បើតាមអគ្គនាយកដ្ឋានអត្តសញ្ញាណកម្ម បានប្រាប់ពីលក្ខខណ្ឌ និងឯកសារមួយចំនួនដែលត្រូវមាន នៅពេលស្នើសុំផ្តល់អត្តសញ្ញាណបណ្ណខ្មែរដំបូង ឬបន្តសុពលភាព ដូចជា៖

១.ការស្នើសុំផ្តល់អត្តសញ្ញាណបណ្ណខ្មែរដំបូង

សាមីខ្លួនដែលស្នើសុំផ្តល់អត្តសញ្ញាណបណ្ណខ្មែរដំបូង ត្រូវមានអាយុ ១៥ឆ្នាំឡើង។ សាមីខ្លួនត្រូវភ្ជាប់ជាមួយឯកសារផ្ទាល់ខ្លួនមួយចំនួនដូចជា សេចក្តីចម្លងសំបុត្រកំណើត ឬសេចក្តីចម្លងសំបត្របញ្ជាក់កំណើត, សៀវភៅស្នាក់នៅ ឬសៀវភៅគ្រួសារ ឬលិខិតបញ្ជាក់ទីលំនៅ។ ចំពោះព្រះសង្ឃ ត្រូវភ្ជាប់ឯកសារបន្ថែម គឺឆាយា ឬសង្ឃដីកា ឬសុទ្ធិបត្រ។

២.ការស្នើសុំបន្តសុពលភាពអត្តសញ្ញាណបណ្ណខ្មែរ

សាមីខ្លួនត្រូវមកដោយផ្ទាល់ និងភ្ជាប់មកជាមួយនូវអត្តសញ្ញាណបណ្ណខ្មែរដែលអស់សុពលភាព ឬនៅមានសុពលភាពត្រឹម ១៨០ថ្ងៃ ឬតិចជាង។ ក្នុងករណីដែលផ្លាស់ប្តូរអាសយដ្ឋាន ត្រូវភ្ជាប់មកជាមួយសៀវភៅស្នាក់នៅ សៀវភៅគ្រួសារ ឬលិខិតបញ្ជាក់ទីលំនៅអាសយដ្ឋានថ្មី។

សូមជម្រាបថា ប្រជាពលរដ្ឋខ្មែរ អាចស្នើសុំផ្តល់អត្តសញ្ញាណបណ្ណខ្មែរដំបូង និងសុំបន្តសុពលភាព នៅទីតាំងចំនួន ៧ដូចជា៖ ទី១.ប៉ុស្តិ៍នគរបាលរដ្ឋបាលឃុំ សង្កាត់ នៃលំនៅឋានរបស់សាមីខ្លួនកំពុងរស់នៅ។ ទី២. អធិការដ្ឋាននគរបាលក្រុង ស្រុក ខណ្ឌ នៃលំនៅឋានសាមីខ្លួនកំពុងរស់នៅ។ ទី៣.ស្នងការដ្ឋាននគរបាលរាជធានី ខេត្ត នៃលំនៅដ្ឋានរបស់សាមីខ្លួនកំពុងរស់នៅ។ ទី៤.នាយកដ្ឋានអត្តសញ្ញាណបណ្ណសញ្ជាតិខ្មែរ។ ទី៥.ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរផ្សារទំនើបអ៊ីអនម៉លសែនសុខ (អ៊ីអន២)។ ទី៦.ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរផ្សារទំនើបអ៊ីអនម៉លមានជ័យ (អ៊ីអន៣) និងទី៧.ទីស្នាក់ការកណ្តាលបេឡាជាតិសន្តិសុខសង្គម (ប.ស.ស.) (សម្រាប់សមាជិក ប.ស.ស.)។

