​និន្នាការកើនឡើងនេះ ​ឆ្លុះបញ្ចាំង​ពីការពង្រីក​សមត្ថភាពផលិតកម្ម​ជាបន្តបន្ទាប់ ​និង​ការពង្រឹង​សកម្ម​ភាព​ខ្សែសង្វាក់ផ្គត់ផ្គង់នៅក្នុងតំបន់។​ ​តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) នៅតែបន្តបង្ហាញ​ពីដំណើរប្រតិបត្តិការ​ដ៏រឹងមាំ និងមានស្ថិរភាព ដែលពង្រឹងចំណាត់ថ្នាក់របស់ខ្លួនជាតំបន់ឧស្សាហកម្ម​ឈាន​មុខ​របស់កម្ពុជា។​

​នៅឆ្នាំ២០២៥ ក្រុមហ៊ុន រ៉ូយ៉ាល់ គ្រុប ភ្នំពេញ បានសម្រេចលទ្ធផលហិរញ្ញវត្ថុដ៏រឹងមាំ ដែលឆ្លុះបញ្ចាំងពីប្រសិទ្ធភាពប្រតិបត្តិការ ​និង​ភាពធន់របស់ខ្លួននៅក្នុងបរិយាកាសសេដ្ឋកិច្ច ដែល​មានការប្រែប្រួលជាប្រចាំ។ ​

​ក្រុមហ៊ុនបានកត់ត្រាចំណូលសរុបចំនួនទឹកប្រាក់ ៤១,២ លានដុល្លារ​ និងប្រាក់ចំណេញសុទ្ធចំនួន ៨,១ លានដុល្លារ ​ដែលស្មើនឹងអត្រា ​ផលចំណេញសុទ្ធ ១៩,៧%​។ ​

​សកម្មភាពពាណិជ្ជកម្មនៅក្នុងតំបន់សេដ្ឋកិច្ចពិសេស​ ក៏ឆ្លុះបញ្ចាំងពីកំណើន​គួរឱ្យចាប់អារម្មណ៍​ ដែលបង្ហាញពីការកើនឡើងនៃទំនុកចិត្តរបស់វិនិយោគិន ​និង​ការពង្រីកប្រតិបត្តិការឧស្សាហកម្ម។ ​

​តំបន់សេដ្ឋកិច្ចពិសេស រ៉ូយ៉ាល់ ភ្នំពេញ នៅតែជាអ្នករួមចំណែកដ៏សំខាន់មួយចំពោះ​ការបង្កើត​ឱកាស​ការងារ​ និង​ការអភិវឌ្ឍសេដ្ឋកិច្ចសង្គម នៅកម្ពុជា។ គិត​ត្រឹម​ខែកុម្ភៈ​ ឆ្នាំ២០២៦​ តំបន់សេដ្ឋកិច្ចពិសេសផ្តល់ឱកាសការងារដល់កម្មករ កម្មការិនីចំនួន ៥៥,៩៣៥ នាក់ ដែលគាំទ្រដល់ជីវភាពរស់នៅ និងរួមចំណែកដល់ការអភិវឌ្ឍកម្លាំង​ពលកម្មជំនាញ។

អ្នកឧកញ៉ា គិត ម៉េង ​ប្រធានក្រុមប្រឹក្សាភិបាលនៃ ​ក្រុមហ៊ុន រ៉ូយ៉ាល់ គ្រុប ភ្នំពេញ មាន​ប្រសាសន៍ថា៖ «ការរីកចម្រើនជាបន្តបន្ទាប់ ​និង​ប្រតិបត្តិការឈានទៅមុខជាលំដាប់របស់​ RGPPSEZ គឺបានឆ្លុះបញ្ចាំងពីទំនុកចិត្តដែលយើងខ្ញុំបានទទួល​ពីវិនិយោគិន​ និងការខិតខំប្រឹង​ប្រែង​របស់ភាគីពាក់ព័ន្ធទាំងអស់នៅក្នុងតំបន់នេះ។ យើងខ្ញុំមាន មោទនភាពជាខ្លាំង ក្នុងការចូលរួម​ចំណែកដល់ការអភិវឌ្ឍសេដ្ឋកិច្ចរបស់ប្រទេសកម្ពុជា ដោយការគាំទ្រដល់​ការពង្រីក​វិស័យ ​ឧស្សា​ហកម្ម កំណើនពាណិជ្ជកម្ម និងការបង្កើតឱកាសការងារ»។

​

​នៅក្នុងឆ្នាំ ២០២៥ ​ការនាំចេញទំនិញ​ពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ (RGPPSEZ ) សម្រេចបាននូវ​ទំហំទឹក​ប្រាក់ ២,១៥ ​ពាន់លានដុល្លារ ​តំណាងឱ្យ ៧% ​នៃ​តម្លៃនាំចេញសរុប​របស់កម្ពជា​៕

អត្ថបទ៖ ឡេង ដេត

The post ​ការនាំចេញពី​តំបន់សេដ្ឋកិច្ចពិសេស ​រ៉ូយ៉ាល់ ​ភ្នំពេញ ​សម្រេចបានជាង ៣២៥ ​លានដុល្លារ កើនឡើងជិត ១៤% នៅ ២ ខែដំបូងឆ្នាំនេះ​ appeared first on Kampuchea Thmey Daily.

​អ្នក​ឧកញ៉ា គិត ម៉េង ​បាន​លើកឡើង​នៅ​ក្នុង​កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ ២០២៦ ​នៅ​ព្រឹក​ថ្ងៃទី ​០៤ ​ខែមីនា ​ឆ្នាំ ២០២៦។​

​ប្រធាន​សភា​ពាណិជ្ជកម្មកម្ពុជា ​បានលើកឡើងថា ​កិច្ចប្រជុំកំពូលធុរកិច្ចអាស៊ាន-កម្ពុជា​រៀបចំឡើង​នៅដំណាក់កាលដ៏សំខាន់មួយសម្រាប់សេដ្ឋកិច្ចពិភពលោក ​ខណៈការប្រកួតប្រជែង​ជាយុទ្ធសាស្ត្រ​កាន់តែខ្លាំង ​រវាងមហាអំណាចធំៗ ​ដែលអាស៊ានកំពុងតែធ្វើដំណើរឆ្លងកាត់រលកសម្ពាធ។​

