ក្រុមហ៊ុន ផេសថិក(ខេមបូឌា) ដែលជាក្រុមហ៊ុនបញ្ជូនខ្សែបណ្តាអគ្គិសនី និងបានចុះបញ្ជីនៅផ្សារមូលបត្រកម្ពុជា បានរាយការណ៍អំពីការទទូលបានចំណូលសរុប​ចំនួន បានកត់ត្រាត្រឹម ២៣ ៥៩៣ លានរៀល សម្រាប់ត្រីមាសទី២ ​ ថ្ងៃទី៣១ ខែមីនា ឆ្នាំ២០២៥ ​កើនឡើង​ ១៣៨,១% បើប្រៀបធៀបទៅនឹងត្រីមាសទីបីនៃឆ្នាំហិរញ្ញវត្ថុ២០២៤ ​មានចំនួនត្រឹម ៩ ៩០៩លានរៀល។

យោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជាកាលពីចុងសប្តាហ៍មុន គិតត្រឹម ថ្ងៃទី៣១ ខែមីនា ឆ្នាំ២០២៥ ទ្រព្យសកម្មសរុប មានចំនួន ៩៤៣ ៨៨៨ លានរៀល តំណាងឲ្យការកើនឡើងចំនួន ២៦ ៣៣៣ លានរៀល ឬ ២,៩% បើប្រៀបធៀបនឹងចំនួន ៩១៧ ៥៥៥ លានរៀល នៃការិយអន្តរកាលត្រឹមថ្ងៃទី៣០ ខែកញ្ញា ឆ្នាំ២០២៤ និង មូលធនសរុបចំនួន (១៥ ៩២០ ) លានរៀល តំណាងឲ្យការថយចុះចំនួន ១៤ ៦២៩ លានរៀល ឬ ១ ១៣៣,២% បើប្រៀបធៀបនឹងចំនួន (១ ២៩១) លានរៀល នៃការិយអន្តរកាលត្រឹមថ្ងៃទី៣០ ខែកញ្ញា ឆ្នាំ២០២៤។

លោក Paul Lim Pay Chuan នាយកប្រតិបត្តិស្តីទី របស់ក្រុមហ៊ុនបានថ្លែងនៅក្នុងរបាយការណ៍ដែលផ្ញើរទៅកាន់ផ្សារមូលបត្រកម្ពុជាថា៖« ត្រីមាសកន្លងទៅនេះ គឺជារយៈពេលនៃការផ្លាស់ប្តូរមួយ ជាមួយនឹងឧបសគ្គ និងសុទិដ្ឋិនិយមដ៏ប្រុងប្រយ័ត្នសម្រាប់ពួក យើងនៅ ក្រុមហ៊ុន ផេសជិក ( ខេមបូឌា) ។ យើងដឹងថាខែកន្លងមកមិនងាយស្រួលនោះទេ ហើយខ្ញុំចង់ទទួលស្គាល់ និងអរគុណម្ចាស់ភាគហ៊ុនរបស់យើងសម្រាប់ការអត់ធ្មត់ និងការគាំទ្ររបស់អ្នកបន្តនៅពេលយើងធ្វើការឆ្លងកាត់ដំណាក់ កាលដ៏សំខាន់នេះនៅក្នុងដំណើររបស់យើង»។

លោកថា ការខាតបង់របស់ក្រុមហ៊ុនមុនពេលបង់ពន្ធមានចំនួន ៦ ៨៥២ លានរៀល ដែលបង្ហាញពីការប្រសើរឡើងចំនួន ៤ ៩៥៨ លានរៀលពីការខាត បង់នៅត្រីមាសមុខមុនពេលបង់ពន្ធចំនួន ១១ ៤១០ លានរៀល។

បើយោងតាមលោក Paul ​នៅខ្សែបញ្ជូនតាតៃរបស់របស់ក្រុមហ៊ុន និងបានបញ្ចប់ដោយជោគជ័យនូវរសៀគ្វីពេញលេញមួយ ដើម្បីផ្តល់ថាមពលដល់រោងចក្រស៊ីម៉ងត៍ CONCH ដែលមាន ប្រវែងផ្លូវ ៦៥ គីឡូម៉ែត្រ ក្នុងខែកុម្ភៈ ឆ្នាំ២០២៥។ នេះគឺជាដំណាក់កាលប្រតិបត្តិការដ៏សំខាន់មួយរបស់ក្រុមហ៊ុន។ ការងារខ្សែបណ្តាញដែលនៅសេសសល់ឆ្ពោះទៅស្ថានីយរងខេត្តកោះកុងកំពុងដំណើរការ។

លោកបានថ្លែងបន្តទៀតថា៖«​គម្រោងខ្សែបណ្តាញក្រោមដីរបស់យើងក្រោមការផ្តល់មូលនិធិពី JICA បានឈានដល់ការរីកចំរើនគួរឲ្យចាប់អារម្មណ៍។ យើងបានបញ្ចប់ការផលិត និងដំឡើងរន្ធទាំងអស់សម្រាប់ការភ្ជាប់ខ្សែបណ្តាញ ហើយខ្សែចំនួន ១៦ ក្នុង ចំណោម ១៨ ខ្សែត្រូវបានតភ្ជាប់ដោយជោគជ័យ។ ការងារចុងក្រោយនៅលើវិសាលភាពដែលនៅសេសសល់រួមមានការ ការពារបំពង់ ការសាងសង់ស្ពានខ្សែកាប និងរចនាសម្ព័ន្ធជំនួយកំពុងដំណើរការយ៉ាងល្អ ដោយបង្ហាញពីសមត្ថភាពរបស់ ក្រុមការងារយើងក្នុងការផ្គត់ផ្គង់នូវរហដ្ឋារចនាសម្ព័ន្ធស្មុគស្មាញជាមួយនឹងភាពជាក់លាក់ និងល្បឿនដ៏ល្អប្រសើរ»៕

​​

The post ប្រាក់ចំណូលរបស់ក្រុមហ៊ុនបញ្ជូនខ្សែបណ្តាញអគ្គិសនីផេសថិកកើនឡើងខ្ពស់ក្នុងត្រីមាស​ទី២ឆ្នាំនេះ appeared first on Kampuchea Thmey Daily.