បើតាម អគ្គនាយកដ្ឋានអត្តសញ្ញាណកម្ម អត្តសញ្ញាណបណ្ណសញ្ជាតិខ្មែរ ត្រូវផ្តល់ជូនបុគ្គលមានសញ្ជាតិខ្មែរគ្រប់រូប ដែលមានអាយុចាប់ពី១៥ឆ្នាំឡើងទៅ រួមទាំងព្រះសង្ឃ បព្វជិតសាសនា ជនជាប់ឃុំ ឬជនវិបល្លាសស្មារតី។ ជាមួយគ្នានេះ អត្តសញ្ញាណបណ្ណសញ្ជាតិខ្មែរ មានសុពលភាពរយៈពេល “១០ឆ្នាំ” គិតចាប់ពីកាលបរិច្ឆេទផ្តល់ ចំពោះបុគ្គលដែលមានអាយុចាប់ពី ១៥ឆ្នាំ រហូតដល់ក្រោម ៦០ឆ្នាំ និងមានសុពលភាព “អចិន្រ្តៃយ៍” គិតចាប់ពីកាលបរិច្ឆេទផ្តល់ ចំពោះបុគ្គលដែលមានអាយុចាប់ពី ៦០ឆ្នាំឡើង៕

The post តើពេលធ្វើអត្តសញ្ញាណបណ្ណសញ្ជាតិខ្មែរដំបូង និងបន្តសុពលភាព ត្រូវការឯកសារអ្វីខ្លះ? appeared first on Kampuchea Thmey Daily.

នៅ​លើ​បណ្តាញ​ទំនាក់​ទំនង​សង្គម​ផ្លូវ​ការ លោក កៅ​ ថាច មាន​ប្រសាសន៍​ថា​ ក្រោយ​ការ​ដួល​រលំ​សម័យ​អង្គរ ខ្មែរ​ហាក់ដូចជា​បាត់ទម្លាប់កត់ត្រាឯកសារទុក រហូតដល់​សម័យបារាំងចូលស្រុក​ឆ្នាំ១៨៦៣​ បារាំង​បានជួយកត់ត្រា​ឯកសារទុក​ឱ្យ​ ក្រៅអំពីការកត់ត្រាក្នុងសាស្ត្រាស្លឹករឹតបន្តិចបន្តួចប៉ុណ្ណោះ។

លោកបានសង្កត់ធ្ងន់ថា «ខ្មែរយើង​ជួបគ្រោះ​មហន្តរាយ​បាត់បង់​ឯកសារ ២ លើកធំៗ​ គឺ១​ សម័យលង្វែក-ប្រាក់ដួង​ និង ទី​២​ សម័យ​​ប៉ុលពត​ដ៏​ខ្មៅ​ងងឹត​ ដែល​ពួកគេ​កម្ទេច​ទាំង​ឯកសារ​មាន​ជីវិត (គ្រូបង្រៀន​ គ្រូពេទ្យ​ វិស្វករ)​ និង​ឯកសារ​ផ្សេងៗ​ ជាពិសេស​ ច្បាប់​ បញ្ញត្តិ​ វប្បធម៌​ខ្មែរ​  និង​សាសនា​ជា​ដើម»​។

ជា​មួយ​គ្នា​នេះ លោក ក៏​បាន​អំពាវនាវ​ ដល់​ពលរដ្ឋ​ខ្មែរ​ ​ឱ្យ​ចូលរួម​ស្រាវជ្រាវ​ ចងក្រង​ឯកសារ​ទុក​ឱ្យបាន​សម្បូណ៌​បែប​ សម្រាប់​អ្នក​ជំនាន់​ក្រោយ ដើម្បី​អភិវឌ្ឍ​ខ្លួន​ និង​ជាតិ​ ឱ្យ​ថ្កុំថ្កើង​រុងរឿង។

លោកបានលើកឡើងបែបនេះស្របពេលដែល បណ្ណាល័យ​ARDB,​ មជ្ឈមណ្ឌល​ស្រាវជ្រាវ​ អគ្គ​បណ្ឌិត​សភាចារ្យ​ អូន​ ព័ន្ធមុនីរ័ត្ន​ និង​ APRACA Center of Excellence នឹង​សម្ពោធ​ដាក់​​ឱ្យ​ប្រើប្រាស់​នៅ​​ថ្ងៃទី១៨​ ខែ​មេសា​ ឆ្នាំ២០២៥​ ​នេះ​។

