សែន រ៉ាដេត ទៅដណ្តើម​ខ្សែក្រវាត់ ISKA នៅអង់គ្លេស ប៉ះ​ជើងខ្លាំងមិនទាន់ចាញ់ ៨ ប្រកួតជាប់គ្នា

កីឡាករគុនខ្មែរ សែន រ៉ាដេត នឹងត្រូវធ្វើការងារធ្ងន់នៅខែ កុម្ភៈ ខាងមុខ ដោយត្រូវហោះទៅប្រកួតនៅ អេស្ប៉ាញ លក្ខណៈមិត្តភាព និងមួយប្រកួតទៀត ត្រូវចេញទៅប្រកួតនៅ អង់គ្លេស ដើម្បីដណ្តើមខ្សែក្រវាត់លំដាប់ពិភពលោក ISKA World Title។

សែន រ៉ាដេត ត្រូវបានអ្នកគាំទ្រកោតសរសើរយ៉ាងខ្លាំង បន្ទាប់ពីរូបគេបង្ហាញសក្តានុពលរបស់ខ្លួន តាមរយៈការតស៊ូប្រកួតដោយភាពអង់អាចនៅសង្វៀន Knock Out កាលពី ២ ខែ មុន ទោះការប្រកួតនោះចាញ់កីឡាករម្ចាស់ផ្ទះជប៉ុន YUKI MORIOKA ក៏ដោយ។

នៅខែ កុម្ភៈ ខាងមុខកីឡាករ នឹងទទួលបានឱកាសចេញទៅប្រកួតនៅក្រៅប្រទេសជាថ្មី ដោយនៅថ្ងៃទី ៧ ត្រូវហោះទៅ អេស្ប៉ាញ ជួបកីឡាករ Gonzalo Tebar និងនៅថ្ងៃទី ២៨ ត្រូវចេញទៅ អង់គ្លេស ដណ្តើមខ្សែក្រវាត់ ISKA ពិភពលោក ទល់នឹងកីឡាករ Fergus Smith។

ការចេញទៅដណ្តើមខ្សែក្រវាត់ ISKA ពិភពលោកនាខែ កុម្ភៈ ខាងមុខ ទំនងនឹងក្លាយជាភាពមិនងាយស្រួលប៉ុន្មានទេ សម្រាប់សែន រ៉ាដេត ព្រោះរូបគេ នឹងត្រូវជួបកីឡាករជើងខ្លាំងប្រចាំទម្ងន់ ៥៤ គីឡូក្រាមរបស់ អង់គ្លេស។ គូប្រកួតរបស់ រ៉ាដេត កីឡាករ Fergus Smith ត្រូវបានគេដឹង ថា ជាម្ចាស់មេដាយមាសការប្រកួតប្រដាល់សេរីនៅ អឺរ៉ុប ២ ឆ្នាំជាប់គ្នា ហើយបច្ចុប្បន្នកំពុងគ្រងខ្សែក្រវាត់ WMO ទ្វីប អឺរ៉ុប មួយខ្សែ។

រឿងគួរឱ្យចាប់អារម្មណ៍មួយទៀត គឺនៅឆ្នាំ ២០២៥ កីឡាករបានឆ្លងកាត់ការប្រកួតអាជីពចំនួន ៨ លើក ដោយឈ្នះទាំង ៨ លើកជាប់ៗគ្នា។ កីឡាកររូបនេះ ក៏ធ្លាប់ឡើងសង្វៀន ONE មួយលើកផងដែរ ដោយកាលពីថ្ងៃទី ១៧ ខែ តុលា ឆ្នាំ ២០២៥ បានផ្តួលកីឡាករ Zahran Al-Wesabi ឱ្យសន្លប់ទឹកទី ១។

នេះជាឱកាសដ៏កម្រសម្រាប់កីឡាករគុនខ្មែរចិត្តសឿង សែន រ៉ាដេត ដែលអាចឡើងដណ្តើមខ្សែក្រវាត់ស្ថាប័ន ISKA ពិភពលោកនៅក្រៅប្រទេស។ ចាំមើល ថាតើ រ៉ាដេត នឹងអាចបំបែកកំណត់ត្រាជាកីឡាករគុនខ្មែរដំបូងគេ ដែលអាចដណ្តើមខ្សែក្រវាត់ ISKA ពិភពលោកនៅក្រៅប្រទេសដំបូងគេបានដែរឬទេ?

អត្ថបទ៖ សេម កុសល