លោករដ្ឋមន្ត្រីបានបញ្ជាក់ថា ថាមពលអគ្គិសនី​ជាចំណែកមួយដ៏សំខាន់ក្នុងការប្រើប្រាស់​បច្ចេក​វិទ្យាឌីជីថល ដើម្បីធ្វើការ​កែសម្រួល​សេវា​នៅកម្ពុជាឱ្យកាន់តែមានប្រសិទ្ធភាព និងតម្លាភាព អគ្គិ​សនីកម្ពុជា និងអាជ្ញាធរអគ្គិសនីកម្ពុជា បានធ្វើការរួមគ្នា ដើម្បីផ្ដល់សេវា​បម្រើអតិថិជននៅ​លើ​ប្រ​ព័ន្ធ​ឌីជីថល ក្នុងក្របខណ្ឌប្រតិបត្តិការរបស់ EDC និងក្របខណ្ឌបង្កើត EDC អេប សម្រាប់​ក្របខណ្ឌទូទាំងប្រទេស ដើម្បីឱ្យមានសមាហរណកម្មមួយឱ្យអ្នកផ្គត់ផ្គង់ទាំងអស់ដែលមាន EDC​ និងសេវាករឯកជនអាចប្រើថ្នាលរួមដើម្បីបម្រើប្រជាជនដូចគ្នា។

លោក កែវ រតនៈ បញ្ជាក់ថា៖ «ដូច្នេះក្រសួងចង់បាន ២០២៥ ដែលសេវាពាក់ព័ន្ធនេះ ត្រូវ​ធ្វើ​ប្រតិបត្តិការទៅលើអេបទាំងអស់ ហើយឈានទៅ ២០២៦ នឹងប្រជុំឡើងវិញ សូមឱ្យ​ការបង់​លុយ​ពីអតិថិជន ៩៥% ត្រូវតែបង់​លុយតាមប្រព័ន្ធធានាគារទាំងអស់ ហើយរាល់​ការ​ដាក់ពាក្យ​ស្នើសុំ​តភ្ជាប់​​ចរន្ត​សុំឱ្យត្រឹមចុងឆ្នាំ ២០២៥ នេះ អត់មានដាក់​ពាក្យធ្វើដោយដៃទេ»។

យោងតាមអាជ្ញាធរអគ្គិសនីកម្ពុជា ​ការអភិវឌ្ឍបង្កើនសមត្ថភាព​ប្រភពផលិត អានុភាពនៃប្រភពផលិតអគ្គិសនី បានកើនឡើងពី ៤ ៦៤៩ មេហ្គាវាត់ នៅចុងឆ្នាំ ២០២៣ ដល់ ៥ ០៤៤ មេហ្គាវាត់នៅចុងឆ្នាំ ២០២៤ ឯបរិមាណ​ថា​​មពល​ដែលបាន​​ប្រើ​ប្រាស់​ចេញពីប្រភពអគ្គិសនី បានកើនឡើងពី ១៦ ៨០៤ លានគីឡូវាត់ម៉ោង នៅឆ្នាំ ២០២៣ មក ១៩ ៤១៩ លានគីឡូវ៉ាត់ម៉ោង នៅឆ្នាំ ២០២៤។

ការអភិវឌ្ឍប្រព័ន្ធបញ្ជូនអគ្គិសនីនៅក្នុឆ្នាំ ២០២៤ កម្ពុជាបានអភិវឌ្ឍបណ្ដាញ​អគ្គិស​នីបន្ថែមចំនួន ១៨២ គីឡូម៉ែត្រ និងសាងសង់អនុស្ថានីយចំនួន ២ បន្ថែមទៀត ធ្វើឱ្យបច្ចុប្បន្ននេះ កម្ពុជាមានខ្សែបណ្ដាញបញ្ជូនសរុប ៣ ៨៩០ គីឡូម៉ែត្រ និងមាន​អនុស្ថានីយចំនួន ៧០ ដែលអាចបញ្ជូនប្រភពអគ្គិសនីដល់រាជធានីខេត្តចំនួន ២៥ ផ្ទាល់ ទូទាំងប្រទេស៕

អត្ថបទ៖ ឡេង ដេត

The post អគ្គិសនីកម្ពុជាដាក់គោលដៅឱ្យអតិថិជនបង់ថ្លៃភ្លើងតាមប្រព័ន្ធឌីជីថលឱ្យបានជាង ៩០ ភាគរយ ចាប់ពីដំណាច់ឆ្នាំ ២០២៥ appeared first on Kampuchea Thmey Daily.

