តើអ្នកដឹងទេ ជនបរទេសដែលប្តូរយកបណ្ណបើកបរខ្មែរ តម្រូវឱ្យមានឯកសារអ្វីខ្លះ?  

អាចនឹងមានមនុស្សមួយចំនួនតែងតែឆ្ងល់ថា តើជនបរទេសដែលមករស់នៅកម្ពុជាអាចមានបណ្ណបើកបរខ្មែរទេ? ឬ ពួកគេអាចយកបណ្ណបើកបរពីប្រទេសកំណើតខ្លួនប្តូរយកបណ្ណបើកបរខ្មែរបានទេ? តើតម្រូវឱ្យមានឯកសារអ្វីខ្លះ? ត្រូវបង់ថ្លៃសេវាប៉ុន្មាន?

បើតាមក្រសួងសាធារណការ និងដឹកជញ្ជូន ធ្លាប់បានចេញសេចក្តីប្រកាសកន្លងមកថា ជនបរទេសអាចស្នើសុំយកបណ្ណបើកបរពីប្រទេសរបស់ខ្លួន ប្តូរជាបណ្ណបើកបរខ្មែរបាន ដោយតម្រូវឱ្យមានឯកសារដូចជា ត្រូវមានបណ្ណបើកបរដើមនៃប្រទេសសាមីខ្លួន ដែលត្រូវបកប្រែជាភាសាអង់គ្លេស ឬ បារាំង មានបញ្ជាក់ពីស្ថានទូត ឬ ស្ថានកុងស៊ុលនៃជនជាតិនោះ។ មានលិខិតឆ្លងដែន និងទិដ្ឋាការមានសុពលភាពមិនតិចជាង ១៥ថ្ងៃ ហើយក៏ត្រូវមានលិខិតបញ្ជាក់អាសយដ្ឋានបច្ចុប្បន្ន ដែលត្រូវបញ្ជាក់ពីមេឃុំ ឬ ចៅសង្កាត់ ដែលខ្លួនរស់នៅ។ បន្ថែមពីនេះ ក៏ត្រូវមានលិខិតបញ្ជាក់កាយសម្បទា ដែលលិខិតនេះមាននៅទីតាំងផ្តល់សេវា ព្រមទាំងភ្ជាប់មកជាមួយរូបថត  ៤X៦ ផ្ទៃក្រោយពណ៌សចំនួន៣សន្លឹកផង។

បើនិយាយពីថ្លៃសេវាវិញ ប្រភេទ ក តម្លៃ ៤០.០០០រៀល និងប្រភេទ ខ មានតម្លៃ ១២០.០០០រៀល។ សម្រាប់ជនបរទេសរូបណាដែលធ្លាប់បានប្តូរមកបណ្ណបើកបរខ្មែរហើយហួសសុពលភាព នឹងត្រូវរងការផាកពិន័យ ៥០០រៀល ក្នុងមួយថ្ងៃ៕