អាហ្វហ្គានីស្ថាន Archives - Kampuchea Thmey Daily

ប៉ាគីស្ថាន បើកការវាយប្រហារតាមបណ្តោយព្រំដែនជាមួយអាហ្វហ្គានីស្ថាន សម្លាប់ក្រុមសកម្មយុទ្ធ ២៩នាក់

Minea Neu — Mon, 29 Jun 2026 04:15:48 +0000

មន្ត្រីប៉ាគីស្ថាន បានលើកឡើងថា កងកម្លាំងសន្តិសុខប៉ាគីស្ថានបានបើកប្រតិបត្តិការតាមដីគោកនិងអាកាសតាមបណ្តោយព្រំដែនជាប់អាហ្វហ្គានីស្ថាន ដើម្បីឆ្លើយតបទៅនឹងការវាយប្រហារមួយ ដោយសម្លាប់ក្រុមសកម្មប្រយុទ្ធចំនួន ២៩នាក់ ដែលមានមូលដ្ឋាននៅអាហ្វហ្គានីស្ថាន។ នេះបើយោងតាមភ្នាក់សារព័ត៌មាន AFP ផ្សាយនៅថ្ងៃទី២៩ ខែមិថុនា ឆ្នាំ២០២៦ ។

ក្នុងការបង្ហោះមួយលើប្រព័ន្ធផ្សព្វផ្សាយសង្គម រដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar និយាយថា៖ « ប្រតិបត្តិការនេះត្រូវបានចាប់ផ្តើម ដើម្បីឆ្លើយតបទៅនឹងការវាយប្រហារជាច្រើនលើកដោយក្រុមប្រដាប់អាវុធនៅទូទាំងប្រទេស»។

កងសន្តិសុខប៉ាគីស្ថាន។ រូបភាព៖ Reuters

លោក Tarar សរសេរលើបណ្តាញសង្គម X ដោយសំដៅទៅលើខេត្តចំនួនបី នៅភាគខាងកើតប្រទេសអាហ្វហ្គានីស្ថាន ថា គោលដៅចំនួនបីនៅ Paktia, Paktika និង Kunar ត្រូវបានបំផ្លាញ អំឡុងពេលវាយប្រហារយ៉ាងជាក់លាក់។

ទោះយ៉ាងណាក៏ដោយ ជុំវិញបញ្ហានេះ មិនមានការឆ្លើយតបភ្លាមៗពីប្រទេសអាហ្វហ្គានីស្ថានទេ។

គួរបញ្ជាក់ថា ការវាយប្រហារនៅប្រទេសប៉ាគីស្ថាន ផ្តោតលើប៉ូលីស និងកងកម្លាំងសន្តិសុខបានកើនឡើងក្នុងប៉ុន្មានឆ្នាំថ្មីៗនេះ។

ការវាយប្រហារបានកើតឡើងមួយថ្ងៃ បន្ទាប់ពីក្រុមសកម្មប្រយុទ្ធប្រដាប់ដោយកាំភ្លើង និងគ្រឿងផ្ទុះបានកំណត់គោលដៅទីស្នាក់ការកណ្តាលតំបន់នៃកងអនុសេនាធំយោធា ភាគខាងត្បូងទីក្រុងកំពង់ផែ Karachi ដោយបានសម្លាប់ទាហានប៉ាគីស្ថានបីនាក់។

មិនតែប៉ុណ្ណោះ ប្រតិបត្តិការចុងក្រោយបំផុតទំនងជានឹងធ្វើឱ្យទំនាក់ទំនងដ៏តានតឹងរវាងទីក្រុងអ៊ីស្លាម៉ាបាដ និងទីក្រុងកាប៊ុលដែលមានរួចទៅហើយ កាន់តែតានតឹងថែមទៀត។

ការវាយប្រហារឆ្លងកាត់ព្រំដែន និងប្រតិបត្តិការតាមដីគោកកាលពីថ្ងៃអាទិត្យបានកើតឡើងតិចជាងបីសប្តាហ៍ បន្ទាប់ពីយោធាប៉ាគីស្ថានបានបើកការវាយប្រហារតាមអាកាសលើកន្លែងលាក់ខ្លួនរបស់ក្រុមសកម្មប្រយុទ្ធក្នុងប្រទេសអាហ្វហ្គានីស្ថាន។

ប្រទេសទាំងពីរបានបញ្ចប់ភាពស្ងប់ស្ងាត់ប្រហែលមួយខែ បន្ទាប់ពីទីក្រុងអ៊ីស្លាម៉ាបាដបានពិពណ៌នាថាជាសង្គ្រាមបើកចំហ រវាងប្រទេសជិតខាង ទោះបីជាមានកិច្ចខិតខំប្រឹងប្រែងពីអន្តរជាតិ ដើម្បីសម្របសម្រួលសន្តិភាពយូរអង្វែងក៏ដោយ៕

សម្រួល៖ ណឺ មិនា

The post ប៉ាគីស្ថាន បើកការវាយប្រហារតាមបណ្តោយព្រំដែនជាមួយអាហ្វហ្គានីស្ថាន សម្លាប់ក្រុមសកម្មយុទ្ធ ២៩នាក់ appeared first on Kampuchea Thmey Daily.

ប៉ាគីស្ថាន បើកការវាយប្រហារតាមអាកាសជាថ្មី លើអាហ្វហ្គានីស្ថាន សម្លាប់មនុស្ស ១៣ និង របួស១៤នាក់

Minea Neu — Wed, 10 Jun 2026 06:38:00 +0000

មន្រ្តីអាហ្វហ្គានីស្ថាន បានលើកឡើងនៅថ្ងៃពុធ នេះ ថា ប្រទេសប៉ាគីស្ថានបានបើកការវាយប្រហារតាមអាកាសជាថ្មីទៅលើប្រទេសខ្លួន ដោយសម្លាប់មនុស្សយ៉ាងហោចណាស់ ១៣នាក់ និងរបួស ១៤នាក់។

យោងតាមភ្នាក់ងារសារព័ត៌មាន AP ផ្សាយថ្ងៃទី១០ ខែមិថុនា ឆ្នាំ២០២៦ ប្រទេសទាំងពីរប្រយុទ្ធគ្នាអស់រយៈពេលជាច្រើនខែមកហើយ រួមទាំងសម្លាប់មនុស្សរាប់រយនាក់ផងដែរ។

