នៅក្នុងអត្ថបទវិភាគដ៏វែងមួយដែលត្រូវបានចុះផ្សាយនៅលើគេហទំព័រ New Mandala កាលពីថ្ងៃទី១២ ខែមិថុនា លោក Richard បានកត់សម្គាល់ពីការព្យាយាមប្រើប្រាស់សម្ពាធសេដ្ឋកិច្ចរបស់ថៃលើកម្ពុជា កាលពីពាក់កណ្តាលឆ្នាំ២០២៥ តាមរយៈការបិទច្រកព្រំដែនពាណិជ្ជកម្ម កាត់ផ្តាច់ចរន្តអគ្គិសនី ប្រព័ន្ធអ៊ីនធឺណិត និងការរឹតបន្តឹងលើការនាំចូលប្រេងឥន្ធនៈ។ ទោះជាយ៉ាងណា យុទ្ធសាស្ត្រនេះត្រូវបានចាត់ទុកថា «បរាជ័យ»។

លោកបានស្រង់សម្តីមេបញ្ជាការកងទ័ពភាគភូមិភាគទី២ របស់ថៃ ឧត្តមសេនីយ៍ Boonsin Padklang ដែលបានថ្លែងកាលពីខែកញ្ញាថា៖ «វាគឺជាយុទ្ធសាស្ត្រដែលផ្តល់ឱ្យប្រទេសថៃនូវអត្ថប្រយោជន៍នៅក្នុងការប្រយុទ្ធ… សន្តិសុខជាតិត្រូវតែមានអាទិភាពលើអត្ថប្រយោជន៍សេដ្ឋកិច្ចរយៈពេលខ្លី រួមទាំងពាណិជ្ជកម្មប្រេងឥន្ធនៈ អាហារ ស៊ីម៉ងត៍ និងទំនិញផលិតផ្សេងទៀត»។

អ្នកវិភាគរូបនេះក៏បានលើកឡើងពីវិធានការតបតវិញរបស់កម្ពុជាផងដែរ ដូចជាការរឹតបន្តឹងការនាំចូលទំនិញ និងប្រេងពីរដ្ឋភិបាល ការអំពាវនាវឱ្យមានការធ្វើពហិការស្ម័គ្រចិត្តលើទំនិញប្រើប្រាស់របស់ថៃ និងការជំរុញឱ្យពលករខ្មែរត្រឡប់មកមាតុភូមិវិញ។ លោកសង្កត់ធ្ងន់ថា កម្ពុជាបានបង្ហាញពីភាពធន់ និងអាចឆ្លងកាត់វិបត្តិនេះបានយ៉ាងល្អ ដោយរក្សាបាននូវអត្រាកំណើនសេដ្ឋកិច្ចក្នុងរង្វង់ ៥% ព្រមទាំងមិនមានការឡើងថ្លៃទំនិញ ឬប្រេងឥន្ធនៈហួសហេតុនោះឡើយ។

មូលហេតុចម្បងដែលធ្វើឱ្យកម្ពុជាអាចទប់ទល់នឹងសម្ពាធសេដ្ឋកិច្ចនេះបាន គឺដោយសារតែក្នុងរយៈពេល ៥ ទៅ ១០ ឆ្នាំចុងក្រោយនេះ កម្ពុជាបានកាត់បន្ថយការពឹងផ្អែកលើថៃ ដោយងាកទៅពង្រឹងពាណិជ្ជកម្មយ៉ាងខ្លាំងជាមួយ ចិន វៀតណាម និងអាមេរិក ដែលអាចមើលឃើញថាទំហំនាំចូលពីចិន និងវៀតណាមបានវ៉ាដាច់ថៃទៅហើយ។ បន្ថែមលើនេះ កម្ពុជាក៏បានស្វែងរកប្រភពថាមពលជំនួសយ៉ាងរហ័ស រួមទាំងការទិញប្រេងឥន្ធនៈពីសិង្ហបុរី និងម៉ាឡេស៊ី ព្រមទាំងការតភ្ជាប់បណ្តាញអគ្គិសនីផ្ទៃក្នុង និងជាមួយវៀតណាម។

ទោះជាយ៉ាងណា លោក Richard ក៏បានកត់សម្គាល់ថា សម្ពាធសេដ្ឋកិច្ចពីថៃបានជះឥទ្ធិពលអវិជ្ជមានខ្លះៗដែរ ជាពិសេសនៅតំបន់ព្រំដែនភាគខាងលិច ដូចជាវិស័យកសិកម្ម ការកម្សាន្ត និងលំហូរត្រឡប់នៃពលករ ប៉ុន្តែវាមិនបានធ្វើឱ្យប៉ះពាល់ដល់សេដ្ឋកិច្ចជាតិទាំងមូលទេ ព្រោះមជ្ឈមណ្ឌលជំរុញសេដ្ឋកិច្ចចម្បងៗរបស់កម្ពុជាស្ថិតនៅរាជធានីភ្នំពេញ ខេត្តកណ្តាល និងខេត្តព្រះសីហនុ។

