តាមរយៈសេចក្តីប្រកាសរបស់ស្ថានទូតបារាំងប្រចាំកម្ពុជា រហូតដល់ថ្ងៃទី២១ ខែមីនា ឆ្នាំ២០២៦ វិទ្យាស្ថានបារាំង នឹងរៀបចំឱ្យមានជំនួបជាមួយអ្នកនិពន្ធសៀវភៅរឿង និងជំនួបផ្សេងទៀត ដើម្បីអបអរភាសាបារាំងតាមរយៈចម្រៀង ឬសិល្បៈនៃការថ្លែងជាសាធារណៈ ការចាក់បញ្ចាំងភាព​យន្ត​​និយាយភាសាបារាំងដែលមានការគាំទ្រពីអង្គការអន្តរជាតិហ្រ្វង់កូហ្វូនី (OIF) រឿងនិទានភាសាបារាំងសម្រាប់កុមារ និងការសម្ដែងល្ខោននិយាយ “Maliroots” ដែលនិពន្ធ និងសម្តែងដោយសិល្បករពហុជំនាញ Ladji Diallo ។

ទិវាអន្តរជាតិហ្វ្រង់កូហ្វូនី និងសប្តាហ៍ភាសាបារាំង ត្រូវបាន​រៀបចំឡើងជារៀងរាល់ឆ្នាំ នៅក្នុងអំឡុងថ្ងៃទី២០​ ខែមីនា ក្រោមការផ្ដួចផ្ដើមរបស់ក្រសួងវប្បធម៌បារាំង។ កម្មវិធីនេះ បានក្លាយទៅជាព្រឹត្តិការណ៍​អន្តរជាតិដ៏សំខាន់មិនអាចខ្វះបានសម្រាប់គ្រប់វិទ្យាស្ថាន និងស្ថានទូតបារាំងជុំវិញពិភពលោក។ ជាពេលវេលាវប្បធម៌ អប់រំ និងការកម្សាន្តសម្រាប់សាធារណៈជន ភាសាបារាំងបានក្លាយទៅជាចលករនៃភាពរីករាយ ការបំផុសគំនិត កិច្ចសន្ទនាលើព្រឹត្តិការណ៍នានា និងសកម្ម​ភាព​គរុកោសល្យ ។

ក្នុងឆ្នាំនេះ ហ្រ្វង់កូហ្វូនីត្រូវបានប្រារព្ធឡើងដោយមានទស្សនីយ៍ភាពដ៏រស់រវើក ជាមួយនឹងការសម្ដែងរឿងល្ខោន “Maliroots” របស់លោក Ladji Diallo នៅភ្នំពេញ សៀមរាប និង​បាត់ដំបង អមដោយសិក្ខាសាលាសម្រាប់សិស្សានុសិស្ស និងនិស្សិតសាកលវិទ្យាល័យដែលប្រើប្រាស់ភាសាបារាំង ។ លោកស្រី Julie Dupré អ្នកនិទានរឿង មកពីប្រទេស Nouvelle Calédonie ក៏នឹងសម្តែងនៅតាមគ្រឹះស្ថានឧត្តមសិក្សាផងដែរ ដែលគាំទ្រដោយមជ្ឈមណ្ឌលកិច្ចប្រជុំ និងផ្លាស់ប្តូរអន្តរជាតិប៉ាស៊ីហ្វិក (CREIPAC) និងអង្គការអន្តរជាតិហ្រ្វង់កូហ្វូនី (OIF) ។

បើតាមស្ថានទូតបារាំងប្រចាំកម្ពុជា បច្ចុប្បន្នមាននិស្សិតជាង ២២ ០០០នាក់ កំពុងសិក្សាភាសាបារាំងនៅប្រទេសកម្ពុជា។ ស្ថានទូតបារាំងផ្តល់ការគាំទ្រដល់ការបង្រៀនភាសាបារាំងនៅក្នុងប្រព័ន្ធអប់រំកម្ពុជា តាមរយៈការបណ្តុះបណ្តាលគ្រូ និងការរៀបចំសកម្មភាពផ្សេងៗសម្រាប់សិស្ស ដើម្បីបង្ហាញពីភាពរស់រវើក និងភាពទាក់ទាញនៃភាសាបារាំងនៅក្នុងវិថីសិក្សា និងអាជីពការងាររបស់ពួកគេ។

កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ ក្នុងខែវិច្ឆិកា ឆ្នាំ២០២៦ ដែលជាលើកទី២ ក្នុងតំបន់អាស៊ី បន្ទាប់ពីរយៈពេលជិត ៣០ឆ្នាំ ក្រោយកិច្ចប្រជុំកំពូលនៅទីក្រុងហាណូយឆ្នាំ ១៩៩៧។ កិច្ចប្រជុំកំពូលខាងលើ នឹងជាឱកាសបង្ហាញពីភាពរស់រវើកនៃហ្វ្រង់កូហ្វូនីនៅអាស៊ីអាគ្នេយ៍ ក៏ដូចជាឧទ្ទិសថ្វាយព្រះបរមរតនកោដ្ឋ នរោត្តម សីហនុ ដែលទ្រង់ជាបិតាស្ថាបនិកមួយអង្គនៃហ្វ្រង់កូហ្វូនីពហុភាគី។

លោកព្យែរ វ៉ាំងសង់ ទីប្រឹក្សាសហប្រតិបត្តិការ និងសកម្មភាពវប្បធម៌ និងជានាយកវិទ្យាស្ថានបារាំងនៅកម្ពុជាបានមានប្រសាសន៍ថា «ហ្វ្រង់កូហ្វូនីនៅកម្ពុជាមានភាពសកម្មខ្លាំង ជាពិសេសក្នុងវិស័យសំខាន់ៗមួយចំនួនដូចជា ច្បាប់ សេដ្ឋកិច្ច វេជ្ជសាស្ត្រ វិស្វកម្ម កិច្ចសហប្រតិបត្តិការយោធា ឬឧស្សាហកម្មវប្បធម៌ និងកែច្នៃ។ ការចេះភាសាបារាំងគឺជាការធានានូវសមាជិកភាពក្នុងសហគមន៍ដែលមានអ្នកនិយាយភាសាបារាំងចំនួន ៣៤៣ លាននាក់ជុំវិញពិភពលោក ។ កិច្ចប្រជុំកំពូលហ្រ្វង់កូហ្វូនីនឹងជាឱកាសមួយដើម្បីបង្កើតភាពសហការថ្មីរវាងប្រទេសកម្ពុជា និងពិភពនៃអ្នកប្រើប្រាស់ភាសាបារាំង»៕ 

The post វិទ្យាស្ថាន​បារាំង និងស្ថានទូតបារាំងប្រចាំ​កម្ពុជា រៀបចំព្រឹត្តិការណ៍វប្បធម៌ ដើម្បីអបអរកិច្ចប្រជុំកំពូលហ្រ្វង់កូហ្វូនី appeared first on Kampuchea Thmey Daily.

