សំឡេងរំខាន Archives - Kampuchea Thmey Daily

គណៈបញ្ជាការឯកភាពខណ្ឌមានជ័យ ចុះរដ្ឋបាលឃាត់ខ្លួនក្មេងៗប្រមូលផ្តុំគ្នា អត់ដេកពួនរំខានដល់ប្រជាពលរដ្ឋ

Ung Meng — Fri, 22 May 2026 02:36:40 +0000

កម្លាំងចម្រុះខណ្ឌមានជ័យ ចុះរដ្ឋបាលឃាត់ក្មេងៗចំនួន ១២នាក់ ដែលប្រមូលផ្តុំគ្នា មិនគិតដេកពួន បង្កសម្លេងរំខានដល់អ្នកជិតខាង យកទៅកាន់អធិការដ្ឋាននគរបាលខណ្ឌមានជ័យ ដើម្បីបន្តនីតិវិធី។ ការចុះរដ្ឋបាលនេះដែរបានធ្វើឡើងកាលពីយប់ម៉ោង១០ និង៤៥នាទីថ្ងៃទី២១ ឧសភា ២០២៦ ស្ថិតនៅភូមិទ្រា៣ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។

លោក សេង គន្ធ អភិបាលនៃគណៈអភិបាលខណ្ឌមានជ័យ បានលើកឡើងថា ដោយមានការរាយការណ៍ពីពលរដ្ឋថា ចំណុចខាងលើនេះតែងតែមានក្មេងៗ មួយក្រុមមកអង្គុយជក់បារី ប្រមូលផ្តុំគ្នានាពេលយប់ បង្កសម្លេងរំខានដល់ពលរដ្ឋក្បែរនោះ មិនអាចសម្រាកបាន ។ ភ្លាមៗលោកអភិបាលបានដឹកនាំ កម្លាំងគណៈបញ្ជាការឯកភាពខណ្ឌមានជ័យ ចុះទៅកាន់ទីតាំងខាងលើតែម្តង ដើម្បីរក្សាសុខសុវត្ថិភាពជូនពលរដ្ឋ នៅចំណុចតំបន់ខាងលើនេះ។

អភិបាលខណ្ឌបន្តថា ជាក់ស្តែងនៅពេលកម្លាំងចុះទៅដល់ បានឃើញក្មេងៗ ដែលមិនដេកពួន ចំនួន ១២នាក់ កំពុងបង្កសម្លេងរំខានឡូឡា ទើបកម្លាំងឃាត់ខ្លួន បញ្ជូនតាមរថយន្ត មកកាន់សាលាខណ្ឌមានជ័យ ដើម្បីសួរនាំ ។

ក្រោយឃាត់គណៈបញ្ជាការឯកភាពខណ្ឌ បានប្រគល់ក្មេងទាំង១២នាក់ បញ្ជូនទៅអធិការនគរបាលខណ្ឌ ដើម្បីចាត់ការតាមនិតិវិធី៕ អត្ថបទ ៖ រដ្ឋា

The post គណៈបញ្ជាការឯកភាពខណ្ឌមានជ័យ ចុះរដ្ឋបាលឃាត់ខ្លួនក្មេងៗប្រមូលផ្តុំគ្នា អត់ដេកពួនរំខានដល់ប្រជាពលរដ្ឋ appeared first on Kampuchea Thmey Daily.

ពលរដ្ឋនៅជ្រោយចង្វារ ស្នើឲ្យអាជ្ញាធរអន្តរាគមន៍ ការបង្កសំឡេងរំខានដោយធុងបាស់ពីសំណាក់អា ជីវករលក់ដូរភេសជ្ជៈពេលរាត្រី

