សែន រ៉ាដេត Archives - Kampuchea Thmey Daily

សែន រ៉ាដេត មិនសូវសំបូរទីផ្សារដូចកីឡាករក្មេងៗ ប៉ុន្តែការគាំទ្រពីអ្នកតាមដានប្រដាល់នៅតែច្រើន

Sina Noun — Wed, 06 May 2026 01:33:54 +0000

អ្នកលេងគុនខ្មែរចាស់វស្សា សែន រ៉ាដេត ទោះមិនសូវមានទីផ្សារប្រកួតច្រើនដូចកីឡាករក្មេងៗក្នុងពេលឥលូវនេះមែន ប៉ុន្តែសន្ទុះនៃការស្រឡាញ់គាំទ្ររូបគេនៅតែមានច្រើន និងបានជំរុញឲ្យខ្លួនបន្តខំប្រឹងប្រែងទាំងការប្រកួតហ្វឹកហាត់ និងប្រកួត។

កីឡាករ សែន រ៉ាដេត

សែន រ៉ាដេត បានឲ្យដឹងថា ទទួលស្គាល់ថាទីផ្សារប្រកួតសម្រាប់រូបគេគឺមិនសូវសំបូរដូចកីឡាករក្មេងៗជំនាន់ក្រោយឥលូវនេះទេដោយសារតែខ្លួនចាត់ចូលជាកីឡាករចាស់មួយរូបហើយលើវិស័យប្រដាល់នេះ។ យ៉ាងណាអ្វីដែលខ្លួនសង្កេតមើលនោះសន្ទុះនៃការគាំទ្រនៅពេលប្រកួតម្ដងៗមានច្រើនដដែលមិនថាពេលឈ្នះ ឬចាញ់ក៏ដោយ។

កីឡាករ សែន រ៉ាដេត

អ្នកប្រដាល់ដើមកំណើតពីខេត្តកោះកុងរូបនេះបន្ថែមទៀតថា នៅពេលដែលគិតដល់ការស្រឡាញ់គាំទ្រពីសំណាក់អ្នកតាមដានប្រដាល់បានធ្វើឲ្យរូបគេនៅតែមានកម្លាំងចិត្តលើវិថីប្រដាល់នេះតទៅមុខទៀតផងដែរ។ បច្ចុប្បន្នវ័យច្រើនបន្តិចមែន ប៉ុន្តែទឹកចិត្តខំប្រឹងប្រែងហ្វឹកហាត់ និងការតស៊ូក្នុងការប្រកួតផ្សេងៗឲ្យអស់ពីសមត្ថភាពគឺនៅតែមានជូនអ្នកគាំទ្រខ្លួនដដែល។

កីឡាករ សែន រ៉ាដេត

បញ្ជាក់ដែរថា សែន រ៉ាដេត ជាកីឡាករចាស់វស្សាមួយរូបហើយនៅក្នុងវិស័យប្រដាល់គុនខ្មែរនេះ និងបានចូលប្រឡូកជាច្រើនឆ្នាំមកហើយ។ បើទោះជាកីឡាករក្នុងជំនាន់ជាមួយរូបគេខ្លះៗបោះបង់អាជីពនេះជាយូរមកហើយក្ដី ឬកីឡាករខ្លះបានធ្លាក់ទម្រង់ប្រកួតយ៉ាងណា ប៉ុន្តែ សែន រ៉ាដេត នៅតែរក្សារាងកាយបានល្អ និងរក្សាទម្រង់ប្រកួតជក់ចិត្តដដែលជូនអ្នកគាំទ្រគុនខ្មែរ។ ចំណុចខំប្រឹងប្រែង និងការប្រកួតបង្ហាញអស់ៗពីសមត្ថភាពនេះហើយទើបធ្វើឲ្យរូបគេនៅតែជាទីស្រឡាញ់សម្រាប់អ្នកគាំទ្រ៕

អត្ថបទដោយ៖ នួន ស៊ីណា

The post សែន រ៉ាដេត មិនសូវសំបូរទីផ្សារដូចកីឡាករក្មេងៗ ប៉ុន្តែការគាំទ្រពីអ្នកតាមដានប្រដាល់នៅតែច្រើន appeared first on Kampuchea Thmey Daily.

