នាព្រឹកថ្ងៃទី១៣ ខែកក្កដា ឆ្នាំ២០២៦នេះ លោក ឯក ឃុនដឿន អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ បានដឹកនាំក្រុមការងារ ចុះស្តារប្រព័ន្ធលូ ដើម្បីកាយភក់ និងសំរាម ដែលអាចធ្វើឱ្យរាំងស្ទះដល់លំហូរទឹកភ្លៀង ដែលចាប់ផ្តើមពីចំណុចផ្លូវលេខ២១១ និងទៅកាន់ផ្លូវសំខាន់ៗជាច្រើនទៀត ដូចជាផ្លូវលេខ២១៥, ផ្លូវលេខ១៨២, ប្រមាណជា ៣.២៣៤ម៉ែត្រ នៃខណ្ឌ៧មករា ដែលជាខណ្ឌអទិភាព និងស្ថិតនៅកណ្តាលរាជធានីភ្នំពេញ។

ក្នុងឱកាសនោះ ឯក ឃុនដឿន បានឱ្យក្រុមការងារ អនុវត្តតាមការណែនាំរបស់លោកអភិបាលរាជធានីភ្នំពេញ ដែលបានណែនាំឱ្យយកចិត្តទុកដាក់ ចំពោះផ្លូវណា ឬតំបន់ណាដែលចាំបាច់ ត្រូវធ្វើការស្តារភ្លាមៗ ដើម្បីធានាថា ប្រព័ន្ធលូមិនរាំងស្ទះកាកសំណល់ និងសំរាម សំដៅបើកមុខលូឱ្យស្អាតល្អ និងធ្វើឱ្យលំហូរទឹកភ្លៀងអាចហូរចេញបានលឿន ។

ក្នុងនោះដែរ ឯក ឃុនដឿន ក៏បានឱ្យក្រុមការងារឆែកមើលតាមប្រព័ន្ធលូ ដែលមិនទាន់មានការតភ្ជាប់បង្ហូរចេញត្រូវតភ្ជាប់ ខណៈបណ្តាញលូណាដែលមិនទាន់បើកមុខធំ ក៏ត្រូវបើកឱ្យអស់ ដោយសារស្ថានីយបូមទឹកមួយចំនួន បានសាងសង់រួចរាល់ អាចធានាដល់លំហូរទឹកភ្លៀងបានហើយ។

ឆ្លៀតក្នុងឱកាសនោះ រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋទាំងអស់ មេត្តាកុំចាក់សាប រៀបការូឡាលើគម្របលូ និងយកដីចាក់បិទលូផងដែរ ។សម្រាប់យុទ្ធនាការស្ដារលូ អណ្ដូងលូ កាយភក់ និងសំរាម ក្នុងខណ្ឌកណ្ដាលក្រុងទាំង៥នេះជាផែនការរបស់រដ្ឋបលរាជធានីភ្នំពេញហើយការងារទាំងនេះធ្វើឡើងក្រោមការយកចិត្តទុកដាក់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងផែនការត្រៀមរំដោះជំនន់ទឹកភ្លៀង ដេីម្បី បញ្ចៀសការជន់លិចផ្ទះសម្បែងនិងហេដ្ឋារចនាសម្ព័ន្ធនានាក្នុងរដូវវស្សានេះ។

គួរបញ្ជាក់ដែរថា សកម្មភាពចុះស្តារ និងកាយភក់ យកសំរាម ចេញពីបណ្តាញលូ ក្នុងខណ្ឌ៧មករានាពេលនេះ គឺជាការពង្រីកសកម្មភាពស្តារនិងកាយភក់ និងសំរាម បន្តពីខណ្ឌសំខាន់ៗផ្សេងៗ ជាពិសេសខណ្ឌដែលនៅកណ្តាលរាជធានីភ្នំពេញទាំង៥តែម្តង ពោលរដ្ឋបាលរាជធានីភ្នំពេញ បានអនុវត្តចំពោះខណ្ឌដូនពេញ, ខណ្ឌចំការមន និងខណ្ឌ៧មករា ជាខណ្ឌទី៣ផងដែរ។