Sokhom Khon — Thu, 13 Nov 2025 08:45:57 +0000

ប្រជាពលរដ្ឋរស់នៅខណ្ឌជ្រោយចង្វារស្នើឱ្យអាជ្ញាធររាជធានីភ្នំពេញជួយអន្តរាគមន៍ពាក់ព័ន្ធការរំខានដោយសំឡេងធុងបាស់ពីសំណាក់ជីវករលក់ដូរភេសជ្ជៈពេលរាត្រី និងស្នើសុំជួសជុលផ្លូវមួយខ្សែ ក្នុងសង្កាត់ព្រែកតាសេក។ ការស្នើបែបនេះ បានធ្វើឡើងនៅក្នុងវេទិការសាធារណៈ នៅផ្សាររុងរឿង សង្កាត់ព្រែកលាប នាថ្ងៃទី១៣ ខែវិច្ឆិកា ឆ្នាំ២០២៥នេះ ក្រោមអធិបតីលោក ជួប ខុន សមាជិកក្រុមប្រឹក្សារាជធានីភ្នំពេញ តំណាងលោក ម៉ប សារិន ប្រធានក្រុមប្រឹក្សារាជធានីភ្នំពេញ និងលោក ឃ្លាំង ហួត អភិបាលរងតំណាងលោក ឃួង ស្រេង អភិបាលរាជធានីភ្នំពេញ ។

ចំពោះសំណូមពរ និងសំណើររបស់ពលរដ្ឋខាងលើ ត្រូវបានលោក ឃ្លាំង ហួត ឆ្លើយតបជូនភ្លាមៗ ពាក់ព័ន្ធនឹងអាជីវករលក់ដូរពេលរាត្រីតាមដងផ្លូវ បង្កសំឡេងរំខាន ដោយការចាក់ធុងបាស់ដល់កណ្តាលអាធ្រាត្រ។ លោក ឃ្លាំង ហួត បានណែនាំឱ្យអាជ្ញាធរចុះទៅអប់រំ និងមិនត្រូវឱ្យមានការរំខានបែបនេះឡើយ ហើយអាជីវករលក់ដូរ ក៏ត្រូវប្រកបរបររកស៊ីដោយក្រមសីលធម៌ និងការទទួលខុសត្រូវខ្ពស់។ ដោយឡែកអាជ្ញាធរចុះអប់រំ ក្នុងនាមជាអាណាព្យាបាល របស់ពលរដ្ឋក្នុងមូលដ្ឋាន ក៏មិនត្រូវប្រើប្រាស់កម្លាំង ឬទង្វើមិនគប្បីណាមួយលើអាជីវកនោះដែរ។

ដោយឡែក ពាក់ព័ន្ធសំណើជួសជុលផ្លូវ លោកអភិបាលរង បានបញ្ជាក់ថា គឺស្ថិតក្នុងគម្រោងរបស់ក្រុមហ៊ុនឯកជន ហើយលោកសន្យាជំរុញដល់ក្រុមហ៊ុនឯកជន ឱ្យមានវិធានការឱ្យបានឆាប់តាមដែលអាចទៅបាន ដើម្បីបម្រើឱ្យផលប្រយោជន៍ជូនប្រជាជន ។

បន្ថែមលើនេះលោក ឃ្លាំង ហួត បានកត់សម្គាល់ថា ខណ្ឌជ្រោយចង្វារ ក្រោមការដឹកនាំរបស់លោក ឃួង ស្រេង ជាអភិបាលរាជធានីភ្នំពេញ ដែលមានការចង្អុលបង្ហាញផ្ទាល់ដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យខណ្ឌជ្រោយចង្វារ ប្រែក្លាយពីដីបឹង ទឹកលិច គ្មានផ្លូវ មកជាខណ្ឌមួយអភិវឌ្ឍរីកចម្រើន មានផ្លូវខ្វាត់ខ្វែង គួរឱ្យកត់សម្គាល់។

លោក ជួប ខុន បានលើកឡើងថា វេទិកាផ្សព្វផ្សាយ និងពិគ្រោះយោបល់នា ថ្ងៃនេះ នឹងផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយសម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើល លើការផ្តល់សេវាសាធារណៈ របស់រដ្ឋបាលរាជធានីភ្នំពេញ រដ្ឋបាលខណ្ឌ រដ្ឋបាលសង្កាត់៕

អត្ថបទ៖ ស្រីរ័ត្ន

The post ពលរដ្ឋនៅជ្រោយចង្វារ ស្នើឲ្យអាជ្ញាធរអន្តរាគមន៍ ការបង្កសំឡេងរំខានដោយធុងបាស់ពីសំណាក់អា ជីវករលក់ដូរភេសជ្ជៈពេលរាត្រី appeared first on Kampuchea Thmey Daily.