ថ្លែង​បើក​សិក្ខាសាលា​ស្ដីពី​ការ​បណ្ដុះបណ្ដាល​បង្កើន​ប្រភព​ថាមពល​កកើត​ឡើងវិញ​អថេរ​ទៅ​ក្នុង​ប្រព័ន្ធ​ផ្គត់ផ្គង់​អគ្គិសនី​ជាតិ​ដោយ​មាន​ជំនួយ​ពី​បច្ចេកវិទ្យា​ប្រព័ន្ធ​ស្តុក​ថាមពល​អគ្គិសនី​នៅ​ព្រឹក​ថ្ងៃ​ទី ១៦ ឧសភា​នេះ លោក​បណ្ឌិត ប្រាំង ជលសា ប្រតិភូ​រាជរដ្ឋាភិបាល​កម្ពុជា​ទទួល​បន្ទុក​ជា​អគ្គនាយក​អគ្គិសនី​កម្ពុជា បាន​បន្ត​ថា «មែនទែន​ទៅ យើង​បាន​លើស​គោលដៅ​បាត់​ទៅ​ហើយ​តាម​ការ​សិក្សា​របស់​ធនាគារ​ពិភពលោក​ឆ្នាំ ២០០០ បាន​ដាក់​ទិសដៅ​ថា នៅ​ឆ្នាំ ២០៣០ ធ្វើ​យ៉ាងណា​ផ្គត់ផ្គង់​អគ្គិសនី​គ្របដណ្ដប់​ដល់​ប្រជាពលរដ្ឋ​ឱ្យ​បាន ៧០%។ ឥឡូវនេះ យើង​បាន​ភ្ជាប់ ៩៤% ពី​ប្រព័ន្ធ​បណ្ដាញ​ជាតិ​បញ្ជូន​អគ្គិសនី និង​មាន ៤% ភ្ជាប់​ប្រព័ន្ធ​សូឡា ឬ​ពន្លឺ​ព្រះអាទិត្យ​ដូចជា​ភូមិ​បណ្តែត​ទឹក​តាម​តំបន់​ភ្នំ​នៅ​ឆ្ងាយៗ ដែល​មិន​អាច​បញ្ជូន​ខ្សែ​បណ្ដាញ​ទៅ​ដល់ ព្រោះ​វា​ត្រូវ​ចំណាយ​ខ្ពស់ ។ ដូច្នេះ​យើង​ផ្តល់​ជូន​គាត់​នូវ​ផ្ទាំង​សូឡា ឬ​ពន្លឺ​ព្រះអាទិត្យ អាច​ដាំ​ស្ល​បាន»។

លោក​បណ្ឌិត បាន​បន្ត​ទៀត​ថា ចំណែក​នៅសល់ ២% ទៀត ប្រជាពលរដ្ឋ​រស់នៅ​ឆ្ងាយៗ ពី​គ្នា តែ​យើង​នឹង​ខិតខំ​ផ្តល់​ផ្ទាំង​ពន្លឺ​ព្រះអាទិត្យ​ដើម្បី​ឱ្យ​ពួកគាត់​មាន​ភ្លើង​ប្រើប្រាស់​បាន​គ្រប់ៗ គ្នា។

លោក​បណ្ឌិត បាន​បញ្ជាក់​ថា «​ជា​ធម្មតា​ទេ នៅ​ចុងក្រោយ​គេ ប្រទេស​ណា​ក៏​ជួប​ការ​លំបាក​ដែរ ពេល​ផ្តល់​បាន​លឿន​អីចឹង​ទៅ​ដល់​ជិត​គ្របដណ្ដប់​បាន ១០០% មាន​ការ​លំបាក ហើយ​មិន​ដឹង​ថា គាត់​នៅ​កន្លែង​ណាខ្លះ​ទៀត យើង​ពិបាក​ទៅ​ដល់ មាន​តែ​ផ្តល់​ផ្ទាំង​ពន្លឺ​ព្រះអាទិត្យ​ជូន​ពួកគាត់​»។

យ៉ាងណាក៏ដោយ អគ្គិសនី​កម្ពុជា គ្រោង​នឹង​ប្រើ​បច្ចេកវិទ្យា​ទំនើប​ស្តុក​ថាមពល​អគ្គិសនី​សម្រាប់​បង្កើន​ផលិតកម្ម​ចេញពី​ប្រភព​ថាមពល​ស្អាត​កកើត​ឡើងវិញ​ដូចជា​ថាមពល​ខ្យល់ និង​ពន្លឺ​ព្រះអាទិត្យ ដើម្បី​ជំនួស​ប្រភព​ថាមពល​អគ្គិសនី​ដែល​មិន​ស្អាត​ដូចជា​ធ្យូងថ្ម និង​ប្រេង​ជាដើម។

លោក​បណ្ឌិត បាន​បន្ត​ឱ្យ​ដឹង​ថា បច្ចុប្បន្ន​នេះ​នៅ​កម្ពុជា​ថាមពល​ដែល​កកើត​ពី​ពន្លឺ​ព្រះអាទិត្យ​មាន​ប្រមាណ ១៥% ហើយ​យើង​គ្រោង​បន្ថែម​ឱ្យ​បាន​ច្រើន ពី ២០ ទៅ ៣០ ទៅ​ជំនួស​ថាមពល​អគ្គិសនី​ចេញពី​ប្រភព​ធ្យូងថ្ម និង​ប្រភព​ផ្សេងៗ ទៀត ព្រោះថា​ពន្លឺ​ថ្ងៃ​នៅ​ប្រទេស​យើង​មាន​ច្រើន។ ដូចនេះ​យើង​ត្រូវការ​បច្ចេកវិទ្យា​ថ្មី​ទំនើប​ពី​សហរដ្ឋអាមេរិក និង​អូស្ត្រាលី ដែល​អ្នក​ជំនាញ នឹង​ជួយ​សិក្សា​ស្រាវជ្រាវ និង​បណ្ដុះបណ្ដាល​មន្ត្រី​អគ្គិសនី​កម្ពុជា​យើង​ឱ្យ​ចេះ​លើ​ការ​បង្កើន​ផលិតកម្ម​ពី​ថាមពល​កកើត​ឡើងវិញ​អថេរ​ទៅ​ក្នុង​ប្រព័ន្ធ​បញ្ជូន​អគ្គិសនី​ជាតិ​ដោយ​ប្រើប្រាស់​បច្ចេកវិទ្យា​ប្រព័ន្ធ​ស្តុក​ថាមពល ដើម្បី​បង្កើន​សមត្ថភាព​ផ្គត់ផ្គង់​បំពេញ​តម្រូវការ​អគ្គិសនី​ក្នុង​ពេល​អនាគត៕

