អវកាសយានិក Archives - Kampuchea Thmey Daily

អវកាសយានិកស្រ្តីដំបូង រួមដំណើរទៅឋានព្រះចន្ទ បន្ទាប់ពីជាង៥០ឆ្នាំ

Minea Neu — Mon, 06 Apr 2026 12:30:00 +0000

ពេលនិយាយពីវិស័យអវកាសប្រហែលមនុស្សភាគច្រើនគិតដល់បុរសមុនគេដែលស័ក្ដិសមនិងទទួលបានមុខដំណែងណាមួយក្នុងលំហមានចម្ងាយរាប់ម៉ឺនគីឡូពីភពដែនដី តែសម័យបច្ចុប្បន្នស្រ្តីជាច្រើនមានសមត្ថភាពអាចបំពេញការងារតាមក្តីស្រមៃរបស់ពួកគេបាន មិនថាខាងនយោបាយ យោធា បច្ចេកវិទ្យា និងវិស័យអវកាសនោះទេ។

សហរដ្ឋអាមេរិកមានមោទនភាពចំពោះ លោកស្រី Christina Koch ជាអវកាសយានិករបស់អង្គការ NASA កំពុងបង្កើតប្រវត្តិសាស្ត្រជាស្ត្រីដំបូងគេដែលបានធ្វើដំណើរជុំវិញឋានព្រះចន្ទ។

លោក ស្រី Christina Koch និងមិត្តរួមក្រុមក្នុងយានអវកាស។ រូបភាព៖ Reuters

យោងតាមសារព័ត៌មាន ABC News ផ្សាយដើមខែមេសា ឆ្នាំ២០២៦ លោកស្រី Koch អាយុ ៤៧ ឆ្នាំ ជាម្នាក់ក្នុងចំណោមមនុស្ស៤នាក់ នឹងហោះហើរជាមួយយានអវកាស Orion សម្រាប់បេសកកម្ម Artemis II របស់ NASA ដែលបាញ់បង្ហោះទៅឋានព្រះចន្ទនៅល្ងាចថ្ងៃពុធពីមជ្ឈមណ្ឌលអវកាស Kennedy ក្នុងរដ្ឋ Florida ក្នុងរយៈពេល ១០ថ្ងៃនៃបេសកកម្ម។

ដំណើរដ៏វែងឆ្ងាយជាង ១ ១០២ ៤០០ គីឡូម៉ែត្រហោះឆ្លងកាត់លំហរអាកាសទៅឋានព្រះចន្ទ វាជាលើកទីមួយក្នុងរយៈពេលជាង៥០ឆ្នាំ សម្រាប់អវកាសយានិកអាមេរិកបានធ្វើដំណើរជុំវិញឋានព្រះចន្ទ។

ក្រៅពី Koch បេសកកម្មនេះក៏មានអវកាសយានិកដទៃទៀតរបស់ NASA ជាជនជាតិអាមេរិកគឺ លោក Reid Wiseman និង លោក Victor Glover ព្រមទាំងអវកាសយានិករបស់ទីភ្នាក់ងារអវកាសកាណាដា លោក Jeremy Hansen ម្នាក់ផងដែរ។

លោកស្រី Koch កើតនៅរដ្ឋ Michigan និងធំធាត់ក្នុងរដ្ឋ North Carolina ស្រ្តីរូបនេះមិនមែនជាមនុស្សចម្លែក ចំពោះបេសកកម្ម NASA ដែលបានបង្កើតកំណត់ត្រានោះទេ។ លោកស្រីត្រូវបានជ្រើសរើសជាលើកដំបូងជាអវកាសយានិក NASA ក្នុងឆ្នាំ២០១៣ ។ នៅក្នុងខែធ្នូ ឆ្នាំ២០១៩ លោកស្រីបង្កើតកំណត់ត្រាសម្រាប់ការហោះហើរអវកាសយូរបំផុត ដោយចំណាយពេល ៣២៨ថ្ងៃជាប់ៗគ្នានៅក្នុងលំហ។

គួរបញ្ជាក់ថា លោកស្រី Koch បញ្ចប់ការដើរក្នុងលំហអាកាសនៅឆ្នាំ២០១៩ ចំនួន៣លើក ក្នុងនោះមានតែស្ត្រីប៉ុណ្ណោះដែលសរុបរយៈពេល៤២ ម៉ោងនិង១៥ នាទី។

