ស្នាដៃអ្នកនិពន្ធខ្មែរ Archives - Kampuchea Thmey Daily

បុគ្គលជំនាន់ដើម ៥ រូប បន្សល់ស្នាដៃលេចធ្លោបន្តដល់កូនខ្មែរជំនាន់ក្រោយ

Din Thary — Thu, 17 Aug 2023 07:27:55 +0000

ច្បាស់ណាស់ថា មហាជននិងអ្នកជំនាន់ក្រោយមួយភាគធំបានស្គាល់ពីបុគ្គលជំនាន់ដើមមួយចំនួន ដែលបានបន្សល់ទុកស្នាដៃមួយចំនួន ទាំងផ្នែកចំណេះដឹង ការតែងនិពន្ធ កំណាព្យ សំណង់ស្ថាបត្យកម្ម ផ្នែកសិល្បៈសម្រាប់កូនខ្មែរបានស្គាល់រហូតដល់សព្វថ្ងៃ។

«កម្ពុជាថ្មី» នឹងលើកយកបុគ្គលជំនាន់ដើម ៥រួប ក្នុងចំណោមបុគ្គលជំនាន់ដើមល្បីៗជាច្រើនរូបទៀត មកបង្ហាញពីចំណេះដឹង ស្នាដៃ ដែលទទួលបានការទទួលស្គាល់ និងការផ្តល់តម្លៃដល់បច្ចុប្បន្ន។

បុគ្គលជំនាន់ដើម ៥រូបដែលយើងនឹងលើកយកមកបង្ហាញនោះរួមមាន៖

១. សម្ដេចព្រះសង្ឃរាជ ជួន ណាត

សម្ដេចព្រះសង្ឃរាជ ជួន ណាត ប្រសូតនៅថ្ងៃទី១១ ខែមិនា ឆ្នាំ១៨៨៣ នៅភូមិកំរៀង សង្កាត់រកាកោះ ស្រុកគងពិសី ខេត្តកំពង់ស្ពឺ។ សម្តេចព្រះសង្ឃរាជ គឺជាអ្នកប្រាជ្ញខាងអក្សរសាស្ត្រខ្មែរមួយរូប ដែលមានល្បីល្បាញតាមរយៈស្នាដៃតែងនិពន្ធ ការប្រែភាសាបាលី មកជាភាសាខ្មែរ សំស្ក្រឹត និងគម្ពីរស្លឹករឹតជាច្រើន។ ពិសេសគឺ វចនានុក្រមខ្មែរដែលបានបន្សល់ទុកដល់កូនខ្មែរ យុវជន និងមនុស្សគ្រប់ស្រទាប់វណ្ណៈប្រើប្រាស់ និងទទួលស្គាល់រហូតដល់បច្ចុប្បន្ននេះ។

១. បណ្ឌិតសាស្ត្រាចារ្យ កេង វ៉ាន់សាក់

បណ្ឌិតសាស្ត្រាចារ្យ កេង វ៉ាន់សាក់ កើតនៅថ្ងៃទី១៩ ខែកញ្ញា ឆ្នាំ១៩២៥។ លោក ត្រូវបានគេស្គាល់ថា ជាអ្នកបង្កើតពុម្ពអក្សរខ្មែរសម្រាប់ប្រើប្រាស់នៅក្នុងម៉ាស៊ីនអង្គុលីលេខ និងធ្លាប់បាននិពន្ធសៀវភៅស្រាវជ្រាវវប្បធម៌ អក្សរសាស្ត្រ និងល្ខោន កំណាព្យ និងរឿងខ្លីៗជាច្រើនតាំងពីទសវត្សរ៍ ១៩៤០។ លោក កេង វ៉ាន់សាក់ ក៏បានបង្កើតនៅស្នាដៃជាច្រើនដូចជារឿង សាច់មិនបានស៊ី យកឆ្អឹងព្យួរក, អន្ទិតគោលោត, ចិត្តក្រមុំ, គុកកាមកិលេស, ល្បែងល្បោយ, ខ្មែរស្លាប់ ខ្មែររស់។ បន្ថែមនេះ ក៏នៅមានជាប្រភេទអត្ថបទនៃនិក្ខេបបទ វប្បធម៌ខ្មែរដ៏ល្អកម្ររកបាន និងកំណាព្យជាភាសាបារាំងជាដើម។

៣. វណ្ណ មូលីវ៉ាន់

លោក វណ្ណ មូលីវ៉ាន់ កើតនៅថ្ងៃទី២៣ ខែវិច្ឆិកា ឆ្នាំ១៩២៦ នៅខេត្តកំពត។ លោកគឺជាស្ថាបត្យករជើងចាស់មួយរូបដ៏ល្បីល្បាញនៅក្នុងប្រទេសកម្ពុជា ដែលបានរួមចំណែកជាច្រើនក្នុងស្ថាបត្យកម្មហៅថា ស្ថាបត្យកម្មខ្មែរទំនើបនៅក្នុងសម័យសង្គមរាស្ត្រនិយម (១៩៥៥–១៩៧០) ក្រោមព្រះរាជកិច្ចដឹកនាំរបស់អតីតព្រះមហាក្សត្រ ព្រះបាទនរោត្តមសីហនុ។

លោក វណ្ណ មូលីវ៉ាន់ បានសាងសំណង់ជាច្រើននៅក្នុងប្រទេសខ្មែរក្រោមគំនិតស្នាដៃនៃការច្នៃប្រឌិត និងបានបន្សល់ទុកជាប្រវត្តិសាស្ត្រមួយដល់កម្ពុជា និងយុវជនខ្មែរជំនាន់ក្រោយ។ ស្នាដៃនៃស្ថាបត្យករជើងចាស់រូបនេះរួមមាន សាលសន្និសីទចតុមុខ, វិមានឯករាជ្យ, ពហុកីឡាដ្ឋានជាតិអូឡាំពិក, សាលមហោស្រពព្រះសុរាម្រិត, សាកលវិទ្យាល័យភូមិន្ទភ្នំពេញ, វិទ្យាស្ថានភាសាបរទេស, ទីស្តីការគណៈរដ្ឋមន្ត្រីចាស់, សំណង់ផ្ទះ ១០០ខ្នង និងវិមានរដ្ឋចំការមន ជាដើម។