អត្ថបទ ៖ សំអឿន

The post មន្ត្រីជាន់ខ្ពស់ ៖ ពលរដ្ឋកម្ពុជា ៩៨% ហើយ មានអគ្គិសនីប្រើប្រាស់​សម្រួលដល់ការរស់នៅប្រចាំថ្ងៃកាន់តែប្រសើរ appeared first on Kampuchea Thmey Daily.

ថ្លែង​បើក​សិក្ខាសាលា​ស្តីពី​ការ​បណ្ដុះបណ្ដាល​បង្កើន​ប្រភព​ថាមពល​កកើត​ឡើងវិញ​អថេរ​ទៅ​ក្នុង​ប្រព័ន្ធ​ផ្គត់ផ្គង់​អគ្គិសនី​ជាតិ​ដោយ​មាន​ជំនួយ​ពី​បច្ចេកវិទ្យា​ប្រព័ន្ធ​ស្តុក​ថាមពល​អគ្គិសនី​នៅ​ព្រឹក​ថ្ងៃ​ទី ១៦ ឧសភា​នេះ លោក​បណ្ឌិត ប្រាំង ជលសា ប្រតិភូ​រាជរដ្ឋាភិបាល​កម្ពុជា​ទទួល​បន្ទុក​ជា​អគ្គនាយក​អគ្គិសនី​កម្ពុជា បាន​មាន​ប្រសាសន៍​ថា សិក្ខាសាលា​នេះ​ធ្វើឡើង​ក្នុង​គោលបំណង​ដើម្បី​បង្កើន​ផលិតកម្ម​ចេញពី​ថាមពល​ស្អាត​កកើត​ឡើង​វិញ​ជា​ប្រភេទ​អថេរ​ដែល​មានន័យថា​ប្រភព​ថាមពល​មិន​មាន​ស្ថិរភាព ឬ​ការ​ផលិត​ចេញ​មក​អត់​មាន​ស្ថិរភាព ព្រោះ​វា​ផលិត​ចេញពី​ថាមពល​ពន្លឺ​ព្រះអាទិត្យ និង​ខ្យល់ វា​អាស្រ័យ​ទៅ​លើ​បរិយាកាស និង​អាកាសធាតុ។

លោក​បាន​បន្ត​ថា «គោលនយោបាយ​សកលលោក​ចង់​បាន​ថាមពល​ស្អាត ហើយ​វារីអគ្គិសនី​កាន់តែ​អស់​ទីតាំង​ធ្វើ អីចឹង​នៅ​សល់​ខ្យល់ និង​ពន្លឺ​ព្រះអាទិត្យ​ដែល​អាច​ធ្វើ​បាន ហើយ​ធ្វើ​ម៉េច​ចូល​ឱ្យ​កាន់តែ​ច្រើន យើង​ត្រូវ​ការ​ប្រើ​បច្ចេកវិទ្យា​ទំនើប​ដើម្បី​ស្តុក​ថាមពល​ឱ្យ​បាន​ច្រើន ដើម្បី​ជំនួស​ប្រភព​អគ្គិសនី​មួយ​ចំនួន​ដូចជា ធ្យូងថ្ម ប្រេង​ដែល​ជា​ប្រភព​មិន​ស្អាត»។

លោក​បណ្ឌិត បាន​បន្ត​ថា បច្ចុប្បន្ន​នេះ​នៅ​កម្ពុជា​ថាមពល​ដែល​កកើត​ពី​ពន្លឺ​ព្រះអាទិត្យ​មាន​ប្រមាណ ១៥% ហើយ​យើង​គ្រោង​បន្ថែម​ឱ្យ​បាន​ច្រើន ពី ២០ ទៅ ៣០ ទៅ​ជំនួស​ថាមពល​អគ្គិសនី​ចេញពី​ប្រភព​ធ្យូងថ្ម និង​ប្រភព​ផ្សេងៗ ទៀត ព្រោះថា​ពន្លឺ​ថ្ងៃ​នៅ​ប្រទេស​យើង​មាន​ច្រើន​។ ដូចនេះ​យើង​ត្រូវការ​បច្ចេកវិទ្យា​ថ្មី​ទំនើប​ពី​សហរដ្ឋ​អាមេរិក និង​អូស្ត្រាលី ដែល​អ្នក​ជំនាញ​នឹង​ជួយ​សិក្សា​ស្រាវជ្រាវ និង​បណ្ដុះបណ្ដាល​មន្ត្រី​អគ្គិសនី​កម្ពុជា​ឱ្យ​ចេះ​លើ​ការ​បង្កើន​ផលិតកម្ម​ពី​ថាមពល​កកើត​ឡើងវិញ​អថេរ​ទៅ​ក្នុង​ប្រព័ន្ធ​បញ្ជូន​អគ្គិសនី​ជាតិ​ដោយ​ប្រើប្រាស់​បច្ចេកវិទ្យា​ប្រព័ន្ធ​ស្តុក​ថាមពល ដើម្បី​បង្កើន​សមត្ថភាព​ផ្គត់ផ្គង់​បំពេញ​តម្រូវការ​អគ្គិសនី​ក្នុង​ពេល​អនាគត។

