កូរ៉េខាងជើង សាកល្បងមីស៊ីលបញ្ជាទិស ក្នុងន័យត្រៀមខ្លួនប្រយុទ្ធជាមួយសត្រូវពេញទី

ប្រព័ន្ធផ្សព្វផ្សាយរដ្ឋ (KCNA) បានរាយការណ៍នាថ្ងៃចន្ទទី២៩ធ្នូ ថា កូរ៉េខាងជើងបានសាកល្បងមីស៊ីលបញ្ជាទិសយុទ្ធសាស្ត្ររយៈចម្ងាយឆ្ងាយចំនួន២គ្រាប់ ដោយសរសើរសមយុទ្ធនេះថាជាការបង្ហាញ ការត្រៀមខ្លួនប្រយុទ្ធ ប្រឆាំងនឹងការគំរាមកំហែងពីសត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាម yahoo ការបាញ់បង្ហោះនេះគឺជាព្រឹត្តិការណ៍ចុងក្រោយបង្អស់ដែលលោកគីមបានចូលរួម ក៏ជាសកម្មភាពដ៏មមាញឹករបស់មេដឹកនាំកូរ៉េខាងជើង ដើម្បីគូសបញ្ជាក់ពីវឌ្ឍនភាពយោធា និងសេដ្ឋកិច្ចរបស់ប្រទេស មុនពេលសមាជបក្សដ៏សំខាន់មួយ ដែលត្រូវបានគេរំពឹងថានឹងធ្វើឡើងនៅដើមឆ្នាំ២០២៦ ដែលកំណត់ផែនការអភិវឌ្ឍន៍សម្រាប់កូរ៉េខាងជើងនៅរយៈពេល៥ឆ្នាំខាងមុខ។

ទីភ្នាក់ងារសារព័ត៌មានកណ្តាលកូរ៉េរបស់រដ្ឋបាននិយាយថា មេដឹកនាំ គីម ជុងអ៊ុន បានត្រួតពិនិត្យសមយុទ្ធនេះ ដែលធ្វើឡើងកាលពីថ្ងៃអាទិត្យ លើសមុទ្រលឿង នៅភាគខាងលិចនៃឧបទ្វីបកូរ៉េ ហើយបានអំពាវនាវឲ្យមានការអភិវឌ្ឍ គ្មានដែនកំណត់ និងប្រកបដោយចីរភាព នៃកងកម្លាំងអាវុធនុយក្លេអ៊ែររបស់លោក។

ទីភ្នាក់ងារដដែលបាននិយាយទៀតថា គោលដៅនៃសមយុទ្ធនេះគឺដើម្បីពិនិត្យមើល ឥរិយាបថឆ្លើយតបតបវិញ និងសមត្ថភាពប្រយុទ្ធរបស់អង្គភាពរងមីស៊ីលរយៈចម្ងាយឆ្ងាយ។ ជាក់ស្ដែង មីស៊ីលទាំងនោះបានហោះអស់រយៈពេលជាងពីរម៉ោង ដោយចែករំលែករូបថតនៃមីស៊ីលដែលត្រូវបានបាញ់ និងវាយប្រហារចំគោលដៅ។

យ៉ាងណា លោកគីមបានសន្យាថា «ទីក្រុងព្យុងយ៉ាង នឹងលះបង់កិច្ចខិតខំប្រឹងប្រែងទាំងអស់របស់ពួកគេ ចំពោះការអភិវឌ្ឍគ្មានដែនកំណត់ និងប្រកបដោយចីរភាពនៃកងកម្លាំងប្រយុទ្ធនុយក្លេអ៊ែររបស់រដ្ឋ»។

នាពេលកន្លងមក កូរ៉េខាងជើងបានធ្វើការសាកល្បងមីស៊ីលផ្លោងចុងក្រោយនៅដើមខែវិច្ឆិកា ប្រហែលមួយសប្តាហ៍បន្ទាប់ពីប្រធានាធិបតីអាមេរិក ដូណាល់ ត្រាំ ក្នុងដំណើរទស្សនកិច្ចក្នុងតំបន់ដោយសម្តែងចំណាប់អារម្មណ៍ក្នុងការជួបជាមួយលោកគីម។ នៅពេលនោះ ត្រាំទើបតែបានអនុម័តផែនការរបស់កូរ៉េខាងត្បូង ក្នុងការសាងសង់នាវាមុជទឹកដើរដោយថាមពលនុយក្លេអ៊ែរ។

ក្រោយមក លោកគីមចេញការបញ្ចាក់ថា ទីក្រុងព្យុងយ៉ាងបានចាត់ទុកការអភិវឌ្ឍនាវាមុជទឹកដើរដោយថាមពលនុយក្លេអ៊ែររបស់ទីក្រុងសេអ៊ូលជា ទង្វើវាយលុកដែលរំលោភយ៉ាងធ្ងន់ធ្ងរលើសន្តិសុខ និងអធិបតេយ្យភាពដែនសមុទ្ររបស់ខ្លួន។

ប្រព័ន្ធផ្សព្វផ្សាយរដ្ឋកូរ៉េខាងជើងកាលពីសប្តាហ៍មុនក៏បានចេញផ្សាយសេចក្តីថ្លែងការណ៍របស់ក្រសួងការពារជាតិដោយថ្កោលទោសការចតនាវាមុជទឹកវាយប្រហារដើរដោយថាមពលនុយក្លេអ៊ែររបស់កងទ័ពជើងទឹកអាមេរិក USS Greenville នៅទីក្រុងប៊ូសាន ប្រទេសកូរ៉េខាងត្បូងផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកត្រាំ អបអរសាទរ បទឈប់បាញ់រវាង កម្ពុជានិងថៃ