អាជីវករ Archives - Kampuchea Thmey Daily

អាជីវករមានជម្រើស ២ អាចទៅលក់ដូរនៅផ្សារដើមគថ្មី ឬ ផ្សារតាម៉ាប់ព្រែកជ្រៃ តែហាមដាច់ខាតមិនឲ្យលក់លើដងផ្លូវ និងចិញ្ចើមផ្លូវសាធារណៈ

អ៊ិន ពិសី — Tue, 20 Jan 2026 07:27:37 +0000

តបតាមសំណូមពររបស់អាជីវករដែលបានមកជួបសំណេះសំណាលជាមួយ លោក ឃួង ស្រេង អភិបាល នៃគណៈអភិបាលរាជធានីភ្នំពេញ កាលពីម្សិលមិញ នៅព្រឹកថ្ងៃទី ២០ ខែមករា ឆ្នាំ ២០២៦ នេះ លោកអភិបាល ក៏បានដឹកនាំក្រុមការងារ ចុះពិនិត្យ និងធ្វើការសម្របសម្រួលបន្ថែមជាមួយម្ចាស់ផ្សារឯកជនមួយមានឈ្មោះថា “ផ្សារតាម៉ាប់ព្រែកជ្រៃ” ស្ថិតនៅតាមបណ្ដោយផ្លូវ ២១៧ ភូមិព្រែកកំពិស សង្កាត់ព្រែកកំពិស ខណ្ឌដង្កោ រាជធានីភ្នំពេញ ដើម្បីដោះស្រាយកង្វល់មួយចំនួនរបស់អាជីវករដែលចង់ផ្លាស់ប្ដូរ ពីការលក់គ្មានសណ្ដាប់ធ្នាប់នៅលើដងផ្លូវ និងចិញ្ចើមផ្លូវសាធារណៈជុំវិញតំបន់ផ្សារដើមគ ទៅលក់ដូរនៅទីតាំង នោះវិញ។

ក្នុងឱកាសចុះពិនិត្យផ្ទាល់នៅទីតាំងជាក់ស្តែងនេះ លោកអភិបាលរាជធានីភ្នំពេញ បានពិភាក្សាដោយមនោសញ្ចេតនា ខ្មែរជួយខ្មែរ ខ្មែរស្រលាញ់ខ្មែរ ជាមួយម្ចាស់ផ្សារ និងទទួលបានការឯកភាពតាមលក្ខខណ្ឌមួយចំនួន។ ជាមួយគ្នានេះ លោកអភិបាល បានផ្តល់ការធានាអះអាងក្នុងការជួយរៀបចំ កែលម្អហេដ្ឋារចនាសម្ព័ន្ធ ចាំបាច់មួយចំនួននៅជុំវិញផ្សារតាម៉ាប់ព្រែកជ្រៃ រួមមាន ៖ ១.ធ្វើការជួសជុលផ្លូវ និងបំពាក់បន្ថែមអំពូលភ្លើងបំភ្លឺសាធារណៈតាមដងផ្លូវ ២១៧។ ២.សហការជាមួយម្ចាស់ផ្សារដំឡើងអំពូលភ្លើងតាមច្រកផ្លូវក្នុងបរិវេណផ្សារ។ ៣.ជួយសិក្សាគម្រោងបង្ហូរទឹកកខ្វក់ និងតម្រូវឲ្យម្ចាស់ផ្សាររៀបចំប្រព័ន្ធលូឲ្យបានត្រឹមត្រូវ។ ៤.ផ្តល់ការអនុគ្រោះលើកលែងថ្លៃចាក់សំរាមនៅទីលានរយៈពេល ១ ឆ្នាំ ដោយម្ចាស់ផ្សារ ត្រូវធានាមិនយកកម្រៃអនាម័យពីអ្នកលក់ដូរ។ ដូច្នេះ សូមអាជីវករមេត្តាស្ងប់ចិត្ត និងទទួលយកនូវជម្រើសសមរម្យណាមួយដែលអាជ្ញាធរបានព្យាយាមសម្របសម្រួលជូន ហើយអាជីវករអាចមានជម្រើសទៅលក់ដូរនៅទីតាំងផ្សារដើមគថ្មី ឬ ផ្សារតាម៉ាប់ព្រែកជ្រៃ ក៏បាន ប៉ុន្តែហាមដាច់ខាតមិនត្រូវលក់នៅលើដងផ្លូវ និងចិញ្ចើមផ្លូវសាធារណៈឡើយ។

លោក ឃួង ស្រេង លើកឡើងថា «សម្រាប់អាជ្ញាធរដែនដីដែលជាអាណាព្យាបាលប្រជាពលរដ្ឋ ធ្វើអ្វីៗ គឺ ដើម្បីបម្រើផលប្រយោជន៍ប្រជាពលរដ្ឋ បើប្រជាពលរដ្ឋចង់មកទីតាំងថ្មីខាងលើនេះ រដ្ឋបាលរាជធានីភ្នំពេញ គាំទ្រភ្លាម ជាមួយនឹងការបង្កលក្ខណៈងាយស្រួលគ្រប់យ៉ាងជូនបងប្អូន។ អ្វីដែលអាជ្ញាធររាជធានីភ្នំពេញ ចង់បាន គឺអាជីវករទាំងអស់បញ្ឈប់ការលក់ដូរលើដងផ្លូវ និងចិញ្ចើមផ្លូវសាធារណៈតំបន់ជុំវិញផ្សារដើមគ ដែលធ្វើឲ្យបាត់បង់សណ្ដាប់ធ្នាប់ និងកកស្ទះចរាចរណ៍ បង្កការថ្នាំងថ្នាក់ដល់ប្រជាពលរដ្ឋ ១៧ លាននាក់»។