ផ្ទុយទៅវិញ ក្រុមហ៊ុនថៃខ្លួនឯងទេដែលកំពុងរងគ្រោះពីសម្ពាធរបស់រដ្ឋាភិបាលខ្លួនឯង ដោយអាជីវកម្មថៃនៅតាមបណ្តោយព្រំដែនកំពុងខាតបង់ ហើយក្រុមហ៊ុនថៃធំៗ (ដូចជា PTT) ក៏កំពុងតស៊ូយ៉ាងលំបាកដើម្បីរក្សាទីផ្សាររបស់ខ្លួននៅកម្ពុជា ដោយគ្មានសញ្ញាណាមួយថាអ្នកនយោបាយថៃនឹងជួយពួកគេនោះឡើយ។

លោក Richard Yarrow បានសន្និដ្ឋានថា បច្ចុប្បន្នការប្រើប្រាស់សម្ពាធសេដ្ឋកិច្ចអវិជ្ជមាន (ដូចជាការដាក់ទណ្ឌកម្ម ឬបិទច្រកពាណិជ្ជកម្ម) ដាក់ប្រទេសជិតខាង គឺលែងសូវមានប្រសិទ្ធភាពទៀតហើយនៅអាស៊ីអាគ្នេយ៍ ព្រោះប្រទេសរងគ្រោះមានភូមិសាស្ត្រជាប់ប្រទេសច្រើន និងមានហេដ្ឋារចនាសម្ព័ន្ធល្អ ដែលអាចឱ្យពួកគេប្តូរដៃគូពាណិជ្ជកម្មបានយ៉ាងងាយស្រួល។

គួរបញ្ជាក់ថា រហូតមកដល់ពេលនេះ ព្រំដែនគោកកម្ពុជា និងថៃត្រូវបានបិទជិតជិត ១ ឆ្នាំហើយ បន្ទាប់ពីមានភាពរកាំរកូសនឹងគ្នា។ កម្ពុជាបានហាមឃាត់ការនាំចូលបន្លែ ផ្លែឈើ និងប្រេងឥន្ធនៈពីប្រទេសថៃ ហើយការនាំចូលទំនិញថៃតាមព្រំដែនគោកខុសច្បាប់ក៏ត្រូវបានរឹតបន្តឹងយ៉ាងខ្លាំង។

ប្រមុខរដ្ឋស្តីទី សម្តេចតេជោ ហ៊ុន សែន បានសរសេរនៅលើបណ្តាញសង្គមរបស់សម្តេចថា រាល់ទំនិញថៃដែលលួចឆ្លងកាត់ព្រំដែនគោកទាំងអស់ គឺជាទំនិញបំផ្លាញជាតិ និងប្រមាថជាតិ។

សម្តេចបានសរសេរយ៉ាងដូច្នេះថា៖ «អ្នកប្រើប្រាស់គឺជាចៅហ្វាយ កុំមានប្រាក់ទិញហើយទុកឱ្យគេមើលងាយទាំងសាមីខ្លួនទាំងជាតិសាសន៍»។

អត្ថបទដោយ៖ ហ៊ុន សិរីវឌ្ឍន៍

The post អ្នកស្រាវជ្រាវគោលនយោបាយ​តំបន់ថា ថៃបរាជ័យក្នុងការប្រើប្រាស់យុទ្ធសាស្ត្រសម្ពាធសេដ្ឋកិច្ចដាក់កម្ពុជា appeared first on Kampuchea Thmey Daily.

លោកស្រី ជា សិរី បានលើកឡើង ក្នុងពេល​ចូលរួមជាវាគ្មិន​កិត្តិយសនៅ​ក្នុងកិច្ចពិភាក្សា​ក្នុងវេទិកា Nikkei Forum ​ស្តីពីអនាគតអាស៊ី ក្រោមប្រធានបទ “អាស៊ាន+៣៖ ការពង្រឹងកិច្ចស​ហ​ប្រតិបត្តិការ​ក្នុងតំបន់ ដើម្បីរួមចំណែក​ក្នុងស្ថិរភាពសកល” នៅរថ្ងៃទី ១០ មិថុនា ឆ្នាំ២០២៦ នៅទីក្រុងតូក្យូ ប្រទេស​ជប៉ុន​។

​លោកស្រីទេសាភិបាល ​បានលើកឡើងពីទំនាក់ទំនងនៃកត្តាខាងក្រៅ​ ចំពោះប្រទេសដែល​មានសេដ្ឋកិច្ច​បើកចំហ និងកម្រិតដុល្លារូបនីយកម្មខ្ពស់។ ​

​លោកស្រី ​ជា សិរី ​បាន​លើកឡើងពីការប្តេជ្ញាចិត្ត​ខ្ពស់​របស់​រាជរដ្ឋាភិបាល​ក្នុង​ការ​ពង្រីក​ការ​ផ្គត់ផ្គង់​ថាមពលកកើតឡើងវិញ ​ដែលជាការរួមចំណែកកាត់បន្ថយផល​ប៉ះពាល់ពីកត្តា​ខាងក្រៅ​ក្នុងវិស័យ​ថាមពល។​

