​សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ​មានប្រសាសន៍កាលពីពេលថ្មីៗនេះ ​រាជរដ្ឋាភិបាលកម្ពុជា ​កំពុងអភិវឌ្ឍហេដ្ឋារចនាសម្ព័ន្ធតភ្ជាប់​សួនឧស្សាហកម្មស្វាយចន្ទី​នៅក្នុង​ខេត្ត​កំពង់ធំ ​ដើម្បីជំរុញការ​អភិវឌ្ឍន៍វិស័យ​ស្វាយចន្ទីកម្ពុជា។

​សម្ដេចនាយករដ្ឋមន្ត្រី បានលើកឡើងថា ឧស្សាហកម្មស្វាយចន្ទី ត្រូវបាន​រៀបចំសាកល្បង​មួយ​ជំហានរួចហើយ ដើម្បីប្រែក្លាយរៀបចំយុទ្ធសាស្ត្រអភិវឌ្ឍស្វាយចន្ទី ​តាមរយៈការដាក់ចេញ​នូវ​ការ​ប្រតិបត្តិជាក់ស្ដែង ដោយយកខេត្តកំពង់ធំជាការចាប់ផ្ដើម ជាមជ្ឈមណ្ឌលសួនឧស្សា​ហកម្មស្វាយចន្ទី។

បើតាមសម្ដេច ហ៊ុន ម៉ាណែត សួនឧស្សាហកម្មស្វាយចន្ទី ផ្តោតសំខាន់លើការ​កែច្នៃគ្រាប់ស្វាយចន្ទី​ ប្រមូលផ្ដុំនៅទីនេះ ដើម្បីជួយកសិករនៅខេត្តកំពង់ធំ និងខេត្តមួយចំនួនទៀត ដូចជាខេត្តព្រះវិហារ ខេត្តកំពង់ចាម និងខេត្តសៀមរាប។

សម្ដេច ហ៊ុន ម៉ាណែត បញ្ជាក់ថា៖ «បានន័យថា យើងបង្កើតទីផ្សារនៅនឹងកន្លែង កន្លងទៅយើង​បង្កើតទីផ្សារនៅក្រៅច្រើន យើងផលិតកែច្នៃហើយ យើងនាំអាឆៅ នាំអាឆ្អិនទៅ ឥឡូវយើងចង់បង្កើតទីផ្សារក្នុងស្រុក បានន័យថា បង្កើតឧស្សាហកម្មកែច្នៃក្នុងស្រុក ដើម្បីនាំចេញ»។

សម្ដេច ហ៊ុន ម៉ាណែត បន្ថែមថា ការកែច្នៃស្វាយចន្ទី មិននិយាយតែកែច្នៃគ្រាប់​ចន្ទីយក​ទៅក្រៅនោះទេ និយាយទាំងអស់ ទាំងសំបកធ្វើអ្វី និងដើមចន្ទីធ្វើអ្វី យកមកកែច្នៃ ដើម្បីឱ្យ​ជាខ្សែសង្វាក់ផលិតកម្មតែម្ដង ដោយសង្ឃឹមថា កម្ពុជានឹងក្លាយទៅជាអធិរាជស្វាយចន្ទី ដែលមានខេត្តកំពង់ធំជាស្នូលនៃអ្នកផលិតស្វាយចន្ទីច្រើន។​

​លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា លោកចង់ឲ្យតំបន់សួនឧស្សា​ហកម្មស្វាយចន្ទី មានលក្ខណៈដូចតំបន់សេដ្ឋកិច្ចពិសេស ដែលត្រូវបានទទួលការឧបត្ថម្ភ​ធនលើផ្នែកបច្ចេកទេស និងការលើកលែងពន្ធមួយចំនួនដូចជាពន្ធនៃការនាំចេញត្រូវបានលើកលែង ប៉ុន្តែផ្ដោតតែលើកសិ-ឧស្សាហកម្មប៉ុណ្ណោះ។

លោក អួន ស៊ីឡុត បន្ថែមថា៖ «ជាសំណូមពរផ្ទាល់ខ្លួន ខ្ញុំចង់ឲ្យតំបន់សួនកសិ-ឧស្សាហកម្មឲ្យក្រុមហ៊ុនអាច​មកធ្វើរោងចក្រនៅលើដីហ្នឹង ដោយមិនចាំបាច់មានភាគទុនជាកម្ពុជាទេ គាត់អាចជួលដីហ្នឹងបើករោងចក្រក្នុងអំឡុងពេលណាមួយ ដែលធ្វើឱ្យវិនិយោគិនមានភាពងាយស្រួល គាត់ទទួលបានការឧបត្ថម្ភធន គាត់អាចរួចពន្ធមួយចំនួន ហើយគាត់នៅបណ្ដុំគ្នាដែលគាត់អាចប្រមូលបានវត្ថុធាតុដើម អ្នកដែលនៅបណ្ដុំគ្នានេះ មិនមែនតែចន្ទីទេ អាចនឹងដំឡូងមីផងដែរ»។​

​កម្ពុជា​បាន​នាំចេញគ្រាប់ស្វាយចន្ទីឆៅ​សរុបជាង​ ៨៣ ម៉ឺនតោន (​៨៣១១៧៩) ​ទៅកាន់ប្រទេស​វៀត​ណាម​ នៅក្នុងរយៈពេល ៤ ​ខែ​ដំបូងឆ្នាំ ​២០២៦​ ដោយបង្កើតប្រាក់ចំណូល​​ប្រមាណ ​១,៤៤ ​ពាន់លាន​ដុល្លារ ​​កើនឡើង ​២៤.១៧% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍ក្រៅផ្លូវការ​របស់​ស​មាគម​ស្វាយចន្ទីកម្ពុជា៕​

អត្ថបទ៖ ឡេង ដេត

The post ​គណៈកម្មាធិការវិនិយោគ ចុះពិនិត្យ​ទីតាំង​សួន​ឧស្សាហកម្មចន្ទី​ នៅខេត្តកំពង់ធំ​ appeared first on Kampuchea Thmey Daily.

