តាមការផ្សាយពី CNA ថ្ងៃទី ២៩ ខែធ្នូ ឆ្នាំ ២០២៥ ឥណ្ឌាមានគោលបំណងគូសបញ្ជាក់ថា តំណែងប្រធានាធិបតីរបស់ខ្លួននឹងផ្តល់អាទិភាពដល់ភាគខាងត្បូងសកល ក្នុងពេលដែលនៅតែយកចិត្តទុកដាក់ចំពោះការអភិវឌ្ឍដែលកំពុងផ្លាស់ប្តូរនៅជុំវិញពិភពលោក។

វាក៏នឹងផ្តោតលើលទ្ធផលជាក់ស្តែងសម្រាប់សេដ្ឋកិច្ចដែលកំពុងរីកចម្រើន ដោយស្វែងរកការបង្ហាញថា BRICS អាចនាំសមាជិកដែលប្រឈមមុខនឹងបញ្ហាប្រឈមរួមមកជួបជុំគ្នា ទោះបីជាផលប្រយោជន៍ជាតិរបស់ពួកគេខុសគ្នាក៏ដោយ។

អ្នកវិភាគនិយាយថា ចំណុចសំខាន់នៅក្នុងរបៀបវារៈរបស់ឥណ្ឌា អាចជាការអភិវឌ្ឍយន្តការធានាការវិនិយោគដែលបានស្នើឡើង ដើម្បីដោះស្រាយការប្រែប្រួលអាកាសធាតុ ភាពក្រីក្រ ការផ្លាស់ប្តូរថាមពល និងតម្រូវការហេដ្ឋារចនាសម្ព័ន្ធ។

គំនិតផ្តួចផ្តើមនេះមានគោលបំណងបង្កើតរចនាសម្ព័ន្ធហិរញ្ញវត្ថុដែលគ្រប់គ្រងដោយប្រទេស BRICS ជាជាងមហាអំណាចលោកខាងលិច ដែលដំណើរការតាមរយៈធនាគារអភិវឌ្ឍន៍ថ្មី (NDB) ដែលបង្កើតឡើងដោយ BRICS។

ទោះជាយ៉ាងណាក៏ដោយ ដោយសារតែប្លុកនេះតំណាងឲ្យប្រហែលពាក់កណ្តាលនៃចំនួនប្រជាជនពិភពលោក និងជិត ៤០ ភាគរយនៃទិន្នផលសេដ្ឋកិច្ចពិភពលោក នោះបានធ្វើឲ្យបណ្តាប្រទេសលោកខាងលិច ចាត់ទុកជាគូប្រជែងរបស់ប្លុកដែលខ្លួនកំពុងដឹកនាំ។

កាលពីដើមឡើយ BRICS បានបង្កើតឡើងដោយប្រេស៊ីល រុស្ស៊ី ឥណ្ឌា និងចិន ហើយអាហ្វ្រិកខាងត្បូង ក៏បានចូលរួមជាសមាជិកភ្លាមៗដែរ។ ក្រោ​យមក ប្លុកនេះបានពង្រីកខ្លួន ដោយរួមបញ្ចូលប្រទេសថ្មីៗបន្ថែមទៀតដូចជា អេហ្ស៊ីប អេត្យូពី អ៊ីរ៉ង់ អេមីរ៉ាតអារ៉ាប់រួម និងឥណ្ឌូនេស៊ី។ ក្រៅពីនេះ ក៏មានដៃគូចំនួន៩ប្រទេសដូចជា បេឡារុស បូលីវី គុយបា កាហ្សាក់ស្ថាន ម៉ាឡេស៊ី នីហ្សេរីយ៉ា ថៃ អ៊ូហ្គង់ដា និងអ៊ូសបេគីស្ថាន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូរ៉េខាងជើង សាកល្បងមីស៊ីលបញ្ជាទិស ក្នុងន័យត្រៀមខ្លួនប្រយុទ្ធជាមួយសត្រូវពេញទី

The post ឥណ្ឌា ត្រៀមខ្លួនដឹកនាំ BRICS ចំពេលមានសម្ពាធពីសហរដ្ឋអាមេរិក appeared first on Kampuchea Thmey Daily.

តាមការផ្សាយរបស់ The Star, សំណើនេះគឺធ្វើឡើងដោយរដ្ឋមន្ត្រីការបរទេសថៃ Sihasak Phuangketkeow ដែលបញ្ជាក់កាលពីថ្ងៃពុធទី៣ខែធ្នូឆ្នាំ២០២៥ថា ទីក្រុងបាងកក ស្នើឲ្យរដ្ឋមន្ត្រីការបរទេសឥណ្ឌា Subrahmanyam Jaishankar ជួយឲ្យថៃឡើងឋានៈពីដៃគូ BRICS ទៅជាសមាជិក BRICS ពេញសិទ្ធិតែម្តង។

សូមជម្រាបថា BRICS គឺជាអង្គការនៃក្រុមប្រទេសមានសេដ្ឋកិច្ចកំពុងរីកចម្រើនដ៏សំខាន់លើពិភពលោកបង្កើតឡើងក្នុងឆ្នាំ២០០៩។ អង្គការនេះ ត្រូវបានបង្កើតឡើងដើម្បីលើកកម្ពស់កិច្ចសហប្រតិបត្តិការសេដ្ឋកិច្ច និងនយោបាយរវាងសមាជិករបស់ខ្លួន ក៏ដូចជាដើម្បីជំរុញកំណែទម្រង់រចនាសម្ព័ន្ធអភិបាលកិច្ចពិភពលោក។