​បើតាម​លោកស្រី ​ជា សិរី ប្រព័ន្ធហិរញ្ញវត្ថុដែលដំណើរការប្រកបដោយ​ប្រសិទ្ធភាពគឺជាមូលដ្ឋាន​គ្រឹះ​ដ៏រឹងមាំសម្រាប់ការរីកចម្រើន និងភាពធន់នៃសេដ្ឋកិច្ច។​

លោកស្រីក៏​បានលើកឡើងពីកិច្ចខិតខំប្រឹងប្រែង​របស់ធនាគារជាតិនៃកម្ពុជា​ក្នុងការជំរុញការទូ​ទាត់ឌីជីថល និងការតភ្ជាប់ប្រព័ន្ធទូទាត់ឆ្លងដែនដែល​បច្ចុប្បន្នបានតភ្ជាប់​ជាមួយប្រទេស​ជាច្រើន​ក្នុងតំបន់ ដើម្បីគាំទ្រដល់ការអភិវឌ្ឍវិស័យពាណិជ្ជកម្ម និងទេសចរណ៍។ ​

​បន្ថែមលើនេះ ​លោកស្រីក៏បានបញ្ជាក់ពីសារៈសំខាន់នៃហិរញ្ញប្បទានប្រកបដោយចីរភាព និង​ការ​ពង្រឹងភាពធន់ទៅនឹងការប្រែប្រួលអាកាសធាតុ ផងដែរ៕​

អត្ថបទ៖ ឡេង ដេត

The post ​កម្ពុជា​ ពង្រឹង​មូលដ្ឋាន​សេដ្ឋកិច្ច​ តាមរយៈ​ការធ្វើ​ពិពិធកម្មផលិតផល ​និង​ទីផ្សារ​នាំចេញ​ appeared first on Kampuchea Thmey Daily.

លោក ប៊ូ ច័ន្ទភីរូ បានបន្តថា ទោះបីជាសេដ្ឋកិច្ចសកលលោកបន្តជួបប្រទះនូវបញ្ហាប្រឈមយ៉ាងណាក្ដី សេដ្ឋកិច្ចកម្ពុជា អាចរក្សាបាននូវកំណើនល្អប្រសើរ ដែលស្ថិតក្នុងរង្វង់ ៦% ក្នុងឆ្នាំ ២០២៤។ ស្របតាម “យុទ្ធសាស្រ្តបញ្ចកោណដំណាក់កាលទី ១” និង “យុទ្ធសាស្រ្តអភិវឌ្ឍន៍វិស័យហិរញ្ញវត្ថុឆ្នាំ ២០២៥-២០៣០” របស់រាជរដ្ឋាភិបាលកម្ពុជា វិស័យធានារ៉ាប់រងនៅកម្ពុជា បាននិងកំពុងដើរតួនាទីជាសមាភាគមួយដ៏សំខាន់ ក្នុងការរួមចំណែកគាំទ្រដល់កំណើនសេដ្ឋកិច្ចជាតិ ពិសេសទ្រទ្រង់ប្រព័ន្ធសន្តិសុខសង្គម តាមរយៈការបង្កើតជាសំណាញ់សុវត្ថិភាព និងការបង្កើនភាពធន់ផ្នែកហិរញ្ញវត្ថុប្រឈមនឹងហានិភ័យដែលត្រូវបានធានាជូនបណ្ដាប្រជាពលរដ្ឋ គ្រួសារ និងម្ចាស់អាជីវកម្មនានា។

លោកបញ្ជាក់ថា តាមរយៈការអង្កេត និងវាយតម្លៃរបស់និយ័តករធានារ៉ាប់រងកម្ពុជាមានកត្តាចំនួន ៣ ដែលបណ្ដាលឲ្យការអនុវត្តការធានារ៉ាប់រងជាកាតព្វកិច្ចនៅមានកម្រិតទាបរួមមាន ៖ ទី១.ម្ចាស់យានយន្ត ម្ចាស់អាជីវកម្មដែលប្រកបអាជីវកម្មដឹកជញ្ជូន និងម្ចាស់ការដ្ឋាន ពុំទាន់បានជ្រាបពីកាតព្វកិច្ចដែលត្រូវទិញធានារ៉ាប់រងសម្រាប់ការប្រកបអាជីវកម្ម។ ទី២.ការផ្សព្វផ្សាយពីការអនុវត្តការធានារ៉ាប់រងជាកាតព្វកិច្ចដល់សាធារណជន ព្រមទាំងតួអង្គពាក់ព័ន្ធ ពុំទាន់មានភាពទូលំទូលាយ និងទី៣.ក្រសួង-ស្ថាប័នដែលមានសមត្ថកិច្ចអនុវត្ត ពុំទាន់ជ្រាបច្បាស់ពីកាតព្វកិច្ច នៃការអនុវត្តការធានារ៉ាប់រងនេះនៅឡើយ។

