ក្នុងឱកាសបំពេញដំណើរទស្សនកិច្ចនៅទីក្រុងម៉ានីល ប្រទេសហ្វីលីពីន នាព្រឹកថ្ងៃច័ន្ទនេះ G-Devith បានបង្ហាញមោទនភាពដែលបានដើរតួនាទីជាអ្នកជំរុញការផ្លាស់ប្តូរវប្បធម៌ តាមរយៈទំនាក់ទំនង និងតន្ត្រី។ តារាចម្រៀងរូបនេះក៏បានបង្ហាញក្តីរំពឹងថា នឹងបន្តបង្កើតអនុស្សាវរីយ៍ដ៏មានអត្ថន័យ និងមិនអាចបំភ្លេចបានជាមួយអ្នកគាំទ្រ និងដៃគូសហការនៅលើឆាកអន្តរជាតិបន្ថែមទៀត។

គួររំលឹកថា យោងតាមការចុះផ្សាយរបស់ Wazzup ក្រោមចំណងជើង “G-Devith Returns to Manila: Tour Plans, P-Pop & Pinoy Culture” បានឱ្យដឹងថា G-Devith បានចូលរួមសន្និសីទសារព័ត៌មានមួយកាលពីថ្ងៃទី១៨ ខែកក្កដា ឆ្នាំ២០២៦ នៅ Chameleon, LaVie Resort and Casino Manila ដោយចែករំលែកពីចក្ខុវិស័យក្នុងការពង្រីកវត្តមានរបស់ខ្លួននៅប្រទេសហ្វីលីពីន និងពង្រឹងទំនាក់ទំនងជាមួយវិស័យតន្ត្រីរបស់ប្រទេសនេះ។

ក្នុងឱកាសនោះ G-Devith បានសរសើរចំពោះការរីកចម្រើនយ៉ាងឆាប់រហ័សរបស់ P-Pop ហើយបង្ហាញបំណងចង់សហការជាមួយក្រុមសិល្បករល្បីៗរបស់ហ្វីលីពីន ដូចជា SB19, BINI និង HORI7ON ។ ជាពិសេស HORI7ON ដែលធ្លាប់បានឈរលើឆាកជាមួយ G-Devith ក្នុងកម្មវិធី ASEAN-Korea ROUND Festival ។

ក្រៅពីតន្ត្រី តារារូបនេះក៏បានបង្ហាញការចាប់អារម្មណ៍លើវប្បធម៌ហ្វីលីពីន និងម្ហូបប្រពៃណីរបស់ហ្វីលីពីនផងដែរ។ ការបើកចិត្តទទួលយកវប្បធម៌ប្រទេសដទៃនេះ ត្រូវបានមើលឃើញថា ជាការបង្ហាញពីការគោរព និងការចង់ស្គាល់អត្តសញ្ញាណរបស់ប្រទេសជាម្ចាស់ផ្ទះផងដែរ។

G-Devith ក៏បានថ្លែងអំណរគុណចំពោះអ្នកគាំទ្រហ្វីលីពីន ដែលផ្តល់ការគាំទ្រយ៉ាងកក់ក្តៅ និងបង្កើតបរិយាកាសដ៏រំភើបក្នុងពេលការប្រគំតន្ត្រី។ លោកបញ្ជាក់ថា ការរក្សាទំនាក់ទំនងជិតស្និទ្ធជាមួយអ្នកគាំទ្រ មានសារៈសំខាន់មិនចាញ់ការបង្កើតបទចម្រៀងថ្មីឡើយ ហើយលោកក៏ព្យាយាមឆ្លើយតបសាររបស់អ្នកគាំទ្រតាមបណ្ដាញសង្គមនៅពេលមានឱកាស។

ការបង្ហាញវត្តមានរបស់ G-Devith នៅហ្វីលីពីន លើកនេះ មិនត្រឹមតែជាការពង្រីកទីផ្សារតន្ត្រីប៉ុណ្ណោះទេ ប៉ុន្តែថែមទាំងជាស្ពានភ្ជាប់ការផ្លាស់ប្តូរវប្បធម៌រវាងកម្ពុជា និងហ្វីលីពីន តាមរយៈតន្ត្រី ការសម្តែង និងកិច្ចសហការរវាងសិល្បករនៅក្នុងតំបន់អាស៊ីអាគ្នេយ៍ផងដែរ៕

The post G-Devith ទទួលការស្វាគមន៍យ៉ាងកក់ក្តៅ នៅម៉ានីល និងបង្ហាញឆន្ទៈជំរុញការផ្លាស់ប្តូរវប្បធម៌តាមរយៈតន្ត្រី appeared first on Kampuchea Thmey Daily.