សកម្មភាពចុះឈ្មោះនេះ បានធ្វើឡើងនៅថ្ងៃទី៥ ខែមិថុនា ឆ្នាំ២០២៦ នៅសាលារោងភូមិទៀមលើ ឃុំកាចូន ស្រុកវើនសៃ ខេត្តរតនគិរីដោយមានប្រជាពលរដ្ឋចូលរួមប្រមាណ ២៥នាក់ ក្នុងនោះមានបុរស ៨នាក់។ កម្មវិធីនេះមានគោលដៅជួយឱ្យកសិករមិនចាំបាច់ចំណាយប្រាក់ទិញកូនស្វាយចន្ទីផ្សាំពីខាងក្រៅទៀតឡើយ ដោយអាចរៀនបច្ចេកទេស និងអនុវត្តដោយខ្លួនឯង។

លោក ទិត សុខរិន គ្រូបង្រៀននៃមជ្ឈមណ្ឌលវិជ្ជាជីវៈខេត្តរតនគិរី បានប្រាប់កម្ពុជាថ្មីថា បន្ទាប់ពីការចុះឈ្មោះរួចរាល់ វគ្គបណ្តុះបណ្តាលបច្ចេកទេសកាត់តស្វាយចន្ទី នឹងចាប់ផ្តើមនៅថ្ងៃទី១ ខែកក្កដា ឆ្នាំ២០២៦ នៅសាលារោងភូមិទៀមលើដដែល។ លោកបន្តថា មជ្ឈមណ្ឌលមានគ្រូបង្គោលដែលមានជំនាញ និងបទពិសោធន៍ខ្ពស់ អាចផ្តល់ចំណេះដឹងជាក់ស្តែងដល់ប្រជាកសិករ ដើម្បីឱ្យពួកគេអាចកាត់ត និងផ្សាំពូជស្វាយចន្ទីដោយខ្លួនឯង។ គោលបំណងសំខាន់គឺកាត់បន្ថយការពឹងផ្អែកលើការទិញកូនពូជពីខាងក្រៅ និងកាត់បន្ថយចំណាយដើមទុនផលិតកម្ម ខណៈដែលកសិករក៏អាចជ្រើសរើសពូជដែលមានគុណភាព និងផ្តល់ទិន្នផលខ្ពស់សម្រាប់ចម្ការរបស់ខ្លួនផងដែរ។

លោក ទិត សុខរិន បានអំពាវនាវដល់ប្រជាពលរដ្ឋក្នុងខេត្តរតនគិរី ឱ្យចូលរួមសិក្សាជំនាញនេះឱ្យបានច្រើន ដោយសារជំនាញបច្ចេកទេសកាត់តស្វាយចន្ទីអាចជួយបង្កើនម្ចាស់ការលើការផលិតកូនពូជ និងលើកកម្ពស់ជីវភាពគ្រួសារនាពេលអនាគត។

លោកបញ្ជាក់ថា កម្មវិធីបណ្តុះបណ្តាលនេះ ជាផ្នែកមួយនៃកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលជូនពលរដ្ឋ ១ លាន ៥ សែននាក់ ដែលផ្តោតលើការលើកកម្ពស់ជីវភាពប្រជាពលរដ្ឋ តាមរយៈការផ្តល់ជំនាញដែលអាចយកទៅប្រើប្រាស់ក្នុងជីវភាពប្រចាំថ្ងៃ។

ជាមួយគ្នានេះ លោកបានឱ្យដឹងថា ក្រុមការងាររបស់មជ្ឈមណ្ឌលបានចុះផ្សព្វផ្សាយ និងចុះឈ្មោះសិក្ខាកាមនៅតាមស្រុកនានាទូទាំងខេត្តរតនគិរី ដើម្បីធានាថាប្រជាពលរដ្ឋនៅតំបន់ដាច់ស្រយាលក៏អាចទទួលបានឱកាសសិក្សាជំនាញវិជ្ជាជីវៈផងដែរ។ ជំនាញកសិកម្មដែលកំពុងបណ្តុះបណ្តាលរួមមាន ដំណាំស្វាយចន្ទី កៅស៊ូ ធុរេន និងចេក ដែលស្របតាមតម្រូវការទីផ្សារ។

លោក ស្វែង បាន មេភូមិទៀមលើ បានលើកឡើងថា វគ្គបណ្តុះបណ្តាលបច្ចេកទេសកាត់តស្វាយចន្ទីនេះ មានសារៈសំខាន់ខ្លាំងសម្រាប់ប្រជាកសិករក្នុងមូលដ្ឋាន ព្រោះអាចជួយពង្រឹងសមត្ថភាពកសិកម្ម និងកាត់បន្ថយការចំណាយក្នុងគ្រួសារ។ លោកបានបញ្ជាក់ថា បន្ទាប់ពីបញ្ចប់វគ្គបណ្តុះបណ្តាល កសិករនឹងទទួលបានជំនាញជាក់ស្តែង ដែលអាចយកទៅអនុវត្តបានដោយខ្លួនឯង ដោយមិនចាំបាច់ពឹងផ្អែកលើការទិញកូនពូជពីខាងក្រៅ៕

ដោយ៖ ខៀវ ចាប

The post មជ្ឈមណ្ឌលវិជ្ជាជីវៈខេត្តរតនគិរី ផ្តល់វគ្គបណ្តុះបណ្តាលជំនាញផ្សាំដើមស្វាយចន្ទីឥតគិតថ្លៃដល់កសិករ appeared first on Kampuchea Thmey Daily.

មួយរយៈចុងក្រោយនេះគេសង្កេតឃើញថា នៅតាមដងផ្លូវក្នុងស្រុកកំរៀង ដែលស្ថិតនៅជាប់នឹងខ្សែបន្ទាត់ព្រំដែនថៃ ក្នុងមួយ​ថ្ងៃៗមានគោយន្តមិនក្រោមពី ៥០ គ្រឿង កំពុងដឹកជញ្ជូនដើមស្វាយបន្តកន្ទុយគ្នា ដោយសារតែផ្លែស្វាយគ្មានអ្នកទិញជ្រុះចោលក្រោមដើមរាប់តោន ទើបពេលនេះម្ចាស់ចំការសម្រេចចិត្តកាប់ដើមលក់ឧិ្យអ្នកដុតធ្យូង។  

លោក ផល សំណព្វ ជាប្រជាកសិកររស់នៅភូមិតាំងយូ ឃុំអូរដា ស្រុកកំរៀង ខេត្តបាត់ដំបងបាននិយាយថា លោកមានដំណាំស្វាយកែវល្មៀតមួយចំការនឹងគេដែរ ប៉ុន្តែរហូតមកទល់ពេលនេះគឺផ្លែស្វាយគ្មានទីផ្សារទាល់តែសោះ បើទោះបីជាផ្លែនោះមានទំហំធំត្រូវប៉ាន់ប៉ុណ្ណាក៏ដោយ ដោយមើលឃើញថា ទុកតទៅទៀតក៏មិនចំណេញ រូបលោកផ្ទាល់ក៏ដូចជាអ្នកភូមិមួយចំនួនទៀត បានសម្រេចចិត្តកាប់ដើមស្វាយទាំងនោះចោល ព្រោះបើទុកបានត្រឹមតែចង្អៀតដីគ្មានផលប្រយោជន៍ ។    