ក្នុងប្រតិបត្តិការចុះស្តារលូ និងកាយភក់យកសំរាមចេញពីប្រព័ន្ធលូនេះ ធ្វើឡើងដោយមានគ្រឿងចក្រជាច្រើនគ្រឿង ពីរដ្ឋបាលរាជធានីនិងពីមន្ទីរសាធារណការ និងដឹកជញ្ជូនរាជធានីភ្នំពេញ៕ អត្ថបទ៖ ស្រីរ័ត្ន

The post រដ្ឋបាលរាជធានី បន្តចុះស្តារប្រព័ន្ធលូជាអាទិភាពនៅក្នុងភូមិសាស្ត្រខណ្ឌ៧មករា ប្រវែងជាង៣ពាន់ម៉ែត្រ appeared first on Kampuchea Thmey Daily.

ជាក់ស្ដែងនៅព្រឹកថ្ងៃទី១៣ ខែកក្កដា ឆ្នាំ២០២៦នេះ អាជ្ញាធររាជធានីភ្នំពេញក្រោមការដឹកនាំដោយ លោក ឯក ឃុនដឿន អភិបាលរងរាជធានីភ្នំពេញ សហការជាមួយអាជ្ញាធរ នៃ រដ្ឋបាលខណ្ឌ៧មករា ដឹកនាំដោយ លោក ថេង សុថុល អភិបាលខណ្ឌ បានបន្តការចុះពិនិត្យប្រព័ន្ធលូតូចៗ កាត់ទទឹកផ្លូវជាច្រើនក្នុងភូមិសាស្រ្តខណ្ឌ៧មករា ដែលជាចរន្តបង្ហូរទឹកសំខាន់ជួយរំដោះការជន់លិច ក្នុងរាជធានីភ្នំពេញពេលមានភ្លៀងធ្លាក់ខ្លាំងក្នុងរដូវវស្សានេះ។

ការចុះពិនិត្យនេះកម្លាំងអាជ្ញាធរក៏បានប្រើប្រាស់រថយន្ត បូមលូជាច្រើនគ្រឿងសម្រាប់ការបូមប្រព័ន្ធលូតូចៗ ដែលមានការកកស្ទះទៅដោយកំទិចដី ឬសំរាមដែលជាឧបសគ្គចម្បងធ្វើឲ្យរាំងស្ទះដល់ចរន្តបង្ហូរទឹក។

លោក ឯក ឃុនដឿន អភិបាលរងរាជធានីភ្នំពេញ បានប្រាប់ឲ្យដឹងថា ការចុះពិនិត្យនេះ គឺក្នុងគោលបំណងរៀបចំផែនការស្តារ និងកែលម្អប្រព័ន្ធលូចាស់ឡើងវិញ ឱ្យមានដំណើរការល្អឡើងវិញ សំដៅរំដោះមុខទឹក និងបញ្ចៀសការលិចលង់នារដូវវស្សា។ ជាពិសេសនៅតាមបណ្តោយផ្លូវលេខ១៨២ កែងផ្លូវ ២១១ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ តែងតែជន់លិចពេលមានភ្លៀងធ្លាក់ម្ដង ដូច្នេះដើម្បីកាត់បន្ថយការជន់លិច រដ្ឋបាលរាជធានីភ្នំពេញ បានចាត់ចែងឲ្យជំនាញ ស្តារលូឡើងវិញ ដើម្បីផ្តល់ភាពងាយស្រួលក្នុងការរស់នៅ និងធ្វើដំណើរជូនប្រជាពលរដ្ឋក្នុងមូលដ្ឋាន។

ការងារស្តារប្រព័ន្ធលូនេះដែរ បច្ចុប្បន្នក្រុមការងារប្រើប្រាស់រថយន្តចំនួន១២គ្រឿង ដោយបែងចែងជា៥ក្រុមធ្វើសកម្មភាពព្រមៗគ្នាតែម្តង។ សម្រាប់ការងារនេះដែរអាជ្ញាធររាជធានីភ្នំពេញបានបញ្ចប់ ការងារនៅខណ្ឌដូនពេញ ខណ្ឌចំការមន នឹងបានកំពុងបន្តទៅខណ្ឌចំនួន៣ទៀតនោះគឺ ខណ្ឌបឹងកេងកង ខណ្ឌ៧មករា និងបញ្ចប់នៅខណ្ឌទួលគោក៕