តាមរយៈវីដេអូដែលត្រូវបានចែករំលែកដោយគណនីហ្វេសប៊ុករបស់សិល្បករមួយរូប គឺលោក វណ្ណ ណារ៉ា បានបង្ហាញពីបរិយាកាសសម្តែងដ៏ស្និទ្ធស្នាល និងរីករាយរវាងលោក ឆន សុវណ្ណរាជ និង G-Devith ដោយបានច្រៀងបទ «ទីក្រុងគ្មានមេឃ» រួមគ្នាយ៉ាងស៊ីចង្វាក់។

ការសម្តែងនេះ ក៏បានទាក់ទាញការចាប់អារម្មណ៍ផងដែរពីអ្នកគាំទ្រ ព្រោះកម្របានឃើញតារាចម្រៀងទាំងពីរដួងច្រៀងរួមគ្នា ខណៈបទមនោសញ្ចេតនាដ៏ល្បីមួយនេះ ទាមទារការប្រើទឹកដមសំឡេងខុសប្លែកពីស្ទីលរ៉េបដែល G-Devith ធ្លាប់បង្ហាញកន្លងមក។

ក្រោយវីដេអូនេះត្រូវបានផ្សព្វផ្សាយលើបណ្ដាញសង្គម អ្នកគាំទ្រជាច្រើន បានបញ្ចេញមតិកោតសរសើរចំពោះតារាចម្រៀងទាំងពីរ មិនមែនតែការច្រៀង តែក៏ឆ្លុះបញ្ចាំងពីភាពជាធ្លុងរវាងអ្នកសិល្បៈ។

ទោះបីនេះជាសកម្មភាពតូចមួយក្នុងរង្វង់សិល្បៈ រវាងលោក ឆន សុវណ្ណរាជ និង G-Devith ក៏ពិតមែន ប៉ុន្តែក៏បានបង្កើតនូវទស្សនីយភាពថ្មីមួយ សម្រាប់អ្នកគាំទ្រតារាចម្រៀងទាំងពីរដួង ហើយត្រូវបានចែករំលែកលើបណ្ដាញសង្គម រហូតមានអ្នកគាំទ្រខ្លះរំពឹងថា អ្នកទាំងពីរនឹងមានឱកាសសហការគ្នាក្នុងបទចម្រៀងផ្លូវការណាមួយនាពេលអនាគត៕

The post កម្របានឃើញ! G-Devith និង ឆន សុវណ្ណរាជ កាន់មេក្រូច្រៀងបទ «ទីក្រុងគ្មានមេឃ» ជាមួយគ្នា appeared first on Kampuchea Thmey Daily.

ជាច្រើនឆ្នាំលើវិថីសិល្បៈ G-Devith តែងតែបង្ហាញពីភាពច្នៃប្រឌិត និងស្ទីលប្លែកៗ ដែលធ្វើឱ្យអ្នកគាំទ្ររបស់ខ្លួនមិនជិនណាយនោះឡើយ។ ជាក់ស្តែង នៅយប់ថ្ងៃទី០៦ ខែឧសភា ឆ្នាំ២០២៦ យប់មិញនេះ លោកបានបង្ហាញរូបភាព និងវីដេអូខ្លីរបស់ខ្លួនជាបន្តបន្ទាប់ ជាមួយនឹងរូបរាងថ្មីក្នុងការតែងកាយជាមនុស្សស្រី ដែលមើលទៅទន់ភ្លន់ ទាក់ទាញ និងពោរពេញដោយភាពជឿជាក់។

អ្វីដែលធ្វើឱ្យគ្រប់គ្នាភ្ញាក់ផ្អើលមិនតិចនោះ គឺការផ្លាស់ប្តូររូបរាងយ៉ាងល្អឥតខ្ចោះ ដោយចាប់ពីស្ទីលសក់ ការតុបតែងមុខ រហូតដល់ការស្លៀកពាក់ ដែលស្រស់ស្អាតមិនចាញ់នារីពិតៗនោះឡើយ។

មិនត្រឹមតែប៉ុណ្ណោះ អ្នកគាំទ្រជាច្រើនក៏បានចូលមកបញ្ចេញមតិសរសើរ និងចែករំលែកព្រោងព្រាតលើបណ្តាញសង្គម ដោយខ្លះថា “ស្អាតជាងមនុស្សស្រីទៅទៀត” ខណៈភាគច្រើនសុទ្ធតែយល់ស្របថា ការបង្ហាញខ្លួនក្នុងស្ទីលជាមនុស្សស្រីរបស់លោក ទំនងជាក្រោមការបង្គាប់របស់ភរិយាជាទីស្រលាញ់ គឺអ្នកនាង ទេព បូព្រឹក្ស។ តួយ៉ាងមួយរយៈនេះ អ្នកនាង ទេព បូព្រឹក្ស តែងញ៉ោះនឹងស្វាមី បង្គាប់ធ្វើនេះធ្វើនោះមិនឈប់ ហើយហេតុតែ G-Devith ចង់បានម៉ូតូធំក្នុងក្តីស្រមៃថែមទៀត ក៏ត្រូវតាមចិត្តភរិយាគ្រប់យ៉ាងបែបនេះ។