ស្ថានទូតបានបញ្ជាក់ថា កាលពីឆ្នាំមុន ផ្សារបារាំងទទួលបានការគាំទ្រយ៉ាងខ្លាំង ដោយមានអ្នកចូលទស្សនាជាង ១ម៉ឺននាក់ ហេតុនេះ នៅឆ្នាំ២០២៥ នឹងមានការតាំងពិព័រណ៍ជាង ៧០ រួមទាំងការតាំងបង្ហាញផលិតផល និងសេវាកម្មជាច្រើនប្រភេទ ដូចជាមុខ‍ម្ហូបពិសេសៗរបស់បារាំង និងការភ្លក់រសជាតិមុខម្ហូបឆ្ងាញ់ៗជាច្រើន។ បន្ថែមពីនេះ ក៏មានសកម្មភាពកីឡាផ្សេងៗ ទីលានវាយកូនបាល់ អមជាមួយសួនច្បារដ៏ស្រស់ស្អាតរបស់ស្ថានទូត ដែលអាចឱ្យមហាជនទទួលបានអារម្មណ៍ស្រស់ថ្លា ខ្យល់អាកាសបរិសុទ្ធ និងការបន្ធូរអារម្មណ៍ជាមួយធម្មជាតិ។

សូមបញ្ជាក់ថា ការចូលរួមនេះមិនគិតថ្លៃនោះទេ ចំពោះកាតាប ឬកាបូប សត្វចិញ្ចឹម ឬសម្ភារៈសំពីងសំពោង មិនត្រូវបានអនុញ្ញាតឱ្យយកចូលឡើយ៕

The post ស្ថានទូតបារាំង នឹងបើកទ្វារ​ឱ្យសាធារណជនចូលរួមទស្សនាដោយសេរី នូវព្រឹត្តិការណ៍ផ្សារបារាំងឆ្នាំ២០២៥ appeared first on Kampuchea Thmey Daily.

ការចាប់ផ្តើមជាផ្លូវការនៃបេសកកម្មរបស់លោកឯកអគ្គរដ្ឋទូត អូលីវ្យេ រីឆា នៅកម្ពុជាពេលនេះ ដើម្បីជំនួសលោក ហ្សាក់ ប៉ឺឡេ (Jacques Pellet) ដែលត្រូវចប់អាណត្តិការងារ។ លោក ហ្សាក់ ប៉ឺឡេ ដែលទទួលបានការតែងតាំងជាឯកអគ្គរដ្ឋទូតបារាំងប្រចាំកម្ពុជា កាលពីឆ្នាំ២០២១ ត្រូវបញ្ចប់មុខងារការទូតក្នុងឆ្នាំ២០២៥នេះ។

រយៈពេល៤ឆ្នាំនៅកម្ពុជា លោក ហ្សាក់ ប៉ឺឡេ បានធ្វើការយ៉ាងសកម្មក្នុងការរួមចំណែកពង្រឹងពង្រីកនូវទំនាក់ទំនងជាមិត្ត ភាព និងកិច្ចសហប្រតិបត្តិការដែលផ្សារភ្ជាប់ប្រទេសកម្ពុជា និងប្រទេសបារាំងកាន់ជិតស្និទ្ធិ ដែលក្នុងនោះវិស័យជាច្រើននៃកិច្ចសហប្រតិបត្តិការដ៏សម្បូរបែប​រវាងប្រទេសទាំងពីរត្រូវបានចងរឹត ជាពិសេសការលើកកម្ពស់ភាសាបារាំង និងការអភិរក្សបេតិកភណ្ឌ។

បន្តពីឯកអគ្គរដ្ឋទូតចាស់ លោកឯកអគ្គរដ្ឋទូតថ្មី អូលីវ្យេ រីឆា ក្នុងឱកាសថ្វាយសារតាំងព្រះមហាក្សត្រកម្ពុជា កាលពីព្រឹកថ្ងៃទី២០ ខែសីហា ឆ្នាំ២០២៥ នៅព្រះបរមរាជវាំង បានសម្តែងនូវក្ដីរីករាយ ដែលលោកអាចចាប់ផ្តើមបេសកកម្មការទូតនៅកម្ពុជា។ តាមខ្លឹមសារចុះផ្សាយលើទំព័រហ្វេសប៊ុកស្ថានទូតបារាំងប្រចាំនៅកម្ពុជា លោក អូលីវ្យេ រីឆា គូសបញ្ជាក់​សាជាថ្មីពីការប្តេជ្ញាចិត្តរបស់លោកក្នុងការពង្រឹងទំនាក់ទំនងមិត្តភាព និងកិច្ចសហប្រតិបត្តិការដែលមានជាយូរមកហើយរវាងប្រទេសបារាំង និង​ប្រទេសកម្ពុជា៕

The post អូលីវ្យេ រីឆា រដ្ឋទូតបារាំងថ្មីចាប់ផ្ដើមបេសកកម្មនៅកម្ពុជា ដោយបានថ្វាយសារតាំងព្រះមហាក្សត្រ appeared first on Kampuchea Thmey Daily.

នៅថ្ងៃទី០៥ ខែសីហា អង្គការដើម្បីភាពញញឹមនៃកុមារ (PSE)  បានប្រកាសពីដំណឹងមរណភាពរបស់ កញ្ញា “Lisa Girard-Fabre”  ដែលជាប្រធានគម្រោងអប់រំ នៃសាលាពាណិជ្ជសាស្រ្ដ ផ្នែកគ្រប់គ្រង និងការលក់របស់អង្គការ។ បើតាមអង្គការដើម្បីភាពញញឹមនៃកុមារ (PSE)  កញ្ញាLisa បានបាត់ខ្លួនតាំងពីព្រឹកថ្ងៃសៅរ៍ទី០២ ខែសីហា ឆ្នាំ២០២៥ អំឡុងពេលរត់ ក្នុងបរិវេណប្រាសាទអង្គរវត្ត ជាមួយមិត្តភក្តិរបស់ខ្លួន។  

ស្នងការដ្ឋាននគរបាលខេត្តសៀមរាបឱ្យដឹងថា កាលពីថ្ងៃទី២ ខែសីហា សមត្ថកិច្ចនគរបាលថ្នាក់ក្រោមទទួលបានព័ត៌មាន ពីតំណាងស្ថានកុងស៊ុលកិត្តិយសបារាំងប្រចាំខេត្តសៀមរាប និងបុគ្គលិកអង្គការ PSE អំពីករណីបាត់ដំណឹងស្ត្រីជនជាតិបារាំងម្នាក់ឈ្មោះថា Lisa Girard-Fabre នៅម្តុំប្រាសាទតាសោម អំឡុងពេលរត់សាកល្បងកម្មវិធីម៉ារ៉ាតុន ជាមួយមិត្តភក្តិ។