អ្នកនាំពាក្យរបស់តាលីបង់ លោក Zabihullah Mujahid បាននិយាយថា ការវាយប្រហារតាមអាកាសចុងក្រោយបំផុត បានកំណត់គោលដៅលើខេត្ត Khost, Kunar និង Paktika របស់អាហ្វហ្គានីស្ថាន និងបានសម្លាប់កុមារ ១១នាក់ ស្ត្រីម្នាក់ និងបុរសចំណាស់ម្នាក់។

យន្តហោះចម្បាំងប៉ាគីស្ថាន។ រូបភាព៖ Swarajya

យ៉ាងណា មិនមានការបកស្រាយភ្លាមៗពីប៉ាគីស្ថាននោះទេ។

ការវាយប្រហារទាំងនេះបានកើតឡើងមួយថ្ងៃ បន្ទាប់ពីក្រុមសកម្មប្រយុទ្ធតាលីបង់ប៉ាគីស្ថានសង្ស័យថាបានវាយប្រហារប៉ុស្តិ៍សន្តិសុខមួយនៅក្នុងតំបន់ Hasan Khel ភាគពាយ័ព្យនៃខេត្ត Khyber Pakhtunkhwa ជាប់ព្រំដែនអាហ្វហ្គានីស្ថាន បង្កឱ្យមានការប្រយុទ្ធគ្នាយ៉ាងខ្លាំង ដែលមានសមាជិក ៦នាក់នៃកងរក្សាសន្តិសុខសហព័ន្ធត្រូវបានសម្លាប់ និងជាច្រើននាក់ទៀតរងរបួស។ នេះបើយោងតាមក្រសួងមហាផ្ទៃប៉ាគីស្ថាន។

អាជ្ញាធរមូលដ្ឋាននិយាយកាលពីថ្ងៃអង្គារថា កងកម្លាំងសន្តិសុខបានសម្លាប់អ្នកវាយប្រហារចំនួន ៨នាក់ និងរារាំងការប៉ុនប៉ងឈ្លានពានប៉ុស្តិ៍ត្រួតពិនិត្យ។

រដ្ឋមន្ត្រីក្រសួងមហាផ្ទៃប៉ាគីស្ថាន លោក Mohsin Naqvi និយាយថា ប្រទេសប៉ាគីស្ថាននៅតែរួបរួមគ្នាក្នុងការប្រយុទ្ធប្រឆាំងនឹងក្រុមសកម្មប្រយុទ្ធ ហើយប្រតិបត្តិការប្រឆាំងនឹងក្រុមដែលគំរាមកំហែងដល់សន្តិភាព និងសន្តិសុខ។

គួរបញ្ជាក់ថា ប្រទេសប៉ាគីស្ថាន និងអាហ្វហ្គានីស្ថានបានប្រយុទ្ធគ្នាដ៏សាហាវ ចាប់តាំងពីចុងខែកុម្ភៈ ពេលប្រទេសអាហ្វហ្គានីស្ថានបានបើកការវាយប្រហារឆ្លងកាត់ព្រំដែនទៅលើប្រទេសប៉ាគីស្ថាន ដើម្បីសងសឹក ចំពោះការវាយប្រហារតាមអាកាសរបស់ប៉ាគីស្ថាននៅក្នុងប្រទេសអាហ្វហ្គានីស្ថាន៕

សម្រួល៖ ណឺ មិនា

The post ប៉ាគីស្ថាន បើកការវាយប្រហារតាមអាកាសជាថ្មី លើអាហ្វហ្គានីស្ថាន សម្លាប់មនុស្ស ១៣ និង របួស១៤នាក់ appeared first on Kampuchea Thmey Daily.

ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់

Minea Neu — Tue, 17 Mar 2026 10:29:47 +0000

អ្នកនាំពាក្យរដ្ឋាភិបាលតាលីបង់នៅអាហ្វហ្គានីស្ថាន បានឱ្យដឹងកាលពីថ្ងៃអង្គារថា យោធាប៉ាគីស្ថានបើកការវាយប្រហារតាមអាកាសលើមន្ទីរពេទ្យព្យាបាលអ្នកញៀនថ្នាំមួយកន្លែងនៅទីក្រុង Kabul មានមនុស្សយ៉ាងហោចណាស់ ៤០០ស្លាប់ និងរងរបួស ២៥០ នាក់។ នេះបើយោងតាមភ្នាក់ងាររ៉យទ័រ ផ្សាយថ្ងៃទី១៧ ខែមីនា ឆ្នាំ២០២៦ ។

ការវាយប្រហារតាមអាកាសរបស់ប៉ាគីស្ថាន លើអាហ្វហ្គានីស្ថាន។ រូបភាព៖ Reuters

ប៉ាគីស្ថានបានបដិសេធការអះអាងខាងលើថា៖ «វាមិនពិត ជារឿងបំភាន់! ប៉ាគីស្ថានបានកំណត់គោលដៅយ៉ាងច្បាស់ទៅលើទីតាំងយោធា និងហេដ្ឋារចនាសម្ព័ន្ធគាំទ្រភេរវកម្មប៉ុណ្ណោះ នៅយប់ថ្ងៃចន្ទ»។

ចំណែករដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar បង្ហោះលើបណ្តាញ X ថា៖ « ការផ្ទុះបន្ទាប់បន្សំដែលអាចមើលឃើញបន្ទាប់ពីការវាយប្រហារ បង្ហាញយ៉ាងច្បាស់ពីវត្តមាននៃឃ្លាំងគ្រាប់រំសេវធំៗ»។

គួរបញ្ជាក់ថាការវាយប្រហារតាមអាកាសនេះកើតឡើងប៉ុន្មានម៉ោង បន្ទាប់ពីប្រទេសចិននិយាយថាចិនត្រៀមខ្លួនរួចជាស្រេច ដើម្បីបន្តកិច្ចខិតខំប្រឹងប្រែងបន្ធូរបន្ថយភាពតានតឹងរវាងប្រទេសរដ្ឋអ៊ីស្លាមអាស៊ីខាងត្បូង ជំរុញឱ្យប្រទេសទាំងពីរជៀសវាងការពង្រីកសង្គ្រាម និងវិលត្រឡប់មកតុចរចាវិញ។