លោកសំណព្វបានបន្តថា ភាគច្រើនអ្នកដែលកាប់ដើមស្វាយចោលនោះ គឺមានគម្រោងដាំដើមស្វាយចន្ទីជំនួសវិញ ដោយកូនស្វាយចន្ទីគឺទិញពីអ្នកបណ្តុះនិងផ្សាំកូនពីខេត្តត្បូងឃ្មុំនិងពីខេត្តកំពង់ធំហើយ តម្លៃកូនស្វាយចន្ទីក្នុង១ដើម ចន្លោះពី ២.០០០ រៀល ទៅ ៣.៥០០រៀល ទៅតាមកំពស់ ពី ២០ ស.ម. ទៅ ៣៥ស.ម.។

ដោយសារតែបច្ចុប្បន្នគ្រាប់ស្វាយចន្ទីនៅស្រុកកំរៀងមានហាងឆេងល្អគឺមានតម្លៃជាង ៦.០០០ រៀល ក្នុងមួយគីឡូក្រាម ហេតុដូច្នេះហើយទើបរូបលោកក៏ដូចជាប្រជាកសិករមួយចំនួនទៀតសម្រេចចិត្តកាប់ដើមស្វាយនេះចោលតែម្ដង៕

អត្ថបទ៖ សោ និយមរ័ត្ន

The post កសិករស្រុកកំរៀង​កាប់ដើមស្វាយ​ចោល មក​ដាំស្វាយ​ចន្ទី ខណៈ​ទីផ្សារ​ស្វាយ​ចន្ទី​ឡើង​ដល់ ៦ ០០០ រៀល/គីឡូក្រាម appeared first on Kampuchea Thmey Daily.

យោងតាមរបាយការណ៍របស់សមត្ថកិច្ចនៃអធិការដ្ឋាននគរបាលស្រុកកំរៀង ខេត្តបាត់ដំបង បានបញ្ជាក់ថា បន្ទាប់ពីទទួលបានពាក្យបណ្ដឹងពីជនរងគ្រោះចំនួន ៣រូបដែលបានអះអាងថា នៅក្នុងចម្ការស្វាយចន្ទីរបស់ពួកគេមានជនមិនស្គាល់មុខដើរប្រមូលបេះគ្រាប់ស្វាយចន្ទី ដោយក្នុងម្នាក់ៗអស់ជាច្រើនដើម ដែលក្នុងពាក្យបណ្ដឹងនោះជនរងគ្រោះមានឈ្មោះ ១.ឃុន កាណុច ភេទប្រុស អាយុ៣៤ឆ្នាំ រស់នៅភូមិអូរគគី ឃុំអូរដា ស្រុកកំរៀង ២.អូន សុឡា ភេទប្រុស អាយុ ៣២ឆ្នាំ រស់នៅភូមិព្រះពុទ្ធ ឃុំបឹងរាំង ស្រុកកំរៀង និង ៣.នួន នន ភេទប្រុស អាយុ ៥០ឆ្នាំ រស់នៅភូមិអូរគគី ឃុំអូរដា ស្រុកកំរៀង។

បន្ទាប់ពីបានធ្វើការស្រាវជ្រាវរួចមក នៅថ្ងៃទី១ ខែឧសភា ឆ្នាំ២០២៦ កម្លាំងសមត្ថកិច្ចបានធ្វើការឃាត់ខ្លួនជនសង្ស័យម្នាក់ឈ្មោះ ផល សិទ្ធិ ភេទប្រុស អាយុ ៣៤ឆ្នាំ ស្នាក់នៅភូមិស្វាយជ្រុំ ឃុំអូរដា ស្រុកកំរៀង ខេត្តបាត់ដំបង មុខរបរជាកម្មករ និងបាននាំយកទៅកាន់អធិការដ្ឋាននគរបាលស្រុកកំរៀងដើម្បីធ្វើការសាកសួរ។

នៅចំពោះមុខសមត្ថកិច្ច ជនសង្ស័យរូបនេះបានសារភាពថា កាលពីវេលាម៉ោង ៤និង៣០នាទី ល្ងាចថ្ងៃទី២៩ ខែមេសា ខ្លួនពិតជាបានចូលលួចគ្រាប់ស្វាយចន្ទីនៅក្នុងចម្ការរបស់ជនរងគ្រោះពិតប្រាកដមែន។ ហើយកន្លងមកខ្លួនក៏ធ្លាប់បានធ្វើសកម្មភាពលួចបេះគ្រាប់ស្វាយចន្ទីជាច្រើនលើករួចមកហើយដែរ។ យោងតាមចម្លើយសារភាព បច្ចុប្បន្នសមត្ថកិច្ចជំនាញបានរៀបចំឯកសារដើម្បីបញ្ជូនជនសង្ស័យរូបនេះទៅកាន់ការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការតាមនីតិវិធីច្បាប់៕

អត្ថបទ៖ សោ និយមរ័ត្ន

The post ហាងឆេងគ្រាប់ស្វាយចន្ទីបានថ្លៃខ្ពស់ ជនសង្ស័យម្នាក់់ដើរលួចបះតាមចម្ការពលរដ្ឋជាច្រើនកន្លែង appeared first on Kampuchea Thmey Daily.

យ៉ាងណាមិញ ​គ្រាប់​ស្វាយចន្ទី​មួយ​ភាគ​ធំ ដែល​ប្រមូលផល​បានត្រូវ​បាន​នាំ​ចេញ​ទៅ​ក្រៅ​ប្រទេស​ជា​ពិសេស​ប្រទេស​វៀតណាម​ ដោយ​មិន​បាន​កែច្នៃ​។

ស្របជាមួយសក្តានុពល​និង​ការ​ជំរុញលើកទឹកចិត្តពីរដ្ឋាភិបាល បច្ចុប្បន្ន​ឃើញថា​មាន​ក្រុមហ៊ុន​មួយចំនួន​បានបោះទុន​វិនិយោគបង្កើត​​រោងចក្រ​​កែច្នៃ​គ្រាប់ស្វាយចន្ទី​ សម្រាប់ផ្គង់ផ្គត់ទីផ្សារក្នុងស្រុក និង​បាន​ចូលរួមទប់ស្កាត់​​ការ​ហូរចេញ​គ្រាប់​ស្វាយចន្ទីឆៅ​​មិន​បាន​កែច្នៃ​ជាចំណែកលើក​កម្ពស់​ផលិតផល​ស្វាយចន្ទីកម្ពុជាឱ្យ​ឈាន​ទៅ​កាន់ពិភពលោក។

ក្រុមហ៊ុន CSNC Agriculture

កាល​ពីឆ្នាំ ២០២៣ ក្រុមហ៊ុន CSNC Agriculture ដែល​មាន​មូលដ្ឋាន​មក​ពី​ប្រទេស​សឹង្ហបុរីបានបោះ​ទុន​វិនិយោគ​ប្រមាណ ១២ លាន​ដុល្លារ​ សាង​សង់​រោង​ចក្រ​កែច្នៃ​គ្រាប់ស្វាយចន្ទី​នៅ​លើ​ផ្ទៃដី​ទំហំ ១៤ ហិកតា​ នៅ​ភូមិ​ស្នោ ឃុំ​​ត្រពាំង​ប្ញស្សី ស្រុក​កំពង់ស្វាយ ខេត្ត​កំពង់ធំ។