លោក ឃួង ស្រេង បានបញ្ជាក់ថា ដើម្បីបង្កភាពងាយស្រួលដល់អាជីវករ អាជ្ញាធររាជធានីភ្នំពេញ នឹងដាក់ភ្លើងបំភ្លឺសាធារណៈថ្មី ចាប់ពីព្រំប្រទល់ខេត្តកណ្តាល រហូតមកដល់ក្នុងផ្សារតាម៉ាប់ព្រែកជ្រៃ បើកសួនពុះចែកទ្រូងផ្លូវ ២១៧ ឲ្យបានធំទូលាយ ជំរុញឲ្យប្រធានផ្សារចាក់បេតុង ដាក់ថ្មម៉ិចក្នុងផ្សារនិងការមិនយកថ្លៃសំរាម ១ ឆ្នាំ ថែមទៀត។

បើតាមការបញ្ជាក់ពីលោកប្រធានផ្សារតាម៉ាប់ព្រែកជ្រៃ បានឲ្យដឹងថា ផ្សារតាម៉ាប់ព្រែកជ្រៃ មានផ្ទៃដីជិត ១០ ហិតា មានស្តង់អាជីវកម្មបន្លែ ផ្លែឈើ និងត្រីសាច់រាប់ពាន់ស្តង់ ដែលអាចឲ្យអាជីវករលក់ដូរលើដងផ្លូវ និងចិញ្ចើមផ្លូវសាធារណៈតំបន់ជុំវិញផ្សារដើមគ ប្រមាណ ៩៨% មកលក់ទីនេះបាន ជាមួយនឹងការរៀបចំចំណតនៅសងខាងផ្សារធំៗ ចំនួន ២ កន្លែង។

ប្រធានផ្សារ បញ្ជាក់ថា ចំពោះអាជីវករលក់ជាកញ្ច្រែង ល្អី ពួកគាត់ក៏អាចមកលក់បាន ដោយមិនត្រូវបង់ថ្លៃនោះទេ។

ចំណែក អាជីវករ វិញ ក៏បានសម្តែងនូវក្តីរីករាយ និងកក់ក្តៅយ៉ាងខ្លាំង ដែលទទួលបានការគាំទ្រយ៉ាងពេញទំហឹងពីអាជ្ញាធររាជធានី នៅពេលដែលពួកគាត់សម្រេចចិត្តមកលក់ដូរនៅផ្សារថ្មីនេះ៕

អត្ថបទ ៖ ស្រីរ័ត្ន

The post អាជីវករមានជម្រើស ២ អាចទៅលក់ដូរនៅផ្សារដើមគថ្មី ឬ ផ្សារតាម៉ាប់ព្រែកជ្រៃ តែហាមដាច់ខាតមិនឲ្យលក់លើដងផ្លូវ និងចិញ្ចើមផ្លូវសាធារណៈ appeared first on Kampuchea Thmey Daily.

អ្នកលក់ដូរតាមចិញ្ចើមផ្លូវ ទ្រូងផ្លូវ នៅតំបន់ជុំវិញផ្សារដើមគ ដែលត្រូវទៅលក់ដូរនៅផ្សារដើមគថ្មី នឹងទទួលបានលក្ខខណ្ឌអនុគ្រោះជាច្រើន

អ៊ិន ពិសី — Mon, 19 Jan 2026 02:51:29 +0000

ប្រជាពលរដ្ឋលក់ដូរតាមចិញ្ចើមផ្លូវ និងទ្រូងផ្លូវ នៅតំបន់ជុំវិញផ្សារដើមគរ ដែលត្រូវទៅលក់ដូរនៅផ្សារដើមគថ្មី នឹងទទួលបានលក្ខខណ្ឌអនុគ្រោះជាច្រើនដូចជា ការអនុគ្រោះថ្លៃឈ្នួលតូបរយៈពេល ២ ឆ្នាំ ដំបូង ដោយពុំមានប្រាក់កក់ ពុំគិតថ្លៃទឹកភ្លើងរយៈពេល ៦ ខែ ដំបូង ព្រមទាំងអត្ថប្រយោជន៍ផ្សេងៗ ជាច្រើនទៀត។ ដោយឡែក អាជីវករលក់ដូរក្នុងផ្សារដើមគ នៅបន្តលក់ដូរធម្មតា មិនមានការរុះរើ និងផ្ទេរពីផ្សារដើមគចាស់ ទៅផ្សារដើមគថ្មី នោះទេ។

លោក ឃួង ស្រេង មានប្រសាសន៍ថា អាជីវករលក់ដូរក្នុងផ្សារដើមគ នៅបន្តលក់ដូរធម្មតា មិនមានការរុះរើ និងផ្ទេរពីផ្សារដើមគចាស់ ទៅផ្សារដើមគថ្មី ទេ អ្វីដែលជាគោលការណ៍របស់រដ្ឋបាលរាជធានីភ្នំពេញ គឺធ្វើទៅលើតែអាជីវករលក់ដូរឥតសណ្ដាប់ធ្នាប់លើចិញ្ចើមផ្លូវ និងទ្រូងផ្លូវប៉ុណ្ណោះ។

លោក ឃួង ស្រេង អភិបាលរាជធានីភ្នំពេញ ថ្លែងបែបនេះ ខណៈអញ្ជើញដឹកនាំក្រុមការងាររដ្ឋបាលរាជធានីភ្នំពេញ ចុះពិនិត្យសកម្មភាពអនុវត្តគម្រោងរៀបចំកែលម្អចិញ្ចើមផ្លូវតាមបណ្ដោយមហាវិថីម៉ៅសេទុង មហាវិថីព្រះមុន្នីរ៉េត ផ្លូវ ២៣០ និងតំបន់ជុំវិញពាក់ព័ន្ធ ដើម្បីកែលម្អហេដ្ឋារចនាសម្ព័ន្ធជុំវិញនោះ សម្រាប់បម្រើប្រយោជន៍សាធារណៈជារួម កាលពីរសៀលថ្ងៃទី ១៨ ខែមករា ឆ្នាំ ២០២៦។

ក្នុងខណៈនោះដែរ លោកអភិបាលរាជធានីភ្នំពេញ ថែមទាំងបានគូសបញ្ជាក់ទៀតថា សម្រាប់អ្នកលក់ដូរនៅក្នុងផ្សារដើមគ កុំព្រួយបារម្ភ នៅបន្តការលក់ដូររបស់ខ្លួនដដែលចុះ អាជ្ញាធររៀបចំសណ្តាប់ធ្នាប់ចំពោះតែអ្នកលក់ដូរតាមចិញ្ចើមផ្លូវ និងទ្រូងផ្លូវ នៅជុំវិញផ្សារដើមគ តែប៉ុណ្ណោះ។