យ៉ាងណាមិញ តាមរយៈការបង្ហាញស្ទីលតុងតែងកាយលើកនេះ មិនត្រឹមតែផ្តល់ភាពភ្ញាក់ផ្អើលដល់អ្នកគាំទ្រខ្លួនប៉ុណ្ណោះទេ ប៉ុន្តែថែមទាំងបញ្ជាក់ថា G-Devith ក៏ជាស្វាមីដ៏ល្អមួយរូបដែលមិនមើលរំលងការឯកភាព ឬពេញចិត្តរបស់ភរិយាខ្លួននោះឡើយ បើទោះបីជាខ្លួនមានសមត្ថភាពរកចំណូលច្រើនកម្រិតណាក៏ដោយ។

ហេតុផលទាំងអស់នេះហើយ ដែលធ្វើឱ្យ G-Devith នៅតែរក្សាបានប្រជាប្រិយភាពខ្ពស់ និងទទួលបានជោគជ័យជាបន្តបន្ទាប់លើវិថីសិល្បៈ៕

The post ផ្ទុះការភ្ញាក់ផ្អើល! G-Devith បង្ហាញស្ទីលថ្មី តុបតែងកាយស្អាតដូចមនុស្សស្រីបេះបិទ appeared first on Kampuchea Thmey Daily.

តាមរយៈស្នាដៃតន្ត្រីជាច្រើន តារាចម្រៀងល្បីឈ្មោះទាំងពីរដួង បានយកធាតុផ្សំនៃសិល្បៈបុរាណ ដូចជា ចង្វាក់ បទភ្លេង និងទស្សនីយភាពសិល្បៈបុរាណ មកបន្សំជាមួយនឹងបច្ចេកទេសផលិតតន្ត្រីបែបថ្មី។ មិនតែប៉ុណ្ណោះ ស្នាដៃនេះ ក៏បានចូលរួមជួយបង្កើនការយល់ដឹងពីវប្បធម៌ខ្មែរ ដល់អ្នកស្តាប់ជំនាន់ថ្មី និងអន្តរជាតិផងដែរ ពិសេសមានការសាទរ និងចាប់អារម្មណ៍យ៉ាងខ្លាំងពីទស្សនិកជន Round Festival 2026 នៅហ្វីលីពីន ។

ឆ្លៀតក្នុងការឱកាសនេះដែរ នាដការរបាំបុរាណ ចាប សុីដាណាល់ ក្នុងនាមជាអ្នកដឹកនាំក្រុមសិល្បៈបុរាណ និងជាអ្នកសម្តែងផ្ទាល់ ក៏បានបង្ហាញមោទនភាពក្នុងការនាំយកសិល្បៈវប្បធម៌ និងជាអត្តសញ្ញាណជាតិ ទៅបង្ហាញលើឆាកព្រឹត្តិការណ៍ប្រគំតន្ត្រីដ៏អស្ចារ្យនេះផងដែរ។

យ៉ាងណាមិញ ជោគជ័យនេះមិនមែនកើតឡើងដោយចៃដន្យឡើយ ប៉ុន្តែជាលទ្ធផលនៃការខិតខំប្រឹងប្រែងយ៉ាងខ្ពស់ ក្នុងការសិក្សាស្រាវជ្រាវ និងការច្នៃប្រឌិតជាបន្តបន្ទាប់។ ជាក់ស្តែង តារាចម្រៀងទាំងពីរដួង បានយកចិត្តទុកដាក់លើគុណភាពស្នាដៃ ទាំងផ្នែកសំឡេង រូបភាព និងអត្ថន័យ ដើម្បីធានាថា ស្នាដៃនីមួយៗអាចឆ្លុះបញ្ចាំងទាំងរសនិយមបែបសម័យ ទន្ទឹមនឹងដួងព្រលឹងនៃវប្បធម៌ជាតិខ្មែរ ក្នុងចំណោមនោះ មានដូចជា៖

