AFC Champions League Two Archives - Kampuchea Thmey Daily

ក្រុមហ្វីលីពីន និងឥណ្ឌូណេស៊ី ត្រូវជម្រុះ ខណៈ ភ្នំពេញក្រោន ឡើងវគ្គចែកពូល ដូចព្រះខ័នរាជស្វាយរៀង ពាន AFC2

Kosal Sem — Thu, 11 Jun 2026 05:05:00 +0000

ការប្រកួតពានរង្វាន់ AFC Champions League Two ប្រចាំតំបន់ អាស៊ីខាងកើត គឺក្លិបត្រូវប្រកួតជម្រុះ playoff នៅសល់តែក្លិបជើងឯកលីគ ហ្វីលីពីន និង ឥណ្ឌូណេស៊ី ប៉ុណ្ណោះ ខណៈក្រុម ភ្នំពេញក្រោន របស់ កម្ពុជា ត្រូវបានកំណត់ឡើងទៅវគ្គចែកពូលដោយស្វ័យប្រវត្តិជាមួយក្រុម ព្រះខ័នរាជស្វាយរៀង។

ដើមឡើយ សហព័ន្ធបាល់ទាត់ទ្វីប អាស៊ី (AFC) បានកំណត់កៅអីឱ្យ កម្ពុជា តែ ១ កៅអីកន្លះប៉ុណ្ណោះក្នុងពាន AFC2 ដែលមានន័យ ថា ក្រុមជើងឯកលីគទទួលបាន ១ កៅអីនៅវគ្គចែកពូល និងក្រុមលេខ ២ ក្នុងលីគត្រូវប្រកួតជម្រុះ playoff។

ទោះបីជាយ៉ាងណា កាលពីថ្ងៃ ពុធ ទី ១០ ខែ មិថុនា ឆ្នាំ ២០២៦ ក្លិប ភ្នំពេញក្រោន បានប្រកាសជាផ្លូវការ ថា ពួកគេទទួលបានកៅអីឡើងទៅវគ្គចែកពូលដោយស្វ័យប្រវត្តិ ពោលគឺពុំមានការប្រកួតជម្រុះឡើយ។ ដូច្នេះ ក្រុមតំណាង កម្ពុជា នឹងមាន ២ ក្រុម ដើម្បីចូលប្រកួតនៅវគ្គសន្សំពិន្ទុក្នុងពូលពាន AFC2 រដូវកាលថ្មី ២០២៦-២០២៧។

ងាកទៅមើលការប្រកួតជម្រុះ playoff វិញ គឺគិតត្រឹមពេលនេះ នៅសល់ត្រឹមតែ ២ ក្រុមប៉ុណ្ណោះ ក្នុងនោះមានក្រុមជើងឯកលីគ ឥណ្ឌូណេស៊ី Persib Bandung និងក្រុមជើងឯកលីគ ហ្វីលីពីន Manila Digger។ ការប្រកួតជម្រុះ playoff រវាងក្រុមទាំង ២ នឹងធ្វើឡើងចំនួន ១ ជើង ដែលនឹងធ្វើនៅថ្ងៃទី ១២ ខែ សីហា ឆ្នាំ ២០២៦។

គួរបញ្ជាក់ ថា ការប្រកួតពាន AFC2 រដូវកាល ២០២៦-២០២៧ នេះ នឹងចាប់ផ្តើមពីខែ កញ្ញា ឆ្នាំ ២០២៦ រហូតដល់ខែ ឧសភា ឆ្នាំ ២០២៧៕

អត្ថបទ៖ សេម កុសល

The post ក្រុមហ្វីលីពីន និងឥណ្ឌូណេស៊ី ត្រូវជម្រុះ ខណៈ ភ្នំពេញក្រោន ឡើងវគ្គចែកពូល ដូចព្រះខ័នរាជស្វាយរៀង ពាន AFC2 appeared first on Kampuchea Thmey Daily.

គ្រាន់តែវគ្គចែកពូល ព្រះខ័នរាជស្វាយរៀង ទទួលបាន ៣០ ម៉ឺនដុល្លារក្នុងពាន AFC2

chean virakbot — Fri, 22 May 2026 07:34:39 +0000

ព្រះខ័នរាជស្វាយរៀង ក្នុងនាមជាក្រុមជើងឯកលីគបាល់ទាត់កំពូលកម្ពុជា រដូវកាល ២០២៥-២៦ ទទួលបានកៅអី នៅវគ្គចែកពូល ពានរង្វាន់ក្លិបអាស៊ីលំដាប់ទី២ AFC Champions League Two សម្រាប់រដូវកាល ២០២៦-២៧។

ការទទួលបានកៅអីវគ្គចែកពូលនេះ ដោយសារ ព្រះខ័នរាជស្វាយរៀង បានឈានដល់វគ្គផ្តាច់ព្រ័ត្រ ពានរង្វាន់កម្រិតទី៣ AFC Challenge League កាលពីរដូវកាល ២០២៤-២៥ ដែលផ្តល់ឲ្យសម្រាប់ក្រុមជើងឯកលីគកំពូលកម្ពុជា រដូវកាល ២០២៥-២៦ និងទទួលបានកន្លះកៅអីទៀតសម្រាប់ក្រុមចំណាត់ថ្នាក់លេខ ២ នៃលីគកំពូលកម្ពុជា។