ក្នុងឱកាសនោះដែរ លោក លី សារី អភិបាលរងខេត្តសៀមរាប បានបង្ហាញនូវជំនឿយ៉ាងមុតមាំថា ការធានារ៉ាប់រងជាកាតព្វកិច្ច ដែលមានធានារ៉ាប់រងភារៈទទួលខុសត្រូវយានយន្ត ធានារ៉ាប់រងភារៈទទួលខុសត្រូវដឹកជញ្ជូនអ្នកដំណើរ និងធានារ៉ាប់រងភារៈទទួលខុសត្រូវការដ្ឋាន ពិតជាមានសារៈសំខាន់ណាស់ក្នុងការរួមចំណែកអភិវឌ្ឍន៍សង្គមសេដ្ឋកិច្ចរបស់ខេត្តសៀមរាប តាមរយៈការផ្តល់សេវាធានារ៉ាប់រងជូនដល់ម្ចាស់អាជីវកម្មដឹកជញ្ជូនទំនិញ និងអ្នកដំណើរ ម្ចាស់ការដ្ឋានសាងសង់ សហគ្រាស សិប្បកម្ម និងរោងចក្រ ដែលប្រកបអាជីវកម្មក្នុងមូលដ្ឋានខេត្តសៀមរាប មានតម្រូវការដឹកជញ្ជូនផលិតផលរបស់ខ្លួនទៅកាន់ទីផ្សារនៅតាមបណ្ដារាជធានី-ខេត្តដទៃទៀត និងឆ្លងកាត់ព្រំដែនផងដែរ។

គួរជម្រាបថា ដើម្បីចូលរួមពង្រឹងការអនុវត្តច្បាប់ និយ័តករធានារ៉ាប់រងកម្ពុជា បានរៀបចំ “ផែនការយុទ្ធសាស្ត្រអភិវឌ្ឍន៍វិស័យធានារ៉ាប់រងកម្ពុជា ២០២១-២០៣០” ដោយបានកំណត់យកការពង្រឹងការអនុវត្តការធានារ៉ាប់រងជាកាតព្វកិច្ច ជាផែនការអាទិភាពមួយតាមរយៈការជំរុញការផ្សព្វផ្សាយ និងលើកកម្ពស់ការយល់ដឹងរបស់ប្រជាពលរដ្ឋ ក៏ដូចជាស្ថាប័នមានសមត្ថកិច្ច និងស្ថាប័នពាក់ព័ន្ធ អំពី អ្វីទៅជាការធានារ៉ាប់រង? តើមានការធានារ៉ាប់រងអ្វីខ្លះ? ដែលត្រូវបានកំណត់ជាកាតព្វកិច្ចក្នុងច្បាប់៕
អត្ថបទ ៖ គឿនវេត

The post វិស័យធានារ៉ាប់រងនៅកម្ពុជា ដើរតួនាទីដ៏សំខាន់ក្នុងការរួមចំណែកគាំទ្រដល់កំណើនសេដ្ឋកិច្ចជាតិ ពិសេសទ្រទ្រង់ប្រព័ន្ធសន្តិសុខសង្គម appeared first on Kampuchea Thmey Daily.

នៅក្នុងរយៈពេល ៥ខែ ដើមឆ្នាំ ២០២៥ ទំហំពាណិជ្ជកម្មអន្តរជាតិ-កម្ពុជា សម្រេចបាន ២៥,៥ ពាន់លាន​ដុល្លារ កើន ១៨% ក្នុងនោះការនាំចេញមានតម្លៃ ១២ ពាន់លានដុល្លារ កើន ១៧,៩៨% បើធៀបនឹងរយៈពេលដូចគ្នា ឆ្នាំ ២០២៤។

ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៩០ គម្រោង កើនឡើង ១៣៧ គម្រោង និងមានទុន​វិនិយោគប្រមាណ ៤,២ ពាន់លាន ដុល្លារ កើន ១,៤ ពាន់លានដុល្លារ និងអាចបង្កើនការងារបានប្រមាណ ២០ម៉ឺនកន្លែង។

ចំនួនសហគ្រាសគ្រឹះស្ថានបានកើនពីចំនួន ៤៤ ៧៩៨ ដល់ចំនួន ៤៥ ៣៨៦ ដែលមាន​កម្មករ​និយោជិត សរុប ១,៨៧ លាននាក់ កើនប្រមាណ ៥ម៉ឺននាក់។

ការបង្កបង្កើនផលស្រូវ រដូវប្រាំង​ឆ្នាំ ២០២៥ សម្រេចបាន ៩០៧ ៨៨៩ ហិកតា លើសឆ្នាំមុន ៦៧ ៧០១ហិកតា ឯការ​ប្រមូល​ផល​ស្រូវរដូវប្រាំងសម្រេចបាន ៤ ២៥៤ ៥០៨តោន លើសឆ្នាំមុន ៤១៨ ០០០តោន ស្មើនឹង ១០,៩០%។

កម្ពុជាទទួលបានទេសចរអន្តរជាតិចំនួន ២,៩៥ លាននាក់ កើន ១១,៧% ឯទេសចរ​ជាតិ​មាន​ចំនួន ១៣,១៦ លាននាក់ កើន ៥០% ធៀបនឹងរយៈពេល ៥ខែ ឆ្នាំ ២០២៤។

ជាមួយគ្នានេះ ការ​កសាង ពង្រីកហេដ្ឋារចនាសម្ព័ន្ធរូបវន្ត ដូចជា ហេដ្ឋារចនា​សម្ព័ន្ធតាម​ព្រំដែន ប្រព័ន្ធ​ធារា​សាស្ត្រ ផ្លូវ ស្ពាន អគ្គិសនី ព្រែកជីក កំពង់ផែ ព្រលានយន្តហោះ បច្ចេកវិទ្យា​គមនាគមន៍ និង​ព័ត៌មាន៕

The post ម៉ាក្រូសេដ្ឋកិច្ចរក្សាស្ថិរភាពល្អ នៅក្នុងឆមាសទី១ ឆ្នាំ ២០២៥ appeared first on Kampuchea Thmey Daily.