ជាក់ស្តែង ការបង្កើត​បណ្ណាល័យ​ និងស្ថាប័នស្រាវជ្រាវទាំង ២ នេះ ក្នុងគោល​បំណង​ លើក​កម្ពស់​ការ​ស្រាវជ្រាវ​ និង​អភិវឌ្ឍន៍(R&D) ក៏​ដូចជា​ ប្រមូល​ផ្តុំ​ និង​ចងក្រង​ឯកសារ​​ទុក​សម្រាប់កូនខ្មែរ​ជំនាន់​ក្រោយៗ​ សិក្សា​ស្វែង​យល់អំពីបទពិសោធន៍របស់​កូនខ្មែរជំនាន់មុន។

បណ្ណាល័យ​ARDB  បើក​ឱ្យ​ប្រើប្រាស់​ជា​សាធារណ:​ ជាពិសេស​សិស្ស​និស្សិត​ អាច​ចូលអាន​ និង​ស្រាវជ្រាវផ្ទាល់​ គ្រប់​ពេល​ ដោយ​​មាន​ភ្ជាប់​ប្រព័ន្ធ​អ៊ីនធឺណិត​ល្បឿន​លឿន។ អាស្រ័យ​ហេតុនេះ សប្បុរសជន​មេត្តាផ្តល់ជូន​ជា​សៀវភៅ​ និង​ឯកសារ​ស្រាវជ្រាវ​ផ្សេងៗ​ មក​តម្តល់​ទុកជា​ប្រយោជន៍​សាធារណៈ​នៅ​បណ្ណាល័យ​ARDB ៕

The post លោក កៅ ថាច៖ ខ្មែរជួបគ្រោះមហន្តរាយបាត់បង់ឯកសារ ២ លើកធំៗ appeared first on Kampuchea Thmey Daily.

បើតាមក្រសួងសាធារណការ និងដឹកជញ្ជូន ធ្លាប់បានចេញសេចក្តីប្រកាសកន្លងមកថា ជនបរទេសអាចស្នើសុំយកបណ្ណបើកបរពីប្រទេសរបស់ខ្លួន ប្តូរជាបណ្ណបើកបរខ្មែរបាន ដោយតម្រូវឱ្យមានឯកសារដូចជា ត្រូវមានបណ្ណបើកបរដើមនៃប្រទេសសាមីខ្លួន ដែលត្រូវបកប្រែជាភាសាអង់គ្លេស ឬ បារាំង មានបញ្ជាក់ពីស្ថានទូត ឬ ស្ថានកុងស៊ុលនៃជនជាតិនោះ។ មានលិខិតឆ្លងដែន និងទិដ្ឋាការមានសុពលភាពមិនតិចជាង ១៥ថ្ងៃ ហើយក៏ត្រូវមានលិខិតបញ្ជាក់អាសយដ្ឋានបច្ចុប្បន្ន ដែលត្រូវបញ្ជាក់ពីមេឃុំ ឬ ចៅសង្កាត់ ដែលខ្លួនរស់នៅ។ បន្ថែមពីនេះ ក៏ត្រូវមានលិខិតបញ្ជាក់កាយសម្បទា ដែលលិខិតនេះមាននៅទីតាំងផ្តល់សេវា ព្រមទាំងភ្ជាប់មកជាមួយរូបថត  ៤X៦ ផ្ទៃក្រោយពណ៌សចំនួន៣សន្លឹកផង។

បើនិយាយពីថ្លៃសេវាវិញ ប្រភេទ ក តម្លៃ ៤០.០០០រៀល និងប្រភេទ ខ មានតម្លៃ ១២០.០០០រៀល។ សម្រាប់ជនបរទេសរូបណាដែលធ្លាប់បានប្តូរមកបណ្ណបើកបរខ្មែរហើយហួសសុពលភាព នឹងត្រូវរងការផាកពិន័យ ៥០០រៀល ក្នុងមួយថ្ងៃ៕

The post តើអ្នកដឹងទេ ជនបរទេសដែលប្តូរយកបណ្ណបើកបរខ្មែរ តម្រូវឱ្យមានឯកសារអ្វីខ្លះ?   appeared first on Kampuchea Thmey Daily.