សែន រ៉ាដេត លើកទីមួយក្នុងឆាកជីវិតហើយមួយប្រកួតរាប់ដល់ទៅបីដងកាលនៅអង់គ្លេស

Sina Noun — Wed, 04 Mar 2026 05:04:23 +0000

កីឡាករ សែន រ៉ាដេត ថាការប្រកួតនៅប្រទេសអង់គ្លេសនេះជាការប្រកួតលើកទី១ ក្នុងឆាកជីវិតហើយដែលត្រូវអាជ្ញាកណ្ដាលរាប់ដល់ទៅ ៣ដងក្នុងមួយប្រកួតបែបនេះ ស្របពេលមកដល់ខ្មែរហើយនៅតែឈឺថ្គាមនៅឡើយទេមកដល់ពេលនេះ។

រ៉ាដេត ពេលប្រកួតនៅអង់គ្លេស

អ្នកប្រដាល់មកពីខេត្តកោះកុង សែន រ៉ាដេត បានឲ្យដឹងថា ការប្រកួតនៅអង់គ្លេសនេះគឺជាការប្រកួតដែលជូចត់ខ្លាំងសម្រាប់រូបគេ និងជាលើកទី១ ក្នុងឆាកជីវិតប្រកួតដែលត្រូវអាជ្ញាកណ្ដាលរាប់ដល់ទៅ ៣ដងក្នុងមួយប្រកួតបែបនេះ។ ការប្រកួតកន្លងទៅយ៉ាងច្រើនរាប់ ១-២ដងតែប៉ុណ្ណោះ ប៉ុន្តែនៅអង់គ្លេសនេះគឺការប្រកួត ៥ទឹកត្រូវអាជ្ញាកណ្ដាលរាប់ដល់ទៅ ៣ដងឯណោះ។

រ៉ាដេត ពេលប្រកួតនៅអង់គ្លេស

កីឡាករចិត្តសឿងរូបនេះបន្ថែមទៀតថា Smith ដែលជាដៃគូរបស់ខ្លួននេះគឺសមត្ថភាពល្អ និងមានក្បាច់ចេញចូលរហ័ស អាវុធចេញលឿន ល្អកណ្ដាប់ដៃ ធាក់ និងបោះជង្គង់ ពោលល្អទាំងព្រមតែម្ដង។ ដោយសារតែការប៉ះគ្នាកាលនោះចូលជង្គង់ និងកណ្ដាប់ដៃរបស់ដៃគូច្រើនទើបធ្វើឲ្យ រ៉ាដេត គ្រាំម ឈឺថ្គាម នៅឡើយទេមកដល់ពេលក៏ដោយ។

រ៉ាដេត ពេលប្រកួតនៅអង់គ្លេស

បញ្ជាក់ដែរថា កីឡាករ សែន រ៉ាដេត កាលពីថ្ងៃទី២៨ ខែកុម្ភៈ ឆ្នាំ២០២៦ នេះរូបគេបានប្រកួតចាញ់ពិន្ទុកីឡាករ Smith ក្នុងជំនួបដណ្ដើមខ្សែក្រវាត់ ISKA ឯកម្មវិធី HITMAN Fight League នៅប្រទេសអង់គ្លេស។ ក្នុងការប្រកួតនោះដែររូបគេត្រូវអាជ្ញាកណ្ដាលរាប់រហូតទៅ ៣ដងឯណោះ៕

អត្ថបទដោយ៖ នួន ស៊ីណា

The post សែន រ៉ាដេត លើកទីមួយក្នុងឆាកជីវិតហើយមួយប្រកួតរាប់ដល់ទៅបីដងកាលនៅអង់គ្លេស appeared first on Kampuchea Thmey Daily.

សែន រ៉ាដេត ទៅដណ្តើមខ្សែក្រវាត់ ISKA នៅអង់គ្លេស ប៉ះជើងខ្លាំងមិនទាន់ចាញ់ ៨ ប្រកួតជាប់គ្នា

Kosal Sem — Tue, 27 Jan 2026 04:26:33 +0000

កីឡាករគុនខ្មែរ សែន រ៉ាដេត នឹងត្រូវធ្វើការងារធ្ងន់នៅខែ កុម្ភៈ ខាងមុខ ដោយត្រូវហោះទៅប្រកួតនៅ អេស្ប៉ាញ លក្ខណៈមិត្តភាព និងមួយប្រកួតទៀត ត្រូវចេញទៅប្រកួតនៅ អង់គ្លេស ដើម្បីដណ្តើមខ្សែក្រវាត់លំដាប់ពិភពលោក ISKA World Title។

សែន រ៉ាដេត ត្រូវបានអ្នកគាំទ្រកោតសរសើរយ៉ាងខ្លាំង បន្ទាប់ពីរូបគេបង្ហាញសក្តានុពលរបស់ខ្លួន តាមរយៈការតស៊ូប្រកួតដោយភាពអង់អាចនៅសង្វៀន Knock Out កាលពី ២ ខែ មុន ទោះការប្រកួតនោះចាញ់កីឡាករម្ចាស់ផ្ទះជប៉ុន YUKI MORIOKA ក៏ដោយ។

នៅខែ កុម្ភៈ ខាងមុខកីឡាករ នឹងទទួលបានឱកាសចេញទៅប្រកួតនៅក្រៅប្រទេសជាថ្មី ដោយនៅថ្ងៃទី ៧ ត្រូវហោះទៅ អេស្ប៉ាញ ជួបកីឡាករ Gonzalo Tebar និងនៅថ្ងៃទី ២៨ ត្រូវចេញទៅ អង់គ្លេស ដណ្តើមខ្សែក្រវាត់ ISKA ពិភពលោក ទល់នឹងកីឡាករ Fergus Smith។