៤. លោក ស៊ិន ស៊ីសាមុត

កិត្តិនាមក៏ដូចជាកេរ្តិ៍ឈ្មោះដ៏ល្បាញរបស់លោក ស៊ិន ស៊ីសាមុត ត្រូវបានមហាជនជាច្រើននៅក្នុងប្រទេសកម្ពុជាបានស្គាល់តាមរយៈទឹកដមសំឡេងដ៏ក្រអួនក្រអៅពីរោះរណ្ដំចិត្ត គួបផ្សំនឹងបទចម្រៀងមនោសញ្ចេតនាគ្រប់រសជាតិយ៉ាងអន្លង់អន្លោច ស្ទើរគ្រប់ទម្រង់ដែលមានទាំងសប្បាយ កម្សត់ ខ្លោចផ្សាផ្សេងៗ ដែលជាស្នាដៃនិពន្ធផ្ទាល់របស់លោក និងជាមួយដៃគូអ្នកនិពន្ធដ៏ទៃទៀតក្នុងជំនាន់នោះ។ លោកតាស៊ិន ស៊ីសាមុត កើតនៅថ្ងៃទី២៣ ខែសីហា ឆ្នាំ១៩៣៣ នៅខេត្តស្ទឹងត្រែង ហើយដោយសារទឹកដមសំឡេងដ៏ល្អក្រអួនក្រអៅបែបនេះហើយ លោកតាមានរហស្សនាមថាជា អធិរាជសំឡេងមាស ដែលត្រូវបានបំពាក់មេដៃមាសកិត្តិយសពីព្រះមហាក្សត្រកម្ពុជាព្រះបាទនរោត្តម សីហនុ។

កេរ្តិ៍ឈ្មោះដ៏ល្បីល្បាញរបស់លោកតា ស៊ិន ស៊ីសាមុត រហូតមកដល់ពេលបច្ចុប្បន្ននៅតែដក់ជាប់ក្នុងការចងចាំ និងគោរពពីសំណាក់សិល្បករ-សិល្បការិនី និងមនុស្សស្ទើរតែគ្រប់ស្រទាប់វណ្ណៈ។

៥. លោក នូ ហាច

លោក នូ ហាច កើតនៅថ្ងៃទី២៦ ខែមិថុនា ឆ្នាំ១៩១៦ ស្ថិតនៅក្នុងស្រុកសង្កែ ខេត្តបាត់ដំបង។ លោកគឺជាអ្នកនិពន្ធមួយរូបដែលកេរ្តិ៍ឈ្មោះ តាមរយៈស្នាដៃតែងនិពន្ធជាច្រើនជាពិសេសរឿងផ្កាស្រពោនដែលជាស្នាដៃដំបូងរបស់លោក ហើយត្រូវបានក្រសួងអប់រំជាតិ ដាក់បញ្ចូលនៅក្នុងកម្មវិធីសិក្សានៅមធ្យមសិក្សាតាំងពីឆ្នាំ១៩៥៨។

ក្រៅពីនេះលោកក៏នៅមានស្នាដៃតែងនិពន្ធសំខាន់ៗជាច្រើនទៀតដូចជា រឿងនារីជាទីស្រលាញ់, លាវ័ណ្យ និងរវន្ត និងមាលាដួងចិត្តជាដើម៕

The post បុគ្គលជំនាន់ដើម ៥ រូប បន្សល់ស្នាដៃលេចធ្លោបន្តដល់កូនខ្មែរជំនាន់ក្រោយ appeared first on Kampuchea Thmey Daily.

“សំណែន” ឈរលើតារាងមានអ្នកចុចអានច្រើនបំផុតទាំង ១០ នៅលើវេបសាយអ្នកនិពន្ធ ម៉ីសន សុធារី

Sonya — Fri, 17 Sep 2021 09:49:48 +0000

ប្រលោមលោកខ្នាតខ្លីក្រោមចំណងជើង “សំណែន” របស់កម្មវិធី MST Writer បានឈរលើតារាង Top 10 នៅលើវេបសាយអ្នកនិពន្ធ ម៉ីសន សុធារី ដែលនេះជាមោទកភាពមួយ ខណៈម្ចាស់ស្នាដៃជាកវីវ័យក្មេង ទើបប្រឡូកក្នុងវិស័យតែងនិពន្ធថ្មីសន្លាង។

កាលពីចុងខែសីហា ឆ្នាំ២០២១ កន្លងទៅ អ្នកនិពន្ធ ម៉ីសន សុធារីបានបង្កើតកម្មវិធីមួយឈ្មោះថា MST Writer រដូវកាលទី១ ក្រោមប្រធានបទ អ្នកនិពន្ធក្រៅសាលា សម្រាប់យុវវ័យដែលមានបំណងក្លាយជាអ្នកនិពន្ធ។

ក្រោយប្រកាសកម្មវិធីនេះ មានប្រិយមិត្តដាក់ពាក្យ និងផ្ញើសា្នដៃឱ្យចេញផ្សាយលើវេបសាយ meysansotheary.com ជាច្រើនរឿង។ ក្នុងនោះដែរប្រលោមលោកខ្នាតខ្លីរឿង “សំណែន” ដែលជាស្នាដៃនិពន្ធរបស់ សៀក ម៉ាវិន បានដណ្ដើមការចាប់អារម្មណ៍ និងមានអ្នកចូលអានយ៉ាងច្រើន រហូតអាចប្រជែងជាមួយប្រលោមលោកធំៗរបស់អ្នកនិពន្ធ ម៉ីសន សុធារី ទៀតផង។

ស្របពេលជាមួយគ្នានេះ អ្នកនិពន្ធ ម៉ីសន សុធារី បានសម្ដែងនូវការត្រេកអរ ក៏ដូចជាពោលសរសើរដល់កវីជំនាន់ថ្មី ព្រមទាំងលើកទឹកចិត្តឱ្យគ្រប់គ្នាជួយគាំទ្រដល់អ្នកនិពន្ធជំនាន់ក្រោយនេះផងដែរ។