កញ្ញា កាសល់ ស៊ីនួន និស្សិតជំនាញអភិវឌ្ឍសហគមន៍ និងជាមនុស្សដំបូងគេ នៃសហគមន៍ជនជាតិដើមភាគតិចចារ៉ាយ ដែលបានសិក្សាបញ្ចប់ថ្នាក់មធ្យមសិក្សាទុតិយភូមិ និងថ្នាក់បរិញ្ញាបត្រ បានប្រាប់សារព័ត៌មានកម្ពុជាថ្មីថា មូលហេតុដែលកញ្ញារៀបចំផលិតភាពយន្តឯកសារ ស្ដីពី ជីវិត និងវប្បធម៌ជនជាតិដើមភាគតិចនេះឡើង ដោយសារតែកញ្ញាចង់បង្ហាញពីសហគមន៍ជនជាតិដើមភាគតិចចារ៉ាយ ដូចជា៖ បញ្ហាហិង្សាក្នុងគ្រួសារ ការប្រកបរបរចិញ្ចឹមជីវិត និងភាពអសន្តិសុខក្នុងសហគមន៍របស់កញ្ញាផ្ទាល់។

យុវតីរូបនេះ បានផលិតរឿងខ្លីមួយមានចំណងជើងថា៖ “គ្រាន់ជាសុបិន” សាច់រឿងផ្ទាល់ ស្ដីពី ជីវិតពិតរបស់ស្រ្តីមេផ្ទះជនជាតិដើមភាគតិចចារ៉ាយ ដែលចង់បានគ្រួសារមួយដែលមានសុភមង្គលដូចមនុស្សទូទៅដែរ។ កញ្ញា កាសល់ ស៊ីនួន បានបញ្ជាក់ថា គោលបំណងធំបំផុតនោះ គឺកញ្ញាចង់ឃើញសហគមន៍របស់ខ្លួន មានការអភិវឌ្ឍជឿនលឿន និងកាត់បន្ថយហិង្សាក្នុងគ្រួសារចំពោះស្រ្តីមេផ្ទះ ដែលជាជនជាតិដើមភាគតិចចារ៉ាយ។

ជាមួយគ្នានេះដែរ កញ្ញា សា រ៉ាឌី និស្សិតជំនាញទេសចរណ៍ និងជាជនជាតិដើមភាគតិចទំពួនទី ១ ដែលបានមកសិក្សានៅរាជធានីភ្នំពេញ មកពីស្រុកអូរជុំ ខេត្តរតនគិរី ក៏មានទស្សនៈចង់បង្ហាញប្រាប់សាធារណៈជន ឲ្យបានមើលឃើញពីបញ្ហាប្រឈមផ្សេងៗ របស់ស្រ្តីជនជាតិដើមភាគតិច ដែលកើតមាន នៅក្នុងសហគមន៍របស់កញ្ញាផ្ទាល់។

ជាក់ស្ដែង កញ្ញា បានផលិតរឿងមួយមានចំណងជើងថា៖ “មិនអាចបំភ្លេច” ដែលឆ្លុះបញ្ចាំងពីជីវិតសិល្បៈរបស់ស្រ្តីមេម៉ាយជនជាតិដើមភាគតិច ដែលតស៊ូខិតខំតស៊ូរកលុយដើម្បីចិញ្ចឹមកូន មិនថាយប់ ឬថ្ងៃ ទោះបីត្រូវប្រឈមនឹងគ្រោះថ្នាក់យ៉ាងណាក៏ដោយ។ កញ្ញា សា រ៉ាឌី បានផ្ដាំផ្ញើ និងលើកទឹកចិត្តដល់ជនជាតិដើមភាគតិចទាំងអស់ ឲ្យក្លាហាន និងហ៊ានផ្សព្វផ្សាយពីបញ្ហា ដែលកើតមានក្នុងសហគមន៍របស់ខ្លួនផ្ទាល់ ដើម្បីធ្វើឲ្យសហគមន៍មានការរីកចម្រើន និងការអភិវឌ្ឍជឿនលឿន ដូចសហគមន៍ទូទៅដែរ។