ជម្លោះនេះបានចាប់ផ្តើមកាលពីខែមុន វាគឺជាជម្លោះដ៏អាក្រក់បំផុតមិនធ្លាប់មានរវាងប្រទេសជិតខាងដែលមានព្រំដែនប្រវែង ២ ៦០០គីឡូម៉ែត្រពីគ្នា។

យ៉ាងណាជម្លោះរវាងប្រទេសទាំងពីរបានថមថយទៅវិញ ពេលមានប្រទេសជាមិត្ត រួមទាំងប្រទេសចិនសម្របសម្រួល និងបញ្ចប់ការប្រយុទ្ធមុនពេលផ្ទុះឡើងម្តងទៀត។

ការកើនឡើងនៃភាពតានតឹងនេះកើតឡើង ចំពេលមានអស្ថិរភាពកាន់តែខ្លាំងក្នុងតំបន់ជិតខាង ជាកន្លែងដែលមានការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់។

វាជាការសងសឹករបស់ទីក្រុងតេហេរ៉ង់ទៅមូលដ្ឋានទ័ពរបស់អាមេរិកវិញ ដែលធ្វើឱ្យមជ្ឈិមបូព៌ាធ្លាក់ចូលទៅក្នុងវិបត្តិ៕

ប្រែសម្រួល៖ ណឺ មិនា

The post ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់ appeared first on Kampuchea Thmey Daily.

ចិនអំពាវនាវឱ្យប៉ាគីស្ថាន-អាហ្វហ្គានីស្ថាន ដោះស្រាយដោយសន្តិវិធី និងឈប់ប្រយុទ្ធគ្នាជាបន្ទាន់

Minea Neu — Sat, 28 Feb 2026 03:13:34 +0000

ប្រទេសចិនអំពាវនាវឱ្យប៉ាគីស្ថាន-អាហ្វហ្គានីស្ថាន រក្សាភាពអត់ធ្មត់ ព្យាយាមដោះស្រាយគ្នាដោយសន្តិវិធី តាមរយៈការសន្ទនា ការចរចា និងបញ្ចប់ការប្រយុទ្ធគ្នាឱ្យបានឆាប់តាមដែលអាចធ្វើទៅបាន។

យោងតាម Global Times ចុះផ្សាយនៅថ្ងៃទី២៧ខែកុម្ភៈ, អ្នកនាំពាក្យក្រសួងការបរទេសចិន លោកស្រី ម៉ៅ នីង( Mao Ning) លើកឡើងថា៖ « ប្រទេសចិនមានការព្រួយបារម្ភយ៉ាងខ្លាំង ចំពោះការកើនឡើងនៃជម្លោះប៉ាគីស្ថាន-អាហ្វហ្គានីស្ថាន ហើយមានការសោកស្ដាយចំពោះអ្នកស្លាប់ និងរបួស»។

អ្នកនាំពាក្យក្រសួងការបរទេសចិន លោកស្រី ម៉ៅ នីង។ រូបភាព៖ Facebook Page៖ លោកស្រី Mao Ning

បន្ថែមពីនេះ ប្រទេសចិនដើរតួនាទីជាអ្នកសម្របសម្រួលរវាងភាគីទាំងពីរតាមរយៈបណ្តាញក្នុងប្រទេសផ្ទាល់ខ្លួន និងត្រៀមខ្លួនរួចជាស្រេចដើម្បីបន្តស្ថាបនាក្នុងការបន្ធូរបន្ថយភាពតានតឹង កែលម្អទំនាក់ទំនងរវាងប្រទេសទាំងពីរ។

លោកស្រី Mao Ning បន្តថា៖ «ក្រសួង និងស្ថានទូតរបស់យើងនៅប្រទេសប៉ាគីស្ថាន និងអាហ្វហ្គានីស្ថានកំពុងចូលរួមជាមួយភាគីពាក់ព័ន្ធក្នុងប្រទេសទាំងពីរ។ ប្រទេសចិនស្នើសុំឱ្យប្រទេសប៉ាគីស្ថាន និងអាហ្វហ្គានីស្ថានធានាសុវត្ថិភាព និងសន្តិសុខរបស់បុគ្គលិក គម្រោង និងស្ថាប័នចិននៅក្នុងប្រទេសទាំងពីរ»។

គួរបញ្ជាក់ថា រដ្ឋមន្ត្រីក្រសួងការពារជាតិប៉ាគីស្ថាន លោក Khawaja Asif និយាយកាលពីថ្ងៃសុក្រថា ទីក្រុងអ៊ីស្លាម៉ាបាដ( Islamabad) នឹងធ្វើសង្គ្រាមបើកចំហក្នុងពេលឥឡូវនេះ ខណៈខ្លួនអស់ការអត់ធ្មត់ជាមួយអាជ្ញាធរតាលីបង់ បន្ទាប់ពីការវាយប្រហារដោយកងកម្លាំងអាហ្វហ្គានីស្ថានប្រឆាំងនឹងទីតាំងយោធាប៉ាគីស្ថានតាមបណ្តោយតំបន់ព្រំដែនរួមរវាងប្រទេសទាំងពីរ។

ការប៉ះទង្គិចគ្នាជុំថ្មីនេះ បណ្តាលឱ្យមានអ្នកស្លាប់និងរបួសសងខាង ទោះបីជាតួលេខពិតប្រាកដនៅតែមានការជជែកវែកញែកក៏ដោយ។

មិនតែប៉ុណ្ណោះ លោក Antonio Guterres អគ្គលេខាធិការអង្គការសហប្រជាជាតិ កំពុងតាមដានយ៉ាងដិតដល់នូវការប៉ះទង្គិចគ្នាឆ្លងព្រំដែនកាន់តែខ្លាំងឡើងរវាងប្រទេសអាហ្វហ្គានីស្ថាន និងប៉ាគីស្ថាន ដោយសម្តែងការព្រួយបារម្ភយ៉ាងខ្លាំង ចំពោះការកើនឡើងនៃអំពើហិង្សាថ្មីៗនេះ។

លោក Guterres បានជំរុញឱ្យប្រទេសទាំងពីរប្រកាន់ខ្ជាប់យ៉ាងតឹងរ៉ឹងនូវកាតព្វកិច្ចរបស់ខ្លួនក្រោមច្បាប់អន្តរជាតិ ជាពិសេសលើច្បាប់មនុស្សធម៌អន្តរជាតិ។ នេះបើយោងតាមការចុះផ្សាយរបស់ Al Jazeera៕

ប្រែសម្រួល៖ ណឺ មិនា

The post ចិនអំពាវនាវឱ្យប៉ាគីស្ថាន-អាហ្វហ្គានីស្ថាន ដោះស្រាយដោយសន្តិវិធី និងឈប់ប្រយុទ្ធគ្នាជាបន្ទាន់ appeared first on Kampuchea Thmey Daily.