The post អាជ្ញាធររាជធានីភ្នំពេញ បន្តចុះពិនិត្យប្រព័ន្ធលូតូចៗ និង រៀបចំបង្កើនប្រព័ន្ធលូថ្មីបន្ថែម ដើម្បីបញ្ចៀសការជន់លិចនៅរដូវវស្សា appeared first on Kampuchea Thmey Daily.

នៅព្រឹកថ្ងៃទី២ ខែកក្កដា ឆ្នាំ២០២៦ មន្ទីរសូរិយោដី រួមជាមួយរដ្ឋបាលខណ្ឌ ក្រោមអធិបតីភាព លោក សារិន វណ្ណា ប្រធានមន្ទីររៀបចំដែនដី តំណាង ឧបនាយករដ្ឋមន្ត្រីក្រសួង និង លោក ថេង សុថុល អភិបាលខណ្ឌ៧មករា តំណាងលោក ឃួង ស្រេង អភិបាលរាជធានីភ្នំពេញ បានរៀបចំ «ពិធីប្រកាសកំណត់តំបន់ធើ្វការវិនិច្ឆ័យ ស្ដីពីការចុះបញ្ជីដីធ្លីមានលក្ខណៈជាប្រព័ន្ធ និងចុះបញ្ជីចំណែកឯកជននៃអាគារសហកម្មសិទ្ធិ ដែលត្រូវសាងសង់មុនឆ្នាំ១៩៧៩ និងមុនថ្ងៃទី១៩ ខែធ្នូ ឆ្នាំ១៩៩៧» ស្ថិតក្នុងមូលដ្ឋានខណ្ឌ៧មករា រាជធានីភ្នំពេញ។

លោក ថេង សុថុល អភិបាលខណ្ឌ៧មករា មានប្រសាសន៍ថា ជំនួសមុខឱ្យប្រជាពលរដ្ឋទាំងអស់ទូទាំងខណ្ឌ សូមថ្លែងអំណរគុណដល់រាជរដ្ឋាភិបាលកម្ពុជា ក្រសួងរៀបចំដែនដី នគរូបនីយកម្ម និងសំណង់ ដែលបានបង្កើតឱ្យមានការចុះបញ្ជីដីធ្លីមានលក្ខណៈជាប្រព័ន្ធនេះឡើង។ លោកក៏បានកោត សរសើរចំពោះកិច្ចខិតខំប្រឹងប្រែងដល់ក្រុមការងារ ដែលបាននិងកំពុងបន្តប្រឹងប្រែងក្នុងដំណើរការចុះបញ្ជីដីធ្លី ជូនប្រជាពលរដ្ឋ។

លោក សារិន វណ្ណា បានឡើងថ្លែងប្រសាសន៍ពន្យល់យ៉ាងលម្អិតអំពីដំណើរការចុះបញ្ជីប្លង់កម្មសិទ្ធិឯកជន និងសហកម្មសិទ្ធិ ដោយបានគូសបញ្ជាក់ថា ការចុះបញ្ជីនេះមានសារៈសំខាន់ខ្លាំងក្នុងការផ្តល់ភាពច្បាស់លាស់ផ្នែកច្បាប់ជូនម្ចាស់អចលនទ្រព្យ និងជួយការពារសិទ្ធិកម្មសិទ្ធិស្របច្បាប់របស់ប្រជាពលរដ្ឋ។