ចំណែក លោក ជា សុភាព នាយកគ្រប់គ្រងទូទៅ នៅមជ្ឈមណ្ឌលសោតទស្សន៍បុប្ផាណា ក៏បន្ថែមប្រាប់សារព័ត៌មានកម្ពុជាថ្មីដែរថា កន្លងមកមជ្ឈមណ្ឌលបុប្ផាណា បានបណ្ដុះបណ្ដាលដល់យុវជនជំនាន់ក្រោយ ដើម្បីឲ្យយុវជនចេះចងក្រងការចងចាំ ឬឯកសារភាពយន្តផ្សេងៗ ដែលប្រឈមនឹងការបាត់បង់។

ជាក់ស្ដែង បុប្ផាណា បានបានបណ្ដុះបណ្ដាលកសាងសមត្ថភាព ដល់ជនជាតិដើមភាគតិចប្រមាណជាង ៥០នាក់ ឲ្យយុវជនទាំងនោះ មានឱកាសបង្ហាញពីបញ្ហាសង្គម ដែលកើតមានក្នុងសហគមន៍របស់ពួកគេ ដើម្បីជំរុញក្រែប្រែ និងអភិវឌ្ឍសហគមន៍របស់ជនជាតិដើមភាគតិចទាំងអស់ផងដែរ។

លោក ជា សុភាព បន្ថែមទៀតថា នៅមជ្ឈមណ្ឌលរបស់លោក មិនត្រឹមតែមានការផលិតឯកសារភាពយន្ត ស្ដីពី ជីវិត និងវប្បធម៌ជនជាតិដើមភាគតិច តែប៉ុណ្ណោះទេ។ ក្នុងនោះ ក៏បានរៀបចំកម្មវិធី និងគម្រោងជាច្រើនដូចជា៖ ទី១. ការបន្លឺសំឡេងស្ត្រីជនជាតិដើមភាគតិច ទី២. ការបង្កើតបណ្ណាសារជនជាតិដើមភាគតិច និងទី៣. សិល្បៈនៃការផ្លាស់ប្ដូរវិជ្ជមាន របស់ជនជាតិដើមភាគតិចទាំងអស់ មាននៅក្នុងប្រទេសកម្ពុជា។

ដើម្បីរំឮក និងចូលរួមអបអរសាទរ “ទិវាជនជាតិដើមភាគតិចពិភពលោក” លើកទី ២៩ និងលើកទី ១៩ នៅកម្ពុជា មជ្ឈមណ្ឌលបុប្ផាណា រួមសហការជាមួយអង្គការភាពយន្តឈូករ័ត្ន បានបង្កើតកម្មវិធីបញ្ចាំងភាពយន្តឯកសារពិសេស ស្ដីពី ” ជីវិត និងវប្បធម៌ជនជាតិដើមភាគតិច” របស់សហគមន៍ជនជាតិដើមភាគតិចនៅកម្ពុជា ដែលដឹកនាំផលិតផ្ទាល់ដោយក្រុមយុវជនជនជាតិដើមភាគតិច៕

អត្ថបទ៖ សួស សិត

The post មជ្ឈមណ្ឌលបុប្ផាណា ចាក់បញ្ចាំងភាពយន្តឯកសារ ស្ដីពី ជីវិត និង​វប្បធម៌ជនជាតិដើមភាគតិច appeared first on Kampuchea Thmey Daily.