ដើមឡើយ BRICS មានតែប្រេស៊ីល រុស្ស៊ី ឥណ្ឌា និងចិន ប៉ុណ្ណោះ ប៉ុន្តែមិនយូរប៉ុន្មានក៏មានអាហ្វ្រិកខាងត្បូងចូលរួមនៅឆ្នាំ២០១០។ ក្រោ​យមក ប្លុកនេះបានពង្រីកខ្លួន ដោយបន្ថែមសមាជិកថ្មីៗដូចជាអ៊ីរ៉ង់ អេហ្ស៊ីប អេត្យូពី និងអារ៉ាប់រួម ជាដើម។

បច្ចុប្បន្ន BRICS មានសមាជិកពេញសិទ្ធិចំនួន១១ប្រទេស បន្ទាប់ពីការបន្ថែមឥណ្ឌូណេស៊ីនិងអារ៉ាប៊ីសាអ៊ូឌីត។ ក្រៅពីនេះ BRICS មានដៃគូចំនួន៩ប្រទេសដូចជា បេឡារុស បូលីវី គុយបា កាហ្សាក់ស្ថាន ម៉ាឡេស៊ី នីហ្សេរីយ៉ា ថៃ អ៊ូហ្គង់ដា និងអ៊ូសបេគីស្ថាន។

BRICS តំណាងឲ្យប្រហែល៤០%នៃចំនួនប្រជាជនពិភពលោក និង១ភាគ៥នៃពាណិជ្ជកម្មសកល ប៉ុន្តែអង្គការនេះ ត្រូវបានបណ្តាប្រទេសលោកខាងលិច ចាត់ទុកជាគូប្រជែងរបស់ប្លុកដែលខ្លួនកំពុងដឹកនាំ តួយ៉ាងដូចជា G7 ជាដើម៕

អត្ថបទ៖ សុខ សុវណ្ណ

The post ថៃ សុំឲ្យឥណ្ឌាជួយ ដើម្បីក្លាយជាសមាជិក BRICS  ពេញសិទ្ធិ appeared first on Kampuchea Thmey Daily.

ថ្លែង​ក្នុងកិច្ចប្រជុំកំពូល​តាមអនឡាញ រដ្ឋមន្ត្រីការបរទេសឥណ្ឌា លោក​ S. Jaishankar បាននិយាយថា៖ «ឱនភាពពាណិជ្ជកម្មដ៏ធំបំផុតរបស់ប្រទេស(ឥណ្ឌា) គឺជាមួយដៃគូ BRICS»។

ការថ្លែងរបស់លោក Jaishankar ធ្វើឡើងត្រឹមតែ ១ សប្ដាហ៍ប៉ុណ្ណោះ ក្រោយ​លោក ណារិនដ្រា មូឌី ចូលរួម​កិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) ក្នុងប្រទេសចិន ដោយ​ត្រូវគេមើលឃើញថាជាសញ្ញានៃការជំរុញទំនាក់ទំនង​ជាមួយ​ចិន ​ក្រោម​សម្ពាធរបស់សហរដ្ឋអាមេរិក។

BRICS ដែលមាន​ប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូងជាសមាជិកសំខាន់ៗ ​កន្លងមកបាន​រងការចោទប្រកាន់ពីលោក ត្រាំ ថា បម្រើគោលនយោបាយប្រឆាំងអាមេរិក​។

សម្ដីរបស់ឥណ្ឌាលើកនេះ ហាក់ដូចជាប្រទាញប្រទង់គ្នាទៅនឹង​អ្វីដែល​ប្រេស៊ីល ដែលជាម្ចាស់ផ្ទះនៃកិច្ចប្រជុំ BRICS បានចោទប្រកាន់អាមេរិកថា «ជំរិតបង្ខំ» គេឯង។ ឥណ្ឌា និងប្រេស៊ីល បច្ចុប្បន្នជាសមាជិកប្លុក ដែលរងពន្ធរបស់លោក ត្រាំ រហូតដល់ ៥០ ភាគរយ។

មុនបន្ថែមពន្ធលើឥណ្ឌា ២៥ ភាគរយ ចំពោះការទិញប្រេងរុស្ស៊ី លោក ត្រាំ ដាក់ពន្ធលើ​ប្រទេសនេះ ២៥ ភាគរយ រួចហើយ​ ក្នុងបរិបទពន្ធបដិការដូចទៅនឹងប្រទេសជាច្រើនទូទាំងពិភពលោក​។ លោក​​សំអាង​លើ​ «ពាណិជ្ជកម្មមិនស្មើគ្នា» ដែលបង្កឱនភាពពាណិជ្ជកម្មសម្រាប់អាមេរិក។

ចិន​ដែលរង​សម្ពាធ​ដូចគ្នា បាន​ប្រឆាំងនឹង​ពន្ធ ត្រាំ ជាបន្តបន្ទាប់ ដោយ​ប្រធានាធិបតីចិន លោក ស៊ី ជីពីង កន្លងមកបាន​ព្រមានប្រឆាំងនឹង «អនុត្តរ​ភាព ឯកតោភាគីនិយម និងការការពារនិយម» ​ហើយ​និយាយថា «សង្រ្គាមពាណិជ្ជកម្ម និងសង្រ្គាមពន្ធ​ ដែលធ្វើឡើងដោយប្រទេសមួយចំនួន បានរំខានយ៉ាងធ្ងន់ធ្ងរដល់សេដ្ឋកិច្ចពិភពលោក និងធ្វើឱ្យខូចដល់ច្បាប់ពាណិជ្ជកម្មអន្តរជាតិ»។ មេដឹកនាំចិនរូបនេះ ​បាន​ជំរុញឱ្យប្រទេសសមាជិក BRICS ​កាន់ដៃគ្នាក្នុងការជម្នះការគំរាមកំហែងទាំងនោះ។