ម្ចាស់ស្នាដៃ បេះដូងមេគង្គ រូបនេះ មានប្រសាសន៍ថា “ការបូកដំបូង គឺគ្នាយើងម្នាក់បានឡើង Top១០ ទៅហើយ។ រឿង សំណែន មានអ្នកអានជាង៥០០នាក់ នេះជាការចាប់ផ្តើមដ៏ល្អមួយ ។ សូមទាំងអស់គ្នា បង្កើនទំនុកចិត្ត ជួយចែកចាយព័ត៌មាន និងធ្វើអ្វីៗក្នុងទំហំដែលអាចទៅរួចដើម្បីគាំទ្រគ្នាទៅវិញទៅមក។”

បន្ថែមពីលើនេះ អ្នកនិពន្ធជើងចាស់រូបនេះ ក៏អំពាវនាវឱ្យមានស្នាដៃ មានគំនិតរឿងល្អ ហើយចង់បង្ហាញ អាចផ្ញើរឿងរបស់ខ្លួនទៅកាន់សហការីរបស់អ្នកស្រី ដើម្បីអាចឱកាសក្លាយជាម្ចាស់រង្វាន់គួរឱ្យភ្ញាក់ផ្អើល៕

អត្ថបទ៖ សន្យា

ចុចអាន៖ ប្រធានបទថ្មី «អ្នកនិពន្ធក្រៅសាលា» ឱកាសសម្រាប់យុវវ័យ ដែលមានបំណងក្លាយជាអ្នកសរសេរប្រលោមលោក

ចុចអាន៖ អ្នកស្រី ម៉ីសន សុធារី បង្ហើប ៥ ចំណុចសម្គាល់ថា បុគ្គលនោះអាចក្លាយជាអ្នកនិពន្ធអាជីពបាន

The post “សំណែន” ឈរលើតារាងមានអ្នកចុចអានច្រើនបំផុតទាំង ១០ នៅលើវេបសាយអ្នកនិពន្ធ ម៉ីសន សុធារី appeared first on Kampuchea Thmey Daily.

សៀវភៅ៤ក្បាលរៀបរាប់អំពីពុកនិងម៉ែ អានហើយភ្ញាក់ខ្លួន

Sonya — Fri, 18 Jun 2021 04:41:57 +0000

សៀវភៅគ្រប់ក្បាលសុទ្ធតែផ្ញើសារពុទ្ធិតិចឬច្រើន មិនដែលអត់នោះទេ។ សៀវភៅខ្លះជាការជំរុញទឹកចិត្ត ខ្លះជាការដាស់តឿន និងខ្លះទៀតផ្ដល់ចំណេះដឹងផ្សេងៗជុំវិញសង្គមនិងការរស់នៅប្រចាំថ្ងៃ។

ដោយឡែក សៀវភៅ ៤ ក្បាលខាងក្រោមនេះវិញ ជាសៀរភៅដែលបរិយាយអំពីលោកឪពុក និងអ្នកម្ដាយ ដែលពួកគាត់តែងតែព្យាយាមលះបង់គ្រប់យ៉ាងដើម្បីចិញ្ចឹមបីបាច់កូនៗឱ្យរស់នៅបានសុខសប្បាយ។

កូនរបស់ម៉ែ

សៀវភៅ “កូនរបស់ម៉ែ” ជាប្រភេទសៀវភៅកំណត់ហេតុរៀបរាប់ខ្សែជីវិតពិតរបស់អ្នកនិពន្ធ និងមានប្រលោមលោកខ្លីមួយចំនួនទៀតអមជាមួយគ្នា។ កូនសៀវភៅពណ៌សនេះជាស្នាដៃអ្នកនិពន្ធ គឹម សុធាថងឌី ដែលមានឈ្មោះក្រៅហៅ អេមី។

“កូនរបស់ម៉ែ” ចង់ផ្ញើសារប្រាប់អ្នកអានគ្រប់រូបឲ្យយល់ពី ព្រហ្មវិហារធម៌ទាំង៤ របស់ម្តាយម្នាក់ដែលជាស្រី្តមេម៉ាយ ក៏ដូចជាជាស្រី្តធ្លាប់រងគ្រោះដោយអំពើហិង្សាមកពីជនបទដាច់ស្រយាល ព្រមទាំងបង្ហាញនូវការខំប្រឹងតស៊ូ និងការលះបង់ដ៏ធំធេងក្នុងភាពជាម្តាយ ដើម្បីផ្តល់ឲ្យជីវិតកូនបានរុងរឿងខ្ពង់ខ្ពស់។ ហេតុនេះកូនៗត្រូវចេះទទួលយកព្រហ្មវិហារធម៌ដែលម្តាយបានផ្តល់ឲ្យ ដោយសម្តែងនូវការដឹងគុណ ការភ្ញាក់រលឹក ដើម្បីតបស្នងតម្លៃដ៏សក្តិសមនឹងការលះបង់របស់អ្នកមានគុណដែលមានចំពោះកូនម្នាក់ៗ។

ដើម្បីកូន

បន្ទាប់ពីទទួលបានការគាំទ្រយ៉ាងច្រើនពីទស្សនិកជនលើភាពយន្តខា្នតធំរឿង “ដើម្បីកូន” ដែលស្នាដៃនិពន្ធរបស់លោក ហ៊ុយ យ៉ាងឡេង រឿងនេះបានបោះផ្សាយជាសៀវភៅបែបអត្ថបទភាពយន្តដំបូងគេក្នុងប្រទេសកម្ពុជា។

សៀវភៅរឿង “ដើម្បីកូន” ក្រៅពីតម្លៃអប់រំដែលនិយាយពីឪពុកធាក់ស៊ីក្លូពិការជើងម្នាក់ ខិតខំលះបង់គ្រប់បែបយ៉ាងសូម្បីជីវិតមិនស្តាយព្រោះតែកូនជាទីស្រឡាញ់ ដែលតំណាងឱ្យទឹកចិត្តស្រឡាញ់របស់ឪពុករាប់លាននាក់ រឿងនេះក៏បានឆ្លុះបញ្ចាំងពីគុណបំណាច់របស់មន្ទីរពេទ្យគន្ធបុប្ផានៅក្នុងការជួយសង្គ្រោះអាយុជីវិតកុមារកម្ពុជារាប់លាននាក់ផងដែរ។ ជាពិសេសនោះ ថវិកា ១០ % ដែលបានមកពីការលក់សៀវភៅនេះ ត្រូវបានបរិច្ចាគជូនមន្ទីរពេទ្យគន្ធបុប្ផា។