អ្នកជំនាញកត់ចំណាំជីវប្រវត្តិផ្លូវការរបស់លោកស្រីថា៖ «ចំណុចសំខាន់ៗមួយចំនួនពីបេសកកម្មរបស់ Koch រួមមានការធ្វើមនុស្សយន្តដល់ភ្នាក់ងារ Alpha Magnetic Spectrometer ការដាំដុះគ្រីស្តាល់( crystals) ប្រូតេអ៊ីនសម្រាប់ការស្រាវជ្រាវឱសថនិងការសាកល្បងម៉ាស៊ីនបោះពុម្ពជីវសាស្រ្ត ៣D ក្នុងមីក្រូទំនាញ»។

មុនទទួលភារកិច្ច Artemis II, លោកស្រីបម្រើការជាប្រធានក្រុមចាត់តាំងក្នុងការិយាល័យអវកាសយានិករបស់ NASA និងជាជំនួយការសម្រាប់សមាហរណកម្មបច្ចេកទេសសម្រាប់នាយកមជ្ឈមណ្ឌលនៅមជ្ឈមណ្ឌលអវកាសទៀតផង។

ចំណែកមុនពេលក្លាយជាអវកាសយានិក ប្រវត្តិវិស្វកម្មរបស់អវកាសយានិកស្រ្តីរូបនេះ មានទាំងការអភិវឌ្ឍឧបករណ៍បេសកកម្មវិទ្យាសាស្ត្រអវកាសនិងវិស្វកម្មវាលវិទ្យាសាស្ត្រពីចម្ងាយនៅអង់តាក់ទិកនិងអាកទិក ជាអ្នកពន្លត់អគ្គិភ័យ ស្វែងរក និងជួយសង្គ្រោះនៅស្ថានីយ៍ប៉ូលអង់តាក់ទិកផងដែរ។

គួរបញ្ជាក់ថា លោកស្រី Koch ទទួលបានសញ្ញាបត្របរិញ្ញាបត្រវិទ្យាសាស្ត្រផ្នែកវិស្វកម្មអគ្គិសនីនិងរូបវិទ្យា ក៏ដូចជាសញ្ញាបត្រអនុបណ្ឌិតវិទ្យាសាស្ត្រផ្នែកវិស្វកម្មអគ្គិសនីពីសាកលវិទ្យាល័យរដ្ឋ North Carolina សហរដ្ឋអាមេរិក៕

ប្រែសម្រួល៖ ណឺ មិនា

The post អវកាសយានិកស្រ្តីដំបូង រួមដំណើរទៅឋានព្រះចន្ទ បន្ទាប់ពីជាង៥០ឆ្នាំ appeared first on Kampuchea Thmey Daily.

អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច?

Chheang — Tue, 05 Nov 2024 08:56:42 +0000

ពលរដ្ឋអាមេរិក បានចាប់ផ្ដើមនាំគ្នាទៅបោះឆ្នោតជ្រើសរើសមេដឹកនាំថ្មី នាថ្ងៃទី៥ខែវិច្ឆិកាឆ្នាំ២០២៤នេះ ហើយសូម្បីតែអវកាសយានិក២រូបដែលកំពុងជាប់គាំងខ្លួននៅលើស្ថានីយអវកាសអន្តរជាតិ (ISS) ក៏អាចចូលរួមនៅក្នុងការបោះឆ្នោតនេះផងដែរ។

លោកស្រី Sunita “Suni” Williams និងលោក Barry “Butch” Wilmore (រូបភាព៖ NASA)

លោក Barry “Butch” Wilmore និងលោកស្រី Sunita “Suni” Williams ដែលបានជួបប្រទះនឹងបញ្ហាបច្ចេកទេស ហើយកំពុងជាប់ខ្លួននៅលើស្ថានីយ ISS នឹងត្រូវធ្វើការបោះឆ្នោតពីលើអវកាសដូចទៅនឹងពលរដ្ឋអាមេរិកផ្សេងអ៊ីចឹងដែរ។

តាមរយៈសន្និសីទកាសែតជាមួយអង្គការណាសា (NASA) លោកស្រី Williams បាននិយាយថា លោកស្រីមានសេចក្ដីរំភើបដែលអាចបោះឆ្នោតពីលើគន្លងផែនដី។