គម្រោង​របស់​ក្រសួង​ពាណិជ្ជកម្ម​ថៃ រៀប​ចំឡើង​ក្រោយ​មាន​ការតវ៉ាជាសាធារណៈពី​គ្រប់​ទិសទី​ ​អំពី​វត្តមាន​នៃ​វេទិកាពាណិជ្ជកម្ម​អេឡិចត្រូនិកបរទេស​ក្នុងប្រទេសថៃ ដែលបង្ក​ឱ្យ​មាន​លំហូរចូល​នៃ​ផលិតផល​ក្រោម​ស្តង់ដារថោកៗ​កាន់តែច្រើន ហើយ​​បង្កគ្រោះថ្នាក់ដល់អ្នកប្រើប្រាស់ និងផល​ប៉ះពាល់​ SMEs ក្នុងស្រុក​។

អនុរដ្ឋមន្ត្រីក្រសួងពាណិជ្ជកម្ម លោក Napintorn Srisunpang បាន​ថ្លែង​ថា អនុគណៈកម្មាធិការរបស់ក្រសួងដែលទទួលបន្ទុកគាំទ្រសហគ្រាសធុនតូច និងមធ្យមថៃ និងបង្ក្រាបទំនិញបរទេសដែលមានគុណភាពអន់ បានបើកកិច្ចប្រជុំកាលពីថ្ងៃព្រហស្បតិ៍ ជាមួយតំណាងទីភ្នាក់ងាររដ្ឋាភិបាលចំនួន ២០ ដើម្បីពិភាក្សាអំពីវិធានការបង្ក្រាបទំនិញទាំងនេះ ដោយបែងចែកគ្នា​ជា៣ក្រុម៖ កសិកម្ម អ្នកប្រើប្រាស់ និងឧស្សាហកម្ម។

​លោក​បន្ត​ថា ផលិតផល​កសិកម្ម​នឹង​ត្រូវ​ពិនិត្យ​រក​ប្រភព​ដើម និង​សារជាតិ​​ថ្នាំ​សម្លាប់​សត្វល្អិត ដែល​អាច​បង្ក​គ្រោះថ្នាក់​ដល់​សុខភាព​មនុស្ស។ ទំនិញប្រើប្រាស់ នឹងត្រូវបានត្រួតពិនិត្យសម្រាប់សុវត្ថិភាព និងគុណភាព ជាពិសេសទំនិញ​ដែល​ជួញដូរ​តាមរយៈប្រព័ន្ធអនឡាញ​ដូចជា Temu និង Lazada ​ជាដើម​។

ចំណែកឯ​​ទំនិញ​ឧស្សាហកម្មវិញ​ នាយកដ្ឋាន​គយ​គ្រោង​អនុញ្ញាត​ឱ្យ​មានការ​នាំ​ចូល​ទំនិញ​ ដែល​កំណត់​ដោយ​វិទ្យាស្ថាន​ស្តង់ដារ​ឧស្សាហកម្ម​ថៃ​៕

The post ថៃ​គ្រោង​បង្រ្កាប​លើ​ទំនិញថោកៗពីបរទេស​ ដោយថា​វា​ធ្វើ​ឱ្យ​ប៉ះពាល់ដល់ SMEs ក្នុងស្រុក appeared first on Kampuchea Thmey Daily.

ទិន្នន័យ​ពី​ការិយាល័យស្ថិតិជាតិ បាន​បង្ហាញថា​ អត្រាគ្មានការងារធ្វើសម្រាប់​យុវជន​អាយុពី ១៦-២៤ ឆ្នាំ​ ក្នុង​ប្រទេស​ចិន​ ដោយ​មិន​រាប់​បញ្ជូល​សិស្ស​ បាន​ធ្លាក់​ចុះ​មក​ត្រឹម​ ១៧,៦ ភាគរយ​ ក្នុង​ខែ​កញ្ញា​ ពី​ ១៨,៨ ភាគរយ​ ក្នុង​ខែ​សីហា​។​

​អត្រា​គ្មាន​ការងារធ្វើក្នុងចំណោមយុវជន និងនិស្សិតបញ្ចប់ការសិក្សានៅមហាវិទ្យាល័យ បាន​ហក់ឡើងពី ១៣,២ ភាគរយ​ ​នៅ​ខែ​មិថុនា ដល់​ ១៧,១ ភាគរយ​ នៅ​ខែ​កក្កដា​ ក្រោយ​ពេល​សិស្ស​ប្រមាណ​ ១២ លាន​នាក់ បញ្ចប់​ការ​សិក្សា​ទូទាំង​ប្រទេស​ ហើយ​ស្វែង​រក​ការងារ​ធ្វើ​។