និទានម៉ែ

“និទានម៉ែ” ជាប្រភេទសៀវភៅបែបទស្សនវិជ្ជាអប់រំ ព្រមទាំងជំរុញ លើកទឹកចិត្តដល់យុវជនទាំងអស់ឱ្យយល់ដឹងពីដំណើរជីវិតរបស់អ្នកម្តាយ។ ក្នុងនោះ “និទានម៉ែ” បានបញ្ជ្រាបអត្ថន័យពិសេសឱ្យអ្នកអានអាចស្វែងយល់និងបានរៀនបន្ថែមពីបទពិសោធន៍ជីវិតរបស់ម៉ែដែលបានឆ្លងកាត់កន្លងមក ថាពួកលំបាកប៉ុនណា។ សៀវភៅនេះជាស្នាដៃអ្នកនិពន្ធវ័យក្មេង តុន ច័ន្ទរិទ្ធិ ចេញផ្សាយជាសាធារណៈកាលពី ដើមខែមករា ឆ្នាំ២០២០។

ពេលម៉ែចាស់ទៅ

“ពេលម៉ែចាស់ទៅ” ជាស្នាដៃរបស់អ្នកនិពន្ធជើងចាស់អ្នកស្រី ពាន់ភួង បុប្ផា និងអ្នកនិពន្ធវ័យក្មេង លោក ជា តុងហៃ។

រឿងនេះរៀបរាប់ ជីវិតវ័យចំណាស់របស់អ្នកម៉ែ ដែលតែងមានអារម្មណ៍ប្រែប្រួលមិនទៀងទាត់ ភ្នែកមើលមិនសូវឃើញច្បាស់ ត្រចៀកក៏ស្តាប់មិនសូវឮ អណ្តាតវិញក៏រឹតតែលែងសុវដឹងរសជាតិដែរ។ ដោយសារតែបែបនេះទើបកូនៗមួយចំនួនកើតការធុញទ្រាន់ជាមួយម៉ែខ្លួនឯង។

សៀវភៅមួយក្បាលនេះបង្ហាញយ៉ាងច្បាស់ពីជីវិតជាម្តាយ និងពេលដែលចាស់ទៅយើងបែបណា។ ក្តីស្រលាញ់ដ៏ធំមហិមា ប៉ុន្តែកូនៗបែជាមើលរំលងដោយសារហេតុផលរៀងខ្លួន ព្រោះម៉ែចូលចិត្តរអ៊ូច្រើន ធ្វើឲ្យកូនក្នក់ចិត្ត អារម្មណ៍មួរម៉ៅម្តងៗដោយសារតែម៉ែរឹងរូស។ ទោះម៉ែមាត់ធំមាត់តូចដាក់កូនយ៉ាងណា តែម៉ែនៅតែជាម៉ែរបស់កូន កុំចាកចោលម៉ែទោះម៉ែដេញ កុំបន្ទោសម៉ែពេលម៉ែភ្លេចយើង ព្រោះជរាភាព។

សម្រាប់អ្នកមិនទាន់អាន ឬចង់ជូនជាអំណោយទៅកាន់មនុស្សជាទីស្រឡាញ់ អាចរកទិញបានណា៎!

អត្ថបទ៖ សន្យា

ចុចអាន៖ ចំណុចពិសេស ៣ នៃរឿង “មកតាមសន្យា” ដែលនឹងបង្ហាញវត្តមានឆាប់ៗនេះ

ចុចអាន៖ កុំរំលង! សំណុំក្ដីថ្មី ក្នុងស្នាដៃទី៦របស់សំណេររឿង “អាពាហ៍ពិពាហ៍ក្រាលឈាម”

The post សៀវភៅ៤ក្បាលរៀបរាប់អំពីពុកនិងម៉ែ អានហើយភ្ញាក់ខ្លួន appeared first on Kampuchea Thmey Daily.

បាត់អផ្សុកហើយ! រឿងស៊ើបអង្កេត៤ខ្សែពី “សុភាប្រុស” អានហ្វ្រីលើវេបសាយអ្នកនិពន្ធ ម៉ីសន សុធារី

Sonya — Wed, 21 Apr 2021 04:37:26 +0000

កម្រងរឿងក្ដីព្រហ្មទណ្ឌ យ៉ាងចាក់ស្រ្តេសពី សុភាប្រុស ចំនួន៤រឿង ពេលនេះប្រិយមិត្កអាចអានបានដោយសេរីនៅលើវេបសាយអ្នកនិពន្ធ ម៉ីសន សុធារី ក្រោយគេហទំព័រ Meysansoteary.com សម្ពោធជាផ្លូវការ។

សម្រាប់ហ្វេនៗដែលនិយមប្រលោមលោកស៊ើបអង្កេត ប្រាកដជាមិនទាន់ភ្លេចទេនូវសំណុំរឿងក្ដីរបស់ សុភាប្រុស ទាំង ៤ ខ្សែ ដែលធ្លាប់អានដាច់បាយដាច់ទឹក ដាច់ទាំងយប់ទៀតនោះ ឥឡូវនេះប្រិយមិត្តអាចចូលអានម្ដងទៀតលើគេហទំព័រអ្នកនិពន្ធដោយមិនគិតថ្លៃឡើយ។ ចំណែកប្រិយមិត្តមិនទាន់អានប្រលោមលោកទាំងនេះ ក៏អាចចូលអានបានដោយហ្វ្រីៗដូចគ្នា។

សំណុំរឿងយ៉ាងអាថ៌កំបាំង បំបែកក្ក្ដីយ៉ាងស្មុគស្មាញ ធំៗចំនួន៤រឿងនោះរួមមានរឿង “ស្ទូឌីយោលេខ7” រឿង “ម៉ោង១២រំលងអាធ្រាត្រនៅសង្កាត់លេខ១” រឿង “សំណុំឯកសារZ22” និងរឿង “គម្រោងការណ៍សម្ងាត់២០៣៥” ។

ក្រៅពីប្រលោមលោកទាំង៤នេះ ក៏មានប្រលោមលោកមនោសញ្ចេតនាជាច្រើនរឿង ក៏ដូចជាសៀវភៅល្អៗផ្សេងទៀតដែលអាចអានគ្មានដែកកំណត់ផងដែរ។

ចាំអីទៀត! ចូលទៅអានហ្វ្រីៗ កុំឱ្យអផ្សុកកំលុងនៅផ្ទះ!