ការចងភ្ជាប់តន្ត្រីជាមួយសាវតារខ្មែរ បង្ហាញពីលទ្ធិទេវរាជ និងជាសារដាស់តឿន

១. បទ «ទេវរាជ» ច្រៀងដោយអ្នកនាង ទេព បូព្រឹក្ស ជាស្នាដៃតន្ត្រីបែបទំនើបលាយបញ្ចូលប្រវត្តិសាស្ត្រយ៉ាងល្អឥតខ្ចោះ ក្នុងន័យលើកតម្កើងមោទនភាពជាតិខ្មែរ តាមរយៈការរំលឹកលទ្ធិទេវរាជ ក្នុងរាជ្យព្រះបាទជ័យវរ្ម័នទី២ និងដើមកំណើតអាណាចក្រអង្គរ។ បទនេះក៏ជាសារសំខាន់ក្នុងការដាស់តឿនយុវជនឱ្យស្គាល់ឫសគល់វប្បធម៌ រួបរួមសាមគ្គី និងអភិវឌ្ឍខ្លួនសម្រាប់ជាតិ ខណៈបញ្ចូលស្ទីល Rap ជាមួយភ្លេងបុរាណ បង្កើតភាពទាក់ទាញ និងសម្គាល់អត្តសញ្ញាណខ្មែរយ៉ាងច្បាស់។

២. យុទ្ធសង្គ្រាម “War Of Warriors” វណ្ណកម្មចម្រៀងថ្មីនេះ គឺធ្វើឡើងស្របពេលនៃការឈ្លានពានរបស់ពូជចោរប្រវត្តិសាស្ត្រ ថៃ រំលោភលើដែនអធិបតេយ្យកម្ពុជា ដោយយកបរិបទប្រវត្តិសាស្ត្រមកបកស្រាយជាសំឡេងតន្ត្រី ហើយពណ៌នាយ៉ាងសុីជម្រៅនៃសាវតាឈ្លានពានរបស់ជាតិសាសន៍នេះ លើដែនកម្ពុជាដ៏ល្អផូរផង់។

៤. ចតុរង្គគុនខ្មែរ ជាបទចម្រៀងបែប Epic/Hip-hop ដែលលើកតម្កើងសិល្បៈ គុនខ្មែរ ឱ្យឃើញនូវភាពអង់អាច ខ្លាំងក្លា និងអត្តសញ្ញាណជាតិយ៉ាងច្បាស់។ សារសំខាន់នៃបទនេះ គឺបង្ហាញពីយុទ្ធគុនខ្មែរដែលមានតឹកតាងយ៉ាងច្បាស់លាស់ពីសម័យដូនតាខ្មែរដ៏រុងរឿង តាមរយៈនិមិត្តរូប “ស្តេចគ្រុឌ” និងដៃរុំអំបោះឆៅ ដែលតំណាងឱ្យភាពស៊ូទ្រាំ និងភាពរឹងមាំ។ បទនេះក៏មានគោលបំណងលើកកម្ពស់គុនខ្មែរ និងវប្បធម៌ជាតិឱ្យឈានដល់ឆាកអន្តរជាតិផងដែរ។

៤. មហានគរ (यशोधरपुर Yaśōdharapura) ជាបទចម្រៀងដែលផ្ទុះការចាប់អារម្មណ៍ខ្លាំងបំផុតក្នុងចំណោមបទចម្រៀងរសនិយមបែបវប្បធម៌របស់ G-Devith រហូតមានការជជែកវែកញែកពីតថភាពប្រវត្តិសាស្ត្រពិត នៃសម័យដ៏រុងរឿងរបស់ជាតិ។ ចំណែកឯអត្ថន័យវិញ ក៏មិនសូវជាមានគោលបំណងខុសពីបទខាងលើដែរ គឺក្នុងន័យផ្សព្វផ្សាយ និងលើកស្ទួយតម្លៃអត្តសញ្ញាណជាតិ។

៥. វីរនារី
តាមរយៈចម្រៀងមួយបទនេះ គឺមានការរួមបញ្ចូលដោយទ្សនីយភាពសិល្បៈបុរាណខ្មែរផងដែរ ដោយមានការរួមសម្តែងដោយក្រុមនាដការរបាំបុរាណ រួមមាននាដការរបាំ ចាប ស៊ីដាណាល់ (CHAB SYDANAL), លាវ ច័ន្ទលិកា (LEAV CHANLYKA), ឌួង សុខជា (DOUNG SOKCHEA), ពឿន ប្រុសពៅ (POEUN BROSPOV), ចេក សាំងថន (CHEK SANGTHORN), ជួន ភារ៉ា (CHOUN PHEARA), ចំរើន វីដ (CHAMROEUN VIT), ចាប ស៊ីដាណែល (CHAB SYDANEL), ពឿន ថារី (POEUN THARY), នក អ៊ែនីវ័ន្ត (NORK AIRNYVONE) ។