ការចេញទៅដណ្តើមខ្សែក្រវាត់ ISKA ពិភពលោកនាខែ កុម្ភៈ ខាងមុខ ទំនងនឹងក្លាយជាភាពមិនងាយស្រួលប៉ុន្មានទេ សម្រាប់សែន រ៉ាដេត ព្រោះរូបគេ នឹងត្រូវជួបកីឡាករជើងខ្លាំងប្រចាំទម្ងន់ ៥៤ គីឡូក្រាមរបស់ អង់គ្លេស។ គូប្រកួតរបស់ រ៉ាដេត កីឡាករ Fergus Smith ត្រូវបានគេដឹង ថា ជាម្ចាស់មេដាយមាសការប្រកួតប្រដាល់សេរីនៅ អឺរ៉ុប ២ ឆ្នាំជាប់គ្នា ហើយបច្ចុប្បន្នកំពុងគ្រងខ្សែក្រវាត់ WMO ទ្វីប អឺរ៉ុប មួយខ្សែ។

រឿងគួរឱ្យចាប់អារម្មណ៍មួយទៀត គឺនៅឆ្នាំ ២០២៥ កីឡាករបានឆ្លងកាត់ការប្រកួតអាជីពចំនួន ៨ លើក ដោយឈ្នះទាំង ៨ លើកជាប់ៗគ្នា។ កីឡាកររូបនេះ ក៏ធ្លាប់ឡើងសង្វៀន ONE មួយលើកផងដែរ ដោយកាលពីថ្ងៃទី ១៧ ខែ តុលា ឆ្នាំ ២០២៥ បានផ្តួលកីឡាករ Zahran Al-Wesabi ឱ្យសន្លប់ទឹកទី ១។

នេះជាឱកាសដ៏កម្រសម្រាប់កីឡាករគុនខ្មែរចិត្តសឿង សែន រ៉ាដេត ដែលអាចឡើងដណ្តើមខ្សែក្រវាត់ស្ថាប័ន ISKA ពិភពលោកនៅក្រៅប្រទេស។ ចាំមើល ថាតើ រ៉ាដេត នឹងអាចបំបែកកំណត់ត្រាជាកីឡាករគុនខ្មែរដំបូងគេ ដែលអាចដណ្តើមខ្សែក្រវាត់ ISKA ពិភពលោកនៅក្រៅប្រទេសដំបូងគេបានដែរឬទេ?

អត្ថបទ៖ សេម កុសល

The post សែន រ៉ាដេត ទៅដណ្តើមខ្សែក្រវាត់ ISKA នៅអង់គ្លេស ប៉ះជើងខ្លាំងមិនទាន់ចាញ់ ៨ ប្រកួតជាប់គ្នា appeared first on Kampuchea Thmey Daily.

ជំនួយនៅជើងទី១ នេះកីឡាករ សែន រ៉ាដេត ដឹកយកទៅឧបត្ថម្ភខាងខេត្តកោះកុង និងនៅបន្តទទួលអំណោយពីមហាជន

Sina Noun — Tue, 16 Dec 2025 02:16:08 +0000

កីឡាករគុនខ្មែរ សែន រ៉ាដេត ថាជំនួយសប្បុរសធម៌នៅជើងទី១ នេះរូបគេបានយកទៅឧបត្ថម្ភជនភៀសសឹកនៅឯខេត្តកោះកុងរួចរាល់ហើយដែលកំពុងជួបការលំបាក និងកងទ័ព កម្លាំងនគរបាល ក្នុងទីរួមខេត្ត។

កីឡាករ សែន រ៉ាដេត

អ្នកលេងគុនខ្មែរ សែន រ៉ាដេត បានឲ្យដឹងថា ជំនួយលើកទី១ នេះបានយកទៅឧបត្ថម្ភដល់ជនភៀសសឹក និងកងកម្លាំងប្រដាប់អាវុធក្នុងខេត្តកោះកុងរួចរាល់ហើយ។ អំណោយសប្បុរសធម៌ដែលទទួលបានពីមហាជនរួមមាន តង់ មី ត្រីខ ទឹកសុទ្ធ អង្ករ រួមទាំងថវិកាមួយចំនួនផងដែរ។

កីឡាករខាងលើបន្តទៀតថា ពេលមកដល់កន្លែងភៀសសឹកផ្ទាល់គឺប្រជាពលរដ្ឋជួបការលំបាក់ខ្លាំង ដូច្នេះហើយមានតែការជួយគ្នាក្នុងគ្រានេះទេដែលបានជួយសម្រាលទុក្ខលំបាកមួយនេះក្នុងនាមខ្មែរដូចគ្នា។ ខ្មែរស្រឡាញ់ខ្មែរ ខ្មែរជួយខ្មែរ។