ពិភពលោកមិនអើពើចំពោះជម្លោះរវាងប៉ាគីស្ថាននិងអាហ្វហ្គានីស្ថាន

Rann Reuy — Mon, 13 Oct 2025 03:31:44 +0000

បន្ទាប់ពីការផ្ទុះអាវុធទ្រង់ទ្រាយធំចាប់ពីយប់ថ្ងៃសៅរ៍មក ជម្លោះព្រំដែននៃប្រទេសមូស្លីមពីរគឺ ប៉ាគីស្ថាននិងអាហ្វហ្គានីស្ថាន នៅតែបន្តតានតឹងខ្លាំង ប៉ុន្តែមហាអំណាចធំៗគ្មានចេញប្រតិកម្មអ្វីសោះរហូតដល់ពេលនេះ បើទោះបីជាមានការអះអាងថា ការផ្ទុះអាវុធនោះឈានដល់ការស្លាប់ទាហានច្រើនក៏ដោយ។

ប្រជាជនប៉ាគីស្ថានរត់ភៀសសឹកក្រោយផ្ទះអាវុធជាមួយអាហ្វហ្គានីស្ថាន។ Reuters

កាលពីថ្ងៃសៅរ៍កងកម្លាំងព្រំដែនប៉ាគីស្ថាន និងអាហ្វហ្គានីស្ថាន បានបើកការប្រយុទ្ធគ្នាដោយការបាញ់កាំភ្លើងធំ ដាក់គ្នា និងបានចោទប្រកាន់គ្នាទៅវិញទៅមកថា «បង្កើនភាពតានតឹងនៅតាមព្រំដែន» ។ នៅថ្ងៃអាទិត្យ កងកម្លាំងអាហ្វហ្គានីស្ថានបានឲ្យដឹងថា ខ្លួនបានសម្លាប់ទាហានប៉ាគីស្ថានចំនួន៥៨នាក់នៅក្នុងប្រតិបត្តិការព្រំដែនពេញមួយយប់ថ្ងៃសៅរ៍ ដើម្បីឆ្លើយតបទៅនឹងអ្វីដែលខ្លួនចោទប៉ាគីស្ថានថា «រំលោភបំពានម្តងហើយម្តងទៀតនៃទឹកដី និងដែនអាកាសរបស់អាហ្វហ្គានីស្ថាន»នោះ។ យោងតាម AP កងទ័ពប៉ាគីស្ថានបានបញ្ជាក់តួលេខថា ចំនួនអ្នកស្លាប់តិចជាងឆ្ងាយពីការអះអាងរបស់ភាគីសត្រូវ ដោយនិយាយថាទាហាន ២៣នាក់ត្រូវបានសម្លាប់។

រហូតមកដល់ពេលនេះ ប្រទេសមួយចំនួននៅមជ្ឈិមបូព៌ា បានអំពាវនាវឱ្យ ប្រទេសប៉ាគីស្ថាន និងអាហ្វហ្គានីស្ថានបង្ហាញការអត់ធ្មត់ ប៉ុន្តែគ្មានវត្តមានមហាអំណាចណាមួយបង្ហាញពីក្តីបារម្ភនៃការផ្ទុះអាវុធរវាងប្រទេសទាំងពីរឡើយ។ ប្រទេសដែលបានបង្ហាញក្តីកង្វល់ចំពោះជម្លោះនោះ និងអំពាវនាវឲ្យមានការអត់ធ្មត់ រួមមានប្រទេស អារ៉ាប៊ីសាអូឌីត អ៊ីរ៉ង់ និងប្រទេសកាតាប៉ុណ្ណោះ។

ប្រទេសអារ៉ាប៊ីសាអូឌីត ដែលប៉ាគីស្ថានបានចុះហត្ថលេខាលើកិច្ចព្រមព្រៀងការពារគ្នាទៅវិញទៅមកនាពេលថ្មីៗនេះ បានជំរុញឱ្យភាគីទាំងពីរជៀសវាងការកើនឡើង និងទទួលយកការសន្ទនា។ សេចក្តីថ្លែងការណ៍របស់ក្រសួងការបរទេសនៃព្រះរាជាណាចក្រមូស្លីមនេះ បាននិយាយថា៖«ព្រះរាជាណាចក្រអំពាវនាវឱ្យមានការអត់ធ្មត់ ជៀសវាងការកើនឡើង និងទទួលយកការសន្ទនា និងបញ្ញា ដើម្បីរួមចំណែកកាត់បន្ថយភាពតានតឹង និងការរក្សាសន្តិសុខ និងស្ថិរភាពនៅក្នុងតំបន់»។ នេះយោងតាមភ្នាក់ងារសារព័ត៌មានរ៉ាប៊ីសាអូឌីត (Saudi Press Agency (SPA))។

ភ្នាក់ងារសារព័ត៌មានតូកគី Anadolu បានស្រង់ការថ្លែងរបស់រដ្ឋមន្ត្រីការបរទេសអ៊ីរ៉ង់ លោក Abbas Araghchi ដែលបានអំពាវនាវឱ្យទីក្រុង Islamabad និងទីក្រុង Kabul អនុវត្តការអត់ធ្មត់។

លោក Araghchi បាននិយាយនៅក្នុងបទសម្ភាសន៍ជាមួយទូរទស្សន៍រដ្ឋកាលពីថ្ងៃសៅរ៍ថា «ជំហររបស់យើងគឺថាភាគីទាំងពីរត្រូវតែអនុវត្តការអត់ធ្មត់» ដោយបន្ថែមថា ស្ថិរភាពរវាងប្រទេសទាំងពីររួមចំណែកដល់ស្ថិរភាពក្នុងតំបន់។

កាតាក៏បានជំរុញឱ្យភាគីទាំងពីរផ្តល់អាទិភាពដល់ការសន្ទនា ការទូត និងការអត់ធ្មត់ និងធ្វើការឆ្ពោះទៅរកការមានភាពខុសគ្នាក្នុងលក្ខណៈដែលជួយកាត់បន្ថយភាពតានតឹង និងជៀសវាងការកើនឡើង។

