បុគ្គលិកអង្គការPSE​ ម្នាក់  សង្ស័យគាំងបេះដូងទើបធ្លាក់ពីលើចិញ្ចើមផ្លូវស្លាប់ក្នុងប្រឡាយនៅសៀមរាប

បុគ្គលិករបស់អង្គការដើម្បីភាពញញឹមនៃកុមារ (PSE) ជាជនជាតិបារាំងម្នាក់ឈ្មោះ GIRARD FABRE LISA CELINE VERONICA ដែលបាត់ខ្លួនក្នុងពេលរត់ម៉ារ៉ាតុងជាមួយមិត្តភក្តិ ត្រូវបានស្នងការដ្ឋាននគរបាលខេត្តសៀមរាបរកឃើញសាកសពនៅត្រង់ចំណុចនៅក្នុងប្រឡាយអមផ្លូវ៦០ម៉ែត្រ ក្នុងភូមិអារក្សស្វាយ សង្កាត់នគរធំ ខេត្តសៀមរាប បន្ទាប់ពីទទទួលបានការរាយការណ៍ពីប្រជាពលរដ្ឋ។ សេ​ចក្ដីប្រកាសព័ត៌មានរបស់ស្នងការដ្ឋាននគរបាលខេត្ត ឱ្យដឹងថា ឆ្លងកាត់ធ្វើកោសល្យវិច័យពីអ្នកជំនាញ ជាមួយគ្រូពេទ្យអមសាលាដំបូង និងតំណាងស្ថានកុងស៊ុលកិត្តិយសបារាំងប្រចាំខេត្តសៀមរាប បានសន្និដ្ឋានថា ជនរងគ្រោះស្លាប់ដោយសារធ្លាក់ពីលើចិញ្ចើមផ្លូវ ដែលអាចបណ្តាលមកពីគាំងបេះដូង។

នៅថ្ងៃទី០៥ ខែសីហា អង្គការដើម្បីភាពញញឹមនៃកុមារ (PSE)  បានប្រកាសពីដំណឹងមរណភាពរបស់ កញ្ញា “Lisa Girard-Fabre”  ដែលជាប្រធានគម្រោងអប់រំ នៃសាលាពាណិជ្ជសាស្រ្ដ ផ្នែកគ្រប់គ្រង និងការលក់របស់អង្គការ។ បើតាមអង្គការដើម្បីភាពញញឹមនៃកុមារ (PSE)  កញ្ញាLisa បានបាត់ខ្លួនតាំងពីព្រឹកថ្ងៃសៅរ៍ទី០២ ខែសីហា ឆ្នាំ២០២៥ អំឡុងពេលរត់ ក្នុងបរិវេណប្រាសាទអង្គរវត្ត ជាមួយមិត្តភក្តិរបស់ខ្លួន។  

ស្នងការដ្ឋាននគរបាលខេត្តសៀមរាបឱ្យដឹងថា កាលពីថ្ងៃទី២ ខែសីហា សមត្ថកិច្ចនគរបាលថ្នាក់ក្រោមទទួលបានព័ត៌មាន ពីតំណាងស្ថានកុងស៊ុលកិត្តិយសបារាំងប្រចាំខេត្តសៀមរាប និងបុគ្គលិកអង្គការ PSE អំពីករណីបាត់ដំណឹងស្ត្រីជនជាតិបារាំងម្នាក់ឈ្មោះថា Lisa Girard-Fabre នៅម្តុំប្រាសាទតាសោម អំឡុងពេលរត់សាកល្បងកម្មវិធីម៉ារ៉ាតុន ជាមួយមិត្តភក្តិ។

បន្ទាប់ពីទទួលព័ត៌មាននេះភ្លាមសមត្ថកិច្ចចម្រុះស្ថាប័ន បានចុះស្រាវជ្រាវដល់ទីតាំងដែលបាត់ដំណឹងចុងក្រោយ ពីចំណុចប្រាសាទតាសោម បន្តមកតាមព្រៃ ឧទ្យានអង្គរ មកដល់កស្សិណអង្គរខាងលិចកែងផ្លូវ៦០ម៉ែត្រ ចាប់ថ្ងៃទី២ ខែសីហា ឆ្នាំ២០២៥ រហូតដល់ព្រឹកថ្ងៃទី៤ ខែសីហា ឆ្នាំ២០២៥ ជាលទ្ធផលពុំមានតម្រុយពាក់ព័ន្ធនឹងដំណើររបស់ស្ត្រីជនជាតិបារាំងនោះឡើយ ។

លុះមកដល់ ម៉ោងប្រហែល ១០៖០៥នាទី ថ្ងៃទី៤ ខែសីហា សមត្ថកិច្ចក៏ទទួលបានសេចក្តីរាយការណ៍ពីពលរដ្ឋ ថា៖«នៅជម្រាលប្រឡាយអមផ្លូវ ៦០ម៉ែត្រ ត្រង់ចំណុចមុខចំហៀងខាងត្បូងអាហារដ្ឋានមាន់ស្រែ ឃើញសត្វរុយកំពុងរោមអ្វីមួយប៉ុន្តែមិនដឹងជាអ្វីនោះទេ»។  បន្ទាប់ពីទទួលបានព័ត៌មាននេះភ្លាមសមត្ថកិច្ចមានការសង្ស័យ ក៏បានចុះទៅពិនិត្យជាក់ស្តែងដល់កន្លែងកើតហេតុប្រទះឃើញសាកសព និងពិនិត្យឃើញថា ជាសពរបស់ស្ត្រីជនជាតិបារាំង កញ្ញា Lisa Girard-Fabreដែល បានបាត់ខ្លួនកាលពីថ្ងៃទី០២ ខែសីហា កន្លងទៅ។

ភ្លាមៗ សមត្ថកិច្ចជំនាញ រួមជាមួយគ្រូពេទ្យអមសាលាដំបូង និងតំណាងស្ថានកុងស៊ុលកិត្តិយសបារាំងប្រចាំខេត្តសៀមរាបបានស្រាវជ្រាវ និងធ្វើកោសល្យវិច័យ និងសន្និដ្ឋានថា ជនរងគ្រោះស្លាប់ដោយសារធ្លាក់ពីលើចិញ្ចើមផ្លូវ ដែលអាចបណ្តាលមកពីគាំងបេះដូង។ បច្ចុប្បន្ន សាកសពត្រូវបានសមត្ថកិច្ចបញ្ជូនទៅតម្កល់ទុកនៅមន្ទីរពេទ្យមិត្តភាពខ្មែរសូវៀត រាជធានីភ្នំពេញរង់ចាំការសម្រេចពីក្រុមគ្រួសារ និងស្ថានទូត។

ទំព័រហ្វេសប៊ុករបស់PSE ឱ្យដឹងថា កញ្ញា Lisa បានបំពេញបេសកកម្មមនុស្សធម៌ជាមួយអង្គការដើម្បីភាពញញឹមនៃកុមារចប់សព្វគ្រប់កាលពី ២ឆ្នាំមុន ដោយធ្វើដំណើរថ្មើរជើងពីទីក្រុងប៉ារីសប្រទេសបារាំង មកកាន់ទីក្រុងភ្នំពេញប្រទេសកម្ពុជា។ PSE ចាត់ទុកថា Lisa ជានារី ដែលមានភាពក្លាហាន មានភាពរួសរាយរាក់ទាក់ ព្រមទាំងមានសន្ដានចិត្តល្អ ចេះជួយយកអាសារអ្នកដទៃ៕