ជាថ្មីម្តងទៀត ព្រះខ័នរាជស្វាយរៀង បានឈានដល់វគ្គផ្តាច់ព្រ័ត្រ AFC Challenge League រដូវកាល ២០២៥-២៦ ហើយកម្ពុជា ទទួលបានកៅអីវគ្គចែកពូលទៀតនៅរដូវកាល ២០២៧-២៨ សម្រាប់ក្រុមជើងឯកលីគកំពូលកម្ពុជាទៀត។

តាមលក្ខន្តិកៈនៃការប្រកួតពានរង្វាន់ AFC Champions League Two រដូវកាល ២០២៦-២៧ បានចែងថា ការប្រកួតជម្រុះបឋម ក្រុមនីមួយៗ ទទួលបានប្រាក់ចំនួន ៥ ម៉ឺនដុល្លារអាមេរិក សម្រាប់ការធ្វើដំណើរ ដូច្នេះ ភ្នំពេញក្រោន នឹងទទួលបាន ៥ ម៉ឺនដុល្លារសម្រាប់ការធ្វើដំណើរ។

ចំណែកនៅវគ្គចែកពូល ក្រុមនីមួយៗទទួលបានចំនួន ៣០ ម៉ឺនដុល្លារអាមេរិក ដូច្នេះ ព្រះខ័នរាជស្វាយរៀង នឹងទទួលបាន ៣០ ម៉ឺនដុល្លារអាមេរិកសម្រាប់ការចំណាយលើការប្រកួតវគ្គនេះ។ ចំពោះ ភ្នំពេញក្រោន ប្រសិនបើបានឆ្លងផុតវគ្គជម្រុះ ហើយឈានដល់វគ្គចែកពូល នឹងទទួលបាន ៣០ ម៉ឺនដុល្លារដែរ។

នៅដល់វគ្គ ១៦ ក្រុមចុងក្រោយ ក្រុមនីមួយៗនឹងទទួលបាន ៨ ម៉ឺនដុល្លារអាមេរិកបន្ថែមទៀត ហើយឈានដល់វគ្គ ៨ ក្រុមចុងក្រោយ ក្រុមនីមួយៗនឹងទទួលបាន ១៦ ម៉ឺនដុល្លារអាមេរិកបន្ថែមទៀត និងវគ្គ ៤ ក្រុមចុងក្រោយ ក្រុមនីមួយៗ នឹងទទួលបាន ២៤ ម៉ឺនដុល្លារអាមេរិក។

ចំណែកក្រុមចំណាត់ថ្នាក់លេខ ២ ដែលជាជើងឯករង ទទួលបាន ១ លានដុល្លារអាមេរិក ខណៈ ក្រុមជើងឯកទទួលបាន ២,៥ លានដុល្លារអាមេរិក។

ប្រាក់ឧបត្ថម្ភ និងប្រាក់រង្វាន់

ក្រុមភ្ញៀវ ទទួលបាន ៥ ម៉ឺនដុល្លារ សម្រាប់ថ្លៃធ្វើដំណើរ វគ្គជម្រុះបឋម
ក្រុមនីមួយៗទទួលបាន ៣០ ម៉ឺនដុល្លារ វគ្គសន្សំពិន្ទុក្នុងពូល
វគ្គ ១៦ ក្រុមចុងក្រោយ ក្រុមនីមួយៗ ទទួលបាន ៨ ម៉ឺនដុល្លារទៀត
វគ្គ ៨ ក្រុមចុងក្រោយ ក្រុមនីមួយៗ ទទួលបាន ១៦ ម៉ឺនដុល្លារទៀត
វគ្គ ៤ ក្រុមចុងក្រោយ ក្រុមនីមួយៗ ទទួលបាន ២៤ ម៉ឺនដុល្លារទៀត
ចំណាត់ថ្នាក់លេខ ២ ទទួលបាន ១ លានដុល្លារ
ជើងឯក ទទួលបាន ២,៥ លានដុល្លារ

អត្ថបទ៖ វិរបុត្រ

The post គ្រាន់តែវគ្គចែកពូល ព្រះខ័នរាជស្វាយរៀង ទទួលបាន ៣០ ម៉ឺនដុល្លារក្នុងពាន AFC2 appeared first on Kampuchea Thmey Daily.

លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន

chean virakbot — Fri, 22 May 2026 03:20:41 +0000

ក្លិបបាល់ទាត់ ព្រះខ័នរាជស្វាយរៀង និង ភ្នំពេញក្រោន មានភារកិច្ចចូលរួមប្រកួតក្នុងពានរង្វាន់ក្លិបអាស៊ីលំដាប់ទី២ AFC Champions League Two នៅរដូវកាលថ្មី ២០២៦-២៧ ប៉ុន្តែគ្រូបង្វឹកត្រូវតែមានសញ្ញាបត្រអាស៊ីខ្ពស់បំផុតគឺ AFC Professional Diploma ទើបអាចដឹកចូលរួមប្រកួតបាន។

រហូតដល់ពេលនេះ លោក Mattew McConkey គ្រូបង្វឹក ព្រះខ័នរាជស្វាយរៀង និង Oleg Starynskyi គ្រូបង្វឹករបស់ ភ្នំពេញក្រោន មិនទាន់មានសញ្ញាបត្រ AFC Pro Lecense ទេ ដូច្នេះលោកមិនអាចដឹកនាំចូលរួមការប្រកួតក្នុងពានរង្វាន់អាស៊ីកម្រិតទី២បានឡើយ។