រ៉ាដេត និងសិស្សពេលប្រគល់អំណោយ

សែន រ៉ាដេត បន្តទៀតថា ខ្លួនរួមទាំងសិស្សក្នុងក្លឹបប្រដាល់គុនខ្មែរដែនសមុទ្រ បន្តនៅទទួលអំណោយសប្បុរសធម៌ពីប្រជាពលរដ្ឋនៅម្ដុំភូមិត្រពាំងស្វាយ ឃុំក្រាំងម្កាក់ ស្រុកអង្គស្នូល ឬអ្នកធ្វើដំណើរកាត់ហ្នឹងដដែលដែលមានបំណងចង់ចូលរួមបរិច្ចាគសម្ភារផ្សេងៗទៀត។ ខ្លួននៅតែបន្តជួយកៀងគររកជំនួយជួយជនភៀសសឹករហូតដល់ប្រជាពលរដ្ឋបានវិលត្រឡប់ទៅផ្ទះវិញ និងបានប្រកបរបររកស៊ីជាធម្មតាវិញ។

រ៉ាដេត និងសិស្សពេលប្រគល់អំណោយ

បញ្ជាក់ដែរថា កីឡាករ សែន រ៉ាដេត បន្ទាប់ពីនាំយកអំណោយសប្បុរសធម៌ជួយដល់ជនភៀសសឹកលើកទី១នេះរួចរាល់ហើយនោះរូបគេឥលូវនេះក៏នៅតែបន្តចាំទទួលអំណោយពីមហាជន ប្រជាពលរដ្ឋបន្តទៀតដែរនៅមុខក្លឹបប្រដាល់គុនខ្មែរដែនសមុទ្រ ម្ដុំភូមិត្រពាំងស្វាយ ឃុំក្រាំងម្កាក់។ ប្រសិនបើអ្នកគាំទ្រចង់ចូលរួមឧបត្ថម្ភជួយជនភៀសសឹកតាមរយៈកីឡាករ សែន រ៉ាដេត អាចទំនាក់ទំនងទៅកាន់លេខ 016 377 093 ឬ QR របស់រូបគេ៕

QR របស់ សែន រ៉ាដេត

អត្ថបទដោយ៖ នួន ស៊ីណា

The post ជំនួយនៅជើងទី១ នេះកីឡាករ សែន រ៉ាដេត ដឹកយកទៅឧបត្ថម្ភខាងខេត្តកោះកុង និងនៅបន្តទទួលអំណោយពីមហាជន appeared first on Kampuchea Thmey Daily.

ខ្មែរជួយខ្មែរ កីឡាករ សែន រ៉ាដេត ប្រកាសទទួលជំនួយនៅទីតាំងក្លឹបផ្ទាល់ពីមហាជនដើម្បីជួយកងទ័ព និងជនភៀសសឹក

Sina Noun — Fri, 12 Dec 2025 09:29:09 +0000

កីឡាករ សែន រ៉ដេត លើកឡើងថាខ្មែរជួយខ្មែរ ប្រកាសទទួលជំនួយពីសប្បុរសជននានាពិសេសអ្នករស់នៅក្បែរក្លឹបប្រដាល់គុនខ្មែរដែនសមុទ្រ ឯភូមិត្រពាំងស្វាយ ឃុំក្រាំងម្កាក់ អាចយកជំនួយទៅបរិច្ចាគនៅទីនោះបានដោយមានរូបគេរួមទាំងសិស្សគុននៅរង់ចាំទទួល។

ទីតាំងទទួលជំនួយបរិច្ចាគរបស់ សែន រ៉ាដេត

អ្នកលេងគុនខ្មែរ សែន រ៉ាដេត បានប្រកាសនៅថ្ងៃនេះថា ក្លឹបប្រដាល់គុនខ្មែរដែនសមុទ្រដែលមានទីតាំងនៅម្ដុំភូមិត្រពាំងស្វាយ ឃុំក្រាំងម្កាក់ ស្រុកអង្គស្នូល ឬអ្នកធ្វើដំណើរកាត់ហ្នឹងដែលមានបំណងចង់ចូលរួមបរិច្ចាគសម្ភារ គ្រឿងឧបភោគបរិភោគផ្សេងៗដល់វីរកងទ័ព និងជនភៀសសឹកអាចយកមកបរិច្ចាគនៅទីនោះបាន។

ជនភៀសសឹក

រ៉ាដេត លើកឡើងទៀតថា នេះជាការរួមចំណែករបស់ក្លឹបក៏ដូចជារូបគេ និងសិស្សៗផង និងជាការជួយសម្រួលដល់ប្រជាពលរដ្ឋដែលមានបំណង់ចង់បរិច្ចាគផ្សេងៗឲ្យកាន់តែងាយស្រួលដោយមិនចាំបាច់ឡើងទៅដល់ភ្នំពេញ។ ចំពោះសម្ភារ គ្រឿងឧបភោគបរិភោគផ្សេងៗដែលបានយកមកបរិច្ចាគតាមរយៈខ្លួននេះនឹងដឹកយកទៅប្រគល់នៅកន្លែងទទួលធំឯបឹងកក់ រាជធានីភ្នំពេញ ឬអាចយកទៅព្រំដែនផ្ទាល់តែម្ដង។