អត្ថបទ៖ សន្យា

ចុចអាន៖ មិនធម្មតា! ប្រលោមលោក “បេះដូងមេគង្គ” ទាក់ចិត្តដល់តួឯកប្រុស ស្រទន់មន្តស្នេហ៍ ស្លុងអារម្មណ៍តាមសាច់រឿង

ចុចអាន៖ ទីបំផុតហ្វេនៗអាចអានប្រលោមលោកស្នេហាកក់ក្តៅបំផុតមួយហ្វ្រីហើយ!

The post បាត់អផ្សុកហើយ! រឿងស៊ើបអង្កេត៤ខ្សែពី “សុភាប្រុស” អានហ្វ្រីលើវេបសាយអ្នកនិពន្ធ ម៉ីសន សុធារី appeared first on Kampuchea Thmey Daily.

ទីបំផុតហ្វេនៗអាចអានប្រលោមលោកស្នេហាកក់ក្តៅបំផុតមួយហ្វ្រីហើយ!

Sonya — Mon, 12 Apr 2021 04:13:38 +0000

ក្រោយដាក់សម្ពោធឲ្យប្រើប្រាស់នូវវេបសាយប្រលោមលោកបែបឌីជីថលរបស់អ្នកនិពន្ធ ម៉ីសន សុធារី នាដើមខែមេសានេះ ឥឡូវប្រិយមិត្តអាចអានរឿងមួយចំណងដោយហ្វ្រីៗហើយ!

ប្រលោមលោកមនោសញ្ចេតនា ស្នេហាកក់ក្ដៅ រវាងកូនប្រុសទោលនៃត្រកូលអ្នកនយោបាយនិងគ្រូបង្វឹកបង្ហាញម៉ូដរឿង “កិច្ចសន្យាស្នេហាយើង” ដែលធ្លាប់ចេញផ្សាយកាលពីឆ្នាំ ២០១៣ ពេលនេះហ្វេនៗអាចចូលអានមួយរឿងពេញដោយសេរីពីវេបសាយអ្នកនិពន្ធផ្ទាល់ម្ដង។

ក្រៅពីប្រលោមលោកមនោសញ្ចេតនាល្បីៗរបស់អ្នកនិពន្ធ ម៉ីសន សុធារី ប្រិយមិត្តយើងក៏អាចអានប្រលោមលោកស៊ើបអង្កេតពី សុភាប្រុស ប្រលោកលោកអបិយជំនឿ មន្តអាគម របស់ ពេជ្របណ្ឌិត និងសៀវភៅល្បីៗផ្សេងៗ រួមទាំងប្រលោមលោកចេញថ្មីជាច្រើនទៀតផងដែរ ជឿថាមិនធ្វើឱ្យខកបំណងសម្រាប់អ្នកស្នេហាការអានទាំងឡាយឡើយ។

ចង់អានហ្វ្រីទេ? ចូលវេបសាយអ្នកនិពន្ធបានណា៎! ឬអាចតាមផេក Meysan Sotheary Digital ក៏បាន!

អត្ថបទ៖ សន្យា

ចុចអាន៖ អ្នកគាំទ្រប្រលោមលោក រំភើបចិត្តចំពោះការសម្ពោធដាក់ឲ្យប្រើប្រាស់វេបសាយនៃអ្នកនិពន្ធផ្ទាល់

ចុចអាន៖ អ្នកនិពន្ធ ៣ រូប ហ្វេនៗស្ងើចសរសើរសរសេររឿងបែបរន្ធត់បានល្អខ្លាំង

The post ទីបំផុតហ្វេនៗអាចអានប្រលោមលោកស្នេហាកក់ក្តៅបំផុតមួយហ្វ្រីហើយ! appeared first on Kampuchea Thmey Daily.

អ្នកគាំទ្រប្រលោមលោក រំភើបចិត្តចំពោះការសម្ពោធដាក់ឲ្យប្រើប្រាស់វេបសាយនៃអ្នកនិពន្ធផ្ទាល់

សាង ស្រីល័ក្ខ — Wed, 07 Apr 2021 08:00:21 +0000

កំណើនអ្នកអានសៀវភៅ បានធ្វើឲ្យវិស័យតែងនិពន្ធកាន់តែរីកដុះដាលពីមួយឆ្នាំទៅមួយឆ្នាំ។ ស្របពេលនេះដែរ អ្នកនិពន្ធ ម៉ីសន សុធារី បានដាក់សម្ពោធឲ្យប្រើប្រាស់វេបសាយបែបឌីជីថលរបស់អ្នកនិពន្ធផ្ទាល់តែម្ដង។

ការដាក់ឲ្យប្រើប្រាស់នៅវេបសាយបែបឌីជីថល ជាការជួយសម្រួលដល់មិត្តអ្នកអាន ក៏ដូចជាហ្វេនដែលកំពុងសម្រាកធ្វើការពីផ្ទះឬមិនអាចចេញទៅណាបានក្នុងអំឡុងពេលនេះ។

កញ្ញា នាង មុនីច័ន្ទ ជាសិស្សថ្នាក់ទី១២ និងជាសមាជិក MST ហ្វេនក្លឹប បានប្រាប់កម្ពុជាថ្មី ក្នុងបទសម្ភាសន៍ថា ប្អូនមានអារម្មណ៍សប្បាយចិត្ត ព្រោះថានៅក្នុងសម័យកូវីដនេះ នរណាក៏ខ្លាចរអាការឆ្លងជំងឺ ហើយនៅពេលដែលអ្នកនិពន្ធសម្ពោធវេបសាយផ្ទាល់ គឺពិតជាផ្ដល់ភាពងាយស្រួលដល់អ្នកអានក្នុងការចូលទៅអានរឿងថ្មីៗរបស់អ្នកនិពន្ធបានគ្រប់ពេលវេលានិងទីកន្លែង។

កញ្ញាក៏បានបន្ថែមជាការសំណូមពរទៅកាន់អ្នកនិពន្ធថា សូមឲ្យអ្នកនិពន្ធចេញរឿងស្នេហាបែបសិស្សវិទ្យាល័យម្ដង ព្រោះនាងចូលចិត្តអានរឿងប្រភេទនេះជាពិសេស។