ទន្ទឹមនឹងនេះ ក្រុមការងាររដ្ឋបាលរាជធានីភ្នំពេញ និងកងកម្លាំងគ្រប់ប្រភេទ នឹងបន្តសម្របសម្រួលជាមួយអាជីវករដែលបានលក់ដូរនៅតាមចិញ្ចើមផ្លូវ និងទ្រូងផ្លូវ នៅតំបន់ជុំវិញផ្សារដើមគ ឲ្យទៅ លក់ដូរនៅផ្សារដើមគថ្មី ដោយទទួលបានលក្ខខណ្ឌអនុគ្រោះជាច្រើនរួមមាន ការអនុគ្រោះថ្លៃឈ្នួលតូបរយៈពេល ២ ឆ្នាំ ដំបូង ដោយពុំមានប្រាក់កក់ ពុំគិតថ្លៃទឹកភ្លើងរយៈពេល ៦ ខែ ដំបូង ព្រមទាំងអត្ថប្រយោជន៍ផ្សេងៗ ជាច្រើនទៀត។

កាលពីព្រឹកថ្ងៃទី ១៨ ខែមករា ឆ្នាំ ២០២៦ អាជ្ញាធររាជធានីភ្នំពេញ បានដំណើរការ ការសំអាតអនាម័យ ជួសជុល និងកែលម្អហេដ្ឋារចនាសម្ព័ន្ធនៅលើផ្លូវពាក់ព័ន្ធនានា ជុំវិញផ្សារដើមគ ដោយដំណើរការនេះ ត្រូវបានហាមដាច់ខាត មិនឲ្យអាជីវករដែលធ្លាប់លក់ដូរតាមចិញ្ចើមផ្លូវ ជាពិសេសលើផ្លូវ ជុំវិញផ្សារដើមគ វិលត្រឡប់មកបន្តលក់ដូរយ៉ាងអនាធិបតេយ្យដូចដែលធ្លាប់លក់ដូរពីមុនទៀតឡើយ។ នេះជាការបញ្ជាក់របស់លោកស្រី ដោ សម្ផស្ស នាយិការង និងជាអ្នកនាំពាក្យរដ្ឋបាលរាជធានីភ្នំពេញ កាលពីព្រឹកទី ១៨ មករា ម្សិលមិញ។

អ្វីដែលអាជ្ញាធរកំពុងតែអនុវត្តជុំវិញការរៀបចំសណ្តាប់ធ្នាប់ និងស្តារឡើងវិញ នូវសោភ័ណភាពជុំវិញផ្សារដើមគ នាពេលនេះ បាននិងកំពុងទទួលបានការសាទរយ៉ាងច្រើនលើសលប់ពីសំណាក់ប្រជាពលរដ្ឋក្នុងតំបន់ ក៏ដូចជានៅទូទាំងរាជធានីភ្នំពេញ។

ជាមួយគ្នានេះ លោកស្រី ដោ សម្ផស្ស បានអំពាវនាវដោយទទូច ឲ្យអាជីវករមួយចំនួនតូចលក់ដូរតាមចិញ្ចើមផ្លូវ និងលើផ្លូវជុំវិញផ្សារដើមគ ដែលនៅមិនទាន់ទទួលយកនូវការសម្របសម្រួលរបស់អាជ្ញាធររាជធានីភ្នំពេញ សម្រេចមកទទួលយកតាមអ្វីដែលបានព្រមព្រៀងគ្នាទៅ ដើម្បីចូលរួមក្នុងការរៀបចំសណ្តាប់ធ្នាប់ និងរបៀបរៀបរយ ក៏ដូចជាការកែលម្អសោភ័ណភាពទីក្រុង ស្របទៅនឹងអ្វីដែលរាជធានីភ្នំពេញ ទទួលបានចំណាត់ថ្នាក់ ជាទីក្រុងគោលដៅទេសចរណ៍ល្អបំផុត ក្នុងចំណោមទីក្រុងធំៗ ទាំង ២០ ជុំវិញពិភពលោក សម្រាប់ឆ្នាំ ២០២៦ នេះ។ ក្នុងការចាប់ផ្ដើមការសំអាតអនាម័យ ជួសជុល និងកែលម្អហេដ្ឋារចនាសម្ព័ន្ធ នៅលើផ្លូវពាក់ព័ន្ធនានា ជុំវិញផ្សារដើមគ នេះ នាព្រឹកនេះ ដោយមានការចូលរួមពីលោកអភិបាលរងរាជធានីភ្នំពេញជាច្រើនរូប រួមជាមួយលោកនាយករដ្ឋបាល និងលោក លោកស្រីជានាយករងរដ្ឋបាលរាជធានីភ្នំពេញ , លោកអភិបាលខណ្ឌទួលគោក អភិបាលខណ្ឌបឹងកេងកង ផងដែរ។

សូមបញ្ជាក់ថា រដ្ឋបាលរាជធានីភ្នំពេញ នឹងមិនអនុញ្ញាតឲ្យមានការលក់ដូរគ្មានសណ្ដាប់ធ្នាប់នៅលើដងផ្លូវ ចិញ្ចើមផ្លូវ នៅតំបន់ជុំវិញផ្សារដើមគ ទៀតទេ ចាប់ពីថ្ងៃទី ១៨ ខែមករា ឆ្នាំ ២០២៦ តទៅ៕

អត្ថបទ ៖ ស្រីរ័ត្ន

The post អ្នកលក់ដូរតាមចិញ្ចើមផ្លូវ ទ្រូងផ្លូវ នៅតំបន់ជុំវិញផ្សារដើមគ ដែលត្រូវទៅលក់ដូរនៅផ្សារដើមគថ្មី នឹងទទួលបានលក្ខខណ្ឌអនុគ្រោះជាច្រើន appeared first on Kampuchea Thmey Daily.