រូបភាពវីរកងទ័ព

បញ្ជាក់ដែរថា បន្ទាប់ពីរងការឈ្លានពានពីសំណាក់ប្រទេសសៀមមកលើកម្ពុជាតាំងពីថ្ងៃទី៧ ខែធ្នូ ឆ្នាំ២០២៥ ប៉ុន្មានថ្ងៃមកនេះគេឃើញប្រជាពលរដ្ឋខ្មែរទូទាំងប្រទេសមានការសាមគ្គីគ្នាជាខ្លាំង និងមានចលនាកៀងគររកជំនួយសប្បុរសធម៌ជាច្រើន។ ជាមួយគ្នានេះដែរមិនថាប្រជាពលរដ្ឋ អ្នកជំនួញ ឬផ្នែកកីឡានោះទេគឺមានភាពសកម្មតែម្ដងក្នុងការស្វែងរកជំនួយដើម្បីជួយផ្គត់ផ្គងដល់វីរកងទ័ពដែលកំពុងច្បាំង និងជនភៀសសឹកតាមបណ្ដោយព្រំដែន៕

ទីតាំងទទួលជំនួយបរិច្ចាគរបស់ សែន រ៉ាដេត

អត្ថបទដោយ៖ នួន ស៊ីណា

The post ខ្មែរជួយខ្មែរ កីឡាករ សែន រ៉ាដេត ប្រកាសទទួលជំនួយនៅទីតាំងក្លឹបផ្ទាល់ពីមហាជនដើម្បីជួយកងទ័ព និងជនភៀសសឹក appeared first on Kampuchea Thmey Daily.

ស្មារតីមោះមុតរបស់ សែន រ៉ាដេត ធ្វើឱ្យកីឡាករជប៉ុន Morioka សរសើរគុនខ្មែរមិនដាច់ពីមាត់

Kosal Sem — Mon, 10 Nov 2025 07:44:11 +0000

អ្នកប្រដាល់ ជប៉ុន Morioka Yuki បានបង្ហាញភាពភ្ញាក់ផ្អើល និងកោតសរសើរអំពីអ្នកប្រដាល់ «គុនខ្មែរ» មិនដាច់ពីមាត់ បន្ទាប់ពីកីឡាកររូបនេះប្រកួតជាមួយ សែន រ៉ាដេត នៅសង្វៀន Knock Out កាលពីពេលថ្មីៗនេះ។

Morioka Yuki និងសែន រ៉ាដេត

កាលពីថ្ងៃ សៅរិ៍ ទី ៨ ខែ វិច្ឆិកា ឆ្នាំ ២០២៥ អ្នកប្រដាល់ម្ចាស់ផ្ទះ ជប៉ុន Morioka Yuki បានយកឈ្នះលើកីឡាករគុនខ្មែរ សែន រ៉ាដេត ដោយពិន្ទុ បន្ទាប់ពីឆ្លងកាត់ ៣ ទឹកពេញ នៅសង្វៀន Knock Out របស់ប្រទេស ជប៉ុន។

ទោះបីជាការប្រកួតនេះ រ៉ាដេត បរាជ័យក៏ពិតមែន ប៉ុន្តែរូបគេទទួលបានការកោតសរសើរពីអ្នកគាំទ្រជាខ្លាំង ដោយសារអំឡុងពេលនៅលើសង្វៀនប្រកួត កីឡាករបានបង្ហាញពីការតស៊ូ និងទឹកចិត្តមោះជាខ្លាំង។ កីឡាករមិនបោះបង់ការប្រកួតឡើយ ទោះត្រូវគូប្រកួតវាយចូលច្រើន និងត្រូវបានអាជ្ញាកណ្តាលរាប់ ១ លើកតាំងពីទឹកទី ១ ក៏ដោយ។ រឿងដ៏គួរឱ្យស្ងើចសរសើរមួយទៀត គឺ រ៉ាដេត បានវាយឱ្យ Morioka រាប់វិញម្តងនៅទឹកទី ៣។