អ្នកជំនាញលើកឡើងថា ឥណ្ឌា​មើល​ឃើញ BRICS ជា​គំនិត​ផ្ដួចផ្ដើម​សេដ្ឋកិច្ច​ជា​ចម្បង ខណៈ​ចិន និង​រុស្ស៊ី​ មើល​ឃើញវាជាប្លុក​ភូមិសាស្ត្រ​នយោបាយ។

គួរគូសបញ្ជាក់ថា ឥណ្ឌាមាន​ឱនភាព​ពាណិជ្ជកម្ម ៩៩,២ ប៊ីលាន​ដុល្លារ ជាមួយចិន គិតត្រឹមឆ្នាំសារពើពន្ធ ដែលបញ្ចប់នៅខែមីនា ២០២៥។ ឱនភាព​ពាណិជ្ជកម្មជាមួយរុស្ស៊ីវិញ ក៏ខ្ពស់ដែររហូតដល់ ៥៩ ប៊ីលាន​ដុល្លារ ដោយសារតែឥណ្ឌាទិញប្រេងរុស្ស៊ី៕

​

The post ឥណ្ឌាជំរុញ​ BRICS ដោះស្រាយបញ្ហាឱនភាពពាណិជ្ជកម្មជាមួយខ្លួន appeared first on Kampuchea Thmey Daily.

នៅក្នុងសុន្ទរកថា​ចំពោះមុខមេដឹកនាំផ្សេងទៀត​កាល​ពី​ថ្ងៃ​ចន្ទ​ទី​៧​ខែ​កក្កដា​ឆ្នាំ​២០២៥ លោក Lula បានស្តីបន្ទោសដោយ​ចំៗ​ចំពោះអ្វីដែលគាត់បានពិពណ៌នាថាជាការប៉ុនប៉ងរបស់លោក ត្រាំ ក្នុងការបំភិតបំភ័យប្រទេសឯករាជ្យ។ លោក Lula បានហៅការគំរាមកំហែងនេះថា«ការ​មិនទទួលខុសត្រូវ» និង «ហួសសម័យកាល»។

មេ​ដឹក​នាំ​ប្រេស៊ីល បាន​រៀបរាប់​​ទៀត​ថា «ពិភពលោកបានផ្លាស់ប្តូរហើយ។ យើងមិនចង់បានអធិរាជទេ។ នេះ​ជា​ក្រុម​ប្រទេស​មួយ​ដែល​ចង់​ស្វែង​រក​វិធី​ផ្សេង​ទៀត ​ក្នុង​ការ​រៀបចំ​ពិភពលោក​តាម​ទស្សនៈ​សេដ្ឋកិច្ច។​ ខ្ញុំ​គិត​ថា ​នោះ​ហើយ​ជា​មូលហេតុ​ដែល​ក្រុម​ BRICS ធ្វើឲ្យ​​​អ្នក​ខ្លះ​​មិន​ស្រួល​ក្នុង​ខ្លួន»។

ការបង្ហោះ​លើ​ប្រព័ន្ធផ្សព្វផ្សាយសង្គមរបស់លោក ត្រាំ បានព្រមានអំពីពន្ធថ្មីលើសមាជិក BRICS ប្រសិនបើពួកគេបន្ត«ធ្វើ​ឲ្យ​ខូចពាណិជ្ជកម្មអាមេរិក»។ សារ​​ព្រមា​ន​នេះ បង្ក​ឲ្យ​មានប្រតិកម្ម​យ៉ាង​ខ្លាំងពី​បណ្ដា​ប្រទេស​ជា​សមាជិក​ BRICS។

ប្រធានាធិបតីអាហ្រ្វិកខាងត្បូង លោក Cyril Ramaphosa បានច្រានចោលការគំរាមកំហែងនេះ ដោយ​ថ្លែង​ថា ប្រទេសដែលមានអំណាចមិនគួរប្រើឧបករណ៍សេដ្ឋកិច្ច ដើម្បីដាក់ទណ្ឌកម្មអ្នកដទៃឡើយ។ ចំណែក​ឯ​ក្រសួងការបរទេសចិន បានថ្កោលទោសសេចក្តីថ្លែងការណ៍នេះថាជា «ការទូតបង្ខិតបង្ខំ» ខណៈពេលដែលបញ្ជាក់ឡើងវិញថា BRICS មិនមែនប្រឆាំងនឹងអាមេរិកទេ ប៉ុន្តែកំពុងធ្វើការឆ្ពោះទៅរកសណ្តាប់ធ្នាប់ពិភពលោកដែលមានតុល្យភាពជាងមុន។

ប្លុក BRICS ដែលបង្កើតឡើងដោយប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង និងសមាជិកថ្មីមួយចំនួនបានប្រើប្រាស់កិច្ចប្រជុំកំពូលនៅឆ្នាំនេះ ដើម្បីជំរុញ​ឲ្យ​មានកំណែទម្រង់សេដ្ឋកិច្ច និងកាត់បន្ថយការពឹងផ្អែកលើប្រាក់ដុល្លារអាមេរិកក្នុងពាណិជ្ជកម្មពិភពលោក។