រោងចក្រ​របស់​ក្រុមហ៊ុន​ CSNC ប្រមូល​ទិញ​គ្រាប់​ស្វាយ​ចន្ទី​ដោយ​ផ្ទាល់​ពី​សហគមន៍​កសិករ និង​អ្នកប្រមូលទិញមួយចំនួន ខណៈ​រោងចក្រ​ធ្វើ​ការ​កែច្នៃ​ផង​និង​នាំចេញ​ផង។

រោងចក្រ CSNC មាន​សមត្ថភាព​កែច្នៃ​គ្រាប់ស្វាយ​ចន្ទី​បាន​ប្រមាណ ៤០ តោនក្នុងមួយថ្ងៃឬស្មើនឹង ១ ម៉ឺន ២ ពាន់​តោន ក្នុងមួយឆ្នាំ ខណៈ​ក្រុមហ៊ុន​មាន​ផែនការ​ទិញ​គ្រាប់ស្វាយចន្ទី​​ពាក់កណ្ដាលសម្រេច​ពី​សហ​គ្រាស​ក្នុង​ស្រុក ដើម្បី​យក​ទៅ​កែ​ច្នៃ​បន្តលក់​​ទៅក្រៅប្រទេស ដែលក្រុមហ៊ុន​មានទីផ្សារ​លក់​រាយ​​នៅ​ប្រទេស​ចិន និងអឺរ៉ុប។

ក្រុមហ៊ុនជប៉ុន MIRATH GREEN TECH

ក្រុមហ៊ុន​ជប៉ុន MIRATH GREEN TECH បាន​សម្ពោធដាក់ឱ្យដំណើរការ​រោងចក្រកាលពីឆ្នាំ ២០២៤ នៅ​ខេត្ត​កំពង់ធំ។ ក្រុមហ៊ុន​បានបោះទុន​វិនិយោគ​​ជាង ១ លានដុល្លារ ដើម្បី​បង្កើតរោងចក្រកែច្នៃគ្រាប់ស្វាយចន្ទីជាមួយ​សមត្ថភាព​កែច្នៃ​បាន​ចំនួន​ ១,៥០០​ តោន នៅ​ឆ្នាំ​ដំបូង និង​ពង្រីក​ដល់​​ ៣ ០០០ តោន​នៅឆ្នាំបន្តបន្ទាប់​ ដើម្បីនាំចេញ​ទៅទីផ្សារ​ប្រទេស​ជប៉ុននិង​សហភាព​អឺរ៉ុប។

ដើម្បី​បំពេញ​ក្នុង​ខ្សែ​សង្វាក់ផលិតកម្ម ក្រុមហ៊ុនបានចុះ​ប្រមូល​ទិញគ្រាប់​ស្វាយចន្ទី​ស្រស់​ពី​សហគមន៍​មួយចំនួន ដូចជា​សហគមន៍​សាលា​វិស័យ សហគមន៍​ឃុំ​ក្រយា និង​សហគមន៍​សន្ទុក ព្រមទាំង​សហគមន៍ទំនើបទាំង ៣ ស្ថិត​ក្នុង​ខេត្ត​កំពង់ធំ​។

ក្រៅពីកែច្នៃ​គ្រាប់​ស្វាយចន្ទីលក់លើទីផ្សារ ក្រុមហ៊ុន​ក៏មានគម្រោង​ផលិត​ប្រេង​ជីវឥន្ធនៈ​ចេញ​ពី​សំបកគ្រាប់​ស្វាយចន្ទី រួមទាំង​ផែនការ​នាំ​យកគ្រឿង​បរិក្ខារ​ និង​បច្ចេកវិទ្យា​ទំនើបៗ​ពីប្រទេសជប៉ុន​សម្រាប់បម្រើឱ្យការកែច្នៃក្នុងរោងចក្រ​។

ក្រុមហ៊ុន Khmer Agro Cashew

សហគ្រាស​ Khmer Agro Cashew បង្កើត​ឡើងនៅ​ក្នុង​ឆ្នាំ ​២០២៥ ​មាន​ទិសដៅ​ប្រមូល​ទិញ​គ្រាប់ស្វាយ​ចន្ទី​ដែល​មាន​ស្ដង់ដាគុណភាព​ ដើម្បី​យក​ទៅកែ​ច្នៃ​ហើយ​នាំ​ចេញ​ ដើម្បី​ចូលរួមចំណែក​ជួយ​លើក​កម្ពស់ជីវភាពកសិករ​នៅក្នុងសហគមន៍។

សហគ្រាស​ Khmer Agro Cashew គ្រោង​ចាប់ផ្តើម​ខ្សែ​សង្វាក់ផលិតកម្ម​​នៅ​ពាក់​កណ្ដាល​ឆ្នាំ ២០២៦​ ជាមួយ​សមត្ថភាព​កែច្នៃ​គ្រាប់​ស្វាយ​ចន្ទីបានប្រមាណ ​៥០ តោនក្នុងមួយថ្ងៃ ដែល​ទីផ្សារនាំចេញ​គឺ​ទៅប្រទេស​ជប៉ុន កោះតៃវ៉ាន់ និងទីផ្សារអឺរ៉ុប។

កាល​ពី​ថ្ងៃទី ​០៦ ​ខែកុម្ភៈ ​ឆ្នាំ ២០២៦ ក្រុមហ៊ុនក៏​​បាន​ចុះ​កិច្ច​សន្យា​ទិញ​គ្រាប់​ស្វាយ​ចន្ទី​សើម​ចំនួន​ ៦ ០០០ តោន ​ពីសហគមន៍កសិកម្មចំនួន ៦ ស្ថិត​នៅ​ក្នុង​ស្រុក​ព្រែក​ប្រសព្វ ខេត្ត​ក្រចេះ។ ​កិច្ចសន្យា​ទិញ-លក់​គ្រាប់ស្វាយចន្ទី​ជាមួយសហគមន៍កសិកម្ម​​ ក្នុង​តម្លៃ​ប្រហាក់ប្រហែលជាមួយឈ្មួញកណ្ដាល។