Morioka Yuki និងសែន រ៉ាដេត

មិនត្រឹមតែអ្នកគាំទ្រគុនខ្មែរប៉ុណ្ណោះទេ សូម្បីកីឡាករ Morioka Yuki ក៏បានកោតសរសើរពីទឹកចិត្តមោះមុតរបស់ សែន រ៉ាដេត ផងដែរ ដោយក្រោយបញ្ចប់ការប្រកួត កីឡាករបានបង្ហោះសារនៅលើបណ្តាញសង្គម IG ដូច្នេះថា៖ «សូមអរគុណដល់ការខំប្រឹងប្រែង ខ្ញុំអាចឈ្នះបាននៅវិនាទីចុងក្រោយ។ ការឆ្លងកាត់ការប្រកួតនេះ នឹងក្លាយជាបទពិសោធសំខាន់សម្រាប់ការប្រកួតបន្ទាប់ ហើយខ្ញុំនឹងបន្តហ្វឹកហាត់ ដើម្បីអាចឱ្យការប្រកួតក្រោយៗឲ្យកាន់តែល្អប្រសើរ…»។

កីឡាករ ជប៉ុន បានបន្ត ថា៖ «សូមអរគុណចំពោះគូប្រជែង សែន រ៉ាដេត ដែលបានធ្វើដំណើរពីប្រទេសកម្ពុជា មកប្រកួតនៅជប៉ុន។ គាត់ជាអ្នកប្រយុទ្ធគុនខ្មែរ ពិតប្រាកដ ដែលរឹងមាំ មានស្មារតីប្រយុទ្ធ និងសក្ដានុពលខ្លាំង។ អ្នកប្រដាល់គុនខ្មែរ មកពីប្រទេស កម្ពុជា មានលក្ខណៈពិសេសជាច្រើន ដែលយើងជាកីឡាករប្រដាល់ ជប៉ុន មិនមាន។ ពួកគេជាអ្នកប្រដាល់អស្ចារ្យមែនៗ។ ជួបគ្នាម្ដងទៀតនៅការប្រកួតលើកក្រោយ»៕

Morioka Yuki និងសែន រ៉ាដេត

អត្ថបទ៖ សេម កុសល

The post ស្មារតីមោះមុតរបស់ សែន រ៉ាដេត ធ្វើឱ្យកីឡាករជប៉ុន Morioka សរសើរគុនខ្មែរមិនដាច់ពីមាត់ appeared first on Kampuchea Thmey Daily.

ទីបំផុត! សែន រ៉ាដេត បំពេញបំណង ជើងខ្លាំងជប៉ុន Morioka ដែលចង់ជួបកីឡាករគុនខ្មែរ

Kosal Sem — Thu, 23 Oct 2025 02:05:52 +0000

អ្នកប្រដាល់គុនខ្មែរ សែន រ៉ាដេត នឹងត្រូវទទួលភារកិច្ចថ្មីមួយ ដោយត្រូវឆ្លងដែនទៅប្រទេស ជប៉ុន ដើម្បីជួបជាមួយកីឡាករម្ចាស់ផ្ទះ Morioka Yuki នៅសង្វៀន Knock Out ថ្ងៃទី ៨ ខែ វិច្ឆិកា ឆ្នាំ ២០២៥។

កីឡាករសែន រ៉ាដេត

ក្រោយសង្វៀន Knock Out ប្រកាសអំពីជំនួបរវាងកីឡាករទាំង ២ នៅថ្ងៃ ពុធ ទី ២២ ខែ តុលា ឆ្នាំ ២០២៥ បានធ្វើឱ្យអ្នកគាំទ្រមានការចាប់អារម្មណ៍ជាខ្លាំង ពីព្រោះ Morioka Yuki ធ្លាប់បានប្រកាស ថា «រូបគេចង់សាកល្បងជាមួយកីឡាករគុនខ្មែរ» បន្ទាប់ពីឃើញ ម៉ឺន មេឃា អេ អាំម៉ារីនភូថង និងកីឡាករគុនខ្មែរប៉ុន្មានរូបទៀត បានយកឈ្នះមិត្តរួមជាតិរបស់គេនៅទីនោះ។

ខិត្តប័ណ្ណផ្សព្វផ្សាយការប្រកួត

សែន រ៉ាដេត បានក្លាយជាកីឡាករគុនខ្មែរដំបូងគេ ដែលនឹងបំពេញបំណងជូនកីឡាករ ជប៉ុន វ័យ ៣១ ឆ្នាំរូបនេះ។ ទោះបីជាយ៉ាងណា ការទទួលភារកិច្ចនេះ អាចថាមិនមែនជារឿងងាយស្រួលប៉ុន្មានឡើយសម្រាប់កីឡាករគុនខ្មែរ ត្រូវជាប្អូនប្រុសបង្កើតរបស់អតីតកីឡាករម្ទេសខ្មាំង សែន រ៉ាឌី ព្រោះថាគេគឺជាម្ចាស់ផ្ទះ ហើយម្យ៉ាងទៀត Morioka នេះ ជាជើងខ្លាំងមួយរូបក្នុងទម្ងន់ ៥៤ ទៅ ៥៧ គីឡូក្រាមនៅ ជប៉ុន។