សេចក្តីថ្លែងការណ៍ចុងក្រោយពីកិច្ចប្រជុំកំពូល BRICS បានជំរុញ​​ឲ្យ​មាន​​ពហុភាគីនិយម ដោយ​បានអំពាវនាវ​ឲ្យ​មានកំណែទម្រង់នៅក្នុងស្ថាប័នពិភពលោកដូចជា IMF និងក្រុមប្រឹក្សាសន្តិសុខអង្គការសហប្រជាជាតិ ហើយបានព្រមានប្រឆាំងនឹងគោលនយោបាយគាំពារនិយមដែលរំខានដល់ការអភិវឌ្ឍពិភពលោក៕

ដោយ៖ ឈាង

The post Lula រិះគន់លោក ត្រាំ ក្នុង​កិច្ច​ប្រជុំ BRICS ថា «ពិភពលោកមិនចង់បានអធិរាជទេ» appeared first on Kampuchea Thmey Daily.

លោក ត្រាំ បាន​សរសេរ​លើបណ្ដាញសង្គម Truth Social របស់លោកយ៉ាងដូច្នេះថា៖ «ប្រទេសណាក៏ដោយ​ ដែលដើរតាម​​គោលនយោបាយប្រឆាំងអាមេរិករបស់ BRICS នឹង​រងការបន្ថែមពន្ធ ១០ ភាគរយ ពីលើទៀត»។ លោក​បន្តថា៖ «វានឹង​គ្មាន​ការលើកលែង​ចំពោះគោលនយោបាយបែបនេះ​ទេ»។

ការគំរាមកំហែង​របស់លោកយ៉ាងដូច្នេះ ធ្វើឡើងខណៈលោកគ្រោងនឹង​ផ្ញើ «លិខិតស្ដីពីពន្ធ និង/ឬកិច្ចព្រមព្រៀង(ពាណិជ្ជកម្មពាក់ព័ន្ធពន្ធ)» ទៅកាន់ប្រទេសផ្សេងៗនៅថ្ងៃចន្ទនេះ ដើម្បីបញ្ជាក់ពីអត្រាពន្ធខ្ពស់ដែលពួកគេជាប់ ក្រោយ​ប្រធានាធិបតីដដែលប្រកាសពីការពន្យារពេលចូលធរមាននៃពន្ធបដិការដល់​ថ្ងៃ ១ សីហា ដោយរំកិលពីកាលកំណត់ចាស់ ៩ កក្កដា។

លោក ត្រាំ មិន​បាន​បញ្ជាក់ឱ្យច្បាស់នោះទេ ថាតើលក្ខខណ្ឌបែបណា ដែលអាមេរិក​នឹង​រាប់ចូលថាជាប្រទេស «​ដើរ​តាម​គោលនបាយប្រឆាំងអាមេរិករបស់ BRICS»។ នៅអាស៊ីអាគ្នេយ៍ មាន​ប្រទេសឥណ្ឌូណេស៊ី គឺជាសមាជិក​ពេញសិទ្ធិ​របស់ BRICS ខណៈថៃ និងម៉ាឡេស៊ី គឺជាប្រទេសដៃគូផ្លូវការ ហើយ​ប្រទេសទាំងនេះកន្លងមក បាន​បង្ហាញចំណាប់អារម្មណ៍ លើការចូលជាសមាជិកពេញសិទ្ធិ។

នេះមិនមែនជាលើកទីមួយ​នោះទេ ដែលលោក​ ត្រាំ ធ្វើការគំរាមកំហែងលើ BRICS ចំពោះគោលនយោបាយប្រឆាំងអាមេរិក ដែលរួមបញ្ជូលទាំងគោលនយោបាយងាកចេញពីការប្រើប្រាស់ប្រាក់ដុល្លារ (​បដិដុល្លារូបនីយកម្ម)។

​យ៉ាងណាមិញ ការគំរាមកំហែងលើកនេះ ធ្វើឡើងខណៈប្រទេសផ្សេងៗនៅអាស៊ីអាគ្មេយ៍កំពុងប្រឈមមុខនឹង​ហានិភ័យពន្ធខ្ពស់ ដោយ​មិនទាន់សម្រេចបាន​កិច្ចព្រមព្រៀងពាណិជ្ជកម្មជាមួយរដ្ឋបាល​ ត្រាំ។ ក្នុងនោះ រួមមាន​ ថៃ (៣៦ ភាគរយ) ឥណ្ឌូណេស៊ី (៣២ ភាគរយ) និងម៉ាឡេស៊ី (២៤ ភាគរយ)។

ប្រសិនបើការចរចាបរាជ័យ នោះ​ការគំរាមកំហែងរបស់លោក ត្រាំ ចុង​ក្រោយ មាន​ន័យថា ពន្ធ ១០ ភាគរយ ថ្មី នឹង​ត្រូវបន្ថែមពីលើអត្រាដែលមាន​ស្រាប់ទាំងនោះ ខណៈវៀតណាម ដែល​ប្រកាសកិច្ចព្រមព្រៀងពាណិជ្ជកម្ម​ជាមួយអាមេរិក​កាលពីសប្ដាហ៍មុន រងនូវពន្ធ ២០ ភាគរយ។