​រលកថ្មីៗ​នៃវិធានការពន្ធឯកតោភាគី ​និងការឆ្លើយតបជាប​ន្តបន្ទាប់​ បានធ្វើឱ្យសេដ្ឋកិច្ចកាន់​តែការ​បែក​បាក់ខ្លាំងឡើង ដោយ​បានបង្កើនល្បឿននៃគម្លៀត និងបង្ហាញពីការផ្លាស់ប្តូរបន្តិចម្តងៗ​ងាក​ចេញ​ពីប្រព័ន្ធពាណិជ្ជកម្មពហុភាគីដែលអាចព្យាករបាន ​និង​ផ្អែកលើបទបញ្ញត្តិច្បាប់​ ឆ្ពោះទៅ​រក​សណ្តាប់​ធ្នាប់​សកល​មួយ​ដែល​ត្រូវ​បាន​ជំរុញ​ដោយប្រតិបត្តិការ និង​ផលប្រយោជន៍។​

​អ្នក​ឧកញ៉ា គិត ម៉េង បញ្ជាក់ថា៖ ​«ជាមួយ​តម្លៃ​ប្រេងឆៅប្រភេទ Brent កើនឡើងខ្ពស់ ​និងការរំខាន​នៅក្នុងច្រកសមុទ្រ Hormuz ដែលជាចំណុចឆ្លងកាត់សម្រាប់ការដឹកជញ្ជូនប្រេង ២០% របស់ពិភព​លោក អាជីវកម្មក្នុងតំបន់របស់យើងត្រូវប្រឈមនឹងសម្ពាធអតិផរណាភ្លាមៗ»។​

បើតាមប្រធានសភាពាណិជ្ជកម្ម​ នៅក្នុងបរិយាកាសនេះ ចំណុចខ្លាំងរបស់​អាស៊ានមិន​មែន​ស្ថិតនៅលើការជ្រើសរើសភាគីនោះទេ ប៉ុន្តែស្ថិតនៅលើការរក្សាភាពបើកចំហ អព្យាក្រឹតភាព និងជាមជ្ឈភាព។

​អ្នកឧកញ៉ា ​គិត ម៉េង ​បញ្ជាក់ថា ​ភារកិច្ចរួមរបស់យើងគឺរក្សាអាស៊ានជាកម្លាំងដែលមានស្ថិរភាព ដែលជាកម្លាំងជំរុញការសន្ទនា រក្សាទំនាក់ទំនងទីផ្សារ​ និងធានាថា កិច្ចសហប្រតិបត្តិការ​សេដ្ឋកិច្ច​នៅ​តែត្រូវបានគ្រប់គ្រងដោយ​ភាពត្រឹមត្រូវ​យុត្តិធម៌ តម្លាភាព និងការគោរពគ្នាទៅវិញទៅមក៕​

អត្ថបទ៖ ឡេង ដេត

The post ​អ្នក​ឧកញ៉ា គិត ម៉េង៖ កំណើន​សេដ្ឋកិច្ចអាស៊ាន​ នឹង​ប្រឈម​ដោយសារ​ជម្លោះ​នៅ​តំបន់មជ្ឈិមបូព៌ា​ appeared first on Kampuchea Thmey Daily.

ផ្សារ វីងសប មានគោលបំណងជួយឱ្យការទិញទំនិញប្រចាំថ្ងៃរបស់អតិថិជនកាន់តែរហ័ស រលូន និងងាយស្រួល ព្រមជាមួយនឹងបង្កើតឱកាសអាជីវកម្មថ្មីៗសម្រាប់សហគ្រិនក្នុងស្រុក តាមរយៈការទិញសិទ្ធិជាដៃគូរអាជីវកម្មរបស់ខ្លួន។

ពិធីសម្ពោធនេះ ត្រូវបានធ្វើឡើងនៅថ្ងៃទី៩ ខែកុម្ភៈ ឆ្នាំ២០២៦ នៅអគារវីង ថៅវ័រ ដោយមានការអញ្ជើញចូលរួមជាកិត្តិយសដ៏ខ្ពង់ខ្ពស់ពីសំណាក់អ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង និងជាអគ្គនាយកប្រតិបត្តិក្រុមហ៊ុន រ៉ូយ៉ាល់គ្រុប និងលោកជំទាវអ្នកឧកញ៉ា ម៉ៅ ចំណាន គិតម៉េង អនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់គ្រុប និងជាប្រធានសមាគមសិល្បករខ្មែរ, សមាជិកសមាជិកាក្រុមប្រឹក្សាភិបាល និងគណៈកម្មាធិការប្រតិបត្តិ នៃក្រុមហ៊ុន រ៉ូយ៉ាល់ គ្រុប, ដៃគូអាជីវកម្ម, ភ្នាក់ងារវីង ម៉ាស្ទ័រ, អ្នកសារព័ត៌មាន និងភ្ញៀវកិត្តិយសជាច្រើននាក់ផងដែរ។

លើសពីនេះ ពិធីសម្ពោធនេះទទួលបានការអញ្ជើញចូលរួមជាកិត្តិយសដ៏ខ្ពង់ខ្ពស់ពីសំណាក់ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងឯកឧត្តម ហ៊ុយ វណ្ណៈ រដ្ឋលេខាធិការទីស្តីការគណៈរដ្ឋមន្ត្រី។

លោក Stéphane Pareinte នាយកគ្រប់គ្រងអាជីវកម្ម នៃផ្សារវីងសប បានលើកឡើងថា នៅថ្ងៃបើកសម្ពោធជាផ្លូវការនេះ ផ្សារ វីងសប បាននាំមកនូវមុខទំនិញចម្រុះ ដោយផ្តោតសំខាន់លើម៉ាកល្បីៗ ដែលផលិតនៅប្រទេសកម្ពុជា រួមជាមួយនឹងម៉ាកផលិតផលដែលជាទីទុកចិត្តមកពីបរទេស ដើម្បីបង្កើតឱកាសជូនសហគ្រាសធុនតូច និងមធ្យមនូវលទ្ធភាពចូលទីផ្សារបានកាន់តែច្រើន។ ហើយស្របពេលនេះដែរ ក៏ដើម្បីផ្តល់ជូនអតិថិជននូវជម្រើសកាន់តែច្រើន សម្បូរបែប និងប្រកបដោយគុណភាពខ្ពស់ ខណៈដែលផ្សារ វីងសប បានបង្ហាញពីចក្ខុវិស័យរបស់យើងសម្រាប់អនាគតនៃផ្សារទំនើបលក់រាយនៅក្នុងប្រទេសកម្ពុជា។