ដកស្រង់ប្រវត្តិត្រួសៗ Morioka Yuki បច្ចុប្បន្នជាម្ចាស់ខ្សែក្រវាត់របស់សង្វៀន Knock Out ២ ខ្សែ ក្នុងនោះមាន Knock Out Red និង Knock Out Black។ កីឡាករ ធ្លាប់ឡើងសង្វៀនអាជីពចំនួន ៣៥ ដង ក្នុងនោះឈ្នះ ២១ ដង (ផ្តួលដៃគូឱ្យបោះបង់ការប្រកួត ១៣ ដង) ចាញ់ ១១ ដង និងស្មើ ៣ ដង។

Morioka Yuki

Morioka Yuki ក៏ធ្លាប់ឡើងសង្វៀន ONE ផងដែរកាលពីខែ ឧសភា ឆ្នាំ ២០២៤ ដោយពេលនោះរូបគេបានយកឈ្នះលើកីឡាករ អ៊ីរ៉ង់ Peyman Zolfaghari ដោយផ្តួលឱ្យសន្លប់ទឹកទី ១។ ដោយឡែកការប្រកួតចុងក្រោយរបស់កីឡា ជប៉ុន រូបនេះ គឺបានយកឈ្នះមិត្តរួមជាតិ FUKUDA Takumi កាលពីខែ កញ្ញា កន្លងទៅ និងដណ្តើមបានខ្សែក្រវាត់ Knock Out Black មួយគ្រឿង។

រឿងដ៏ចាប់ចាប់អារម្មណ៍មួយទៀត សម្រាប់ Morioka Yuki គឺរូបគេមានកណ្តាប់ដៃត្រង់ និងលឿនខ្លាំង ហើយម្យ៉ាងទៀតកណ្តាប់ដៃរបស់គេក៏ធ្ងន់ផងដែរ។ ជាក់ស្តែងការផ្តួលដៃគូរបស់គេទាំង ១៣ លើក ភាគច្រើនសុទ្ធតែតាមរយៈកណ្តាប់ដៃ។ យ៉ាងណា សែន រ៉ាដេត របស់ កម្ពុជា ក៏ជាជើងខ្លាំងមួយរូបផងដែរ ដោយរូបគេជាកីឡាករមួយរូបសម្បូរទាំងសាច់ស្នៀត និងបទពិសោធ។ ដូច្នេះការប្រកួតនេះ ធានាថានឹងកក្រើកសម្រាប់អ្នកគាំទ្រទាំងសងខាង។

គួរឱ្យដឹងថា ក្រៅអំពីសែន រ៉ាដេត គឺមានកីឡាករ កីឡាការិនីគុនខ្មែរ ៤ នាក់ទៀត ដែលត្រូវអមដំណើទៅជាមួយផងដែរ រួមមាន រស្មី គុនខ្មែរ ទូច ចាន់វត្តី មាស ប៊ុនថេន និង ផានិត គុនខ្មែរ៕

គូ រស្មី គុនខ្មែរ

គូ ទូច ចាន់វត្តី

គូ មាស ប៊ុនថេន

គូ ផានិត គុនខ្មែរ

អត្ថបទ៖ សេម កុសល

The post ទីបំផុត! សែន រ៉ាដេត បំពេញបំណង ជើងខ្លាំងជប៉ុន Morioka ដែលចង់ជួបកីឡាករគុនខ្មែរ appeared first on Kampuchea Thmey Daily.

សែន រ៉ាដេត៖ បើតាំងចិត្តជាអ្នកប្រយុទ្ធត្រូវស្មោះត្រង់ កុំខ្លួនជាប្រយុទ្ធ តែចិត្តជាកុមារី…

Sina Noun — Wed, 16 Jul 2025 03:55:52 +0000

អ្នកលេងគុនខ្មែរ សែន រ៉ាដេត បាននិយាយទៅកាន់កីឡាករមួយចំនួនបើតាំងចិត្តជាអ្នកប្រយុទ្ធហើយត្រូវស្មោះត្រង់ចំពោះការធ្វើទម្ងន់តាមការកំណត់ឲ្យបានត្រឹមត្រូវជៀសវាងប្រើលេសនេះលេសនោះនៅពេលថ្លឹងទម្ងន់ជាដើមដែលនេះបង្ហាញពីចិត្តកំសាកមិនសមជាកីឡាករ។

រូបភាពលើផេក រ៉ាដេត

សែន រ៉ាដេត បានធ្វើវីដេអូបង្ហោះថា ក្នុងនាមម្នាក់ៗជាកីឡាករសូមមានភាពស្មោះត្រង់ចំពោះរឿងទម្ងន់ខ្លួនឯង ដូចជាត្រូវប្រកួត ៥១-៥៤-៥៧ ជាដើមដល់ថ្ងៃថ្លឹងទម្ងន់គឺធ្វើយ៉ាងណាឲ្យគ្រប់ទៅតាមការកំណត់របស់ស្ថានីយ ឬខាងសហព័ន្ធ។