បណ្ណសារដ្ឋានជាតិ​កម្ពុជាត្រូវ​បាន​បង្កើត​ឡើង​នៅឆ្នាំ១៩២៦ និងបានបើក​បម្រើ​ដល់​ការ​សិក្សាស្រាវជ្រាវ​ដល់​អ្នក​ស្រាវជ្រាវ​ជាតិ និងអន្ដរជាតិ​រហូតមកដល់បច្ចុប្បន្ន លើកលែង​តែ​ក្នុងសម័យកម្ពុជាប្រជាធិបតេយ្យ (ខ្មែរក្រហម) ឆ្នាំ១៩៧៥-១៩៧៩ ដែលកម្ពុជាធ្លាក់ចូលភ្នក់ភ្លើងសង្គ្រម។ បណ្ណសារដ្ឋាន​ជាតិនេះ ជា​កន្លែង​តម្កល់ និង​រក្សាឯកសារ​រដ្ឋបាល​នៅ​គ្រប់​សម័យកាល ចាប់តាំង​ពី​សម័យ​អាណានិគម​បារាំង​រហូត​ដល់​បច្ចុប្បន្ន ដែល​ទទួលបាន​ពី​ក្រសួង-ស្ថាប័ននានា។

បណ្ណសារដ្ឋានជាតិ ឬនាយកដ្ឋានតម្កល់ឯកសារជាតិ បានបើកស្វាគមន៍ទទួលសិស្ស និស្សិត បញ្ញវន្ត អ្នកស្រាវជ្រាវជាតិអន្តរជាតិ មន្ត្រីរាជការ និងសាធារណជនទាំងអស់ដែលមានបំណងសិក្សាស្រាវជ្រាវ និងស្វែងយល់ពីឯកសារដ៏សម្បូរបែបទាក់ទងនឹងកម្ពុជា។ ក្នុងនោះ ឯកសាររដ្ឋបាលរបស់រាជរដ្ឋាភិបាល ដែលមានតម្លៃជាប្រវត្តិសាស្ត្រ និងតម្លៃគតិយុត្ត ក៏ត្រូវបានតម្កល់ ថែរក្សា និងអភិរក្សទុកសម្រាប់បម្រើឲ្យការស្រាវជ្រាវ នៅពេលបច្ចុប្បន្ន និងទៅអនាគត។  

ការស្រាវជ្រាវនៅទីនេះទៀតសោត គឺមិនតម្រូវឲ្យមានលិខិតបញ្ជាក់ពីស្ថាប័នដែលខ្លួនកំពុងសិក្សា និងមិនមានលក្ខណៈស្មុគស្មាញក្នុងការធ្វើបែបបទ ដើម្បីអាចស្រាវជ្រាវនៅបណ្ណសារដ្ឋានជាតិកម្ពុជាឡើយ។ ផ្ទុយទៅវិញ បណ្ណសារដ្ឋានជាតិ បានបង្កលក្ខណៈងាយស្រួលក្នុងការធ្វើបែបបទសម្រាប់អ្នកស្រាវជ្រាវ ដើម្បីឲ្យការស្រាវជ្រាវនេះទទួលបានជោគជ័យ។ 

ទន្ទឹមនេះ បណ្ណសារដ្ឋានជាតិកម្ពុជា បានខិតខំយ៉ាងខ្លាំងក្នុងការអភិរក្ស និងស្ដារឡើងវិញនូវឯកសារដែលជាប្រវត្តិសាស្រ្តជាតិ និងផ្សព្វផ្សាយ បណ្ដុះបណ្ដាលពីចំណេះដឹង និងបច្ចេកទេសនៃការថែរក្សាឯកសារជូនដល់មន្ត្រីនៃស្ថាប័នរដ្ឋ ដើម្បីរួមគ្នាថែរក្សាប្រវត្តិសាស្ត្រជាតិ។ ក្នុងនាមជាស្ថាប័នរបស់រាជរដ្ឋាភិបាល បណ្ណសារដ្ឋានជាតិកម្ពុជា បានប្ដេជ្ញាចិត្តផ្ដល់នូវសេវាកម្មដ៏មានប្រសិទ្ធិភាព និងដោយគ្មានការរើសអើងចំពោះអ្នកស្រាវជ្រាវទាំងអស់ដែលអញ្ជើញមកធ្វើការស្រាវជ្រាវ៕

ដោយ៖ ធឿន វ៉ាន់សុង

The post តើបុគ្គលណាខ្លះ អាចសិក្សាស្រាវជ្រាវនៅបណ្ណសារដ្ឋានជាតិកម្ពុជាបាន?   appeared first on Kampuchea Thmey Daily.

