ពលរដ្ឋនៅជ្រោយចង្វារ ស្នើឲ្យអាជ្ញាធរអន្តរាគមន៍ ការបង្កសំឡេងរំខានដោយធុងបាស់ពីសំណាក់អា ជីវករលក់ដូរភេសជ្ជៈពេលរាត្រី

ប្រជាពលរដ្ឋរស់នៅខណ្ឌជ្រោយចង្វារស្នើឱ្យអាជ្ញាធររាជធានីភ្នំពេញជួយអន្តរាគមន៍ពាក់ព័ន្ធការរំខានដោយសំឡេង​ធុងបាស់ពីសំណាក់ជីវករលក់ដូរភេសជ្ជៈពេលរាត្រី និងស្នើសុំជួសជុលផ្លូវមួយខ្សែ ក្នុងសង្កាត់ព្រែកតាសេក។ ការស្នើបែបនេះ បានធ្វើឡើងនៅក្នុងវេទិការសាធារណៈ នៅផ្សាររុងរឿង សង្កាត់ព្រែកលាប នាថ្ងៃទី១៣ ខែវិច្ឆិកា ឆ្នាំ២០២៥នេះ ក្រោមអធិបតីលោក ជួប ខុន សមាជិកក្រុមប្រឹក្សារាជធានីភ្នំពេញ តំណាងលោក ម៉ប សារិន ប្រធានក្រុមប្រឹក្សារាជធានីភ្នំពេញ និងលោក ឃ្លាំង ហួត អភិបាលរងតំណាងលោក ឃួង ស្រេង អភិបាលរាជធានីភ្នំពេញ ។

ចំពោះសំណូមពរ និងសំណើររបស់ពលរដ្ឋខាងលើ ត្រូវបានលោក ឃ្លាំង ហួត ឆ្លើយតបជូនភ្លាមៗ ពាក់ព័ន្ធនឹងអាជីវករ​លក់ដូរពេលរាត្រីតាមដងផ្លូវ បង្កសំឡេងរំខាន ដោយការចាក់ធុងបាស់ដល់កណ្តាលអាធ្រាត្រ។ លោក ឃ្លាំង ហួត បានណែនាំឱ្យអាជ្ញាធរចុះទៅអប់រំ និងមិនត្រូវឱ្យមានការរំខានបែបនេះឡើយ ហើយអាជីវករលក់ដូរ ក៏ត្រូវប្រកបរបររកស៊ីដោយក្រមសីលធម៌ និងការទទួលខុសត្រូវខ្ពស់។ ដោយឡែកអាជ្ញាធរចុះអប់រំ ក្នុងនាមជាអាណាព្យាបាល របស់ពលរដ្ឋក្នុងមូលដ្ឋាន ក៏មិនត្រូវប្រើប្រាស់កម្លាំង ឬទង្វើមិនគប្បីណាមួយលើអាជីវកនោះដែរ។

ដោយឡែក ពាក់ព័ន្ធសំណើជួសជុលផ្លូវ លោកអភិបាលរង បានបញ្ជាក់ថា គឺស្ថិតក្នុងគម្រោងរបស់ក្រុមហ៊ុនឯកជន ហើយលោកសន្យាជំរុញដល់ក្រុមហ៊ុនឯកជន ឱ្យមានវិធានការឱ្យបានឆាប់តាមដែលអាចទៅបាន ដើម្បីបម្រើឱ្យផលប្រយោជន៍ជូនប្រជាជន ។

បន្ថែមលើនេះលោក ឃ្លាំង ហួត បានកត់សម្គាល់ថា ខណ្ឌជ្រោយចង្វារ ក្រោមការដឹកនាំរបស់លោក ឃួង ស្រេង ជាអភិបាលរាជធានីភ្នំពេញ ដែលមានការចង្អុលបង្ហាញផ្ទាល់ដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យខណ្ឌជ្រោយចង្វារ ប្រែក្លាយពីដីបឹង ទឹកលិច គ្មានផ្លូវ មកជាខណ្ឌមួយអភិវឌ្ឍរីកចម្រើន មានផ្លូវខ្វាត់ខ្វែង គួរឱ្យកត់សម្គាល់។

លោក ជួប ខុន បានលើកឡើងថា វេទិកាផ្សព្វផ្សាយ និងពិគ្រោះយោបល់នា ថ្ងៃនេះ នឹងផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយសម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើល លើការផ្តល់សេវាសាធារណៈ របស់រដ្ឋបាលរាជធានីភ្នំពេញ រដ្ឋបាលខណ្ឌ រដ្ឋបាលសង្កាត់៕

អត្ថបទ៖ ស្រីរ័ត្ន