លោកក៏បានលើកឡើងពីបញ្ហាប្រឈម និងផលប៉ះពាល់មួយចំនួនដែលអាចកើតមានក្នុងអំឡុងពេលអនុវត្តការងារ ព្រមទាំងបានអំពាវនាវដល់ប្រជាពលរដ្ឋ ម្ចាស់អចលនទ្រព្យ និងអ្នកពាក់ព័ន្ធទាំងអស់ មានចំឯកសារពាក់ព័ន្ធអោយបានគ្រប់គ្រាប់ ដើម្បីពន្លឿនការងារ ជាងវៀងដល់ក្រុមការងារចុះទើបរត់ទៅបញ្ជាក់ឯកសារជាមួយអាជ្ញាធរ និងសូម ឱ្យមានការយោគយល់ សហការ និងផ្តល់ព័ត៌មានត្រឹមត្រូវជូនដល់មន្ត្រីជំនាញ ដើម្បីឱ្យដំណើរការចុះបញ្ជីអាចប្រព្រឹត្តទៅដោយរលូន មានតម្លាភាព និងប្រសិទ្ធភាពខ្ពស់។

លោកបានបន្តថា ការប្រកាសកំណត់តំបន់វិនិច្ឆ័យនាពេលនេះ ត្រូវបានចាត់ទុកថាជាជំហានដ៏សំខាន់មួយក្នុងការពន្លឿនការចុះបញ្ជីដីធ្លីមានលក្ខណៈជាប្រព័ន្ធ និងការចុះបញ្ជីចំណែកឯកជននៃអគារសហកម្មសិទ្ធិដែលបានសាងសង់មុនឆ្នាំ១៩៧៩ និងមុនថ្ងៃទី១៩ ខែធ្នូ ឆ្នាំ១៩៩៧ នៅក្នុងខណ្ឌ៧មករា ដើម្បីធានាដល់សុវត្ថិភាពផ្នែកច្បាប់លើកម្មសិទ្ធិ និងរួមចំណែកដល់ការអភិវឌ្ឍទីក្រុងប្រកបដោយចីរភាព និងសណ្តាប់ធ្នាប់ល្អ៕

The post មន្ទីររៀបចំដែនដីរាជធានី ប្រកាសកំណត់តំបន់វិនិច្ឆ័យ ដើម្បីរុញការចុះបញ្ជីដីធ្លីជាប្រព័ន្ធ ជូនពលរដ្ឋក្នុងខណ្ឌ៧មករា appeared first on Kampuchea Thmey Daily.

យោងតាមរបាយការណ៍របស់រដ្ឋបាលខណ្ឌ៧មករា នៅថ្ងៃទី០១ ខែកក្កដា ឆ្នាំ២០២៦ នេះ ដោយមានការចង្អុលបង្ហាញ និងបញ្ជា លោក ថេង សុថុល អភិបាល នៃគណៈអភិបាលខណ្ឌ៧មករា និងជាប្រធានគណៈបញ្ជាការឯកភាពរដ្ឋបាលខណ្ឌ បានចាត់ឱ្យ លោក កេត ឧត្ដម អភិបាលរងខណ្ឌ ដឹកនាំកម្លាំងក្រុមការងារចម្រុះនៃរដ្ឋបាលខណ្ឌ បន្តចុះប្រតិបត្តិការយ៉ាងសកម្មនៅក្នុងភូមិសាស្ត្ររបស់ខ្លួន។

ក្នុងប្រតិបត្តិការនេះ ក្រុមការងារចម្រុះបានធ្វើការចុះត្រួតពិនិត្យយ៉ាងហ្មត់ចត់តាមទីតាំងសំខាន់ៗមួយចំនួនរួមមាន៖ អគារខុនដូ អាផាតមិន បុរី ផ្ទះសំណាក់ និងសណ្ឋាគារ ដែលស្ថិតក្នុងភូមិសាស្រ្តខណ្ឌ៧មករា។ គោលដៅចម្បងនៃការចុះត្រួតពិនិត្យនេះ គឺដើម្បីស្រាវជ្រាវ ស្វែងរក និងបោសសម្អាតរាល់ទីតាំងទាំងឡាយណាដែលត្រូវបានសង្ស័យថាអាចជាកន្លែងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)។

