ម៉ាក្រូសេដ្ឋកិច្ចរក្សាស្ថិរភាពល្អ នៅក្នុងឆមាសទី១ ឆ្នាំ ២០២៥

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា មាន​ប្រសាសន៍​ក្នុងពិធីមីទ្ទីងរំឮកខួប ទី៧៤ ថ្ងៃបង្កើតគណបក្សប្រជាជនកម្ពុជា នៅថ្ងៃទី ២៨ ខែមិថុនា ឆ្នាំ ២០២៥ថា នៅក្នុងឆមាសទី១ ឆ្នាំ ២០២៥ ស្ថិរភាពម៉ាក្រូសេដ្ឋកិច្ចត្រូវបានរក្សា យ៉ាង​ល្អ អតិផរណាមានកម្រិតទាប តម្លៃប្រាក់រៀលមានស្ថិរភាព ទុនបម្រុងអន្តរជាតិក៏បន្តកើនឡើង ដោយរំពឹងថា សេដ្ឋកិច្ចកម្ពុជានឹងសម្រេចបានអត្រាកំណើន ៥,២% ក្នុងឆ្នាំ ២០២៥។

នៅក្នុងរយៈពេល ៥ខែ ដើមឆ្នាំ ២០២៥ ទំហំពាណិជ្ជកម្មអន្តរជាតិ-កម្ពុជា សម្រេចបាន ២៥,៥ ពាន់លាន​ដុល្លារ កើន ១៨% ក្នុងនោះការនាំចេញមានតម្លៃ ១២ ពាន់លានដុល្លារ កើន ១៧,៩៨% បើធៀបនឹងរយៈពេលដូចគ្នា ឆ្នាំ ២០២៤។

ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៩០ គម្រោង កើនឡើង ១៣៧ គម្រោង និងមានទុន​វិនិយោគប្រមាណ ៤,២ ពាន់លាន ដុល្លារ កើន ១,៤ ពាន់លានដុល្លារ និងអាចបង្កើនការងារបានប្រមាណ ២០ម៉ឺនកន្លែង។

ចំនួនសហគ្រាសគ្រឹះស្ថានបានកើនពីចំនួន ៤៤ ៧៩៨ ដល់ចំនួន ៤៥ ៣៨៦ ដែលមាន​កម្មករ​និយោជិត សរុប ១,៨៧ លាននាក់ កើនប្រមាណ ៥ម៉ឺននាក់។

ការបង្កបង្កើនផលស្រូវ រដូវប្រាំង​ឆ្នាំ ២០២៥ សម្រេចបាន ៩០៧ ៨៨៩ ហិកតា លើសឆ្នាំមុន ៦៧ ៧០១ហិកតា ឯការ​ប្រមូល​ផល​ស្រូវរដូវប្រាំងសម្រេចបាន ៤ ២៥៤ ៥០៨តោន លើសឆ្នាំមុន ៤១៨ ០០០តោន ស្មើនឹង ១០,៩០%។

កម្ពុជាទទួលបានទេសចរអន្តរជាតិចំនួន ២,៩៥ លាននាក់ កើន ១១,៧% ឯទេសចរ​ជាតិ​មាន​ចំនួន ១៣,១៦ លាននាក់ កើន ៥០% ធៀបនឹងរយៈពេល ៥ខែ ឆ្នាំ ២០២៤។

ជាមួយគ្នានេះ ការ​កសាង ពង្រីកហេដ្ឋារចនាសម្ព័ន្ធរូបវន្ត ដូចជា ហេដ្ឋារចនា​សម្ព័ន្ធតាម​ព្រំដែន ប្រព័ន្ធ​ធារា​សាស្ត្រ ផ្លូវ ស្ពាន អគ្គិសនី ព្រែកជីក កំពង់ផែ ព្រលានយន្តហោះ បច្ចេកវិទ្យា​គមនាគមន៍ និង​ព័ត៌មាន៕