អត្រា​​គ្មាន​ការងារ​ធ្វើ​ បាន​កើន​ឡើង​ដល់​ចំណុច​ខ្ពស់​បំផុត​នៅ​ខែ​សីហា​ រាប់តាំង​ពី​​ការិយាល័យស្ថិតិជាតិ ​សម្រេច​ផ្លាស់​ប្ដូរ​ការ​កំណត់​អត្រាគ្មាន​ការងារ​ធ្វើ​ ដោយ​មិនរាប់បញ្ចូលសិស្ស នៅ​ខែ​ធ្នូ​ ឆ្នាំ​ ២០២៣​។​

តាម​វិធីសាស្រ្ត​ចាស់​ ដែល​រាប់​បញ្ជូល​ទាំង​សិស្សសាលា អត្រាគ្មាន​ការងារ​ធ្វើ​របស់យុវជនបានកើនឡើងដល់កម្រិតខ្ពស់បំផុត ២១,៣ ភាគរយ ក្នុង​ខែ​មិថុនា​ ឆ្នាំ​ ២០២៣​។

ខណៈ​អត្រា​អត់​ការងារ​ធ្វើ​បាន​ប្រសើរ​ឡើង​ ក្រុមមន្ត្រីចិន​កាលពីសប្ដាហ៍​មុន​ ​បាន​បង្ហាញទំនុកចិត្តថា សេដ្ឋកិច្ចចិន​នឹង​បន្តមាន​ស្ថិរភាព និង​និន្នាការ​ស្ទុះងើបងើបឡើងវិញ ដែល​មាន​ក្នុង​ខែកញ្ញា»។ សេដ្ឋកិច្ច​ចិន​បាន​កើន​ឡើង​ ៤,៦ ភាគរយ​ នៅ​ត្រីមាស​ទី​៣​ឆ្នាំ​​២០២៤ ដោយ​លើស​ការ​រំពឹង​ទុក​ ៤,៥ ភាគរយ​ ប៉ុន្តែ​នៅ​តែ​យឺត​បំផុត​រាប់​តាំង​ពី​ដើម​ឆ្នាំ​ ២០២៣​។

ទោះ​ជា​យ៉ាង​ណា​ក៏ដោយ​ សេដ្ឋកិច្ច​ចិន​ស្ថិត​នៅ​ក្នុងភាព​ស្រពិច​ស្រពិល​លើ​ការ​ឆ្ពោះ​ទៅរក​គោលដៅ​ប្រចាំ​ឆ្នាំ​ ៥ ភាគរយ​ របស់​ប្រទេស​ ដែល​ជំរុញ​ឱ្យ​រដ្ឋាភិបាល​ដាក់​ចេញ​គោលនយោបាយ​ជំរុញ​សេដ្ឋកិច្ច​ផ្សេង​ៗ​៕

The post អត្រាគ្មានការងារធ្វើ​នៃយុវជនចិន​ ធ្លាក់ចុះ​មក​វិញ​ ក្រោយ​ហក់​ឡើង​២​ខែ​ជាប់​ៗ​គ្នា​ appeared first on Kampuchea Thmey Daily.

វេទទិកានេះ មានការចូលរួមពីតំណាងក្រសួងការងារ និងបណ្តុះបណ្តាលវិជ្ជាជីវៈ អគ្គនាយកដ្ឋាន អប់រំបណ្តុះបណ្តាលបច្ចេកទេស និងវិជ្ជាជីវៈ និងក្រសួងកិច្ចការនារី ក៏ដូចជាវត្តមានពីសំណាក់ដៃគូអភិវឌ្ឍនានា តំណាងវិស័យឯកជន តំណាងស្ថាប័នអប់រំបណ្តុះបណ្តាលបច្ចេកទេស និងវិជ្ជាជីវៈថ្នាក់ខេត្ត ក៏ដូចជាយុវជន និងភា គឺផ្សេងៗទៀតពីបណ្តាខេត្ត និងរាជធានី។ គម្រោង “ពង្រឹងសមត្ថភាពសេដ្ឋកិច្ចយុវជនតាមរយៈការអភិវឌ្ឍជំនាញ (YEESD)” មានគោលបំណងដើម្បីផ្តល់ជាដំណោះស្រាយទៅលើកង្វះជំនួយផ្លូវចិត្ត និងធនធានដល់យុវជនដែលងាយរងគ្រោះ ជាពិសេសស្ត្រី ដែលជំរុញឱ្យពួកគេ ទទួលបាននូវការអភិវឌ្ឍជំនាញ និងការងារសមរម្យ។