ក្រុមហ៊ុន Giant Cashew Enterprise

សហគ្រាស Giant Cashew Enterprise ក៏​ជា​សហគ្រាស​កសិកម្ម​ឈានមុខគេមួយ​ ដែល​មាន​ឯកទេស​ក្នុង​ការ​ដាំដុះ ដំណើរការ និង​ចែកចាយគ្រាប់​ស្វាយចន្ទី​ដែល​មាន​គុណភាព​ខ្ពស់​នៅ​ទូទាំង​ពិភពលោក​។ សហគ្រាស​មាន​ប្រមូល​ទិញ ហាល​សម្ងួត កែច្នៃ​គ្រាប់ស្វាយចន្ទី សម្រាប់​ផ្គត់ផ្គង់រោងចក្រ សិប្បកម្ម​ក្នុង​ស្រុក និង​បរទេស​។

ក្រុមហ៊ុន Pinex Agro

វត្តមាន​របស់​រោងចក្រ​ Pinex Agro ជា​ជំហានដ៏​សំខាន់​បំផុត​មួយ ក្នុងការចូលរួម​ចំណែក​ជំរុញ​វិស័យ​ដាំដុះស្វាយចន្ទី​​នៅ​ក្នុង​ខេត្ត​កំពង់ធំ។

ខណៈ​ស្វាយ​ចន្ទី​គឺ​ជាដំណាំ​ដែលមានសក្តានុពលធំជាងគេ​ក្នុង​ខេត្ត​ រោងចក្រនេះ​បានបង្កើតឱកាសការងារយ៉ាងច្រើន​នៅក្នុង​​សហគមន៍ផ្ទាល់ ដែល​ជួយ​ឱ្យប្រជា​ពលរដ្ឋ​មាន​ការងារ​ធ្វើនៅជិតផ្ទះ ជួយសម្រួលដល់ជីវភាពគ្រួសារ និងកាត់បន្ថយការធ្វើចំណាកស្រុក។

ក្រុមហ៊ុន Harvest Center Cambodia

ក្រុមហ៊ុន Harvest Center (Cambodia) ក៏ជា​ក្រុមហ៊ុន​ក្នុងស្រុកដែលប្រមូលទិញ​ស្វាយចន្ទីក្នុងការកែច្នៃ​នាំចេញទៅក្រៅប្រទេស​។ ក្នុង​ជំនួប​ជាមួយ​តំណាង​សហគមន៍​កសិកម្មនៅ​ខេត្តកំពង់ធំ​កាលពីថ្ងៃទី ២២ ខែកុម្ភៈ​ ក្រុមហ៊ុន Harvest Center (Cambodia) នៅ​ក្នុង​ចំណោម​ក្រុមហ៊ុន​ធំៗ​ក្នុង​ស្រុក​ចំនួន ៦ ដែល​បាន​សន្យា​ក្នុង​ការ​ប្រមូល​ទិញ​គ្រាប់​ស្វាយចន្ទី​ឆៅ​ពី​កសិករ​ក្នុង​តម្លៃ​ប្រកួតប្រជែង​នា​រដូវ​ប្រមូល​ផល​ឆ្នាំ ២០២៦ នេះ។​

ក្រុមហ៊ុន TL Agri Foods Import Export Co.,Ltd

រោងចក្រកែច្នៃគ្រាប់ស្វាយចន្ទីខ្មែរ TL Agri Foods Import Export Co.,Ltd ជា​ក្រុមហ៊ុន​ក្នុងស្រុក​​ ១០០%​ ដែលមាន​ឧកញ៉ា ឡាង ទីលាង ជាអគ្គនាយក​ ដែល​បានវិនិយោគ​រោងចក្រកែច្នៃគ្រាប់ស្វាយចន្ទីក្នុង​ទុន​វិនិយោគ​ប្រមាណ ១.៥ លាន​ដុល្លារ​អាមេរិក ដែល​មាន​ទីតាំង​ស្ថិត​នៅ​ស្រុក​ចម្ការ​លើ​ ខេត្ត​កំពង់ចាម។

ជាមួយ​ការ​​ដំឡើង​គ្រឿង​ចក្រ​បច្ចេកវិទ្យា​ទំនើប​ចុង​ក្រោយ រោង​ចក្រ​ដែល​បាន​​​ចាប់ផ្តើមដំណើរការនៅឆ្នាំ ២០២៥ មានសមត្ថភាព​បក​គ្រាប់​ស្វាយ​ចន្ទី​បានប្រមាណ​ ៥០ តោន​ក្នុង​មួយ​ថ្ងៃ​។

ខណៈដែល​ការ​វិនិយោគ​សាងសង់​រោងចក្រនេះ ក្រុមហ៊ុនមាន​ចម្ការ​ដាំ​ដុះ​ស្វាយ​ចន្ទី​ដោយ​ខ្លួន​ឯង​នៅ​លើ​ផ្ទៃ​ដី​ប្រមាណ ១០ ​ហិតា និង​​ប្រមូល​ទិញ​គ្រាប់​ស្វាយ​ចន្ទី​បន្ថែម​ពី​ប្រជាពលរដ្ឋ​ ដោយ​ក្នុង​ ១ ​ឆ្នាំ​ៗ ក្រុមហ៊ុន​គ្រោង​ទិញ​ចូល​គ្រាប់​ស្វាយ​ចន្ទី​ប្រមាណ ១០ ម៉ឺន ដើម្បី​បំពេញ​តម្រូវ​ការ​ខ្សែ​សង្វាក់​ផលិតកម្ម និង​សម្រាប់​កែច្នៃ​នាំ​ចេញ​ទៅ​កាន់​ទីផ្សារ​អន្តរ​ជាតិ​។

សមាគម​ស្វាយ​ចន្ទី​កម្ពុជាបានឲ្យដឹង​ថា គិតត្រឹមដើមឆ្នាំ​២០២៥ កម្ពុជា​មានសហគ្រាស​កែច្នៃស្វាយចន្ទី​ចំនួន ៥២ ក្នុង​នោះ​រោងចក្រ​​ធុន​មធ្យមមាន​ចំនួន ៦ (សមត្ថភាព​ផលិត ៧ ០០០ តោន ទៅ ១៤០ ០០០ តោន​ក្នុងមួយឆ្នាំ)។ ចំណែក ៤៨ សហគ្រាស​ផ្សេងទៀត​ជា​សិប្បកម្ម​លក្ខណៈគ្រួសារតូចៗ​។​

នៅក្នុងរដូវ​ប្រមូល​ផលគ្រាប់ស្វាយចន្ទី​ឆ្នាំ ២០២៦ ​រំពឹង​សម្រេចបាន ៨០ ម៉ឺនតោន ​ដល់ ១ ​លាន​តោន ​ដោយសារ​ការកើនឡើង​នៃផ្ទៃដីដាំដុះ រួមផ្សំនឹងការអំណោយ​ផល​ពី​អាកាស​ធាតុ។ ​

​យោងតាម​សមាគមស្វាយចន្ទី​កម្ពុជា នៅក្នុងឆ្នាំ ២០២៥ កម្ពុជា​រក​ចំណូល​បាន​ប្រមាណ​ ​១,៥ ​ពាន់លាន​ដុល្លារ ​ពីការ​នាំចេញ​គ្រាប់​​ស្វាយ​ចន្ទី​ឆៅ ១ លាន​តោន​ កើនឡើង ២៧% ធៀបនឹងឆ្នាំ ២០២៤។ គិត​មកដល់ពេលនេះ ​កម្ពុជា​មានផ្ទៃដីដាំដុះស្វាយចន្ទីប្រមាណ ​៧៤ ម៉ឺនហិកតា៕

The post មកស្គាល់សហគ្រាស​កែច្នៃ​​គ្រាប់​ស្វាយ​ចន្ទី​ធំៗ​ក្នុង​ប្រទេស​ ប្រមូលទិញស្វាយចន្ទីរាប់ម៉ឺនតោន កែច្នៃនាំចេញទៅក្រៅប្រទេស appeared first on Kampuchea Thmey Daily.