ឃាត់ខ្លួនសន្តិសុខរោងចក្រម្នាក់ ពាក់ព័ន្ធករណីយកលុយដាក់ខែពីអាជីវករលក់ដូរតាមដងផ្លូវ

Sokhom Khon — Mon, 03 Feb 2025 07:31:22 +0000

កម្លាំងអាជ្ញាធរខណ្ឌពោធិ៍សែនជ័យ នៅព្រឹកថ្ងៃទី៣ ខែកុម្ភៈ ឆ្នាំ២០២៥ បានឃាត់ខ្លួនបុរសជាសន្តិសុខម្នាក់ដែលបានដេីរយកលុយដាក់ខែពីអាជីវករលក់ដូរតាមតូបនៅចំណុចមុខរោងចក្រអាមេរិកកាំង តាមផ្លូវ៣០ម៉ែត្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ និងចាត់ការតាមនីតិវិធី។ ការឃាត់ខ្លួននេះ ធ្វើឡើងបន្ទាប់ពីអាជ្ញាធរទទួលបានព័ត៌មានពីស្ត្រីអាជីវករម្នាក់ដែលលើកឡើងថា មានបុរសម្នាក់ដើរយកលុយដាក់ខែក្នុងមួយតូប៥០ម៉ឺនរៀល ជាថ្នូរនឹងការបានលក់ដូរនៅទីនោះ។

បុរសសន្តិសុខដែលត្រូវកម្លាំងអាជ្ញាធរឃាត់ខ្លួនមានឈ្មោះ ផល ភេទប្រុស អាយុប្រហែល៤០ឆ្នាំ មុខរបរជាសន្តិសុខរោងចក្រ អាមេរិកកាំង ផ្លូវ៣០ម៉ែត្រ ភូមិទួលពង្រ សង្កត់ចោមចៅទី១ ខណ្ឌពោធិ៍សែនជ័យ។

លោក ប៉ាង លីដា អភិបាលរងខណ្ឌពោធិ៍សែនជ័យ បានឲ្យដឹងថា ក្រោយពីទទួលព័ត៌មាននេះ នៅព្រឹកថ្ងៃទី៣ ខែកុម្ភៈ លោកបានដឹកនាំកម្លាំងចុះដល់ទីតាំង និងបានទំនាក់ទំនងទៅបុរសខាងលេីសួរនាំជំវិញបញ្ហានេះ។ នៅចំពោះមុខអាជ្ញាធរ បុរសខាងលេីបានសារភាពថា រូបគាត់ពិតជាបានដេីរយកលុយពីក្រុមអាជីវករពិតប្រាកដមែន។

ក្រោយពីសួរនាំ បុរសខាងលេីត្រូវបានកម្លាំងអាជ្ញាធរបញ្ជូនខ្លួនទៅអធិការដ្ឋាននគរបាលខណ្ឌពោធិ៍សែនជ័យ ដេីម្បីចាក់ការតាមនីតិវិធី៕

អត្ថបទ៖ សុខា

The post ឃាត់ខ្លួនសន្តិសុខរោងចក្រម្នាក់ ពាក់ព័ន្ធករណីយកលុយដាក់ខែពីអាជីវករលក់ដូរតាមដងផ្លូវ appeared first on Kampuchea Thmey Daily.

អាជីវករលក់ផ្កាគ្រប់ប្រភេទសម្រាប់ពិធីបុណ្យចូលឆ្នាំចិនឆ្នាំនេះ ថា «លក់ដាច់ជាងឆ្នាំមុន»

អ៊ិន ពិសី — Sat, 25 Jan 2025 05:21:21 +0000

ជនជាតិចិន និងកូនខ្មែរកាត់សែស្រឡាយចិន-វៀតណាម មានភាពមមាញឹករៀបចំផ្ទះសម្បែង សម្រាប់ពិធីបុណ្យចូលឆ្នាំរបស់ខ្លួន ដោយឡែក ដើមផ្កាគ្រប់ប្រភេទ ដើមក្រូច និងដើមផ្កាអង្គាសីល ជាគ្រឿងតាំងលម្អមិនអាចខ្វះបាននោះ បានក្លាយជាទីផ្សារលក់រាយសំខាន់សម្រាប់ពិធីបុណ្យប្រពៃណីនេះ។

អ្នកស្រី អ៊ាវ ចិន្តា ជាអាជីវករលក់ផ្កានៅសង្កាត់ទឹកថ្លា បានប្រាប់ កម្ពុជាថ្មី ថា អ្នកស្រីមានលក់ដុំ និងលក់រាយដើមផ្កាគ្រប់ប្រភេទមានដូចជា ដើមផ្កាអង្គាសីល ដើមក្រូច ផ្កាស្បៃរឿង និងផ្កាគ្រប់ប្រភេទផ្សេងៗ ទៀត មានការលក់ដាច់ស្មើៗ គ្នា ពុំដូចឆ្នាំមុនដែលគេល្បីឆុងផ្កាលឿងនោះទេ។

អាជីវកររូបនេះ បានបន្តថា ផ្កាគ្រប់ប្រភេទដែលគាត់បានទិញយកមកដាក់លក់ មានអតិថិជនចូលទិញហូរហែ អស់ប្រមាណជា ៧០ ទៅ ៨០ ភាគរយ គឺមិនមានបញ្ហាអ្វីទេ។ ចំពោះផ្កាដែលមានពណ៌លឿង និងពណ៌ក្រហម ដែលពណ៌ទាំងនេះ តែងតែនិយម និងសំខាន់ជាងគេ លក់ដាច់ជាធម្មតា ដោយសារមិនមានពាក្យចចាមអារ៉ាមថាមានការឆុងនឹងពណ៌ក្រហម លឿង ដូចឆ្នាំមុន។