ដោយឡែក នៅមានចម្រៀង ២បទទៀត ដែលជាការរួមបញ្ចូលគ្នាមួយបែប ក្នុងន័យជំរុញផ្សាព្វផ្សាយ និងលើកតម្លៃវប្បធម៌ជាតិ គឺ Goblin និង Speechless ។

Speechless ដ្បិតជាចម្រៀងដែលពណ៌នាពីដំណើរជីវិតរបស់តារាចម្រៀងរូបនេះក៏ពិតមែន ប៉ុន្តែចំពោះអត្ថន័យនៃបទចម្រៀងនេះវិញ G-Devith បានពាំនាំនូវសារដ៏សំខាន់ ២ ទៅកាន់យុវជនខ្មែរ គឺកំហុសក្មេងខ្ចីដែលយល់ខុសថាការសិក្សាគ្មានតម្លៃ និងមួយទៀត គឺដាស់តឿនយុវជនខ្មែរ ត្រូវស្គាល់តម្លៃអត្តសញ្ញាណជាតិ ហើយធ្វើអ្វីដែលគួរគប្បីសម្រាប់ទាំងខ្លួនឯង និងសង្គមជាតិ។

ក្រៅពីវណ្ណកម្មចម្រៀង តារាចម្រៀងប្រុសស្រីទាំង ២ដួងនេះ ក៏តែងនាំយកអត្តសញ្ញាណវប្បធម៌ជាតិ ទៅបង្ហាញឆាកព្រឹត្តិការណ៍ជាតិ-អន្តរជាតិនានាផងដែរ។

វណ្ណកម្មតន្ត្រីរបស់សិល្បករទាំងពីរនេះ បានបង្ហាញថា តន្ត្រីមិនមែនត្រឹមជាការកម្សាន្តទេ ប៉ុន្តែជាមធ្យោបាយដ៏មានអានុភាពក្នុងការផ្សព្វផ្សាយវប្បធម៌ ប្រវត្តិសាស្ត្រ និងការបង្កើនស្មារតីស្នេហាជាតិ។ ការច្នៃប្រឌិតរវាងអតីតកាល និងបច្ចុប្បន្ន បានធ្វើឱ្យស្នាដៃរបស់អ្នកទាំងពីរក្លាយជាគំរូសំខាន់សម្រាប់វិស័យតន្ត្រីខ្មែរ នៅសម័យទំនើប៕

The post លទ្ធផលមិនក្បត់ការខំប្រឹង! G-Devith និង ទេព បូព្រឹក្ស មានស្នាដៃជំរុញតម្លៃវប្បធម៌ជាតិ ឱ្យរស់រវើកលើឆាកតន្ត្រីសម័យ appeared first on Kampuchea Thmey Daily.

ក្រោយចាប់ដៃគ្នាធ្វើឱ្យកក្រើកឆាកតន្ត្រី ក្នុងព្រឹត្តិការណ៍តន្ត្រីអន្តរជាតិដ៏ធំ ASEAN⋅Korea Music Festival 2026 ROUND តារាចម្រៀង ទេព បូព្រឹក្ស បានបង្ហើបពីគម្រោងដ៏ជាក់លាក់មួយ ក្នុងការនាំយកស្បៃ និងឧបករណ៍ភ្លេងបុរាណខ្មែរ បង្ហាញលើឆាកអន្តរជាតិ។

គម្រោងនៃការរួមបញ្ចូលគ្នារវាងតន្ត្រីសម័យ និងសិល្បៈបុរាណនេះ ត្រូវបានគេមើលឃើញថា ជាវិធីសាស្ត្រដ៏វិសេសវិសាលមួយ ក្នុងការបង្កើតភាពខុសប្លែក និងបន្ថែមតម្លៃសិល្បៈខ្មែរ នៅក្នុងបរិបទសកលភាវូបនីយកម្មវប្បធម៌។

លើសពីនេះ សារដែលតារាចម្រៀងបានចែករំលែកថា “see you soon again Philippines” បង្ហាញពីការចង់ត្រឡបប់ទៅជួបអ្នកគាំទ្រនៅ Philippines ម្តងទៀត ជាមួយការសម្ដែងដែលមានការរៀបចំកាន់តែអស្ចារ្យជាងមុន។ តួយ៉ាង នេះក៏បញ្ជាក់ពីភាពប្រសើរនៃទំនាក់ទំនងវប្បធម៌ និងការទទួលស្គាល់សិល្បៈខ្មែរ ក្នុងចំណោមទស្សនិកជនអន្តរជាតិផងដែរ។

