អូលីវ្យេ រីឆា រដ្ឋទូតបារាំងថ្មីចាប់ផ្ដើមបេសកកម្មនៅកម្ពុជា ដោយបានថ្វាយសារតាំងព្រះមហាក្សត្រ

ឯកអគ្គរដ្ឋទូតថ្មីរបស់បារាំង លោក អូលីវ្យេ រីឆា (Olivier Richard) បានមកដល់កម្ពុជាហើយសម្រាប់បេសកកម្មការទូតរបស់ខ្លួននៅកម្ពុជា ដោយផ្ដើមដំបូង លោកបានចូលគាល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ដើម្បីថ្វាយសារតាំង។  

ការចាប់ផ្តើមជាផ្លូវការនៃបេសកកម្មរបស់លោកឯកអគ្គរដ្ឋទូត អូលីវ្យេ រីឆា នៅកម្ពុជាពេលនេះ ដើម្បីជំនួសលោក ហ្សាក់ ប៉ឺឡេ (Jacques Pellet) ដែលត្រូវចប់អាណត្តិការងារ។ លោក ហ្សាក់ ប៉ឺឡេ ដែលទទួលបានការតែងតាំងជាឯកអគ្គរដ្ឋទូតបារាំងប្រចាំកម្ពុជា កាលពីឆ្នាំ២០២១ ត្រូវបញ្ចប់មុខងារការទូតក្នុងឆ្នាំ២០២៥នេះ។

រយៈពេល៤ឆ្នាំនៅកម្ពុជា លោក ហ្សាក់ ប៉ឺឡេ បានធ្វើការយ៉ាងសកម្មក្នុងការរួមចំណែកពង្រឹងពង្រីកនូវទំនាក់ទំនងជាមិត្ត ភាព និងកិច្ចសហប្រតិបត្តិការដែលផ្សារភ្ជាប់ប្រទេសកម្ពុជា និងប្រទេសបារាំងកាន់ជិតស្និទ្ធិ ដែលក្នុងនោះវិស័យជាច្រើននៃកិច្ចសហប្រតិបត្តិការដ៏សម្បូរបែប​រវាងប្រទេសទាំងពីរត្រូវបានចងរឹត ជាពិសេសការលើកកម្ពស់ភាសាបារាំង និងការអភិរក្សបេតិកភណ្ឌ។

បន្តពីឯកអគ្គរដ្ឋទូតចាស់ លោកឯកអគ្គរដ្ឋទូតថ្មី អូលីវ្យេ រីឆា ក្នុងឱកាសថ្វាយសារតាំងព្រះមហាក្សត្រកម្ពុជា កាលពីព្រឹកថ្ងៃទី២០ ខែសីហា ឆ្នាំ២០២៥ នៅព្រះបរមរាជវាំង បានសម្តែងនូវក្ដីរីករាយ ដែលលោកអាចចាប់ផ្តើមបេសកកម្មការទូតនៅកម្ពុជា។ តាមខ្លឹមសារចុះផ្សាយលើទំព័រហ្វេសប៊ុកស្ថានទូតបារាំងប្រចាំនៅកម្ពុជា លោក អូលីវ្យេ រីឆា គូសបញ្ជាក់​សាជាថ្មីពីការប្តេជ្ញាចិត្តរបស់លោកក្នុងការពង្រឹងទំនាក់ទំនងមិត្តភាព និងកិច្ចសហប្រតិបត្តិការដែលមានជាយូរមកហើយរវាងប្រទេសបារាំង និង​ប្រទេសកម្ពុជា៕