ដោយឡែក អ្នកស្រី ស៊ូ ចរិយា ជាអ្នកលក់ផ្កាគ្រប់ប្រភេទនៅជិតវត្តទឹកថ្លា ក៏បានបញ្ជាក់ដែរថា ក្នុងរដូវនេះ ហាងរបស់អ្នកស្រីអាចលក់ដាច់ជាហូរហែដែរ ទាំងអង្គាសីល និងផ្កាស្បៃរឿង រួមទាំងដើមក្រូចផងដែរ។

អ្នកស្រីបានបន្តថា ម៉ូយដែលធ្លាប់ទិញ គឺនៅតែទិញជាប្រចាំ រីឯម៉ូយថ្មី ក៏បន្តចូលទិញ ហើយឆ្នាំនេះ អតិថិជនក៏មិនរើសប្រកាន់ពណ៌ផ្កាលឿងក្រហមអីដែរ។ សម្រាប់អតិថិជនរបស់គាត់ នៅតែមានជំនឿរឿងពណ៌នេះជាធម្មតា គឺ នៅតែតាមទំនៀមទម្លាប់មកទិញដោយពុំគិតពាក្យចចាមអារ៉ាមអ្វីឡើយ។

គួរជម្រាបថា កំណើនអតិថិជនមានការសម្រុកទិញលើសមុនទ្វេដង ខណៈចូលឆ្នាំចិននេះនៅសល់តែ ៣ ថ្ងៃទៀតតែប៉ុណ្ណោះ។ ចំពោះបុណ្យចូលឆ្នាំចិន-វៀតណាម ឆ្នាំនេះ ចាប់ផ្ដើមនៅថ្ងៃទី ២៨-៣១ ខែមករា ឆ្នាំ ២០២៥ ខាងមុខនេះ៕

អត្ថបទ ៖ សំណាង

The post អាជីវករលក់ផ្កាគ្រប់ប្រភេទសម្រាប់ពិធីបុណ្យចូលឆ្នាំចិនឆ្នាំនេះ ថា «លក់ដាច់ជាងឆ្នាំមុន» appeared first on Kampuchea Thmey Daily.

អាជីវករតាមផ្សាររដ្ឋ ចូលលក់ដូរធម្មតា ខណៈអ្នកទិញក៏អ៊ូអរ ក្រោយចប់បុណ្យភ្ជុំបិណ្ឌ

អ៊ិន ពិសី — Sun, 06 Oct 2024 02:11:17 +0000

ក្រោយចប់ភ្ជុំបិណ្ឌរួច ប្រជាអាជីវករតាមផ្សាររដ្ឋ បានចូលទៅប្រកបអាជីវកម្មលក់ដូរវិញជាធម្មតា ខណៈអ្នកទិញក៏អ៊ូអរផងដែរ។

លោក ទិត្យ វុទ្ធី ប្រធានគណៈកម្មការគ្រប់គ្រងផ្សារដើមគ បានប្រាប់ឱ្យដឹងថា អាជីវករនៅទូទាំងផ្សាររបស់លោកបានចូលមកលក់ដូរ ១០០ ភាគរយ មានទាំងអ្នកលក់ម្ហូបអាហារ បន្លែត្រីសាច់ និងផ្លែឈើ សម្លៀកបំពាក់ ជាដើម។

លោកបន្ថែមថា អាជីវករ និងពលរដ្ឋដែលមកទិញអីវ៉ាន់នៅផ្សារ សុទ្ធតែរីករាយក្នុងការមកលក់ដូរ និងទិញទំនិញ ក្រោមដំបូលសុខសន្តិភាព ដឹកនាំដោយរាជរដ្ឋាភិបាល ដែល សម្តេច បានគិតគូរដល់ប្រជាជន និងសង្គមជាតិ។

អាជីវករអ្នកលក់ដូរនៅផ្សារដើមគ បានសម្ដែងក្ដីរីករាយ ដោយសារលក់ដូរដាច់គួរសម កាលពីព្រឹកថ្ងៃទី ០៥ ខែតុលា ឆ្នាំ ២០២៤ ព្រោះចប់ភ្ជុំរួច មានពលរដ្ឋអ៊ូអរបានមកជាវទំនិញម្ហូបអាហារជាធម្មតាដូចសព្វមួយដង។

សូមបញ្ជាក់ថា មិនមែនតែផ្សារដើមគ មួយនោះទេ នៅតាមបណ្តាផ្សាររដ្ឋ ២៤ ផ្សេងទៀត ក្នុងរាជធានីភ្នំពេញ ក៏មានការលក់ដូរអាជីវកម្មជាធម្មតាវិញហើយផងដែរ៕

អត្ថបទ ៖ សុភា

The post អាជីវករតាមផ្សាររដ្ឋ ចូលលក់ដូរធម្មតា ខណៈអ្នកទិញក៏អ៊ូអរ ក្រោយចប់បុណ្យភ្ជុំបិណ្ឌ appeared first on Kampuchea Thmey Daily.

លោក ឃួង ស្រេង ស្នើអ្នកលក់ដូរគ្មានសណ្តាប់ធ្នាប់នៅផ្សារដើមគរចាស់ មកទទួលយកទីតាំងលក់ដូរថ្មី នៅមហាវិថីឈ្នះ-ឈ្នះ

អុន ស្រីមាន — Sat, 27 Apr 2024 07:18:25 +0000

លោក ឃួង ស្រេង អភិបាល នៃគណៈអភិបាលរាជធានីភ្នំពេញបានអំពាវនាវឱ្យអាជីវករ ដែលកំពុងលក់ដូរគ្មានសណ្តាប់ធ្នាប់តាមដងផ្លូវ ក្នុងតំបន់ជុំវិញផ្សារដើមគរចាស់ និងអាជីវករសេដ្ឋកិច្ចក្រៅប្រព័ន្ធទាំងអស់ក្នុងរាជធានីភ្នំពេញ មេត្តាចូលរួមសហការ និងមកទទួលយកទីតាំងលក់ដូរថ្មី នោះគឺមជ្ឈមណ្ឌលពាណិជ្ជកម្ម អាស៊ាន-អន្តរជាតិ របស់ក្រុមហ៊ុន ចាង វ៉ាង (ខេមបូឌា) រៀល អុីស្ទេត អុិនវេសម៉ិន ឯ.ក ដែលស្ថិតនៅតាមបណ្តោយ មហាវិថីឈ្នះ-ឈ្នះក្នុងខណ្ឌព្រែកព្នៅ រាជធានីភ្នំពេញ។