កាតាសេចក្តីថ្លែងការណ៍របស់ក្រសួងការបរទេសបាននិយាយថា គាំទ្ររាល់កិច្ចខិតខំប្រឹងប្រែងក្នុងតំបន់ និងអន្តរជាតិ សំដៅពង្រឹងសន្តិភាព និងសន្តិសុខអន្តរជាតិ ហើយបានអះអាងពីការប្តេជ្ញាចិត្តរបស់ខ្លួនក្នុងការធានាសន្តិសុខ និងវិបុលភាពសម្រាប់ប្រជាជននៃប្រទេសទាំងពីរ។

យោង AP កន្លងមក ប៉ាគីស្ថានបានវាយលុកទីតាំងនានាក្នុងប្រទេសអាហ្វហ្គានីស្ថាន ដោយកំណត់គោលដៅលើអ្វីដែលខ្លួនចោទថាជាកន្លែងលាក់ខ្លួនរបស់ពួកសកម្មប្រយុទ្ធ ប៉ុន្តែទីតាំងទាំងនេះស្ថិតនៅក្នុងតំបន់ដាច់ស្រយាល និងតំបន់ភ្នំ។ ភាគីទាំងពីរក៏បានប៉ះទង្គិចគ្នាតាមបណ្តោយព្រំដែននាពេលកន្លងមក។ ការប៉ះទង្គិចគ្នាយ៉ាងខ្លាំងកាលពីយប់ថ្ងៃសៅរ៍បញ្ជាក់ពីភាពតានតឹងកាន់តែជ្រៅរវាងរដ្ឋអ៊ីស្លាមទាំងពីរ៕

រ៉ាន់ រើយ

The post ពិភពលោកមិនអើពើចំពោះជម្លោះរវាងប៉ាគីស្ថាននិងអាហ្វហ្គានីស្ថាន appeared first on Kampuchea Thmey Daily.

រុស្ស៊ីទំនងអូសទាញរដ្ឋាភិបាលតាលីបង់របស់អាហ្វហ្គានីស្ថានឲ្យចូលរួមសង្គ្រាមនៅអ៊ុយក្រែន

Rann Reuy — Tue, 26 Nov 2024 09:10:05 +0000

ខណៈសង្គ្រាមរុស្ស៊ី-អ៊ុយក្រែនកំពុងតែវិវឌ្ឍទៅរកភាពប្រឈមកាន់តែខ្លាំងដែលអ្នកតាមដានហេតុការណ៍សកលលោក បានសន្និដ្ឋានថា «វាធ្លាក់ចូលសង្គ្រាមលោកលើកទី៣»ទៅហើយនោះ រុស្ស៊ីងាកទៅអូសទាញ បង្កើតនិងពង្រីកទំនាក់ទំនងជាមួយសត្រូវចាស់គឺអាហ្វហ្គានីស្ថានដែលកំពុងគ្រប់គ្រងដោយរដ្ឋាភិបាលតាលីបង់ដែលរងទណ្ឌកម្មពីសំណាក់បស្ចឹមប្រទេសស្រាប់ទៅហើយនោះ។

លេខាធិការក្រុមប្រឹក្សាសន្តិសុខរុស្ស៊ី Sergey Shoigu និងរដ្ឋមន្ត្រីការពារជាតិរបស់ក្រុមតាលីបង់ Min Mullah Yaqub Mujahid ក្នុងជំនួបកាលថ្ងៃចន្ទ។ X

នៅថ្ងៃចន្ទ អតីតរដ្ឋមន្ត្រីការពារជាតិរុស្ស៊ី និងបច្ចុប្បន្នជាលេខាធិការក្រុមប្រឹក្សាសន្តិសុខ លោក Sergey Shoigu បានជួបពិភាក្សាជាមួយឧបនាយករដ្ឋមន្ត្រីរបស់អាហ្វហ្គានីស្ថាន លោក Mohammed Abdul Kabir និងប្រមុខដឹកនាំក្រុមតាលីបង់ច្រើនទៀតដូចជារដ្ឋមន្ត្រីក្រសួងការពារជាតិតាលីបង់ជាដើម ដោយរុស្ស៊ីមានបំណងអភិវឌ្ឍកិច្ចសហប្រតិបត្តិការទ្វេភាគីជាមួយអាហ្វហ្គានីស្ថានក្នុងវិស័យផ្សេងៗរួមមាន ការប្រឈមបញ្ហាសន្តិសុខផងដែរ។ នេះបើយោងទីភ្នាក់ងារព័ត៌មានរុស្ស៊ី TASS។

ក្នុងដំណើរទស្សនកិច្ចទៅកាន់ប្រទេសអាហ្វហ្គានីស្ថានកាលពីថ្ងៃចន្ទ លោក Shoigu បានជួបជាមួយថ្នាក់ដឹកនាំកំពូលរបស់ប្រទេសអាហ្វហ្គានីស្ថាន ដោយបានចរចាលើបញ្ហាសេដ្ឋកិច្ច ការដឹកជញ្ជូន និងសន្តិសុខជាមួយឧបនាយករដ្ឋមន្ត្រី និងរដ្ឋមន្ត្រីចំនួន៤ផ្សេងគ្នា។

លោក Shoigu បាននិយាយថា៖«យើងមានបំណងអភិវឌ្ឍកិច្ចសហប្រតិបត្តិការទ្វេភាគីរវាងរុស្ស៊ី និងអាហ្វហ្គានីស្ថានលើវិស័យជាច្រើន។ ខ្ញុំបញ្ជាក់ពីការត្រៀមខ្លួនរបស់យើងក្នុងការបង្កើតកិច្ចពិភាក្សានយោបាយប្រកបដោយការស្ថាបនារវាងប្រទេសរបស់យើង រួមទាំងក្នុងគោលបំណងផ្តល់កម្លាំងរុញច្រានដល់ដំណើរការនៃដំណោះស្រាយផ្ទៃក្នុងអាហ្វហ្គានីស្ថាន»។