លោកស្រី គ្វីនេត វ៉ង នាយិកាប្រចាំប្រទេសរបស់អង្គការភ្លែនអន្តរជាតិកម្ពុជា បានឱ្យដឹងថា គម្រោងនេះបានផ្តោតសំខាន់ លើការផ្តល់ធនធានគ្រប់គ្រាន់ទៅកាន់យុវជនដែលងាយរងគ្រោះ ជាពិសេសស្ត្រី ដើម្បីឱ្យពួកគាត់ទទួលបាននូវការ បណ្តុះបណ្តាលបច្ចេកទេស ក៏ដូចជាបណ្តុះគំនិតជាសហគ្រិនភាព រួមនឹងការគាំទ្រ ចំណេះអំពីទីផ្សារ និងធនធាន ហិរញ្ញវត្ថុ ដើម្បីទ្រទ្រង់មហិច្ឆតាអាជីវកម្មរបស់ពួកគេ។ លោកស្រី និយាយថា៖ “គម្រោងនេះគឺផ្តោតសំខាន់លើការអប់រំសហគ្រិនភាព និងការរួមបញ្ចូលជាមួយគោលនយោបាយសិក្សាពេញមួយជីវិត។ គម្រោងនេះក៏បានបង្ហាញអំពីការស្របគ្នាជាមួយនឹងគោលនយោបាយអប់រំបណ្តុះបណ្តាលបច្ចេកទេស និងវិជ្ជាជីវៈ របស់អាស៊ានផងដែរ ជាពិសេសក្នុងការលើកកម្ពស់នូវរួមបញ្ចូលឱកាស ការងារនាពេលអនាគត និងការពង្រឹងលទ្ធភាពការងាររបស់កម្មករដែលមានជំនាញទាប ខណៈដែលសង្គមប្រឈម នឹងការរីកចម្រើននៃបច្ចេកវិទ្យា”។ លោកស្រី បន្តថា តាមរយៈការវាយតម្លៃគម្រោងជំនាញដើម្បីភាពជោគជ័យបានផ្តល់ដំណោះស្រាយទៅលើតម្រូវការរបស់ក្មេងស្រី និងបុរស ដែលបានបោះបង់ការសិក្សាពាក់កណ្តាលទី និងកំពុងតែប្រឈមមុខនឹងការខ្វះឱកាសការងារ តាមរយៈការសម្របនូវការបណ្តុះបណ្តាលបច្ចេកទេស និងវិជ្ជាជីវៈតាមចំណង់ចំណូលរបស់សិស្ស តម្រូវការសម្រាប់ទីផ្សារការងារក្នុងស្រុក និងបំណងប្រាថ្នាដើម្បីផ្គត់ផ្គង់ដល់គ្រួសាររបស់ពួកគេផ្នែកហិរញ្ញវត្ថុ។

ចំណែកកញ្ញា ផារី តំណាងយុវជនទាំង៣ខេត្ត បានលើកឡើងក្នុងវេទិកានេះថា ​ខ្លួនបានបោះបង់ការសិក្សាព្រោះតែជីវភាពគ្រួសារ​ និងទៅធ្វើជាឈ្នួលដើម្បីជួយដល់គ្រួសារ។ បន្ទាប់មកកញ្ញាក៏សម្រេចចិត្តរៀនជំនាញដើម្បីទៅប្រកបរបរដោយខ្លួនវិញ។ កញ្ញា បន្តថា តាមរយៈរៀនជំនាញនេះ ជួយឱ្យខ្លួនមានជំនាញមួយច្បាស់លាស់ក្នុងជីវិត។ បន្ថែមពីនេះ កញ្ញា ឃើញថាអ្នករៀនជំនាញមួយចំនួនជួបនូវបញ្ហាមួយចំនួនដូចជា គ្រួសារមិនគាំទ្រ ឬ រៀនហើយទៅប្រកបមុខរបរខុសជំនាញជាដើម។ កញ្ញា សង្ឃឹមថា តាមរយៈវេទិកានេះ នឹងអាចជួយរកដំណោះស្រាយដល់យុវជនងាយរងគ្រោះ និងស្ត្រី ក្នុងការស្វែងរកការងារសម្រាប់ពួកគេ។