ដំណើរការបោះឆ្នោតរបស់អវកាសយានិក នឹងធ្វើឡើងដោយសម្ងាត់ និងតាមរយៈប្រព័ន្ធផ្កាយរណប។ មុនដំបូង អវកាសយានិកត្រូវដាក់ពាក្យស្នើសុំ «សន្លឹកឆ្នោតអវត្តមាន» ដែលពួកគេអាចធ្វើការបំពេញតាមរយៈសារអេឡិចត្រូនិចខណៈកំពុងស្ថិតនៅលើស្ថានីយអវកាសអន្តរជាតិ។ NASA នឹងរៀបចំទុកដាក់ទិន្នន័យនេះលើកុំព្យូទ័រ ហើយបញ្ជូនវាតាមភ្នាក់ងារប្រព័ន្ធរ៉ាដា Near Space Network របស់ខ្លួន។ បន្ទាប់មក ទិន្នន័យនេះ នឹងផ្ញើបន្តតាមប្រព័ន្ធផ្កាយរណប Tracking and Data Relay Satellite System (TDRSS) ទៅកាន់មជ្ឈមណ្ឌល White Sands Test Facility របស់ NASA នៅរដ្ឋ New Mexico មុនផ្ញើបន្តទៅកាន់មជ្ឈមណ្ឌល Mission Control នៅទីក្រុង Houston រដ្ឋតិចសាស់។ ចុងក្រោយ ទិន្នន័យនៃសន្លឹកឆ្នោតរបស់អវកាសយានិក នឹងត្រូវបញ្ជូនទៅកាន់មណ្ឌលបោះឆ្នោតរបស់ពួកគេរៀងៗខ្លួន។

គួរបញ្ជាក់ថា នេះមិនមែនជាលើកដំបូងទេ ដែលអវកាសយានិកអាមេរិកធ្វើការបោះឆ្នោតពីលំហ។ ការបោះឆ្នោតពីលំហបែបនេះ កើតមានតាំងពីឆ្នាំ១៩៩៧មកម៉្លេះ ហើយអវកាសយានិកដំបូងគេដែលបានបោះឆ្នោតពីលំហ គឺ លោក David Wolf។ ការបោះឆ្នោតពីលំហចុងក្រោយគេ គឺនៅអំឡុងឆ្នាំ២០២០ នៅពេលដែលលោកស្រី Kate Rubins កំពុងបំពេញបេសកកម្មនៅលើ ISS៕

ដោយ៖ ឈាង

ចុចអាន៖ ថាទៅតែ៨ថ្ងៃទេ តែអវកាសយានិក២រូបជាប់ក្នុងលំហដល់ឆ្នាំ២០២៥ទើបត្រឡប់វិញបាន

The post អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច? appeared first on Kampuchea Thmey Daily.

ចិន ជោគជ័យបញ្ជូនអវកាសយានិកក្មេងបំផុតទៅ ស្ថានីយអវកាស

Sok Sovann — Wed, 30 Oct 2024 07:33:38 +0000

នៅទីបំផុត ប្រទេសចិន បានទទួលជោគជ័យក្នុងការបញ្ជូន អវកាសយានិកចំនួន៣នាក់ទៅកាន់ស្ថានីយអវកាស Tiangong របស់ខ្លួន ដើម្បីបំពេញបេសកកម្មរយៈពេលប្រាំមួយខែ ដោយក្នុងនោះមាន២នាក់ ជាអវកាសយានិកវ័យក្មេងបំផុតដែលចិនមិនធ្លាប់បញ្ជូនទៅសោះ។

យានអវកាស Shenzhou-19 ត្រូវបាញ់បង្ហោះ (រូបថត៖ AP)

តាមការចុះផ្សាយរបស់ BBC, យានអវកាស Shenzhou-19 ភ្ជាប់ជាមួយរ៉ុកកែត Long March-2F បានបាញ់បង្ហោះនៅម៉ោង៤និង២៧នាទីព្រឹកថ្ងៃពុធទី៣០ខែតុលាឆ្នាំ២០២៤ ចេញពីមជ្ឈមណ្ឌលបាញ់បង្ហោះផ្កាយរណប Jiuquan ក្នុងតំបន់ Inner Mongolia នៃខេត្ត Gansu។

អវកាសយានិកវ័យក្មេងបំផុត២នាក់ក្នុងយានអវកាសនោះ គឺ Song Lingdong អាយុ៣៤ឆ្នាំជាអតីតអ្នកបើកយន្តហោះឲ្យកងទ័ពអាកាស និង Wang Haoze អាយុ៣៤ឆ្នាំដូចគ្នា ជាវិស្វករយានអវកាស។ ចំណែកម្នាក់ទៀតនៅក្នុងនោះដែរ គឺមេបញ្ជាការ Cai Xuzhe ដែលធ្លាប់ត្រូវបានបញ្ជូនទៅបំពេញបេសកកម្ម Shenzhou-14។

(រាប់ពីឆ្វេងទៅស្តាំ) Wang Haoze, Song Lingdong និង Cai Xuzhe មុនពេលបាញ់បង្ហោះ (រូបថត៖ EFE)

ក្រុមអវកាសយានិក Shenzhou-19 នឹងចូលបន្តវេនពីក្រុមបច្ចុប្បន្នដែលមាន Ye Guangfu, Li Cong និង Li Guangsu ពីបេសកកម្ម Shenzhou-18។