WHO ព្រមានថា ស្តាប់សំឡេងខ្លាំងៗពីកាសអាចធ្វើឲ្យយើងថ្លង់

Sonya — Wed, 04 Aug 2021 06:25:23 +0000

អង្គការសុខភាពពិភពលោក (WHO) បានព្រមានពីផលវិបាកលើសុខភាពផ្លូវកាយ និងផ្លូវចិត្ត ការអប់រំ និងអាជីព បណ្ដាលមកពីការបាត់បង់សោតវិញ្ញាណ។ អង្គការនេះ បានណែនាំឲ្យបន្ថយសំឡេងចំពោះឧបករណ៍ស្ដាប់សំឡេងនានា ប្រើប្រាស់កាសកាត់បន្ថយសំឡេងមិនចាំបាច់ និងពាក់កាស នៅពេលទៅកន្លែងមានសំឡេងខ្លាំង។

ទិន្នន័យពីអង្គការសុខភាពពិភពលោក បានបង្ហាញថា ជិត ៥០% នៃក្មេងជំទង់ និងមនុស្សពេញវ័យ ពី ១២-៣៥ ឆ្នាំ បានរងការប៉ះពាល់ទៅនឹងកម្រិតមិនមានសុវត្ថិភាពនៃសំឡេងចេញពីឧបករណ៍ស្ដាប់ផ្ទាល់ខ្លួន។ ចំណែក ៤០% បានរងការប៉ះពាល់កម្រិតសំឡេងនៅតាមទីតាំងកម្សាន្ដនានា នាំឲ្យខូតខាតសោតវិញ្ញាណ។ កត្ដាទាំងនេះ អាចឈានទៅការបំផ្លាញកោសិកាស្ដាប់ ធ្វើឲ្យយើងថ្លង់រៀងរហូត។

ការបាត់បង់សរសៃប្រសាទសោតវិញ្ញាណ ជាបញ្ហាសុខភាពមួយ ដោយសារបានប៉ះពាល់កម្រិតសំឡេងមិនមានសុវត្ថិភាព។ នេះបើតាមលោក Pan Tao អ្នកជំនាញផ្នែកសោតនៃសាកលវិទ្យាល័យ Peking ក្នុងក្រុងប៉េកាំង ប្រទេសចិន។ នាយកដ្ឋានលោក បានទទួលអ្នកជំងឺកាន់តែច្រើនឡើង ជាមួយពិការភាពផ្នែកត្រចៀក ក្នុងនោះរួមមានក្មេងជំទង់ជាច្រើនផងដែរ។

លោក Pan Tao បន្ថែមថា “អ្នកបាត់បង់ការសា្ដប់ដំណាក់ដំបូង (Mild Hearing Loss) ជាធម្មតា អាចធ្វើការទំនាក់ទំនងប្រចាំថ្ងៃដោយគ្មានបញ្ហានោះទេ ប៉ុន្ដែការបំផ្លាញ អាចនឹងមិនត្រលប់មកដូចដើមនោះទេ បើមិនបានព្យាបាលត្រឹមត្រូវ ក្នុងរយៈពេល ២-៣ ខែ ដំបូង“៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ រងសំឡេងរំខានរយៈពេលយូរ ប៉ះពាល់សុខភាពលើសពីអ្វីយើងគិត

ចុចអាន៖ តន្រ្តីមានប្រយោជន៍ដល់សុខភាព លើសពីអ្វីយើងធ្លាប់ដឹង

The post WHO ព្រមានថា ស្តាប់សំឡេងខ្លាំងៗពីកាសអាចធ្វើឲ្យយើងថ្លង់ appeared first on Kampuchea Thmey Daily.