ទោះបីជាយ៉ាងណា កាលពីពេលថ្មីៗនេះ សហព័ន្ធកីឡាបាល់ទាត់កម្ពុជា បានប្រកាសបើកវគ្គបណ្តុះបណ្តាលជំនាញគ្រូបង្វឹកកម្រិតអាស៊ីខ្ពស់បំផុតនៅកម្ពុជា ហើយនេះជាការបើកវគ្គបណ្តុះបណ្តាលជំនាញគ្រូបង្វឹកខ្ពស់បំផុតលើកដំបូងនៅកម្ពុជា។

កញ្ញា ជា ស្រីលីស ប្រធានអាជ្ញាប័ណ្ណក្លិបបាល់ទាត់កម្ពុជា បានប្រាប់ថា មានលក្ខខណ្ឌមួយដែលគ្រូបង្វឹកភ្នំពេញក្រោន និង ព្រះខ័នរាជស្វាយរៀង អាចដឹកនាំការប្រកួតក្នុងពានរង្វាន់អាស៊ីកម្រិតទី២បានគឺ ពួកគាត់ត្រូវតែចុះឈ្មោះចូលរួមរៀនវគ្គ AFC Pro Lecense ហើយទទួលបានការអនុម័តពីគណៈកម្មការជំនាញបណ្តុះបណ្តាល។

កញ្ញា ជា ស្រីលីស បានបញ្ជាក់ថា ៖«ពាក់ព័ន្ធនឹងចំណុចនេះ មានន័យថា មិនចាំបាច់ពួកគាត់រៀនចប់ហើយបានដឹកនាំបានទេ គឺ ឲ្យតែពួកគេបានចុះឈ្មោះ ហើយពួកគាត់ជាប់ចូលរៀនត្រឹមត្រូវគឺ ពួកគាត់អាចដឹកនាំការប្រកួតបានហើយ ប៉ុន្តែទាល់តែពួកគាត់ជាប់ឈ្មោះចូលរៀនជាមុនសិន។ ប្រសិនបើពួកគាត់បានចុះឈ្មោះហើយ តែអត់ជាប់ឈ្មោះចូលរៀន ក៏មិនអាចដឹកនាំបានដែរ»។

ការអនុម័តឲ្យបេក្ខជនចូលរួមរៀនដោយគណៈកម្មការរៀបចំវគ្គបណ្តុះបណ្តាលរបស់សហព័ន្ធកីឡាបាល់ទាត់កម្ពុជាតែម្តង មិនមែនខាងសហព័ន្ធកីឡាបាល់ទាត់ទ្វីបអាស៊ីទេ។ តាមសេចក្តីប្រកាសរបស់សហព័ន្ធកីឡាបាល់ទាត់កម្ពុជា បង្ហាញឲ្យឃើញពីតម្រូវការជាច្រើនសម្រាប់គ្រូបង្វឹកមុនពេលទទួលបានការអនុម័តឲ្យចូលរៀនត្រឹមត្រូវ។ ក្នុងនោះ បេក្ខជនត្រូចចុះឈ្មោះ ត្រូវឆ្លងកាត់ការសម្ភាស និងបំពេញឯកសារផ្សេងៗជាច្រើនទើបអាចទទួលបានការអនុម័តឲ្យចូលរៀន។

ការរៀបចំបើកវគ្គបណ្តុះបណ្តាលជំនាញគ្រូបង្វឹកអាស៊ីកម្រិតខ្ពស់បំផុតរបស់សហព័ន្ធកកីឡាបាល់ទាត់កម្ពុជាពេលនេះ ពិតជាមានសារសំខាន់ណាស់សម្រាប់គ្រូបង្វឹកកម្ពុជា និងជនបរទេស ពីព្រោះការចេញទៅរៀននៅក្រៅប្រទេសចំណាយប្រាក់ច្រើន។ ជាពិសេសស្របពេលដែលក្លិបបាល់ទាត់កម្ពុជាត្រូវចូលរួមប្រកួតពានរង្វាន់អាស៊ីកម្រិតទី២ផង៕

អត្ថបទ៖ វិរបុត្រ

The post លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន appeared first on Kampuchea Thmey Daily.

គុណសម្បត្តិ ព្រះខ័នរាជស្វាយរៀង និង ភ្នំពេញក្រោន ធ្វើឱ្យកម្ពុជា បានលេង AFC2 ពីររដូវកាលជាប់គ្នា

Kosal Sem — Tue, 19 May 2026 05:30:00 +0000

ក្លិបរបស់ កម្ពុជា នឹងទទួលបានកៅអីលេងពានរង្វាន់កម្រិតទី ២ របស់ទ្វីប អាស៊ី AFC Champions League Two ពីររដូវកាលជាប់គ្នា ពោលគឺនៅរដូវកាល ២០២៦-២០២៧ និង ២០២៧-២០២៨ បន្ទាប់ពីក្រុម ព្រះខ័នរាជស្វាយរៀង និង ភ្នំពេញក្រោន សាងស្ថិតិល្អក្នុងពានរង្វាន់ AFC Challenge League។