គួរបញ្ជាក់ថា ASEAN-Korea Music Festival ROUND គឺជាវេទិកាតន្ត្រីអន្តរជាតិដ៏ធំមួយ ដែលប្រមូលផ្តុំសិល្បករពីបណ្តាប្រទេសអាស៊ាន និងកូរ៉េខាងត្បូង ដើម្បីបង្ហាញស្នាដៃ និងជំរុញការផ្លាស់ប្តូរវប្បធម៌។ ការចូលរួមរបស់សិល្បករខ្មែរក្នុងព្រឹត្តិការណ៍នេះ ត្រូវបានវាយតម្លៃថា ជាជំហានសំខាន់មួយក្នុងការពង្រីកសក្តានុពលសិល្បៈជាតិ និងការបង្ហាញអត្តសញ្ញាណខ្មែរ ទៅកាន់ឆាកពិភពលោក។

ជារួម ការត្រៀមបញ្ចូលស្បៃ និងភ្លេងបុរាណក្នុងការសម្ដែងបន្ទាប់ មិនត្រឹមតែបង្ហាញពីភាពច្នៃប្រឌិត និងទេពកោសល្យសិល្បៈរបស់តារាចម្រៀងប្រុសស្រីទាំង ២ដួងទេ ប៉ុន្តែថែមទាំងជាការបញ្ជាក់ពីការប្តេជ្ញាចិត្ត ក្នុងការលើកកម្ពស់ និងអភិរក្សវប្បធម៌ខ្មែរ ឱ្យបន្តរស់រវើក និងទទួលស្គាល់នៅលើឆាកអន្តរជាតិ ខណៈជាសកម្មភាពដែលអ្នកទាំងពីរតែងប្រឹងលើកស្ទួយ និងតម្កល់តម្លៃវប្បធម៌ជាតិកន្លងមក៕

The post ទេព បូព្រឹក្ស គ្រោងបង្ហាញអត្តសញ្ញាណខ្មែរលើឆាកអន្តរជាតិម្ដងទៀត តាមរយៈ «ស្បៃ» និង «ឧបករណ៍ភ្លេងបុរាណ» appeared first on Kampuchea Thmey Daily.

តាមរយៈសារពីទំព័រហ្វេសប៊ុកផ្លូវការរបស់អ្នកអង្គម្ចាស់ក្សត្រិយ៍ បានបង្ហាញការកោតសរសើរចំពោះសមត្ថភាព និងការបង្ហាញខ្លួនដ៏អស្ចារ្យរបស់សិល្បករទាំងពីរ ដែលមិនត្រឹមតែបង្ហាញសមត្ថភាពផ្នែកតន្ត្រីប៉ុណ្ណោះទេ ប៉ុន្តែថែមទាំងបាននាំយកអត្តសញ្ញាណ និងព្រលឹងវប្បធម៌ខ្មែរដ៏ល្អផូរផង់ ទៅបង្ហាញលើឆាកអន្តរជាតិទៀតផង។

អ្នកអង្គម្ចាស់ក្សត្រិយ៍ គូសបញ្ជាក់ថា ការសម្ដែងរបស់ G-Devith និង ទេព បូព្រឹក្ស គឺជាគំរូដ៏ល្អសម្រាប់សិល្បករខ្មែររួមទាំងជំនាន់ក្រោយ ក្នុងការប្រើប្រាស់សិល្បៈជាមធ្យោបាយផ្សព្វផ្សាយវប្បធម៌ជាតិទៅកាន់ពិភពលោក។ ជាពិសេស ការរចនាសម្លៀកបំពាក់ និងរចនាបថលើឆាកដែលបញ្ចូលធាតុនៃវប្បធម៌ខ្មែរ បានធ្វើឱ្យការសម្ដែងមានភាពប្លែក និងមានអត្តសញ្ញាណច្បាស់លាស់។

បន្ថែមពីនេះ អ្នកអង្គម្ចាស់ក្សត្រិយ៍ ក៏បានបង្ហាញក្តីសង្ឃឹមថា សិល្បករទាំងពីរនឹងទទួលបានឱកាសកាន់តែច្រើនបន្ថែមទៀត ក្នុងការចូលរួមលើឆាកអន្តរជាតិ និងបន្តជាអ្នកតំណាងដ៏មានតម្លៃក្នុងការផ្សព្វផ្សាយវប្បធម៌ និងសិល្បៈខ្មែរ។