ទស្សនកិច្ចរបស់ប្រមុខដឹកនាំជាន់ខ្ពស់រុស្ស៊ីនាពេលនេះ ចំពេលដែលសង្គ្រាមរុស្ស៊ី-អ៊ុយក្រែនកើនឡើងយ៉ាងខ្លាំង ដោយសារតែការបង្កើនការបាញ់ផ្លោងដោយមីស៊ីលរបស់រុស្ស៊ីនៅទូទាំងប្រទេសអ៊ុយក្រែន ជាពិសេសការប្រើប្រាស់មីស៊ីលដ៏មានឥទ្ធិពលមិនធ្លាប់ប្រើប្រាស់ គឹមីស៊ីល Oreshnik ទៅលើរោងចក្រឧស្សាហកម្មផលិតសម្ភារៈយោធារបស់អ៊ុយក្រែនកាលពីថ្ងៃព្រហស្បតិ៍សប្តាហ៍មុន។

លោក Sergey Shoigu

ប្រធានាធិបតីអ៊ុយក្រែន លោក វ៉ុលឌីមៀ ហ្សេលេនស្គី បាននិយាយនៅថ្ងៃចន្ទថា ប្រទេសរុស្ស៊ីបានប្រើប្រាស់យន្តហោះគ្មានមនុស្សបើក (ដ្រូន) ម៉ាក Shahed ៥០០គ្រឿងក្នុងសប្តាហ៍កន្លងទៅដើម្បីបាញ់ទៅលើទឹកដីអ៊ុយក្រែន។ ដូ្រន Shahed ត្រូវបានផ្តល់ដោយប្រទេសអ៊ីរ៉ង់សម្រាប់សង្គ្រាមនៅអ៊ុយក្រែន។ លើសពីនេះ រុស្ស៊ីបានបង្កើតរោងចក្រចំនួន២ ដើម្បីផលិតដ្រូនប្រភេទនេះសម្រាប់សង្គ្រាម។

មិនត្រឹមទទួលបានការផ្គត់ផ្គង់សម្ភារៈយោធាពីសម្ព័ន្ធមិត្តអ៊ីរ៉ង់នោះទេ រុស្ស៊ីក៏ទទួលបានការផ្គត់ផ្គង់យោធាពីកូរ៉េខាងជើរប្រមាណ១០០០០នាក់សម្រាប់សង្គ្រាមនៅអ៊ុយក្រែនផងដែរ។

ដំណើរទៅកាន់ប្រទេសអាហ្វហ្គានីស្ថាន របស់ប្រមុខដឹកនាំជាន់ខ្ពស់រុស្ស៊ីនាពេលនេះ ត្រូវបានអ្នកជំនាញកិច្ចការអន្តរជាតិមើលឃើញថា រុស្ស៊ីទំនងបញ្ចុះបញ្ចូលរដ្ឋាភិបាលតាលីបាន ឲ្យបញ្ជូនកងទ័ពទៅជួយរុស្ស៊ីថែមទៀត ខណៈក្រុមតាលីបានកំពុងប្រឈមទណ្ឌកម្មរបស់លោកខាងលិចស្រាប់ផងនោះ។

ក្នុងសម័យកាលអតីតសហភាពសូវៀតចន្លោះឆ្នាំ១៩៧៩ ដល់១៩៨៩ អាហ្វហ្គានីស្ថានជាប្រទេសប្រយុទ្ធប្រឆាំងការគ្រប់គ្រងដោយរដ្ឋាភិបាលដែលទទួលការគាំទ្រដោយសហភាពសូវៀត ហើយសង្គ្រាមបានផ្ទុះឡើងយ៉ាងខ្លាំង។ សង្គ្រាមរបស់សហភាពសូវៀតណាមនៅអហ្វហ្គានីស្ថាន បានធ្វើឲ្យសហភាពសូវៀតបាក់មុខមាត់នៅលើឆាកអន្តរជាតិ និងឈានទៅដួលរលំនៅឆ្នាំ១៩៩១ ពោលគឺ២ឆ្នាំក្រោយការដកកងទ័ពចេញពីអាហ្វហ្គានីស្ថាន។

យោងតាមឯកសារប្រវត្តិសាស្ត្រ ក្នុងសង្គ្រាមរយៈពេល១ទសវត្សរ៍នោះ សហភាពសូវៀតបានបាត់បង់កម្លាំងយោងធាប្រមាណ១៥០០០នាក់ ខណៈខាងភាគីអាហ្វហ្គានីស្ថានត្រូវគេរាយការណ៍ថា បានបាត់បង់បុរសប្រមាណ២លាននាក់៕

ដោយ រ៉ាន់ រើយ

ប្រព័ន្ធមីស៊ីលអាមេរិករយៈចម្ងាយឆ្ងាយ ATACMS។

The post រុស្ស៊ីទំនងអូសទាញរដ្ឋាភិបាលតាលីបង់របស់អាហ្វហ្គានីស្ថានឲ្យចូលរួមសង្គ្រាមនៅអ៊ុយក្រែន appeared first on Kampuchea Thmey Daily.

តាលីបង់មិនទទួលស្គាល់ក្រុមនារីរបស់ខ្លួន តំណាងអាហ្វហ្គានីស្ថាននៅអូឡាំពិក

chean virakbot — Fri, 19 Jul 2024 06:35:30 +0000

អ្នកនាំពាក្យនាយកដ្ឋានកីឡានៃរដ្ឋាភិបាលតាលីបង់ របស់ប្រទេសអាហ្វហ្គានីស្ថាន មិនទទួលស្គាល់អត្តពលិកស្រី ៣រូបដែលនឹងតំណាងឱ្យអាហ្វហ្គានីស្ថានក្នុងព្រឹត្តិការណ៍កីឡាអូឡាំពិក ទីក្រុងប៉ារីសក្នុងខែនេះនោះទេ។

គណៈកម្មាធិការអូឡាំពិកអន្តរជាតិ (IOC) បានអញ្ជើញក្រុមអត្តពលិកអាហ្វហ្គានីស្ថាន ចំនួន ៦នាក់ ក្នុងនោះមានស្ត្រី ៣នាក់ និងបុរស ៣នាក់ ដើម្បីពិភាក្សាជាមួយគណៈកម្មាធិការជាតិអូឡាំពិក ដែលត្រូវបាននិរទេសខ្លួនពីប្រទេសអាហ្វហ្គានីស្ថាន។