(រូបថត៖ CCTV)

ក្រុមថ្មីនេះនឹងធ្វើការពិសោធន៍ចំនួន៨៦លើកនៅក្នុងលំហ ដោយផ្តោតជាពិសេសលើវិទ្យាសាស្ត្រជីវសាស្ត្រនិងរូបវិទ្យា។ ពួកគេនឹងដំឡើងឧបករណ៍ប្រឆាំងបំណែកនៅលំហអវកាស គ្រប់គ្រងប្រតិបត្តិការនៅស្ថានីយ៍ ដើរក្នុងលំហរអាកាស និងរៀបចំឧបករណ៍នានា។

សូមបញ្ជាក់ថា ស្ថានីយអវកាស Tiangong ត្រូវសាងសង់ដោយប្រទេសចិនសុទ្ធសាធ ហើយនឹងដំណើរការយ៉ាងហោចណាស់មួយទសវត្សរ៍ទៀត៕

អត្ថបទ៖ សុខ សុវណ្ណ

ចុចអាន៖ អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

The post ចិន ជោគជ័យបញ្ជូនអវកាសយានិកក្មេងបំផុតទៅ ស្ថានីយអវកាស appeared first on Kampuchea Thmey Daily.

អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

Chheang — Fri, 07 Jun 2024 04:23:52 +0000

ក្រោយឆ្លងកាត់ដំណើរទៅកាន់លំហអវកាសចំនួន៥ដងរួចមក លោក Oleg Kononenko បានក្លាយខ្លួនជាអវកាសយានិកដំបូងគេបង្អស់នៅលើពិភលោក ដែលបានរស់នៅក្នុងលំហអស់រយៈពេល ១០០០ថ្ងៃ។ នេះបើយោងតាមការប្រកាសរបស់ទីភ្នាក់ងារអវកាសរុស្ស៊ី Roscosmos កាលពីថ្ងៃទី៥ ខែមិថុនាកន្លងទៅ។

លោក Oleg Kononenko អវកាសយានិករុស្ស៊ី (រូបភាព៖ Reuters)

អវកាសយានិករុស្ស៊ីវ័យ៥៩ឆ្នាំ បានចាប់ផ្ដើមបេសកកម្មនៅស្ថានីយអវកាសអន្តរជាតិ ISS លើកដំបូង នៅក្នុងឆ្នាំ២០០៨ ហើយបេសកកកម្មចុងក្រោយរបស់លោកបានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២៣កន្លងទៅ ដែលគ្រោងនឹងបញ្ចប់នៅក្នុងថ្ងៃទី២៣ ខែកញ្ញាខាងមុខ។ ដំណើរទៅលំហរបស់លោក Kononenko លើកនេះ មានការចូលរួមពីអវកាសយានិកអាមេរិកមកពីអង្គការ NASA គឺអ្នកស្រី Lora O’Hara និងអវកាសយានិកសញ្ជាតិរុស្ស៊ីដូចគ្នាគឺលោក Nikolai Chub។

លោក Kononenko ធ្លាប់បានបំបែកកំណត់ត្រាម្ដងរួចមកហើយកាលពីខែកុម្ភៈ ឆ្នាំ២០២៤ ដោយកាលណោះ រយៈពេលដែលលោករស់នៅលំហមានចំនួន ៨៧៨ថ្ងៃ តាមទាន់មិត្តរួមអាជីពសញ្ជាតិរុស្ស៊ីដូចគ្នាគឺលោក Gennady Padlka ដែលធ្លាប់បំំបែកកំណត់ត្រានេះបាននៅក្នុងឆ្នាំ២០១៥។

បន្ថែមពីនេះ ប្រសិនបើបេសកកម្មលើកទី៥របស់លោក Kononenko សម្រេចដូចការគ្រោងទុក នោះរយៈពេលសរុបនៅលើលំហរបស់លោកនឹងកើនដល់ចំនួន ១ ១១០ថ្ងៃ។

ស្ថានីយអវកាសអន្តរជាតិ ISS (រូបភាព៖ NASA)