កត្តាដែល ព្រះខ័នរាជស្វាយរៀង ឡើងដល់វគ្គផ្តាច់ព្រ័ត្រពានរង្វាន់ AFC Challenge League កាលពីរដូវកាល ២០២៤-២០២៥ បានធ្វើឱ្យ កម្ពុជា រកបានពិន្ទុយ៉ាងច្រើននៅក្នុងចំណាត់ថ្នាក់ក្លិប AFC រហូតធ្វើឱ្យក្លិបក្នុងលីគ កម្ពុជា ទទួលបាន ១ កៅអីកន្លះឡើងទៅលេងពាន AFC Champions League Two នៅរដូវកាលក្រោយ ២០២៦-២០២៧។

បច្ចុប្បន្ន កម្ពុជា បានរកឃើញទាំង ២ ក្រុមហើយ ដែលត្រូវឡើងទៅលេងពាន AFC2 នៅរដូវកាលក្រោយ រួមមាន ព្រះខ័នរាជស្វាយរៀង ជាក្រុមជើងឯកលីគកំពូល កម្ពុជា និង ភ្នំពេញក្រោន ជាជើងឯករងលីគកំពូល កម្ពុជា។ ព្រះខ័នរាជស្វាយរៀង នឹងត្រូវចូលវគ្គចែកពូលដោយស្វ័យប្រវត្តិ ខណៈ ភ្នំពេញក្រោន ត្រូវប្រកួតជម្រុះ playoffs។

ដោយឡែកនៅរដូវកាល ២០២៧-២០២៨ កម្ពុជា ក៏ទទួលបានកៅអីលេងពាន AFC2 ១ កៅអីកន្លះផងដែរ បន្ទាប់ពី ព្រះខ័នរាជស្វាយរៀង និង ភ្នំពេញក្រោន ធ្វើបានល្អនៅក្នុងពាន AFC Challenge League រដូវកាលនេះ។

យោងតាម Footy Ranking បន្ទាប់ពី ព្រះខ័នរាជស្វាយរៀង ឡើងដល់វគ្គផ្តាច់ព្រ័ត្រ និង ភ្នំពេញក្រោន ឡើងដល់វគ្គ ៨ ក្រុម បានធ្វើឱ្យ កម្ពុជា ឈរនៅលេខ ៩ ប្រចាំតំបន់អាស៊ីខាងកើតមាន ២៧.៨៥០ ពិន្ទុ លើក្រុមលេខ ១០ ឥណ្ឌូណេស៊ី មាន ២៧.៨៥០។

នៅរដូវកាលក្រោយ ក្លិប កម្ពុជា នឹងកាន់តែអាចសន្សំពិន្ទុបានច្រើន ដោយសារតែបានលេងនៅក្នុងពានអាស៊ីកម្រិតទី ២។ ដូច្នេះប្រសិនបើ ព្រះខ័នរាជស្វាយរៀង និង ភ្នំពេញក្រោន ធ្វើបានល្អ ដោយអាចឡើងដល់វគ្គជ្រៅៗ នោះនឹងអាចរកបានពិន្ទុច្រើន ដើម្បីបន្តលេងក្នុងពាន AFC2 ទៀត៕

អត្ថបទ៖ សេម កុសល

The post គុណសម្បត្តិ ព្រះខ័នរាជស្វាយរៀង និង ភ្នំពេញក្រោន ធ្វើឱ្យកម្ពុជា បានលេង AFC2 ពីររដូវកាលជាប់គ្នា appeared first on Kampuchea Thmey Daily.

ពានអាស៊ី AFC3 គ្មានក្រុមអាស៊ីខាងកើត ស្ថិតនៅវគ្គចែកពូលដោយស្វ័យប្រវត្តិ

chean virakbot — Mon, 27 Apr 2026 02:54:37 +0000

សហព័ន្ធកីឡាបាល់ទាត់ទ្វីបអាស៊ី (AFC) បានចេញអំពីប្រទេសអាស៊ីខាងកើតទទួលបានកៅអី ដើម្បីចូលរួមប្រកួតពានរង្វាន់ក្លិបអាស៊ីទាំង ៣ កម្រិតគឺ AFC Champions League Elite, AFC Champions League Two និង AFC Challenge League។

ប្រទេសចំនួន ១០ ទទួលបានកៅប្រកួតពានលំដាប់ទី២ AFC Champions League Two រដូវកាល ២០២៦-២៧ កម្ពុជា ទទួលបាន ១ កៅអីកន្លះ គឺ ១កៅអី វគ្គចែកពូល បានទៅ ព្រះខ័នរាជស្វាយរៀង ក្នុងនាមជាម្ចាស់ជើងឯកលីគកំពូលកម្ពុជា និងកន្លះកៅអីទៀត វគ្គជម្រុះ។ វៀតណាម ទទួលបាន ១កៅអី វគ្គក្នុងពូល ហើយ សិង្ហបុរី និង ហុងកុង ទទួលបាន ១ កៅអីកន្លះកៅអី ដូចកម្ពុជាដែរ។ ចំណែក ឥណ្ឌូណេស៊ី និង ហ្វីលីពីន ទទួលបានកន្លះកៅអី សម្រាប់វគ្គជម្រុះពានកម្រិតទី២។ ប្រទេសអាស៊ីខាងកើតផ្សេងទៀតគឺនៅវគ្គចែកពូលមាន ជប៉ុន ១ កៅអី កូរ៉េខាងត្បូង ១ កៅអី ថៃ ១ កៅអី ចិន ១ កៅអី អូស្ត្រាលី ១ កៅអី ម៉ាឡេស៊ី ១ កៅអី សម្រាប់ពាន AFC Champions League Two។