តាមរបាយការណ៍របស់អង្គការភ្លែនបានឱ្យដឹងថា ត្រឹមឆ្នាំ២០២៣ យុវជនដែលបោះបង់ការសិក្សាជាង ១ម៉ឺននាក់ (៥០% ជាស្ត្រី) បានទទួលអត្ថប្រយោជន៍ដោយ ផ្ទាល់ពីអង្គការភ្លែនអន្តរជាតិកម្ពុជា និងដៃគូក្រសួងការងារ និងបណ្តុះបណ្តាលវិជ្ជាជីវៈ លើគម្រោងអប់រំបណ្តុះបណ្តា លបច្ចេកទេស និងវិជ្ជាជីវៈ ដោយក្នុងនោះមាន ៣៥០០នាក់ (៥១% ជាស្ត្រី) បានចូលរួមដោយផ្ទាល់ក្នុងវគ្គបណ្តុះ បណ្តាលបច្ចេកទេស និងការវាយតម្លៃជំនាញមុនការរៀន ក្នុងខេត្តសៀមរាប ត្បូងឃ្មុំ រតនគីរី និងស្ទឹងត្រែង។ ជាសរុប យុវជនជាង ៨៣% ទទួលបានការងារសមរម្យ ឬបានចាប់ផ្តើមបង្កើតអាជីវកម្មខ្នាតតូចរបស់ពួកគេ ក្នុងរយៈ ពេល៦ខែក្រោយពីរៀនចប់ ដែលតួលេខនេះគឺខ្ពស់ជាងតួលេខមធ្យមរបស់រាជរដ្ឋាភិបាលលើចំនួនយុវសិស្សដែល ទទួលបានការងារក្រោយការបណ្តុះបណ្តាល (រង្វង់ ៦០%)។ បន្ថែមពីលើនេះទៀត អង្គការភ្លែនអន្តរជាតិកម្ពុជា បានធ្វើការយ៉ាងជិតស្និទជាមួយក្រសួងការងារ និងបណ្តុះបណ្តាលវិជ្ជាជីវៈ (តាមរយៈអគ្គនាយកដ្ឋានអប់រំបណ្តុះប ណ្តាលបច្ចេកទេស និងវិជ្ជាជីវៈ) ដើម្បីពង្រឹងនូវប្រព័ន្ធ TVET ក្នុងការធ្វើឌីជីថលភាវូបនីយកម្ម និងប្រព័ន្ធ TVET បៃតង (ប្រព័ន្ធជាតិវាយតម្លៃទទួលស្គាល់ការសិក្សាពីមុនពីចម្ងាយសម្រាប់ការវាយតម្លៃផ្អែកលើសមត្ថភាព និងផ្តល់ គុណវុឌ្ឍជាតិកម្ពុជា និងបច្ចុប្បន្ននៅក្រោមការអភិវឌ្ឍឌីជីថល និងជីវិតបៃតងសម្រាប់សិស្ស TVET)៕

The post អង្គការភ្លែនរៀបចំវេទិកាពង្រឹងសមត្ថភាពសេដ្ឋកិច្ចយុវជន និងស្ត្រី ឱ្យពួកគេមានជំនាញការងារច្បាស់លាស់ appeared first on Kampuchea Thmey Daily.

លោកលើកឡើងបែបនេះ ស្របពេលដែលពិធីបុណ្យចូលឆ្នាំខ្មែរប្រពៃណីជាតិត្រូវបានបញ្ចប់ និងមានប្រជាពលរដ្ឋ រួមទាំងភ្ញៀវទេសចរបរទេសជាច្រើនសប្បាយរីករាយជាមួយនឹងការប្រារព្ធពិធីបុណ្យចូលឆ្នាំខ្មែរ ដោយមានការលេងទឹក និងប៉ាតម្សៅផងដែរ។ ត្រង់ចំណុចនេះ លោក ង៉ែត ជូ បានបញ្ជាក់ថា ការលេងទឹក និងប៉ាតម្សៅនេះ លោកមិនហ៊ានថាខុស ឬ ត្រូវនោះឡើយ លោកបានមើលឃើញពីការខាតបង់ចំនួន៣ចំណុច។

ខាតបង់ទី១ គឺផ្នែកវប្បធម៌ លោកយល់ថា ការលេងទឹក និងប៉ាតម្សៅនេះ ជាល្បែងដែលមិនបង្កប់ន័យអប់រំដូចល្បែងប្រជាប្រិយខ្មែរនោះទេ ហើយថែមទាំងធ្វើឱ្យបាត់បង់អត្តសញ្ញាណជាខ្មែរទៀតផង ប្រសិនបើយុវជនខ្មែរងប់ងុលហើយបំភ្លេចនូវអ្វីដែលជារបស់ខ្មែរ។ ទី២ ខាតបង់ផ្នែក សេដ្ឋកិច្ច ត្រង់ចំណុចនេះលោកសង្កត់ធ្ងន់ថា​ការលេងប៉ាតម្សៅ និងជះទឹក ធ្វើឱ្យប្រជាជនចំណាយលើការទុញម្សៅ និងកាំភ្លើងបាញ់ទឹក ដែលសុទ្ធតែជារបស់នាំចូល មានន័យថា លុយហូរចេញពីប្រទេស ហើយអាចមានតម្លៃសរុបរាប់សិបលានដុល្លារឯណោះ។

ក្រៅពីខាតបង់វប្បធម៌ និងសេដ្ឋកិច្ច លោក ង៉ែត ជូ ឃើញបញ្ហាបរិស្ថានក៏សំខាន់ដូចគ្នា។​ នៅពេលដែលលេងចប់ កាកសំណល់ពីការលេងជះទឹក និងប៉ាតម្សៅ នឹងក្លាយជាសមរាមរាប់តោន។ លោកក៏បានប្រៀបធៀបជាមួយនឹងប្រទេសសឹង្ហបុរី ដែលហាមមិនឱ្យប្រជាជមដុតក្រដាសសែនចិននោះទេ ព្រោះខាតបង់ទាំងសេដ្ឋកិច្ច និងបរិស្ថាន។ លោកក៏បានដាក់សំណួរថា តើកម្ពុជាអាចរៀនអ្វីខ្លះពីមេរៀនដ៏ល្អមួយនេះ?៕

The post លោក ង៉ែត ជូ យល់ឃើញថា លេងជះទឹក និងប៉ាតម្សៅធ្វើឱ្យខាតបង់វប្បធម៌ សេដ្ឋកិច្ច បរិស្ថាន appeared first on Kampuchea Thmey Daily.