រងសំឡេងរំខានរយៈពេលយូរ ប៉ះពាល់សុខភាពលើសពីអ្វីយើងគិត

Sonya — Mon, 12 Jul 2021 02:00:00 +0000

អ្នកនៅតាមទីក្រុង ឬទីប្រជុំជននានាទំនងជាសុទ្ធតែជួបហើយការរំខានដោយសំឡេង ចេញពីកន្លែងសិប្បកម្ម សំឡេងពីឧបករណ៍បំពងសំឡេង ស៊ីផ្លេឬសំឡេងយានយន្ត និងសំឡេងយន្តហោះ ជាដើម។ យើងពិតជាដឹងហើយថាសំឡេងទាំងនេះរំខានត្រចៀកយើងកម្រិតណា តែថាគ្នាយើងដឹងទេការបំពុលដោយសំឡេងប៉ះពាល់ដល់សុខភាពបេះដូងដែរ?

ការសិក្សាមួយចុះផ្សាយនៅក្នុងព្រឹត្តិបត្រ Journal of the American College of Cardiology បានបង្ហាញថាការបំពុលដោយសំឡេងនឹងធ្វើឲ្យមនុស្សយើងប្រឈមនឹងជំងឺសរសៃអាក់ទែ ជំងឺលើសសម្ពាធឈាម និងខ្សោយបេះដូង។

ការសិក្សាឲ្យដឹងទៀតថាកាលពីជាងមួយទសវត្សរ៍មុន គេគិតថាសំឡេងឮខ្លាំងៗគ្រាន់តែរំខានត្រចៀក តែពេលនេះមានភ័ស្តុតាងអាចយកមកពិចារណាបានថាសំឡេងក៏ធ្វើឲ្យមនុស្សយើងមានបញ្ហាសុខភាព ពិសេសជំងឺបេះដូង។

ការស្រាវជ្រាវដដែលបន្តថា ការទទួលរងនូវសំឡេងរំខានក្នុងរយៈពេលយូរ មិនខុសអីពីយើងកំពុងតែប្រមូលផ្ដុំកូលេស្តេរ៉ូលនៅក្នុងខ្លួន និងជំងឺធាត់នោះទេ ដែលសុទ្ធតែជាកត្តាប្រឈមកើតជំងឺបេះដូង។

សំឡេងឮៗ ដែលធ្វើឲ្យយើងមិនអាចទ្រាំបាន ក៏អាចរំញោចឲ្យការឆ្លើយតបស្រ្តេសនៅក្នុងខួរក្បាល ពេលនោះនឹងមានការបញ្ចេញអ័រម៉ូន adrenaline និងcortisol ដែលធ្វើឲ្យសរសៃឈាមអាក់ទែរួមតូច អាចបង្កឲ្យសម្ពាធឈាមកើនឡើង និងទំនងជាអាចធ្វើឲ្យមានកំណកឈាមផងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ សុខៗសំឡេងប្រែជាស្អក អាចបង្កបញ្ហាធ្ងន់ធ្ងរដែររឺទេ?

ចុចអាន៖ ការស្រាវជ្រាវថ្មីបង្ហាញថា អ្នកជំងឺកូវីដ-១៩បានបាត់បង់សមត្ថភាពស្តាប់សំឡេង

The post រងសំឡេងរំខានរយៈពេលយូរ ប៉ះពាល់សុខភាពលើសពីអ្វីយើងគិត appeared first on Kampuchea Thmey Daily.