សូមបញ្ជាក់ថា ស្ថានីយអវកាសអន្តរជាតិ ISS មានការចូលរួមសហការគ្នាយ៉ាងជិតស្និទ្ធរវាងសហរដ្ឋអាមេរិក និងរុស្ស៊ី បើទោះជាលើបញ្ហាភូមិសាស្ត្រនយោបាយរវាងមហាអំណាចទាំង២ហាក់មានភាពរកាំរកូសខ្លាំងក៏ដោយ ក្រោយពីផ្ទុះសង្គ្រាមនៅអ៊ុយក្រែន កាលពីខែកុម្ភៈ ឆ្នាំ២០២២។ ទីភ្នាក់ងារអវកាសរុស្ស៊ី Roscosmos ធ្លាប់ប្រកាសកាលពីខែធ្នូកន្លងទៅថា កម្មវិធីអវកាសរួមគ្នាជាមួយអង្គការ NASA ក្នុងការបញ្ជូនអវកាសយានិកទៅស្ថានីយអវកាសអន្តរជាតិ ISS នឹងនៅតែបន្តរហូតដល់ឆ្នាំ២០២៥ខាងមុខឯណោះ៕

ដោយ៖ ឈាង

The post អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ appeared first on Kampuchea Thmey Daily.

ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង

Chheang — Sat, 27 Apr 2024 03:29:04 +0000

ការដាក់យានគ្មានមនុស្សបើកនៅលើភពព្រះចន្ទ ត្រូវបានមហាយក្សចិនធ្វើបេសកកម្មបញ្ចប់ដោយជោគជ័យចំនួន៣លើកមកហើយ ប៉ុន្តែសម្រាប់ការបញ្ជូនមនុស្សទៅទីនោះនៅមិនទាន់បានធ្វើនោះឡើយ។

ទីភ្នាក់ងារអវកាសចិន China Manned Space Agency (CMSA) បានបញ្ជាក់ថា គម្រោងខាងលើកំពុងស្ថិតនៅក្នុងដំណើរការ ហើយនឹងសម្រេចបានមុនចុងឆ្នាំ២០៣០ខាងមុខ។ គម្រោងនេះ នឹងបញ្ជូនអវកាសយានិក ២នាក់ឲ្យទៅលើភពព្រះចន្ទរយៈពេល ៦ម៉ោង មុនវិលត្រឡប់ចូលទៅគន្លងព្រះចន្ទវិញ។ នៅលើយាននឹងមានអវកាសយានិក ១រូបផ្សេងទៀត ដែលជាអ្នករ៉ាប់រងបើកយានហោះចូលមកផែនដីវិញ។

លោក Lin Xiqiang អនុប្រធាន CMSA បានឲ្យដឹងថា ផលិតផលសំខាន់ៗនៃកម្មវិធីអភិវឌ្ឍន៍នេះ ត្រូវបានធ្វើរួចរាល់ហើយ ដែលមានដូចជា រ៉ុកកែត Long March 10, យានអវកាសយានិក Mengzhou, យានសម្រាប់ចុះចត Lanyue និងឈុតសម្លៀកបំពាក់អវកាសយានិក។ លោក Lin បានបន្តថា ទីតាំងដែលនឹងត្រូវបាញ់បង្ហោះរ៉ុកកែតនៃបេសកកម្មដ៏ធំនេះ កំពុងស្ថិតក្នុងការសាងសង់ ដែលមានទីតាំងនៅក្បែរកន្លែងបាញ់បង្ហោះអវកាសរាល់ដង ក្នុងកោះ Wenchang Hainan ប្រមាណជាង ២ ២០០គីឡូម៉ែត្រពីក្រុងប៉េកាំង។

បើនិយាយពីមហិច្ឆតាបន្ត ប្រទេសចិនក៏គ្រោងនឹងសង់ស្ថានីយស្រាវជ្រាវអន្តរជាតិអចិន្ត្រៃយ៍ផងដែរនៅលើប៉ូលខាងត្បូងនៃភពព្រះចន្ទ ឲ្យបានត្រឹមឆ្នាំ២០៤០ខាងមុខ។

សូមបញ្ជាក់ថា ទាំងចិន ទាំងអាមេរិក កំពុងនាំគ្នាស្វះស្វែងរកមើលប្រភពទឹកនៅលើភពព្រះចន្ទ ដែលអាចប្រែក្លាយវាទៅជាចំហេះថាមពល សម្រាប់ប្រើបញ្ឆេះរ៉ុកកែត។ បើបានសម្រេចមែននោះ រ៉ុកកែតនឹងអាចបង្ហោះបន្តចេញពីព្រះចន្ទផ្ទាល់តែម្ដងទៅលំហ កាន់តែបានជ្រៅថែមទៀត។ ការបាញ់រ៉ុកកែតចេញពីព្រះចន្ទទៅលំហ មានសភាពងាយស្រួយជាងការបាញ់ចេញពីផែនដី ក៏ព្រោះតែភាពអំណោយផលនៃទំនាញខ្សោយនៅលើភពព្រះចន្ទ៕

ដោយ៖ ឈាង

The post ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង appeared first on Kampuchea Thmey Daily.

