល់អាយុជីវិត

ការយល់ដឹងពីស្ដ្រីមានផ្ទៃពោះ និងទារក ជាមួយជំងឺថ្លើមប្រភេទ បេ

ការព្យាបាលជំងឺដុំមហារីកថ្លើម សម័យទំនើប !

តើជំងឺបូសថ្លើម បណ្តាលមកពីអ្វី?

ខ្លីៗអំពីដំណាក់កាលផ្សេងៗ នៃការព្យាបាលជំងឺរលាកថ្លើមប្រភេទ បេ!

សូមប្រុងប្រយ័ត្ន លោកអ្នកអាចនឹងកំពុងកើតជំងឺមហារីកថ្លើមដោយមិនដឹងខ្លួនបាន!