គួរបញ្ជាក់ថា ព្រឹត្តិការណ៍ ASEAN⋅Korea Music Festival 2026 ROUND in Philippines គឺជាវេទិកាតន្ត្រីអន្តរជាតិដ៏សំខាន់មួយ ដែលប្រមូលផ្តុំសិល្បករពីបណ្តាប្រទេសអាស៊ាន និងកូរ៉េខាងត្បូង ដើម្បីបង្ហាញស្នាដៃ និងបង្កើនការផ្លាស់ប្តូរវប្បធម៌រវាងប្រទេសនានា។ ការចូលរួមរបស់សិល្បករខ្មែរ ក្នុងព្រឹត្តិការណ៍នេះ ត្រូវបានចាត់ទុកថា ជាជំហានសំខាន់មួយទៀត ក្នុងការលើកកម្ពស់ភាពមានសមត្ថភាព និងអត្តសញ្ញាណសិល្បៈខ្មែរលើឆាកអន្តរជាតិ៕

The post អ្នកអង្គម្ចាស់ក្សត្រិយ៍ នរោត្តម ចេណ្ណា មានមោទកភាព ដែលតារាខ្មែរ ២ដួង នាំយកដួងព្រលឹងវប្បធម៌ជាតិ បង្ហាញលើឆាកអន្តរជាតិ appeared first on Kampuchea Thmey Daily.

ក្នុងការសម្តែងលើកនេះ ទេព បូព្រឹក្ស បញ្ជាក់ថា ណងប្រាថ្នាដ៏ធំមួយរបស់ខ្លួន គឺនៅពេលមានឱកាសសម្តែងនៅក្រៅប្រទេស មិនថាទីណាក៏ដោយ គឺតែងតែចង់នាំយកសិល្បៈវប្បធម៌បុរាណខ្មែរទៅបង្ហាញជាមួយខ្លួនជានិច្ច។ ដោយហេតុនេះហើយ ទើបតារាចម្រៀងរូបនេះ បាននាំយកទស្សនីយភាពវប្បធម៌ខ្មែរ ទាំងបែបបុរាណ និងសម័យ ទៅបង្ហាញលើឆាកអន្តរជាតិ ក្នុងន័យឱ្យអន្តរជាតិបានស្គាល់ពីកម្ពុជាកាន់តែទូលំទូលាយ។

ជាមួយគ្នានេះដែរ តារាចម្រៀងរូបនេះក៏បានលើកឡើងថា ទោះបីមានមតិយោបល់ផ្សេងៗពីសាធារណៈ មិនថាពេញចិត្ត ឬមិនពេញចិត្តក្តី អ្វីដែលខ្លួនធ្វើ គឺធ្វើចេញពីចិត្ត និងសេចក្តីស្មោះត្រង់។ ហេតុនេះ អ្នកនាងអំពាវនាវឱ្យប្រជាជនខ្មែរ មានការយោគយល់ និងដាក់រឿងផ្ទាល់ខ្លួនមួយឡែកសិន ដ្បិតអីជាជាតិខ្មែរដែលមានឈាមដូចគ្នា ដូច្នេះគួរតែរួមគ្នាលើកស្ទួយវប្បធម៌ជាតិឱ្យឈានទៅមុខលើឆាកអន្តរជាតិ។

ការចូលរួមរបស់សិល្បករទាំងពីរនេះ ត្រូវបានគេរំពឹងដែរថា នឹងជួយបង្កើនការចាប់អារម្មណ៍លើសិល្បៈខ្មែរ និងបង្ហាញសមត្ថភាពសិល្បករខ្មែរ ទៅកាន់ទស្សនិកជនអន្តរជាតិយ៉ាងទូលំទូលាយ៕

The post ទេព បូព្រឹក្ស នាំអត្តសញ្ញាណវប្បធម៌ខ្មែរ ទៅបង្ហាញលើឆាក KBS ROUND Festival នៅហ្វីលីពីន appeared first on Kampuchea Thmey Daily.

ការវិវត្តន៍របស់តារាចម្រៀងរូបនេះ មិនមែនកើតឡើងដោយចៃដន្យនោះទេ ប៉ុន្តែជាលទ្ធផលនៃការខិតខំប្រឹងប្រែង និងការអភិវឌ្ឍខ្លួនជាបន្តបន្ទាប់ ទាំងផ្នែកស្ទីលតន្ត្រី និងគំនិតច្នៃប្រឌិត។ ពិសេស គឺការផ្លាស់ប្តូរទស្សនៈពីសាធារណជន ពីរូបភាព “ស្ដេចត្រាញ់នៃចង្វាក់បែកស្លុយ” មកជា “ស្ដេចត្រាញ់នៃចង្វាក់រីករាយ” ដែលបង្ហាញយ៉ាងច្បាស់ពីការលូតលាស់ផ្នែកសិល្បៈ និងការក្លាយខ្លួនជាសិល្បករដែលមានប្រជាប្រិយភាព អាចទាក់ទាញអ្នកស្តាប់។

សាធារណជនដែលជាអ្នកគាំទ្រតារាចម្រៀងរូបនេះ មើលឃើញថា សម្រាប់ ងួន ចាន់ដេវីដ ពាក្យសរសើរបែបនេះ មិនត្រឹមតែជាកិត្តិយសផ្ទាល់សម្រាប់លោកប៉ុណ្ណោះទេ ប៉ុន្តែជឿថា នេះនឹងកាន់តែក្លាយជាកម្លាំងចិត្តដ៏ធំមួយទៀត ដែលជំរុញលោកបន្តបង្កើតស្នាដៃថ្មីៗ និងអភិវឌ្ឍខ្លួនឯងឱ្យកាន់តែប្រសើរឡើងក្នុងវិថីសិល្បៈ។

ជាក់ស្តែង ក្នុងរយៈពេលចុងក្រោយនេះ ងួន ចាន់ដេវីដ បានបង្ហាញភាពសកម្មយ៉ាងខ្លាំងក្នុងការផលិតបទចម្រៀងថ្មីៗ ដែលមិនត្រឹមតែមានចង្វាក់ទាក់ទាញប៉ុណ្ណោះទេ ប៉ុន្តែថែមទាំងបន្ថែមអត្ថន័យជ្រាលជ្រៅ និងការច្នៃប្រឌិតបែបថ្មីៗ ដែលធ្វើឱ្យស្នាដៃរបស់លោកកាន់តែមានតម្លៃ និងទទួលបានការគាំទ្រយ៉ាងទូលំទូលាយពីមហាជន។

គួររំលឹកថា G-Devith ជាសិល្បករម្នាក់ដែលលេចធ្លោគួរឱ្យកត់សម្គាល់ក្នុងវិស័យតន្ត្រីសម័យ តាមរយៈស្ទីលចម្រៀងប្លែក និងការប្រើពាក្យភាសាដែលមានភាពច្នៃប្រឌិតខ្ពស់ ដោយមានបទខ្លះបញ្ចូលមាតិកាអំពីវប្បធម៌ និងប្រវត្តិសាស្ត្រខ្មែរ ដែលធ្វើឱ្យស្នាដៃមានភាពប្លែក និងមានតម្លៃសិល្បៈខ្ពស់។ ខណៈនេះ ក៏ស្ថិតក្នុងឆន្ទៈ និងការប្តេជ្ញាជំរុញផ្សព្វផ្សាយអត្តសញ្ញាណជាតិឱ្យកាន់តែទូលំទូលាយ តាមរយៈតន្ត្រីសម័យផងដែរ។

តួយ៉ាងក្នុងដំណើរអាជីពរយៈពេលជាងមួយទសវត្សរ៍លោក ងួន ចាន់ដេវីដ បានបញ្ចេញបទចម្រៀងជាច្រើនដែលទទួលបានការគាំទ្រខ្លាំងពីមហាជន ជាពិសេសក្រុមយុវវ័យ។ ឯបទរបស់លោកមួយចំនួន នៅតែមានប្រជាប្រិយ និងទទួលបានចំនួនអ្នកទស្សនាច្រើនលើវេទិកាឌីជីថល។

មិនត្រឹមតែយកបាននូវប្រជាប្រិយភាពប៉ុណ្ណោះទេ ងួន ចាន់ដេវីដ ក៏ត្រូវបានគេចាត់ទុកថាជាសិល្បករដែលមានការអភិវឌ្ឍជាបន្តបន្ទាប់ ដែលផ្តោតលើការកម្សាន្ត និងការច្នៃប្រឌិតក្នុងស្នាដៃរបស់ខ្លួន។

បន្ថែមពីនេះ ងួន ចាន់ដេវីដ ក៏ជាសិល្បករម្នាក់ដែលមានឥទ្ធិពលខ្លាំងក្នុងស្រទាប់យុវវ័យ ដោយសារស្ទីលតន្ត្រី ទំនាក់ទំនងជាមួយអ្នកគាំទ្រ និងភាពសកម្មលើបណ្ដាញសង្គម។ សមិទ្ធផលទាំងនេះបានធ្វើឱ្យលោកក្លាយជាតារារ៉េបមួយរូបដែលមានឈ្មោះលេចធ្លោ និងឈរជើងបានយ៉ាងរឹងមាំនៅលើវិថីសិល្បៈខ្មែររហូតមកដល់សព្វថ្ងៃ៕ ដោយ៖ ចាន់រ៉ា | rewrite: Sotheavy

The post មោទនភាពឪពុក! ក្រោយឭគេប្តូររហ័សនាម G-Devith ពី “បែកស្លុយ” ទៅជា “ស្ដេចត្រាញ់នៃចង្វាក់រីករាយ” appeared first on Kampuchea Thmey Daily.