លោក Stéphane Pareinte បានបន្តថា គោលដៅរបស់យើង គឺបង្កើតនូវបទពិសោធទិញទំនិញដ៏សាមញ្ញ រហ័ស ខណៈផ្តល់ឱកាសឱ្យផលិតផលកម្ពុជាបានចូលមកទីផ្សារកាន់តែច្រើន និងជំរុញអាជីវកម្មឲ្យកាន់តែមានភាពរីកចម្រើន។ ផ្សារ វីងសប ក៏បើកទ្វារស្វាគមន៍ដៃគូទិញសិទ្ធិអាជីវកម្ម និងភ្នាក់ងារវីងម៉ាស្ទ័រ ដើម្បីចូលរួមក្នុងអាជីវកម្មផ្សារទំនើបលក់រាយ ដែលបំពាក់ដោយបច្ចេកវិទ្យា ប្រព័ន្ធប្រតិបត្តិការច្បាស់លាស់ និងភាពរឹងមាំនៃម៉ាកយីហោ។

លោក Stéphane Pareinte បានគូសបញ្ជាក់ថា រួមជាមួយ ផ្សារវីងសប ក្រុមហ៊ុនក៏បានបើកសម្ពោធហាង K’FAE ដែលជាគំនិតថ្មីក្នុងការផ្តល់ជូននូវកាហ្វេទំនើប និងសេវាកម្មរហ័សរបស់ខ្លួន ដែលបានប្រើប្រាស់បច្ចេកវិទ្យាស្វ័យប្រវត្តន៍ដំបូងគេនៅកម្ពុជា។ ហាង K’FAE  ផ្តល់ជូននូវភេសជ្ជៈដែលមានគុណភាពខ្ពស់ជាច្រើនប្រភេទ និងអាហារចម្អិនស្រាប់ លឿនរហ័ស ក្នុងតម្លៃសមរម្យ ដែលធ្វើឱ្យអតិថិជនមានងាយស្រួលក្នុងការទិញកាហ្វេ និងអាហារដ៏ឈ្ងុយឆ្ងាញ់ គ្រប់ពេលវេលា និងគ្រប់ទីកន្លែង។ ការរួមគ្នានៃ ផ្សារវីងសប និងហាង K’FAE បានឆ្លុះបញ្ចាំងពីការប្តេជ្ញាចិត្តចំពោះនវានុវត្តន៍ ភាពងាយស្រួល និងការរចនាដែលផ្តោតលើអតិថិជនជាចម្បង ដោយរួមបញ្ចូលនូវការលក់រាយជាមួយនឹងដំណោះស្រាយឌីជីថល ដើម្បីបម្រើសេវាកម្មជូនអតិថិជន។

លោក Stéphane Pareinte បន្ថែមទៀតថា ការទិញសិទ្ធិអាជីវកម្មរបស់ ផ្សារវីងសប ត្រូវបានរចនាឡើងដើម្បីជួយជម្រុញដល់ម្ចាស់អាជីវកម្មក្នុងស្រុក ដោយផ្តល់នូវការគាំទ្រប្រតិបត្តិការពីដើមរហូតដល់ចប់ រួមទាំងប្រព័ន្ធប្រតិបត្តិការហាង ខ្សែសង្វាក់ផ្គត់ផ្គង់ សមាហរណកម្មបច្ចេកវិទ្យា និងការធ្វើទីផ្សារផងដែរ។ ដំណើរការនេះនឹងជួយឱ្យអាជីវកម្មរបស់ដៃគូសហការមានភាពរីកចម្រើន ប្រកបដោយចីរភាព ហើយក៏បានចូលរួមចំណែកដល់ការបង្កើតការងារ និងប្រព័ន្ធអេកូស៊ីលក់រាយរបស់ប្រទេសកម្ពុជា ដែលកំពុងមានភាពវិវត្តគួរឲ្យកត់សម្គាល់ផងដែរ។

ជាមួយគ្នានេះដែរ ការបើកសម្ពោធជាផ្លូវការនេះ គឺជាការចាប់ផ្តើមនៃការពង្រីកអាជីវកម្មទូទាំងប្រទេសរបស់ ផ្សារវីងសប ជាមួយនឹងផែនការពង្រីកអាជីវកម្មរបស់ខ្លួននៅតាមបណ្តាហាង ដែលគ្រប់គ្រងដោយក្រុមហ៊ុន និងតាមរយៈហាងរបស់ដៃគូទិញសិទ្ធិអាជីវកម្មទាំងអស់ ដើម្បីបង្កើនលទ្ធភាពរបស់សហគមន៍ក្នុងការចូលទិញទំនិញទៅក្នុងផ្សារទំនើបលក់រាយ ព្រមទាំងបង្កើតឱកាសអាជីវកម្មបន្ថែមទៀត។

លើសពីនេះ រួមជាមួយនឹងហាង K’FAE ដែលជាគំនិតថ្មីក្នុងការផ្តល់ជូននូវកាហ្វេទំនើប និងសេវាកម្មរហ័ស ផ្សារវីងសប គាំទ្រដល់ដៃគូទិញសិទ្ធិអាជីវកម្មរបស់ខ្លួន និងភ្នាក់ងារវីងម៉ាស្ទ័រ ព្រមទាំងលើកកម្ពស់អាជីវកម្មក្នុងស្រុក និងសហគមន៍ តាមរយៈការច្នៃប្រឌិតភាពងាយស្រួល និងការគាំទ្រយ៉ាងមុតមាំពីសំណាក់ក្រុមហ៊ុន រ៉ូយ៉ាល់គ្រុប។

សូមបញ្ជាក់ថា ផ្សារវីងសប ជាផ្នែកមួយនៃក្រុមហ៊ុន រ៉ូយ៉ាល់គ្រុប ដែលជាគំនិតថ្មីនៃផ្សារទំនើបនៅកម្ពុជា មានគោលបំណងផ្តល់បទពិសោធទិញទំនិញ ដែលមានភាពរហ័ស សាមញ្ញ និងងាយស្រួលជូនអតិថិជន។ ផ្សារវីងសប មានទំនិញជាច្រើនប្រភេទ រួមទាំងផលិតផលខ្មែរជាច្រើនមុខ ដែលត្រូវបានជ្រើសរើសយ៉ាងសម្រិតសម្រាំង ដោយរួមបញ្ចូលនូវបច្ចេកវិទ្យាលក់រាយបែបឆ្លាតវៃ ប្រព័ន្ធបង់ប្រាក់ឌីជីថល អាហារចម្អិនស្រាប់ និងសេវាកម្មល្អបំពេញតាមតម្រូវការប្រចាំថ្ងៃនៅក្នុងទីតាំងតែមួយ៕

អត្ថបទពាណិជ្ជកម្ម

The post ក្រុមហ៊ុន រ៉ូយ៉ាល់គ្រុប បើកឱ្យដំណើរការ ផ្សារ វីងសប និងហាង K’FAE ចំនួន ៤ ក្នុងពេលតែមួយ appeared first on Kampuchea Thmey Daily.

ក្នុង​ឱកាស​នោះ លោក​ណែនាំ​​ឲ្យ​ប្រធាន​​សភាពាណិជ្ជកម្ម​ក្រៅប្រទេសធ្វើស្ថិតិប្រជាពលរដ្ឋខ្មែរ ទាំងអ្នកដែលមានសញ្ជាតិដើម និងអ្នកដែលបានចូលសញ្ជាតិ​បរទេស ​ដើម្បី​កៀរករ​ធនធាន​​ជួយកសាងនិង​អភិវឌ្ឍ​ប្រទេសជាតិ។

អ្នក​ឧកញ៉ា​បាន​បញ្ជាក់​​ថា ប្រជាពលរដ្ឋខ្មែរដែលបានចាកចេញ​ទៅក្រៅប្រទេសតាំងពីឆ្នាំ ១៩៧៥ ឬ ១៩៨០ បានបន្ត​ដល់​ជំនាន់ទី ២ និងទី ៣ ​ដែលមានអាយុចន្លោះពី ២០ ទៅ ៣០ ឆ្នាំ។ ជំនាន់ទី ១ អាចនឹងមានវ័យចំណាស់ ហើយ​ពួកគាត់បានផ្ទេរទ្រព្យសម្បត្តិនិងធនធាន​ទៅឱ្យ​កូនចៅ​ជំនាន់​ក្រោយ​ដែលមានសមត្ថភាពនិងធនធានច្រើន។

គោលដៅសំខាន់គឺស្វាគមន៍ពលរដ្ឋ​ឱ្យត្រឡប់មក​ស្រុកខ្មែរវិញ ដើម្បីចូលរួមចំណែកជួយកសាងនិង​អភិវឌ្ឍ​ប្រទេសជាតិ ព្រោះពួកគេជាធនធានដ៏សំខាន់។

បើតាមអ្នក​ឧកញ៉ា កន្លងទៅ​ការទាក់ទាញការវិនិយោគច្រើនផ្ដោតលើជនបរទេស ប៉ុន្តែ​យុទ្ធសាស្ត្រថ្មីនេះ​​ត្រូវយកចិត្តទុកដាក់​លើពលរដ្ឋ​ខ្មែរដែលរស់នៅក្រៅប្រទេស ដែលមាន​សញ្ជាតិបរទេសតែមានកំណើត​ជាខ្មែរ។ លោក​លើកឡើង​ប្រទេសគោលដៅសំខាន់ៗរួមមាន បារាំង អូស្ត្រាលី នូវេហ្សេឡង់ កាណាដា និងសហរដ្ឋអាមេរិក។

គោលនយោបាយគាំទ្រពីរដ្ឋាភិបាលតាំង​ពី​អាណត្តិរបស់សម្ដេចតេជោ បានផ្ដល់នូវទិដ្ឋាកាអចិន្ត្រៃយ៍មួយជីវិត ដែលអនុញ្ញាតឱ្យពលរដ្ឋ​ខ្មែររស់នៅ​ក្រៅស្រុក អាចចេញចូលស្រុកខ្មែរបានដោយមិនបាច់សុំទិដ្ឋាការឡើយ។

​អ្នក​ឧកញ៉ាជំរុញ​ឲ្យ​សភាពាណិជ្ជកម្មក្រៅប្រទេស ចាំបាច់ត្រូវផ្សព្វផ្សាយព័ត៌មាននេះឱ្យបានទូលំទូលាយ ដើម្បីឱ្យពលរដ្ឋខ្មែរនៅក្រៅស្រុកបានដឹងនិងសម្រួលដល់ការមកលេងឬវិនិយោគនៅកម្ពុជា។

បើតាម​អ្នកឧកញ៉ា​ តំណាងសភាពាណិជ្ជកម្មកម្ពុជានៅក្រៅប្រទេសគឺជាតួអង្គយ៉ាងសំខាន់ក្នុងការអនុវត្តយុទ្ធសាស្ត្រទាក់​ទាញ​ធនធាន និងកម្លាំងសាមគ្គីពីខ្មែរនៅក្រៅស្រុកមកជួយប្រទេសជាតិវិញ៕

The post ឧកញ៉ា គិត ម៉េង ណែនាំ​ឲ្យ​សភាពាណិជ្ជកម្ម​ក្រៅ​ប្រទេស​ឲ្យ​ធ្វើស្ថិតិពលរដ្ឋដើមកំណើត​ខ្មែរ ដើម្បី​កៀរករ​ធនធាន​​ចូល​រួម​អភិវឌ្ឍ​ប្រទេសកំណើត​ appeared first on Kampuchea Thmey Daily.

នៅក្នុងមហាសន្និបាតបូកសរុបលទ្ធផលការងារឆ្នាំ ២០២៥ និងលើកទិសដៅការងារឆ្នាំ២០២៦ របស់​សភា​ពាណិជ្ជកម្ម​កម្ពុជា​ នៅ​ថ្ងៃទី២៨ ខែមករា ឆ្នាំ២០២៦ ​អ្នក​ឧកញ៉ា គិត ម៉េង បាន​​លើក​ឡើង​ថា នៅក្នុងឆ្នាំ ១៩៨០ ផលិតផល​ក្នុង​ស្រុក​សរុប (GDP) គឺ​មាន​ត្រឹម​តែ ៧១៦ លានដុល្លារប៉ុណ្ណោះ ប៉ុន្តែនៅក្នុងឆ្នាំ២០២៦ នេះ តាមការរំពឹងទុក GDP នឹង​កើន​ពី ៧១៦ លានដុល្លារ មកដល់ប្រមាណ ៥៣ ប៊ីលានដុល្លារ​អាមេរិក។

អ្នកឧកញ៉ាបានថ្លែងបន្តទៀតថា ក្នុង​នោះ GDP សម្រាប់មនុស្សម្នាក់ មានការ​ហក់​លោត​​យ៉ាងខ្លាំង ដោយ​ឈាន​ដល់​ប្រមាណ ៣,០២០ ដុល្លារ​ក្នុង​ឆ្នាំ ២០២៦ ធៀប​នឹង ៣០០ ដុល្លារ​ក្នុង​ឆ្នាំ ២០០០ ។

អ្នក​ឧកញ៉ា៖« ទោះបីជាមានបញ្ហាប្រឈមជាសកលក៏ដោយ សេដ្ឋកិច្ចកម្ពុជានៅតែរក្សាបាននូវអត្រា​កំណើនដ៏រឹងមាំគឺ ៥% ពេញមួយឆ្នាំ ២០២៥ ។​ ព្រោះ​ឆ្នាំ ២០២៥ គឺជាចំណុច​របត់​ដ៏​សំខាន់​សម្រាប់​អាជីវ​កម្ម​កម្ពុជា ដែលពោរពេញទៅដោយបញ្ហាប្រឈម និងឱកាស ដែល​រួមមាន​ភាពតានតឹង​ភូមិសាស្ត្រ​នយោបាយ សង្គ្រាម​ពាណិជ្ជកម្ម​រវាងរុស្ស៊ី និងអ៊ុយក្រែន បញ្ហានៅមជ្ឈិមបូព៌ា និងជម្លោះព្រំដែនកម្ពុជា-ថៃ ជា​ដើម​»។

យោង​តាម​​ការ​វាយ​តម្លៃ​នៃ​ក្របខ័ណ្ឌ​ហិរញ្ញវត្ថុ​សាធារណៈរយៈពេល​មធ្យម​របស់​រាជរដ្ឋាភិបាល នៅ​ឆ្នាំ ២០២៥ ផលិតផល​ក្នុង​ស្រុក​សរុប​សម្រាប់​មនុស្សម្នាក់ (GDP Per Capita) របស់​ពលរដ្ឋ​កម្ពុជា​​រំពឹង​ថា នឹង​កើន​ដល់ ២ ៩២៤ ដុល្លារ​អាម៉េរិក​។

សេដ្ឋកិច្ចកម្ពុជានៅ​ឆ្នាំ ២០២៥ ក៏​ត្រូវ​បាន​ព្យាករ​ថា ស្ថិត​ក្នុង​អត្រា​កំណើន ៦,៣% ដែល​កំណើន​នេះ​គាំទ្រ​ដោយ​វិស័យ​សេដ្ឋកិច្ច​សំខាន់ៗ ទី១. វិស័យ ឧស្សាហកម្ម នឹង​មាន​កំណើន ៨,៦% ទី២. វិស័យ​សេវាកម្ម​នឹង​មាន​កំណើន ៥,៦% និងទី៣. វិស័យ​កសិកម្ម នឹង​កើនឡើង ១,១%។ ចំណែកអតិផរណា ត្រូវបានព្យាករថា នឹង​ស្ថិត​ក្នុង​រង្វង់ ២,៥% ក្នុង​នោះ វិស័យសង្គមកិច្ច នៅតែត្រូវបានចាត់ទុកជាវិស័យអាទិភាពទី១៕

ដោយ៖ ឌិន ថារី

The post តាមការរំពឹងទុកឆ្នាំ២០២៦ GDP ក្នុងស្រុកសរុបនឹងកើនដល់ប្រមាណ ៥៣ ប៊ីលានដុល្លារ appeared first on Kampuchea Thmey Daily.

​

ថ្លែង​នៅ​ក្នុងមហាសន្និបាតបូកសរុប​លទ្ធផលការងារឆ្នាំ ២០២៥ និង​លើកទិសដៅការងារឆ្នាំ ២០២៦ របស់សភាពាណិជ្ជកម្មកម្ពុជានៅ​ព្រឹក​មិញ​នេះ អ្នកឧកញ៉ា គិត ម៉េង ​​បាន​ណែនាំ​​ឲ្យ​ប្រធាន​សភា​ពាណិជ្ជកម្ម​ខេត្តត្រូវ​ធ្វើ​ការ​ឲ្យ​ជិតស្និទ្ធជាមួយអាជ្ញាធរដែនដី ជាពិសេស​ជាមួយ​អភិបាល​នៃ​គណៈអភិបាលខេត្ត​នីមួយៗ និងត្រូវយកចិត្តទុកដាក់គាំទ្រ​ដល់​សហគ្រាស​​ខ្នាតតូច SME (Small and Medium Enterprise) និង​មីក្រូ (MSME) ដើម្បី​ឲ្យ​ទទួល​បាន​ជោគជ័យ ព្រោះអាជីវកម្មខ្នាតតូច​គឺជាឆ្អឹងខ្នងនៃសេដ្ឋកិច្ច។

ជាមួយ​គ្នា​នេះ ត្រូវ​ពង្រឹងទំនាក់ទំនងជាមួយប្រទេសជិតខាងតាមព្រំដែន ដើម្បីទាក់ទាញ​ការ​វិនិយោគ​មក​កាន់​កម្ពុជា និងជំរុញការធ្វើពាណិជ្ជកម្មទៅវិញទៅមក និង​បង្កើន​កិច្ចសហការ​ជាមួយ​ក្រុម​ប្រឹក្សា​អភិវឌ្ឍន៍ដែលចំណុះឲ្យ​រដ្ឋបាល​ខេត្ត ដើម្បីសម្របសម្រួល​ការងារវិនិយោគ​ផ្សេងៗ។

លោក​ក៏​​លើក​ឡើង​បន្ថែម​ពាក់ព័ន្ធ​ការ​កំណត់នូវឧត្តមភាព​ប្រកួតប្រជែងរបស់ខេត្តនីមួយៗ ឧទាហរណ៍​ដូចជាវិស័យទេសចរណ៍​នៅសៀមរាប កសិ​កែច្នៃនៅកំពង់ធំ ឬភស្តុភារកម្មនៅខេត្តព្រះសីហនុ ។

អ្នក​ឧកញ៉ាបាន​គូស​បញ្ជាក់​ថា សភាពាណិជ្ជកម្មមិនមែនគ្រាន់តែជាបណ្តាញធុរកិច្ចប៉ុណ្ណោះទេប៉ុន្តែគឺ​ជា​តំណាងវិស័យឯកជន ជាក្បាល​ម៉ាស៊ីននៃសេដ្ឋកិច្ចជាតិ និងជាមុខមាត់នៃសក្តានុពលរបស់កម្ពុជា​នៅលើ​ឆាកអន្តរជាតិ។

សភាពាណិជ្ជកម្មកម្ពុជាគឺជា​ដៃគូ​របស់​រាជរដ្ឋាភិបាល។ បេសកកម្មចម្បងរបស់​សភា​ពាណិជ្ជកម្ម​ គឺជាស្ពាន​ចម្លងរួមគ្នា​រវាង​សហគមន៍ធុរកិច្ច និងចក្ខុវិស័យយុទ្ធសាស្ត្ររបស់រាជរដ្ឋាភិបាល។

បើតាមអ្នក​ឧកញ៉ា សភាពាណិជ្ជកម្មកម្ពុជាបានរួមចំណែក​ដ៏សំខាន់ចំពោះវិស័យឯកជន គឺការ​ទទួល​បាន​ឱកាស​ចូលជួបពិភាក្សាដោយផ្ទាល់ជាមួយថ្នាក់ដឹកនាំកម្រិតខ្ពស់បំផុត។

តាម​រយៈ​វេទិកា​រាជរដ្ឋាភិបាល​និង​ផ្នែកឯកជន ដោយសារ​សភាពាណិជ្ជកម្ម​បានបញ្ចេញ​សំឡេងរួមគ្នា​ផ្អែកលើមូលដ្ឋាន​ច្បាស់​លាស់ បាន​ដោះស្រាយដោយជោគជ័យនូវ​បញ្ហាដែល​នៅ​សេស​សល់​យូរអង្វែង​ក្នុងវិស័យ​ពន្ធដារ គយ និង​ភស្តុភារកម្ម។ កត្តានេះបានបញ្ជាក់យ៉ាងច្បាស់ថា សភាពាណិជ្ជកម្មកម្ពុជាគឺជាតំណាងស្របច្បាប់នៃ​វិស័យឯកជន។ អ្នក​ឧកញ៉ា គិត ម៉េង​ បញ្ជាក់បន្ថែម។

បច្ចុប្បន្ន​នេះ បណ្តាញសភាពាណិជ្ជកម្មកម្ពុជាបានពង្រីកខ្លួនលើ ២៥ រាជធានីខេត្ត និង​បាន​ពង្រីក​លើសពីព្រំដែនជាតិ​ដោយ​មាន​ការិយាល័យ​តំណាងចំនួន ៨ នៅទូទាំងពិភពលោករួមមាននៅប្រទេស​កាណាដា ជប៉ុន អូស្ត្រាលី សហរដ្ឋ​អាមេរិក និងនូវែលសេឡង់៕

The post អ្នកឧកញ៉ា គិត ម៉េង ជំរុញ​សភា​ពាណិជ្ជកម្ម​​​​ខេត្ត​​ ត្រូវ​ធ្វើ​ការ​​ឲ្យ​ជិតស្និទ្ធជាមួយ​អាជ្ញាធរ​​ដែនដី និង​គាំំទ្រ​ការ​អភិវឌ្ឍ​សហគ្រាស​ធុន​តូច​​ និង​មធ្យម appeared first on Kampuchea Thmey Daily.

នៅក្នុងមហាសន្និបាតបូកសរុបលទ្ធផលការងារឆ្នាំ ២០២៥ និងលើកទិសដៅការងារឆ្នាំ២០២៦ របស់​សភា​ពាណិជ្ជកម្ម​កម្ពុជា​ នៅ​ថ្ងៃទី២៨ ខែមករា ឆ្នាំ២០២៦ នេះ អ្នក​ឧកញ៉ា គិត ម៉េង បាន​មាន​ប្រសាសន៍​ថា សភា​ពាណិជ្ជកម្ម​កម្ពុជា មិន​ត្រឹម​តែ​ជា​ស្ថាប័នធម្មតា​មួយ​ទេ ប៉ុន្តែ​គឺ​ជា “ដៃគូ” របស់​រាជរដ្ឋាភិបាល។

តាម​ច្បាប់ស្តី​ពី​សភាពាណិជ្ជកម្ម សភាពាណិជ្ជកម្ម​មាន​បេសកកម្ម​ចម្បង គឺធ្វើជាស្ពានចម្លងរួមគ្នារវាងសហគមន៍ធុរកិច្ច និង​ចក្ខុ​វិស័យ​យុទ្ធសាស្ត្ររបស់រាជរដ្ឋាភិបាល។

ការរួមចំណែកដ៏សំខាន់បំផុតរបស់សភាពាណិជ្ជកម្មកម្ពុជា ចំពោះវិស័យឯកជនផ្អែកលើមូលដ្ឋានច្បាស់លាស់សភា​ពាណិជ្ជកម្ម​បាន​ដោះស្រាយដោយជោគជ័យនូវបញ្ហាដែលនៅសេសសល់យូរអង្វែងក្នុងវិស័យពន្ធដារ គយ និងភស្តុភារកម្ម។

អ្នក​ឧកញ៉ា បាន​បន្ត​ថា បច្ចុប្បន្ន សភាពាណិជ្ជកម្មកម្ពុជាបានពង្រីកខ្លួនលើសពីព្រំដែនជាតិ ដោយ​មាន​ការិយាល័យតំណាងចំ​នួន ៨ នៅទូទាំងពិភពលោក រួមមាននៅប្រទេសកាណាដា ជប៉ុន អូស្ត្រាលី សហរដ្ឋអាមេរិក និងនូវែលសេឡង់។

ការិយាល័យ​ទាំងអស់ មានបេសកកម្មចម្បង គឺត្រូវដើរ​តួជា​ច្រក​ទ្វារ​យុទ្ធសាស្ត្រ​ក្នុងការធានាថា ម៉ាកសញ្ញា “ផលិតនៅកម្ពុជា” (Made in Cambodia) នឹងក្លាយ​ជា​សញ្ញា​សម្គាល់​នៃ​គុណភាព និង​ភាពជឿជាក់នៅក្នុងទីផ្សារអន្តរជាតិ។