សកម្មភាពនេះសបញ្ជាក់ឱ្យឃើញពីការយកចិត្តទុកដាក់ខ្ពស់របស់គណៈបញ្ជាការឯកភាពរដ្ឋបាលខណ្ឌ៧មករា ក្នុងការលុបបំបាត់បទល្មើសឧក្រិដ្ឋកម្មឆ្លងដែន និងបទល្មើសបច្ចេកវិទ្យាគ្រប់ប្រភេទ ដើម្បីផ្តល់នូវភាពកក់ក្តៅជូនប្រជាពលរដ្ឋ ព្រមទាំងរក្សាបាននូវកិត្តិយស និងសេចក្តីថ្លៃថ្នូររបស់មូលដ្ឋានទាំងមូល។

អាជ្ញាធរខណ្ឌ ក៏បានក្រើនរំលឹក និងអំពាវនាវដល់ម្ចាស់ទីតាំងអាជីវកម្មស្នាក់នៅ ព្រមទាំងប្រជាពលរដ្ឋទាំងអស់ សូមចូលរួមសហការជិតស្និទ្ធជាមួយសមត្ថកិច្ច និងរាយការណ៍ជាបន្ទាន់ក្នុងករណីប្រទះឃើញសកម្មភាព ឬជនសង្ស័យណាមួយ ដើម្បីឈានទៅបង្ក្រាបបានទាន់ពេលវេលា៕

The post រដ្ឋបាលខណ្ឌ៧មករា បន្តប្រតិបត្តិការចុះត្រួតពិនិត្យ និង បោស សម្អាតទីតាំងសង្ស័យបទល្មើសឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

ក្នុងនោះផងដែល លោកអភិបាលរង រាជធានីភ្នំពេញ រួមនិងលោក ថេង សុថុល អភិបាលខណ្ឌ៧មករា បានពិនិត្យសិក្សានៅកន្លែងដាក់ប្រព័ន្ធលូបង្ហូរទឹកបន្ថែម នៅចំណុចស្ដុប ផ្សារដេប៉ូ តាមបណ្តោយផ្លូវលេខ ២១៥កែង១៨២ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

លោក ឯក ឃុនដឿន អភិបាលរងរាជធានីភ្នំពេញ បានប្រាប់ឲ្យដឹងថា ការចុះពិនិត្យនេះ គឺក្នុងគោលបំណងរៀបចំផែនការស្តារ និងកែលម្អប្រព័ន្ធលូចាស់ឡើងវិញ ឱ្យមានដំណើរការល្អ សំដៅរំដោះមុខទឹក និងបញ្ចៀសការលិចលង់នារដូវវស្សា។ ជាពិសេសនៅតាមបណ្តោយផ្លូវលេខ២១៥ ចំណុចស្តុបផ្សារដេប៉ូ ស្ថិតក្នុងសង្កាត់វាលវង់ ខណ្ឌ៧មករា ព្រំប្រទល់សង្កាត់ផ្សារដេប៉ូទី១ ខណ្ឌទួលគោក រាជធានី ភ្នំពេញ តែងតែជន់លិចពេលមានភ្លៀងធ្លាក់ម្ដង ដូច្នេះដើម្បីកាត់បន្ថយការជន់លិច រដ្ឋបាលរាជធានីភ្នំពេញ បានចាត់ចែងឲ្យជំនាញ ដាក់ប្រព័ន្ធលូកាត់ទទឹងផ្លូវលេខ២១៥ (មហាវិថីនេរុហ៍) បញ្ជូនទឹកហូបានលឿនជាងមុន ដើម្បីផ្តល់ភាពងាយស្រួលក្នុងការរស់នៅ និងធ្វើដំណើរជូនបងប្អូនប្រជាពលរដ្ឋក្នុងមូលដ្ឋាន។