បន្ទាប់ពីទទួលព័ត៌មាននេះភ្លាមសមត្ថកិច្ចចម្រុះស្ថាប័ន បានចុះស្រាវជ្រាវដល់ទីតាំងដែលបាត់ដំណឹងចុងក្រោយ ពីចំណុចប្រាសាទតាសោម បន្តមកតាមព្រៃ ឧទ្យានអង្គរ មកដល់កស្សិណអង្គរខាងលិចកែងផ្លូវ៦០ម៉ែត្រ ចាប់ថ្ងៃទី២ ខែសីហា ឆ្នាំ២០២៥ រហូតដល់ព្រឹកថ្ងៃទី៤ ខែសីហា ឆ្នាំ២០២៥ ជាលទ្ធផលពុំមានតម្រុយពាក់ព័ន្ធនឹងដំណើររបស់ស្ត្រីជនជាតិបារាំងនោះឡើយ ។

លុះមកដល់ ម៉ោងប្រហែល ១០៖០៥នាទី ថ្ងៃទី៤ ខែសីហា សមត្ថកិច្ចក៏ទទួលបានសេចក្តីរាយការណ៍ពីពលរដ្ឋ ថា៖«នៅជម្រាលប្រឡាយអមផ្លូវ ៦០ម៉ែត្រ ត្រង់ចំណុចមុខចំហៀងខាងត្បូងអាហារដ្ឋានមាន់ស្រែ ឃើញសត្វរុយកំពុងរោមអ្វីមួយប៉ុន្តែមិនដឹងជាអ្វីនោះទេ»។  បន្ទាប់ពីទទួលបានព័ត៌មាននេះភ្លាមសមត្ថកិច្ចមានការសង្ស័យ ក៏បានចុះទៅពិនិត្យជាក់ស្តែងដល់កន្លែងកើតហេតុប្រទះឃើញសាកសព និងពិនិត្យឃើញថា ជាសពរបស់ស្ត្រីជនជាតិបារាំង កញ្ញា Lisa Girard-Fabreដែល បានបាត់ខ្លួនកាលពីថ្ងៃទី០២ ខែសីហា កន្លងទៅ។

ភ្លាមៗ សមត្ថកិច្ចជំនាញ រួមជាមួយគ្រូពេទ្យអមសាលាដំបូង និងតំណាងស្ថានកុងស៊ុលកិត្តិយសបារាំងប្រចាំខេត្តសៀមរាបបានស្រាវជ្រាវ និងធ្វើកោសល្យវិច័យ និងសន្និដ្ឋានថា ជនរងគ្រោះស្លាប់ដោយសារធ្លាក់ពីលើចិញ្ចើមផ្លូវ ដែលអាចបណ្តាលមកពីគាំងបេះដូង។ បច្ចុប្បន្ន សាកសពត្រូវបានសមត្ថកិច្ចបញ្ជូនទៅតម្កល់ទុកនៅមន្ទីរពេទ្យមិត្តភាពខ្មែរសូវៀត រាជធានីភ្នំពេញរង់ចាំការសម្រេចពីក្រុមគ្រួសារ និងស្ថានទូត។

ទំព័រហ្វេសប៊ុករបស់PSE ឱ្យដឹងថា កញ្ញា Lisa បានបំពេញបេសកកម្មមនុស្សធម៌ជាមួយអង្គការដើម្បីភាពញញឹមនៃកុមារចប់សព្វគ្រប់កាលពី ២ឆ្នាំមុន ដោយធ្វើដំណើរថ្មើរជើងពីទីក្រុងប៉ារីសប្រទេសបារាំង មកកាន់ទីក្រុងភ្នំពេញប្រទេសកម្ពុជា។ PSE ចាត់ទុកថា Lisa ជានារី ដែលមានភាពក្លាហាន មានភាពរួសរាយរាក់ទាក់ ព្រមទាំងមានសន្ដានចិត្តល្អ ចេះជួយយកអាសារអ្នកដទៃ៕

The post បុគ្គលិកអង្គការPSE​ ម្នាក់  សង្ស័យគាំងបេះដូងទើបធ្លាក់ពីលើចិញ្ចើមផ្លូវស្លាប់ក្នុងប្រឡាយនៅសៀមរាប appeared first on Kampuchea Thmey Daily.

ចាប់ពីថ្ងៃទី០៦ ខែឧសភា​ វេលាម៉ោង១៨៖៣០នាទី ពិព័រណ៍ «ប្រឈមមុខនឹងខ្មែរក្រហម­ស្ថានទូត​បារាំង​ជាប់​ចូល​​ក្នុង​ការដួលរលំទីក្រុងភ្នំពេញ (ថ្ងៃទី១៧ មេសា-០៨ ឧសភា ១៩៧៥)» នឹង​ប្រព្រឹត្ត​ទៅ​នៅ​វិទ្យាស្ថាន​បារាំង នៅកម្ពុជា។ កម្មវិធីនេះ រៀប​ចំ​ដោយ​ស្ថាន​ទូត​បារាំង និងវិទ្យាស្ថានបារាំង ក្រោមការចាត់ចែងរបស់​អ្នក​ស្រាវ​ជ្រាវ​បារាំងពីររូប ពិព័រណ៍​ខាងលើ​នឹង​បង្ហាញ​ពី​ព្រឹត្តិការណ៍ដ៏សោកនាដកម្មក្នុងសម័យនោះ អមដោយសក្ខីកម្ម រួមទាំងឯកសារ​ដែល​សាធារណជន​​មិន​ធ្លាប់​​​​ឃើញ ក្នុងនោះមានបណ្ណាសាររបស់ក្រសួងអឺរ៉ុប និងការបរទេសបារាំង រូបភាព និងវីដេអូផងដែរ។

នៅថ្ងៃពុធ ទី០៧ ខែឧសភា វេលាម៉ោង១៨៖៣០នាទី វេទិកាពិភាក្សាជាមួយសាធារណ​ជន​នឹង​ត្រូវ​ធ្វើ​ឡើង​នៅ​វិទ្យាស្ថានបារាំង ជាមួយវាគ្មិនពីរនាក់គឺ ពន្ធុវិទូ និងអ្នកនិពន្ធបារាំងឈ្មោះ François Bizot និង​អ្នក​ថត​រូបសា​រ​ព័ត៌មាន Roland Neveu។ បុគ្គលទាំងពីរនេះគឺជាសាក្សីនៃការដួលរលំទីក្រុងភ្នំពេញ។ កិច្ច​ពិភា​ក្សា​នេះនឹង​បើក​ជូន​សាធារណជន​ចូល​រួម​ដោយសេរី ដោយធ្វើឡើងជាភាសាបារាំង ជាមួយការបកប្រែជា​ភាសា​ខ្មែរ។