នាពេលនេះ បណ្ដាប្រទេសអាស៊ីអាគ្មេយ៍កំពុងប្រញាប់ប្រញាល់សម្រាប់ការចរចាជាមួយរដ្ឋបាល ត្រាំ ដែលទាមទារឱ្យ​ពួកគេផ្ដល់នូវសម្បទានល្អៗសម្រាប់អាមេរិក ជាថ្នូរនឹង​ពន្ធទាប។ ជាថ្នូរនឹង​ពន្ធ ២០ ភាគរយ វៀតណាម​បាន​យល់ព្រមបើកចំហរទីផ្សារសម្រាប់អាមេរិក ខណៈអាមេរិក​អាច​នាំចូល​វៀតណាម​​ដោយ​មិនជាប់ពន្ធ បន្ថែមពីលើលក្ខខណ្ឌផ្សេងៗទៀត រួមទាំងការបង្កើនការនាំចូលទំនិញ​អាមេរិក រឹតត្បឹត «ទំនិញ​ឆ្លងកាត់» (Transshipping goods) វៀតណាម​ និងកាត់​បន្ថយការពឹង​ផ្អែក​លើ​ចិន​​ជាដើម​។

មុនពេល​លោក ត្រាំ គំរាមពីពន្ធ ១០ភាគរយ បន្ថែមថ្មី រដ្ឋមន្រ្តីក្រសួងហិរញ្ញវត្ថុថៃ លោក Pichai Chunhavajira បាន​ថ្លែង​ក្នុងបទសម្ភាសន៍មួយ​ប្រាប់ Bloomberg កាលពីថ្ងៃអាទិត្យ​ថា ថៃបាន​ដាក់សំណើថ្មីទៅអាមេរិក ដែលរួមបញ្ជូលទាំង​ការបើកទីផ្សារឱ្យ​ទំនិញកសិកម្ម និងឧស្សាហកម្មរបស់​អាមេរិក ​បន្ថែមពីលើ​ការបង្កើនការទិញថាមពល និងយន្តហោះ Boeing ។ សំណើទាំងអស់នេះ មាន​គោលបំណងកាត់បន្ថយអតិរេកពាណិជ្ជកម្ម ៤៦ ​ប៊ីលានដុល្លារ​ដែល​ថៃមាន​ជាមួយ​អាមេរិក(កាលពីឆ្នាំមុន​) ឱ្យ​បាន​ ៧០ ភាគរយ ក្នុងរយៈពេល ៥ ឆ្នាំ។ ​

ឥណ្ឌូណេស៊ីដែលជាសមាជិក​ BRICS មួយទៀត ក៏ដាក់សំណើទៅសហរដ្ឋអាមេរិកស្រដៀងគ្នានឹង​ថៃផងដែរ​ ជាពិសេស​លើ​ការបង្កើនការទិញទំនិញ​អាមេរិក​។ បើតាមទីភ្នាក់ងារសារព័ត៌មាន​រ៉យទ័រ​ រដ្ឋមន្ត្រី​សេដ្ឋកិច្ច​ជាន់​ខ្ពស់​ឥណ្ឌូណេស៊ី លោក Airlangga Hartarto ដែល​កំពុង​ចូលរួមកិច្ចប្រជុំកំពូល BRICS នៅប្រេស៊ីល គ្រោងនឹង​ធ្វើដំណើរទៅសហរដ្ឋអាមេរិកថ្ងៃចន្ទនេះ ដើម្បីចរចាបញ្ចុះពន្ធ។

មកទល់ពេលនេះ គេមិនទាន់ឃើញ​មាន​ប្រតិកម្មណាមួយ​ ពាក់ព័ន្ធ​នឹង​​ពន្ធ ១០ ភាគរយ បន្ថែមថ្មី​ ពីសមាជិក BRICS នោះទេ។ ប៉ុន្តែគួរកត់សម្គាល់ថា ប៉ុន្មាន​ម៉ោងមុនការគំរាមកំហែងរបស់លោក ត្រាំ ប្លុក BRICS បាន​ចេញសេចក្ដីថ្លែងការណ៍រួមពីទីក្រុង Rio de Janeiro (ប្រេស៊ីល) ដោយសំដៅលើគោលនយោបាយពន្ធរបស់ ត្រាំ ប៉ុន្តែមិននិយាយឈ្មោះអាមេរិក​ចំៗ យ៉ាងដូច្នេះថា​៖ «​យើងមាន​ក្តីបារម្ភយ៉ាងខ្លាំងចំពោះ​កំណើនវិធានការ​ការពារនិយមជាឯកតោភាគី ដែល​មិនស្របនឹងច្បាប់របស់អង្គការពាណិជ្ជកម្មពិភព​លោក​ (WTO) រួមទាំង​កំណើន​ពន្ធបដិការមិនរើសមុខ​ និងវិធានការ​មិនមែនពន្ធគយ»។

មែនទែនទៅ ប្លុក​ BRICS រួមមាន ប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង អារ៉ាប៊ីសាអូឌីត អេហ្ស៊ីប អារ៉ាប់រួម អេត្យូពី ឥណ្ឌូណេស៊ី និងអ៊ីរ៉ង់។ ប្លុកនេះ​ហៅខ្លួនឯង​ថាជា «វេទិកាសម្របសម្រួលនយោបាយ និងការទូតសម្រាប់ប្រទេសមកពីសកលលោកខាងត្បូង និងសម្រាប់ការសម្របសម្រួល​ចម្រុះ​វិស័យ»។