មកស្គាល់អវកាសយានិកស្ត្រី ចិន ដំបូងគេ ជាគំរូដល់យុវជនជំនាន់ក្រោយ

Mean Ratana — Thu, 07 Mar 2024 08:11:37 +0000

អវកាសយានិកស្រ្តីជនជាតិចិនដំបូងគេដែលជាគំរូដល់យុវជនជំនាន់ក្រោយៗ បន្ទាប់ពីបំពេញបេសកកម្មលើលំហអាកាសបានយ៉ាងជោគជ័យនាពេលកន្លងទៅ, ថ្មីៗនេះលោកស្រីនៅតែបន្តបេ្តជ្ញាបេសកកម្មស្រាវជ្រាវលើលំហថ្មីៗបន្ថែមទៀត ។ នេះបើតាមការចុះផ្សាយរបស់សារព័ត៌មានចិន CGTN ។

ប្រភពព័ត៌មានដដែលបានឲ្យដឹងថា អវកាសយានិកស្រ្តីចិនដំបូងគេបង្អស់ គឺលោកស្រី Liu Yang ថែមទាំងបានប្តេជ្ញាពង្រីកបន្ថែមនូវគុណភាពអភិវឌ្ឍលើការពិសោធក្នុងលំហរបស់ជាតិចិន ពោលគឺក្នុងទិសដៅស្រាវជ្រាវរុករកអ្វីថ្មីៗបន្ថែមទៀត ។

ក្រោយពេលបំពេញបេសកកម្មជោគជ័យលើកទី ២ លើលំហកាលពីឆ្នាំ ២០២២ និងក្នុងរយៈ ៦ ខែនៅលើគន្លងអវកាស លោកស្រី Liu បានបន្តកិច្ចសហប្រតិបត្តិការជាប់ជាមួយអ្នកស្រាវជ្រាវវិទ្យាសាស្រ្តជាច្រើន ក្នុងនោះមានការចែករំលែកនូវបទពិសោធរបស់អ្នកស្រីដើម្បីពង្រីកវិសាលភាព និងសម្រួចកិច្ចស្រាវជ្រាវក្នុងវិស័យនេះផងដែរ ។

ក្នុងនាមជាអនុប្រធានសម័យប្រជុំលើកទី ១៤ នៃសភាប្រជាជនចិន (NPC) ផងដែរនោះ លោកស្រី Liu ក៏គ្រោងនឹងគាំទ្រ និងជួយជាបទពិសោធដល់គម្រោងពិសោធនានាក្នុងឆ្នាំ ២០២៤ នេះទៅដល់អ្នកដែលចូលចិត្តវិស័យស្រាវជ្រាវលំហអវកាសដែលក្នុងនោះលោកស្រីនឹងគាំទ្រដល់ការចូលរួមប្រកួតចម្រាញ់យកអ្នកមានទេពកោសល្យផ្សេងៗនៅលើវិស័យលំហអវកាសនេះ ។

គួររំឭកផងដែរថា លោកស្រី Liu Yang ជាអវកាសយានិកស្រ្តីចិនដំបូងគេដែលបំពេញបេសកកម្មនៅលើអវកាស ដែលពេលនោះលោកស្រីជាក្រុមការងារនៃបេសកកម្មលំហអវកាសចិន Shenzhou 9 ចាប់ផ្តើមការងារកាលពីថ្ងៃទី១៦ ខែមិថុនា ឆ្នាំ២០១២ ៕

ដោយ៖ មាន រតនា

The post មកស្គាល់អវកាសយានិកស្ត្រី ចិន ដំបូងគេ ជាគំរូដល់យុវជនជំនាន់ក្រោយ appeared first on Kampuchea Thmey Daily.

ស្ថានីយ៍អវកាសអន្តរជាតិបញ្ជូនទាំងអ្នកជំនាញ អាមេរិក និងរុស្ស៊ី ទៅទីលំហ

Mean Ratana — Mon, 04 Mar 2024 09:31:14 +0000

ស្ថានីយ៍អវកាសអន្តរជាតិ (ISS) ថ្មីៗនេះបានបាញ់បញ្ជូនយានកាំជ្រួច Space X មួយគ្រឿងដែលផ្ទុកអវកាសយានិក ៤ នាក់ រួមមានសញ្ជាតិអាមេរិក ៣ នាក់ និងរុស្ស៊ីម្នាក់ចេញពីមជ្ឈមណ្ឌលលំហអវកាស Kennedy រដ្ឋ Florida សហរដ្ឋអាមេរិកឆ្ពោះទៅកាន់ទីតាំងស្ថានីយ៍របស់ ISS ដែលស្ថិតក្នុងគន្លងទីលំហ ។