លោក​បណ្ឌិត បាន​បញ្ជាក់​ថា «ដើម្បី​ឱ្យ​ការ​ដាក់​បញ្ចូល​នេះ​បាន​ច្រើន​ជា​អតិបរមា បំពេញ​តម្រូវការ​កើន​ឡើង ចាំបាច់​ត្រូវការ​បច្ចេកវិទ្យា​ទំនើប និង​ថ្មីៗ ដែល​ក្នុង​នោះ​ប្រទេស​-​ស្ថាប័ន​ដៃគូ​អភិវឌ្ឍន៍ បាន​រីករាយ​ក្នុង​ការ​ជួយ​ដល់​កម្ពុជា​ក្នុង​ការ​អភិវឌ្ឍន៍​បច្ចេកវិទ្យា​ទាំងអស់​នេះ ដូចជា​សិក្ខាសាលា​នេះ​ដែល​មាន USAID និង Australia Aid បាន​យល់ព្រម​ជួយ​សិក្សា ផ្ដល់​បច្ចេកវិទ្យា​ប្រព័ន្ធ​ស្ដុក​ថាមពល ដើម្បី​យក​ទៅ​អនុវត្ត​ឱ្យ​ប្រភព​ផ្តល់​ថាមពល​នេះ​អាច​ស្តុក​បាន​នៅ​ពេល​លើស ហើយ​បន្ត​យក​ទៅ​ប្រើ​នៅ​ពេល​ខ្វះ ហើយ​អាច​គ្រប់គ្រង​បញ្ហា​បាន ព្រមទាំង​បង្កើន​ប្រសិទ្ធភាព​សេដ្ឋកិច្ច​ឱ្យ​មាន​ថ្លៃ​សមរម្យ អាច​ធ្វើ​អាជីវកម្ម​បាន»។

លោក​បណ្ឌិត សង្ឃឹម​ថា ការ​បន្ត​សហប្រតិបត្តិការ​នេះ នឹង​ចេញ​ជា​ផ្លែផ្កា ផ្តល់​ចំណេះដឹង​ដល់​អ្នក​ជំនាញ​របស់​អគ្គិសនី​កម្ពុជា ដើម្បី​យក​បច្ចេកវិទ្យា​ទៅ​អនុវត្ត​នៅ​ពេល​ដែល​បង្កើន​ការ​ដាក់​បញ្ចូល​ថាមពល​កកើត​ឡើងវិញ​អថេរ​ឱ្យ​បាន​កាន់តែ​ច្រើន​ក្នុង​ពេល​អនាគត​ដ៏​ខ្លី​នេះ ចូលរួម​ចំណែក​កាត់​បន្ថយ​ការ​សាយភាយ​ឧស្ម័ន​កាបូនិច​ទៅ​បរិយាកាស ប្រែប្រួល​អាកាសធាតុ ដើម្បី​ថែរក្សា​ភព​ផែនដី​របស់​យើង​ឱ្យ​នៅ​បន្ត​ស្រស់បំព្រង។

លោក​បណ្ឌិត បាន​បន្ថែម​ថា ជាមួយ​គោលនយោបាយ​ចូលរួម​ការពារ​បរិស្ថាន រាជរដ្ឋាភិបាល​កម្ពុជា បាន​ប្រកាស​ជា​ផ្លូវការ នៅ COP 26 ដោយ​ពុំ​មាន​ការ​សាងសង់​រោងចក្រ​អគ្គិសនី​ដើរ​ដោយ​ធ្យូងថ្ម​ថ្មី​បន្ថែម និង​ពុំ​មាន​ការ​សាងសង់​រោងចក្រ​វារីអគ្គិសនី​នៅ​លើ​ដង ទន្លេ​មេគង្គ ក៏ដូចជា​គោលដៅ អព្យាក្រឹតភាព​កាបូន នៅ​ឆ្នាំ ២០៥០ តម្រូវ​ឱ្យ​យើង​អភិវឌ្ឍន៍​ថាមពល​កកើត​ឡើងវិញ ដែល​ក្រសួង​រ៉ែ និង​ថាមពល បាន​ដាក់​គោលដៅ​ឱ្យ​បាន ៧០% ថាមពល​កកើត​ឡើង​វិញ​នៅ​ឆ្នាំ ២០៣០ ជាពិសេស​ប្រភេទ​អថេរ​គឺ​សំដៅ​ទៅ​ប្រភព​ពន្លឺ​ព្រះអាទិត្យ និង​ខ្យល់​ជាដើម៕

អត្ថបទ ៖ សំអឿន

The post កម្ពុជា នឹងប្រើបច្ចេកវិទ្យាទំនើបបង្កើនផលិតកម្មចេញពី​ប្រភពថាមពលស្អាតកកើតឡើងវិញ ជំនួសថាមពលមិនស្អាត appeared first on Kampuchea Thmey Daily.