BRICS មិនហៅខ្លួនឯងថាជាប្លុកប្រឆាំងលោកខាងលិចត្រង់ៗនោះទេ ប៉ុន្តែគេមើលឃើញថា វាជាកំពុងបង្កើន​ឥទ្ធិពលប្រឆាំងអំណាច​របស់​លោកខាងលិច ជាពិសេស​ក្នុង​វិស័យ​ហិរញ្ញវត្ថុ នយោបាយ និង​ការទូត​សកល។ កន្លងមក សមាជិកប្លុកធំៗរួមទាំងចិន បាន​រិះគន់គោលនយោបាយពន្ធគយរបស់លោក ត្រាំ ថាខុសច្បាប់ WTO និងបង្កការខូចខាតដល់ខ្សែច្រវ៉ាក់ផ្គត់ផ្គង់ និងពាណិជ្ជកម្មសកល ដែលនាំទៅរកភាពមិនប្រាកដប្រជានៃសេដ្ឋកិច្ច៕

The post អាស៊ីអាគ្មេយ៍រង​ការគំរាមកំហែងថ្មីពី ត្រាំ: ពន្ធ ១០% បន្ថែម ចំពោះទំនាក់ទំនងជាមួយ​ BRICS appeared first on Kampuchea Thmey Daily.

ថ្លែងនៅឯកិច្ច​ប្រជុំ Brics កាល​ពី​ថ្ងៃ​អាទិត្យ​​ទី​៦​ខែ​កក្កដា​ លោក Araghchi បានពណ៌នាអំពីការវាយប្រហារថាជា«ការវាយប្រហារដ៏សាហាវ» ចំពោះផ្នែកការទូត ដែលបង្ក​ជា​វិបត្តិ​មនុស្សធម៌ដ៏ធំ​ ដោយ​បានបំផ្លាញផ្ទះសម្បែង កន្លែងនុយក្លេអ៊ែរ និងហេដ្ឋារចនាសម្ព័ន្ធសំខាន់ៗ។ លោកបានទទូចថា ការវាយប្រហារបានរំលោភលើសន្ធិសញ្ញាមិនរីកសាយភាយ​នុយក្លេអ៊ែរ និងសេចក្ដី​សម្រេច​​លេខ២២៣១ របស់ក្រុមប្រឹក្សាសន្តិសុខអង្គការសហប្រជាជាតិ ដោយបន្ថែមថា អ៊ីរ៉ង់នឹងមិននៅស្ងៀមឡើយ។

លោក Araghci បាន​សង្កត់​ធ្ងន់​ថា ទាំង​អ៊ីស្រាអែល​ និង​អាមេរិក​មិនមានមូលដ្ឋានផ្លូវច្បាប់ ដើម្បីវាយប្រហារកម្មវិធីនុយក្លេអ៊ែរស៊ីវិល ដោយ​គ្រាន់​តែ​ការសង្ស័យនៃការផលិតអាវុធនោះទេ។

ក្រុម​មេ​ដឹក​នាំ​ BRICS បាន​បង្ហាញ​ពីការ​គាំទ្រ​ចំពោះ​អ៊ីរ៉ង់ ដោយ​ចេញ​សេចក្ដី​ថ្លែងការណ៍​រួម​មួយ​ថា «ពួក​យើងថ្កោលទោសការវាយប្រហារដោយយោធា ប្រឆាំងនឹងសាធារណរដ្ឋអ៊ីស្លាមអ៊ីរ៉ង់ចាប់តាំងពីថ្ងៃទី​១៣​ខែមិថុនា​ឆ្នាំ​២០២៥។ ពួក​យើងបង្ហាញការព្រួយបារម្ភយ៉ាងខ្លាំង ចំពោះការវាយប្រហារដោយចេតនាលើហេដ្ឋារចនាសម្ព័ន្ធស៊ីវិល និងកន្លែងនុយក្លេអ៊ែរដោយសន្តិវិធី»។

បន្ថែម​ពី​នេះ ប្លុក​ទាំង​​១១​​ប្រទេស​នេះ បាន​​បន្ថែម​​ថា ​ការ​វាយ​ប្រហារ​នេះ​គឺ​ជា​ការ​រំលោភ​ច្បាប់​អន្តរជាតិ៕

ដោយ៖ ឈាង

The post អ៊ីរ៉ង់ប្រាប់ BRICS ថា ជនស៊ីវិលជាង ៦ ០០០​នាក់ស្លាប់​និង​របួសក្នុងការវាយប្រហាររបស់អាមេរិក-អ៊ីស្រាអែល appeared first on Kampuchea Thmey Daily.