អ្វីដែលគួរឲ្យកត់សំគាល់ ពានរង្វាន់កម្រិតទី៣ AFC Challenge League មិនទាន់មានក្រុមស្ថិតនៅក្នុងវគ្គចែកពូលដោយស្វ័យប្រវត្តិឡើយ។ ក្រុមរបស់ កម្ពុជា សិង្ហបុរី ហុងកុង ឥណ្ឌូណេស៊ី និង ហ្វីលីពីន ដែលជម្រុះពាន AFC Champions League Two គឺក្រុមឈ្នះឡើងទៅវគ្គចែកពូល ប៉ុន្តែក្រុមចាញ់គឺមានតែ ក្រុមរបស់ កម្ពុជា សិង្ហបុរី និងហុងកុង ត្រូវធ្លាក់ទៅវគ្គចែកពូលពានកម្រិតទី៣។ ជាមួយគ្នានេះ ចំនួន ១២ ប្រទេស សុទ្ធតែទទួលបានកន្លះកៅអីសម្រាប់វគ្គជម្រុះទាំងអស់គឺ ឥណ្ឌូណេស៊ី ហ្វីលីពីន មីយ៉ាន់ម៉ា ឆាយនីសតៃប៉ិ កូរ៉េខាងជើង ម៉ុងហ្គោលី ម៉ាកាវ ឡាវ ព្រុយណេ ទីម័រខាងកើត ហ្គាំ និងកោះម៉ារីណា។

សូមបញ្ជាក់ថា វគ្គចែកពូលពាន AFC Challenge League ត្រូវជ្រើសរើសយកចំនួន ៨ ក្រុម គឺ ២ ក្រុម មកពីជម្រុះពានកម្រិតទី២ រវាង សិង្ហបុរី ហុងកុង កម្ពុជា និងក្រុមរងជើងឯក AFC Challenge League រដូវកាលនេះ ខណៈ ៦ ក្រុម ទៀតមកពីជម្រុះពានAFC Challenge League រវាង ឥណ្ឌូណេស៊ី ហ្វីលីពីន មីយ៉ាន់ម៉ា ឆាយនីសតៃប៉ិ កូរ៉េខាងជើង ម៉ុងហ្គោលី ម៉ាកាវ ឡាវ ព្រុយណេ ទីម័រខាងកើត ហ្គាំ និងកោះម៉ារីណា។

ចំណែកនៅអាស៊ីខាងលិច មាន ៣ ក្រុមស្ថិតនៅវគ្គចែកពូលដោយស្វ័យប្រវត្តិគឺ តួកមេនីស្ថាន គុយវ៉ែត និង លីបង់។

សូមបញ្ជាក់ថា ក្រុមលេខ ២ នៃលីគបាល់ទាត់កំពូលកម្ពុជា រដូវកាលនេះ គឺត្រូវប្រកួតជម្រុះពានរង្វាន់ AFC Champions League Two។ ប្រសិនបើឈ្នះការប្រកួតជម្រុះ នោះកម្ពុជា នឹងបានឡើងវគ្គចែកពូល ២ ក្រុម ដោយមិនមានក្រុមលេងពានកម្រិតទី ៣ ទេ។ ផ្ទុយទៅវិញ ប្រសិនបើមិនជោគជ័យវគ្គជម្រុះ នោះកម្ពុជា នឹងធ្លាក់ទៅវគ្គចែកពូលពានកម្រិតទី ៣ ៕

អត្ថបទ៖ វិរបុត្រ

The post ពានអាស៊ី AFC3 គ្មានក្រុមអាស៊ីខាងកើត ស្ថិតនៅវគ្គចែកពូលដោយស្វ័យប្រវត្តិ appeared first on Kampuchea Thmey Daily.

លទ្ធផលក្នុងពាន Shopee Cup បង្ហាញពី ព្រះខ័នរាជស្វាយរៀង មានសមត្ថភាពលេងពាន AFC2

Kosal Sem — Thu, 23 Apr 2026 08:40:30 +0000

ក្លិប ព្រះខ័នរាជស្វាយរៀង បានបង្ហាញទៅអ្នកគាំទ្រ ពីសមត្ថភាពរបស់ខ្លួនដែលអាចប្រកួតប្រជែងក្នុងពាន AFC Champions League Two នៅរដូវកាលក្រោយបាន បន្ទាប់រដូវកាលនេះ ពួកគេទទួលបានលទ្ធផលល្អ នៅពេលលេងតទល់នឹងក្រុមលំដាប់ AFC2 ក្នុងពាន ASEAN Club Championship Shopee Cup។

ថ្វីដ្បិត ព្រះខ័នរាជស្វាយរៀង បានបញ្ចប់បេសកកម្មក្នុងពាន Shopee Cup ដោយធ្លាក់ត្រឹមវគ្គក្នុងពូល បន្ទាប់ពីឈរលេខ ៣ ក្នុងពូល B ក៏ដោយ ប៉ុន្តែពួកគេបានបង្ហាញនូវលទ្ធផលយ៉ាងល្អគួរទទួលយកបាន។ ឆ្លងកាត់ ៥ ប្រកួត ពួកគេឈ្នះ ២ ស្មើ ២ និងចាញ់ ១។