ប្រភពព័ត៌មានពី BBC បានឲ្យដឹងថា អវកាសយានិកទាំង ៤ រូបនឹងបំពេញបេសកកម្មរបស់ខ្លួនលើលំហរយៈពេល ៦ ខែ ហើយក្នុងកិច្ចការស្រាវជា្រវពិសោធលើលំហអវកាសនេះ គឺមិនមានជាប់ពាក់ព័ន្ធនឹងនិន្នាការនយោបាយនោះឡើយ ពោលគឺទាំងអាមេរិក និងរុស្ស៊ីសហការគ្នាយ៉ាងជិតស្និទ្ធក្នុងកិច្ចការរួម ។

សម្រាប់អ្នកអវកាសទាំង ៤ រូបបានហោះចេញពីផែនដីនាវេលាម៉ោង ១០ និង ៥៣ នាទីព្រឹកថ្ងៃចន្ទដោយជោគជ័យនៅលើកទី ២ ពោលគឺនៅក្រោយពីការបាញ់បង្ហោះយាននៅលើកទីមួយ មិនអាចដំណើរការបាន ដោយសារខ្យល់បក់ខ្លាំង ។

អ្នកអវកាសទាំង ៤ នាក់រួមមានលោក Matthew Dominick ជាប្រធានក្រុមដឹកនាំបេសកកម្ម ជាមួយអវកាសយានិកអាមេរិក ២ រូបទៀតគឺ Michael Barratt ជាវេជ្ជបណ្ឌិតប្រចាំការព្យាបាល និង Jeanette Epps ក៏ដូចជាអ្នកអវកាសរុស្ស៊ី Alexander Grebenkin ។ សម្រាប់អវកាសយានិកទាំង ៣ រូប គឺជាបទពិសោធលើកទី ១ ហើយទៅទីអវកាស លើកលែងតែលោក Michael Barratt ជាវេជ្ជបណ្ឌិត ជាបទពិសោធលើកទី ៣ របស់លោកទៅទីលំហ ។

ដោយឡែកសម្រាប់បេសកកម្មខាងលើនេះ អ្នកអវកាសទាំង ៤ នឹងបំពេញការងារស្រាវជ្រាវពិសោធរួមមាន ការបណ្តុះកោសិកាចម្លងសប្បនិម្មិតរបស់មនុស្សដើម្បីសិក្សាពីជំងឺ ឬភាពប្រក្រតីណាមួយនៃរាងកាយដែលមិនដំណើរការនៅក្នុងបរិស្ថានដែលមានទំនាញផែនដីតិចតួច ។

គួររំឭកដែរថា ស្ថានីយ៍អវកាសអន្តរជាតិ ISS ជាស្ថានីយ៍ទីតាំងលើលំហដែលជាកិច្ចសហប្រត្តិការរួមជាអន្តរជាតិនៃរដ្ឋាភិបាលប្រទេសធំៗនៅលើពិភពលោក ។ ស្ថានីយ៍អន្តរជាតិនេះគ្រប់គ្រង និងថែរក្សាដោយទីភ្នាក់ងារអវកាសនៃបណ្តាប្រទេសរួមមានសហរដ្ឋអាមេរិក រុស្ស៊ី ជប៉ុន កាណាដា និងបណ្តាប្រទេសអឺរ៉ុបមួយចំនួនផងដែរ ៕

ដោយ៖ មាន រតនា

The post ស្ថានីយ៍អវកាសអន្តរជាតិបញ្ជូនទាំងអ្នកជំនាញ អាមេរិក និងរុស្ស៊ី ទៅទីលំហ appeared first on Kampuchea Thmey Daily.

អវកាសយានិក ចិន ផ្ញើសារអបអរ និងជូនពរឆ្នាំថ្មីដល់ជនរួមជាតិពីទីលំហ

Mean Ratana — Fri, 09 Feb 2024 08:05:56 +0000

អ្នកអវកាសចិន ដែលជាក្រុមការងារហោះទៅទីលំហអវកាសនៃបេសកកម្ម Shenzhou-17 បានផ្ញើសារជូនពរឆ្នាំថ្មី ឆ្នាំរោងនៃប្រពៃណីជាតិចិនតាមរយៈវីដេអូនៅព្រឹកថ្ងៃសុក្រទី០៩ ខែកុម្ភៈ ឆ្នាំ២០២៤នេះ ទៅជនរួមជាតិរបស់ខ្លួន ។ នេះបើតាមទីភ្នាក់ងារសារព័ត៌មានចិនស៊ីនហួរ ។