លោក សាន សុខសីហា ជំនួយការលោក ស ថេត បានឲ្យដឹងថា ក្រុមការងារផ្តល់សេវាជូនប្រជាពលរដ្ឋដល់ខ្នងផ្ទះ នៅក្នុងសង្កាត់បឹងទំពន់ទី ១នេះ ត្រូវបានបង្កើតឡើងកាលពីដើមខែកក្កដា ឆ្នាំ ២០២២មកម្លេះ ហើយរហូតមកដល់ពេលនេះ មានឯកសារនានាជិត ១ពាន់ឯកសារ ត្រូវបានក្រុមការងារយកជូនប្រជាពលរដ្ឋដល់ខ្នងផ្ទះ។

គោលបំណងដែលលោក ស ថេត ប្រធានក្រុមការងារគណបក្សប្រជាជនកម្ពុជា ចុះជួយសង្កាត់បឹងទំពន់ទី ១ បង្កើតក្រុមការងារផ្តល់សេវាជូនប្រជាពលរដ្ឋដល់ខ្នងផ្ទះបែបនេះ គឺដើម្បីជួយសម្រួលការលំបាករបស់ប្រជាពលរដ្ឋ ដែលត្រូវទៅធ្វើ និងចាំយកឯកសារនៅសង្កាត់។

ម្យ៉ាងទៀត លោកប្រធានក្រុមការងារចុះជួយសង្កាត់បឹងទំពន់ទី ១ គិតដល់ប្រយោជន៍ជារួមរបស់ប្រជាពលរដ្ឋ ដោយនៅពេលដែលមានក្រុមការងារនេះ គឺប្រជាពលរដ្ឋមិនចាំបាច់រង់ចាំនៅសង្កាត់ឡើយ។ ដូច្នេះហើយ ធ្វើឲ្យពួកគាត់ចំណេញពេលវេលា ហើយនៅពេលចំណេញពេលវេលា ប្រជាពលរដ្ឋអាចយកពេលវេលានោះ ទៅធ្វើការងារ ទៅប្រកបមុខរបរ ឬធ្វើអាជីវកម្មផ្សេង ដែលអាចនាំមកនូវចំណូលបន្ថែមទៀត។

លោក សាន សុខសីហា ឲ្យដឹងបន្ថែមថា «អ្វីដែលសំខាន់បំផុត គឺមិនចង់ឲ្យប្រជាពលរដ្ឋលំបាក គឺមានន័យថា ក្រុមការងារនេះបង្កើតឡើង ដើម្បីយកឯកសារនានាទៅដល់ខ្នងផ្ទះរបស់ពួកគាត់តែម្ដង ទាំងនៅពេលថ្ងៃ និងពេលយប់ ដោយនៅពេលក្រុមការងារទាក់ទងទៅ ហើយប្រជាពលរដ្ឋនៅផ្ទះ ឬពេលខ្លះនៅកន្លែងការងារ ឬនៅកន្លែងប្រកបមុខរបររបស់ពួកគាត់ គឺក្រុមការងារយកទៅជូនដល់ដៃតែម្ដង»។

សូមជម្រាបថា ឯកសារដែលក្រុមការងារយកជូនប្រជាពលរដ្ឋ នៅក្នុងសង្កាត់បឹងទំពន់ទី ១ ខណ្ឌមានជ័យ រួមមាន៖ អត្រានុកូលដ្ឋាន, សំបុត្រកំណើត, សំបុត្រអាពាហ៍ពិពាហ៍, សំបុត្រមរណភាព, និងឯកសារពាក់ព័ន្ធមួយចំនួនទៀត ដែលប្រជាពលរដ្ឋបានទៅធ្វើនៅក្នុងសង្កាត់បឹងទំពន់ ១៕

អត្ថបទ៖ ឃួន សុភ័ក្រ

The post ឯកសារជិត ១ពាន់ ត្រូវបានក្រុមការងារផ្តល់សេវាដល់ខ្នងផ្ទះ យកជូនប្រជាពលរដ្ឋក្នុងសង្កាត់បឹងទំពន់ទី ១ appeared first on Kampuchea Thmey Daily.