កញ្ញា នាង មុនីច័ន្ទ

កញ្ញា អ៊ិន បូបូ

ដោយឡែក កញ្ញា អ៊ិន បូបូ ជាជាសមាជិកទសប៉ាកកាមួយរូបក៏បានផ្ដល់ចំណាប់អារម្មណ៏រំភើបរីករាយដែរថា កញ្ញាមានអារម្មណ៍ថាថ្មី ប្លែក ហើយងាយស្រួលក្នុងការអាន គ្រប់ចំណងជើងរបស់អ្នកនិពន្ធមានបង្ហាញនៅលើវេបសាយទាំងអស់ ចឹងអ្នកអានអាចជ្រើសរើសចំណងជើងដែលចង់អានបានតាមចិត្ត និងកាត់បន្ថយចំណាយបានខ្លះ បើធៀបទៅនឹងការទិញសៀវភៅ។

កញ្ញាបានបន្ថែមទៀតថា អានលើឌីជីថលក៏មានផលរំខានតិចតួចដល់អ្នកដែលមិនទម្លាប់ បើអ្នកខ្លះគាត់ស្រឡាញ់ការអានលើសៀវភៅជាង។ តែយ៉ាងណាការបង្កើតវេបសាយអាន ជាការឈានមួយជំហានទៀត សមស្របនឹងកាលៈទេសៈបច្ចុប្បន្ន ជួយសម្រាលអារម្មណ៍ស្មុគស្មាញក្នុងរយៈពេលតឹងតែងនេះបាន។

សូមបញ្ជាក់ដែរថា អ្នកនិពន្ធ ម៉ីសន សុធារី ក៏បានបញ្ចេញនូវចំណងជើងរឿងប្រលោមទាំងស្នេហានិងអបិយជំនឿខ្លះៗនៅលើវេបសាយបែបឌីជីថលថ្មីដែលទើបតែសម្ពោធដូចជា ៖ បេះដូងមេគង្គ , ស្រលាញ់បងជ្រៅជាងសមុទ្រ , ថ្ងៃណាមួយ និង រូបខ្មៅស្រអាប់៕

អត្ថបទ៖ សាង ស្រីល័ក្ខ

ចុចអាន៖ទស្សនៈនានាអំពីកម្រងនិទាន “សង្វៀនផ្លូវងងឹត” ដែលឆ្លុះបញ្ចាំងប្រពៃណី និងអបិយជំនឿដូនតាខ្មែរ

ចុចអាន៖វិស័យតែងនិពន្ធប៉ុន្មានឆ្នាំចុងក្រោយ ស្ថិតលើផ្លូវវិជ្ជមាន

The post អ្នកគាំទ្រប្រលោមលោក រំភើបចិត្តចំពោះការសម្ពោធដាក់ឲ្យប្រើប្រាស់វេបសាយនៃអ្នកនិពន្ធផ្ទាល់ appeared first on Kampuchea Thmey Daily.

ទស្សនៈនានាអំពីកម្រងនិទាន “សង្វៀនផ្លូវងងឹត” ដែលឆ្លុះបញ្ចាំងប្រពៃណី និងអបិយជំនឿដូនតាខ្មែរ

Sonya — Fri, 22 Jan 2021 03:35:31 +0000

(ផ្សាយឡើងវិញ) ភាគនិទានបែបមន្តអាគម “សង្វៀនផ្លូវងងឹត” ត្រូវបានយុវជន៣រូបបញ្ចេញទស្សនៈវិជ្ជមានចំពោះដំណើរដើមទងនៃរឿង ព្រមទាំងតម្លៃនៃពុទ្ធិ ថាជាប្រលោមលោកដែលឆ្លុះបញ្ចាំងពីប្រពៃណីនិងអបិយជំនឿដូនតាខ្មែរ ដែលអាចរៀនសូត្របានសន្ធឹកក្នុងនាមពួកគេជាកូនចៅជំនាន់ក្រោយ។

លោក ជា តុងហៃ អ្នកនិពន្ធមកពីក្រុមទសប៉ាកកា បានលើកឡើងថា ខ្លួនជាអ្នកគាំទ្រស្នាដៃរបស់ ពេជ្រ បណ្ឌិត ជាយូរមកហើយ តាំងតែពីលោកមិនទាន់ក្លាយជាអ្នកនិពន្ធមកម្លេះ។ លោកថា ពេជ្រ បណ្ឌិត មានស្នាដៃបែបមន្តអាគមប្រមាណ ១០ រឿងនៅលើវេបសាយអនឡាញប្រលោមលោក Sabbay ហើយលោកជាអ្នកគាំទ្រម្នាក់ដែលអានស្នាដៃទាំងនោះដោយមិនចន្លោះណាមួយឡើយ ។ ស្នាដៃរឿងនីមួយៗសុទ្ធតែមានលក្ខណៈពិសេស ដោយមិនត្រឹមតែផ្ដល់ការកម្សាន្តប៉ុណ្ណោះទេ តែវាបានផ្ដល់នូវចំណេះដឹងពីវប្បធម៌ក្នុងជំនឿខ្មែរ ដែលសូម្បីតែរូបលោកជាកូនខ្មែរម្នាក់ក៏មិនធ្លាប់បានស្គាល់ ឬបានដឹងផង។

ចំណែកឯ កញ្ញា សំ ច័ន្ទមុន្នីកា ប្រាប់មកកម្ពុជាថ្មីថា នៅពេលកញ្ញាបានអានប្រលោមលោករបស់ ពេជ្រ បណ្ឌិត កញ្ញារកឃើញថា ស្នាដៃរបស់អ្នកនិពន្ធរូបនេះមានភាពខុសប្លែកពីស្នាដៃមន្តអាគមផ្សេងៗ។ កញ្ញាថា លក្ខណៈខុសប្លែកនោះរួមមាន ១.និយាយពីអបិយជំនឿគួបផ្សំនឹងហេតុផលដោយបញ្ជាក់ពីប្រភពច្បាស់លាស់ ២. អភិរក្សប្រពៃណីអត្តសញ្ញាណជាតិ ៣.ឆ្លុះបញ្ចាំងពីកម្មពៀររបស់អ្នកប្រព្រឹត្តមន្តអាគមខ្មៅងងឹតដែលបំពានអ្នកដទៃ នឹងទទួលកម្មតបស្នងមិនចាំបាច់ជាតិក្រោយឡើយ។

ងាកមកយុវជនម្នាក់ទៀតនោះគឺ លោក លី គឹមសួរ ដែលជាអ្នកនិពន្ធជំនាន់ថ្មីមួយរូបមកពីក្រុមទសប៉ាកកាផងនោះ បានឲ្យដឹងថា លោកអានកម្រងរឿងបែបមន្តអាគមរបស់អ្នកនិពន្ធរូបនេះ ធ្វើឲ្យលោកស្លុងអារម្មណ៍ ព្រឺព្រួច ដូចស្ថិតក្នុងហេតុការណ៍ជាមួយតួអង្គពិតៗ។

ដោយឡែក អ្នកនិពន្ធ ពេជ្រ បណ្ឌិត ដែលជាម្ចាស់ស្នាដៃប្រលោមលោកមន្តអាគមជាច្រើនរឿង មានប្រសាសន៍ថា ចំពោះអ្នកស្រីនៅពេលសរសេររឿងមន្តអាគម អ្នកស្រីគិតទៅលើចំណុចមួយចំនួនគឺ ជាដំបូងត្រូវផ្សារភ្ជាប់សាច់រឿងទៅនឹងស្ថានភាពរស់នៅរបស់ប្រជាជន ដោយមិនបំភ្លៃការពិតពេកខុសពីអ្វីដែលអ្នកអានធ្លាប់ជួបឡើយ។ ក្នុងនាមជាអ្នកនិពន្ធ អ្នកស្រីថា យើងអាចបំភ្លៃ ប៉ុន្តែមិនមែនបំភ្លៃបែបមិនទំនង ធ្វើឲ្យអ្នកអានយល់ថា សាច់រឿងកុហកៗនោះទេ។ ការសរសេររឿងបែបមនោសញ្ចេតនាគេផ្ដោតលើតួអង្គជាជាងទិដ្ឋភាព តែសម្រាប់រឿងបែបភ័យរន្ធត់ឬមន្តអាគម គេផ្តោតលើទិដ្ឋភាពជាជាងតួអង្គវិញ។ អ្នកនិពន្ធបន្ថែមថា រឿងបែបមន្តអាគមអូមអាមមិនមែនជារឿងដែលអ្នកស្រីចង់ឲ្យអ្នកអានព្រឺខ្លាចទេ ត ចង់ឲ្យអ្នកបានទទួលនូវពុទ្ធិដែលពាក់ព័ន្ធនឹងជំនឿដូនតាយើង។

ម្ចាស់ស្នាដៃ “សង្វៀនផ្លូវងងឹត” រូបនេះបាននសង្កត់ធ្ងន់ជាចុងក្រោយថា ប្រលោមលោកអបិយជំនឿ អ្នកស្រីតែងតែបញ្ចប់រឿងដោយឲ្យមនុស្សល្អនិងអំពើល្អ ឈ្នះលើសេចក្ដីអាក្រក់និងអមនុស្សជានិច្ច។ ការបញ្ចប់រឿងបែបនេះ វាមិនមែនជារសនិយមដែលអ្នកស្រីចូលចិត្តទេ ប៉ុន្តែអ្នកស្រីចង់ឆ្លុះបញ្ចាំងថា គ្រប់បញ្ហាកើតឡើងចំពោះយើងម្នាក់ៗតែងតែមានផ្លូវដោះស្រាយដរាបណាយើងមិនបោះបង់។

ភាគនិទានមន្តអាគម “សង្វៀនផ្លូវងងឹត” មាន ៤ រឿងខ្លី និយាយពី ជំងឺជួរសម្បួរក្នុងគ្រួសារខ្មែរ អាថ៌កំបាំងក្នុងផ្ទះគ្រូទាយម្នាក់ ការចាក់សាក់របស់តារាដែលមានឈ្មោះល្បី និងក្រុមចម្រៀងមួយក្រុមដែលខុសមាត់កជាមួយជនជាតិភាគតិចនៅភាគឦសាន។ ប្រលោមលោកនេះ ជាស្នាដៃរបស់អ្នកនិពន្ធ ពេជ្រ បណ្ឌិត ដែលបានចេញផ្សាយកាលពីដើមខែមករា ឆ្នាំ ២០២០៕

អត្ថបទ៖ សន្យា

ចុចអាន៖ ខ្លះៗជុំវិញពាក្យជួរសម្បួរដែលជាជំងឺផ្លូវងងឹតក្នុងជំនឿខ្មែរ

ចុចអាន៖ គួរឲ្យសរសើរ! អ្នកនិពន្ធ រតនា យកថវិកាពីការលក់សៀវភៅគាំទ្រសកម្មភាពសប្បុរសធម៌

The post ទស្សនៈនានាអំពីកម្រងនិទាន “សង្វៀនផ្លូវងងឹត” ដែលឆ្លុះបញ្ចាំងប្រពៃណី និងអបិយជំនឿដូនតាខ្មែរ appeared first on Kampuchea Thmey Daily.

“បែបណាទើបល្អ?” ប្រើពេលជាង១ឆ្នាំដើម្បីសរសេរ ផ្ដើមចេញពីពិសោធន៍ធ្លាប់ជួបបញ្ហារបស់អ្នកនិពន្ធ

Sonya — Thu, 14 Jan 2021 06:52:29 +0000

ផ្ដើមចេញពីបទពិសោធន៍ធ្លាប់ជួបបញ្ហា ហើយត្រូវការការលើកទឹកចិត្ត សៀវភៅ “បែបណាទើបល្អ?” បានចេញផ្សាយជាស្នាដៃលើកទឹកចិត្តទី៣ របស់អ្នកនិពន្ធ កែវ សេងរដ្ឋា កាលពីពេលថ្មីៗនេះ។

និយាយដល់ការសរសេរសៀវភៅលើកទឹកចិត្តមកហូរហែ អ្នកនិពន្ធ កែវ សេងរដ្ឋា ប្រាប់ថា មិនមែនលោកសរសេរតែសៀវភៅលើកទឹកចិត្តនោះទេ គ្រាន់តែលោកមានឱកាសចេញសៀវភៅលើកទឹកចិត្តមុនប៉ុណ្ណោះ។ លោកថា នាថ្ងៃមុខខ្លួនមានគម្រោងចេញសៀវភៅប្រលោមលោកដែរ។

ទន្ទឹមនឹងនេះ មូលហេតុដែលម្ចាស់ស្នាដៃ “បែបណាទើបល្អ?” សរសេរសៀវភៅលើកទឹកចិត្តកន្លងមក ដោយសារលោកខ្លួនឯងធ្លាប់ជួបបញ្ហា ហើយត្រូវការការលើកទឹកចិត្ត។

“ពេលនោះ ខ្ញុំបានទទួលការលើកទឹកចិត្តតាមរយៈសំណេររបស់អ្នកនិពន្ធខ្មែរ និងបរទេសជាច្រើន។ ក្រោយមក ដោយហេតុខ្ញុំរកឃើញថា ខ្លួនឯងស្រឡាញ់ការតែងនិពន្ធផងនោះ ខ្ញុំក៏ចាប់ផ្ដើមសរសេរអត្ថបទលើកទឹកចិត្ត ហើយក៏បានបោះពុម្ពជាសៀវភៅបន្តបន្ទាប់។”

អ្នកនិពន្ធវ័យ ២៩ ឆ្នាំរូបនេះ បានឲ្យដឹងថា សៀវភៅ “បែបណាទើបល្អ?” មានលក្ខណៈប្លែកពីសៀវភៅ “សំឡេងខ្សឹប” និង “ហឫទ័យ” បន្តិចត្រង់ថា “បែបណាទើបល្អ?” បង្ហាញពីគំនិត ក៏ដូចជាការណែនាំអ្នកអានឱ្យដឹងថា បើពួកគេជួបបញ្ហាមួយ តើត្រូវដោះស្រាយបែបណាទើបល្អ ជាជាងគ្រាន់តែលើកទឹកចិត្តប្រិយមិត្តឱ្យរឹងមាំតែម្យ៉ាង។

ដោយឡែក ស្នាដៃថ្មីចុងក្រោយនេះ អ្នកនិពន្ធប្រើពេលជាងមួយឆ្នាំក្នុងការសរសេរ ពោលគឺលោកចាប់ផ្ដើមសរសេរតាំងពីមិនទាន់បានបោះពុម្ពផ្សាយសៀវភៅ “ហឫទ័យ” មកម្ល៉េះ។ លោកមានប្រសាសន៍ថា មានការពិបាកខ្លះៗដែរក្នុងការសរសេរ “បែបណាទើបល្អ?” ព្រោះគ្រប់យ៉ាងក្នុងសៀវភៅ លោកផ្ដោតលើដំណោះស្រាយនៃបញ្ហាតាមរបៀបលើកទឹកចិត្តទៅជាមួយគ្នា។

“បែបណាទើបល្អ?” មានកម្រាស់ ២៤៥ ទំព័រ តម្លៃ ២៨០០០រៀល។ ប្រិយមិត្តអាចរកទិញបាននៅតាមបណ្ណាគារ និងហាងលក់សៀវភៅអនឡាញជាច្រើនទូទាំងប្រទេស។ ប្រសិនបើចង់ទិញដុំយកទៅលក់បន្ត អាចទាក់ទងទៅកាន់ផេក មេសា-April ៕

អត្ថបទ៖ សន្យា

ចុចអាន៖ ហេតុផលសំខាន់ពីរនេះហើយ ទើបរឿង “ភរិយាខ្ញុំអាយុ ១៨ ឆ្នាំ” បោះពុម្ពម្ដងទៀត

ចុចអាន៖ ខ្សែជីវិតនារីវ័យក្មេងម្នាក់កើតចេញពីគ្រួសារក្រីក្រនៅជាយដែន ត្រូវបានលាតត្រដាងក្នុងកូនសៀវភៅថ្មី

The post “បែបណាទើបល្អ?” ប្រើពេលជាង១ឆ្នាំដើម្បីសរសេរ ផ្ដើមចេញពីពិសោធន៍ធ្លាប់ជួបបញ្ហារបស់អ្នកនិពន្ធ appeared first on Kampuchea Thmey Daily.

ស្នាដៃអ្នកនិពន្ធខ្មែរ Archives - Kampuchea Thmey Daily

បុគ្គលជំនាន់ដើម ៥ រូប បន្សល់ស្នាដៃ​​លេចធ្លោ​​បន្ត​ដល់​​​កូនខ្មែរ​ជំនាន់ក្រោយ​

“សំណែន” ឈរលើតារាងមានអ្នកចុចអានច្រើនបំផុតទាំង ១០ នៅលើវេបសាយអ្នកនិពន្ធ ម៉ីសន សុធារី

សៀវភៅ៤ក្បាលរៀបរាប់អំពីពុកនិងម៉ែ អានហើយភ្ញាក់ខ្លួន

បាត់អផ្សុកហើយ! រឿងស៊ើបអង្កេត៤ខ្សែពី “សុភាប្រុស” អានហ្វ្រីលើវេបសាយអ្នកនិពន្ធ ម៉ីសន សុធារី

ទីបំផុតហ្វេនៗអាចអានប្រលោមលោកស្នេហាកក់ក្តៅបំផុតមួយហ្វ្រីហើយ!

អ្នក​គាំទ្រ​ប្រលោមលោក រំភើប​ចិត្ត​ចំពោះ​ការ​សម្ពោធ​ដាក់​ឲ្យ​ប្រើប្រាស់​វេបសាយ​នៃ​អ្នក​និពន្ធ​ផ្ទាល់

ទស្សនៈនានាអំពីកម្រងនិទាន “សង្វៀនផ្លូវងងឹត” ដែលឆ្លុះបញ្ចាំងប្រពៃណី និងអបិយជំនឿដូនតាខ្មែរ

“បែបណាទើបល្អ?” ប្រើពេលជាង១ឆ្នាំដើម្បីសរសេរ ផ្ដើមចេញពីពិសោធន៍ធ្លាប់ជួបបញ្ហារបស់អ្នកនិពន្ធ

បុគ្គលជំនាន់ដើម ៥ រូប បន្សល់ស្នាដៃលេចធ្លោបន្តដល់កូនខ្មែរជំនាន់ក្រោយ

អ្នកគាំទ្រប្រលោមលោក រំភើបចិត្តចំពោះការសម្ពោធដាក់ឲ្យប្រើប្រាស់វេបសាយនៃអ្នកនិពន្ធផ្ទាល់