នៅក្នុង​សន្និបាតបូកសរុបការងារ​ឆ្នាំ ២០២៣ និងលើកទិសដៅការងារឆ្នាំ ២០២៤ កាលពី​ថ្ងៃទី​១៥ ខែកុម្ភៈ ឆ្នាំ២០២៤ អគ្គិសនីកម្ពុជា​​​បាន​ឲ្យ​ដឹ​ង​ថា បច្ចុប្បន្ន​មាន​​​ភូមិទូទាំង​ប្រទេស​ដែល​ពុំទាន់​មានការផ្គត់ផ្គង់អគ្គិសនី​​ចំនួន ១៦០ ភូមិ ដែល​ក្នុង​នោះមាន​ភូមិ ១៤៣ ស្ថិត​ក្នុង​ដែនអាជ្ញាបណ្ណដែលបានផ្តល់ឱ្យទៅអ្នក​ចែកចាយ​រួចហើយ និងភូមិ ១៧ ស្ថិត​នៅក្រៅ​ដែន​អាជ្ញាបណ្ណ។

ផ្អែក​តាម​ការ​សិក្សា ក្នុងឆ្នាំ២០២៤ ទាំងអគ្គិសនីកម្ពុជា និងទាំងសេវាករឯកជន អាចមានលទ្ធភាពពង្រីកការផ្គត់ផ្គង់អគ្គិសនី​ពីបណ្តាញ​ជាតិទៅកាន់​ភូមិ​ចំនួន ៨៣ ភូមិទៀត ដូច្នេះនៅក្រោយឆ្នាំ២០២៤ នៅ​សល់ភូមិចំនួន ៧៧ ទៀត​ ត្រូវជា ០.៥៤% ដែល​ពុំ​មានការ​ផ្គត់ផ្គង់ពីបណ្តាញជាតិ។

ក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជា ក៏​បានរួមគ្នាពិនិត្យលទ្ធភាព​រកដំណោះស្រាយ​ផ្សេងៗ​ជូន​​ភូមិ​ដែលនៅសល់ទាំង ៧៧ តាមស្ថានភាព​ជាក់​ស្តែងនៃភូមិនីមួយៗ តាមរយៈការផ្គត់ផ្គង់អគ្គិសនី​ពីប្រភពពន្លឺព្រះអាទិត្យប្រព័ន្ធទោល ដែល​អាចជា​ប្រភព​ទុន​របស់អគ្គិសនីកម្ពុជា ពីស្ថាប័នហិរញ្ញវត្ថុអន្តរជាតិនានា ពីការវិនិយោគរបស់​ក្រុមហ៊ុន​ឯកជន​។

គិតមកត្រឹមចុងឆ្នាំ២០២៣ ព្រំដែននៃអាជ្ញាបណ្ណដែល​បាន​ផ្តល់​ឱ្យអ្នកកាន់​អាជ្ញាបណ្ណចែកចាយធ្វើការ​វិនិយោគអភិវឌ្ឍបណ្តាញចែកចាយអគ្គិសនី ទាំងរដ្ឋ និង​ទាំង​ឯកជន មាន​ចំនួន ៩៩.៨៨% នៃចំនួនភូមិទូទាំងប្រទេស។ ក្នុងឆ្នាំ​២០២៣​នេះ ការសាងសង់​បណ្តាញ​ចែកចាយ​អគ្គិសនី​បន្ថែមធ្វើបាន ០.៦០% នៃចំនួនភូមិថែមទៀត ធ្វើឱ្យភូមិ​ដែលមាន​បណ្តាញ​ចែកចាយរួចបានកើនឡើងពី ៩៨.២៧% នៅចុងឆ្នាំ២០២២ មក ៩៨.៨៧% នៅចុង​ឆ្នាំ​២០២៣​។

ការភ្ជាប់បណ្តាញអគ្គិសនីឱ្យអ្នកប្រើប្រាស់​អគ្គិសនីគ្រប់ប្រភេទ​នៅ​កម្ពុជា បានកើនឡើងពី ៣,៥៣៣,៩៣៥ ទីតាំង នៅចុងឆ្នាំ២០២២ មក ៣,៧០៥,៥០៧ ទីតាំង នៅ​ចុង ឆ្នាំ២០២៣។ តាមស្ថិតិនេះ នៅចុងឆ្នាំ២០២៣ លំនៅឋានដែលបានភ្ជាប់ចរន្តអគ្គិសនីរួចមានចំនួន ៣,៤៥៩,៣៧២ ស្មើនឹង ៩៤.០២% នៃលំនៅឋានសរុប៕

The post ៨៣ ភូមិទៀត​​នឹង​ទទួលបាន​អគ្កីសនី​​ប្រើប្រាស់​ពីបណ្តាញ​ជាតិនៅឆ្នាំ ២០២៤ ​ appeared first on Kampuchea Thmey Daily.