នៅថ្ងៃទី០៨ ខែឧសភា​ ដោយមានការចូលរួមពីអ្នករស់រានមានជីវិត សាក្សី តំណាងសង្គមស៊ីវិល តំណាង​អាជ្ញាធរ​កម្ពុជា និងអង្គទូត ស្ថានទូតបារាំងនឹងរៀបចំពិធីរំលឹក និងឧទ្ទិសដល់វិញ្ញាណក្ខន្ធរបស់អ្នក​ដែល​បានមក​ស្វែង​រក​ការ​ជ្រកកោននៅក្នុងស្ថានទូតបារាំង ព្រមទាំងជនរងគ្រោះទាំងអស់។

ជាងនេះទៅទៀត ចាប់ពីថ្ងៃទី១០ ខែឧសភា វិទ្យាស្ថានបារាំងនៅកម្ពុជានឹងចាក់បញ្ចាំងភាពយន្ត និងភាពយន្ត​​ឯកសារ​​ប្រមាណ​១២រឿង ​ដែល​ផ្តោត​លើ​ប្រវត្តិសាស្រ្តប្រទេសកម្ពុជាក្រោមរបបខ្មែរក្រហម ដោយសហការជាមួយ មជ្ឈ​មណ្ឌល​​បុប្ផាណា។ ជា​វណ្ណ​កម្ម​របស់​ផលិតករកម្ពុជា និងបរទេសដូចជាលោក ប៉ាន់ រិទ្ធី លោក ដាវី ជូ លោក​Denis Do លោកស្រី អែន​ជេលី​ណា ​ជូលី លោក Arthur Dong និងលោក ឆាយ បូរ៉ា​​​ ស្នា​ដៃ​ទាំង​នេះ​បង្ហាញ​ពីការចងចាំផ្ទាល់ខ្លួន និងការចងចាំរួម ពីអំពើ​ហិង្សាក្នុងរបប​ខ្មែរ​ក្រហម ហើយឆ្លុះ​បញ្ចាំង​ពី​បញ្ហា​នៃ​ការ​បញ្ជ្រាប​ចំណេះ​ដឹងពីរបបខ្មែរក្រហម និងការតស៊ូជម្នះលើការប៉ះទង្គិចផ្លូវចិត្ត។ កម្មវិធី​លម្អិត​មានលើគេហ​ទំព័រ​វិទ្យាស្ថា​ន​បារាំង​​នៅ​កម្ពុជា៖ institutfrancais-cambodge.com។

បើតាមស្ថានទូតបារាំងបានឱ្យដឹងថា កាលពី៥០ឆ្នាំមុន ពោល គឺនៅថ្ងៃទី១៧ ខែមេសា ​ឆ្នាំ១៩៧៥ ខ្មែរក្រហមបានចូលកាន់កាប់ទីក្រុងភ្នំពេញ បន្ទាប់ពី​សង្រ្គាម​​​ស៊ីវិលដ៏វិនាសកម្មអស់រយៈពេលជាច្រើនឆ្នាំ។ នៅថ្ងៃនោះ ប្រទេសកម្ពុជាបានធ្លាក់ទៅក្នុង​សម័យ​កាល​ដ៏​ខ្មៅ​​ងងឹត​​បំផុ​តមួយនៃ​ប្រវត្តិ​សាស្រ្តរបស់ខ្លួន។ ក្នុងស្ថានភាពវឹកវរដែលកើតមានឡើងក្រោយការដួលរលំទីក្រុង​ភ្នំពេញ មនុស្សជាច្រើនរយនាក់បាននាំគ្នាមកជ្រកកោននៅក្នុងស្ថានទូតបារាំង ដោយសង្ឃឹមថាទទួលបាន​ការ​ការពារនៅ​​ទី​នោះ។ ជាក់ស្តែង ពលរដ្ឋបារាំង​ជាង​៥០០នាក់ត្រូវបានទទួលឱ្យស្នាក់នៅក្នុងស្ថានទូត រួមជា​មួយ​ពល​រដ្ឋ​ប្រមាណ​១០០​នាក់​នៃប្រទេសចំនួន២០ផ្សេងទៀត (រួម​មានអាល្លឺម៉ង់ អាល្លឺម៉ង់ខាងកើត បែលហ្ស៊ិក កាណាដា អេស្ប៉ាញ សហរដ្ឋអាម៉េរិក ឥណ្ឌា អ៊ីតាលី ឥណ្ឌូនេស៊ី ជប៉ុន ឡាវ លីបង់ នូវែលហ្សេឡង់ ប៉ាគីស្ថាន អង់គ្លេស ស៊ុយអែត ស្វ៊ីស ថៃ និង​វៀត​ណាម)។ គេប៉ាន់ប្រមាណថា ​ជន​ជាតិ​ខ្មែរប្រហែល៦០០នាក់​ក៏​បានមកជ្រក​កោននៅក្នុង​ស្ថានទូត​បារាំងផង​ដែរ។ ក្នុង​រយៈ​​ពេល​ជាងពីរសប្តាហ៍ បរិវេណស្ថាន​ទូត​​បាន​​ក្លាយទៅជា​ទី​​កន្លែង​​ហ៊ុំព័ទ្ធមួយ ដែលចុងក្រោយបានជួបវាសនាដ៏សោកសង្រេង ជាមួយ​ការចាក​ចេញ​របស់​ពលរដ្ឋកម្ពុជា បន្ទាប់​មក​ការ​​ជម្លៀស​ជនបរទេស​ទៅ​កាន់​​ប្រទេស​ថៃ​តាម​ក្បួនរថយន្តចំនួនពីរជើង នៅថ្ងៃទី៣០ ខែ​មេសា និងថ្ងៃទី០៦ ខែឧសភា ឆ្នាំ​១៩៧៥៕

The post ស្ថានទូតបារាំង រៀបចំពិព័រណ៍ និងបញ្ចាំងភាពយន្តដើម្បីប្រារព្ធខួប៥០ឆ្នាំនៃការដួលរលំទីក្រុងភ្នំពេញ appeared first on Kampuchea Thmey Daily.