អាជ្ញាធរបានខិតខំរៀបចំជូនក្នុងមជ្ឈមណ្ឌលពាណិជ្ជកម្មនេះ សមស្របទៅតាមលទ្ធភាព និងទំហំអាជីវកម្មរបស់អាជីវករ ហើយបញ្ឈប់ការលក់ដូរ គ្មានសណ្តាប់ធ្នាប់ ដើម្បីរួមគ្នាកាត់បន្ថយការកកស្ទះចរាចរណ៍ រក្សាសណ្តាប់ធ្នាប់សាធារណៈ សុវត្ថិភាពសង្គម លើកកម្ពស់អនាម័យ បរិស្ថាន និងកែលម្អសោភណភាពទីក្រុងឱ្យកាន់តែស្រស់បំព្រងឡើង។ ការអំពាវនាវនេះបានធ្វើឡើង ខណៈលោក ឃួង ស្រេង និងលោក វ៉ាង វិនធាន ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំនៅកម្ពុជា អញ្ជើញជាអធិបតិភាព ក្នុងពិធី “បើកសម្ពោធ មជ្ឈមណ្ឌលពាណិជ្ជកម្ម អាស៊ាន-អន្តរជាតិ របស់ក្រុមហ៊ុន ចាង វ៉ាង (ខេមបូឌា) រៀល អុីស្ទេត អុិនវេសម៉ិន ឯ.ក” មានទីតាំងស្ថិតនៅតាមបណ្តោយ មហាវិថីឈ្នះ-ឈ្នះ ក្នុងខណ្ឌព្រែកព្នៅ រាជធានីភ្នំពេញកាលពីព្រឹកថ្ងៃទី២៧ ខែមេសា ឆ្នាំ២០២៤។

លោក ឃួង ស្រេង បានលើកឡើងថា រាជរដ្ឋាភិបាលកម្ពុជា បានកំណត់យ៉ាងច្បាស់ថា ផ្នែកឯកជនគឺជាកម្លាំង ចលករនៃការអភិវឌ្ឍ និងជាក្បាលម៉ាស៊ីនជំរុញកំណើនសេដ្ឋកិច្ចជាតិ។ ការសម្ពោធមជ្ឈមណ្ឌលពាណិជ្ជកម្មអាស៊ាន- អន្តរជាតិ របស់ក្រុមហ៊ុន ចាង វ៉ាង (ខេមបូឌា) រៀល អ៊ីស្ទេត អ៊ិនវេសម៉ិន នាពេលនេះ គឺជាការអនុវត្តកិច្ចសន្យា សម្រាប់បំពេញតម្រូវការទាំង រដ្ឋបាលរាជធានីភ្នំពេញ និងភាគីក្រុមហ៊ុនវិនិយោគ ដែលនឹងទទួលបាន ការគាំទ្រពីសំណាក់វិស័យឯកជន និងអាជីវករ យ៉ាងពិតប្រាកដ។ មជ្ឈមណ្ឌលពាណិជ្ជកម្មអាស៊ាន-អន្តរជាតិ គឺជាគម្រោង អភិវឌ្ឍន៍ ក្នុងភាពជាដៃគូរវាងវិស័យរដ្ឋ និងវិស័យឯកជន ដែលទទួល បានគោលការណ៍អនុញ្ញាតដ៏ខ្ពង់ខ្ពស់ពីរាជរដ្ឋាភិបាលកម្ពុជា ក្នុងនោះ រដ្ឋបាលរាជធានីភ្នំពេញ បានចុះ កិច្ចសន្យាជួលទីតាំងបឹងតាមោកទំហំ ២០ ហិកតា ឱ្យទៅក្រុមហ៊ុន ចាង វ៉ាង (ខេមបូឌា) រៀល អ៊ីស្ទេត អ៊ិនវេសម៉ិន ដើម្បីអភិវឌ្ឍជាផ្សារផ្គត់ផ្គង់បន្លែ ផ្លែឈើ ចំណតរថយន្តបង់ប្រាក់ និងអគារពាណិជ្ជកម្មកម្ពស់ ៣៣ ជាន់ ហើយភាគីក្រុមហ៊ុន ក៏បានវិនិយោគបន្ថែមលើអចលនទ្រព្យ ក្នុងតំបន់នេះ ដែលធ្វើឱ្យគម្រោងអភិវឌ្ឍន៍កាន់តែមានវិសាលភាពធំ នឹងប្រកបដោយសក្តានុពល។

លោក ឃួង ស្រេង បានបញ្ជាក់ថា គោលបំណងសំខាន់នៃការអនុវត្តគម្រោងនេះ គឺដើម្បី ប្រែក្លាយតំបន់បឹងតាមោក ឱ្យទៅជាតំបន់វិនិយោគពហុបំណង ដែលនឹងរួមចំណែកដល់ការកាត់បន្ថយការកកស្ទះចរាចរណ៍ សណ្តាប់ធ្នាប់ សាធារណៈ សុវត្ថិភាពសង្គម អនាម័យ-បរិស្ថាន និងជំរុញការអភិវឌ្ឍ សេដ្ឋកិច្ច-សង្គមក្នុងតំបន់នេះ ឱ្យកាន់តែប្រសើរឡើង។ ជាក់ស្តែង ក្រោយការសាងសង់រួចរាល់ មួយផ្នែកនៃមជ្ឈមណ្ឌលពាណិជ្ជកម្មនេះ នឹងត្រូវបានប្រើប្រាស់សម្រាប់ទទួលយក អាជីវករ ដែលកំពុង តែលក់ដូរគ្មានសណ្តាប់ធ្នាប់តាមដងផ្លូវ ជាពិសេសតំបន់ជុំវិញផ្សារដើមគរចាស់ ក្នុងខណ្ឌទួលគោក ព្រមទាំងតំបន់ស្មុគស្មាញមួយចំនួនទៀតអាចចូលមកលក់ដូរក្នុងទីតាំងសមរម្យ ប្រកបដោយផាសុកភាព និង សុវត្ថិភាព ដែលនេះ គឺជាការគិតគូរខ្ពស់បំផុតរបស់ សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ចំពោះអាជីវករសេដ្ឋកិច្ចក្រៅប្រព័ន្ធ។

ជាមួយគ្នានេះ លោក វ៉ាង វិនធាន បានលើកឡើងថា មជ្ឈមណ្ឌលពាណិជ្ជកម្មអាស៊ាន-អន្តរជាតិ គឺជាគម្រោងមួយឆ្លើយតបទៅនឹងកិច្ចសហប្រតិបត្តិការរវាងប្រទេសកម្ពុជានិងចិន។ មជ្ឈមណ្ឌលនេះនឹងក្លាយជាផ្សារបោះដុំទំនិញដ៏ធំជាងគេនៅកម្ពុជា ហើយផ្សារនេះនឹងរួមចំណែកក្នុងការអភិវឌ្ឍនិង ជំរុញឱ្យកើនឡើងនូវពាណិជ្ជកម្មនៃប្រទេសទាំង២កម្ពុជា-ចិន៕

ដោយ៖ ស្រីរ័ត្ន

The post លោក ឃួង ស្រេង ស្នើអ្នកលក់ដូរគ្មានសណ្តាប់ធ្នាប់នៅផ្សារដើមគរចាស់ មកទទួលយកទីតាំងលក់ដូរថ្មី នៅមហាវិថីឈ្នះ-ឈ្នះ appeared first on Kampuchea Thmey Daily.

អភិបាលក្រុងកែបស្ដីទី នឹងអប់រំអាជីវករដែលទារលុយពីភ្ញៀវទេសចរ នៅឆ្នេរកែប បន្ថែមទៀត

អ៊ិន ពិសី — Thu, 11 Apr 2024 03:58:53 +0000

នាថ្ងៃទី ១១ ខែមេសា ឆ្នាំ ២០២៤ នេះ លោក ឃន វុទ្ធី អភិបាលក្រុងកែបស្ដីទី បានបញ្ជាក់ថា លោក នឹងហៅអាជីវករដែលបានទារលុយពីភ្ញៀវទេសចរនៅឆ្នេរកែប មកធ្វើការអប់រំ ណែនាំ នៅរដ្ឋបាលក្រុងកែប។

លោក ឃន វុទ្ធី បញ្ជាក់បន្ថែមថា កាលពីសប្ដាហ៍មុន លោកក៏បានចុះណែនាំអាជីវករដែលរកស៊ីនៅតាមបណ្ដោយឆ្នេរកែបនោះរួចហើយដែរ មុនរដូវចូលឆ្នាំថ្មីមកដល់ ប៉ុន្តែនៅតែមានអ្នកឆ្លៀតឱកាសបង្កភាពមិនសប្បាយរីករាយដល់ភ្ញៀវទេសចរទៀត។

លោកអភិបាលក្រុងកែបស្ដីទី បញ្ជាក់ទៀតថា អាជ្ញាធរហាមដាច់ខាតមិនឲ្យមានការក្រាលកន្ទេលយកលុយ ឬ ទារលុយពីភ្ញៀវទេសចរនោះទេ។ ដោយឡែកសម្រាប់ទីតាំងលើការូឡា តាមបណ្ដោយមាត់ឆ្នេរស្រីស ដែលភ្ញៀវទេសចរមកដាក់តុអង្គុយនោះ ក៏មិនអនុញ្ញាតឲ្យភ្ញៀវ ឬ អាជីវករ ក្រាលកន្ទេល ឬ ដាក់តុអង្គុយនោះដែរ ដោយទុកសម្រាប់តែផ្លូវថ្មើរជើងប៉ុណ្ណោះ។

គួរជម្រាបថា កន្លងមក លោក ឃន វុទ្ធី អភិបាលក្រុងកែបស្ដីទី ធ្លាប់បានធ្វើការណែនាំជាច្រើនដងរួចមកហើយចំពោះអាជីវករដែលរកស៊ីនៅតាមបណ្ដោយឆ្នេរកែប ប៉ុន្តែនៅតែមានអ្នកឆ្លៀតឱកាសទៀត៕

អត្ថបទ ៖ សឹង រ៉ាត់

The post អភិបាលក្រុងកែបស្ដីទី នឹងអប់រំអាជីវករដែលទារលុយពីភ្ញៀវទេសចរ នៅឆ្នេរកែប បន្ថែមទៀត appeared first on Kampuchea Thmey Daily.

ទីផ្សារអាវរងា កំពុងត្រូវប៉ាន់ ខណៈអាកាសធាតុចុះត្រជាក់

Sous Sith — Tue, 21 Nov 2023 02:54:55 +0000

ក្រុមអាជីវករ ជាអ្នកលក់ខោអាវជជុះ និងខោអាវរងា នៅក្នុងផ្សារបឹងកេងកង បានប្រាប់ឱ្យដឹងថា ស្របពេលប្រទេសកម្ពុជា ឈានចូលមកដល់រដូវរងា និងអាកាសធាតុត្រជាក់នោះ នៅផ្សារបឹងកេងកង សំបូរទៅដោយអតិថជន មកទិញសម្លៀកបំពាក់ ដែលភាគច្រើនពួកគាត់ទិញជាប្រភេទខោអាវរងា និងអាវស្បែកក្រាស់ៗ ជាជាងខោអាវស្ដើងៗ។

អ្នកស្រី ជឹម ណារិន អាយុ៥៥ឆ្នាំ ជាអាជីវករលក់ខោអាវជជុះ និងខោអាវរងា ក្នុងផ្សារបឹងកេងកង បានប្រាប់ឱ្យកម្ពុជាថ្មី ដឹងថា រយៈពេលប៉ុន្មានថ្ងៃមកនេះ អាកាសធាតុចុះត្រជាក់ អតិថិជនបានមកទិញខោអាវនៅតូបរបស់អ្នកស្រី។ ហើយភាគច្រើន សំបូរទៅដោយអ្នកទិញខោអាវរងា និងប្រភេទខោអាវស្បែកក្រាស់ៗ សម្រាប់យកទៅពាក់ ខណៈអាកាសធាតុកំពុងចុះត្រជាក់ក្នុងខែរងា បន្ទាប់ពីខែអស្សុជ កន្លងផុតទៅ។ អ្នកស្រី បន្ថែមទៀតថា ក្នុងមួយថ្ងៃ នៅតូបរបស់ អ្នកស្រី មានអតិថិជនមិនតិចជាង២០នាក់នោះទេ ដែលនាំគ្នាមកទិញខោអាវរងា និងប្រភេទអាវស្បែកក្រាស់ៗ ហើយចំនួន នៃការទិញក៏កើនឡើងខ្លាំង។ អ្នកស្រី បញ្ជាក់ថា មនុស្សម្នាក់ ទិញអាវយ៉ាងតិចចំនួន ៣អាវ ដែលសុទ្ធសឹងតែជាប្រភេទអាវរងា និងអាវស្បែកក្រាស់ៗ ជាដើម។

ទាក់ទងនឹងអតិថិជននេះដែរ អ្នកស្រី ជឹម ណារិន បញ្ជាក់ថា អ្នកមកទិញខោអាវរងា និងប្រភេទអាវស្បែកក្រាស់ៗ គឺមិនមែនតែប្រជាជនខ្មែរតែមួយទេ ប៉ុន្តែអ្នកស្រី មើលឃើញថាក៏មានជនជាតិបរទេស និងពលរដ្ឋខ្មែរដែលរស់នៅក្រៅប្រទេស ក៏នាំគ្នាមកទិញជាលក្ខណៈជាក្រុម និងគ្រួសារ ផងដែរ។ ក្រៅពីនេះ ក៏មានអតិថនមួយក្រុមទៀត ដែលជាពលករ និងអ្នកទៅធ្វើការនៅក្រៅប្រទេស ក៏បាននាំគ្នាមកទិញខោអាវរងា និងប្រភេទអាវក្រាស់ៗ នៅតូបរបស់ អ្នកស្រី ដោយក្នុងមួយថ្ងៃ អ្នកស្រី អាចលក់ខោអាវរងា បានចន្លោះពី ៤០ ទៅ៥០អាវ ចាត់ទុកជាចំនួនច្រើនជាងការលក់កន្លងមក។

ជាមួយគ្នានេះ លោក ឃឹម ចិន អាជីវករលក់ខោអាវរងា នៅផ្សារបឹងកេងកង ដូចគ្នា ក៏បានប្រាប់កម្ពុជាថ្មីដែរថា ការលក់ខោអាវរងារយៈពេលប៉ុន្មានថ្ងៃមកនេះសម្រាប់តូបរបស់លោកផ្ទាល់ គឺមានការលក់ដាច់គួរសម ដោយសារតែអតិថិជនភាគច្រើន មកទិញតែប្រភេទខោអាវរងា និងអាវក្រាស់ៗ ស្របពេលអាកាសធាតុមានការចុះត្រជាក់ផងនោះ។ លោក បន្ថែមថា ក្នុងមួយថ្ងៃ មានអតិថិជនមកទិញខោអាវរងា ប្រមាណជាង ២០នាក់។ ចំណែកចំនួនខោអាវរងាដែលលក់បាននោះ គឺមានចន្លោះពី ៣០ ទៅ៤០អាវ ដោយមិនទាន់រាប់បញ្ចូលនូវប្រភេទខោអាវធម្មតានៅឡើយ។ លោក ឃឹម ចិន បន្តទៀតថា ចំនួនអ្នកទិញនៅតូបរបស់លោក គឺមានចម្រុះជាតិសាសន៍ ក្នុងនោះរួមមាន៖ ជនជាតិចិន វៀមណាម និងម៉ាឡេស៊ី ដែលមករស់នៅ និងធ្វើការ នៅប្រទេសកម្ពុជា ភាគច្រើនពួកគេ ប្រាប់ថា ខោអាវក្នុងផ្សារបឹងកេងកង តម្លៃសមរម្យ និងមានគុណភាពល្អ មិនចាញ់ខោអាវថ្មី លក់នៅប្រទេសរបស់ពួកគេឡើយ។

ចំណែក កញ្ញា ចាន់ រស្មី អតិថិជនមកទិញខោអាវរងាក្នុងផ្សារបឹងកេងកង ក៏បានប្រាប់ឱ្យកម្ពុជាថ្មីដឹងដែរថា មូលហេតុកញ្ញា មកទិញខោអាវរងានៅផ្សារបឹងកេងកង ក៏ដោយសារតែប្រទេសកម្ពុជាយើង ឈានចូលមកដល់ខែរងា ដែលជារដូវមួយមានអាកាសធាតុត្រជាក់ខ្លាំង ជារៀងរាល់ឆ្នាំគឺស្ថិតនៅក្នុងខែវិច្ឆិកា រហូតដល់ ចុងខែមករា តាមដែរកញ្ញាបានដឹងកន្លងមក។ ក្រៅពីនេះ កញ្ញា បញ្ជាក់ថា ជាទូទៅរាល់ពេលខែរងាចូលមកដល់ កញ្ញា តែងតែជ្រើសរើសមកទិញខោអាវរងានៅក្នុងផ្សារបឹងកេងកង ជាជម្រើសទី១ ព្រោះកញ្ញាយល់ឃើញថា សម្លៀកបំពាក់ មិនថាជាប្រភេទខោអាវរងា និងខោអាវធម្មតា នោះទេ នៅទីនេះ គឺទាន់សម័យយុវវ័យ និងមនុស្សចាស់ទូទៅ ហើយអ្វីកាន់តែពិសេសទៀតនោះ តម្លៃសមរម្យ និងមានគុណភាពល្អ មិនចាញ់ខោអាវថ្មី នៅបណ្ដាហាងទំនើប ប៉ុន្មាននោះឡើយ៕

អត្ថបទ ៖ សួស សិត