លោក​អភិបាល​ខេត្ត​បាន​លើក​ឡើង​វិស័យ​សំខាន់ៗ​ចំនួន ៣ ដែល​ខេត្ត​ជំរុញ​ឲ្យ​មាន​ការ​វិនិយោគ​ក្នុង​នោះ​មាន​វិស័យ​កសិកម្ម ទេសចរណ៍ និង​ធនធាន​រ៉ែ​ធម្មជាតិ។

លោក​អភិបាល​ខេត្ត​បាន​លើក​​ពី​ដំណាំ​​សក្តានុពលក្នុង​ខេត្ត​​មាន​ដូចជា ស្វាយចន្ទី​ដែល​មាន​ផ្ទៃដី​ដាំ​ដុះ​ប្រមាណ ១០ ម៉ឺន​ហិចតា ​កៅស៊ូ​មាន​ប្រមាណ ៧ ទៅ ៨ ម៉ឺន​ហិចតា រួម​ទាំង​ដំណាំ​ផ្សេង​ទៀត​មាន​ចេក​អំបូង​លឿង ទុរេន ម្រេច ដំឡូងមី សណ្ដែក កាកាវ និង​កាហ្វេ។

ពាក់ព័ន្ធ​ដំណាំ​ស្វាយចន្ទី លោកអភិបាល​ខេត្ត​បានអះអាង​ថា ​តាម​លោក​ដឹង​ខេត្ត​រតនគីរី​ជាប់លេខ​២ ឬ​លេខ ៣ បន្ទាប់​ពី​ខេត្ត​ក្រចេះ និង​កំពង់ធំ ដែលមានផ្ទៃដីដាំដុះ​ដំណាំស្វាយចន្ទីច្រើនជាងគេ។

បើទោះបី​ជា​ខេត្ត​មាន​សក្តានុពលលើដំណាំ​កសិឧស្សាហកម្ម​ ប៉ុន្តែ​​ខេត្ត​ខ្វះខាត​រោងចក្រកែច្នៃដែលអាជ្ញាធរ​បាន​កំពុង​​ជំរុញ​ឲ្យ​មាន​​ការ​វិនិយោគបន្ថែម​​ ដើម្បី​ចៀស​វាង​ការ​នាំ​ចេញ​តែវត្ថុធាតុដើម​ទៅក្រៅប្រទេសដោយផ្ទាល់។

ក្នុង​ការផ្តល់​បទសម្ភាសន៍ដល់អ្នកសារព័ត៌មានក្នុងដំណើរទស្សនកិច្ចក្នុងខេត្តរតនគិរិ លោក ញ៉ែម សំអឿន ក៏​បានលើកឡើងពី​ការ​វិនិយោគកសិដ្ឋាន​ចិញ្ចឹម​គោ​រាប់​ម៉ឺន​ក្បាល​ពីសំណាក់​​​ក្រុមហ៊ុនវិនិយោគ​ក្នុង​ខេត្ត​​ធំៗ​​ និង​​មាន​គោល​ដៅ​ពង្រីក​ការ​ចិញ្ចឹម​ដល់ ១០ ម៉ឺនក្បាល ជាមួយ​គោល​នយោបាយ​ចែក​កូន​គោព្រមទាំង​បច្ចេកទេស​ដល់​ប្រជាពលរដ្ឋ​ជុំវិញ​ដើម្បី​ចិញ្ចឹម រួច​ក្រុមហ៊ុន​ប្រមូល​ទិញ​យក​មក​វិញ​។

បន្ថែមពីនេះ​លោកអភិបាលខេត្ត​បានបញ្ជាក់​ថា ខេត្ត​រតនគិរី​បច្ចុប្បន្ន​មាន​ក្រុមហ៊ុន​វិនិយោគ​ដី​សម្បទាន​សេដ្ឋកិច្ច​ចំនួន ២៧ ក្រុមហ៊ុន ក្នុង​នោះ​ក្នុង​ស្រុក​ចំនួន ១០ ក្រុមហ៊ុន​ចិន​ចំនួន ៣ ក្រុមហ៊ុន​វៀតណាម​ចំនួន ១៣ និង​ក្រុមហ៊ុន​មកពី​សិង្ហបុរី​ចំនួន ១ ដែល​ផ្ដោត​លើ​វិស័យ​កសិកម្ម។

ពាក់ព័ន្ធ​វិស័យ​ទេសចរណ៍ ខេត្ត​មាន​ផ្ទៃដី​គ្រប​ដណ្តប់​ដោយ​ព្រៃឈើ​ប្រមាណ ៨០ ម៉ឺន​ហិចតា និង​មាន​ឧទ្យានជាតិ ដែន​ជម្រក​​សត្វព្រៃ​ដែល​មាន​សត្វ​កម្រ​ដូចជា ស្វាកន្ទុយ​លឿង និង​ទោច​ថ្ពាល់​លឿង។ ខេត្ត​មាន​បឹង​ធម្មជាតិ​ធំៗ​ជាច្រើន​ដូច​ជា​​បឹង​យក្សឡោម បឹង​លំកុដ បឹង​កន្សែង និង​ទឹកជ្រោះ​នៅ​ជាប់ៗ​គ្នា​ជា​ច្រើន​កន្លែង​មាន​ទឹកជ្រោះ​កាចាញ ចាអុង កាទៀង អូរស៊ីនលែរ​ជាដើម។

ខណៈ​ដែល​ខេត្តភាគ​ឦសាន​នេះ​មាន​មាន​ការ​វិនិយោគ​ដំណាំ​កសិកម្ម​ជាមួយ​ចម្ការ​ធំៗ ​កំពុង​ក្លាយ​ជា​ទីតាំង​ទាក់​ទាញ​ទេសចរណ៍​កសិកម្ម ដែលផ្តល់អារម្មណ៍ដូចនៅបរទេសផងដែរ។ លោក​អភិបាលខេត្ត​បន្ថែម។

ផ្សារ​ភ្ជាប់​សក្ដានុពល​របស់​ខេត្ត​ លោក​អភិបាល​ខេត្ត​លើក​ទឹកចិត្ត​ដល់​អ្នក​វិនិយោគ​ទាំង​ក្នុងនិង​ក្រៅ​ប្រទេស ឱ្យ​មក​វិនិយោគ​បន្ថែមជាពិសេស​លើ​វិស័យ​កសិឧស្សាហកម្ម តាមរយៈ​ការ​បង្កើត​រោង​ចក្រ​កែ​ច្នៃ​និង​វេច​ខ្ចប់ រួម​ទាំង​ការ​វិនិយោគ​លើ​វិស័យ​ទេសចរណ៍​ធម្មជាតិ-វប្បធម៌ ដើម្បី​ទាញ​យក​ប្រយោជន៍​ពី​សក្ដានុពល​ដ៏​ធំធេង និង​រួមចំណែក​អភិវឌ្ឍ​សេដ្ឋកិច្ច​ខេត្ត​ភូមិភាគ​ឦសាន​មួយ​នេះ។

ពលរដ្ឋ​ជិត ៦០% ក្នុង​ខេត្ត​រតនគិរី គឺជា​ជនជាតិ​ដើម​ភាគតិច​មាន​ដូចជា ទំពួន ចារាយ គ្រឹង កាចក់ កាវែត គុយ និង​ពូណង។ តាមរយៈ​​វប្បធម៌ របាំ សំលៀកបំពាក់​ប្រពៃណី រួម​ទាំង​ស្រា​ពាង​ជា​អត្តសញ្ញាណ​ដែល​ត្រូវ​បាន​ចុះ​បញ្ជី​ជា​ផលិតផល​ភូមិ ១ ផលិតផល ១ របស់​ខេត្ត​ភាគ​ឦសាន​មួយ​នេះ៕

The post ខេត្ត​រតនគិរី​ជាប់​លេខ ៣ មាន​ផ្ទៃដី​ដាំដុះ​ស្វាយ​ចន្ទី​ច្រើន​ជាង​គេ ​បន្ទាប់​ពី​ខេត្ត​កំពង់ធំ និង​ក្រចេះ appeared first on Kampuchea Thmey Daily.

ប៉ៃលិន ៖ ស្វាយចន្ទីជាដំណាំឧហ្សាហកម្មរយៈពេលវែង ដែលមិនរើសដី ងាយស្រួលដាំដុះ ធន់នឹងអាកាសធាតុ ដែលឃើញមានភាគច្រើនដាំដុះនៅតំបន់ខ្ពង់រាប នៃប្រទេសកម្ពុជា ដូចជាខេត្តមណ្ឌលគិរី រតនៈគីរី ស្ទឹងត្រែង ក្រចេះ ព្រះវិហារ ប៉ៃលិន ឧត្តរមានជ័យ កំពង់ធំ កំពង់ចាម ត្បូងឃ្មុំ កោះកុង។ ដំណាំស្វាយចន្ទីក៏មានការដាំដុះ នៅតាមតំបន់វាលទំនាប មិនលិចទឹកផងដែរ ដូចជាខេត្តកំពង់ឆ្នាំង ពោធិ៍សាត់ ព្រៃវែង បន្ទាយមានជ័យ និងខេត្តសៀមរាប ។

បើតាមលោក អ៊ឹម សុភឿន អនុប្រធានមន្ទីរកសិកម្មរុក្ខាប្រមាញ់និងនេសាទខេត្តប៉ៃលិន បានឱ្យដឹងនៅថ្ងៃនេះថា ទីផ្សារគ្រាប់ស្វាយចន្ទី គឺមានភាព ល្អប្រសើរឡើង សម្រាប់កសិករបន្ទាប់ពីក្រសួងកសិកម្មរុក្ខាប្រមាញ់ និងនេសាទមានយន្តការចងក្រងកសិករឱ្យក្លាយទៅជាសហគមន៍កសិកម្ម ។ លោកបន្តថា ការរៀបចំឱ្យមានយន្តការនេះ ដើម្បីឱ្យកសិករ អ្នកផលិត មានអំណាចលក់ផលិតផល និងចរចាតម្លៃ ជាមួយក្រុមហ៊ុន និងឈ្មួញដែលប្រមូលទិញ ប្រសិនបើយើងលក់ជាលក្ខណៈទីផ្សារសេរី យើងអត់អាចកំណត់តម្លៃនៅក្នុងទីផ្សារបានទេ។

ជាក់ស្តែងនៅឆ្នាំនេះ កសិករ ដែលកំពុងប្រមូលផលគ្រាប់ស្វាយចន្ទី លោក ឌុក ពុំ រស់នៅភូមិទឹកផុស សង្កាត់ប៉ៃលិន ក្រុង ប៉ៃលិន ខេត្តប៉ៃលិន បានឱ្យដឹងថា លោកបានដាំស្វាយចន្ទីលើផ្ទៃដី ៥ហិចតាកន្លះ និងដើមជាង១២០០ដើម និងបានប្រមូលផលចំនួន៣ឆ្នាំហើយ។ លោកបន្តថា ឆ្នាំនេះគ្រាប់ស្វាយចន្ទីស្រួលលក់ និងមានទីផ្សារល្អ ព្រោះនៅក្នុងខែមីនា មួយគីឡូក្រាមគ្រាប់សើម មានតម្លៃជាង៧.០០០រៀល និងអាចមានតម្លៃល្អលើសនិងទៀត។ ចំណែកឯ លោក សរ វែង មន្រ្តីបច្ចេកទេសកសិកម្មនៃមន្ទីរកសិកម្មរុក្ខាប្រមាញ់និងនេសាទខេត្តប៉ៃលិន បានសំណូមពរអោយបងប្អូនប្រជាកសិករប្រមូលផលផ្លែចន្ទីអោយបានត្រឹមត្រូវតាមស្តង់ដា ដោយត្រូវទុកអោយផ្លែចន្ទីនោះទុំល្អធ្លាក់មកលើដីទើបជាការល្អ ជាជាងការបេះទម្លាក់ពីលើដើម។

សូមបញ្ជាក់ថា តបតាមការណែនាំរបស់រាជរដ្ឋាភិបាល និងក្រសួងកសិកម្មរុក្ខាប្រមាញ់ និងនេសាទ មន្ត្រីជំនាញពាក់ព័ន្ធនៅខេត្តប៉ៃលិនបានខិតខំប្រឹងប្រែងទំនាក់ទំនង និងបើកកិច្ចសហប្រតិបត្តិការល្អជាមួយដៃគូក្នុងស្រុក សំដៅលើកស្ទួយវិស័យកសិកម្ម ឱ្យរីកចម្រើនប្រកបដោយចីរភាព និងបរិយាប័ន្ន។ 

យោងតាមទិន្នន័យរបស់មន្ទីរកសិកម្មរុក្ខាប្រមាញ់និងនេសាទខេត្តប៉ៃលិន បានឱ្យដឹងថាផ្ទៃដីដាំដំដុះដំណាំកសិកម្មក្នុងខេត្តមានចំនួន៤៨៣១៦ ហិចតា ក្នុងនោះមាន ដំណាំ មៀនប៉ៃលិន ស្វាយកែវរមៀត កៅស៊ូ ពោតក្រហម ដំឡូងមី ដោយឡែកផ្ទៃដីដាំដំណាំស្វាយចន្ទីមានចំនួន២៧៤២ហិចតា ដែលអាចប្រមូលផលបាន១៧៨២ ហិចតាផងដែរ៕

អត្ថបទ ៖ សេង សុវណ្ណារិទ្ធ

The post ប្រជាពលរដ្ឋនៅខេត្តប៉ៃលិន កំពុងប្រមូលផលស្វាយចន្ទី ខណៈមានទីផ្សារល្អនៅឆ្នាំ២០២៦នេះ appeared first on Kampuchea Thmey Daily.

លោក ថៃ ម៉ាយ ជាឈ្មួញទិញគ្រាប់ស្វាយចន្ទីនៅតាមភូមិ បានប្រាប់កម្ពុជាថ្មី នៅថ្ងៃទី១៦ ខែមីនា ថា ការប្រមូលទិញគ្រាប់ស្វាយចន្ទីនេះ មានការកំណត់តម្លៃពីអ្នកទិញបន្ត ដោយលោកមិនហ៊ានទិញលើសពីតម្លៃនេះឡើយ ព្រោះព្រួយ​បារម្ភថា តម្លៃអាចធ្លាក់ចុះបន្ថែមនៅពេលលក់ចេញ ដែលអាចនាំឲ្យខាតបង់។ លោកបន្តថា នៅដើមរដូវប្រមូលផលនេះ ស្វាយចន្ទីពូជត្រូវបានទិញក្នុងតម្លៃ ៦,៥០០រៀលក្នុងមួយគីឡូ ខណៈស្វាយចន្ទីធម្មតាទិញក្នុងតម្លៃ ៥,០០០ រៀល។
បើតាមលោក ម៉ាយ កត់សម្គាល់ថា ការប្រមូលផលនៅដើមរដូវមិនសូវបានច្រើនទេ ហើយលោកទើបតែអាចទិញបានប្រមាណតែ ៣ បេប៉ុណ្ណោះ។

តម្លៃស្វាយចន្ទីនេះ អាចមានការប្រែប្រួលបន្តិចបន្តួច អាស្រ័យលើគុណភាព និងឈ្មួញនីមួយៗ។

ចំណែកអ្នកស្រី គី ជាអ្នកទទួលទិញគ្រាប់ស្វាយចន្ទី នៅស្រុកវើនសៃ បានឱ្យដឹងថា ខ្លួនទទួលទិញគ្រាប់ស្វាយចន្ទីពីប្រជាពលរដ្ឋក្នុងតម្លៃ ៥,២០០ រៀល ក្នុង ១ គីឡូក្រាម សម្រាប់ប្រភេទធម្មតា ខណៈដែលគ្រាប់ស្វាយចន្ទីពូជ មានតម្លៃ ៦,៤០០ រៀល ក្នុង ១ គីឡូក្រាមប៉ុណ្ណោះ។ អ្នកស្រីបញ្ជាក់ថា តម្លៃទិញនេះ មិនខុសពីឈ្មួញទិញតាមភូមិទេ ព្រោះត្រូវបានកំណត់ដោយដេប៉ូធំៗដែលទិញបន្ត។

លោក បាន សុខជា ជាកសិករដាំស្វាយចន្ទីស្ថិតនៅស្រុកវើនសៃ បានប្រាប់ថា លោកមានចម្ការស្វាយចន្ទីទំហំ ៣ ហិកតាកន្លះ ដែលកំពុងចាប់ផ្តើមទុំជាបន្តបន្ទាប់។ មកទល់ពេលនេះ លោកទើបលក់បានចំនួន ២ បេ ដែលក្នុង ១ បេ មានទម្ងន់ ៧០ គីឡូក្រាម ហើយទទួលបានប្រាក់សរុបជាង ១ លានរៀល។ លោកបន្តថា ការប្រមូលផលដើមរដូវឆ្នាំនេះ មានបរិមាណតិចជាងឆ្នាំមុន ដោយសារតែការប្រែប្រួលអាកាសធាតុ និងភ្លៀងធ្លាក់ជាបន្តបន្ទាប់។

លោកបានពន្យល់ថា៖ «ឆ្នាំនេះ ភ្លៀងធ្លាក់២ ទៅ ៣ ដង បណ្តាលឲ្យផ្កាចន្ទីរុះរោយ និងជ្រុះទៅដីប្រហែលពាក់កណ្តាល ដែលធ្វើឲ្យទិន្នផលមិនដូចការរំពឹងទុក។ ផ្លែឆ្នាំនេះក៏មានបរិមាណតិចជាងឆ្នាំមុនផងដែរ។ កាលពីឆ្នាំមុន ខ្ញុំអាចរក​ចំណូល​បានប្រហែល ១៨ លានរៀល ប៉ុន្តែឆ្នាំនេះ ទំនងជាបានតិចជាង»។

គួរជម្រាបថា ស្វាយចន្ទី គឺជាដំណាំកសិឧស្សាហកម្មយុទ្ធសាស្ត្ររបស់កម្ពុជាដែលមានសក្ដានុពលខ្ពស់ក្នុងការអភិវឌ្ឍសេដ្ឋកិច្ចជាតិ ហើយកម្ពុជាក៏ជាប្រទេសនាំចេញគ្រាប់ស្វាយចន្ទីឆៅឈានមុខគេមួយលើពិភពលោក។ ស្វាយចន្ទីជាប្រភេទដំណាំអចិន្ត្រៃយ៍ ដែលធន់នឹងអាកាសធាតុ ងាយស្រួលដាំដុះ ហើយត្រូវបានរាជរដ្ឋាភិបាលកម្ពុជាដាក់ចេញគោលនយោបាយជាតិដើម្បីជំរុញការដាំដុះ និងការកែច្នៃសម្រាប់នាំចេញទៅកាន់ទីផ្សារអន្តរជាតិ៕

ដោយ៖ ខៀវ ចាប

The post ដើមរដូវប្រមូលផល តម្លៃស្វាយចន្ទីបានខ្ពស់ ប៉ុន្តែទិន្នផលទាបដោយសារប្រែប្រួលអាកាសធាតុ appeared first on Kampuchea Thmey Daily.