សេចក្តីប្រកាសព័ត៌មានរួមចេញផ្សាយ នៅថ្ងៃទី​១៥ ខែមករានេះ បានបញ្ជាក់ថា គម្រោង «​ចតុ» មានគោលដៅពង្រឹងសមត្ថភាពយុវជន យុវនារីកម្ពុជាដែលមានទេពកោសល្យក្នុងវិស័យសំខាន់ៗចំនួន៤ គឺ ​គំនូរជីវចល ភាពយន្ត តន្ត្រី និងការរាំ។ កម្មវិធីនេះផ្តោតជាពិសេសលើសារសំខាន់នៃការតែងនិពន្ធក្នុងដំណើរការច្នៃប្រឌិត ដែលជាមូលដ្ឋានគ្រឹះសម្រាប់ការអភិវឌ្ឍឧស្សាហកម្ម​វប្បធម៌ និងច្នៃប្រឌិត។ កម្មវិធីខាងលើមានគោលដៅបណ្តុះបណ្តាលអ្នកប្រកបវិជ្ជាជីវៈតាមរយៈការផ្តល់ការអប់រំមួយស្របតាមតម្រូវការជាក់ស្តែងក្នុងស្រុក និងគោលដៅនៃការអភិវឌ្ឍប្រកបដោយចីរភាពក្នុងឧស្សាហកម្មវប្បធម៌ និងច្នៃប្រឌិត។

លោកស្រី Fanny Pagès នាយិកាប្រតិភូ និងជាមន្ត្រីទទួលបន្ទុកផ្នែកវប្បធម៌នៃវិទ្យាស្ថានបារាំងនៅកម្ពុជា មានប្រសាសន៍ថា «យើងដាក់ឈ្មោះកម្មវិធីនេះថា ចតុ ដោយសារពាក្យនេះឆ្លុះបញ្ចាំងពីភាពច្នៃប្រឌិត និងលើកស្ទួយតម្លៃភាសា និងវប្បធម៌ខ្មែរ។ ចតុ មានន័យថាបួន ហើយជាពាក្យដ៏សំខាន់មួយនៅក្នុងវប្បធម៌ខ្មែរ។ ជាក់ស្តែង ពាក្យនេះត្រូវបានប្រើ​សំដៅលើទិសធំៗទាំងបួន សាលសន្និសីទចតុមុខដែលស្ថិតនៅចំណុចប្រសព្វនៃទន្លេទាំងបួន ឬ​ឈ្មោះ​ប្រវត្តិ​សាស្រ្ត​របស់រាជធានីភ្នំពេញជាដើម។  តាមរយៈឈ្មោះនេះ កម្មវិធីចតុស្ថិតនៅចំណុចប្រសព្វនៃវិស័យសំខាន់ៗបួន ដោយធ្វើឱ្យវិស័យទាំងនោះមានទំនាក់ទំនងគ្នា និងផ្តល់ភាពសម្បូរបែបឱ្យគ្នាទៅវិញទៅមក» ។ 

គម្រោង«ចតុ»មានគោលដៅសំខាន់ៗ៣គឺ៖ ការពង្រឹងសមត្ថភាពសិល្បៈ ការអភិវឌ្ឍសមត្ថភាពផ្នែកសហគ្រិនភាព​នៅក្នុង​វិស័យវប្បធម៌ និងការរៀបចំសិក្ខាសាលាកម្រិតតំបន់មួយ​ដែលផ្តោតលើឧស្សាហកម្មវប្បធម៌ និងច្នៃប្រឌិត។

ការបណ្តុះបណ្តាលគឺជាចំណុចចាប់ផ្តើមនៃកម្មវិធីនេះ ហើយសិក្ខាកាមមកពីតំបន់នានានឹងទទួលការបណ្តុះបណ្តាល​ដែលបង្ហាត់បង្រៀនដោយគ្រូជនជាតិបារាំងទៅតាមជំនាញរបស់ខ្លួន។ វគ្គបណ្តុះបណ្តាលទាំងនេះត្រូវបានបង្កើតឡើងដើម្បីផ្តល់មធ្យោបាយចាំបាច់នានាដល់យុវជនក្នុងការដុសខាត់សមត្ថភាពបច្ចេកទេស និងពង្រីកវិសាលភាព​ ច្នៃប្រឌិតរបស់ពួកគេ។ ក្រោយពេលបញ្ចប់ការបណ្តុះបណ្តាល សិក្ខាកាមត្រូវអនុវត្ត​ជាក់ស្តែង ដោយបញ្ចេញសមត្ថភាពបង្កើតស្នាដៃសិល្បៈទៅតាមជំនាញរៀងខ្លួន ដូចជាផលិតគំនូរជីវចល សរសេរពាក្យពេចន៍តួអង្គ និពន្ធបទភ្លេង ឬបង្កើតក្បាច់រាំ ដែលបង្ហាញពីទម្រង់សិល្បៈចម្រុះនៃកម្មវិធីនេះ។

នៅចុងបញ្ចប់ ស្នាដៃសិល្បៈផ្សេងៗនឹងត្រូវបង្ហាញជូនសាធារណជនកម្ពុជាតាមរយៈព្រឹត្តិការណ៍មួយដែលអនុញ្ញាតឱ្យយុវជនយុវ​នា​​រីជាអ្នកច្នៃប្រឌិតបញ្ចេញស្នាដៃរបស់ខ្លួន។ ការបង្ហាញនេះមានគោលដៅធ្វើឱ្យមហា​ជន​ស្គាល់ពួកគេកាន់តែច្បាស់ និងរួមចំណែកយ៉ាងសកម្មក្នុងភាពរស់រវើកនៃវប្បធម៌ ដែលកំពុងរីកដុះដាលនៅកម្ពុជា។

ចំពោះដៃគូគម្រោង កម្មវិធីនេះផ្តល់ការបណ្តុះបណ្តាលអំពីការផលិតគំនូរជីវចលពីរឿងនិទាន ដោយសហការជាមួយ​គ្រឹះស្ថានបោះពុម្ពផ្សាយស៊ីប៉ា ការបណ្តុះបណ្តាលអំពីការសរសេរពាក្យពេចន៍តួអង្គ ដោយសហការជាមួយផលិតកម្ម Anti-Archive និងការបណ្តុះបណ្តាលជំនាញភ្លេងនិងតន្រ្តី ដោយសហការជាមួយផលិតកម្មកងចក្រ។ ក្រៅពីនេះ កម្មវិធីចតុក៏ជួយជ្រោមជ្រែងសិល្បករក្នុងការបង្កើតក្បាច់រំាំថ្មីៗផងដែរ ដោយសហការជាមួយអង្គការសិល្បៈខ្មែរអមតៈ។ ការបណ្តុះបណ្តាលមានថិរវេលាជាមធ្យម៨ថ្ងៃ និងត្រូវធ្វើឡើងដោយគ្រូជនជាតិបារាំង ដែលក្រៅពីការបង្ហាត់បង្រៀន នឹងជួយជ្រោមជ្រែងសិក្ខាកាមក្នុងការបង្កើតស្នាដៃសិល្បៈ។