ព្រំប្រទល់ដី-ខាងជើងទល់នឹង សុខ សប្បណា-ខាងត្បូងទល់នឹង ចំណីផ្លូវ-ខាងកើតទល់នឹង ចំណីផ្លូវ-ខាងលិចទល់នឹង គឹម អូនកូលាប។

ឯកសារកាន់កាប់ដីធ្លីនេះ ខ្ញុំបាទបានបាត់បង់ការពីកំឡុងឆ្នាំ ២០១៨ ដោយសាររើផ្ទះ។
ខ្ញុំបាទសូមធានាអះអាងថា ពុំបានយកឯកសារកាន់កាប់ដីធ្លីនេះទៅដាក់លក់ ជួល បញ្ចាំ ឬផ្ទេរសិទ្ធិទៅឲ្យអ្នកផ្សេងឡើយ។ ប្រសិនបើមិនពិតដូចការរៀបរាប់ខាងលើ ខ្ញុំបាទសូមទទួលខុសត្រូវទាំងស្រុងចំពោះមុខច្បាប់ជាធរមាន៕

The post ដំណឹងបាត់ឯកសារកាន់កាប់ដីធ្លី appeared first on Kampuchea Thmey Daily.

ឯកសារសម្ងាត់របស់រដ្ឋាភិបាលដែលត្រូវបានសរសេរ បន្ទាប់ពីលំហាត់បណ្តុះបណ្តាលជំងឺរាតត្បាតក្នុងឆ្នាំ២០១៦មួយនេះ បានលម្អិតអំពីផែនការ ដើម្បីការពារមន្ទីរពេទ្យកុំឲ្យណែនតានតាប់ដោយសារតែក្រុមមនុស្សងាយរងគ្រោះ។

នៅក្រោមផែនការនេះ រដ្ឋមន្ត្រីក្រសួងសុខាភិបាល អាចអនុញ្ញាតឲ្យគ្រូពេទ្យ ផ្តល់អាទិភាពដល់អ្នកជំងឺខ្លះ ជាជាងអ្នកជំងឺដែលគ្មានសង្ឃឹមរស់ ក្នុងករណីមានរោគរាតត្បាតធ្ងន់ធ្ងរ។

ផែនការនេះ ថែមទាំងបង្ហាញផងដែរថា អ្នកជំងឺខ្លះមិនគួរទទួលបានការថែទាំសំខាន់ណាមួយឡើយ។

ឯកសារ ដែលមើលឃើញដោយកាសែត Telegraph បានបង្ហាញថា រដ្ឋាភិបាលមានគម្រោងជ្រើសរើសអ្នកជំងឺដោយផ្អែកលើ “លទ្ធភាពដែលអាចរស់រានមានជីវិត” ជាជាងតម្រូវការព្យាបាល ប្រសិនបើធនធានជួបបញ្ហា។

ឯកសារសម្ងាត់និងរសើបនេះ  ត្រូវបានបញ្ជូនទៅទីប្រឹក្សារដ្ឋាភិបាល បន្ទាប់ពីពួកគេត្រូវបានព្រាងនៅក្នុងឆ្នាំ២០១៧និង២០១៨។

ទោះបីជាយ៉ាងណាក៏ដោយ អ្នកនាំពាក្យរដ្ឋាភិបាលបានអះអាងថា ឯកសារទាំងនេះគឺគ្រាន់តែជាសេចក្តីព្រាងប៉ុណ្ណោះ ហើយមិនបង្ហាញពីគោលនយោបាយផ្លូវការឡើយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ វ៉ាក់សាំងការពារការឆ្លងកូវីដ ២២ លានករណី និងការស្លាប់ ៦០,០០០ នាក់ នៅ អង់គ្លេស

The post ធ្លាយឯកសារសម្ងាត់! អង់គ្លេស មានផែនការមិនព្យាបាលមនុស្សចាស់ និងអ្នកគ្មានសង្ឃឹមរស់ ក្នុងពេលផ្ទុះរោគរាតត្បាត appeared first on Kampuchea Thmey Daily.