ក្នុងចំណោមគូប្រជែងទាំង ៥ របស់ ព្រះខ័នរាជស្វាយរៀង មានតែ Shan United មួយប៉ុណ្ណោះ ដែលជាក្រុមលេងកម្រិត AFC Challenge League ខណៈក្រុម ៤ ទៀតសុទ្ធតែលេងនៅលំដាប់ពានទី ២ របស់ទ្វីប អាស៊ី។ លទ្ធផលទាំង ៥ ប្រកួតក្នុងពូល B គឺ ព្រះខ័នរាជស្វាយរៀង ឈ្នះ Shan United ៣-០, ឈ្នះក្រុម Lion City Sailors ២-០, ស្មើ Jorhor Darul Ta’zim ២-២, ស្មើ Bangkok United ១-១ និងចាញ់ Nam Dinh ២-១។

លទ្ធផលទាំងនេះ បានបង្ហាញរួចហើយ ថា ព្រះខ័នរាជស្វាយរៀង កំពុងឈានដល់កម្រិតមួយ ដែលអាចមានសមត្ថភាពចូលរួមប្រកួតប្រជែងក្នុងពានលំដាប់ទី ២ របស់ទ្វីប អាស៊ី AFC Champions League Two នៅរដូវកាលក្រោយបាន។ ក្រៅពីចំណុចនេះ ពួកគេក៏បានបង្ហាញរួចហើយ តាមរយៈការបានឡើងទៅដល់វគ្គផ្តាច់ព្រ័ត្រពាន AFC Challenge League ២ រដូវកាលជាប់គ្នា ពោលគឺនៅរដូវកាល ២០២៤-២០២៥ និង ២០២៥-២០២៦ នេះ។

គួរបញ្ជាក់ ថា ព្រះខ័នរាជស្វាយរៀង បានកក់កៅអីរួចរាល់ហើយ ដើម្បីឡើងទៅលេងពាន AFC Champions League Two នៅរដូវកាលក្រោយ ២០២៦-២០២៧ បន្ទាប់ពីពួកគេបានឈ្នះជើងឯកលីគកំពូល កម្ពុជា រដូវកាលនេះ៕

អត្ថបទ៖ សេម កុសល

The post លទ្ធផលក្នុងពាន Shopee Cup បង្ហាញពី ព្រះខ័នរាជស្វាយរៀង មានសមត្ថភាពលេងពាន AFC2 appeared first on Kampuchea Thmey Daily.

Kwame ស្ថិតក្នុងកីឡាករកំពូល ៣ នាក់ រកបានគ្រាប់បាល់ច្រើនជាងគេ ពានអាស៊ីទាំង ៣

chean virakbot — Thu, 23 Apr 2026 01:19:12 +0000

កីឡាករដែលរកបានគ្រាប់បាល់ច្រើនគ្រាប់ជាងគេ (Top Scorer) នៃពានរង្វាន់ក្លិបអាស៊ីទាំង ៣ សុទ្ធតែរកបាន ៨ គ្រាប់ដូចគ្នា ហើយសុទ្ធតែមានភាគរយខ្ពស់ក្នុងការឈ្នះពានស្បែកជើងមាសដូចគ្នា។

ពាន AFC Challenge League

ពានរង្វាន់ក្លិបអាស៊ីលំដាប់ទី៣ AFC Challenge League រដូវកាល ២០២៥-២៦ រកឃើញក្រុមជួបគ្នាក្នុងដល់វគ្គផ្តាច់ព្រ័ត្រហើយ គឺ ព្រះខ័នរាជស្វាយរៀង ប៉ះក្រុម Al Kuwait របស់គុយវែត។

បើនិយាយពីបេក្ខភាពដណ្តើមពានស្បែកជើងមាសក្នុងនាមជាកីឡាកររកបានគ្រាប់បាល់ច្រើនជាងគេវិញគឺ កីឡាករ Kwame Peprah របស់ក្លិបព្រះខ័នរាជស្វាយរៀង។ កីឡាករ រកបាន ៨ គ្រាប់ គឺ រកបាន ៣ គ្រាប់នៅវគ្គសន្សំពិន្ទុក្នុងពូល រកបាន ៣ គ្រាប់ក្នុងវគ្គ ៨ ក្រុមចុងក្រោយ និង ២ គ្រាប់ ក្នុងវគ្គ ពាក់កណ្តាលផ្តាច់ព្រ័ត្រ។ រហូតដល់ពេលនេះ ស្ទើរតែគ្មានកីឡាករអាចប្រជែងពានស្បែកជើងមាសជាមួយខ្សែប្រយុទ្ធសញ្ជាតិហ្គាណា ឡើយ ដោយសារកីឡាករដែលមានគ្រាប់ចន្លោះពី ៤ ទៅ ៧ គ្រាប់គឺក្រុមរបស់ពួកគេធ្លាក់អស់ហើយ។