ពាក់ព័ន្ធនឹងការជ្រើសរើសបេក្ខជនឱ្យចូលសិក្សាវិញ យុវជនកម្ពុជាត្រូវបានជ្រើសរើសតាមរយៈការប្រកាសទទួលបេក្ខភាពដែលត្រូវបាន​ផ្សព្វផ្សាយនៅលើគេហទំព័រ និងបណ្តាញសង្គមរបស់វិទ្យាស្ថានបារាំងនៅកម្ពុជា និងដៃគូ។ បេក្ខជនត្រូវមានសញ្ជាតិខ្មែរ មានបទពិសោធន៍ និងត្រូវបង្ហាញគម្រោងសិល្បៈមួយ ដែលខ្លួនចង់បង្កើតឡើងនៅក្នុងជំនាញរបស់ខ្លួន។ បេក្ខជន៦០នាក់ដែលត្រូវបានជ្រើសរើស(១៥នាក់ក្នុងមួយមុខជំនាញ) មានឱកាសចូលរួមក្នុងវគ្គសិក្សាពេញម៉ោងដឹកនាំដោយគ្រូជនជាតិបារាំង ដែលនឹងផ្តល់ឱ្យពួកគេនូវចក្ខុវិស័យអន្តរជាតិ និងសមត្ថភាពដ៏មុតស្រួចក្នុងជំនាញនីមួយៗ។

សម្រាប់រយៈពេលវែង  កម្មវិធី«ចតុ»មានគោលដៅគាំទ្រដល់ខឿនវប្បធម៌ខ្មែរ ដោយផ្តល់ដល់យុវជន ដែលមានទេពកោសល្យនូវមធ្យោ​បាយចាំបាច់ដើម្បីអភិវឌ្ឍគម្រោងច្នៃប្រឌិតរបស់ខ្លួន។ អ្នកទទួលផលចុងក្រោយគឺមហាជន​កម្ពុជា ដែលអាចទស្សនាស្នាដៃនានាបង្កើតឡើងក្នុងពេលបណ្តុះបណ្តាល និងរួមចំណែកលើកស្ទួយកិត្យា​នុភាព​នៃឧស្សាហកម្មវប្បធម៌កម្ពុជា។ «ចតុ»មានគោលដៅយូរអង្វែង ដើម្បីពង្រឹងចំណងវប្បធម៌ និងច្នៃប្រឌិតរវាងកម្ពុជា និងបារាំង ដោយលើកកម្ពស់ភាពសម្បូរបែប និងភាពចម្រុះនៃទេពកោសល្យកម្ពុជា៕ 

The post កម្ពុជាកំពុងបោះជំហានទៅឧស្សាហកម្មវប្បធម៌ ភាពយន្ត ការតែងនិពន្ធ និងថ្នាលគំនូរជីវចល appeared first on Kampuchea Thmey Daily.

តាមសេចក្តីប្រកាសរបស់ស្ថានទូតបារាំងប្រចាំកម្ពុជា កាលពីពេលថ្មីៗនេះ អាហារូបករណ៍ប្រមាណ៦០ នឹងត្រូវផ្តល់ជូនក្នុងក្របខ័ណ្ឌនៃអាហារូបករណ៍ឆ្នាំនេះ (ទាំងអាហារូបករណ៍សម្រាប់ជ័យលាភីថ្មី និងការបន្តអាហារូបករណ៍ដល់អ្នកដែលធ្លាប់បានទទួលកន្លងមក)។ កាលពីឆ្នាំសិក្សា២០២៤-២០២៥ និស្សិតកម្ពុជា៥៦នាក់ បានទទួលអាហារូបករណ៍ពីកម្មវិធីនេះ។ បេក្ខជនអាចដាក់ពាក្យសុំអាហារូបករណ៍សម្រាប់គ្រប់មុខជំនាញទាំងអស់ ប៉ុន្តែស្ថានទូតនឹងផ្តោតការយកចិត្តទុកដាក់ជាពិសេសលើមុខជំនាញនីតិសាស្រ្ត វិទ្យាសាស្រ្តមនុស្សសាស្រ្ត និងសង្គម សុខាភិបាល កសិអេកូឡូហ្ស៊ី និងបរិស្ថាន វិទ្យាសាស្រ្តវិស្វករ និងសិល្បៈ។

ក្រៅពីនេះ ស្ថានទូតបារំាងក៏បានបង្កើតសហហិរញ្ញប្បទានអាហារូបករណ៍ជាមួយស្ថាប័នកម្ពុជាផងដែរ ក្នុងនោះមានការផ្តល់អាហារូបករណ៍ដែលទទួលសហហិរញ្ញប្បទានជាមួយក្រសួងអប់រំ យុវជន និងកីឡា និងជាមួយបណ្ឌិត្យសភាបច្ចេកវិទ្យាឌីជីថលកម្ពុជា(CADT) ដើម្បីបណ្តុះបណ្តាលនិស្សិត និងអ្នកស្រាវជ្រាវកម្ពុជា ក្នុងវិស័យវិទ្យាសាស្រ្ត បច្ចេកវិទ្យា វិស្វកម្ម គណិតវិទ្យា (STEM) ក៏ដូចជាព័ត៌មានវិទ្យា និងទូរគមនាគមន៍។

បច្ចុប្បន្ន និសិ្សតកម្ពុជាជាង១៧០នាក់ កំពុងទទួលការបណ្តុះបណ្តាលនៅប្រទេសបារាំងតាមរយៈយន្តការនៃការផ្តល់អាហារូបករណ៍ និងហិរញ្ញប្បទានពីប្រភពនានា រួមមានអាហារូបករណ៍ France Excellence, អាហារូបករណ៍ France Excellence Eiffel, កម្មវិធី Erasmus+ និងកម្មវិធីសញ្ញាប័ត្របណ្តុះបណ្តាលវេជ្ជសាស្រ្តជំនាញ/ជំនាញជាន់ខ្ពស់(DFMS/DFMSA)។ តាំងពីឆ្នាំ២០១៤ មក និស្សិតកម្ពុជាជាង ១ ២០០នាក់ បានទទួលអាហារូបករណ៍ដើម្បីបន្តការសិក្សានៅប្រទេសបារាំង។