លោក Atal Mashwani អ្នកនាំពាក្យនៃនាយកដ្ឋានកីឡារបស់រដ្ឋាភិបាលតាលីបង់ បាននិយាយថា ៖«មានតែអត្តពលិក ៣នាក់ប៉ុណ្ណោះដែលតំណាងឱ្យប្រទេសអាហ្វហ្គានីស្ថាន។ បច្ចុប្បន្ន កីឡាសម្រាប់ស្ត្រីនៅអាហ្វហ្គានីស្ថានត្រូវបានហាមឃាត់។ នៅពេលកីឡាស្ត្រីមិនត្រូវបានហ្វឹកហាត់ តើពួកគេអាចទៅក្រុមជម្រើសជាតិបានដោយរបៀបណា? លោកបានប្រាប់ទីភ្នាក់ងារសារព័ត៌មានបារាំង។

ស្ត្រីទាំង ៣នាក់នោះ និងអត្តពលិកបុរសពីរនាក់នោះរស់នៅក្រៅប្រទេសអាហ្វហ្គានីស្ថាន។ ការហ្វឹកហាត់តែមួយគត់នៅក្នុងប្រទេសគឺអ្នកប្រយុទ្ធយូដូ ខណៈមិត្តរួមផ្សេងទៀតជាអត្តពលកម្ម និងហែលទឹក។ នារីទាំង ៣រូបនោះនឹងប្រកួតកីឡាអត្តពលកម្ម និងជិះកង់។ IOC បាននិយាយថា ខ្លួនមិនបានពិគ្រោះជាមួយមន្ត្រីតាលីបង់អំពីក្រុមនេះទេ ហើយពួកគេមិនត្រូវបានអញ្ជើញឱ្យចូលរួមក្នុងការប្រកួតនោះទេ។

អ្នកនាំពាក្យលោក Mark Adams កាលពីខែមុនបានបញ្ជាក់ពីគណៈកម្មាធិការជាតិអូឡាំពិករបស់ប្រទេសអាហ្វហ្គានីស្ថាន រួមទាំងប្រធាន និងអគ្គលេខាធិការដែលកំពុងរស់នៅនិរទេសខ្លួនផងដែរ នៅតែជា “អ្នកសម្របសម្រួលតែមួយគត់សម្រាប់ការរៀបចំ និងការចូលរួមរបស់ក្រុមអាហ្វហ្គានីស្ថាន”។

ប៉ុន្តែនាយកប្រតិបត្តិគណៈកម្មាធិការអាហ្វហ្គានីស្ថាន លោក Dad Mohammad Payenda Akhtari ដែលស្ថិតនៅតែក្នុងប្រទេសបាននិយាយថា ខណៈអត្តពលិកស្ត្រីត្រូវបានរៀបចំនៅក្រៅប្រទេស គណៈកម្មាធិការរបស់លោកបានសម្របសម្រួលជាមួយអាជ្ញាធរតាលីបង់លើបុរស។

Mashwani បានអះអាងថា រដ្ឋាភិបាលកំពុងជួយពួកគេក្នុងការបណ្តុះបណ្តាល និងអាហារូបករណ៍។ លោកបានប្រាប់ AFP ថា ៖«យើងទទួលខុសត្រូវចំពោះអត្តពលិកបុរស ៣នាក់ប៉ុណ្ណោះដែលចូលរួមក្នុងកីឡាអូឡាំពិក»។

អ្នកចូលរួមនឹងប្រកួតប្រជែងនៅក្រោមទង់ខ្មៅ ក្រហម និងបៃតងនៃរដ្ឋាភិបាលចាស់ដែលគាំទ្រដោយលោកខាងលិច ដែលបានដួលរលំ បន្ទាប់ពីការដកទ័ពអាមេរិកកាលពី៣ឆ្នាំមុន។ ចាប់តាំងពីឡើងកាន់អំណាចនៅឆ្នាំ២០២១ រដ្ឋាភិបាលតាលីបង់បានអនុវត្តការទប់ស្កាត់ការច្របាច់ស្ត្រីចេញពីកីឡា ក៏ដូចជាការសិក្សាកម្រិតអនុវិទ្យាល័យ និងសាកលវិទ្យាល័យ។

អង្គការសហប្រជាជាតិបានពណ៌នាការរឹតត្បិតនេះថាជា “ការរើសអើងភេទ”។ IOC បានហាមឃាត់អាហ្វហ្គានីស្ថានពីការប្រកួតនៅឆ្នាំ១៩៩៩ ក្នុងអំឡុងពេលដំបូងនៃការគ្រប់គ្រងរបស់តាលីបង់ រវាងឆ្នាំ១៩៩៦ និង ២០០១ នៅពេលស្ត្រីក៏ត្រូវបានហាមឃាត់ពីការលេងកីឡាផងដែរ។

អាហ្វហ្គានីស្ថានត្រូវបានស្តារឡើងវិញ បន្ទាប់ពីពួកតាលីបង់ត្រូវបានបណ្តេញចេញដោយការលុកលុយក្រោយថ្ងៃទី០៩ ខែវិច្ឆិកា ប៉ុន្តែការប្រកួតនៅទីក្រុងប៉ារីស គឺជាព្រឹត្តិការណ៍អូឡាំពិករដូវក្តៅដំបូងចាប់តាំងពីការត្រឡប់មកវិញរបស់ពួកគេ៕

ប្រែសម្រួល៖ មន្នីរ័ត្ន
ប្រភព៖ Inside The Games

The post តាលីបង់មិនទទួលស្គាល់ក្រុមនារីរបស់ខ្លួន តំណាងអាហ្វហ្គានីស្ថាននៅអូឡាំពិក appeared first on Kampuchea Thmey Daily.

បច្ចេកទេសចម្លែក រក្សាផ្លែឈើក្នុងដីឥដ្ឋ អាចទុកហូបបានរហូតមួយឆ្នាំ

Sonya — Fri, 22 Apr 2022 11:36:00 +0000

កាលពីបុរាណកាល នៅពេលបច្ចេកវិទ្យាទំនើបគ្មានវត្តមាននៅឡើយ ហើយមិនទាន់មានទូរទឹកកកប្រើប្រាស់ដូចបច្ចុប្បន្ន មនុស្សព្យាយាមរកវិធីសាស្រ្តផ្សេងៗតាមបែបធម្មជាតិ ដើម្បីរក្សាផ្លែឈើឱ្យនៅស្រស់បានយូរ។ ក្នុងនោះ ប្រទេសអាហ្វហ្គានីស្ថាន មានបច្ចេកទេសថែរក្សាផ្លែឈើបុរាណមួយដែលបានប្រគល់ទៅកូនចៅតមកដល់បច្ចុប្បន្ន ដែលបច្ចេកទេសនោះ ត្រូវបានគេហៅថា Gangina ។