ស្រប​តាម​បរិបទ​នេះ អ្នក​ឧកញ៉ា គិត ម៉េង បាន​គូស​បញ្ជាក់​ថា «ឆ្នាំ២០២៦ នឹងក្លាយ​ជាឆ្នាំ​នៃ​ការ​ជំរុញ​សន្ទុះ​សេដ្ឋកិច្ច​ឱ្យកាន់តែលឿន ខណៈដែលកំណើនសេដ្ឋកិច្ចជាតិត្រូវបានព្យាករណ៍ក្នុងកម្រិត ៥,០% សភា​ពាណិជ្ជកម្ម​កម្ពុជា ត្រូវ​ជំរុញ​វិស័យ​ឯកជន​ឱ្យ​ត្រូវតាមគោលនយោបាយរបស់រាជរដ្ឋាភិបាល។

យោងតាម​ធនាគារ​ជាតិ​នៃ​កម្ពុជា ​ក្នុង​ឆ្នាំ២០២៦ សេដ្ឋកិច្ច​កម្ពុជាអាចនឹង​សម្រេច​បាន​ក្នុងរង្វង់ ៥% និង​អត្រា​អតិផរណា ២,៣% ទោះបីជាកម្ពុជា និងបណ្តាប្រទេសនានានៅតែបន្តប្រឈមនឹងបញ្ហានៃការអូសបន្លាយពេលនៃកត្តភូមិសាស្រ្តនយោបាយ និងសង្រ្គាមពាណិជ្ជកម្មនៃប្រទេសមហាអំណាចនៅលើពិភពលោកក្តី។

លោក​ស្រី ជា សិរី ទេសាភិបាល​ធនាគារ​ជាតិ​នៃ​កម្ពុជា បាន​មាន​ប្រសាសន៍​ថា ទស្សនវិស័យនៅឆ្នាំ២០២៦ កម្ពុជា​នឹងត្រូវ​ខិតខំ​ប្រឹងប្រែងដោះស្រាយបញ្ហាប្រឈម និងទាញយកអត្ថប្រយោជន៍ពីឱកាសថ្មីៗ។

ពហុភាគី​កម្ម​សេដ្ឋកិច្ច ការ​វិនិយោគ​បន្តបន្ទាប់​លើហេដ្ឋាចេនាសម្ព័ន្ធ និងការជ្រៀតចូលកាន់តែស៊ីជម្រៅទៅក្នុងតំបន់ និង​សេដ្ឋកិច្ច​ពិភព​លោក បាន​ផ្តល់​ជាមូលដ្ឋានរឹងមាំសម្រាប់កំណើនរយៈពេលមធ្យម។

ស្រម​តាម​យុទ្ធសាស្រ្ត​បញ្ចកោណ​ដំណាក់​កាល​ទី​១ របស់​រាជរដ្ឋាភិបាល​កម្ពុជា​ កិច្ច​ខិតខំ​ប្រឹង​ប្រែង​ក្នុង​ការ​លើក​កម្ពស់​ផលិត​ភាព ការ​ពង្រឹង​ធនធាន​មនុស្ស​ ការ​កែ​លម្អ​បរិយាកាស​អាជីវកម្ម និង​វិនិយោគ និង​ការ​ធ្វើ​ទំនើប​កម្មស្ថាប័ន​សេដ្ឋកិច្ច និង​ជួយ​គាំ​ទ្រ​ដល់​ការ​អភិវឌ្ឍ​សកម្មភាព​សេដ្ឋកិច្ច​ដែល​មាន​តម្លៃ​​បន្ថែម​ និង​កំណើន​ដែល​មាន​ភាព​ធន់​កាន់​តែ​ខ្លាំង​៕

The post អ្នកឧកញ៉ា គិត ម៉េង៖ ២០២៦ នឹងក្លាយជាឆ្នាំជំរុញសន្ទុះសេដ្ឋកិច្ចកាន់តែលឿន appeared first on Kampuchea Thmey Daily.

ថ្លែង​នៅ​ក្នុង​សិក្ខាសាលាផ្សព្វផ្សាយអំពី “និយាម​នីតិវិធី​ប្រតិបត្តិ​សម្រាប់​អនុវត្តវិធានការ​បង្ការ និង​ទប់ស្កាត់​ការ​ក្លែងបន្លំ​ដើម​កំណើតទំនិញនាំចេញទៅកាន់ទីផ្សារសហរដ្ឋអាម៉េរិក” នៅ​ថ្ងៃ​ទី​២២ ខែ​ធ្នូ នេះ អ្នក​ឧកញ៉ា គិត​ ម៉េង បាន​ថ្លែង​ថា អង្គសិក្ខាសាលានេះ​នឹងជំរុញវិនិយោគិនដែលនាំចេញទំនិញទៅកាន់ទីផ្សារសហរដ្ឋអាម៉េរិក ឱ្យ​អនុលោម​ទៅ​តាម​ច្បាប់ និងបទប្បញ្ញត្ដិជាធរមាន។

ទន្ទឹមនេះ អ្នកឧកញ៉ា ក៏​បានស្នើក្រសួង-ស្ថាប័នពាក់ព័ន្ធផ្ដល់កិច្ចសម្រួលពាណិជ្ជកម្មជាអតិបរមាជូនដល់ធុរជន និង​ត្រូវដាក់ទោសទណ្ឌដល់ធុរជនប្រព្រឹត្ដបទល្មើស ព្រមទាំងបានអំពាវនាវដល់ធុរជន ក្រុមហ៊ុនដឹកជញ្ជូន ភ្នាក់​ងារ​ផ្ដល់​សេវា និងជើងសាគយ ត្រូវចូលរួមការប្រកាសនាំចេញ-នាំចូលទំនិញ​ឱ្យបាន​ត្រឹមត្រូវ​ស្របតាម​ច្បាប់ និង​បទ​ប្បញ្ញត្ដិជាធរមាន ជៀសវាង​ការប្រព្រឹត្ដបទល្មើស​ដែលអាច​ឈាន​ដល់​ការចុះ​មក​អង្កេត​ពី​សហរដ្ឋអាម៉េរិក​ដែល​អាច​ធ្វើ​ឱ្យ​ប៉ះពាល់​ធ្ងន់ធ្ងរ​ដល់​ទីផ្សារនាំចេញរបស់កម្ពុជា។