ជាមួយគ្នានោះ ស្ថានទូតបារាំងបានលើកទឹកចិត្តនិស្សិតកម្ពុជាចាប់យកឱកាសនេះដើម្បីទៅសិក្សានៅប្រទេសបារាំង  ដើម្បីពង្រឹងចំណេះដឹង និងមានឱកាសការងារច្រើន។ ការសិក្សានៅប្រទេសបារំាងនៅតាមបណ្តាសាកលវិទ្យាល័យ ឬសាលាល្បីៗនឹងអនុញ្ញាតឱ្យនិស្សិតទទួលបានការអប់រំតាមប្រព័ន្ធឧត្តមសិក្សាល្អជាងគេ និងសម្បូរបែបជាងគេមួយនៅលើពិភពលោក។ កាលពីឆ្នាំ២០២៣-២០២៤ និស្សិតបរទេសជាង ៤៣០ ០០០ នាក់ ក្នុងនោះនិស្សិតកម្ពុជាជាង៨០០នាក់ បានចុះឈ្មោះសិក្សានៅក្នុងប្រព័ន្ធឧត្តមសិក្សាបារាំង ដែលធ្វើឱ្យបារាំងស្ថិតក្នុងចំណោមបណ្តាប្រទេសដែលទទួលនិស្សិតបរទេសឱ្យទៅសិក្សាច្រើនជាងគេលើលោក។

សម្រាប់កាលបរិច្ឆេទផុតកំណត់ដាក់ពាក្យ នៅថ្ងៃអាទិត្យ ទី២៦ ខែមករា ឆ្នាំ២០២៥។ បេក្ខជនទាំងអស់ត្រូវទាញយកពាក្យសុំអាហារូបករណ៍ និងអានឯកសារពន្យល់ដោយយកចិត្តទុកដាក់ ដែលមាននៅលើគេហទំព័រស្ថានទូតបារាំងប្រចាំកម្ពុជា និងនៅលើគេហទំព័រ Campus France Cambodge ។

ចំពោះរាល់ចម្ងល់ទាក់ទងនឹងការសិក្សានៅប្រទេសបារាំង និស្សិតអាចទាក់ទងការិយាល័យ Campus France Cambodge ដែលជាទីភ្នាក់ងារបារាំងសម្រាប់លើកកម្ពស់ឧត្តមសិក្សា និងជួយជ្រោមជ្រែងការបំពេញបែបបទទៅសិក្សានៅប្រទេសបារំាង។ Campus France Cambodge : ស្តិតនៅក្នុងមជ្ឈមណ្ឌលភាសានៃវិទ្យាស្ថានបារាំងនៅកម្ពុជា ផ្ទះលេខ១៨ ផ្លូវ១៨៤ ភ្នំពេញ ឬទូរស័ព្ទ : 076 268 8782 អ៊ីមែល : campusfrance@ifcambodge.com  www.cambodge.campusfrance.org  និង www.facebook.com/campusfrancecambodge ស្ថានទូតបារាំងប្រចាំកម្ពុជា : https://kh.ambafrance.org/ ៕

The post ស្ថានទូតបារាំង ប្រកាសផ្តល់អាហារូបករណ៍ «France Excellence» ដល់និស្សិតខ្មែរប្រមាណ ៦០សម្រាប់ឆ្នាំ២០២៥-២០២៦ appeared first on Kampuchea Thmey Daily.

ថ្លែងក្នុងសន្និសីទសាព័ត៌មាន​ ស្តីពី ការរៀបចំវេទិកាធុរកិច្ចកម្ពុជា-បារាំង ឆ្នាំ២០២៤ នៅថ្ងៃទី២៨ ខែមិថុនា ឆ្នាំ២០២៤ លោក Jacques Pellet ឯកគ្គរដ្ឋទូតបារាំងប្រចាំកម្ពុជា បានឱ្យដឹងថា វេទិកាធុរកិច្ចនេះ ធ្វើឡើងក្រោមកិច្ចសហការ ជាមួយគណៈកម្មាធិការទីប្រឹក្សាពាណិជ្ជកម្មក្រៅប្រទេសបារាំងប្រចាំនៅកម្ពុជា (CCEF) និងសភាពាណិជ្ជកម្មកម្ពុជា (CCC) ជាមួយការគាំទ្រពីស្ថានទូតបារាំងប្រចាំកម្ពុជា សហព័ន្ធនិយោជកបារាំងអន្តរជាតិ (MEDEF) និងសមាគមឧកញ៉ាកម្ពុជា។ ព្រឹត្តិការណ៍ខាងលើ នឹងមានការចូលរួមពីសមាជិកសហគមន៍ធុរកិច្ចបារាំងនៅកម្ពុជា ក៏ដូចជាតំណាងក្រុមហ៊ុនបារាំងនៅក្នុងតំបន់ ដែលមានបំណងស្វែងយល់ឱ្យកាន់តែច្បាស់ពីទីផ្សារកម្ពុជា។​ ក្នុងនោះ តំណាងមកពីក្រុមហ៊ុនសំខាន់ៗជាច្រើននឹងមានវត្តមាន ដូចជា ក្រុមហ៊ុនសំណង់ និងហេដ្ឋារចនាសម្ព័ន្ធ ឌីជីថល សុខាភិបាល ថាមពល នគរូបនីយកម្ម ទេសចរណ៍ ឡូជីស្លឹក ដឹកជញ្ជូន កសិកម្ម និងកសិអាហារ ក៏ដូចជាការអភិវឌ្ឍប្រកបដោយចីរភាព និងបរិស្ថាន។

លោកឯកគ្គរដ្ឋទូត បានបញ្ជាក់ថា វេទិកាធុរកិច្ចលើកទី២ នេះ នឹងជួយពង្រឹងទំនាក់ ទំនងសេដ្ឋកិច្ចកម្ពុជា-បារាំង និងជាឱកាសពិសេសមួយសម្រាប់ក្រុមហ៊ុន អ្នកប្រកបវិជ្ជាជីវៈ និងអ្នកមានចំណាប់អារម្មណ៍អំពីការ អភិវឌ្ឍសេដ្ឋកិច្ច ក្នុងការស្វែងយល់ពីសក្តានុពលជាច្រើនដែលកម្ពុជាផ្តល់ឱ្យ ហើយក៏ជាពេលវេលាសម្រាប់បង្កើតទំនាក់ ទំនងជាមួយដៃគូយុទ្ធសាស្ត្រ ថ្នាក់ដឹកនាំនយោបាយ និងអ្នកជំនាញនៅកម្ពុជាផងដែរ។