ពាន AFC Champions League Two

ពានរង្វាន់ក្លិបអាស៊ីលំដាប់ទី២ AFC Champions League Two រដូវកាលនេះក៏រកឃើញក្រុមជួបគ្នាក្នុង វគ្គផ្តាច់ព្រ័ត្រហើយគឺក្រុម Gamba Osaka របស់ជប៉ុន ប៉ះ ក្រុម Al Nassr របស់អារ៉ាប៊ីសាអ៊ូឌីត។

ចំណែកម្ចាស់គ្រាប់បាល់ច្រើនជាងគេវិញ កំពុងកាន់កាប់កំពូលតារាងដោយកីឡាករ Trent Buhagiar របស់ក្រុម Tampines Rover។ រូបគេរកបាន ៨ គ្រាប់ គឺរកបាន ៥ គ្រាប់ក្នុងវគ្គសន្សំពិន្ទុក្នុងពូល រកបាន១ គ្រាប់រកបានវគ្គ ១៦ និង ២ គ្រាប់រកបាន វគ្គ ៨ ក្រុមចុងក្រោយ។ ថ្វីបើក្រុមរបស់សិង្ហបុរី បានធ្លាក់ត្រឹមវគ្គ ៨ ក្រុមចុងក្រោយហើយក្តី ប៉ុន្តែរូបគេនៅមានឱកាសឈ្នះពានស្បែកជើងមាស ខណៈគូប្រជែងគឺកីឡាករ Kingsley Coman របស់ក្រុម Al Nassr រកបាន ៦ គ្រាប់ ដែលក្រុមរបស់គេឈានដល់វគ្គផ្តាច់ព្រ័ត្រ។

ពាន AFC Champions League Elite

ពានលំដាប់កំពូលរបស់អាស៊ី AFC Champions League Elite បានរកឃើញក្រុមជួបគ្នាក្នុងវគ្គផ្តាច់ព្រ័ត្រហើយ គឺ Al Ahli របស់ប្រទេសអារ៉ាប៊ីសាអ៊ូឌីត ប៉ះ ក្រុម Machida Zelvia របស់ជប៉ុន។

ចំពោះបេក្ខភាពដណ្តើមពានស្បែកជើងមាស កំពុងនាំមុខដោយកីឡាករ Rafa Mujica របស់ក្រុម Al Sadd។ រូបគេរកបាន ៨ គ្រាប់ គឺរកបាន ៥ គ្រាប់ នៅវគ្គសន្សំពិន្ទុក្នុងពូល រកបាន ១គ្រាប់ នៅវគ្គ ១៦ ក្រុមចុងក្រោយ និងរកបាន ២ គ្រាប់នៅវគ្គ ៨ ក្រុមចុងក្រោយ។ ទោះបីជា ក្រុមរបស់កាតា Al Sadd បានធ្លាក់ត្រឹមវគ្គ ៨ ក្រុមចុងក្រោយហើយក្តី ប៉ុន្តែរូបគេនៅតែមានឱកឈ្នះពានស្បែកជើងមាស ដោយសារកីឡាករផ្សេងៗទៀតទើបរកបាន ៤ គ្រាប់៕

អត្ថបទ៖ វិរបុត្រ

The post Kwame ស្ថិតក្នុងកីឡាករកំពូល ៣ នាក់ រកបានគ្រាប់បាល់ច្រើនជាងគេ ពានអាស៊ីទាំង ៣ appeared first on Kampuchea Thmey Daily.

ផ្លូវការ! កម្ពុជា ស្ថិតក្នុងចំណោម ១០ ប្រទេស ទទួលបានកៅអី ពាន AFC 2

chean virakbot — Tue, 21 Apr 2026 02:21:56 +0000

សហព័ន្ធកីឡាបាល់ទាត់ទ្វីបអាស៊ី (AFC) បានចេញជាផ្លូវការហើយអំពីប្រទេសអាស៊ីខាងកើតទទួលបានកៅអី ដើម្បីចូលរួមប្រកួតពានរង្វាន់ក្លិបអាស៊ីទាំង ៣ កម្រិតគឺ AFC Champions League Elite, AFC Champions League Two និង AFC Challenge League។

ប្រទេសចំនួន ៦ ទទួលបានកៅអី ប្រកួតពានលំដាប់ទី១ ខណៈមានប្រទេសចំនួន ១០ ទទួលបានកៅប្រកួតពានលំដាប់ទី២ ក្នុងនោះ កម្ពុជា ផងដែរសម្រាប់រដូវកាលថ្មី ២០២៦-២៧។ កម្ពុជា ទទួលបាន ១ កៅអីកន្លះ គឺ ១កៅអី វគ្គចែកពូល ដែលបានទៅ ព្រះខ័នរាជស្វាយរៀង ក្នុងនាមជាម្ចាស់ជើងឯកលីគកំពូលកម្ពុជា រដូវកាល ២០២៥-២៦ និងកន្លះកៅអីទៀត វគ្គជម្រុះ។

ប្រទេស ៩ ផ្សេងទៀតដែលទទួលបានកៅអីប្រកួតពាន AFC Champions League Two គឺនៅវគ្គចែកពូលមាន ជប៉ុន ១ កៅអី កូរ៉េខាងត្បូង ១ កៅអី ថៃ ១ កៅអី ចិន ១ កៅអី អូស្ត្រាលី ១ កៅអី ម៉ាឡេស៊ី ១ កៅអី វៀតណាម ប៉ុន្តែនៅពានកម្រិតទី១ ជប៉ុន ទទួលបាន ៣ កៅអី កូរ៉េខាងត្បូង ទទួលបាន ២ កៅអីកន្លះ ថៃ ទទួលបាន ២ កៅអីកន្លះ ចិន ទទួលបាន ១ កៅអីកន្លះ អូស្ត្រាលី ទទួលបាន ១ កៅអី និងម៉ាឡេស៊ី ទទួលបាន ១ កៅអី។