ទាក់ទងកិច្ចការងារស្តារប្រព័ន្ធលូនេះដែរ បច្ចុប្បន្ន ក្រុមការងារប្រើប្រាស់រថយន្តចំនួន១២គ្រឿង ដោយបែងចែងជា៥ក្រុមធ្វើសកម្មភាពព្រមៗគ្នាតែម្តង។ សម្រាប់ការងារនេះដែរ អាជ្ញាធររាជធានីភ្នំពេញ បានបញ្ចប់ការងារនៅខណ្ឌដូនពេញនខណ្ឌចំការមន នឹងបានកំពុងបន្តទៅខណ្ឌចំនួន៣ទៀត នោះគឺខណ្ឌបឹងកេងកង ខណ្ឌ៧មករា និងបញ្ចប់នៅខណ្ឌទួលគោក។  

ការចុះពិនិត្យនេះ គោលបំណងរៀបចំផែនការស្តារ និងកែលម្អប្រព័ន្ធលូចាស់ អោយមានដំណើរការល្អឡើងវិញ ដើម្បីរំដោះទឹក និងបញ្ចៀសការលិចលង់នារដូវវស្សា ផ្តល់ភាពងាយស្រួលក្នុងការរស់នៅ និងធ្វើដំណើរជូនប្រជាពលរដ្ឋក្នុងមូលដ្ឋាន៕

The post អាជ្ញាធររាជធានី រួមជាមួយអាជ្ញាធរមូលដ្ឋានខណ្ឌ៧មករា ចុះត្រួតពិនិត្យ និងសិក្សាប្រព័ន្ធលូថ្មីបន្ថែម ដើម្បីបញ្ចៀសការជនលិច appeared first on Kampuchea Thmey Daily.

យោងតាមប្រភពព័ត៌មានពី រដ្ឋបាលខណ្ឌប្រតិបត្តិការ ចុះត្រួតពិនិត្យនេះត្រូវបានធ្វើឡើង ក្រោមការដឹកនាំបញ្ជាផ្ទាល់របស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានី ក្រោមការចង្អុលបង្ហាញយ៉ាងយកចិត្តទុកដាក់ពី លោក ថេង សុថុល អភិបាលនៃគណៈអភិបាលខណ្ឌ៧មករា និងជាប្រធានគណៈបញ្ជាការឯកភាពរដ្ឋបាលខណ្ឌ។ ជាក់ស្តែងកម្លាំងក្រុមការងារចម្រុះ ដែលដឹកនាំផ្ទាល់ដោយលោក ណុបផា និង លោក កេត ឧត្ដម ដែលជា អភិបាលរងខណ្ឌ បានបន្តចុះកម្លាំងត្រួតពិនិត្យយ៉ាងសកម្ម នៅតាមទីតាំងគោលដៅនានា។

ក្នុងប្រតិបត្តិការ ចុះត្រួតពិនិត្យនេះក្រុមការងារ បានធ្វើការឆែកឆេរ និងពិនិត្យយ៉ាងល្អិតល្អន់តាមទីតាំងអគារខុនដូ អាផាតមិន បុរី ផ្ទះសំណាក់ និង សណ្ឋាគារ មួយចំនួនក្នុងភូមិសាស្ត្រខណ្ឌ។ គោលដៅសំខាន់នៃការចុះត្រួតពិនិត្យនេះ គឺ ដើម្បីស្វែងរក និង បោសសម្អាតឱ្យអស់នូវរាល់ ទីតាំងណាដែល មានការសង្ស័យថាអាចត្រូវបានប្រើប្រាស់ជាកន្លែងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)។

ចំណាត់ការរបស់ គណៈបញ្ជាការឯកភាពរដ្ឋបាលខណ្ឌ៧មករា នៅពេលនេះគឺ ជាការឆ្លើយតបយ៉ាងសកម្ម ទៅនឹងកិច្ចខិតខំប្រឹងប្រែង របស់អាជ្ញាធរមានសមត្ថកិច្ច ក្នុងការលុបបំបាត់បទល្មើសបច្ចេកវិទ្យា និង ដើម្បីពង្រឹងសន្តិសុខសណ្តាប់ធ្នាប់ ព្រមទាំងសុវត្ថិភាពជូនប្រជាពលរដ្ឋក្នុងមូលដ្ឋាន៕ដោយ ៖ អុឹងម៉េង

The post អាជ្ញាធរខណ្ឌ៧មករា បន្តប្រតិបត្តិការបោសសម្អាតទីតាំងសង្ស័យពាក់ព័ន្ធនឹងឆបោកតាមប្រព័ន្ធអនឡាញ ក្នុងមូលដ្ឋាន appeared first on Kampuchea Thmey Daily.