Gangina គឺជាដុំដីឥដ្ឋដែលមានរាងមូលបិទជិត ទំហំប្រហាក់ប្រហែលនឹងឆ្នាំងបាយ ឬក្អមខ្មែរ ប៉ុន្តែមានរាងសំប៉ែតបន្តិច។ Gangina នីមួយៗត្រូវបានសូនដីឥដ្ឋពីរស្រទាប់ បន្ទាប់មកគេយកវាទៅដុតឆ្អិន ឬសម្ងួតឱ្យស្ងួតល្អ។ ពេលសូនវា គេទុកប្រហោងខាងក្នុង ដើម្បីអាចដាក់ផ្លែឈើទុំប្រហែល ១គីឡូក្រាម ដែលភាគច្រើនគេនិយមប្រើសម្រាប់រក្សាផ្លែទំពាំងបាយជូរ។ យ៉ាងណាមិញ វិធីសាស្ត្រនេះក៏ត្រូវបានប្រើប្រាស់ចំពោះផ្លែឈើដែលមានសម្បកក្រាស់ៗផ្សេងទៀតដូចជា ចេក ផ្លែប៉ោម និងផ្លែសារីជាដើម។

បន្ទាប់ពីដាក់ផ្លែឈើចូលហើយ អ្នកស្រុកអាហ្វហ្គានីស្ថាន បិទមាត់ Gangina ឱ្យជិត រួចក៏យកទៅទុកប្រើប្រាស់ពេលត្រូវការ។ យោងទៅតាមប្រភពពី Oddity Centrals បច្ចេកទេសប្រពៃណីនេះ ប្រជាជនអាចរក្សាផ្លែឈើស្រស់បានរហូតដល់ ៨០% នៃគុណភាពដើម និងទុកបានរយៈពេល ៦ខែទៅ ១ឆ្នាំឯណោះ។ ជនជាតិអាហ្វហ្គានីស្ថានតែងតែប្រើប្រាស់វីធីសាស្ត្រនេះ ដើម្បីរក្សាផ្លែទំពាំងបាយជូរឱ្យស្រស់ល្អ ទុកហូបកំលុងរដូវរងា និងរដូវផ្ការីក ឬទុកលក់ក្នុងអំឡុងពេលបុណ្យ Nowruz។ ហើយពេលពួកគេចង់ហូបផ្លែឈើស្រស់ ពួកគេគ្រាន់តែបំបែកដីឥដ្ឋចេញ និងយកទៅលាងសម្អាត នោះជាការស្រេច។

ដោយសារប្រទេសអាស៊ីខាងត្បូងមួយនេះ មានទំនៀមទម្លាប់ដាំទំពាំងបាយជូតាំងពីឆ្នាំ ២០០០ មុនគ្រឹស្តសករាជ ដូច្នេះរឿងនេះមិនគួរឱ្យភ្ញាក់ផ្អើលប៉ុន្មានទេ ដែលពួកគេអាចបង្កើតនូវវិធីប្លែកៗជាច្រើនដើម្បីរក្សាផ្លែឈើរបស់ពួកគេ។ អ្វីដែលគួរឱ្យចាប់អារម្មណ៍ វិធីសាស្ត្ររក្សាផ្លែឈើក្នុងដីឥដ្ឋនេះ ពិតជាហុចប្រសិទ្ធភាពខ្ពស់ខ្លាំងមិនចាញ់ទូរទឹកកកឡើយ ហើយវាត្រូវបានអ្នកសិក្សាទទួលស្គាល់ជាសាធារណៈផងដែរ។

តើប្រិយមិត្តយល់យ៉ាងណាដែរ ចំពោះបច្ចេកទេសបុរាណមួយនេះ?

ប្រែសម្រួល៖ សន្យា

ចុចអាន៖ រឿងធម្មតាៗសម្រាប់ស្ត្រីទូទៅ តែស្ត្រីអាហ្វហ្គានីស្ថានមិនអនុញ្ញាតឱ្យធ្វើដាច់ខាត

The post បច្ចេកទេសចម្លែក រក្សាផ្លែឈើក្នុងដីឥដ្ឋ អាចទុកហូបបានរហូតមួយឆ្នាំ appeared first on Kampuchea Thmey Daily.

អាហ្វហ្គានីស្ថាន Archives - Kampuchea Thmey Daily

ប៉ាគី​ស្ថាន​​វាយ​ប្រហារ​​លើ​មន្ទី​ពេទ្យ​នៅ​អាហ្វហ្គានីស្ថានសម្លាប់​មនុស្ស​៤០០នាក់ របួស​២៥០នាក់​

ពិភពលោក​​មិនអើពើ​​ចំពោះ​​​ជម្លោះ​​រវាង​ប៉ាគីស្ថាន​និង​អាហ្វហ្គានីស្ថាន​

រុស្ស៊ី​​​ទំនង​​អូសទាញ​រដ្ឋាភិបាល​តាលីបង់របស់​អាហ្វហ្គានីស្ថាន​​ឲ្យ​ចូលរួម​សង្គ្រាម​នៅ​អ៊ុយក្រែន​​

តាលីបង់មិនទទួលស្គាល់ក្រុមនារី​របស់​ខ្លួន តំណាង​​អាហ្វហ្គានីស្ថាននៅអូឡាំពិក

បច្ចេកទេស​ចម្លែក​ ​រក្សា​ផ្លែឈើ​ក្នុង​ដី​ឥដ្ឋ អាចទុកហូបបានរហូត​មួយ​ឆ្នាំ

ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់

ពិភពលោកមិនអើពើចំពោះជម្លោះរវាងប៉ាគីស្ថាននិងអាហ្វហ្គានីស្ថាន

រុស្ស៊ីទំនងអូសទាញរដ្ឋាភិបាលតាលីបង់របស់អាហ្វហ្គានីស្ថានឲ្យចូលរួមសង្គ្រាមនៅអ៊ុយក្រែន

តាលីបង់មិនទទួលស្គាល់ក្រុមនារីរបស់ខ្លួន តំណាងអាហ្វហ្គានីស្ថាននៅអូឡាំពិក

បច្ចេកទេសចម្លែក រក្សាផ្លែឈើក្នុងដីឥដ្ឋ អាចទុកហូបបានរហូតមួយឆ្នាំ