ចំណែក វៀតណាម សិង្ហបុរី និង ហុងកុង ទទួលបាន ១ កៅអីកន្លះកៅអី ក្នុងពាន AFC Champions League Two ដូច កម្ពុជា ដែរ ខណៈ ឥណ្ឌូណេស៊ី និង ហ្វីលីពីន ទទួលបានកន្លះកៅអី សម្រាប់វគ្គជម្រុះ។

ចំពោះប្រទេសដែលត្រូវប្រកួតពានរង្វាន់កម្រិតទី៣ AFC Challenge League គឺមានចំនួន ១២ ប្រទេស ដែលសុទ្ធតែទទួលបានកន្លះកៅអីសម្រាប់វគ្គជម្រុះទាំងអស់គឺ ឥណ្ឌូណេស៊ី ហ្វីលីពីន មីយ៉ាន់ម៉ា ឆាយនីសតៃប៉ិ កូរ៉េខាងជើង ម៉ុងហ្គោលី ម៉ាកាវ ឡាវ ព្រុយណេ ទីម័រខាងកើត ហ្គាំ និងកោះម៉ារីណា ត្រូវប្រកួតជម្រុះ។

រហូតដល់ពេលនេះ ពានរង្វាន់ AFC Challenge League មិនទាន់មានក្រុមស្ថិតនៅវគ្គចែកពូលដោយស្វ័យប្រវត្តិឡើយ។ ក្រុមរបស់ វៀតណាម សិង្ហបុរី ហុងកុង និង កម្ពុជា ដែលជម្រុះពានកម្រិតទី២ គឺក្រុមឈ្នះឡើងទៅវគ្គចែកពូល ខណៈក្រុមចាញ់ ត្រូវធ្លាក់ទៅវគ្គចែកពូលពានកម្រិតទី៣។

អត្ថបទ៖ វិរបុត្រ

The post ផ្លូវការ! កម្ពុជា ស្ថិតក្នុងចំណោម ១០ ប្រទេស ទទួលបានកៅអី ពាន AFC 2 appeared first on Kampuchea Thmey Daily.

AFC Champions League Two Archives - Kampuchea Thmey Daily

ក្រុមហ្វីលីពីន និងឥណ្ឌូណេស៊ី ត្រូវជម្រុះ ខណៈ ភ្នំពេញក្រោន ឡើងវគ្គចែកពូល ដូចព្រះខ័នរាជស្វាយរៀង ពាន AFC2

គ្រាន់​តែ​វគ្គ​ចែក​ពូល ព្រះ​ខ័ន​រាជ​ស្វាយរៀង ទទួល​បាន ៣០ ម៉ឺន​ដុល្លារ​ក្នុង​ពាន AFC2

លក្ខខណ្ឌ​មួយ​នេះ គ្រូ​ព្រះ​ខ័ន​រាជ​ស្វាយរៀង និង ភ្នំពេញ​ក្រោន អាច​ដឹក​នាំ​ការ​ប្រកួត​ក្នុងពាន AFC2 បាន

គុណសម្បត្តិ ព្រះខ័នរាជស្វាយរៀង និង ភ្នំពេញក្រោន ធ្វើឱ្យកម្ពុជា បានលេង AFC2 ពីររដូវកាលជាប់គ្នា

ពាន​អាស៊ី​ AFC3 គ្មានក្រុម​អាស៊ី​ខាង​កើត ស្ថិត​នៅ​វគ្គ​ចែក​ពូល​ដោយ​ស្វ័យប្រវត្តិ

លទ្ធផលក្នុងពាន Shopee Cup បង្ហាញពី ព្រះខ័នរាជស្វាយរៀង មានសមត្ថភាពលេងពាន AFC2

Kwame ស្ថិតក្នុងកីឡាករកំពូល​ ៣ នាក់ រក​បាន​គ្រាប់​បាល់​ច្រើន​ជាង​គេ ពានអាស៊ី​ទាំង​ ៣

ផ្លូវ​ការ! កម្ពុជា ស្ថិត​ក្នុង​ចំណោម ១០ ប្រទេស ទទួល​បាន​កៅអី​​ ពាន AFC 2

គ្រាន់តែវគ្គចែកពូល ព្រះខ័នរាជស្វាយរៀង ទទួលបាន ៣០ ម៉ឺនដុល្លារក្នុងពាន AFC2

លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន

ពានអាស៊ី AFC3 គ្មានក្រុមអាស៊ីខាងកើត ស្ថិតនៅវគ្គចែកពូលដោយស្វ័យប្រវត្តិ

Kwame ស្ថិតក្នុងកីឡាករកំពូល ៣ នាក់ រកបានគ្រាប់បាល់ច្រើនជាងគេ ពានអាស៊ីទាំង ៣

ផ្លូវការ! កម្ពុជា ស្ថិតក្នុងចំណោម ១០ ប្រទេស ទទួលបានកៅអី ពាន AFC 2