ប្រតិបត្តិការនេះបានធ្វើឡើងកាលពីរសៀលថ្ងៃទី១៨ ខែមិថុនា ឆ្នាំ២០២៦ ដោយអនុវត្តតាមបទបញ្ជា របស់លោកឃួង ស្រេង អភិបាលរាជធានីភ្នំពេញ និង លោកឧត្តមសេនីយ៍ឯក ជួន ណារិន្ទ អគ្គស្នងការង និងជាស្នងការនគរបាលរាជធានីភ្នំពេញ រដ្ឋបាលខណ្ឌ៧មករា លោក ថេង សុថុល អភិបាល នៃគណៈអភិបាលខណ្ឌ៧មករា និងមានការសម្របសម្រួល ពីលោក ទុង រតនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ធ្វើការចុះត្រួតពិនិត្យតាមទីតាំងអាគារ  ខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួនក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងមូលដ្ឋានខណ្ឌ៧មករា។

ក្នុងរង្វង់ប្រតិបត្តិការ កម្លាំងសមត្ថកិច្ចបានពិនិត្យឃើញនៅជាន់ទី០៨ មានជនបរទេស ចំនួន០៦នាក់ ជនជាតិ វៀតណាម និងសម្ភារៈ រួមមាន៖ ១. Laptop បោះចោលពីបន្ទប់ជាន់ទី៨ មកខាងក្រោមបំផ្លាញចោល), ២.ទូរស័ព្ទមួយចំនួន  មានជាប់ពាក់ព័ន្ធការប្រព្រឹត្តការឆបោកតាមប្រព័ន្ធបច្ចេកវិទ្យា(Online scams)។

បន្ថែមទៀតក្នុងប្រតិបត្តិការ បទល្មើសonline scams កម្លាំងចម្រុះត្រួតពិនិត្យ នៅជាន់ទី១១ និងជាន់ទី១៥ ឃាត់ខ្លួនមនុស្សចំនួន០៣នាក់ ពាក់ព័ន្ធគ្រឿងញៀននិងដកហូតបានមួយចំនួនផងដែរ។

បច្ចុប្បន្ន ជនសង្ស័យទាំង០៦នាក់ និងសម្ភារៈ ពាក់ព័ន្ធ Online scams ត្រូវបញ្ជូនទៅអធិការដ្ឋាននគរបាលខណ្ឌ៧មករា និងជនសង្ស័យ០៣នាក់ពាក់ព័ន្ធគ្រឿងញៀន បញ្ជូនទៅការិយាល័យប្រឆាំងបទល្មើសគ្រឿងនៃស្នងការដ្ឋាននគរបាលរាជធានីភ្នំពេញ ដើម្បីអនុវត្តនីតិវិធីបន្ត៕

The post ឃាត់ខ្លួនជនបរទេស៩នាក់ នៅខណ្ឌ៧មករាករណីលួចលាក់ធ្វើសកម្មភាព Online Scams និងពាក់ព័ន្ធគ្រឿងញៀន appeared first on Kampuchea Thmey Daily.

លោក ជុន ប៊ុនណាន អធិការនគរបាលខណ្ឌ៧មករា បានលើកឡើងថា កម្លាំងគណៈបញ្ជាការឯកភាពខណ្ឌ ៧មករា សហការជាមួយគណៈបញ្ជាការឯកភាពរាជធានីភ្នំពេញ បានបើកប្រតិបត្តិការយ៉ាងក្តៅគគុក ក្នុងការចុះបង្ក្រាបទីតាំងបង្កប់ការប្រព្រឹត្តបទល្មើសបច្ចេកវិទ្យា (Online Scam) នៅក្នុងភូមិសាស្ត្រខណ្ឌ ដើម្បីការពារ និងបង្ការបទល្មើសឆបោកតាមប្រព័ន្ធបច្ចេកវិទ្យា។  លោកអធិការ បានបញ្ជាក់បន្ថែមថា ប្រតិបត្តិការនេះធ្វើឡើងក្រោមការចង្អុលបង្ហាញពីថ្នាក់ដឹកនាំ ដើម្បីពង្រឹងសន្តិសុខ សុវត្ថិភាព និងរបៀបរៀបរយសង្គម ជូនដល់ប្រជាពលរដ្ឋ