យោងតាមសេចក្តីជូនដំណឹងរបស់អាជ្ញាធរអគ្គិសនីកម្ពុជា បានឱ្យដឹងថា ក្រសួងរ៉ែ និងថាមពល, អាជ្ញាធរអគ្គិសនីកម្ពុជា និងអគ្គិសនីកម្ពុជា នឹងបញ្ចុះថ្លៃអគ្គិសនី ១៥% ចំពោះបរិមាណថាមពលដែលប្រើលើសពីការប្រើមធ្យមក្នុងរយៈពេល ៦ ខែ កន្លងមក របស់អ្នកប្រើប្រាស់ អគ្គិសនីប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍ តាមគោលការណ៍ និងលក្ខខណ្ឌ ដូចខាងក្រោម ៖

អ្នកប្រើប្រាស់ប្រភេទពាណិជ្ជកម្ម អាជីវកម្ម និងសេវាកម្មបម្រើក្នុងវិស័យទេសចរណ៍

– អ្នកប្រើប្រាស់ធុនតូច ទិញពីខ្សែបណ្តាញចែកចាយ LV សាធារណៈ រួមមាន សណ្ឋាគារ និង ផ្ទះសំណាក់ (មានអត្រាថ្លៃលក់ជារៀល)

– អ្នកប្រើប្រាស់ធុនមធ្យម ទិញតាមនាឡិកាស្ទង់តង់ស្យុងទាប ឬតង់ស្យុងមធ្យម មានអត្រាថ្លៃ លក់ជាដុល្លារ)

– អតិថិជនធុនធំ ទិញពីទ្វារចរន្តតង់ស្យុងមធ្យមនៃអនុស្ថានីយ

– អតិថិជនធុនដុំ ទិញពីខ្សែបណ្តាញតង់ស្យុងខ្ពស់

– លើកលែងតែអតិថិជនពាណិជ្ជកម្ម អាជីវកម្ម មួយចំនួនដូចជា គ្រឹះស្ថានសិក្សា វិស័យសុខា ភិបាល គ្រឹះស្ថានហិរញ្ញវត្ថុ ក្រុមហ៊ុនធានារ៉ាប់រង ក្រុមហ៊ុនដឹកជញ្ជូន អគាររដ្ឋបាល ជាដើម មិនទទួលបានការបញ្ចុះថ្លៃនេះទេ។

បើតាមអគ្គិសនីកម្ពុជា ចំពោះលក្ខខណ្ឌដែលត្រូវបញ្ចុះថ្លៃ ១៥% សម្រាប់បរិមាណថាមពលអគ្គិសនីប្រើប្រចាំខែ ដែលលើសពីមធ្យមភាគក្នុងរយៈពេល ៦ (ប្រាំមួយ) ខែ កន្លងមក ក្នុងលក្ខខណ្ឌធម្មតា។ ការបញ្ចុះថ្លៃនេះ ចំពោះតែបរិមាណថាមពលអគ្គិសនី (kWh) ដែលប្រើលើស ប៉ុណ្ណោះ ។

រយៈពេលដែលត្រូវបញ្ចុះថ្លៃ ចំពោះថាមពលដែលប្រើនៅខែធ្នូ ឆ្នាំ២០២៣ ដល់ ខែកុម្ភៈ ឆ្នាំ២០២៤។ អគ្គិសនីកម្ពុជា បានបញ្ជាក់ថា រយៈពេលនេះអាចបន្ថែមទៀត អាស្រ័យលើលទ្ធភាពហិរញ្ញវត្ថុរបស់អគ្គិសនីកម្ពុជា។

ជាមួយគ្នានេះ អាជ្ញាធរអគ្គិសនីកម្ពុជា បានអំពាវនាវដល់អ្នកប្រើប្រាស់អគ្គិសនី ដែលយល់ថា ការប្រើប្រាស់ អគ្គិសនី​របស់ខ្លួន ស្របតាមលក្ខខណ្ឌខាងលើ អាចដាក់ពាក្យស្នើសុំទៅអ្នកផ្គត់ផ្គង់ដែលឋិតក្នុងតំបន់​ខ្លួនកំពុង​ប្រើអគ្គិសនី ដើម្បីទទួលបានការបញ្ចុះថ្លៃនេះ៕

The post បញ្ចុះតម្លៃអគ្គិសនីអាជីវកម្មក្នុងវិស័យទេសចរណ៍ ១៥% ពីខែធ្នូ ដល់ឆ្នាំដើម ២០២៤ appeared first on Kampuchea Thmey Daily.

បើតាមសេចក្តីជូនដំណឹងរបស់អគ្គិសនីកម្ពុជា ក្នុងទឹកដីនៃខណ្ឌសែនសែន សង្កាត់ទាំង៦ ដែលនឹងត្រូវផ្អាកផ្គត់ផ្គង់អគ្គិសនី រួមមាន សង្កាត់ក្រាំងធ្នង់ សង្កាត់គោកឃ្លាង សង្កាត់ភ្នំពេញថ្មី សង្កាត់ទឹកថ្លា សង្កាត់អូបែកក្អម និងសង្កាត់ឃ្មួញ។ ចំពោះម៉ោងពេលដែលកំណត់ផ្អាកផ្គត់ផ្គង់អគ្គិសនី មានលម្អិតខាងក្រោមនេះ៖

ជាមួយគ្នានេះ សង្កាត់មួយចំនួន ក្នុងខណ្ឌដទៃផ្សេងទៀតនៅរាជធានីភ្នំពេញ មានដូចជាខណ្ឌ៧មករា ខណ្ឌទួលគោក ខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ ខណ្ឌឬស្សីកែវ ខណ្ឌជ្រោយចង្វារ ខណ្ឌព្រែកព្នៅ រួមទាំងតំបន់ខ្លះ ក្នុងខេត្តកណ្តាល ក៏នឹងត្រូវផ្អាកការផ្គត់ផ្គង់អគ្គិសនីដូចគ្នាចន្លោះពី ៥ម៉ោង-៨ម៉ោង ដោយចាប់ផ្តើមពីម៉ោង ៨ព្រឹក ដល់ ៤រសៀល ថ្ងៃទី៣១ ខែសីហានេះតែម្តង។

គួរបញ្ជាក់ថា បើទោះបីជាមានការខិតខំថែរក្សា មិនឱ្យមានការប៉ះពាល់ដល់ ការផ្គត់ផ្គង់អគ្គិសនីធំដុំក៏ដោយ តែការផ្គត់ផ្គង់ចរន្តអគ្គិសនីនៅតំបន់ខ្លះ អាចនឹងមានការរអាក់រអួលខ្លះៗជៀសមិនផុត ហេតុនេះ អគ្គិសនីកម្ពុជាស្នើសុំអភ័យទោសទុកជាមុន។

មួយរយៈនេះ ដោយសារតែមានការជួសជុល ផ្លាស់ប្តូរតម្លើងបរិក្ខារនានា និងរុះរើគន្លងខ្សែបណ្តាញអគ្គិសនី របស់អគ្គិសនីកម្ពុជាជាបន្តបន្ទាប់ ជាហេតុធ្វើឱ្យតំបន់មួយចំនួនក្នុងក្រុងភ្នំពេញ មិនមានចរន្តអិគ្គសនីប្រើប្រាស់ ក្នុងមួយរយៈពេល ជាញឹកញាប់។ អាស្រ័យហេតុនេះ អគ្គិសនីកម្ពុជា ស្នើដល់ប្រជាពលរដ្ឋទាំងអស់ ដែលរស់នៅក្នុងតំបន់ ខាងលើ មានការយោគយល់អាធ្យាស្រ័យ៕

The post តំបន់ខ្លះក្នុងខណ្ឌសែនសុខ នឹងត្រូវផ្អាកផ្គត់ផ្គង់អគ្គិសនី ៣ថ្ងៃជាប់គ្នា និងច្រើនម៉ោង appeared first on Kampuchea Thmey Daily.

យោងតាមលិខិតសំណើមកកាន់លោកស្រី មិថុនា ភូថង អភិបាលខេត្តកោះកុង កាលពីថ្ងៃទី២៨ ខែកក្កដា ឆ្នាំ២០២៣ កន្លងទៅ គឺលោក ង៉ែត សុខន អគ្គនាយកស្តីទីអគ្គិសនីកម្ពុជា និយាយថា ក្រុមការងារជំនាញបានតភ្ជាប់បណ្តាញអគ្គិសនីតង់ស្យុង២២គីឡូវ៉ុល និង៣៥គីឡូវ៉ុល ក្នុងតំបន់ខេត្តកោះកុង និងខេត្តព្រះសីហនុ កប់ក្រោមបាតសមុទ្រចប់ជាស្ថាពរ។

បើតាមលោក ង៉ែត សុខន ដដែលតំបន់ដែលសាងសង់ខ្សែបណ្តាញអគ្គិសនីលើអាកាស និងកប់ក្រោមបាតសមុទ្រ គឺឆ្លងកាត់កោះទទឹង កោះស្តេច កោះសាមិត កោះអំពិលតូច កោះអំពិលធំ កោះស្មាច់ កោះស្រមោច កោះម្នាស់ កោះតាទាម និងកោះរ៉ុង ដោយកាលពីថ្ងៃទី២១ ខែមិថុនា ឆ្នាំ២០២៣កន្លងទៅបានសម្ពោធដាក់ឱ្យជាផ្លូវការហើយ។ ទន្ទឹមនោះ តំណាងអគ្គិសនីកម្ពុជា បានស្នើសុំលោកស្រី មិថុនា ភូថង អភិបាលខេត្តកោះកុង និងលោក គួច ចំរើន អភិបាលខេត្តព្រះសីហនុ មេត្តាធ្វើយ៉ាងណាជួយផ្សព្វផ្សាយ និងជូនដំណឹងដល់ម្ចាស់ទូកនេសាទធំៗ និងក្រុមហ៊ុនដែលមានកាណូត កប៉ាល់ ធ្វើដំណើរឆ្លងកាត់តាមបណ្តាកោះមួយចំនួនខាងលើក្នុងខេត្ត។ លើសពីនេះ អគ្គនាយកអគ្គិសនីកម្ពុជា ក៏មិនអនុញ្ញាតឱ្យបោះយុថ្កានៅទីតាំងគន្លងខ្សែ និងរក្សាគម្លាតប្រមាណ២០០ម៉ែត្រពីគន្លងខ្សែកប់ក្រោមបាតសមុទ្រ ដើម្បីបញ្ចៀសផលប៉ះពាល់លើខ្សែដែលអាចបង្កគ្រោះថ្នាក់ជាយថាហេតុ។

ដោយឡែក លោក សុខ សុទ្ធី អភិបាលរងខេត្តកោះកុង លើកឡើងនៅថ្ងៃទី២ ខែសីហា នេះថា លោកទើបតែទទួលបានលិខិតជូនដំណឹងនេះ ហើយលោកនឹងសុំគោលការណ៍ពីថ្នាក់ដឹកនាំខេត្ត ដើម្បីជំរុញឱ្យមានការផ្សព្វផ្សាយអប់រំណែនាំកាន់តែមានប្រសិទ្ធិភាពសំដៅកាត់បន្ថយអត្រាគ្រោះថ្នាក់ និងសុវត្ថិភាពដល់អ្នកទេសចរព្រមទាំងអ្នកនេសាទ៕

អត្តបទ៖ សិរីវឌ្ឍនៈ

The post មន្រ្តីជំនាញមិនអនុញ្ញាតឲ្យបោះយុថ្កានៅទីតាំងគន្លងខ្សែបណ្តាញអគ្គិសនីកប់បាតសមុទ្រ appeared first on Kampuchea Thmey Daily.