គន្លឹះជួយក្នុងការគេងបានលក់ស្រួល គ្មានសំឡេងរំខានពេញមួយយប់

សាង ស្រីល័ក្ខ — Mon, 21 Jun 2021 05:05:28 +0000

គេងមិនលក់អាចជារោគមួយប្រចាំកាយ ឬដោយសារយើងគិតច្រើនធ្វើឲ្យខួរក្បាលស្មុគស្មាញ។ មានមនុស្សខ្លះពិបាកក្នុងការគេង ហើយបានប្រើគ្រប់វិធីដើម្បីជួយឲ្យដំណេកគេងលក់ស្រួល។

ខាងក្រោមនេះជាគន្លឹះខ្លះៗបន្ថែមទៀត សម្រាប់ជួយឲ្យគេងលក់ និងភ្ញាក់មកមានអារម្មណ៍ស្រស់ស្រាយ។

១ ដាក់ម៉ោងរោទិ៍ឆ្ងាយពីខ្លួន

ការជួសជុលដ៏សាមញ្ញចំពោះបញ្ហានេះគឺដាក់នាឡិការោទ៍ឬទូរស័ព្ទនៅលើឥដ្ឋ។ ប៉ុន្តែត្រូវប្រយ័ត្នពីរបៀបដែលអ្នកដាក់ប្រយ័ត្នវាមិនលឺ អាចធ្វើឲ្យយើងមិនដឹងខ្លួនឬយឺតម៉ោងការងារ។

២ ធ្វើលំហាត់ប្រាណមុនគេង

ការសិក្សាបានបង្ហាញថា អ្នកដែលបានហាត់ប្រាណទៀងទាត់អាចជួយឲ្យគេងលក់ស្រួលជាងអ្នកដែលមិនធ្វើលំហាត់ប្រាណសោះ។ នៅពេលរាងកាយអស់កម្លាំង បន្ទាប់ពីហាត់ប្រាណខ្លាំង នោះយើងនឹងអាចសម្រាកបានស្រួលជាងមុន។ ភាពអសកម្មគ្រាន់តែបណ្ដុះបណ្ដាលរាងកាយឲ្យខ្ជិល ហើយមិនអាចមិនគេងលក់ស្រួល។

៣ ឈប់គិតរឿងឥតបានការ

ឈប់បារម្ភពីរឿងដែលអ្នកមិនអាចគ្រប់គ្រងបាន។ តើការព្រួយបារម្ភនាំមកនូវផលល្អអ្វីខ្លះនៅពេលយប់? ជំនួសឲ្យការគិតអំពីបញ្ហារស្មុគស្មាញនៅពេលយប់ សូមគិតពីគំនិតវិជ្ជមាន ដែលជួយអ្នកឲ្យយើងបានសម្រាកបានលក់ស្រួល។

៤ កុំផឹកកាហ្វេពេលរសៀល

ជាតិកាហ្វេអ៊ីនអាចមានប្រយោជន៍ ធ្វើឲ្យយើងស្វាងងងុយនៅកន្លែងធ្វើការ។ ដោយសារតែយើងភាគច្រើនចំណាយពេលប្រហែល ៤ ទៅ ៦ ម៉ោងដើម្បីរំលាយជាតិកាហ្វេអ៊ីន អ្នកខ្លះថែមទាំងចំណាយពេលយូរ។ ដូច្នេះការផឹកនៅពេលរសៀល វាមិនបានជួយឲ្យយើងគេងលក់ស្រួលទេ។

៥ កុំប្រើប្រាស់ឧបករណ៏អេឡិចត្រូនិក

ពន្លឺពណ៌ខៀវនឹងរារាំងយើងមិនឲ្យដេកលក់ ព្រោះវាធ្វើឲ្យការផលិតមេឡានីនថយចុះ ដែលជាអរម៉ូនគេងផលិតនៅពេលយប់។ ប្រសិនបើអ្នកមានការងារត្រូវធ្វើ ឬប្រើប្រាស់បណ្ដាញសង្គម សូមប្រាកដថាយើងបានប្រើមួយម៉ោងមុនពេលអ្នកចូលគេង។