លោកបន្ថែមថា ក្នុងងអំឡុងវេទិកាធុរកិច្ចនេះ កិច្ចពិភាក្សាតាមប្រធានបទផ្សេងៗនឹងអនុញ្ញាតឱ្យអ្នកចូលរួមស្វែងយល់ពីអាទិភាព និងគោលនយោបាយរបស់រាជរដ្ឋាភិបាលកម្ពុជាក្នុងវិស័យសំខាន់ៗ ដូចជា ហេដ្ឋារចនាសម្ព័ន្ធ ឡូជីស្ទិក កសិអាហារ កសិកម្ម សុខាភិបាល និងថាមពល។ បទបង្ហាញនឹងត្រូវធ្វើឡើងដោយតំណាងក្រសួងពាក់ព័ន្ធនីមួយៗ។ វេទិកានេះ ក៏មានបទបង្ហាញអំពីចក្ខុវិស័យសេដ្ឋកិច្ច និងគតិយុត្តិនៃព្រះរាជាណាចក្រកម្ពុជា ក៏ដូចជាហិរញ្ញប្បទានសាធារណៈ និងឯកជនផងដែរ។ កិច្ចពិភាក្សាតុមូលនឹងអនុញ្ញាតឱ្យអ្នកចូលរួមពិភាក្សាលម្អិតអំពីកាលានុវត្តភាពក្នុងវិស័យអាទិភាពដូចជា ទេសចរណ៍ ឌីជីថល ការចែកចាយ សំណង់ សុខាភិបាល ថាមពល កសិកម្ម ឡូជីស្ទិក ដឹកជញ្ជូន និងបរិស្ថាន។

ដោយឡែក នៅថ្ងៃទី៣ នៃវេទិកានឹងប្រព្រឹត្តទៅនៅក្រុងព្រះសីហនុ ដើម្បីផ្តល់ឱកាសដល់អ្នកចូលរួមស្វែងយល់អំពីទីតាំងសេដ្ឋកិច្ច សំខាន់ៗនៅក្រុងព្រះសីហនុ និងជួបជាមួយតំណាងរាជរដ្ឋាភិបាលកម្ពុជានៅទីនោះ។ វេទិកាធុរកិច្ចកម្ពុជា-បារាំង ឆ្នាំ២០២៤ គឺ ជាកាតាលីករមួយនៃកិច្ចសហការសេដ្ឋកិច្ចទ្វេភាគីថ្មីៗ សម្រាប់ការអភិវឌ្ឍប្រកបដោយចីរភាពនៃប្រទេសទាំងពីរ។

សូមជម្រាបថា អស់រយៈពេលប្រមាណ ២ឆ្នាំ មកហើយ ទំនាក់ទំនងទ្វេភាគីកម្ពុជា-បារាំង មានលក្ខណៈរស់រវើកជាប់ជានិច្ច តាមរយៈដំណើរទស្សនកិច្ចផ្លូវការរបស់ថ្នាក់ដឹកនាំជាន់ខ្ពស់កម្ពុជា ជាច្រើនរូបនៅប្រទេសបារាំង ក្នុងនោះមានដំណើរទស្សនកិច្ចរបស់សម្តេច មហាបវរធិបតី ហ៊ុន ម៉ាណែត កាលពីថ្ងៃទី១៨ និងទី១៩ ខែមករា ឆ្នាំ២០២៤ កន្លងទៅ។ ក្នុងអំឡុងដំណើរទស្សនកិច្ចនេះ កិច្ចព្រមព្រៀងចំនួន៧ ត្រូវបានចុះហត្ថលេខាក្នុងវិស័យគន្លឹះ ដូចជា ថាមពល ហេដ្ឋារចនាសម្ព័ន្ធ និងការចែកចាយ ដែលឆ្លុះបញ្ចាំងពី សករាជថ្មីមួយនៃកិច្ចសហប្រតិបត្តិការរវាងប្រទេសបារាំង និងកម្ពុជា។

កិច្ចព្រមព្រៀងខាងលើក៏បង្ហាញឱ្យឃើញផងដែរពីការ ប្តេជ្ញាចិត្តរបស់រាជរដ្ឋាភិបាលកម្ពុជាក្នុងការលើកកម្ពស់ការពង្រឹងវិស័យឯកជន។ ទំហំនៃបម្លាស់ប្តូរពាណិជ្ជកម្មរវាងកម្ពុជា និងបារាំង មានចំនួន ១ ៣៦៣ លានអឺរ៉ូ កាលពីឆ្នាំ២០២៣។ បច្ចុប្បន្ន ប្រទេសបារាំងគឺ ជាដៃគូពាណិជ្ជកម្មទី២ របស់កម្ពុជានៅអឺរ៉ុប បន្ទាប់ពីប្រទេសអាល្លឺម៉ង់។ ការនាំចេញរបស់បារាំងមកកម្ពុជាកាលពីឆ្នាំ២០២៣ បានកើនឡើងយ៉ាងខ្លាំង ពោលគឺ ៣១% ធៀបនឹងឆ្នាំ២០២២ ជាពិសេសផលិតផលកសិអាហារ ឱសថ និងផលិតផលលោហៈ។

ចំណែក ការនាំចេញរបស់កម្ពុជា ទៅកាន់ប្រទេសបារាំងវិញ មានទំហំទឹកប្រាក់ ១ ១៩២ លានអឺរ៉ូ កាលពីឆ្នាំ២០២៣ ជាពិសេស ក្នុងវិស័យវាយនភ័ណ្ឌ ផលិតផលកសិអាហារ និងទោចក្រយាន។ ក្នុងទំហំប្រមាណ ៥៦០លានអឺរ៉ូ ការវិនិយោគរបស់បារាំងនៅកម្ពុជាក៏មានការកើនឡើងផងដែរ ជាពិសេសក្នុងវិស័យសំណង់ កសិឧស្សាហកម្ម និងសេវា។ ក្រៅពីបុត្រសម្ព័ន្ធនៃក្រុមហ៊ុនបារាំងធំៗ វត្តមានដ៏ច្រើននៃក្រុមហ៊ុនក្នុងស្រុករបស់ជនជាតិបារាំង នៅកម្ពុជា (ជាង ៤០០ក្រុមហ៊ុន) បង្ហាញឱ្យឃើញអំពីការវិនិយោគ ក៏ដូចជាវត្តមានរឹងមាំរបស់បារាំងនៅកម្ពុជា។ តួលេខទាំងនេះ ឆ្លុះបញ្ចាំងឱ្យឃើញពីភាពរស់រវើកនៃទំនាក់ទំនងសេដ្ឋកិច្ចកម្ពុជា-បារាំង ដែលផ្តល់អត្ថប្រយោជន៍ដល់ក្រុមហ៊ុននៃប្រទេសទាំងពីរ និងចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា៕

The post CCIFC នឹងរៀបចំវេទិកាធុរកិច្ចកម្ពុជា-បារាំង លើកទី២ នៅខែកក្កដា ខាងមុខនេះ appeared first on Kampuchea Thmey Daily.