លទ្ធផលក្នុងពាន Shopee Cup បង្ហាញពី ព្រះខ័នរាជស្វាយរៀង មានសមត្ថភាពលេងពាន AFC2

ក្លិប ព្រះខ័នរាជស្វាយរៀង បានបង្ហាញទៅអ្នកគាំទ្រ ពីសមត្ថភាពរបស់ខ្លួនដែល​អាច​ប្រកួត​ប្រជែងក្នុងពាន AFC Champions League Two នៅរដូវកាលក្រោយបាន បន្ទាប់រដូវកាលនេះ ពួកគេទទួលបានលទ្ធផលល្អ នៅពេលលេងតទល់នឹងក្រុមលំដាប់ AFC2 ក្នុងពាន ASEAN Club Championship Shopee Cup។

ថ្វីដ្បិត ព្រះខ័នរាជស្វាយរៀង បានបញ្ចប់បេសកកម្មក្នុងពាន Shopee Cup ដោយធ្លាក់ត្រឹមវគ្គក្នុងពូល បន្ទាប់​ពី​ឈរ​លេខ ៣ ក្នុងពូល B ក៏ដោយ ប៉ុន្តែពួកគេបានបង្ហាញនូវលទ្ធផលយ៉ាងល្អគួរទទួលយកបាន។ ឆ្លងកាត់ ៥ ប្រកួត ពួកគេឈ្នះ ២ ស្មើ ២ និងចាញ់ ១។

ក្នុងចំណោមគូប្រជែងទាំង ៥ របស់ ព្រះខ័នរាជស្វាយរៀង មានតែ Shan United មួយប៉ុណ្ណោះ ដែលជាក្រុមលេងកម្រិត AFC Challenge League ខណៈក្រុម ៤ ទៀតសុទ្ធតែលេងនៅលំដាប់ពានទី ២ របស់ទ្វីប អាស៊ី។ លទ្ធផលទាំង ៥ ប្រកួតក្នុងពូល B គឺ ព្រះខ័នរាជស្វាយរៀង ឈ្នះ Shan United ៣-០, ឈ្នះក្រុម Lion City Sailors ២-០, ស្មើ Jorhor Darul Ta’zim ២-២, ស្មើ Bangkok United ១-១ និងចាញ់ Nam Dinh ២-១។

លទ្ធផលទាំងនេះ បានបង្ហាញរួចហើយ ថា ព្រះខ័នរាជស្វាយរៀង កំពុងឈានដល់កម្រិតមួយ ដែលអាចមានសមត្ថភាពចូលរួមប្រកួតប្រជែងក្នុងពានលំដាប់ទី ២ របស់ទ្វីប អាស៊ី AFC Champions League Two នៅរដូវកាលក្រោយបាន។ ក្រៅពីចំណុចនេះ ពួកគេក៏បានបង្ហាញរួចហើយ តាមរយៈការបានឡើងទៅដល់វគ្គផ្តាច់ព្រ័ត្រពាន AFC Challenge League ២ រដូវកាលជាប់គ្នា ពោលគឺនៅរដូវកាល ២០២៤-២០២៥ និង ២០២៥-២០២៦ នេះ។

គួរបញ្ជាក់ ថា ព្រះខ័នរាជស្វាយរៀង បានកក់កៅអីរួចរាល់ហើយ ដើម្បីឡើងទៅលេងពាន AFC Champions League Two នៅរដូវកាលក្រោយ ២០២៦-២០២៧ បន្ទាប់ពីពួកគេបានឈ្នះជើងឯកលីគកំពូល កម្ពុជា រដូវកាលនេះ៕

អត្ថបទ៖ សេម កុសល