៦ ចៀសវាងការហូបស្រាពេលយប់

ជៀសវាងការទទួលទានស្រាច្រើន ជាពិសេសពេលយប់។ នេះដោយសារតែការផឹកស្រាធ្វើឲ្យសីតុណ្ហភាពរាងកាយឡើងខ្ពស់ ហើយធ្វើឲ្យប្រព័ន្ធសរសៃប្រសាទផ្សេងទៀតភ្ញាក់ឡើងមក។ សូមផឹកស្រាតិចបំផុត និងឲ្យបានត្រឹមត្រូវទើបអាចគេងលក់ស្រួល។

៧ លុបបំបាត់សំឡេងរំខានទាំងអស់

យើងត្រូវការសន្តិភាពនិងស្ងប់ស្ងាត់ខ្លះ ដើម្បីគេង ដូច្នេះត្រូវប្រាកដថាយើងបានបំបាត់សំឡេងរំខានទាំងអស់នៅជុំវិញបន្ទប់គេងឬផ្ទះរបស់យើង។

៨ ធ្វើឲ្យកន្លែងដេកស្រស់ស្រាយ

ពូកឬកម្រាលក្រាលដេកក៏ជាបញ្ហាដែរ ទាំងនោះសុទ្ធតែជាមូលហេតុដែលធ្វើឲ្យអ្នកគេងមិនលក់។ ជាមធ្យមពូកគួរតែផ្លាស់ប្តូររៀងរាល់ ៧ ឆ្នាំម្តង។ ដូច្នេះវាជាការប្រសើរក្នុងការទិញគ្រែថ្មី ពូកថ្មី ដែលល្អទំនើបជាមួយបច្ចេកវិទ្យាចុងក្រោយ។

៩ បរិភោគអាហារធ្វើឲ្យគេងលក់ស្រួល

របបអាហារដែលមានជាតិ tryptophan ខ្ពស់ដូចជាផលិតផលទឹកដោះគោ ឬនំប៉័ង អាចជួយអ្នកសម្រាកបានស្រួល។ ដូច្នេះជំនួសឲ្យការញ៉ាំអាហារដែលគ្មានសារធាតុចិញ្ចឹមមុនពេលអ្នកគេង សូមបរិភោគអាហារទាំងនេះជំនួស៕

ប្រែសម្រួល៖ សាង ស្រីល័ក្ខ

ប្រភព៖practicalheal

ចុចអាន៖តៃជីធ្វើឲ្យប្រសើរឡើងនូវជំងឺធ្លាក់ទឹកចិត្ត ថប់បារម្ភ ចំពោះអ្នកជាសះស្បើយពីជំងឺដាច់សរសៃឈាមខួរក្បាល

ចុចអាន៖ការប៉ះទង្គិចផ្លូវចិត្ត ដាក់សម្ពាធច្រើនទៅលើអារម្មណ៍ និងការរស់នៅមនុស្សយើង

The post គន្លឹះជួយក្នុងការគេងបានលក់ស្រួល គ្មានសំឡេងរំខានពេញមួយយប់ appeared first on Kampuchea Thmey Daily.

សំឡេងរំខាន Archives - Kampuchea Thmey Daily

គណៈបញ្ជាការឯកភាពខណ្ឌមានជ័យ ចុះរដ្ឋបាលឃាត់ខ្លួនក្មេងៗប្រមូលផ្តុំគ្នា អត់ដេកពួនរំខានដល់ប្រជាពលរដ្ឋ

WHO ព្រមានថា ស្តាប់សំឡេងខ្លាំងៗពីកាសអាច​ធ្វើឲ្យយើង​​ថ្លង់

រង​​សំឡេង​រំខានរយៈពេលយូរ ប៉ះពាល់​សុខភាពលើសពីអ្វី​យើង​គិត​

គន្លឹះជួយក្នុងការគេងបានលក់ស្រួល គ្មានសំឡេងរំខានពេញមួយយប់

WHO ព្រមានថា ស្តាប់សំឡេងខ្លាំងៗពីកាសអាចធ្វើឲ្យយើងថ្លង់

រងសំឡេងរំខានរយៈពេលយូរ ប៉ះពាល់សុខភាពលើសពីអ្វីយើងគិត