លោក ជុន ប៊ុនណាន អធិការនគរបាលខណ្ឌ៧មករា

ស្របតាមគោលនយោបាយភូមិ-ឃុំ-សង្កាត់ មានសុវត្ថិភាព ជាពិសេសគឺការលុបបំបាត់រាល់បទល្មើសបច្ចេកវិទ្យា និងការបោកប្រាស់តាមប្រព័ន្ធអនឡាញគ្រប់ទម្រង់។ ការបង្ក្រាបនេះ ឆ្លុះបញ្ចាំងពីការប្តេជ្ញាចិត្តយ៉ាងម៉ឺងម៉ាត់របស់អាជ្ញាធររាជធានីភ្នំពេញ ក្នុងការលុបបំបាត់បទល្មើសបច្ចេកវិទ្យា និងការបោកប្រាស់តាមប្រព័ន្ធអនឡាញគ្រប់ទម្រង់ ដើម្បីការពារសន្តិសុខ និងសណ្តាប់ធ្នាប់សង្គម។

ជាលទ្ធផលនៃប្រតិបត្តិការបន្តបន្ទាប់នាពេលកន្លងមកនេះ កម្លាំងគណៈបញ្ជាការឯកភាពខណ្ឌ៧មករា បានបង្ក្រាបចំនួន ១១ ទីតាំង ផ្សេងគ្នា និងឃាត់ខ្លួនជនសង្ស័យ សរុបចំនួន ១០៨ នាក់ (ក្នុងនោះមានស្រ្តី ចំនួន ១៤ នាក់) ។ ចំពោះជនសង្ស័យរួមទាំងវត្ថុតាងទាំងអស់ ត្រូវបានកម្លាំងសមត្ថកិច្ចកសាងសំណុំរឿង និងបញ្ជូនទៅកាន់ស្ថាប័នជំនាញពាក់ព័ន្ធ ដើម្បីចាត់ការបន្តទៅតាមនីតិវិធីច្បាប់ ។

ការលើកឡើងនេះដែរ ស្របពេលដែរ លោក ថេង សុថុល អភិបាលខណ្ឌ៧មករា បើកកិច្ចប្រជុំតាមដានវឌ្ឍនភាពការងារបង្រ្កាបការឆបោកតាមប្រព័ន្ធបច្ចេកវិទ្យា (Online Scams) ក្នុងភូមិសាស្រ្តខណ្ឌ៧មករា។

សូមបញ្ជាក់ថា៖ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យាបានកម្រិតទោសទណ្ឌធ្ងន់តាមស្ថានទម្ងន់នៃបទល្មើសដែលឧក្រិដ្ឋជនបានប្រឹព្រឹត្តិដោយមានការផ្តន្ទាទោសដាក់ពន្ធនាគារនិងពិន័យជាប្រាក់ក្នុងទំហំច្រើន។ក្នុងនោះដែរអំពើរៀបចំឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យាត្រូវផ្តន្ទាទោសដាក់ពន្ធនាគារពី១៥ទៅ៣០ឆ្នាំឬអស់មួយជីវិតកាលបើអំពើនេះត្រូវបានប្រព្រឹត្តដោយបណ្តាលឲ្យមានមនុស្សស្លាប់ម្នាក់ឬច្រើន៕

The post សមត្ថកិច្ចខណ្ឌ៧មករា បង្ក្រាបទីតាំងបទល្មើសOnline Scam ចំនួន១១កន្លែង ឃាត់ខ្លួនជនសង្ស័យពាក់ព័ន្ធជាង១០០នាក់ នាពេលកន្លងមក appeared first on Kampuchea Thmey Daily.