សេដ្ឋវិទូ លោក Bhima Yudhistira បាន​ប្រាប់​ថ្លែង​ Jakarta Globe ថា ​ឥណ្ឌូណេស៊ីគួរតែព្យាយាមធ្វើការចរចាខ្លះៗជាមួយអាមេរិក ​ទោះបីជាមាន​រយៈពេល​ខ្លីត្រឹមថ្ងៃទី ៩ មេសា ដែល​ពន្ធឆ្លើយតបឱ្យស្មើគ្នាចូលជាធរមាន​ក៏ដោយ​​។

យ៉ាងណា​មិញ សេដ្ឋវិទូរូប​នេះលើកឡើងថា វា​មាន​ឱកាសតិចដែល​សហរដ្ឋអាមេរិក​នឹង​ធ្វើ​ការផ្លាស់ប្ដូរ​សំខាន់ណាមួយ​ ដូច្នេះ «វិធានការបន្ទាប់របស់ឥណ្ឌូណេ​ស៊ី គួរតែពង្រឹងកិច្ចសហប្រតិបត្តិការពាណិជ្ជកម្ម និងវិនិយោគរបស់ខ្លួនជាមួយបណ្តាប្រទេស BRICS» ។ លោក​គូស​បញ្ជាក់ថា៖ «ប្លុក BRICS ​​ពិតជាមានសក្តានុពលចំពេលមានសង្រ្គាមពាណិជ្ជកម្ម ដែល​បង្ក​ឡើងដោយសហរដ្ឋអាមេរិក។ យើងក៏អាចទាក់ទងទៅកាន់មជ្ឈិមបូព៌ា ឬក្រុមប្រឹក្សាសហប្រតិបត្តិការឈូងសមុទ្រ(ឈូងសមុទ្រពែរក្ស​) [GCC] ជាជម្រើសមួយផងដែរ»។

ជុំវិញលទ្ធភាព​ដែល​ថាលោក​ ត្រាំ អាច​បង្កើនពន្ធ​ពេលឥណ្ឌូណេស៊ី​ពង្រឹងទំនាក់ទំនងពាណិជ្ជកម្មជាមួយ BRICS ​លោក​ Bhima បាននិយាយថា វាមិនទំនងជាកើតឡើង​នោះទេ ខណៈ​ពន្ធខ្ពស់នឹងធ្វើឱ្យការនាំចូលទំនិញពី​ BRICS ​​កាន់តែថ្លៃសម្រាប់អ្នកប្រើប្រាស់អាមេរិក។

ដើម​ឡើង BRICS ​ប្រទេស​ជាសមាជិក ៥ រួមមាន​ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ហើយ​ក្រោយមក ​អារ៉ាប់រួម​ អេត្យូពី អេហ្ស៊ីប អ៊ីរ៉ង់ និងឥណ្ឌូណេស៊ី បានចូលរួមជាមួយ​។ កន្លងមក​ លោក ត្រាំ បានរិះគន់ BRICS ហើយថែមទាំងបានគំរាមដាក់ពន្ធ ១០០ ភាគរយ​ លើ​ប្លុកនេះ​ ប្រសិនបើពួកគេព្យាយាម​ឈប់​ប្រើ​ប្រាក់ដុល្លារអាមេរិកជារូបិយប័ណ្ណបម្រុងរបស់ពិភពលោក។

ថ្មីៗ​នេះ ឥណ្ឌូណេស៊ី​បាន ​និង​កំពុង​ខិត​ទៅ​ជិត BRICS។ កាលពីសប្តាហ៍មុន ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ ​បានប្រកាសថា ​ឥណ្ឌូណេស៊ីនឹងចូលរួមជាមួយធនាគារអភិវឌ្ឍន៍ថ្មី (NDB) ដែលគាំទ្រដោយ BRICS ។ ទន្ទឹមនឹងនេះ GCC គឺជា​ប្លុក​សេដ្ឋកិច្ចដាច់ដោយឡែក ដែលរួមមាន បារ៉ែន គុយវ៉ែត អូម៉ង់ កាតា អារ៉ាប៊ីសាអូឌីត និងអារ៉ាប់រួម​។ ​

សេដ្ឋវិទូផ្សេងៗទៀត ក៏​ជំរុញ​ឱ្យ​ឥណ្ឌូណេស៊ីបង្កើន​ទំនាក់ទំនងពាណិជ្ជកម្ម​ជាមួយសមាជិត BRICS ដទៃទៀតផងដែរ។ ​លោក Hans Kwee អ្នកសេដ្ឋកិច្ច និងទីផ្សារមូលធន បាន​និយាយ​ប្រាប់ទីភ្នាក់ងារសារព័ត៌មាន​រដ្ឋ Antara ថា៖ ​«ឥណ្ឌូណេស៊ីត្រូវការពង្រឹងពាណិជ្ជកម្មជាមួយបណ្តាប្រទេស BRICS ដើម្បីស្វែងរកប្រភពចំណូលថ្មី បន្ទាប់ពីការយកពន្ធខ្ពស់​ដោយ​សហរដ្ឋអាមេរិក»។ លោកបានព្រមានថា ពន្ធនាំចូលខ្ពស់ដែលអាមេរិកដាក់លើប្រទេសផ្សេងៗ អាចប៉ះពាល់យ៉ាងធ្ងន់ធ្ងរដល់សេដ្ឋកិច្ច និងទីផ្សារហិរញ្ញវត្ថុរបស់ឥណ្ឌូណេស៊ី។

គួរគូស​បញ្ជាក់ថា ការងាកទៅកាន់ប្លុក BRICS គឺជា​គោលដៅមួយសម្រាប់រដ្ឋាភិបាល​ឥណ្ឌូណេស៊ីក្នុងការ​ធ្វើពិពិធកម្មទីផ្សារនាំចេញ​ ជាជាង​ការពឹង​ផ្អែក​លើទីផ្សារធំតែមួយ ដូចជាសហរដ្ឋអាមេរិក​។ បច្ចុប្បន្ន ឥណ្ឌូណេស៊ី​ក៏​កំពុងពន្លឿន​លើកិច្ចព្រមព្រៀងពាណិជ្ជកម្មសេរីជាមួយ​សហភាពអឺរ៉ុប (EU) ដែល​រង​ពន្ធរបស់ ត្រាំ ប្រមាណ ២០ ភាគរយ ដែរ។ យ៉ាងណាមិញ ខណៈជំរុញការធ្វើពិពិធកម្មដៃគូពាណិជ្ជកម្ម រដ្ឋាភិបាល​ឥណ្ឌូណេស៊ីនៅតែ​ជំរុញ​បន្តការចរចាជាមួយរដ្ឋបាលរបស់ ត្រាំ៕