ជា​មួយ​គ្នា​នេះលោក បណ្ឌិត​ គុណ ញឹម បានគូសរំលេចពីសារៈសំខាន់នៃទីផ្សារសហរដ្ឋអាម៉េរិក ចំពោះ​ទំនិញ​នាំ​ចេញ​ពី​កម្ពុជា ដែលទីផ្សារនេះស្រូបយកប្រមាណ ៤៣% នៃការនាំចេញសរុបរបស់កម្ពុជា ដែលក្នុងន័យនេះ គ្រប់តួអង្គ និងភាគីពាក់ព័ន្ធត្រូវខិតខំថែរក្សាទីផ្សារនេះឱ្យបានល្អ។

ភ្ជាប់នឹងកិច្ចខិតខំប្រឹងប្រែងនេះ អង្គពិធីនៅថ្ងៃនេះ គឺដើម្បីផ្សព្វផ្សាយអំពីខ្លឹមសារនៃ “និយាម​នីតិវិធី​ប្រតិបត្តិ​សម្រាប់​អនុវត្តវិធាន​ការបង្ការ និងទប់ស្កាត់​ការក្លែងបន្លំ​ដើម​កំណើត​ទំនិញ​នាំចេញ​ទៅ​កាន់​ទីផ្សារ​សហរដ្ឋ​អាម៉េរិក” ដែល​ជាឯកសារគោលរបស់ ក្រុមការងារអនុវត្តវិធានការបង្ការ និង​ទប់ស្កាត់​ការក្លែងបន្លំ​ដើម​កំណើត​ទំនិញ​នាំចេញទៅកាន់ទីផ្សារសហរដ្ឋអាម៉េរិក សម្រាប់យកទៅអនុវត្តក្នុងការធានាថា ការ​នាំ​ចូលវត្ថុ​ធាតុដើម​ដើម្បី​ផលិត​ និងកែច្នៃហើយនាំចេញទៅទីផ្សារសហរដ្ឋអាម៉េរិក មាន​អនុលោមភាព​ស្របតាមវិធាន​ដើមកំណើត​ទំនិញដែល​បានកំណត់ ដែល​ការណ៍នេះជាការរួមចំណែកយ៉ាងសំខាន់ក្នុងការថែរក្សាទីផ្សារ និងថែរក្សា​អត្រាពន្ធបដិការដែលមានភាពប្រកួតប្រជែងធៀបជាមួយនឹងប្រទេសជិតខាង ដែលកម្ពុជាទទួលបាន។

ទន្ទឹម​នេះ លោកបណ្ឌិត ក៏បានអំពាវនាវឱ្យគ្រប់ភាគីពាក់ព័ន្ធ ជាពិសេសវិនិយោគិនដែល​បណ្ដាក់ទុន​នៅ​កម្ពុជាបច្ចុប្បន្នខិតខំចូលរួមជាមួយរាជរដ្ឋាភិបាលក្នុងការកែលម្អបរិយាកាសវិនិយោគនៅកម្ពុជា និងខិតខំស្វែងរកវិនិយោគិនមកបណ្ដាក់ទុនធ្វើធុរកិច្ចនៅកម្ពុជាបន្ថែមទៀត។

បន្ថែមលើនេះលោក​ គុណ ញឹម បានគូសបញ្ជាក់ដែរ​ថា អគ្គនាយកដ្ឋានគយនិងរដ្ឋាករកម្ពុជា គ្រោងនឹងស្នើសុំរៀបចំកិច្ចប្រជុំជាមួយរដ្ឋបាលគយនៃសហរដ្ឋអាម៉េរិក ដើម្បីពិនិត្យលទ្ធភាពរៀបចំកសាងឱ្យមានក្របខណ្ឌកិច្ចសហប្រតិបត្ដិការជួយគ្នាទៅវិញទៅមកក្នុងវិស័យ ជាមួយនឹងរដ្ឋបាលគយរបស់សហរដ្ឋអាម៉េរិក ដោយផ្អែកលើ មគ្គុទ្ទេសក៏គំរូ (CMAA) របស់អង្គការគយពិភពលោក ដើម្បីងាយស្រួលឱ្យរដ្ឋបាលគយទាំងពីរអាចបន្តពង្រឹងកិច្ចសហការ ជាពិសេសសម្របសម្រួលក្នុងការចុះមកអង្កេតគម្រោងវិនិយោគនៅកម្ពុជា ការផ្លាស់ប្ដូរទិន្នន័យ និងព័ត៌មានចាំបាច់នានា។

ក្នុងករណីសម្រេចបាននូវការចុះហត្ថលេខាលើក្របខណ្ឌកិច្ចសហប្រតិបត្តិការនេះ ក្រុមការងារអនុវត្តវិធានការបង្ការ និងទប់ស្កាត់ការក្លែងបន្លំដើមកំណើតទំនិញនាំចេញទៅកាន់ទីផ្សារសហរដ្ឋអាម៉េរិក នឹងត្រូវទទួលភារកិច្ចសម្របសម្រួលជាមួយរដ្ឋបាលគយរបស់សហរដ្ឋអាម៉េរិក។

សូម​ជម្រាប​ថា សិក្ខាសាលានេះត្រូវបានរៀបចំឡើងដើម្បីផ្សព្វផ្សាយអំពីខ្លឹមសារ ១.និយាមនីតិវិធីប្រតិបត្តិសម្រាប់អនុវត្តវិធានការបង្ការនិងទប់ស្កាត់ការក្លែងបន្លំដើមកំណើតទំនិញនាំចេញទៅកាន់ទីផ្សារសហរដ្ឋអាម៉េរិក ២. វឌ្ឍនភាពនៃការចរចាពន្ធគយបដិការជាមួយសហរដ្ឋអាម៉េរិក និង​៣.នីតិវិធីនៃការស្នើសុំលិខិតអនុញ្ញាតបញ្ជាក់ដើមកំណើតទំនិញនិងការចែករំលែកព័ត៌មានពីសក្តានុពលទីផ្សារសហរដ្ឋអាម៉េរិក ដោយប្រធានសភាពាណិជ្ជកម្មអាម៉េរិកប្រចាំកម្ពុជា៕

The post តំណាងវិស័យឯកជនស្នើគ្រប់ភាគីទប់ស្តាត់ការក្លែងបន្លំដើមកំណើតទំនិញ ជៀសវាងធ្វើឱ្យប៉ះពាល់ធ្ងន់ធ្ងរដល់ទីផ្សារនាំចេញកម្ពុជា appeared first on Kampuchea Thmey Daily.