តើបុគ្គលណាខ្លះ អាចសិក្សាស្រាវជ្រាវនៅបណ្ណសារដ្ឋានជាតិកម្ពុជាបាន?  

បណ្ណសារដ្ឋានជាតិកម្ពុជា គឺជានាយកដ្ឋានតម្កល់ឯកសារជាតិមួយរបស់រាជរដ្ឋាភិបាល ដែលស្ថិតនៅក្រោមការគ្រប់គ្រងរបស់ទីស្តីការគណៈរដ្ឋមន្ត្រី។ បណ្ណសារដ្ឋានជាតិកម្ពុជា ជាឃ្លាំងផ្ទុកឯកសាររាប់ម៉ឺន ហើយជាកន្លែងដ៏ស្ងប់ស្ងាត់សម្រាប់អ្នកសិក្សាស្រាវជ្រាវ។ តើបុគ្គលណាខ្លះអាចសិក្សាស្រាវជ្រាវនៅបណ្ណសារដ្ឋានជាតិនេះ?  

បណ្ណសារដ្ឋានជាតិ​កម្ពុជាត្រូវ​បាន​បង្កើត​ឡើង​នៅឆ្នាំ១៩២៦ និងបានបើក​បម្រើ​ដល់​ការ​សិក្សាស្រាវជ្រាវ​ដល់​អ្នក​ស្រាវជ្រាវ​ជាតិ និងអន្ដរជាតិ​រហូតមកដល់បច្ចុប្បន្ន លើកលែង​តែ​ក្នុងសម័យកម្ពុជាប្រជាធិបតេយ្យ (ខ្មែរក្រហម) ឆ្នាំ១៩៧៥-១៩៧៩ ដែលកម្ពុជាធ្លាក់ចូលភ្នក់ភ្លើងសង្គ្រម។ បណ្ណសារដ្ឋាន​ជាតិនេះ ជា​កន្លែង​តម្កល់ និង​រក្សាឯកសារ​រដ្ឋបាល​នៅ​គ្រប់​សម័យកាល ចាប់តាំង​ពី​សម័យ​អាណានិគម​បារាំង​រហូត​ដល់​បច្ចុប្បន្ន ដែល​ទទួលបាន​ពី​ក្រសួង-ស្ថាប័ននានា។

បណ្ណសារដ្ឋានជាតិ ឬនាយកដ្ឋានតម្កល់ឯកសារជាតិ បានបើកស្វាគមន៍ទទួលសិស្ស និស្សិត បញ្ញវន្ត អ្នកស្រាវជ្រាវជាតិអន្តរជាតិ មន្ត្រីរាជការ និងសាធារណជនទាំងអស់ដែលមានបំណងសិក្សាស្រាវជ្រាវ និងស្វែងយល់ពីឯកសារដ៏សម្បូរបែបទាក់ទងនឹងកម្ពុជា។ ក្នុងនោះ ឯកសាររដ្ឋបាលរបស់រាជរដ្ឋាភិបាល ដែលមានតម្លៃជាប្រវត្តិសាស្ត្រ និងតម្លៃគតិយុត្ត ក៏ត្រូវបានតម្កល់ ថែរក្សា និងអភិរក្សទុកសម្រាប់បម្រើឲ្យការស្រាវជ្រាវ នៅពេលបច្ចុប្បន្ន និងទៅអនាគត។  

ការស្រាវជ្រាវនៅទីនេះទៀតសោត គឺមិនតម្រូវឲ្យមានលិខិតបញ្ជាក់ពីស្ថាប័នដែលខ្លួនកំពុងសិក្សា និងមិនមានលក្ខណៈស្មុគស្មាញក្នុងការធ្វើបែបបទ ដើម្បីអាចស្រាវជ្រាវនៅបណ្ណសារដ្ឋានជាតិកម្ពុជាឡើយ។ ផ្ទុយទៅវិញ បណ្ណសារដ្ឋានជាតិ បានបង្កលក្ខណៈងាយស្រួលក្នុងការធ្វើបែបបទសម្រាប់អ្នកស្រាវជ្រាវ ដើម្បីឲ្យការស្រាវជ្រាវនេះទទួលបានជោគជ័យ។ 

ទន្ទឹមនេះ បណ្ណសារដ្ឋានជាតិកម្ពុជា បានខិតខំយ៉ាងខ្លាំងក្នុងការអភិរក្ស និងស្ដារឡើងវិញនូវឯកសារដែលជាប្រវត្តិសាស្រ្តជាតិ និងផ្សព្វផ្សាយ បណ្ដុះបណ្ដាលពីចំណេះដឹង និងបច្ចេកទេសនៃការថែរក្សាឯកសារជូនដល់មន្ត្រីនៃស្ថាប័នរដ្ឋ ដើម្បីរួមគ្នាថែរក្សាប្រវត្តិសាស្ត្រជាតិ។ ក្នុងនាមជាស្ថាប័នរបស់រាជរដ្ឋាភិបាល បណ្ណសារដ្ឋានជាតិកម្ពុជា បានប្ដេជ្ញាចិត្តផ្ដល់នូវសេវាកម្មដ៏មានប្រសិទ្ធិភាព និងដោយគ្មានការរើសអើងចំពោះអ្នកស្រាវជ្រាវទាំងអស់ដែលអញ្ជើញមកធ្វើការស្រាវជ្រាវ៕

ដោយ៖ ធឿន វ៉ាន់សុង