The post អ្នកជំនាញជំរុញឱ្យឥណ្ឌូណេស៊ីខិតទៅជិត BRICS ក្រោយជាប់ពន្ធ ៣២ ភាគរយ ពីអាមេរិក appeared first on Kampuchea Thmey Daily.

ក្នុងកិច្ចពិភាក្សានោះលោក អ៊ុន ឃាង បាន​លើកឡើងថា បច្ចុប្បន្នក្នុងតំបន់អាស៊ានមានតែប្រទេសឥណ្ឌូនេស៊ីមួយប៉ុណ្ណោះបានចូលជាសមាជិកនៃក្រុមប្រទេស BRICS ដែលមានកត្តាទាក់ទងជាច្រើនដូចជានយោបាយ និងពាណិជ្ជកម្មទ្វេភាគីជាមួយក្រុមប្រទេសទាំងនោះ។ លោកថាពេលដែលមានសមាជិកអាស៊ានចូល BRICS ក៏ជាចំណុចល្អផងដែរដែលអាចនាំប្រយោជន៍ពាណិជ្ជកម្មសម្រាប់តំបន់ ទោះជាយ៉ាងណាសម្រាប់ការពិចារណាចូលជាសមាជិក BRICS របស់កម្ពុជាលោកថាពេលនេះកម្ពុជាកំពុងតាមដានការវិវត្តន៍នៃBRICS ជាមុនសិន។

លោកថា​៖ «ពួកយើងកំពុងកំណត់លើទំហំនៃភាពខ្លាំង និងភាពខ្សោយរបស់(BRICS)នៅពេលនេះ»។

បើតាមលោក អ៊ុន ឃាង ការងើបឡើងរបស់ BRICS គឺជាការវិវត្តន៍ថ្មីនៃប្រព័ន្ធពហុភាគីនិយម និងតុល្យភាពនៃអំណាចរបស់មហាអំណាចក្នុងពិភពលោក។ លោកបន្ថែមថា BRICS ត្រូវបានបង្កើតឡើងក៏ដើម្បីកាត់បន្ថយឥទ្ធិពលនៃលុយដុល្លារផងដែរ។

ថ្លែងក្នុងសិក្ខាសាលាស្ដីពីប្រាក់រៀល និងអបអរខួប៤៥ឆ្នាំនៃការដាក់ចរាចរប្រាក់រៀលឡើងវិញនៅសភាជាតិកម្ពុជាកាលពីថ្ងៃទី២០ ខែមីនា ឆ្នាំ២០២៥ អគ្គទេសាភិបាលនៃធនាគារជាតិកម្ពុជាលោកស្រី ជា សិរី បានលើកឡើងថាអំណាចបង្កកទ្រព្យសម្បត្តិរបស់អាមេរិកគឺជាការបារម្ភរបស់ធនាគារកណ្ដាលរបស់ប្រទេសទាំងអស់នៅទូទាំងពិភពលោក។ ស្របពេលដែលការប្រើប្រាស់ប្រាក់ដុល្លារយ៉ាងទូលំទូលាយនៅកម្ពុជាដូចពេលបច្ចុប្បន្នពិតជានាំឱ្យកម្ពុជាមានភាពងាយរងគ្រោះជាពិសេសក្នុងពេលដែលមានវិបត្តិសេដ្ឋកិច្ច និងហិរញ្ញវត្ថុ និងក្នុងពេលដែលមិនមានភាពប្រាកដប្រជានៃនយោបាយអាមេរិក ព្រមទាំងការបែងចែកភូមិសាស្ត្រនយោបាយជាដើម។

គួរឱ្យដឹងផងដែរថាបន្ទាប់ពីមានជម្លោះសង្គ្រាមរុស្ស៊ី-អ៊ុយក្រែនក្នុងខែកុម្ភៈ ឆ្នាំ២០២២ សហរដ្ឋអាមេរិក និងសម្ព័ន្ធមិត្តបានបង្កកទ្រព្យសម្បត្តិរបស់ធនាគារកណ្ដាលរុស្ស៊ីប្រមាណ ៣០០ពាន់លានដុល្លារ ជាការឆ្លើយតបរុស្ស៊ីក៏ប្រកាសប្រើវិធានការឆ្លើយតបដួចគ្នា ខណៈក្រុមប្រទេស BRICS ដែលដឹកនាំដោយ ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បួង ក៏កំពុងមានវិធានជាបន្តបន្ទាប់ដើម្បីកាត់បន្ថយនូវការប្រើប្រាស់ប្រាក់ដុល្លារក្នុងកិច្ចប្រតិបត្តិការសេដ្ឋកិច្ចរបស់ខ្លួនដែរ៕

អត្ថបទដោយ ហ៊ុន សិរីវឌ្ឍន៍

The post កម្ពុជាមិនទាន់មានចម្លើយពីការចូល BRICS ទេ appeared first on Kampuchea Thmey Daily.