អ្នកអវកាសយានិកចិនទាំងបីនាក់រួមមាន លោក Tang Hongbo លោក Tang Shengje និងលោក Jiang Xinlin ដែលកំពុងស្ថិតនៅស្ថានីយលំហអវកាសចិន បានផ្ញើសារជូនពរនូវសុខសិរីសួស្តីដល់ជាតិមាតុភូមិ ក៏ដូចជាប្រជាជនចិនទាំងអស់។ “ពួកយើងពិតជារីករាយ និងអបអរសាទរឆ្នាំថ្មីនេះ នៅលើលំហអវកាស”។ នេះបើតាមសម្តីរបស់លោក Tang Hongbo ជាមេបញ្ជាការក្នុងស្ថានីយលំហអវកាស។

ដោយឡែក លោក Tang Shengjie ជាអ្នកទើបនឹងមកលំហអវកាសលើកទី១ បាននិយាយថា លោកពិតជានឹកគ្រួសារ នឹកមាតុភូមិកំណើតរបស់លោក។ វាជាបទពិសោធពិសេសមួយក្នុងជីវិត សម្រាប់ខ្ញុំដែលអបអរឆ្នាំថ្មីនេះ នៅក្នុងលំហអវកាស និងជាលើកដំបូងបំផុត។

ដោយឡែក លោក Jiang បានជូនពរឲ្យមាតុភូមិប្រទេសចិនរបស់ខ្លួន ឲ្យមានភាពរីកចម្រើន និងសុខវិបុលភាព និងទៅដល់គ្រប់ប្រជាពលរដ្ឋចិន មិនថាជនជាតិភាគតិច ឲ្យបាននូវសំណាងល្អ និងសុខភាពល្អ។

គួររំឭកដែរថា ក្រុមការងារនៃបេសកកម្មលំហអវកាស Shenzhou-17 ចិន បានចេញដំណើររបស់ខ្លួនកាលពីថ្ងៃទី២៦ ខែតុលា ឆ្នាំ២០២៣កន្លងទៅ ដោយបានបញ្ជូនអវកាសយានិក៣រូបខាងលើ ទៅកាន់ទីស្ថានីយលំហអវកាសចិន។ ក្រុមខាងលើ ជាក្រុមការងារបទពិសោធថ្មីជាងគេ ឬក្មេងខ្ចីជាងគេ ដែលបានបញ្ជូនទៅទីលំហអវកាស គិតចាប់ពីទីស្ថានីយលំហអវកាសចិនបានបង្កើតឡើង៕

https://vodpub6.v.news.cn/yqfbzx-original/20240209/202402094ddfcbe3b4e64a76b3fd37f61b3aa227_XxjfyxE007023_20240209_CBVFN0A001.mp4

ដោយ៖ មាន រតនា

The post អវកាសយានិក ចិន ផ្ញើសារអបអរ និងជូនពរឆ្នាំថ្មីដល់ជនរួមជាតិពីទីលំហ appeared first on Kampuchea Thmey Daily.

អវកាសយានិក Archives - Kampuchea Thmey Daily

​អវកាសយានិក​ស្រ្តី​​ដំបូង​ រួមដំណើរ​ទៅ​​​ឋាន​ព្រះ​ចន្ទ​ បន្ទាប់​ពី​ជាង​៥០ឆ្នាំ​

អវកាសយានិក​អាមេរិក​២​រូប ដែល​ជាប់​ខ្លួន​ក្នុង​លំហ បោះឆ្នោត​យ៉ាង​ដូចម្ដេច?

ចិន ជោគជ័យបញ្ជូនអវកាសយានិកក្មេងបំផុតទៅ ស្ថានីយអវកាស

អវកាសយានិក​រុស្ស៊ី ក្លាយ​ជា​មនុស្ស​ដំបូង​គេ​រស់នៅ​​ក្នុង​លំហ​បាន ១០០០​ថ្ងៃ

ចិន​កំណត់​ពេល​ដាក់​មនុស្ស​ឲ្យ​ជាន់​ដី​ឋាន​ព្រះ​ចន្ទ​ជា​លើក​ដំបូង

មកស្គាល់អវកាសយានិកស្ត្រី ចិន ដំបូងគេ ជាគំរូដល់យុវជនជំនាន់ក្រោយ

ស្ថានីយ៍អវកាសអន្តរជាតិបញ្ជូនទាំងអ្នកជំនាញ អាមេរិក និងរុស្ស៊ី ទៅទីលំហ

អវកាសយានិក ចិន ផ្ញើសារអបអរ និងជូនពរឆ្នាំថ្មីដល់ជនរួមជាតិពីទីលំហ

អវកាសយានិកស្រ្តីដំបូង រួមដំណើរទៅឋានព្រះចន្ទ បន្ទាប់ពីជាង៥០ឆ្នាំ

អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច?

អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង