ឃាត់ខ្លួនសន្តិសុខរោងចក្រម្នាក់ ពាក់ព័ន្ធករណី​យកលុយដាក់ខែពីអាជីវករលក់ដូរតាមដងផ្លូវ

កម្លាំងអាជ្ញាធរខណ្ឌពោធិ៍សែនជ័យ នៅព្រឹកថ្ងៃទី៣​ ខែកុម្ភៈ​ ឆ្នាំ២០២៥​ បានឃាត់ខ្លួនបុរសជាសន្តិសុខម្នាក់ដែលបានដេីរយកលុយដាក់ខែពីអាជីវករលក់ដូរតាមតូបនៅចំណុចមុខរោងចក្រអាមេរិកកាំង​ តាមផ្លូវ៣០ម៉ែត្រ​ ភូមិទួលពង្រ​ សង្កាត់ចោមចៅទី១​ ខណ្ឌពោធិ៍សែនជ័យ​ និងចាត់ការតាមនីតិវិធី។ ការឃាត់ខ្លួននេះ ធ្វើឡើងបន្ទាប់ពីអាជ្ញាធរទទួលបានព័ត៌មានពីស្ត្រីអាជីវករម្នាក់ដែលលើកឡើងថា មានបុរសម្នាក់ដើរយកលុយដាក់ខែក្នុងមួយតូប៥០ម៉ឺនរៀល ជាថ្នូរនឹងការបានលក់ដូរនៅទីនោះ។

បុរសសន្តិសុខដែលត្រូវកម្លាំងអាជ្ញាធរឃាត់ខ្លួន​មានឈ្មោះ ផល​ ភេទប្រុស​ អាយុប្រហែល៤០ឆ្នាំ​ មុខរបរជាសន្តិសុខ​រោងចក្រ​ អាមេរិកកាំង​ ផ្លូវ៣០ម៉ែត្រ​ ភូមិទួលពង្រ​ សង្កត់ចោមចៅទី១​ ខណ្ឌពោធិ៍សែនជ័យ។

លោក ប៉ាង​ លីដា​ អភិបាលរងខណ្ឌពោធិ៍សែនជ័យ បានឲ្យដឹងថា​ ក្រោយពីទទួលព័ត៌មាននេះ នៅព្រឹកថ្ងៃទី៣​ ខែកុម្ភៈ​ លោក​បានដឹកនាំកម្លាំងចុះដល់ទីតាំង និងបានទំនាក់ទំនងទៅបុរសខាងលេីសួរនាំ​ជំវិញបញ្ហានេះ។ នៅចំពោះមុខអាជ្ញាធរ បុរសខាងលេីបានសារភាពថា​ រូបគាត់ពិតជាបានដេីរយកលុយពីក្រុមអាជីវករពិតប្រាកដមែន។

ក្រោយពីសួរនាំ បុរសខាងលេីត្រូវបានកម្លាំងអាជ្ញាធរបញ្ជូនខ្លួនទៅអធិការដ្ឋាននគរបាលខណ្ឌពោធិ៍សែនជ័យ ដេីម្បីចាក់ការតាមនីតិវិធី៕

អត្ថបទ៖ សុខា