រូបភាពលើផេក រ៉ាដេត

អ្នកប្រដាល់មកពីខេត្តកោះកុងរូបនេះលើកឡើងទៀតថា មានកីឡាករខ្លះត្រូវប្រកួតទម្ងន់ ៥៤ ប៉ុន្តែនៅពេលឡើងថ្លឹងបែរជាលើសរហូតដល់ជាង ៥៦គីឡូក្រាមទៅវិញ។ ទង្វើរទាំងនេះហើយដែលមិនមានយុទ្ធត្តិធម៌ចំពោះដៃគូប្រកួតម្ខាងទៀតសោះ។ តាមស្ថានីយ និងសហព័ន្ធប្រដាល់គុនខ្មែរគឺបានកំណត់ហើយ ប៉ុន្តែកីឡាករមួយចំនួនមិនបានគោរពតាមនោះឡើយ។

រូបភាពលើផេក រ៉ាដេត

ប្អូនប្រុសរបស់ សែន រ៉ាឌី បានផ្ដាំផ្ញើចំៗទៅកាន់កីឡាករមួយចំនួនថា «ប្រសិនបើតាំងខ្លួនជាអ្នកប្រយុទ្ធហើយ សូមធ្វើចិត្តឲ្យសមជាអ្នកប្រយុទ្ធផង កុំតាំងខ្លួនជាអ្នកប្រយុទ្ធ ប៉ុន្តែចិត្តជាកុមារីទៅវិញ»។ បើសម្រក់ ឬធ្វើទម្ងន់មិនបានទេ សូមប្រកួតក្នុងទម្ងន់ដែលខ្លួនគិតថាអាចប្រកួតបានដោយមិនសម្រក់ទៅ។

សែន រ៉ាដេត និង សែន រ៉ាឌី

បញ្ជាក់ដែរថា វីដេអូដែលនិយាយអំពីរឿងទម្ងន់នេះ សែន រ៉ាដេត បានបង្ហោះកាលពីថ្ងៃទី១៥ ខែកក្ដដា ឆ្នាំ២០២៥ ម្សិលមិញនេះលើហ្វេសបុកផេករបស់ខ្លួន Sen Radeth (ទិន ឌិន)។ ចំពោះបញ្ហារឿងធ្វើទម្ងន់នេះក៏នៅតែមានជាបន្តបន្ទាប់ និងចោទជាបញ្ហាជានិច្ចមកដល់ពេលបច្ចុប្បន្ននេះ ដោយគ្រាន់តែមិនសូវមានការផ្សព្វផ្សាយច្រើនអំពីរឿងនេះ។ មានពេលខ្លះបញ្ហាលើសទម្ងន់នេះត្រូវចរចាសម្រួលគ្នាតាមជាក់ស្ដែងតែម្ដងដោយម្ចាស់កម្មវិធីមិនចង់ឲ្យខូចការប្រកួតដែលបានរៀបចំជាយូរមកហើយ៕

អត្ថបទដោយ៖ នួន ស៊ីណា

The post សែន រ៉ាដេត៖ បើតាំងចិត្តជាអ្នកប្រយុទ្ធត្រូវស្មោះត្រង់ កុំខ្លួនជាប្រយុទ្ធ តែចិត្តជាកុមារី… appeared first on Kampuchea Thmey Daily.

សែន រ៉ាដេត Archives - Kampuchea Thmey Daily

សែន​ រ៉ាដេត លើក​ទី​មួយ​ក្នុង​ឆាក​ជីវិត​ហើយ​មួយ​ប្រកួត​រាប់​ដល់​ទៅ​បី​ដង​កាល​នៅ​អង់គ្លេស​

សែន រ៉ាដេត ទៅដណ្តើម​ខ្សែក្រវាត់ ISKA នៅអង់គ្លេស ប៉ះ​ជើងខ្លាំងមិនទាន់ចាញ់ ៨ ប្រកួតជាប់គ្នា

ស្មារតីមោះមុតរបស់ សែន រ៉ាដេត ធ្វើឱ្យកីឡាករជប៉ុន Morioka សរសើរគុន​ខ្មែរមិនដាច់ពីមាត់

ទីបំផុត! សែន រ៉ាដេត បំពេញបំណង ជើងខ្លាំងជប៉ុន Morioka ដែលចង់ជួបកីឡាករគុនខ្មែរ

សែន រ៉ាដេត លើកទីមួយក្នុងឆាកជីវិតហើយមួយប្រកួតរាប់ដល់ទៅបីដងកាលនៅអង់គ្លេស

សែន រ៉ាដេត ទៅដណ្តើមខ្សែក្រវាត់ ISKA នៅអង់គ្លេស ប៉ះជើងខ្លាំងមិនទាន់ចាញ់ ៨ ប្រកួតជាប់គ្នា

ស្មារតីមោះមុតរបស់ សែន រ៉ាដេត ធ្វើឱ្យកីឡាករជប៉ុន Morioka សរសើរគុនខ្មែរមិនដាច់ពីមាត់